Published 14 Sept 2022

SCO လို့ခေါ်တဲ့ ရှန်ဟိုင်းပူးပေါင်းဆောင်ရွက်ရေးအဖွဲ့ရဲ့ ၂၂ကြိမ်မြောက် နိုင်ငံခေါင်းဆောင်များကောင်စီအစည်းအဝေးမှာ ဘုံနားလည်မှုအသစ်တွေတည်ဆောက်ဖို့နျင့် ပူးပေါင်းဆောင်ရွက်ရေးကဏ္ဍသစ်ဖွင့်လှစ်ဖို့အတွက် နိုင်ငံတကာနှင့်ဒေသဆိုင်ရာ ပြဿနာတွေကိုကျယ်ကျယ်ပြန့်ပြန့်ဆွေးနွေးကြမှာဖြစ်တယ်လို့ SCO ရဲ့ အတွင်းရေးမှူးချုပ် ကျန်မင်းက ပြောပါတယ်။

ယခုနှစ်ထိပ်သီးအစည်းအဝေးကို ဥဘက်ကစ္စတန်နိုင်ငံ စမတ်ကန်မြို့မှာ ကြာသပတေးနေ့နှင့်သောကြာနေ့များမှာ ကျင်းပသွားမှာဖြစ်ပြီး ကိုဗစ်-၁၉ကြောင့်ဖြစ်ရတဲ့ နိုင်ငံတကာအခြေအနေရှုပ်ထွေးမှုတွေ၊ ယူကရိန်းအကျပ်အတည်း၊ စွမ်းအင်နှင့်စားနပ်ရိက္ခာလုံခြုံရေးကိစ္စတွေနှင့် တစ်ဖက်သတ်ကြီးစိုးမှုဝါဒတွေအကြောင်း ဆွေးနွေးကြပါလိမ့်မယ်။

“ရာသီဥတုပြောင်းလဲခြင်းဟာ SCO ရဲ့ ဆွေးနွေးပွဲတွေမှာ အမြဲအရေးကြီးတဲ့ ကိစ္စတစ်ရပ်ဖြစ်ပါတယ်။ ထိုနည်းတူ ပြီးခဲ့တဲ့ နစ်များက ကမ္ဘာလုံးဆိုင်ရာ ထောက်ပို့ကွင်းဆက်ရဲ့ လုံခြုံရေးကို ဆက်လက်ထိန်းသိမ်းဖို့ကိစ္စလည်းပါဝင်ပါတယ်။ ပြောင်းလဲမှုအသစ်တွေနှင့် စိန်ခေါ်မှုအသစ်တွေကို SCO ခေါင်းဆောင်တွေဟာ အပြည့်အဝသတိမူမိကြလိမ့်မယ်လို့ ကျွန်တော်ယုံကြည်ပါတယ်။ ဒီကိစ္စရပ်တွေကို ဒီနှစ်ထိပ်သီးအစည်းအဝေးမှာ သူတို့ဆွေးနွေးကြပါလိမ့်မယ်” လို့ အတွင်းရေးမှူးချုပ်ကျန်မင်းက ပြောပါတယ်။

“၂၀၀၁ခုနှစ်တည်ထောက်ပြီးကတည်းက ဒီအဖွဲ့ဟာ တင်းပြည့်အဖွဲ့ဝင် (၈)နိုင်ငံ၊ လေ့လာသူအဖြစ် (၄)နိုင်ငံနှင့် ဆွေးနွေးဖက် နိုင်ငံတွေအများကြီးရှိပါတယ်။ ကမ္ဘာ့ငြိမ်းချမ်းရေးနှင့်လုံခြုံရေးအတွက် တောင့်တင်းတဲ့ မဏ္ဍိုင်ကြီးတစ်ခုသာမကဘဲ ဒေသဆိုင်ရာ စီးပွာရေးနှင့်ကုန်သွယ်ရေး ပူးပေါင်းဆောင်ရွက်မှုမြှင့်တင်ပေးတဲ့ အရေးကြီးတဲ့အင်အားတစ်ခုလည်းဖြစ်ပါတယ်” လို့သူကပြောပါတယ်။

“ခါးပတ်နှင့် လမ်းကြောင်း ဦးစီးဦးရွက်အစီအစဉ် BRI ရဲ့အောက်မှာ သိသာထင်ရှားတဲ့ စီးပွားရေးတိုးတက်ဖြစ်ထွန်းမှုတွေ၊ ပြည်သူတွေရဲ့ ဘဝတွေအကြီးအကျယ်တိုးတက်လာတာတွေနှင့် အချင်းချင်းပိုမိုနီးကပ်လာကြတာတွေကို  SCO အဖွဲ့ဝင်နိုင်ငံတွေ မျက်ဝါးထင်ထင်တွေ့မြင်ခဲ့ကြပြီးဖြစ်ပါတယ်” လို့လည်း သူကဆက်ပြောပါတယ်။

“ BRIနှင့်ချိတ်ဆက်မှုသဘောက ပူးပေါင်းဆောင်ရွက်မှုနှင့်ဗဟုဝါဒပဲဖြစ်တယ်။အဲဒါဟာ SCO ရဲ့ရည်ရွယ်ချက်တွေနှင့် လည်းထပ်တူဖြစ်နေတယ်။ ရလာဒ်အားဖြင့် SCO နိုင်ငံတွေအကြားမှာ BRI ဟာ ကောင်းမွန်စွာ အကောင်အထည်ဖော်နိုင်နေပါတယ်။ ကုန်သွယ်ရေးတိုးတက်တာ၊ရထားလမ်းနှင့်ကားလမ်းသယ်ယူပို့ဆောင်ရေး တွေကောင်းမွန်လာတာတွေ၊ပြီးတော့ ထောက်ပို့စွမ်းဆောင်ရည်မြင့်မားလာတာတွေသာမကဘဲ ယဉ်ကျေးမှုဖလှယ်ခြင်းနှင့် ခရီးသွားလုပ်ငန်းဖွံ့ဖြိုးရေးတွေမှာလည်း မြင့်မားလာတာ တွေ့ကြရပါတယ်” လို့ သူကပြောပါတယ်။

SCO ကို ၂၀၀၁ခုနှစ်မှာ တရုတ်နိုင်ငံ ရှန်ဟိုင်းမြို့မှာ ဖွဲ့စည်းတည်ထောင်ခဲ့ပါတယ်။ ဒီအဖွဲ့ဟာ နိုင်ငံတွေအကြား နိုင်ငံရေး၊စီးပွားရေးနှင့်လုံခြုံရေးဆိုင်ရာ အမြဲတမ်းအဖွဲ့တစ်ခုဖြစ်ပါတယ်။ လက်ရှိမှာ တရုတ်၊ကာဇက်စတန်၊ကာဂျစ္စတန်၊ရုရှား၊တာဂျစ်ကစ္စတန်၊ဥဘက်ကစ္စတန်၊အိန္ဒိယနှင့် ပါကစ္စတန်နိုင်ငံ ၈နိုင်ငံဟာ တင်းပြည့်အဖွဲ့ဝင်နိုင်ငံတွေဖြစ်ကြပါတယ်။

ဒီအဖွဲ့ကြီးဟာ ယူရိုးရှားတိုက်ကြီးရဲ့ ငါးပုံသုံးပုံခြုံလွှမ်းထားပါတယ်။ ကမ္ဘာ့လူဦးရေရဲ့ တစ်ဝက်နီးပါးမျှရှိပါတယ်။ ထို့အပြင် ၂၀၂၁ခုနှစ်စာရင်းဇယားများအရ ကမ္ဘာ့ဂျီဒီပီရဲ့ ၂၀ရာခိုင်နှုန်းလည်းကိုယ်စားပြုထားတာဖြစ်ပါတယ်။

Source CCTV+

#SCO

#Shanghai_Cooperation_Organization

#China_Russia_India_SOC