#World_Health
Published 2 March 2023
စားသောက်ချိန်မှာ မစားဘဲနေခြင်းက ခန္ဓာကိုယ်လုပ်ဆောင်ချက်တွေကို ထိခိုက်စေကြောင်း အရင်ကသိထားကြသလို မစားမသောက်ဘဲ အချိန်ကြာမြင့်စွာနေခြင်းကလည်း နှလုံးသွေးကြောရောဂါများနဲ့ ကင်ဆာဖြစ်နိုင်ချေများကြောင်း သုတေသီများတွေ့ရှိထားပါတယ်။
မကြာမီကလေ့လာချက်တစ်ခုမှာလည်း မနက်စာမစားခြင်းက ထင်ထားတာထက်ပိုပြီး ဘေးဥပါဒ်ဖြစ်စေနိုင်ကြောင်း အစ်ကန်ဆေးတက္ကသိုလ်နဲ့ ဟားဗတ်ဒ်ဆေးတက္ကသိုလ်တို့မှ သုတေသီများက ဖော်ပြခဲ့ကြပါတယ်။
သုတေသီတွေက ကြွက်တွေနဲ့စမ်းသပ်ခဲ့ကြရာ အစာမစားခြင်းက ဦးနှောက်မှာဘယ်လိုတုန့်ပြန်ဖြစ်ပေါ်စေလဲဆိုတာကို တွေ့ရှိခဲ့ကြပါတယ်။
တစ်နေ့တာရဲ့ နံနက်စာကို မစားဘူးဆိုရင် ကိုယ်ခံအားစနစ်ကိုထိခိုက်စေပြီး ခန္ဓာကိုယ်ကနေ ရောဂါကူးစက်မှုတွေကို တိုက်ထုတ်ဖို့ခက်ခဲတတ်ပါတယ်။
အချိန် ၄ နာရီကြာ ဒါမှမဟုတ် ၂၄ နာရီကြာ အစာမစားခြင်းက ကိုယ်ခံအားစနစ်ကို ဘယ်လိုထိခိုက်စေလဲဆိုတာကို ပိုမိုသိရှိနိုင်ရန် လေ့လာခဲ့ကြတာဖြစ်ပါတယ်။
ကြွက်တွေကို အဖွဲ့ ၂ ဖွဲ့ခွဲပြီး တစ်ဖွဲ့က အိပ်ရာနိုးတာနဲ့ မနက်စာစားစေကာ ကျန်တစ်ဖွဲ့ကတော့ မနက်စာမစားခိုင်းပါဘူး။
မနက်နိုးတဲ့အချိန်၊ နောက်ထပ် ၄ နာရီကြာတဲ့အချိန်၊ ၈ နာရီကြာတဲ့အချိန် အသီးသီးတို့မှာ ကြွက်တွေဆီကနေ သွေးနမူနာများရယူခဲ့ပါတယ်။
အစာမစားစေတဲ့အဖွဲ့ဟာ သွေးဖြူဥတည်ရှိမှုမှာ သိသိသာသာကွဲပြားနေတာကို တွေ့ရှိခဲ့ကြပါတယ်။
သွေးဖြူဥတွေကို ရိုးတွင်းခြင်ဆီထဲမှာ ထုတ်လုပ်ပြီး ခန္ဓာကိုယ်အနှံ့လည်ပတ်ကာ ရောဂါတွေကို ကူညီတိုက်ထုတ်ပေးပါတယ်။
အစာမစားရတဲ့ကြွက်တွေရဲ့ သွေးကြောတွေထဲမှာ ထိုဆဲလ်တွေ ၉၀ ရာခိုင်နှုန်းထိ ပျောက်ဆုံးနေတာကို တွေ့ခဲ့ကြပါတယ်။
၂၄ နာရီကြာတဲ့အထိ မစားဘဲနေစေခိုင်းရာ ဆဲလ်တွေက သွေးကြောတွေထဲ ပြန်ဝင်သွားတဲ့အချိန်မှာ ရောင်ရမ်းလာပြီး ရောဂါကူးစက်မှုကို ကာကွယ်ဖို့ခက်ခဲလာပါတယ်။
အချိန်အတိုင်းအတာတစ်ခုအထိ အစာမစားဘဲ ကျင့်ကြံနေထိုင်ခြင်းက ကျန်းမာစေတယ်ဆိုပေမယ့် ဘေးအန္တရာယ်တွေရှိလာနိုင်တာကိုလည်း သတိပြုသင့်ကြောင်း နှလုံးသွေးကြောသုတေသနတက္ကသိုလ်မှ ညွှန်ကြားရေးမှူး'ဖလစ်ဆွာစကီ'က ပြောကြားခဲ့ပါတယ်။
"ထိုဆဲလ်တွေက အခြားရောဂါတွေအတွက် အလွန်အရေးကြီးပြီး သူတို့လုပ်ဆောင်ချက်တွေ ဘယ်လိုထိန်းချုပ်လဲဆိုတာကို သိရဖို့ကလည်း အလွန်အရေးကြီးပါတယ်" လို့ ပြောပြပါတယ်။
အစာမရှိတဲ့အချိန်မှာ ဦးနှောက်ရဲ့အချို့အစိတ်အပိုင်းတွေက သွေးဖြူဥတွေနဲ့ သူတို့ရဲ့တုန့်ပြန်မှုတွေကို တိုက်ရိုက်ထိန်းချုပ်နေကြောင်း တွေ့ခဲ့ကြပါတယ်။
အစာမရှိခြင်းကြောင့် ဦးနှောက်မှာ စိတ်ဖိစီးမှုကို လှုံ့ဆော်ကာ ဆာလောင်စိတ်နဲ့ ဒေါသစိတ်တို့ကို ဖြစ်ပေါ်စေပါတယ်။
#Source: The Jerusalem Post #World_Health #မနက်စာမစားဘဲ
#breakfast #food #ကိုယ်ခံအားစနစ်ကို #မနက်စာမစားဘဲ #ထိခိုက်စေနိုင် #YMG #Yangon_Media_Group
