#Local_News
Published _18 October 2022

နေတိုးနှင့် ဥရောပသမဂ္ဂတို့အပေါ်တွင် ပြင်သစ်၏ ရပ်တည်ချက်ကို ပြောင်းလဲရန်အတွက် ထောင်နှင့်ချီသည့် ဆန္ဒထုတ်ဖော်သူများသည် ပါရီမြို့လယ်တွင် ချီတက်ဆန္ဒပြခဲ့ကြသည်။

အဆိုပါ ကြီးမားသည့် ချီတက်ဆန္ဒပြမှုကြီးကို ပြင်သစ်အမျိုးသားလွှတ်တော်၏ အမျိုးသားစုဝေးပွဲ လက်ထောက်ခေါင်းဆောင်ဟောင်း ဖလော်ရီယန် ဖီလီပေါ့တ် ဦးဆောင်သည့် လက်ယာယိမ်းပါတီဖြစ်သည့် The Patriots မှ စီစဉ်ခဲ့ခြင်းဖြစ်သည်။

ဥရောပတစ်ဝန်းတွင် လူနေမှုစရိတ်အကျပ်အတည်းများ ကြုံတွေ့လာရပြီးနောက် ပြင်သစ်နှင့် ဂျာမဏီအပါအဝင် အချို့ဥရောပနိုင်ငံများတွင် လူအများအပြား ချီတက်ဆန္ဒပြမှုများဖြစ်ပွားခဲ့သည်။ ဥရောပနိုင်ငံများ၌ ဆန္ဒပြမှုတွင် ရေနံချက်စက်ရုံများမှ အလုပ်သမားသမဂ္ဂများလည်း ပါဝင်ပူးပေါင်းခဲ့ကြသည်။ ထိုသို့ဆန္ဒပြပွဲများ ဖြစ်ပွားပြီးနောက် ပြင်သစ်နိုင်ငံ မြို့တော်ပါရီတွင် ထောင်နှင့်ချီသည့် ဆန္ဒထုတ်ဖော်သူများသည် နေတိုးနှင့် ဥရောပသမဂ္ဂတို့ကို ဆန့်ကျင်ကြောင်း ချီတက်ဆန္ဒပြခဲ့ကြသည်။

ယူကရိန်းစစ်ပွဲ စတင်ပြီးနောက် နေတိုးနှင့် ဥရောပသမဂ္ဂတို့သည် ယူကရိန်းဘက်မှ ရပ်တည်ပြီး ရုရှားနှင့် အတိုက်အခံများ ပြုလုပ်ခဲ့ကြသည်။ ရုရှားမှလည်း တုံ့ပြန်သည့်အနေဖြင့် ၎င်း၏ ဥရောပအပေါ် စွမ်းအင်တင်ပို့မှုများကို ဖြတ်တောက်ခဲ့သည်။ ထိုသို့ စွမ်းအင်တင်ပို့မှု ဖြတ်တောက်လိုက်သည့်အခါ ဥရောပတစ်ဝန်း စွမ်းအင်ဈေးနှုန်းများမြင့်တက်လာပြီး လူနေမှုစရိတ် အကျပ်အတည်းများ ဖြစ်ပေါ်လာခဲ့သည်။

ရုရှား၏ ဥရောပအပေါ် စွမ်းအင်တင်ပို့မှု ဖြတ်တောက်ခြင်းအပေါ် တုံ့ပြန်သည့်အနေဖြင့် ပြင်သစ်၏ စွမ်းအင်ကုမ္ပဏီကြီး TotalEnergies က ဥရောပ၏ စွမ်းအင်လိုအပ်ချက်ကို ဖြည့်တင်းရန် ကြိုးစားခဲ့သည်။ သို့သော် TotalEnergies ၏ ကြိုးပမ်းမှုသည် အရာမထင်ဘဲ ပြင်သစ်နိုင်ငံအတွင်းမှာပင် စက်သုံးဆီပြတ်တောက်မှုများ ဖြစ်ပေါ်လျက်ရှိနေသည်။

ပြင်သစ်သမ္မတ အီမန်နျူရယ် မက်ခရွန်က နိုင်ငံတွင်းဖြစ်ပွားနေသည့် စွမ်းအင်အကျပ်အတည်းနှင့်ပတ်သက်ပြီး ထိတ်လန့်ကြောက်ရွံမှု မရှိကြရန် ပြောကြားခဲ့သည်။

မြို့တော် ပါရီမြို့လယ်မှ ထောင်နှင့်ချီသည့် ဆန္ဒထုတ်ဖော်သူများသည် ဥရောပသမဂ္ဂအဖွဲ့မှ ပြင်သစ်ထွက်ခွာရန် ရည်ညွှန်းသည့် တောင်းဆိုချက် ဆိုင်းဘုတ်ငယ်များကို ကိုင်ဆောင်ဆန္ဒပြခဲ့ကြပြီး၊ ဆန္ဒပြသူအများအပြားသည် ပြင်သစ်နိုင်ငံတော်အလံကို ဝှေ့ယမ်းခဲ့ကြသည်။

ထို့အပြင် ဆန္ဒထုတ်ဖော်သူများသည် ရုရှား-ယူကရိန်း ပဋိပက္ခတွင် ရုရှားအပေါ် ပိတ်ဆို့အရေးယူမှုများ ချမှတ်ခဲ့သည့် နေတိုးအဖွဲ့ကိုလည်း ဆန္ဒပြခဲ့ကြပြီး၊ နေတိုးအဖွဲ့သည် စီးပွားရေးကို အနှောက်အယှက်ပေးပြီး စွမ်းအင်နှင့် ကျန်းမားရေးကန့်သတ်ချက်များကို ဖြစ်ပေါ်စေခဲ့သည်ဟု ရှုတ်ချခဲ့ကြသည်။

ထောင်နှင့်ချီသည့် ဆန္ဒထုတ်ဖော်သူများသည် ပြင်သစ်နိုင်ငံ မြို့တော် ပါရီမြို့လယ်ရှိ ပါလီမန်အဆောက်အဦအနီးအထိ ဆန္ဒပြသခဲ့ကြပြီး၊ ပြင်သစ်အာဏာပိုင်များသည် အဆိုပါ ကြီးမားသည့် ဆန္ဒပြသူများနှင့်ပတ်သက်ပြီး မှတ်ချက်ပြုခြင်းမရှိခဲ့သလို ပြင်သစ်မီဒီယာများမှလည်း အဆိုပါဆန္ဒပြမှုများကို မဖော်ပြဘဲ လျစ်လျူရှုခဲ့ကြသည်။

နေတိုးနှင့် ဥရောပသမဂ္ဂတို့၏ ရုရှားအပေါ် ပိတ်ဆို့အရေးယူမှုများကြောင့် ပြင်သစ်နိုင်ငံသည် လက်ရှိအချိန်တွင် စွမ်းအင်အကျပ်အတည်းနှင့် ကြုံတွေ့ရလျက်ရှိနေပြီး၊ လာမည့် ဆောင်းရာသီတွင် နိုင်ငံအတွင်း လျှပ်စစ်ဓာတ်အားပြတ်တောက်မှု ကြုံတွေ့နိုင်ချေ မြင့်တက်နေသည်။

လက်ယာယိမ်း နိုင်ငံရေးသမားများကလည်း ရုရှားအပေါ် အရေးယူပိတ်ဆို့မှုများသည် အလုပ်မဖြစ်နိုင်ဘဲ စွမ်းအင်အကျပ်အတည်းများကြောင့် ပြင်သစ်ပြည်သူများနှင့် ဥရောပတစ်ဝန်းရှိ ပြည်သူများကိုသာ ထိခိုက်စေမည်ဖြစ်ကြောင်း ပြောကြားထားကြသည်။

#Yangon_Media_Group