#World_Health
Published 12 September 2023
လူကီးမီးယားဟာ သွေးကင်ဆာတစ်မျိုးဖြစ်ပြီး သွေးဥဆဲလ်များ ထုတ်လုပ်ရာ ရိုးတွင်းခြင်ဆီကနေ စတင်ဖြစ်ပွားတာ ဖြစ်ပါတယ်။
သွေးဖြူဥဆဲလ်များ ထိန်းမနိုင်သိမ်းမနိုင် များပြားလာကာ ပုံမှန်သွေးဥဆဲလ်များ ထုတ်လုပ်မှုကို အနှောင့်အယှက် ဖြစ်လာပါတယ်။
ဒီရောဂါနဲ့ ပတ်သက်ပ်ြီး လူတွေလွဲမှားနေတာတွေကို ဖော်ပြလိုက်ပါတယ်။
(၁) သွေးကင်ဆာကို ကူးစက်ရောဂါတစ်ခုဆိုပြီး လွဲမှားနေကြပါတယ်။
ဒီရောဂါက တစ်ဦးကနေ တစ်ဦးဆီ မကူးစက်နိုင်ဘဲ မျိုးရိုးဗီဇကြောင့်နဲ့ ပတ်ဝန်းကျင်နေထိုင်မှု အနေအထားကြောင့် ဖြစ်ပွားတာပါ။
(၂) သွေးကင်ဆာဟာ ကလေးတွေမှာသာ ဖြစ်တယ်လို့ ယုံမှားနေကြကာ တကယ်တမ်းမှာတော့ အသက်အရွယ်မရွေး ဖြစ်ပွားနိုင်ပါတယ်။
(၃) သွေးကင်ဆာကို ဓာတုကုထုံး တစ်မျိုးတည်းဖြင့်သာ ကုသနိုင်တယ်ဆိုတာ မဟုတ်မှန်ဘဲ ရောဂါအမျိုးအစားနဲ့ ကင်ဆာအဆင့်ပေါ် မူတည်ပြီး ကိုယ်ခံအားမြှင့်တင်ခြင်းကုထုံး၊ ဓာတ်ရောင်ခြည်ကုထုံး၊ ပင်မစတမ်းဆဲလ် အစားထိုးခြင်းစတဲ့ နည်းလမ်းများလည်း ရှိပါတယ်။
(၄) သွေးကင်ဆာဖြစ်ရင် ဘဝအဆုံးသတ်သွားပြီလို့ ယူဆနေကြတာဟာ မှားယွင်းပြီး တကယ်တမ်းတော့ တိုးတက်လာတဲ့ ဆေးကုသမှုနည်းလမ်းများဖြင့် လုံးဝပျောက်ကင်းနေသူတွေ ရှိနေပြီဖြစ်ပါတယ်။
(၅) မိုဘိုင်းဖုန်းများလို ရောင်ခြည်ထုတ်လွှတ်တဲ့ စက်ပစ္စည်းတွေက သွေးကင်ဆာ ဖြစ်စေနိုင်တယ်ဆိုတဲ့ သိပ္ပံနည်းကျ အထောက်အထား မတွေ့ရှိသေးပါဘူး။
သွေးကင်ဆာနဲ့ ပတ်သက်ပြီး သိထားရမယ့် အချက်တွေကတော့..
(၁) သွေးကင်ဆာဆိုတာဟာ သွေးနဲ့ ရိုးတွင်းခြင်ဆီတို့မှာ သွေးဖြူဥများ ပုံမှန်ထက် ပိုမိုထွက်ရှိလာပြီး ကောင်းတဲ့သွေးဥများ လျော့ကျသွားစေကာ ကိုယ်ခန္ဓာကိုယ်မှ ရောဂါတိုက်ထုတ်မှု စွမ်းရည်နဲ့ သွေးထွက်မှုထိန်းချုပ်ခြင်းတို့ကို ထိခိုက်စေပါတယ်။
(၂) သွေးကင်ဆာ အမျိုးမျိုးရှိပြီး တစ်မျိုးချင်းစီက သူ့လက္ခဏာနဲ့သူ သူ့ကုသနည်းနဲ့သူ ဖြစ်ကြပါတယ်။
(၃) သွေးကင်ဆာဖြစ်ရတဲ့ အကြောင်းအရင်း တိတိကျကျ မသိရပေမယ့် ရောဂါဖြစ်နိုင်ချေရှိတဲ့ အချက်တွေကတော့ စွမ်းအားမြင့် ဓာတ်ရောင်ခြည် အချို့သော ဓာတုပစ္စည်းများနဲ့ ထိတွေ့ခြင်း၊ မျိုးရိုးဗီဇ အကြောင်းအရင်း၊ ကိုယ်ခံအားစနစ် အားနည်းခြင်း၊ ဒေါင်းရောဂါလက္ခဏာကဲ့သို့ ကျန်းမာရေးပြဿနာများ ဖြစ်ပါတယ်။
(၄) သွေးကင်ဆာဖြစ်တဲ့အခါ အများဆုံး ခံစားရတတ်တာတွေကတော့ ပင်ပန်းနွမ်းနယ်ခြင်း၊ မကြာခဏ ရောဂါကူးစက်ခံရခြင်း၊ ကိုယ်အလေးချိန်ကျဆင်းခြင်း၊ ဖျားနာခြင်း၊ သွေးထွက်လွယ်ခြင်း၊ အရိုးကိုက်ခဲခြင်းတို့ ဖြစ်တတ်ပြီး သွေးကင်ဆာအမျိုးအစားနဲ့ ကင်ဆာအဆင့်တို့အပေါ် မူတည်ပါတယ်။
(၅) ရောဂါစောစီးစွာ ရှာဖွေတွေ့ရှိပြီး ကုသခြင်းက သွေးကင်ဆာဖြစ်ပွားသူတွေမှာ အသက်ရှင်နိုင်ချေ သိသိသာသာ တိုးတက်စေပါတယ်။
#World_Health #သွေးကင်ဆာ #ယုံမှားသံသယ
Source: DoctorNDTV
