ဆူဒန်နိုင်ငံမှာ လက်နက်ကိုင်တိုက်ခိုက်မှုများ ဖြစ်ပွားနေတာကြောင့် အကြီးမားဆုံး ရေနံချက်စက်ရုံ ပိတ်သိမ်းလိုက်ရကာ ထောက်ပံ့ရေးကွင်းဆက်မှာ ထိခိုက်လာပြီး လောင်စာပြတ်လပ်မှုများ ပိုမိုဆိုးရွားလာပါတယ်။
#World_News
#Published_ 4 September 2023
#YMG #Yangon_Times
- Category: World
- Hits: 117
Published_ 4 September 2023
ယူကရိန်းသမ္မတ ဗိုလိုဒီမီယာဇယ်လန်စကီက ကာကွယ်ရေးဝန်ကြီး အိုလက်ခ်ဆီရက်ဇ်နီကော့ဗ်ရဲ့ နေရာကို အစားထိုးခန့်အပ်ရန် စီစဥ်နေကြောင်း စက်တင်ဘာ ၃ ရက်နေ့က ကြေညာလိုက်ပါတယ်။
ဒါဟာ ကာကွယ်ရေးဝန်ကြီးဌာနအတွင်း ချဥ်းကပ်ပြောင်းလဲမှု တစ်ခုဖြစ်တယ်လို့ ဆိုလိုက်ပါတယ်။
အိုလက်ခ်ဆီရက်ဇ်နီကော့ဗ်ဟာ ရုရှား-ယူကရိန်း စစ်ပွဲကြီးမှာ ရက်ပေါင်း ၅၅၀ ကျော်ကြာအောင် ဖြတ်သန်းခဲ့ကြောင်း၊ စစ်ပွဲပေါ် ချဥ်းကပ်ပုံအသစ်တွေ၊ စစ်ဘက်ဆိုင်ရာမှာရော လူမှုအသိုင်းအဝိုင်းမှာပါ အခြားသော ဆက်ဆံလုပ်ကိုင်ရေးပုံစံမျိုးတွေ လိုအပ်နေတယ်လို့ ယုံကြည်ကြောင်း ဇယ်လန်စကီက ညနေခင်းမိန့်ခွန်းမှာ ပြောကြားသွားပါတယ်။
ရက်ဇ်နီကော့ဗ်နေရာမှာ အစားထိုးမယ့်လူအဖြစ် ယမန်နှစ်က တိုင်းပြည်ဘဏ္ဍာရန်ပုံငွေအဖွဲ့မှာ အကြီးအကဲအဖြစ် တာဝန်ထမ်းဆောင်နေခဲ့တဲ့ ခရိုင်းမီးယားတာတာလူမျိုး ရပ်စ်တမ်အူမာရော့ဗ်ကို အမည်တင်ပြခဲ့ပါတယ်။
ယခုဆိုရင် အူမာရော့ဗ်က ကာကွယ်ရေးဝန်ကြီးဌာနရဲ အကြီးအကဲ ဖြစ်သင့်ကြောင်း၊ ပါလီမန်အနေနဲ့ သူ့ကို ထောက်ခံဖို့ မျှော်လင့်ကြောင်း ပြောကြားသွားပါတယ်။
ဒီလိုကြေညာချက်ကြောင့် ၂၀၂၂ ဖေဖော်ဝါရီလ ယူကရိန်းပဋိပက္ခစစ်ပွဲအတွင်း ယူကရိန်းကာကွယ်ရေးဌာနမှာ အကြီးမားဆုံး လှုပ်ခတ်မှုကြီး ဖြစ်လာဖွယ်ရှိပါတယ်။
၂၀၂၁ နိုဝင်ဘာလမှာ ကာကွယ်ရေးဝန်ကြီး ဖြစ်ခဲ့တဲ့ ရက်ဇ်နီကော့ဗ်က စစ်ပွဲအတွက် အနောက်တိုင်းမှ စစ်ရေးကူညီမှု ဒေါ်လာဘီလီဘံနဲ့ချီ ရရှိစေရန် ကူညီနိုင်ခဲ့ပေမယ့် ကာကွယ်ရေးဝန်ကြီးဌာနမှာ အဂတိလိုက်စားမှု စွပ်စွဲချက်တွေ ထွက်ပေါ်နေခဲ့ပါတယ်။
ကာကွယ်ရေးဝန်ကြီး ပြောင်းလဲဖို့က ပါလီမန်လွှတ်တော်မှ အတည်ပြုရမှာဖြစ်ပြီး အခုကိစ္စမှာ ဥပဒေပြုအမတ်အများစုမှ ထောက်ခံသွားဖွယ်ရှိနေပါတယ်။
ပါလီမန်အနေနဲ့ အူမာရော့ဗ်ကို ခန့်အပ်ရန် အသိအမှတ်ပြုမယ်လို့ ဇယ်လန်စကီက မျှော်မှန်းထားပါတယ်။
ဇယ်လန်စကီအနေနဲ့ အခြားစီမံကိန်းနေရာတွေမှာ တာဝန်ထမ်းဆောင်ရန် ကမ်းလှမ်းလာပါက ရက်ဇ်နီကော့ဗ်က လက်ခံသွားဖွယ်ရှိတယ်လို့ ပြောကြားခဲ့ကြောင်း ဒေသတွင်းမီဒီယာတွေက ဖော်ပြခဲ့ပါတယ်။
ယူကရိန်းအစိုးရအဖွဲ့အတွင်း အကျင့်ပျက်ခြစားမှု တိုက်ဖျက်ရေးများ ဆောင်ရွက်နေစဥ် ရက်ဇ်နီကော့ဗ်ကို ရာထူးမှထုတ်ပယ်ခဲ့တာ ဖြစ်ပါတယ်။
ယူကရိန်းဟာ ဥရောပသမဂ္ဂလိုမျိုး အနောက်တိုင်းအဖွဲ့အစည်းများထံ ဝင်ရောက်ရန် ကြိုးပမ်းနေတာကြောင့် အဂတိလိုက်စားမှုတွေကို တိုက်ဖျက်ဖို့ လိုအပ်နေပါတယ်။
နိုင်ငံတကာ အကျင့်ပျက်ခြစားမှု ဖော်ပြခြင်းညွှန်းကိန်းများအရ စုစုပေါင်းအဆင့်သတ်မှတ်ချက် ၁၈၀ မှာ ယူကရိန်းက ၁၁၆ မှာရပ်တည်နေပါတယ်။
ရက်ဇ်နီကော့ဗ်ကို အကျင့်ပျက်မှုဖြင့် စွပ်စွဲထားတာမျိုး မရှိပေမယ့် ကာကွယ်ရေးဝန်ကြီးဌာနမှာတော့ စစ်တပ်အတွက် ပစ္စည်းများ အမြတ်ထုတ်ခြင်းကိစ္စများ ရှိနေတယ်လို့ သိရပါတယ်။
Source: WION
#Ukraine_Crisis
#YMG #Yangon_Times
- Category: World
- Hits: 103
#World_Health
Published 4 September 2023
ပတ်ဝန်းကျင်ရှိ ရေများနဲ့ စားစရာတွေမှာ ပလတ်စတစ်အမှုန်များ တွေ့ရှိမှုများပြားလာတာကြောင့် အဆိုပါ မိုက်ခရိုပလတ်စတစ်များ လူသားတွေနဲ့ သတ္တဝါတွေမှာ အပြုအမူပြောင်းလဲလာစေတဲ့အထိ သက်ရောက်မှုများကို လေ့လာခဲ့ကြပါတယ်။
ထိုလေ့လာမှုကို မော်လီကျူးသိပ္ပံ နိုင်ငံတကာဂျာနယ်မှာ ဖော်ပြခဲ့ပါတယ်။
သုတေသီတွေက ပလတ်စတစ်ညစ်ညမ်းခြင်းရဲ့ သက်ရောက်မှုတွေကို လေ့လာခဲ့ကြကာ ပလတ်စတစ်အမှုန်တွေက ပတ်ဝန်းကျင်ကို ညစ်ညမ်းစေသလိုမျိုး ခန္ဓာကိုယ်မှာလည်း ညစ်ညမ်စေကြောင်း တွေ့ရှိခဲ့ကာ အထူးသဖြင့် အသက်အရွယ်ကြီးသူတွေမှာ ပိုမိုဆိုးရွားစေပါတယ်။
လက်ရှိသုတေသန တွေ့ရှိချက်အရ ပလတ်စတစ်အမှုန်တွေဟာ ပတ်ဝန်းကျင်ကနေတဆင့် လူသားတစ်ရှူးတွေထဲမှာ စုပြုံလာကြောင်း၊ သတ္တဝါတွေအပေါ်မှာ ပလတ်စတစ်တွေရဲ့ ကျန်းမာရေးသက်ရောက်မှုတွေကို လေ့လာရတာက အနည်းအကျဥ်းသာ ရှိသေးကြောင်း ရိုင်ယန်တက္ကသိုလ်မှ ဇီဝဆေးပညာနဲ့ ဆေးဝါးသိပ္ပံ တွဲဖက်ပရော်ဖက်ဆာရော့စ်က ပြောပြခဲ့ပါတယ်။
ကြွက်တွေအစာစားရာကနေ ပလတ်စတစ်အမှုန် ထိတွေ့မှုကို ၃ ပတ်ကြာအောင် သုတေသနပြုလုပ်ခဲ့ရာ အပြုအမူပိုင်း ပြောင်းလဲမှုတွေ တွေ့ရသလို အသည်းနဲ့ ဦးနှောက်တို့မှာလည်း ပြောင်းလဲမှုတွေ ဖြစ်ပေါ်လာတာ မြင်တွေ့လိုက်ရပါတယ်။
လူတွေမှာ မှတ်ဉာဏ်ချို့ယွင်းလာခြင်း (ဒီမန်ရှာ)လက္ခဏာမျိုးကို ကြွက်တွေမှာ တွေ့ခဲ့ရပါတယ်။
မိုက်ခရိုပလတ်စတစ်တွေ ဦးနှောက်ထဲကို ဝင်ရောက်လာပါက အဓိကအက်ဆစ်ပရိုတိန်းများကို လျော့နည်းစေကာ အယ်လ်ဇိုင်းမား၊ စိတ်ဓာတ်ကျခြင်းတို့လို အာရုံကြောချို့ယွင်းလာတဲ့ ရောဂါများ ဆက်စပ်နေပါတယ်။
ပလတ်စတစ်က ဦးနှောက်လုပ်ဆောင်ချက်တွေကို ထိခိုက်ပုံတွေ၊ အာရုံကြောချို့ယွင်းလာတဲ့ ရောဂါတွေ ဖြစ်ပေါ်လာစေပုံတို့ကို ပရော်ဖက်ဆာရော့စ်က ဆက်ပြီး လေ့လာချင်နေပါတယ်။
Source: The Jerusalem Post #World_Health #ပလတ်စတစ်အမှုန် #ခန္ဓာကိုယ်တွင်းစနစ်
#Yangon_Times
- Category: World
- Hits: 138
#World_Health
Published4 September 2023
ကင်ဆာဝေဒနာရှင်များ အထူးသဖြင့် အဆုတ်ကင်ဆာနဲ့ ရင်သားကင်ဆာဖြစ်သူတွေမှာ အာဟာရစားသောက်မှုက အရေးပါတဲ့ကဏ္ဍက ပါဝင်နေပါတယ်။
ကင်ဆာရောဂါ ကနဦးအဆင့်တွေမှာ အာဟာရဖြင့် ထိရောက်စွာ ကုသနိုင်တယ်လို့ ပညာရှင်များက ဆိုပါတယ်။
ဟင်းသီးဟင်းရွက်၊ အသီးအနှံ၊ ကောက်ပဲသီးနှံများက ရင်သားကင်ဆာလူနာတွေအတွက် အကျိုးဖြစ်စေတယ်လို့ ဒေလီ ရာဂျစ်ဂန္ဒီကင်ဆာသုတေသနစင်တာမှ အတိုင်ပင်ခံ ဒေါက်တာပန်ကပ်ဂိုယဲလ်က ပြောပြသွားပါတယ်။
ကင်ဆာကုသစဥ်အတွင်း ကုသနည်းတွေရဲ့ ဘေးထွက်ဆိုးကျိုးတွေကို ကာမိစေဖို့ အာဟာရ ညီညွတ်စွာ စားသောက်ဖို့က အရေးကြီးကြောင်း၊ အိန္ဒိယအစားအစာတွေထဲက ပဲအမျိုးမျိုး၊ ဒိန်ချဥ်တို့ဟာ တစ်ရှူးလုပ်ဆောင်ချက်နဲ့ ကိုယ်ခံအားလုပ်ဆောင်ချက်တို့အတွက် အရေးကြီးကြောင်း ပြောပြသွားပါတယ်။
ဓာတ်ရောင်ခြည်၊ ဓာတုကုထုံးတို့ဖြင့် ကုသနေစဥ် အာဟာရမျှတစွာ စားသုံးပေးပါက ဆိုးကျိုးများကို လျော့နည်းစေနိုင်ကာ လူနာရဲ့အသက်ဘဝကို တိုးတက်ကောင်းမွန်စေမှာ ဖြစ်ပါတယ်။
ဗိုက်တာမင် -အေ၊ စီ၊ အီး၊ ဆယ်လီနီယမ်၊ ဇင့်တို့က ဓာတ်တိုးဆန့်ကျင်ပစ္စည်းများဖြစ်ကာ ကုသမှုကာလနဲ့ ကုသပြီးစီးစဥ်ကာလတို့မှာလည်း ဘေးထွက်ဆိုးကျိုးများကို လျော့ပါးစေပါတယ်။
အိုမီဂါ-၃ ဖက်တီးအက်ဆစ်ဆိုရင် ဓာတ်ရောင်ခြည်၊ ဓာတုကုထုံးများခံယူထားတဲ့ အဆုတ်ကင်ဆာလူနာတွေမှာ ရောင်ရမ်းခြင်းကို ထိန်းညှိပေးနိုင်ပါတယ်။
ဘီတာ-ခရစ်ပ်တိုဇန်သင်းများတဲ့အခါ အဆုတ်ကင်ဆာဖြစ်နိုင်ချေနဲ့ ပျံ့ပွားမှုတို့ကို လျှော့ချပေးနိုင်ပြီး အစိမ်းရောင် ဟင်းသီးဟင်းရွက်တွေမှာ ပါဝင်တဲ့ ဖောလိတ်က ဆေးလိပ်သမားတွေမှာ အဆုတ်ကင်ဆာဖြစ်နိုင်ချေကို လျှော့ချပေးနိုင်ပါတယ်။
ကုသခံယူတဲ့ ကုထုံးပေါ်မူတည်ပြီး အစားအစာပြောင်းလဲနိုင်ကာ ဟင်းသီးဟင်းရွက်၊ အသီးအနှံ၊ ကာဗိုဟိုက်ဒရိတ်၊ ပရိုတိန်း၊ အဆီဓာတ်တို့ကို မျှတစွာ စားသုံးသင့်တယ်လို့ မွမ်ဘိုင်း ပီဒီဟင်ဒူဂျာဆေးရုံနဲ့ ဆေးဘက်ဆိုင်ရာ သုတေသနစင်တာမှ ဒေါက်တာဗီဂျေးပါတေးလ်က ပြောပြသွားပါတယ်။
Source: India Today #World_Health #ကင်ဆာအစောပိုင်းအဆင့်ကုသ
#Yangon_Media_Group
- Category: World
- Hits: 141
၃ စက်တင်ဘာ ၂၀၂၃
သွားတိုက်ဆေး၊ ချောကလက်၊အဝတ်လျှော်ဆပ်ပြာမှုန့်နှင့် အနံ့အသက်ပျောက်ဆေးခဲတွေစတဲ့ နေ့စဉ်လူသုံးပစ္စည်းတွေကို ယခုအခါ အမေရိကန်ရဲ့ လက်လီအရောင်းဆိုင်တွေမှာ တစ်နေ့တစ်ခြား သော့ခတ်ရောင်းချနေရတာ တိုးပွားလာနေတယ်လို့ အေအက်ဖ်ပီသတင်းကရေးသားပါတယ်။ ဒါဟာ လူနေမှုစရိတ်တွေ အမေရိကန်မှာ မြင့်တက်လာနေတာကို စားသုံးသူတွေ ရင်ဆိုင်နေရတဲ့အတွက် အသေးအဖွဲအလစ်သုတ်တဲ့သူတွေနှင့် ဂိုဏ်းဖွဲ့ပြီး အရောင်းဆိုင်တွေမှာ အုပ်စုလိုက်အလစ်သုတ်တာတွေ များ လာတာကြောင့်ဖြစ်တယ်လို့ဆိုပါတယ်။
အဲဒီအလစ်သုတ်သူတွေများလာတာကြောင့် အမေရိကန်ရဲ့ အထင်ကရ လက်လီကုန်စုံဆိုင်ကြီးတွေ ဖြစ်ကြတဲ့ ဝေါလ်မတ်နှင့် တားဂက်၊ ဆေးဆိုင်အရောင်းဆိုင်တွဲတွေဖြစ်တဲ့ စီဗွီအက်စ်နှင့် ဝေါဂရင်း၊ အိမ်အလှပြုပြင်ဆိုင်ဖြစ်တဲ့ ဟုမ်းဒီပို့တ်နှင့် ဖိနပ်ဆိုင် ဖု(တ်)လော့ကာတို့ဟာ စိုးရိမ်ပူပန် နေကြပါ တယ်။
“ လက်လီဆိုင်တော်တော်များများအပေါ် ဂိုဏ်းဖွဲ့ခိုးယူကြတာနှင့် အလစ်သုတ်တာတွေ ရဲ့ အကျိုးသက်ရောက်မှုက ပိုမိုးဆိုးရွားလာနေပါတယ်” လို့ ဒစ်ခ် အားကစားပစ္စည်းလုပ်ငန်းက အမှုဆောင်အရာရှိချုပ် လောရင်းဟိုဘတ်က အေအက်ဖ်ပီကိုပြောပါတယ်။
ဒုတိယလေးလပတ်ရဲ့ ကုမ္ပဏီကုန်စာရင်းမှာ အလစ်သုတ်တာတွေရဲ့ အကျိုးဆက်က အတော့်ကို သက်ရောက်နေတယ် လို့လည်း သူမကဆက်ပြောပါတယ်။
“ ဒီနှစ်ပထမငါးလမှာ ကျွန်တော်တို့ရဲ့စတိုးဆိုင်တွေမှာ အကြမ်းဖက်မှု ဒါမှမဟုတ် အကြမ်းဖက် ခြိမ်းခြောက်မှုတွေနှင့်တွဲပြီး အလစ်သုတ်တာတွေဟာ ၁၂၀ ရာခိုင်နှုန်း တိုးပွားလာတယ်” လို့ တားဂက် ကုမ္ပဏီရဲ့ အမှုဆောင်အရာရှိချုပ် ဘရီယန်ကော်နယ်လ်ကလည်း ပြောပါတယ်။
“ ကျွန်တော်တို့အဖွဲ့ဟာ လက်လီဆိုင်အလစ်သုတ်တာတွေနှင့် ဂိုဏ်းဖွဲ့အလစ်သုတ်မှုခင်းကျူးလွန် တာတွေကို လက်မခံနိုင်စရာ ပမာဏတစ်ခုအထိ ဆက်ရင်ဆိုင်နေကြရဦးမှာပဲ” လို့ သူကဖြည့်စွက် ပြောပါတယ်။
ပြီးခဲ့တဲ့ ၁၈လက အတိုးနှုန်းတွေဟာ သုညနားကပ်နေရာကေန ၅.၅ ရာခိုင်နှုန်းဝန်းကျင်မြင့်တက် လာပြီး ဒါဟာ ၂၂နှစ်အတွင်း အမြင့်မားဆုံး အဆင့်ရောက်လာတာပါ။ မူဝါဒချမှတ်သူတွေဟာ ငွေကြေးဖောင်းပွမှုကို ဘယ်လိုတိုက်ဖျက်ရမယ်ဆိုတာ နည်းလမ်းရှာနေပါတယ်။
ချေးငှားစရိတ်တွေမြင့်တက်လာတာကြောင့် ကုမ္ပဏီတွေဟာ သူတို့ရဲ့ လုပ်ငန်းတွေတိုးချဲ့ဖို့ ဈေးတွေပိုကြီးလာတာနှင့်ရင်ဆိုင်နေကြရပါတယ်။စားသုံးသူတွေဟာလည်း အသုံးအစွဲကျုံလာ နေကြပါတယ်။
အမျိုးသားလက်လီလုပ်ငန်းဖက်ဒရေးရှင်းရဲ့ ၂၀၂၂ လက်လီလုပ်ငန်းလုံခြုံရေးဆန်းစစ်ချက်အရ လက်လီလုပ်ငန်းတွေဟာ ၂၀၂၁ ခုနှစ် တစ်နှစ်တည်းမှာတင် အမေရိကန်ဒေါ်လာ ၉၄.၅ ဘီလျံ ဆုံးရှုံးခဲ့ကြတယ်လို့ဆိုပါတယ်။
လက်လီလုပ်ငန်းတွေကျုံလာရတဲ့အထဲမှာ ဝန်ထမ်းတွေခိုးတာ၊ ပစ္စည်းအလစ်သုတ်တာတွေနှင့် အုပ်ချုပ်မှု အမှားတွေကြောင့်လည်း ပါဝင်ပါတယ်။
အဲဒါတွေကြောင့် စတိုးဆိုင်တွေဟာ ဒိုးယိုပေါက်မြင်ရတဲ့ နံရံတွေကို တပ်ဆင်လာရပြီး ပစ္စည်း စင်တွေကိုလည်း သော့တွေတွဲခတ်ထားရပါတယ်။ တစ်ခါတစ်ခါဆို ရေခဲသေတ္တာနှင့်ချိန်းကြိုးတွေ တွဲချိတ်သော့ခတ်တာတွေပါလုပ်ဆောင်ကြရပါတယ်။ ပြီးတော့မင်းလမ်းတွေမှာ ဝန်ထမ်းတွေ အတွက် လူခေါ်ဘဲလ်ခလုတ်တွ ပြန့်ကျဲတပ်ဆင်ထားနေရတယ်လို့ အေအက်ဖ်ပီသတင်းမှာ ရေးသားထားပါတယ်။
ဒါပေမယ့် ဒီလိုလုံခြုံမှုအစီအမံဟာ ထိရောက်တဲ့ကာကွယ်မှုမပေးနိုင်သေးပါဘူး။
ဇွန်လတုန်းက နယူးယောက်ပြည်နယ်၊ကွင်းစ်က ဝေါဂရင်း ဆိုင်ခွဲတစ်ခုမှာ ခေါင်းစွပ်ဂျာကင် ဝတ်ထားပြီး နှာခေါင်းစည်းတပ်ထားတဲ့ အမျိုးသားတစ်ဦးဟာ ဈေးဝယ်တွေနှင့် ဝန်ထမ်းတွေ မျက်စေ့အောက်မှာတင် မီးမှုတ်စက် blowtorch ကို အသုံးပြုပြီး သော့အိမ်ကို အရည်ဖျော်ပြီး ပစ္စည်းတွေကို အိတ်ထဲထည့် ပိုက်ဆံမရှင်းဘဲ ထွက်သွားခဲ့ပါတယ်။
အချို့လက်လီဆိုင်တွေက အန္တရာယ်ပြုလာမှာကို စိုးရိမ်တဲ့အတွက် အကယ်၍ အလစ်သုတ်တာတွေတွေ့ရင် အဲဒီသူတွေကို ဘာမှ မနှောက်ယှက်နှင့်၊ရဲကိုလည်းမခေါ်နှင့်လို့ မှာထားတယ်လို့ မီဒီယာသတင်းတွေကဆိုပါတယ်။
အချို့ကတော့ ဆိုင်အချို့ကိုပိတ်ပစ်ဖို့စဉ်းစားနေကြပါတယ်။ ဂျိုင်းယန့်လုပ်ငန်းဟာ အလစ်သုတ်မှုနှင့်အကြမ်းဖက်မှုတွေ သိသိသာသာဆိုးရွားနေတဲ့ ဝါရှင်တန်က စူပါမားကက်တစ်ခုကို ပိတ်ဖို့ အတော်ကြီးကို စဉ်းစားနေပါတယ်။ ဒီလိုအခြေအနေမျိုးမှာ လုပ်ငန်းလည်ပတ်ဖို့ အတော်ခက် တယ်လို့ အဲဒီလုပ်ငန်းရဲ့ပြောရေးဆိုခွင့်ရှိသူက အေအက်ဖ်ပီကိုပြောပါတယ်။
ဝေါဂရင်းဟာ အလစ်သုတ်မှုတွေကြောင့် အမြတ်မထွက်နိုင်တော့လို့ ၂၀၂၁ ခုနှစ်တုန်းက ဆန်ဖရန်စစ္စကိုက ဆိုင်ငါးဆိုင်ကို ပိတ်ပစ်ခဲ့ရပါတယ်။ အဲဒီနှစ်မှာပဲ ဝေါမတ်ဟာ ဆိုင်လေးဆိုင်ပိတ်ခဲ့ရပါတယ်။
“ဒီနှစ်နည်းနည်းလျော့သွားတယ်၊မနှစ်က တိုးလာတယ်။ တစ်နိုင်ငံလုံးတော့ မတူကြဘူး” လို့ ဝေါမတ်ရဲ့ ဘဏ္ဍာရေးအရာရှိချုပ် ဂျွန်ရိန်းနေက အေအက်ဖ်ပီကိုပြောပါတယ်။
လျှပ်တစ်ပြက်လုယူမှုတွေဖြစ်တဲ့ အုပ်စုလိုက် စတိုးဆိုင်ကို ဝုန်းခနဲရောက်ချလာပြီး ပစ္စည်းတွေ ရသလောက်ကောက်ထည့်ပြီးထွက်ပြေးသွာတာမျိုးတွေကိုလည်း အွန်လိုင်းမှာ ပို့စ်ရေးတင်သူတွေ ရှိနေကြပါတယ်။
ဩဂုတ်လ ၁၂ ရက်နေ့က လော့အိန်ဂျလိမှာရှိတဲ့ နော့ဒ်စတုမ်းစတိုးဆိုင်မှာ နှာခေါင်းစည်းတပ်ဆင်ထားတဲ့ လူ၃၀ ဦးခန့်က တန်ဖိုးကြီး ပစ္စည်းတွေ ဒေါ်လာ သုံးသိန်းဖိုးခန့်ကို အလစ်သုတ်ကာ အစောင့်ကိုလည်း စပရေးနှင့်ပက်သွားတယ်လို့ ရဲကပြောပါတယ်။
Source AFP
- Category: World
- Hits: 293
#World_Health
Published 3 September 2023
ခေါင်းကိုက်တာနဲ့ ပတ်သက်ပြီး တည်နေရာ၊ ပြင်းထန်ပုံ၊ ကြာချိန် အမျိုးမျိုးရှိနိုင်ပြီး သူ့လက္ခဏာနဲ့သူ အကြောင်းအရင်း အမျိုးမျိုးကြောင့် ဖြစ်နိုင်ပါတယ်။
ရံဖန်ရံခါမှ ခေါင်းကိုက်တာမျိုးက သာမန်ဖြစ်ပေမယ့် မကြာခဏခေါင်းကိုက်နေပြီ ဆိုရင်တော့ ရောဂါအခံကြောင့် ဖြစ်နေနိုင်ပါတယ်။
(၁) ဖိစီးမှုနဲ့ ပူပန်သောကစိတ်
အလွန်အကျွံ စိတ်ဖိစီးပြီး ပူပန်သောက ရောက်နေရရင် ခေါင်းကိုက်လာပြီး စားသောက်ချင်စိတ်နဲ့ အိပ်စက်မှုတို့ကို ထိခိုက်လာပါတယ်။
(၂) ကောင်းစွာမအိပ်ရခြင်း
ကိုယ်ခန္ဓာကျန်းမာရေးနဲ့ အားအင်ပြန်လည် ပြည့်ဝစေရန် နှစ်ခြိုက်စွာအိပ်ပျော်ဖို့က အရေးကြီးတာကြောင့် အိပ်ရေးပျက်တယ်ဆိုရင် အထွေထွေကျန်းမာရေးကို ထိခိုက်စေပါတယ်။
(၃) ရေဓာတ်ခန်းခြောက်ခြင်း
ခေါင်းကိုက်ခြင်းဟာ ရေဓာတ်ခန်းခြောက်ခြင်းရဲ့ အဖြစ်များတဲ့ လက္ခဏာဖြစ်ပါတယ်။
(၄) မျက်ကြောတင်းခြင်း
အချိန်ကြာမြင့်စွာ ဖန်သားပြင်ကြည့်ခြင်း၊ စာဖတ်ခြင်းတို့ကြောင့် မျက်ကြောများတင်းလာကာ ခေါင်းကိုက်စေတဲ့အပြင် မျက်စိကျန်းမာရေးပြဿနာများ ဖြစ်လာနိုင်ပါတယ်။
(၅) နှာခေါင်းပေါက်ပြဿနာများ
နှာပိတ်ခြင်း၊ နှာခေါင်းလမ်းကြောင်း ရောဂါပိုးဝင်ခြင်းတို့ကြောင့် ခေါင်းကိုက်ခြင်းကို ခံစားရနိုင်ပါတယ်။
(၆) ဟော်မုန်းအပြောင်းအလဲ
အမျိုးသမီးများမှာ ဓမ္မတာလာခြင်း၊ မီးယပ်သွေးဆုံးခြင်းတို့ ဖြစ်ပေါ်ချိန် ဟော်မုန်းပမာဏ အတက်အကျဖြစ်တတ်ပြီး မကြာခဏခေါင်းကိုက်ရတတ်ပါတယ်။
(၇) ကော်ဖီဖြတ်ခြင်း
ကော်ဖီပုံမှန် သောက်နေကျသူတွေက ကဖင်းဓာတ်မရတဲ့အခါ ခေါင်းကိုက်ခြင်း ခံစားရတတ်တာကြောင့် အကန့်အသတ်ဖြင့်သာ သောက်သုံးသင့်ပါတယ်။
(၈) အချို့သောအစားအစာနှင့် စွဲလမ်းစေတဲ့ဆေးများ
အချို့သော စားစရာတွေနဲ့ အက်စ်ပါတမီ၊ နိုက်ထရိတ်တို့လို အရာတွေက အချို့လူတွေမှာ ခေါင်းကိုက်ခြင်းကို ဖြစ်စေပါတယ်။
(၉) ဆေးဝါးအလွန်အကျွံသုံးစွဲခြင်း
နာကျင်ကိုက်ခဲခြင်း သက်သာအောင် သုံးစွဲရတဲ့ဆေးတွေ အလွန်အကျွံ သုံးစွဲတဲ့အခါ ခေါင်းကိုက်ခြင်းကို ပြန်လည်ခံစားရစေနိုင်ပါတယ်။
(၁၀) အခြားရောဂါအခံများ
ခေါင်းတစ်ခြမ်းကိုက်ခြင်း၊ သွေးတိုးခြင်း၊ ဦးနှောက်အကျိတ်တို့ကြောင့် မကြာခဏ ခေါင်းကိုက်ရတတ်ပါတယ်။
ခေါင်းကိုက်ခြင်းက ပြင်းထန်ပြီး ဆက်တိုက်ဖြစ်နေတယ်ဆိုရင်တော့ ဆရာဝန်ထံ ပြသသင့်ပါတယ်။
#World_Health #ခေါင်းကိုက်ခြင်းဝေဒနာ
Source: DoctorNDTV
- Category: World
- Hits: 653
#World_News
Publilshed 3 September 2023
အမျိုးသမီးတစ်ဦးဟာ ရောဂါလက္ခဏာအမျိုးမျိုးကြောင့် ဆေးရုံသို့ မကြာခဏလာနေခဲ့ရကာ နောက်ဆုံးမှာတော့ ဆရာဝန်တွေက သူမရဲ့ဦးနှောက်ထဲမှာ သန်ကောင်တစ်ကောင် ရှင်သန်နေထိုင်နေတာကို တွေ့ရှိခဲ့ကြပါတယ်။
၂၀၂၁ ခုနှစ်ကတည်းက အသက် ၆၄ နှစ်ရှိ အမျိုးသမီးဟာ အဆုတ်ရောင်ခြင်း၊ ဝမ်းဗိုက်အောင့်ခြင်း၊ ဝမ်းလျှောခြင်း၊ ချောင်းခြောက်ဆိုးခြင်း၊ အဖျားတက်ခြင်း၊ ညဘက်ချွေးပြန်ခြင်းတို့ ခံစားရတာကြောင့် ဆရာဝန်တွေက စတီးရွိုက်တွေ၊ အခြားဆေးဝါးတွေနဲ့ ကုသပေးနေခဲ့ပါတယ်။
၂၀၂၂ မှာတော့ သူမမှာ စိတ်ဓာတ်ကျခြင်းနဲ့ မေ့လျော့တတ်ခြင်းတို့ပါ ခံစားလာရတဲ့ အခါမှာတော့ ဦးနှောက်ကို MRI စကင်ရိုက်ခိုင်းခဲ့ကာ ပုံမှန်မဟုတ်တာကို တွေ့ရှိခဲ့ပြီး ခွဲစိတ်ဖို့ အကြံပြုခဲ့ကြပါတယ်။
ဒါပေမဲ့ အဲဒီထဲမှာ တွန့်လိမ်သွားလာနေတဲ့ သန်ကောင်တစ်ကောင်ကို မြင်တွေ့ရလိမ့်မယ်လို့ မထင်မိခဲ့ကြကြောင်း ကူးစက်ရောဂါအထူးကု ဒေါက်တာဆန်ဂျာယာဆယ်နာနာယာကီက ပြောပြခဲ့ပါတယ်။
၃ လက်မရှည်ပြီး အနီရောင်ရဲနေတဲ့ Ophidascaris robertsi သိပ္ပံအမည်ရှိ ကပ်ပါးသန်ကောင်ကို ထိုအမျိုးသမီးရဲ့ ဦးနှောက်ထဲမှာ မြင်တွေ့ခဲ့ရတာ ဖြစ်ပါတယ်။
ပိုပြီးထူးဆန်းတာက ဒီသန်ကောင်မျိုးဟာ ကောဇောစပါးအုံးမြွေတွေမှာ တွေ့ရတတ်တာပါပဲ။
ဒီလိုမျိုးသန်ကောင်ကို လူတစ်ယောက်မှာ တွေ့ရတာဟာ ဒါပထမဆုံးပဲ ဖြစ်ပါတယ်။
သူမဟာ မြွေတွေနဲ့ တစ်ခါမှ မထိတွေ့ဖူးပေမယ့် သူနေထိုင်တဲ့နေရာ အနီးနားက ရေကန်မှာတော့ မြွေပေါများတယ်လို့ သိရပါတယ်။
ဖြစ်နိုင်တာတစ်ခုကတော့ ထိုအမျိုးသမီးခူးယူတဲ့ နယူးဇီလန်ဟင်းနုနွယ်ရွက်တွေမှာ သန်ကောင်ဥတွေ ရောက်နေတာ ဖြစ်နိုင်တယ်လို့ ကျွမ်းကျင်သူများက ဆိုပါတယ်။
ဒီလိုမျိုးပထမဆုံး တွေ့ရှိမှုက တိရိစ္ဆာန်တွေမှာသာ တွေ့ရတတ်တဲ့ ကူးစက်မှုတွေက လူသားတွေဆီကို ရောက်လာနိုင်တယ်ဆိုတာကို ဖော်ပြနေပါတယ်။
တစ်ကမ္ဘာလုံးက ကူးစက်ရောဂါတွေရဲ့ ၇၅ ရာခိုင်နှုန်းက သတ္တဝါချင်းကူးစက်တဲ့ ရောဂါတွေဖြစ်ပြီး ကိုရိုနာဗိုင်းရပ်စ်လိုမျိုး တိရိစ္ဆာန်ကနေ လူသားတွေကိုပါ ကူးစက်လာကြတာ ဖြစ်ပါတယ်။
အဆိုပါအမျိုးသမီးဟာ ရောဂါလက္ခဏာအချို့ ကျန်ရှိနေသေးပေမယ့် ကောင်းမွန်လာပြီဖြစ်ပါတယ်။
Source: New York Post #World_News #သန်ကောင်တစ်ကောင်ကိုတွေ့ရှိ
#Yangon_Times
- Category: World
- Hits: 112