Published 25 January 2024
မြောက်ကိုရီးယားက ယင်းတို့ရဲ့ ဗျူဟာမြောက်ပဲ့ထိန်းဒုံးကျည်အသစ်ကို ဗုဒ္ဓဟူးနေ့က စမ်းသပ်ခဲ့ကြောင်း နိုင်ငံပိုင်မီဒီယာ KCNA က ကြာသပတေးနေ့မှာ ဖော်ပြလိုက်ပါတယ်။
အဆိုပါ ဒုံးကျည်စမ်းသပ်မှုကို တောင်ကိုရီးယားစစ်တပ်ဘက်က ထိုနေ့မတိုင်ခင်ကတည်းက ပြောထားတာ ဖြစ်ပါတယ်။
Pulhwasal-3-31 လို့ အမည်ပေးထားတဲ့ ဒုံးကျည်ဟာ လက်ရှိမှာ ထုတ်လုပ်နေဆဲဖြစ်ပြီး စမ်းသပ်ပစ်ခတ်မှုက အိမ်နီးချင်းနိုင်ငံတွေရဲ့ လုံခြုံရေးကို ထိခိုက်မှုမရှိခဲ့ဘဲ ဒေသတွင်းအခြေအနေတွေနဲ့ ဘာပတ်သက်မှုမှ မရှိဘူးလို့ မီဒီယာက ဖော်ပြခဲ့ပါတယ်။
ဒုံးကျည်ထိန်းချုပ်ကွပ်ကဲရေးရဲ့ ပြောကြားချက်အရ အဆိုပါစမ်းသပ်မှုဟာ တိုင်းပြည်ရဲ့ လက်နက်လုပ်ငန်းစဥ်များကို အဆင့်မြှင့်တင်ခြင်းရဲ့ တစ်စိတ်တစ်ပိုင်း ဖြစ်ပါတယ်။
စမ်းသပ်ချက်က လက်ရှိဒုံးကျည်စွမ်းရည်များရဲ့ အဆင့်မြှင့်တင်ချက်တွေကို စမ်းသပ်ရန် ဖြစ်တယ်လို့ တောင်ကိုရီးယား ပူးတွဲကာကွယ်ရေးစစ်ဦးစီးချုပ်က ယုံကြည်နေပါတယ်။
မြောက်ကိုရီးယားဟာ ဒေသစံတော်ချိန် နံနက် ၇ နာရီခန့်မှာ ပဲ့ထိန်းဒုံးကျည်များကို အနောက်ကမ်းရိုးတန်းဘက် ပင်လယ်သို့ ပစ်ခတ်ခဲ့တာဖြစ်ကြောင်း တောင်ကိုရီးယားစစ်တပ်က ဗုဒ္ဓဟူးနေ့မှာ ပြောကြားလိုက်ပါတယ်။
ဒုံးကျည်စမ်းသပ်မှုက အိမ်နီးချင်းနိုင်ငံကို အပြင်းအထန် ခြိမ်းခြောက်ရာကျတယ်လို့ တောင်ကိုရီးယား ကာကွယ်ရေးဝန်ကြီး ရှင်ဝမ်ရှစ်က ရှုတ်ချလိုက်ပါတယ်။
ဗျူဟာမြောက်လို့ ဆိုရာမှာ နျူကလီးယား လက်နက်တွေကို ရည်ညွှန်းပါတယ်။
မြောက်ကိုရီးယားဟာ ၂၀၂၁ စက်တင်ဘာလမှာ နျူကလီးယား စွမ်းရည်ပါတဲ့ ပဲ့ထိန်းဒုံးကျည်ကို ပထမဆုံးစမ်းသပ်ခဲ့ပါတယ်။
စောင့်ကြည့်ထောက်လှမ်းခြင်းနဲ့ ကာကွယ်ရေးတို့ မြှင့်တင်ရန်အတွက် ၂၀၂၇ ခုနှစ်မှာ ကင်းထောက်ဒရုန်း အမြောက်အများ ထုတ်လုပ်ဖို့ကိုလည်း ကြာသပတေးနေ့မှာ ပြောကြားခဲ့ပါတယ်။
ကုလသမဂ္ဂ လုံခြုံရေးကောင်စီ ပဋိဉာဥ်စည်းမျဥ်းတွေကနေ တားမြစ်ထားခြင်းမရှိတဲ့ ပဲ့ထိန်းဒုံးကျည်တွေဟာ တိုက်ချင်းပစ်ဒုံးကျည်တွေလောက် သိပ်ပြီးမစိုးရိမ်ကြပါဘူး။
ဒါပေမဲ့ အန္တရာယ်ပေးနိုင်စွမ်းကတော့ မလျော့နည်းဘဲ မြောက်ကိုရီးယားအတွက် အားကိုးရာလက်နက် ဖြစ်နေတယ်လို့ သုံးသပ်သူများက ဆိုပါတယ်။
ပဲ့ထိန်းဒုံးကျည်တွေနဲ့ တာတိုပစ် တိုက်ချင်းပစ်ဒုံးကျည်တွေကို သာမန်လက်နက် ဒါမှမဟုတ် နျူကလီးယားလက်နက် တပ်ဆင်ပါက တည်ငြိမ်အေးချမ်းရေးကို နှောင့်ယှက်စေနိုင်ပါတယ်။
Source: Reuters
#World_Military
#Published_ 25 January 2024
#YMG #Yangon_Times #Yangon_Media_Group
