#LocalNews
Published - 16 Apr 2022
ရှမ်းပြည်နယ်(မြောက်ပိုင်း)၊မူဆယ်ခရိုင်၊မူဆယ်မြို့တွင် ဧပြီလ ၁၅ရက်နေ့ မွန်းလွဲ ၃ နာရီခန့် မိုးသက်လေပြင်းဝင်ရောက်တိုက်ခိုက်မှုကြောင့် သစ်ပင်များကျိုးကျကာ ဓာတ်အားတိုင်များလဲကျခြင်းဖြစ်ပေါ်ခဲ့ပြီး သစ်ပင်ပိကာ လူတစ်ဦးထိခိုက်သေဆုံးခဲ့တယ်လို့ မြို့ခံပရဟိတအသင်းတွေဆီကနေ သိရပါတယ်။
အဆိုပါ ဖြစ်စဉ်ကြောင့် မြို့နယ်ထွေအုပ်(ဟောင်း)ဝင်းအတွင်း သစ်ပင်ကျိုးကျသဖြင့် ဓာတ်အားကြိုးများ၊အင်တာနက်လိုင်းများ ပျက်ကျခြင်းနှင့် အ.ထ.က(၃) ရှေ့၌ မိုးသက်လေပြင်းတိုက်ခတ်မှုကြောင့် လူတစ်ဦး(မ) သစ်ကိုင်းကျိုးကျမှုဒဏ်ရာဖြင့် သတိလစ်နေခဲ့ရာ နှလုံးလှလူမှုကူညီရေးအသင်းနှင့် ဂရုဏာလူမှုကူညီရေးအသင်းမှ ယမန်နေ့တွင် ဆေးရုံသို့ ပို့ဆောင်ခဲ့စဉ် သေဆုံးခဲ့တယ်လို့ သိရပါတယ်။
မိုးသက်လေပြင်းတိုက်ခတ်မှုကြောင့် ဟိုမွန်ရပ်ကွက်အတွင်း သစ်ပင်လဲကျခြင်းကြောင့် ဓာတ်အားဖြန့်ဖြူး ထားသော 11 KV ဓာတ်အားလိုင်းတိုင် (၉)တိုင်နှင့် 400 V ဓာတ်အားလိုင်းတိုင် (၆)တိုင် စုစုပေါင်း(၁၅)တိုင် လဲကျပျက်စီးခဲ့တယ်လို့ သိရပါတယ်။
ymg/hm
#Yangon_Media_Group
