Published_ 10 August 2023

နိုင်ငံခြားသုံးငွေကြီးကြပ်မှုကော်မတီကို ပြင်ဆင်ဖွဲ့စည်းလိုက်ကြောင်း မြန်မာနိုင်ငံ ပြန်တမ်းအရ သိရသည်။

နိုင်ငံခြားငွေလဲလှယ်နှုန်း တည်ငြိမ်ရေးနှင့် နိုင်ငံခြားငွေ ထိရောက်စွာ အသုံးပြုနိုင်ရေးအတွက် ရည်ရွယ်ဖွဲ့စည်း ထားသော အဆိုပါကော်မတီတွင် နစက အဖွဲ့ဝင် ဒုတိယဗိုလ်ချုပ်ကြီး မိုးမြင့်ထွန်းက ဥက္ကဋ္ဌတာဝန်ယူထား ကြောင်း ဖော်ပြထားသည်။

အဖွဲ့ဝင်များမှာ ဒုတိယဝန်ကြီးချုပ်နှင့် စီမံကိန်းနှင့်ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန်၊ ၊ နစက ဥက္ကဋ္ဌ၏ အကြံပေးပုဂ္ဂိုလ် ဒုတိယဗိုလ်ချုပ်ကြီး ညိုစော၊ စီးပွားရေးနှင့် ကူးသန်း ပြည်ထောင်စုဝန်ကြီး ဦးအောင်နိုင်ဦး ၊ ဗဟိုဘဏ် ဥက္ကဋ္ဌ ဒေါ်သန်းသန်းဆွေ တို့ကလည်းကောင်း၊ အတွင်းရေးမှူးအဖြစ် ရင်းနှီးမြှုပ်နှံမှု နှင့် နိုင်ငံခြားစီးပွားဆက် သွယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာ ကံဇော် ကလည်းကောင်း တာဝန်ယူကြမည် ဖြစ်ကြောင်း သိရသည်။

ကော်မတီအနေဖြင့် ပြည်တွင်းရှိ ရင်းနှီးမြှုပ်နှံမှုလုပ်ငန်းများ၊ ကုန်ထုတ်လုပ်မှုလုပ်ငန်းများအတွက် လိုအပ်သည့် စက်ပစ္စည်းများ၊ လုပ်ငန်းသုံး ယာဉ်ယန္တရားများ၊ ကုန်ထုတ် လုပ်မှုအတွက် လိုအပ်သည့် အသုံးအဆောင်များနှင့် ကုန်ကြမ်းပစ္စည်း စသည်တို့ တင်သွင်းရန် လိုအပ်သည့် နိုင်ငံခြားသုံးငွေများကို စိစစ်ခွင့်ပြုရမည် ဖြစ်ကြောင်း သိရသည်။

အလားတူ စက်သုံးဆီ၊ ဆေးဝါး၊ စားသုံးဆီ၊ ဓာတ်မြေဩဇာ၊ ပိုးသတ်ဆေး၊ ပြည်တွင်း၌ ဝယ်ယူနိုင်ခြင်းမရှိတဲ့ တည်ဆောက်ရေး လုပ်ငန်းသုံးပစ္စည်းများ စသည်တို့ကိုဝယ်ယူရေးအတွက် လိုအပ်သည့် နိုင်ငံခြားသုံးငွေကို စိစစ်ခွင့်ပြုခြင်း၊ ပြည်ပသို့ ဆေးဝါးကုသခြင်း၊ ပညာရေးကိစ္စများအတွက် သွားရောက်ခြင်းနှင့် ဘာသာရေး ကိစ္စများအတွက် သွားရောက်ခြင်း စသည်တို့ အတွက်လည်း စိစစ်ရမည်ဖြစ်ကြောင်း သိရသည်။

ယင်းအပြင် အထွေထွေဆိုင်ရာ ပစ္စည်းများ ပြည်ပမှ တင်သွင်းခြင်း၊ ပြည်ပသို့ ချေးငွေနှင့် အတိုးများ ပြန်လည် ပေး ဆပ်ခြင်း၊ ဝန်ဆောင်ခများပေးချေခြင်း၊ ရင်းနှီးမြှုပ်နှံမှုလုပ်ငန်းများမှ အမြတ်ငွေများ ပြန်လည်လွှဲပို့ခြင်း ၊ လူမှုအသုံးအဆောင် ဇိမ်ခံပစ္စည်းများ တင်သွင်းမှုအတွက် မဖြစ်မနေတင်သွင်းရန် လိုအပ်မှုအပေါ်စိစစ် ခွင့်ပြု ခြင်း၊ နိုင်ငံတွင်းရှိ ပြည်တွင်း၊ ပြည်ပ ရင်းနှီးမြှုပ်နှံမှု လုပ်ငန်းများ၊ ကုန်ထုတ်လုပ်ငန်းများ၊ ပို့ကုန်၊ သွင်းကုန် လုပ်ငန်းများ၊ ပညာရေး၊ ကျန်းမာရေးအပါအဝင် ဝန်ဆောင်မှုလုပ်ငန်းများအတွက် နိုင်ငံခြားသုံး ငွေလည်ပတ် မှုဆိုင်ရာ ကိစ္စရပ်များကို ကြီးကြပ်ကွပ်ကဲခြင်း နှင့် အခြားပေးအပ်သော တာဝန်များကိုလည်း ထမ်းဆောင် ရမည်ဖြစ်ကြောင်း သိရသည်။
Yangon-Times/PP
#Local_News
#နိုင်ငံခြားသုံးငွေကြီးကြပ်မှုကော်မတီ #မြန်မာနိုင်ငံ # ဒုတိယဝန်ကြီးချုပ် #စီမံကိန်းနှင့်ဘဏ္ဍာရေးဝန်ကြီးဌာန
#YMG #Yangon_Times