#World_Military
Published 31 December 2022
မြောက်ကိုရီးယားဟာ စနေနေ့မနက်ပိုင်းက အရှေ့ဘက်ရေပြင်သို့ ပဲ့ထိန်းဒုံးကျည် ၃ စင်းပစ်လွှတ်ခဲ့ကြောင်း တောင်ကိုရီးယားစစ်တပ်က ပြောကြားလိုက်ပါတယ်။
မြောက်ကိုရီးယားဟာ တောင်ကိုရီးယားလေပိုင်နက်ထဲသို့ ဒရုန်း ၅ စင်းလွှတ်ခဲ့ပြီး ၅ ရက်အကြာမှာပဲ အခုလိုဒုံးကျည်ပစ်လွှတ်ခဲ့တာဖြစ်ပြီး ကိုရီးယားကျွန်းဆွယ်တဝိုက် တင်းမာမှုတွေဆက်လက်မြင့်နေပါတယ်။
ဒုံးကျည်က ဂျပန်ပင်လယ်ထဲသို့ ကျရောက်ခဲ့ကာ ပစ်ခတ်ခဲ့တဲ့ဒုံးကျည်အမျိုးအစားနဲ့ပတ်သက်ပြီး တောင်ကိုရီးယားစစ်တပ်က အသေးစိတ်မပြောထားကြောင်း AFP သတင်းဌာနက ဖော်ပြခဲ့ပါတယ်။
ယခုနှစ်အတွင်း နှစ်နိုင်ငံကြားစစ်ရေးတင်းမာမှု သိသိသာသာမြင့်တက်လာပြီး ၈ ရက်အကြာမှာပဲ အခုနောက်ဆုံးဒုံးကျည်ပစ်လွှတ်ခဲ့တာဖြစ်ပါတယ်။
"မြောက်ကိုရီးယားဘက်က အရှေ့ပင်လယ်(ဂျပန်ပင်လယ်)ထဲကို အမျိုးအမည်မသိရတဲ့ ပဲ့ထိန်းဒုံးကျည် ပစ်လွှတ်ခဲ့ပါတယ်" လို့ တောင်ကိုရီးယားပူးတွဲစစ်ဦးစီးချုပ်က ပြောကြားခဲ့ပါတယ်။
ယခုနှစ်အတွင်း မြောက်ကိုရီးယားဟာ ပဲ့ထိန်းဒုံးကျည် ၇၀ ကျော်စမ်းသပ်ပစ်လွှတ်ခဲ့တာကြောင့် အမေရိကန်နဲ့ တောင်ကိုရီးယားတို့အနေနဲ့ အင်အားပိုမိုတောင့်တင်းအောင် ပြင်ဆင်ထားဖို့ရာ ကျွမ်းကျင်သူများက သတိပေးလိုက်ပါတယ်။
မြောက်ကိုရီးယားဒရုန်းတွေ ဝင်ရောက်လာပြီး တစ်စင်းက ဆိုးလ်မြို့တော်အနီးထိရောက်ခဲ့ပြီးနောက် တောင်ကိုရီးယားအနေနဲ့ ကျူးကျော်ဝင်ရောက်ခံရနိုင်တဲ့ အလားအလာနဲ့ပတ်သက်ပြီး သတိပေးထားပြီးဖြစ်ပါတယ်။
ယင်းတို့စစ်တပ်ဟာ တိုက်လေယာဉ်တွေနဲ့ တိုက်ခိုက်ရေးရဟတ်ယာဉ်များ ကုန်ဆုံးသွားပြီး ၅ နာရီကြာစစ်ဆင်ရေးအပြီးမှာ ဒရုန်းတွေကို ပြန်မရုတ်သိမ်းနိုင်ခဲ့ပါဘူး။
ဝေဖန်မှုတွေခံရပြီးနောက် တောင်ကိုရီးယားကာကွယ်ရေးဝန်ကြီးဟာ လူသိရှင်ကြားတောင်းပန်မှု ပြုလုပ်ခဲ့ရပါတယ်။
တောင်ကိုရီးယားသမ္မတ'ယွန်ဆော့ယောလ်'က ဒီအဖြစ်အပျက်ဟာ သည်းမခံနိုင်သလို ရန်စလာခဲ့ရင် နောက်ဆက်တွဲအကျိုးဆက်တွေ ခံစားရမယ်ဆိုတာကို မြောက်ကိုရီးယားအနေနဲ့ သိရှိထားဖို့ တုန့်ပြန်တိုက်ခိုက်ရမှာဖြစ်တယ်လို့ ပြောကြားခဲ့ပါတယ်။
မြောက်ကိုရီးယား ပြုံယမ်းမြို့မှာ 'ကင်မ်ဂျုံအန်'နဲ့ ပါတီအကြီးတန်းအရာရှိများ အစည်းအဝေးပြုလုပ်လျက်ရှိကာ ၂၀၂၃ ခုနှစ်အတွက် သံတမန်ရေး၊ လုံခြုံရေး၊ စီးပွားရေးတို့အပါအဝင် အဓိကအကြောင်းအရာများအတွက် မူဝါဒရည်မှန်းချက်များ ချမှတ်နေချိန်မှာ အခုလိုဒုံးကျည်ပစ်လွှတ်ခဲ့ကာ ရန်စခဲ့တာဖြစ်ပါတယ်။
Source: WION
#Yangon_Media_Group
