၂၆ ဇန်နဝါရီ ၂၀၂၄

ကိုယ်ပိုင်အုပ်ချုပ်ခွင့်၊ကိုယ်ပိုင် ပြဋ္ဌာန်းခွင့်များနှင့်ပတ်သက်၍ ဆောင်ရွက်ရာတွင်လည်း နိုင်ငံရေးအရ ဆွေးနွေး ပြီးလွှတ်တော်တွင်အတည်ပြုရန်လိုကြောင်းနှင့်လက်နက်ကိုင်လမ်းစဉ်ဖြင့်တောင်းဆို၍ မရနိုင်ကြောင်း နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်ကပြောကြားသည်။

ယနေ့ ဇန်နဝါရီ၂၆ ရက်က နေပြည်တော်ရှိ နစက ဥက္ကဋ္ဌရုံး အစည်းအဝေးခန်းမတွင် ကျင်းပသည့် ပြည်ထောင်စု သမ္မတမြန်မာနိုင်ငံတော် လုံခြုံရေး; တည်ငြိမ်အေးချမ်းရေးနှင့် တရားဥပဒေစိုးမိုးရေးကော်မတီ အစည်းအဝေး အမှတ်စဉ်(၁/၂၀၂၄)တွင် ဗိုလ်ချုပ်မှူးကြီးက ယင်းကဲ့သို့ ထည့်သွင်းပြောကြားခဲ့ခြင်းဖြစ်ကြောင်း နစက၏ သတင်းထုတ်ပြန်ချက်အရသိရသည်။

ယခုဖြစ်ပွားနေသည့် ပြဿနာမှာ ကိုယ်ပိုင်ပြဋ္ဌာန်းခွင့်! ကိုယ်ပိုင်အုပ်ချုပ်ခွင့်နှင့် ကိုယ်ပိုင်ပြည်နယ်၊ဒေသများရရှိအောင် ဥပဒေပြင်ပမှ တောင်းဆိုလာခြင်းဖြစ်ပြီး နိုင်ငံရေးနှင့်ပတ်သက်၍ ဥပဒေစည်းကမ်းများနှင့်အညီဆောင်ရွက်တတ်ရန် လိုအပ်ချက်များစွာရှိနေသေးကြောင်းလည်း ဗိုလ်ချုပ်မှူးကြီးက ပြောဆိုခဲ့သည်။

ဇွဲ့စည်းပုံအခြေခံဥပဒေ(၂၀၀၈ ခုနှစ်) သည် ဓဲပေးခွင့်ရှိသူများ၏ ၉၂ ဒသမ ၄၈ရာခိုင်နှုန်းက ထောက်ခံထားသည့် ဥပဒေဖြစ်ကြောင်း၊ အဆိုပါအခြေခံဥပဒေသည်ပြည်သူ အများစု၏ ဆန္ဒမဲများဖြင့် အတည်ပြုပြဋ္ဌာန်းထားခြင်းဖြစ်သဖြင့် ကျော်လွန်ဆောင်ရွက်၍ မရကြောင်းလည်း ဗိုလ်ချုပ်မှူးကြီးက အသိပေးပြောကြားခဲ့ကြောင်း သတင်းထုတ်ပြန်ချက်တွင် ဖော်ပြထားသည်။

ယင်းအပြင် နစကအနေဖြင့် တိုင်းပြည်ကို ဖွဲ့စည်းပုံအခြေခံဥပဒေ(၂၀၀၈ခုနှစ်)နှင့် အညီသာ  ထိန်းသိမ်း ဆောင်ရွက်နေခြင်းဖြစ်ကြောင်းလည်း နစက ဥက္ကဋ္ဌက  ဖြည့်စွက်ပြောဆိုသည်။

ထို့အပြင် ပြည်သူ့လုံခြုံရေးစနစ်အကြောင်းကိုလည်း ဗိုလ်ချုပ်မှူးကြီးက အစည်းအဝေးတွင် ထည့်သွင်းပြောကြားခဲ့သည်။

ပြည်သူ့လုံခြုံရေးစနစ်သည် အရေးကြီးပြီး ပြည်သူလူထုအုပ်ချုပ်ရေး အဖွဲ့ အစည်းများနှင့် လုံခြုံရေးတာဝန်ရှိသူများအားလုံး ညီညီညွတ်ညွတ်ဖြင့် စည်းလုံးမှုရှိလုံခြုံရေး တည်ငြိမ်အေးချမ်းရေးနှင့် တရားဥပဒေစိုးမိုးရေးလုပ်ငန်းရပ်များသည်လည်း အောင်မြင်နိုင်မည်ဖြစ်ကြောင်းပြောသည်။

အဓိကမှာ အကြမ်းဖက်သူများအား သတင်းပေးပို့ရန်ဖြစ်ပြီးသတင်းပေးပို့သူကိုလည်း လျှို့ဝှက်ပေးရမည်ဖြစ်ကြောင်း၊ ထို့ကြောင့် ပြည်သူ့လုံခြုံရေးစနစ်ကို စနစ်တကျဖြင့် အကောင်အထည်ဖော် ဆောင်ရွက်ရန်လိုပြီး ပြည်သူ့လုံခြုံရေးစနစ်မှ တဆင့် ပြည်သူ့ ကာကွယ်ရေးစနစ်သို့ ဖော်ဆောင်သွားရမည်ဖြစ်ကြောင်းဖြင့်လည်း ဗိုလ်ချုပ်မှူးကြီးက ဆက်လက်ပြောဆိုသည်။

အစည်းအဝေးသို့ နစက တွဲဖက်အတွင်းရေးမှူးဒုတိယဗိုလ်ချုပ်ကြီး ရဲဝင်းဦး၊ ကောင်စီဝင်များ ဖြစ်ကြသည့် ဗိုလ်ချုပ်ကြီး တင်အောင်စန်း၊ဗိုလ်ချုပ်ကြီး ရာပြည့်၊ ဦး၀ဏ္ဍမောင်လွင်; ဒေါ်ခွဲဘူနှင့် မန်းငြိမ်းမောင်၊ ပြည်ထောင်စုဝန်ကြီးများ ၊ ပြည်ထောင်စုရာထူးဝန်အဖွဲ့ ဥက္ကဋ္ဌ နှင့် တာဝန်ရှိသူများ တက်ရောက်ဆွေးနွေးခဲ့ကြကြောင်းသိရှိရသည်။

-knl/ymg