#World_Health
Published 24 December 2023


အရောင်တွေကို ခွဲခြားပြီး မမြင်နိုင်တဲ့ အခြေအနေကို ကာလာဘလိုင်းလို့ ခေါ်ကြပါတယ်။

 

များသောအားဖြင့် အစိမ်းရောင်တွေ၊ အနီရောင်တွေ ရံဖန်ရံခါ အပြာရောင်တွေကို ခွဲခြားဖို့ ခက်ခဲလေ့ရှိတယ်လို့ မယ်ရီလန်း အမေရိကန် မျက်စိကျွမ်းကျင်အကယ်ဒမီမှ နာတာရှာဟာ့ဇ်က ပြောပြသွားပါတယ်။

 

မျက်ကြည်လွှာထဲက ဆဲလ်တစ်မျိုးဟာ အလင်းကိုအာရုံခံပြီး ဝင်လာတဲ့အရောင်တွေကို ဦးနှောက်ကနေ ဆုံးဖြတ်ပေးတယ်လို့ ပြောပြပါတယ်။

 

ထိုဆဲလ်တွေထဲက တစ်ခုခု မရှိတာမျိုး၊ အလုပ်မလုပ်တာမျိုး၊ ပုံမှန်ထက်ကွဲပြားပြီး အရောင်အာရုံခံတာမျိုးတို့မှာ အရောင်တွေကို ခွဲခြားပြီး မမြင်နိုင်တော့ပါဘူး။

 

အစိမ်း၊ အနီ၊ အပြာဆဲလ် ၃ ခုစလုံး မရှိဘူးဆိုရင်တော့ ကာလာဘလိုင်း အခြေအနေ ပြင်းထန်ပါတယ်။

 

သာမန်ကာလာဘလိုင်း ဖြစ်သူတွေကတော့ အလင်းရောင်ကောင်းတဲ့နေရာမှာ အရောင်တွေကို သာမန်အတိုင်း မြင်နိုင်ပေမယ့် အလင်းမှိန်တဲ့နေရာမှာတော့ မြင်နိုင်ရန် ခက်ခဲလေ့ရှိပါတယ်။

 

ကာလာဘလိုင်း အဆိုးဆုံးခံစားရသူတွေက အရာရာတိုင်းကို မီးခိုရောင်အသွင်အပြင်သာ မြင်ရလေ့ရှိပြီး ဒါကတော့ အဖြစ်နည်းပါတယ်။

 

အရောင်မခွဲခြားနိုင်ခြင်းဟာ မျက်စိနှစ်ဖက်စလုံးမှာ တူညီစွာဖြစ်ပွားပြီး တစ်သက်လုံး ခံစားရပါတယ်။

 

ကာလာဘလိုင်းဖြစ်တဲ့ လူအများစုဟာ များသောအားဖြင့် မွေးကတည်းက ပါလာကြတာ ဖြစ်ပါတယ်။

 

ဒါ့အပြင် အမျိုးသားတွေက ကာလာဘလိုင်းဖြင့် မွေးဖွားနိုင်ခြေ ပိုများနေပါတယ်။

 

ခန့်မှန်းခြေအားဖြင့် အမျိုးသား ၁၀ ဦးမှာ ၁ ဦးနှုန်းက ကာလာဘလိုင်း ဖြစ်တတ်ပြီး ဥရောပမြောက်ပိုင်းလူမျိုး အမျိုးသားတွေမှာ ပိုမိုအဖြစ်များပါတယ်။

 

အသက်အရွယ် နောက်ပိုင်းမှာမှ အချိုု့သော ရောဂါတွေ၊ ဆေးဝါးတွေ၊ မျက်စိထိခိုက်တာတွေကြောင့် အရောင်မခွဲခြားနိုင်တာမျိုးလည်း ရှားရှားပါးပါး ဖြစ်တတ်ပါတယ်။

 

ခံစားရတတ်တဲ့ လက္ခဏာအနေနဲ့ အရောင်တွေနဲ့ အလင်းအမှောင်တွေကို သာမန်အတိုင်း ခွဲခြားခြင်းမလုပ်နိုင်တာမျိုး ဖြစ်ပါတယ်။

 

မွေးကတည်းက အရောင်မခွဲခြားနိုင်သူတွေဟာ အသက်အန္တရာယ် မရှိတတ်ပေမယ့် ပုံမှန်အတိုင်း အသက်ရှင်နေထိုင်သွားနိုင်ပါတယ်။

 

ဒါပေမဲ့ မီးပွိုင့်တွေလို အရောင်ခွဲခြားသတ်မှတ်ထားတဲ့ ကိစ္စတွေမှာ အခက်အခဲ ဖြစ်နိုင်ပါတယ်။

 

ကာလာဘလိုင်း အဆိုးရွားဆုံး အခြေအနေ မဟုတ်ရင်တော့ အမြင်အာရုံသိရှိမှုကို မသက်ရောက်နိုင်ပါဘူး။

 

ကာလာဘလိုင်းရှိမရှိကို စမ်းသပ်နိုင်တဲ့ စစ်ဆေးနည်းများရှိပါတယ်။

 

မွေးရာပါ အရောင်မခွဲခြားနိုင်ခြင်းအတွက် အခုအချိန်ထိ ကုသနည်း မရှိသေးပါဘူး။

 

#World_Health #အရောင်မခွဲခြားနိုင်ခြင်း #ကုသနည်းမရှိ #Source: New York Post