#World_Soccer
Published_16 June 2023

အင်္ဂလိပ်ဘောလုံးကလပ်အသင်း မန်ချက်စတာယူနိုက်တက်ဟာ အသင်းကို ကာတာနိုင်ငံမှ ရှိတ်ခ်ဂျက်ဆင်ဘင်ဟာမက်အယ်ထာနီဦးဆောင်တဲ့ လုပ်ငန်းစုထံသို့ ဒေါ်လာ ၆ ဘီလီယံကျော်ဖြင့် သီးသန့်ရောင်းချရန် ညှိနှိုင်းနေကြောင်း အဆိုပါကိစ္စနဲ့နီးစပ်သူများက ကြာသပတေးနေ့မှာ ပြောကြားလိုက်ပါတယ်။

သဘောတူညီမှုက မသေချာသေးပေမယ့် ပင်လယ်ကွေ့ဒေသရှိ အချမ်းသာဆုံးပုဂ္ဂိုလ်တွေထဲက တစ်ဦးဖြစ်တဲ့ ကာတာဝန်ကြီးချုပ်ဟောင်းရဲ့သားဖြစ်သူ 'ရှိတ်ခ်ဂျက်ဆင်'က အားကစားရေးရာမှာ အထင်ကရနာမည်ကြီးအသင်းတစ်သင်းကို ပိုင်ဆိုင်ရယူနိုင်ဖို့ ကြိုးပမ်းအားထုတ်မှုတွေ မြင်တွေ့နေရတာဖြစ်ပါတယ်။

မန်ချက်စတာယူနိုက်တက်မှာ ရှယ်ယာအနည်းစုပိုင်ဆိုင်ပြီး အသင်းကိုချုပ်ကိုင်ထားတဲ့ ဂလေဇာမိသားစုအဖွဲ့ဝင်တွေကတော့ သဘောတူညီချက် တစ်စိတ်တစ်ပိုင်းအဖြစ် ငွေသားထုတ်သွားနိုင်တယ်လို့ သတင်းရင်းမြစ်တစ်ခုက ပြောကြားခဲ့ပါတယ်။

ဂလေဇာမိသားစုက လက်ရှိမှာ ဓာတုပစ္စည်းထုတ်လုပ်ရေး INEOS တည်ထောင်သူ ဗြိတိန်ဘီလျံနာ'ဂျင်မ်ရက်ကလစ်ဖ်'ရဲ့ ကမ်းလှမ်းချက်ထက် ကာတာရဲ့ကမ်းလှမ်းချက်ကို ပိုပြီးအလေးပေးစဉ်းစားနေပါတယ်။

ရက်ကလစ်ဖ်ရဲ့ကမ်းလှမ်းချက်ကြောင့် ဂလေဇာတို့ဟာ မန်ချက်စတာယူနိုက်တက်ကို ဆက်ပြီးစိတ်ဝင်စားနေဦးမယ်လို့ မျှော်လင့်ရပါတယ်။

ယခုကာလအပိုင်းအခြားမှာတော့ မန်ချက်စတာယူနိုက်တက်ဟာ ရှိတ်ခ်ဂျက်ဆင်ကလွဲပြီး အခြားမည်သူနဲ့မျှ ညှိနှိုင်းသွားဦးမှာမဟုတ်ဘဲ ဘယ်လောက်အထိ ကြာရှည်နေဦးမလဲဆိုတာ မသိနိုင်ပါဘူး။

အခြေအနေက ဘာမဆိုဖြစ်နိုင်နေပြီး ရက်ကလစ်ဖ်ထံမှ ကမ်းလှမ်းချက်အသစ်ရလာပါက ရှိတ်ခ်ဂျက်ဆင်အနေနဲ့ တစ်ဦးတည်းပိုင်ဆိုင်ဖို့ အတားအဆီးဖြစ်လာနိုင်ကြောင်း သတိပေးထားပါတယ်။

မန်ချက်စတာယူနိုက်တက်နဲ့ ရှိတ်ခ်ဂျက်ဆင်တို့ရဲ့ ကိုယ်စားလှယ်တွေကတော့ တုန်ပြန့်ဖြေကြားခြင်း မရှိသေးပါဘူး။

မန်ချက်စတာယူနိုက်တက်အတွက် ဒေါ်လာ ၆ ဘီလီယံနဲ့အထက် ကမ်းလှမ်းချက်ဟာ အားကစားလောကမှာ အများပြားဆုံးပမာဏဖြစ်လာနိုင်ပါတယ်။

ဒေါ်လာ ၆ ဘီလီယံကျော်ဖြင့်ရောင်းချဖြစ်ပါက မန်ချက်စတာယူနိုက်တက်အသင်းဟာ ယမန်နှစ်တစ်နှစ်တာဝင်ငွေရဲ့ ၁၀ ဆကျော် ပိုပြီးတန်ကြေးရှိလာမှာဖြစ်ပါတယ်။

ဂလေဇာမိသားစုဟာ ၂၀၀၅ ခုနှစ်က အသင်းကို ပေါင်သန်း ၇၉၀ ဖြင့် ဝယ်ယူခဲ့တာဖြစ်ပါတယ်။

အင်္ဂလိပ်အမှတ်ပေးချန်ပီယံအကြိမ် ၂၀ စံချိန်တင်ရရှိထားတဲ့ မန်ချက်စတာယူနိုက်တက်အသင်းဟာ ကမ္ဘာတဝှမ်းပရိသတ်ပေါင်း သန်း ၆၅၀ ရှိကာ အများစုက ပိုင်ရှင်ပြောင်းလဲပေးဖို့ တောင်းဆိုနေကြပါတယ်။

ဂလေဇာလက်ထက်မှာ အသင်းက အကျဘက်သို့သိသိသာသာရောက်ရှိနေပြီး ၂၀၁၂-၂၀၁၃ ဘောလုံးရာသီက ဂန္တဝင်နည်းပြ'အဲလက်စ်ဖာဂူဆန်' နောက်ဆုံးကိုင်တွယ်ခဲ့တဲ့နှစ်မှာသာ အမှတ်ပေးဖလားကို နောက်ဆုံးအကြိမ်ရရှိခဲ့ပါတယ်။

ယခုနှစ် 'အဲရစ်တန်ဟက်ဂ်'လက်ထက်မှာ ပြည်တွင်းလိဂ်ဖလားရရှိခဲ့ပေမယ့် အမှတ်ပေးဇယားမှာ အဆင့် ၃ ဖြင့် မြို့ခံပြိုင်ဘက် မန်ချက်စတာစီးတီးနောက် ၁၄ မှတ်ပြတ်ကျန်ခဲ့ပါတယ်။

ယခုနောက်ပိုင်းမှာ အရှေ့အလယ်ပိုင်းနိုင်ငံအများအပြားက အားကစားဘက်မှာ ရင်းနှီးမြှုပ်နှံမှုကြီးများ ပြုလုပ်လာကြပါတယ်။
Source: Reuters
#World_Soccer #မန်ယူအသင်း #ကာတာမှရှိတ်ခ်ဂျက်ဆင်ဘင်ဟာမက်
#YMG #Yangon_Media_Group