#World_Health
Published 21 August 2023
အလုပ်ရှုပ်နေပြီး အားကစားခန်းမ၊ လေ့ကျင့်ခန်းများပြုလုပ်ဖို့ ငွေကြေးအဆင်မပြေသူတွေမှာ နေ့စဉ်ဘဝတက်ကြွလှုပ်ရှားဖို့ရာ ခက်ခဲနေတတ်ပါတယ်။
တကယ်တော့ ကျန်းမာသန်စွမ်းဖို့အတွက် ဘယ်လိုအရွယ်မှာမဆို လုပ်ဆောင်နိုင်တယ်လို့ အချို့တွေက ဖော်ပြနေကြပါတယ်။
ဂျပန်နိုင်ငံမှ အသက် ၂၀ မှ ၆၀ အတွင်း လူတဝက်ကျော်လောက်ဟာ အနည်းဆုံးတော့ လေ့ကျင့်ခန်းလုပ်ဖြစ်ကြတယ်လို့ ဂျပန်သုတေသနအဖွဲ့အစည်းက စစ်တမ်းကောက်ယူ ရရှိခဲ့ပါတယ်။
ဂျပန်လူမျိုးတွေဟာ နေ့စဉ် ပျမ်းမျှခြေလှမ်း ၆,၅၀၀ ခန့်လျှောက်လှမ်းကြကြောင်း လေ့လာတွေ့ရှိခဲ့ကာ ဒါဟာ တစ်ကမ္ဘာလုံးရဲ့ပျမ်းမျှခြေလှမ်းထက် သိသိသာသာ ပိုများနေပါတယ်။
လမ်းလျှောက်ခြင်းဖြင့် အသည်းအသန် နာမကျန်းဖြစ်ခြင်းနဲ့ အသက်အန္တရာယ်တို့ကို သိသိသာသာ လျှော့ချနိုင်ပါတယ်။
လမ်းလျှောက်ခြင်းဟာ ဘယ်သူမဆို အလျဉ်းသင့်သလို လုပ်ဆောင်နိုင်ပြီး အလုပ်အားချိန်မှာ သီချင်းသံစဉ်၊ မိတ်ဆွေ၊ သဘာဝရှုခင်းများဖြင့် တွဲဖက်လျှောက်လှမ်းနိုင်ပါတယ်။
ခပ်ဆတ်ဆတ်လမ်းလျှောက်ခြင်း၊ ခပ်ဖွဖွပြေးခြင်း၊ စက်ဘီးစီးခြင်း၊ ရေကူးခြင်းတို့ကို ပုံမှန်ပြုလုပ်ခြင်းဖြင့် ကျန်းမာရေးတိုးတက်မှုများ ရရှိစေနိုင်ပါတယ်။
လေ့ကျင့်ခန်း လုပ်သည်ဖြစ်စေ မလုပ်သည်ဖြစ်စေ အသက် ၃၀ ကျော်လာတာနဲ့အမျှ ကြွက်သားထုထည် ဆုံးရှုံးမှု ၈ ရာခိုင်နှုန်း ရှိလာတာကို စိတ်ထဲမှတ်ထားရပါမယ်။
အသက် ၆၀ ကျော်တဲ့အခါ ပိုမိုသိသာလာပြီး ဒဏ်ရာများ၊ အရိုးကွဲအက်ခြင်း၊ နာတာရှည်နာကျင်ကိုက်ခဲခြင်းတို့ ဖြစ်လာစေနိုင်ပါတယ်။
ဘယ်လိုပဲဖြစ်ဖြစ် လေ့ကျင့်ခန်းကို ပုံမှန်ပြုလုပ်သူတွေကတော့ ကြွက်သားဆုံးရှုံးမှု သက်သာစေနိုင်မှာဖြစ်ပါတယ်။
ဒိုက်ထိုးခြင်း၊ အိပ်ထမတင်လုပ်ခြင်းတို့ဖြင့် အသက် ၆၀ ကျော်အရွယ်တွေမှာ ၁၀ လအတွင်း ကြွက်သားထုထည် ၁၅ ရာခိုင်နှုန်း တိုးတက်စေနိုင်ပါတယ်။
အဆစ်အမြစ်များ လှုပ်ရှားမှုအားကောင်းစေခြင်း၊ ကြွက်သားသန်မာခြင်းတို့ကို ပေးစွမ်းနိုင်မှာဖြစ်ပါတယ်။
တက်ကြွစွာ လှုပ်ရှားနေထိုင်ခြင်းဖြင့် ရုပ်ပိုင်းဆိုင်ရာ ကျန်းမာရေးသာမက စိတ်ဖိစီးမှုနဲ့ ပူပန်သောက လျော့ကျစေခြင်း၊ ကောင်းစွာအိပ်စက်နိုင်ခြင်း၊ ခွန်အားတိုးများခြင်းတို့လည်း ရရှိစေမှာဖြစ်ပါတယ်။
#World_Health #ဂျပန်လူမျိုး #သက်ရှည်ကျန်းမာအောင်
#Source: The Jerusalem Post
- Category: World
- Hits: 110
လာမယ့် ဩဂုတ် ၂၂ ရက် အင်္ဂါနေ့မှာ အနောက်အုပ်စုကစောင့်ကြည့်နေတဲ့ BRICS ထိပ်သီးအစည်းအဝေးကို တောင်အာဖရိကနိုင်ငံမှာ ကျင်းပတော့မှာဖြစ်ပါတယ်။
BRICS အစည်းအဝေးက ဘာတွေထူးထူးခြားခြားဖြစ်လာမလဲ။
ဒေါ်လာကြီးစိုးမင်းမူမှုလျှော့ချရေးနှင့် BRICS ငွေကြေးက ဘယ်လောက်အထိ တိုးတက်လာမလဲ။
BRICS အင်အား ဘယ်လောက်ကြီးထွားလာမလဲ။
မြန်မာနိုင်ငံ မဟာဗျူဟာနှင့် နိုင်ငံတကာလေ့လာရေးအဖွဲ့ MISIS ရဲ့တွဲဖက်အတွင်းရေးမှူး နိုင်ငံရေးလေ့လာသူ ဦးခင်မောင်ဇော်က သူ့အမြင်ကိုပြောပြထားပါတယ်။
- Category: Myanmar
- Hits: 182
၂၀ ဩဂုတ် ၂၀၂၃
အီရန်အာဏာပိုင်တွေဟာ ခွေးတစ်ကောင်ကို အိမ်ခန်းရောင်းချပေးလိုက်တဲ့ ဗွီဒီယိုတစ်ခု အွန်လိုင်းပေါ် ပျံ့နှံ့သွားပြီးတဲ့နောက် အိမ်ခြံမြေအကျိုးဆောင် လုပ်ငန်းအကြီးအကဲကို ဖမ်းဆီးအရေးယူလိုက်ပါတယ်။ အီရန် လင်မယားက သူတို့ရဲ့ အချစ်တော်ခွေးကလေး ချက်စတာ ကို အိမ်ခန်း လွှဲပေးလိုက်တာ ရိုက်ထားတဲ့ အဲဒီဗွီဒီယိုဟာ အွန်လိုင်းပေါ်မှာ အတော်လူကြိုက်များသွားပါတယ်။
အငြင်းအခုံတွေထဖြစ်စေခဲ့တဲ့ အဲဒီဗွီဒီယိုထဲမှာ လင်မယားတစ်တွဲဟာ သူတို့ရဲ့ အိမ်ခန်းကို သူတို့ရဲ့အချစ်တော် ခွေးဖြူကလေး ချက်စတာထံ တရားဝင်လွှဲပြောင်းပေးတဲ့ ကန်ထရိုက်စာချုပ်လက်မှတ်ရေးထိုးနေတာကို တွေ့မြင်ရပါတယ်။
အဲဒီစာချုပ်ကို ချက်စတာရဲ့ ခြေသည်းရာကို အမျိုးသမီးတစ်ဦးအကူအညီနှင့် မှင်ခံပြားအသုံးပြု ရယူပြီး လက်မှတ်သဖွယ်သုံးခဲ့တာဖြစ်ပါတယ်။ သူတို့မှာ အမွေဆက်ခံမည့်သူမရှိတဲ့အတွက် သူတို့ရဲ့အိမ်ကို သူတို့ချစ်တဲ့ ခွေးကလေးကို ရောင်းချပေးဖို့ အစဉ်အလာမဟုတ်တဲ့ ဆုံးဖြတ်ချက်ကိုချလိုက်ရတာလို့ အဆိုပါစုံတွဲက ရှင်းပြပါတယ်။
အီရန်မှာ ခွေးတွေအိမ်ပိုင်ဆိုင်မှုကို တားမြစ်တဲ့ သီးခြားဥပဒေရယ်လို့မရှိသေးပေမယ့် ခွေးရဲသဘောသဘာဝအရနှင့် ရှေးရိုးစွဲ ဘာသာရေးဆရာတွေရဲ့ ဩဇာလွှမ်းမိုးမှုကြောင့် အဲဒီလိုမျိုးဆောင်ရွက်တာကို မကောင်းတဲ့အလုပ်လို့ မြင်ထားပါတယ်။ မူစလင်နိုင်ငံတော်တော်များများမှာ ခွေးတွေကို မသန့်ရှင်းတဲ့ သတ္တဝါလို့သတ်မှတ်လေ့ရှိကြပါတယ်။ အဲဒီအထဲမှာ အီရန်နိုင်ငံလည်းပါဝင်ပါတယ်။
ဩဂုတ်လ ၂၀ ရက် တနင်္ဂနွေနေ့မှာ အီရန်ရဲတွေဟာ အဲဒီ့ပျံ့နှံ့နေတဲ့ဗွီဒီယိုအတွက် စုံစမ်းမှုတွေစတင်လုပ်ခဲ့ပါတယ်။ အဲသလိုအရောင်းလုပ်ဆောင်ရာမှာ အိမ်ခြံမြေအကျိုးဆောင်အကြီးအကဲတစ်ဦးပါဝင်နေတယ်လို့ ဖော်ထုတ်သိရှိရလို့ သူ့ကိုဖမ်းဆီးခဲ့တာဖြစ်ပါတယ်။အဲဒီကုမ္ပဏီကိုလည်း ယာယီလုပ်ငန်းပိတ်သိမ်းထားပါတယ်။ ဒီလိုရောင်းချတာမျိုးဟာ လူ့အဖွဲ့အစည်းရဲ့ စာရိတ္တတန်ဖိုးတွေနှင့်ဆန့်ကျင်ပြီး ဥပဒေနှင့်လည်း ကင်းလွတ်နေတယ်လို့ ဒုတိယတရားစွဲအရာရှိချုပ် ရီဇာတာဘာက ပြောပါတယ်။
ဓလေ့ထုံးတမ်းအရမည်သို့ပင်ရှိစေကာမူ အီရန်နိုင်ငံမှာ အိမ်မွေးတိရိစ္ဆာန် အထူးသဖြင့် ခွေးနှင့်ကြောင် ပိုင်ရှင်တွေဟာ တိုးပွားလာနေပါတယ်။အထူးသဖြင့် လူလတ်တန်းစားနှင့် အထက်တန်းစားများအကြားမှာဖြစ်ပါတယ်။
Source WION
- Category: World
- Hits: 247
၂၀ ဩဂုတ် ၂၀၂၃
BRICS နိုင်ငံတွေဟာ လာမယ့်အင်္ဂါနေ့ကျရင် တောင်အာဖရိကနိုင်ငံ ဂျိုဟန်နက်စ်ဘတ်မြို့တော်မှာ သုံးရက်ကြာ ထိပ်သီးအစည်းအဝေးပြုလုပ်ကြပါလိမ့်မယ်။ BRICS ဆိုတာက ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိက နိုင်ငံတွေရဲ့ထိပ်ဆုံးစာလုံးတွေကို ပေါင်းစပ်ထားတဲ့ အတိုကောက်အမည်ဖြစ်ပါတယ်။
BRICS ဟာ ကမ္ဘာ့ GDP စုစုပေါင်းရဲ့ ၂၃ ရာခိုင်နှုန်းကို ကိုယ်စားပြုထားပြီး ကမ္ဘာ့လူဦးရေးစုစုပေါင်းရဲ့ ၄၂ ရာခိုင်နှုန်းလည်း ရှိပါတယ်။ သူတို့ဟာ ကမ္ဘာ့ရေးရာမှာ အနောက်စီးပွားရေးကြီးစိုးမင်းမူနေမှုတွေ လျော့ပါးသွားစေဖို့ ကြိုးစားနေကြပါတယ်။
အောက်မှာ BRICS နှင့်ပတ်သက်လို့ သိကောင်းစရာ အချက်(၅)ချက်ကို ဖော်ပြပေးလိုက်ပါတယ်။
#၁။ကမ္ဘာ့အစီအစဉ်အသစ်လား
၂၀၀၉ခုနှစ်မှ တရားဝင်စတည်ထောင်ခဲ့တဲ့ ထွန်းသစ်စစီးပွားရေးအုပ်စု BRICS ဟာ အဖွဲ့ဝင်နိုင်ငံအလိုက် အလှည့်ကျ နှစ်စဉ်အိမ်ရှင်အဖြစ် ထိပ်သီးအစည်းအဝေးကျင်းပပေးရပါတယ်။
အစည်းအဝေးတွေဟာ အထူးသဖြင့် အမေရိကန်ပြည်ထောင်စုနှင့် ဥရောပသမဂ္ဂတို့နှင့် ဆက်ဆံရေးမှာ သူတို့ရဲ့ အနေအထားကို အခိုင်အမာ ဖြစ်စေဖို့ရည်ရွယ်ထားရှိပါတယ်။
BRICS ဟာ စီးပွားရေးနှင့်နိုင်ငံရေး ထိန်းညှိမျှခြေရှိမှုနှင့်အတူ ဝင်ရိုးစုံ ကမ္ဘာ့အစီအစဉ်ကို အသိအမှတ်ပြုမြှင့်တင်ပေးပါတယ်။ ဒုတိယကမ္ဘာစစ်ကာလအလွန် တည်ထောင်ခဲ့တဲ့ ကမ္ဘာ့ဘဏ်နှင့် နိုင်ငံတကာငွေကြေးရန်ပုံငွေအဖွဲ့တွေလို အဖွဲ့အစည်းတွေနေက ခွဲထွက်ဖို့ရည်မှန်းပါတယ်။
#၂။မြင့်မြင့်မှန်းသည့် BRICS
BRICS ရဲ့စီးပွားရေးဖွံ့ဖြိုးတိုးတက်မှုကို အဓိကအားဖြင့် တရုတ်နှင့် အိန္ဒိယတို့က မောင်းနှင်ပေးပြီး အခုဆို အဖွဲ့ဟာ တိုးချဲ့ဖို့လမ်းဖွင့်ထားပါပြီ။ BRICS အဖွဲ့ဝင်ဖို့ နိုင်ငံပေါင်း ၂၃ နိုင်ငံက လျှောက်ထားပြီးပါပြီ။ အဲဒီအရေအတွက်လောက် ရှိတဲ့ အာဂျင်တီးနား၊ အီသီယိုပီးယား၊အီရန်နှင့်ဆော်ဒီအာရေဗျအပါအဝင် အခြားနိုင်ငံတွေကလည်း စိတ်ဝင်စားကြောင်းဖော်ပြဆက်သွယ်နေပါတယ်။
အဖွဲ့ရဲ့ဆွဲဆောင်မှုတွေထဲက တစ်ခုကတော့ အသစ်ဖွံ့ဖြိုးတိုးတက်ရေးဘဏ် New Development Bank ကို ၂၀၁၅ခုနှစ်မှာ ဖန်တီးခဲ့တာပဲဖြစ်ပါတယ်။ အဲဒီဘဏ်ဟာ ကမ္ဘာ့ဘဏ်နှင့် နိုင်ငံတကာငွေကြေးရန်ပုံငွေအဖွဲ့ (IMF) တို့ရဲ့ အခြားအစားထိုးဘဏ်တစ်ခုအဖြစ် ရည်မှန်းတည်ထောင်ထားပါတယ်။
ရှန်ဟိုင်းမှာ ရုံးချုပ်ဖွင့်ထားတဲ့ အဲဒီဘဏ်ဟာ စတင်တည်ထောင်ကတည်းက ယခုအထိ အဖွဲ့ဝင်နိုင်ငံတွေနှင့် အခြားသော ဖွံဖြိုးဆဲစီးပွားရေးနိုင်ငံတွေရဲ့ အခြေခံအဆောက်အအုံဖွံ့ဖြိုးရေးစီမံကိန်းတွေမှာ ဒေါ်လာ ၃၀ဘီလျံအထိ ရင်းနှီးမြှပ်နှံမှုလုပ်ထားပြီးပါပြီ။
#၃။ပူတင်အရေးကိစ္စ
ရုရှားသမ္မတ ဗလက်ဒီမီယာပူတင်ကို အိမ်ရှင်တောင်အာဖရိကသမ္မတ ဆိုင်ရီလ်ရမ်မာဖိုဆာက ထိပ်သီးအစည်းအဝေးကို ဖိတ်ကြားပြီးနောက် ထိပ်သီးအစည်းအဝေးကြိုတင်ပြင်ဆင်မှုတွေမှာ သံတမန်ရေးရာတင်းမာမှုတွေ မြင်တွေ့လာရပါတယ်။
နောက်ဆုံးမှာတော့ ပူတင်ကို ထိပ်သီးအစည်းအဝေးကို ဗွီဒီယိုအွန်လိုင်းကနေပဲ တက်ရောက်မယ်လို့ တောင်အာဖရိကနိုင်ငံက ကြေညာခဲ့ပါတယ်။
စစ်အေးတိုက်ပွဲအတွင်း အာဏာရတောင်အာဖရိကပါတီ အေအင်န်စီဟာ ရုရှားနှင့်ဆက်ဆံရေးမကောင်းခဲ့ပေမယ့် ယူကရိန်းပြဿနာမှာ ရုရှားကို ရှုတ်ချဖို့ သူတို့က ငြင်းဆန်ခဲ့ပါတယ်။
#၄။ဒေါ်လာကိုဆွဲချခြင်း
BRICSနိုင်ငံ (၅)နိုင်ငံရဲ့ စုစုပေါင်းကုန်သွယ်မှုတန်ဖိုး ဟာ နိုင်ငံတကာကုန်သွယ်မှုစုစုပေါင်းရဲ့ ၁၈ရာခိုင်နှုန်းအထိရှိနေပါတယ်။ အဲဒီကုန်သွယ်မှုမှာ အများဆုံးက ဒေါ်လာနှင့်ရောင်းဝယ်နေကြတာဖြစ်ပါတယ်။
ကမ္ဘာ့ကုန်သွယ်ရေးမှာ အမေရိကန်ဒေါ်လာ ကြီးစိုးမင်းမူနေမှုတွေကြောင့် အဖွဲ့ရဲ့ ရည်မှန်းချက်တွေထဲက တစ်ခုကတော့ သူတို့ဟာ ဒေါ်လာမှီခိုမှုကနေ လွတ်မြောက်ဖို့ပါ။
အဖွဲ့ဟာ ကုန်သွယ်ရေးမှာ အဖွဲ့ဝင်နိုင်ငံတွေရဲ့ငွေကြေးတွေ တိုးမြှင့်သုံးစွဲဖို့ အားပေးထောက်ခံထားကြပါတယ်။ ရေရှည်မှာတော့ သူတို့ဟာ ဘုံငွေပေးချေမှုစနစ်တစ်ခု တည်ဆောက်ဖို့ရှိနေပါတယ်။ ဘရာဇီးနှင့်တရုတ်တို့ဟာ ယခုနှစ် စောစောပိုင်းမှာ သူတို့နှစ်နိုင်ငံအကြားကုန်သွယ်ရေးမှာ ပြည်တွင်းသုံးငွေတွေနှင့်ပေးချကြဖို့ သဘောတူညီချက်လက်မှတ် ရေးထိုးကြပြီးဖြစ်ပါတယ်။
#၅။တက္ကသိုလ်အဆင့်သတ်မှတ်ခြင်း
ပြီးခဲ့တဲ့လက BRICS ပညာရေးဝန်ကြီးတွေဟာ အစည်းအဝေးတစ်ခုကျင်းပပြီး BRICS ရဲ့ ကိုယ်ပိုင် နိုင်ငံတကာ တက္ကသိုလ်အဆင့်အတန်းသတ်မှတ်ရေးဆောင်ရွက်ဖို့ ရည်ရွယ်ထားရှိကြောင်းကြေညာခဲ့ကြပါတယ်။
ရုရှားတက္ကသိုလ်တွေဟာ လက်ရှိ နိုင်ငံတကာတက္ကသိုလ်အဆင့်အတန်းသတ်မှတ်တဲ့အထဲကနေ ဖယ်ထုတ်ခံရတာဟာ နိုင်ငံရေးကိစ္စကြောင့် ဖြစ်တယ်လို့ ရုရှားက ယုံကြည်ထားတာဖြစ်ပါတယ်။
Source: The Times of India /AFP
- Category: World
- Hits: 488
#World_Health
Published 20 August 2023
အရွယ်မတိုင်ခင် ဆေးလိပ်သောက်တဲ့ ဆယ်ကျော်သက်တွေရဲ့ ဦးနှောက်တည်ဆောက်ပုံဟာ သူတို့နဲ့ရွယ်တူ ဆေးလိပ်မသောက်သူတွေနဲ့ ယှဉ်ရင် အတော်လေးကွဲပြားနေကြောင်း တွေ့ရှိထားပါတယ်။
ဒီလေ့လာမှုဟာ ဆယ်ကျော်သက်အရွယ်များမှာ ဆေးလိပ်စတင်သောက်ခြင်းနဲ့ ဦးနှောက်ထဲရှိ မီးခိုရောင်သားနေရာပမာဏတို့ကြား ဆက်စပ်မှုအပြင် နီကိုတင်းစွဲလမ်းမှုအကြောင်းကိုပါ ဖော်ပြနေတာဖြစ်ပါတယ်။
အသက် ၁၄ နှစ်၊ ၁၉ နှစ်၊ ၂၃ နှစ်ရှိတဲ့ လူငယ် ၈၀၀ ကျော်ပါဝင်တဲ့ ဦးနှောက်ပုံရိပ်များနဲ့ အချက်အလက်များကို ယူကေရှိ ဝါဝစ်ခ်တက္ကသိုလ်နဲ့ တရုတ်ရှိ ဖူဒန်တက္ကသိုလ်၊ ကိမ်းဘရစ်ဂျ်တက္ကသိုလ်တို့မှ သုတေသီများက ပူးပေါင်းလေ့လာခဲ့ကြပါတယ်။
ဆေးလိပ်စတင်သောက်ခြင်းဖြစ်စေပြီး စွဲလမ်းသွားစေတဲ့ အာရုံကြောဆိုင်ရာ အချက်များကို ရှာဖွေရန် ရည်ရွယ်ခဲ့ကြတာ ဖြစ်ပါတယ်။
အသက် ၁၄ နှစ်အရွယ်ကနေ စတင်ဆေးလိပ်သောက်တဲ့ ဆယ်ကျော်သက်တွေဟာ ဆုံးဖြတ်ချက်ချခြင်းနဲ့ စည်းကမ်းချိုးဖောက်ခြင်းဆိုင်ရာ အပြုအမူတွေနဲ့ ပတ်သက်နေတဲ့ ဦးနှောက်အရှေ့လက်ဝဲဘက်ရှိ မီးခိုးရောင်သားနေရာမှာ သိသိသာသာလျော့နည်းလာတာကို တွေ့ရှိခဲ့ကြပါတယ်။
မီးခိုးရောင်သားနေရာက ဆယ်ကျော်သက်အရွယ်မှာ ဖွံ့ဖြိုးမှုအထွတ်အထိပ်ရောက်တတ်ပြီး ထိုနေရာလျော့နည်းလာခြင်းက နီကိုတင်းစွဲလမ်းလာနိုင်ချေ ရှိနေတာဖြစ်ပါတယ်။
ထိုနေရာရဲ့ ညာဘက်ခြင်းဟာလည်း ဆေးလိပ်သောက်သူတွေမှာ လျော့နည်းလာကာ နီကိုတင်းစွဲလမ်းလာစေပါတယ်။
ထိုကနေ ဆေးလိပ်သောက်ခြင်းကို ထိန်းချုပ်ရန် ခက်ခဲလာကာ သာယာမှုကိုရှာဖွေခြင်း၊ စီမံခန့်ခွဲခြင်းတို့မှာ သက်ရောက်လာပါတယ်။
ဒါ့အပြင် ဆေးခြောက်သောက်ခြင်း၊ အခြားမူးယစ်ဆေးအသုံးပြုခြင်းတို့နဲ့လည်း ဆက်စပ်နေကာ အန္တရာယ်များတဲ့ အပြုအမူတွေ မြင်တွေ့လာရနိုင်ပါတယ်။
လေ့လာမှုကနေ ထွက်ပေါ်လာတဲ့ဖြစ်စဉ်ဟာ နီကိုတင်းစတင်စွဲလမ်းခြင်းနဲ့ ရေရှည်စွဲလမ်းနေခြင်းကို ဖော်ပြနေပါတယ်။
ကမ္ဘာပေါ်မှာ ဆေးလိပ်နဲ့ပတ်သက်တဲ့ အသက်သေဆုံးမှုတွေ နှစ်စဉ်မြင့်တက်နေတာကြောင့် အဆိုပါသုတေသနက ပြည်သူ့ကျန်းမာရေးအတွက် ထင်ရှားတဲ့သက်ရောက်မှုတွေ ဖြစ်လာနိုင်ပါတယ်။
#World_Health #ဆေးလိပ်သောက်သုံးသူ #ဆယ်ကျော်သက်များ
Source: WION
- Category: World
- Hits: 160
#World_Health
Published 20 August 2023
ငယ်ရွယ်စဉ်မှာ ခန္ဓာကိုယ်ကြံ့ခိုင်သန်စွမ်းအောင် ပြုလုပ်ထားခြင်းဖြင့် ကင်ဆာဖြစ်နိုင်ချေ လျှော့ချနိုင်ကြောင်း လေ့လာချက်အသစ် တွေ့ရှိထားပါတယ်။
ဗြိတိန်အားကစားဆေးဘက်ဆိုင်ရာ ဂျာနယ်မှာ အင်္ဂါနေ့က ဖော်ပြခဲ့ရာမှာ ငယ်ရွယ်စဉ်မှာ လေ့ကျင့်ခန်းများပြုလုပ်ပြီး ကြံ့ခိုင်သန်စွမ်းနေခြင်းဖြင့် နောက်ပိုင်းမှာ ကင်ဆာ ၉ မျိုးဖြစ်နိုင်ချေ လျော့နည်းစေပါတယ်။
ဒီကင်ဆာတွေထဲမှာ ဦးခေါင်းနဲ့ လည်ပင်းကင်ဆာ၊ လည်ချောင်းကင်ဆာ၊ အစာအိမ်ကင်ဆာ၊ ပန်ကရိယကင်ဆာ၊ အသည်းကင်ဆာ၊ ကျောက်ကပ်နဲ့ အဆုတ်ကင်ဆာတို့ ပါဝင်ပါတယ်။
အဆိုပါလေ့လာတွေ့ရှိချက်များကို ပြည်သူ့ကျန်းမာရေးမူဝါဒ ချမှတ်ရေးမှာ အသုံးပြုနိုင်ပြီး လူငယ်များအတွက် နှလုံးသွေးကြောဆိုင်ရာ ကြံ့ခိုင်သန်စွမ်းမှု တိုးတက်လာစေရန် ရည်ရွယ်ကာ ဆောင်ရွက်ချက်များ မြှင့်တင်ဖို့အတွက် အခွင့်အရေး ဖြစ်လာစေနိုင်ကြောင်း ဖော်ပြခဲ့ပါတယ်။
အသက် ၁၈ နှစ်အရွယ်မှာ စစ်ရေးလေ့ကျင့်ခန်းတွေ ပြုလုပ်ခဲ့တဲ့ အမျိုးသား ၁ သန်းကျော်ကို ဆွီဒင် ဂိုသင်ဘာ့ဂ်တက္ကသိုလ်မှ သုတေသီများက လေ့လာခဲ့ကာ နောက်ထပ် ၃၃ နှစ်ကြာတဲ့အထိ ကင်ဆာရှာဖွေခဲ့ကြပါတယ်။
၁၉၆၈ မှ ၂၀၀၅ ခုနှစ်အတွင်း စစ်မှုထမ်းခဲ့တဲ့သူတွေရဲ့ နောက်ခံအချက်အလက်များ၊ ဆေးဘက်ဆိုင်ရာရှာဖွေမှုများ၊ သေဆုံးမှုများကို ခွဲခြိမ်းစိတ်ဖြာခဲ့ပါတယ်။
လေ့ကျင့်ခန်းကို အပျော့စား၊ သာမန်၊ အပြင်းစားဆိုပြီး ၃ ဖွဲ့ခွဲခဲ့ပါတယ်။
နှလုံးသွေးကြောလေ့ကျင့်ခန်းဆိုတာဟာ လူတစ်ယောက်ရဲ့ သွေးလည်ပတ်မှုနဲ့ အသက်ရှူစနစ်တို့ကနေ အောက်ဆီဂျင်တွေကို စွမ်းအင်အသုံးချခြင်းအတွက် ထောက်ပံ့နိုင်စွမ်းကို တိုင်းတာခြင်း ဖြစ်ပါတယ်။
ထိုထဲမှာ ပြေးခြင်း၊ စက်ဘီးစီးခြင်း၊ ရေကူးခြင်း၊ လှေကားထစ်တက်ခြင်းတို့ ပါဝင်ပါတယ်။
လူတွေရဲ့ ကြံ့ခိုင်သန်စွမ်းမှု မြင့်မားလာတာနဲ့အမျှ ကင်ဆာဖြစ်နိုင်ချေလည်း လျော့နည်းလာကြောင်း ဒေါက်တာ'အာရွန်ဝမ်းရက်ပ်'က ပြောပြခဲ့ပါတယ်။
ကြံ့ခိုင်မှုနည်းတဲ့သူတွေနဲ့ ယှဉ်တဲ့အခါ ကြံ့ခိုင်မှုအားကောင်းတဲ့သူတွေဟာ ဦးခေါင်းနဲ့ လည်ပင်ကင်ဆာဖြစ်နိုင်ချေ ၁၉ ရာခိုင်နှုန်းနဲ့ ကျောက်ကပ်ကင်ဆာ ဖြစ်နိုင်ချေ ၂၀ ရာခိုင်နှုန်းလျော့နည်းကြောင်း တွေ့ရှိခဲ့ပါတယ်။
ကြံ့ခိုင်မှုအမြင့်ဆုံးရှိတဲ့ သူတွေက အဆုတ်ကင်ဆာဖြစ်နိုင်ချေ ၄၂ ရာခိုင်နှုန်းလျော့နည်းကြောင်း တွေ့ရှိခဲ့ပါတယ်။
လှုပ်ရှားမှုမရှိတဲ့ လူတွေအတွက် လေ့ကျင့်ခန်းအပြင်းအထန် ၅ မိနစ်ခန့် ပြုလုပ်ပေးခြင်းဖြင့် ကင်ဆာဖြစ်နိုင်ချေလျော့ကျစေနိုင်ကြောင်း JAMA ဂျာနယ်မှာ ဖော်ပြထားပါတယ်။
သာမန်ကနေ အပြင်းအထန်လေ့ကျင့်ခန်းတွေကို နေ့စဉ် ၁၁ မိနစ်ခန့်ပြုလုပ်ခြင်းဖြင့် ကင်ဆာ၊ နှလုံးသွေးကြောရောဂါ၊ အရွယ်မတိုင်ခင် သေဆုံးခြင်းတို့ ဖြစ်နိုင်ချေ လျော့နည်းနိုင်ပါတယ်။
#World_Health ခန္ဓာကိုယ်ကြံ့ခိုင်သန်စွမ်းအောင်နေထိုင်ခြင်း #ကင်ဆာဖြစ်နိုင်ချေလျော့နည်း
Source: NY Post
- Category: World
- Hits: 139
Published_ 20 September 2023
ခွေးမျိုးစိတ်နဲ့ မြေခွေးမျိုးစိတ်တို့ ရောယှက်ပေါက်ဖွားလာခဲ့တဲ့ ကမ္ဘာ့ပထမဆုံး ခွေးနှင့်မြေခွေးမျိုးစပ် သတ္တဝါကို ဘရာဇီးလ်မှာ လေ့လာတွေ့ရှိထားပါတယ်။
၂၀၂၁ မှာ ထိုသတ္တဝါဟာ ကားမတော်တဆဖြစ်ပြီးနောက် ရီယိုဂရန်ဒီဒိုဆူလ်ရှိ ဆေးရုံသို့ အရေးပေါ် ရောက်ရှိခဲ့ပါတယ်။
ထိုသတ္တဝါရဲ့ ထူးခြားတဲ့ ပုံပန်းသဏ္ဍာန်တွေ၊ တောရိုင်းတိရိစ္ဆာန်လည်းမဟုတ် အိမ်မွေးတိရိစ္ဆာန်နဲ့လည်း မတူညီတာကြောင့် တိရိစ္ဆာန်အထူးကုတွေလည်း အံ့အားသင့်ခဲ့ရပါတယ်။
မည်းနက်ချွန်ထက်တဲ့ နားရွက်ရှိပြီး ပုံမှန်မဟုတ်တဲ့ အပြုအမူမျိုးတွေ့ရကြောင်း၊ ခွေးလိုလည်း မဟုတ်သလို ကိုင်တွယ်ကြည့်တဲ့အခါမှာလည်း တောရိုင်းတစ်ကောင်လို ရန်လိုတဲ့အပြုအမူ မတွေ့ရကြောင်း ကွန်ဆာဗေးရှင်းနစ်တစ်ဦးဖြစ်တဲ့ ဖလေဗီယာဖယ်ရာရီက The Telegraph ကို ပြောပြခဲ့ပါတယ်။
ထိုသတ္တဝါရဲ့ မျိုးရိုးဗီဇ ဖွဲ့စည်းပုံကို သိရှိရဖို့ သုတေသီများက စမ်းသပ်မှုများ ပြုလုပ်ခဲ့ပါတယ်။
ဒီနောက် တောင်အမေရိက မျိုးနွယ်ဝင် မြေခွေးတစ်ကောင်နဲ့ အမျိုးအမည်မသိ ခွေးတစ်ကောင်တို့ မျိုးစပ်ထားတာ ဖြစ်တယ်ဆိုတဲ့ တွေ့ရှိချက်ကို Animals ဂျာနယ်မှာ ပြီးခဲ့တဲ့လက ဖော်ပြခဲ့ပါတယ်။
ဒါဟာ အဆိုပါ မျိုးနွယ်နှစ်ခုကြား ပထမဆုံးမျိုးစပ်ပေါက်ဖွားခြင်းအဖြစ် မှတ်တမ်းတင်ခဲ့ပါတယ်။
ဒေါ့ဇင်မ်လို့ အမျိုးအမည်ပေးထားတဲ့ ထိုသတ္တဝါဟာ ယခုနှစ်အစောပိုင်းကပဲ မဖော်ပြထားတဲ့ အကြောင်းအရင်းများကြောင့် အသက်ဆုံးပါးသွားပါပြီ။
သဘာဝကြောင့်ပဲဖြစ်ဖြစ် လူသားတွေလုပ်ရပ်ကြောင့်ပဲဖြစ်ဖြစ် ဒီလိုမျိုး မျိုးစပ်ပေါက်ဖွားခြင်းတွေဟာ တိရိစ္ဆာန်မျိုးစိတ်တွေမှာ ၁၀ ရာခိုင်နှုန်းလောက် ဖြစ်လေ့ရှိပြီး အထူးသဖြင့် အလွန်နီးစပ်တဲ့ မျိုးစိတ်တွေကြား ဖြစ်တတ်ပါတယ်။
လူသားတွေ ပြုလုပ်ထားတဲ့ မျိုးစပ်တွေထဲမှာ ဥပမာအားဖြင့် မြင်းနဲ့ မြည်းမျိုးစပ်၊ ခြင်္သေ့နဲ့ ကျားမျိုးစပ်တို့ ပါဝင်နေပါတယ်။
ဒီလိုမျိုးစပ်သတ္တဝါတွေမှာ မျိုးစိတ်နှစ်ခုကြား ရောဂါကူးစက်ပျံ့ပွားခြင်း ဖြစ်နိုင်တာကြောင့် တောရိုင်းအကောင်ရေပမာဏ ထိခိုက်နိုင်တဲ့ အန္တရာယ် ရှိတာကိုလည်း သတိပြုရမှာပါ။
ဒါပေမဲ့ လူသားများဆောင်ရွက်ထားတဲ့ မျိုးစပ်သတ္တဝါအများစုဟာ မျိုးမပွားနိုင်ကြပါဘူး။
Source: WION
#World_Animal
#YMG #Yangon_Times
- Category: World
- Hits: 61