#WorldHealth
Published 4 June 2022
အာဖရိကဝက်တုပ်ကွေးရောဂါတိုက်ဖျက်နိုင်ရန်အတွက် ဝက်တွေမှာထိုးပေးရတဲ့ကာကွယ်ဆေးကို ဗီယက်နမ်နိုင်ငံကအောင်မြင်စွာထုတ်လုပ်နိုင်ခဲ့ကြောင်း ဗုဒ္ဓဟူးနေ့ကထုတ်ပြန်လိုက်ပြီး ဝက်တုပ်ကွေးရောဂါကာကွယ်ဆေးကို ထုတ်လုပ်တင်ပိုနိုင်မယ့် ပထမဆုံးနိုင်ငံဖြစ်လာတော့မှာဖြစ်ပါတယ်။
အာဖရိကဝက်တုပ်ကွေးရောဂါဟာ အဆိုးရွားဆုံးတိရိစ္ဆာန်ကူးစက်ရောဂါတွေထဲက တစ်မျိုးဖြစ်ပြီး ၂၀၁၉ ဖေဖော်ဝါရီတုန်းက ဗီယက်နမ်မှာပထမဆုံးတွေ့ရှိခဲ့တာဖြစ်ပြီး ပြီးခဲ့တဲ့နှစ်အတွင်း ဝက်ကောင်ရေ ၂၀ ရာခိုင်နှုန်းခန့်ကို သုတ်သင်ရှင်းလင်းခဲ့ရပါတယ်။
အဆိုပါရောဂါက ဥရောပနဲ့အာရှသို့မပျံ့ပွားခင် အာဖရိကကနေစတင်ပေါ်ပေါက်ခဲ့ပြီး ကမ္ဘာတဝှမ်းဝက်ကောင်ရေသန်းရာနဲ့ချီ သေဆုံးခဲ့ရပါတယ်။
အာဖရိကဝက်တုပ်ကွေးက လူသားတွေကိုတော့ အန္တရာယ်မဖြစ်စေပါဘူး။
ဒါဟာ တိရိစ္ဆာန်ဆေးကုလုပ်ငန်းအတွက် မှတ်ကျောက်တစ်ခုဖြစ်ကြောင်း၊ ကာကွယ်ဆေးအာနိသင်က ၆ လတာရှည်ခံတာကြောင့် ကမ္ဘာတဝှမ်းမှဝက်မွေးမြူထုတ်လုပ်ရေးလုပ်ငန်းတွေအတွက် အထောက်အကူပြုမှာဖြစ်ကြောင်း စိုက်ပျိုးရေးလက်ထောက်ဝန်ကြီး'ဖောင်ဒုတီယန်'က ထုတ်ပြန်ကြေညာခဲ့ပါတယ်။
ဒီကာကွယ်ဆေးကို ၂၀၁၉ နိုဝင်ဘာလကတည်းက အမေရိကန်ပညာရှင်များနဲ့ ပူးပေါင်းထုတ်လုပ်နေတာဖြစ်ပြီး လက်တွေ့စမ်းသပ်မှု ၅ ကြိမ်ပြုလုပ်ထားပါတယ်။
ကာကွယ်ဆေးရဲ့ဘေးကင်းထိရောက်မှုကို အမေရိကန်စိုက်ပျိုးမွေးမြူရေးဌာနလက်အောက်ရှိ စိုက်ပျိုးမွေးမြူရေးသုတေသနအဖွဲ့အစည်းက အသိအမှတ်ပြုလိုက်ပါတယ်။
"ကာကွယ်ဆေးအောင်မြင်မှုကနေ မျှော်လင့်ချက်တွေသယ်ဆောင်လာပါပြီ၊ ဗီယက်နမ်ကထုတ်လုပ်တဲ့ အာဖရိကဝက်တုပ်ကွေးကာကွယ်ဆေးကို တင်ပိုရမယ့်ကဏ္ဍအများကြီးရှိနေပါတယ်" လို့ 'တီယန်'ကပြောပါတယ်။
ဗီယက်နမ်ကနေ ကာကွယ်ဆေးထုတ်လုပ်နိုင်မယ့်အရေအတွက်နဲ့ ဘယ်အချိန်တင်ပို့မှာလဲဆိုတာကိုတော့ မဖော်ပြသွားပါဘူး။
ဗီယက်နမ်မှာ ဝက်တုပ်ကွေးရောဂါပျံ့ပွားနေပေမယ့် မွေးမြူသူတွေကို ဝက်သားပေါက်များပြန်လည်မွေးမြူခွင့်ပြုထားပြီး ရောဂါဗိုင်းရပ်စ်က နိုင်ငံအချို့ကမွေးမြူရေးခြံတွေမှာ ကူးစက်နေဆဲဖြစ်ပါတယ်။
Source: Reuters
#Yangon_Media_Group
