#World_Health
Published 14 August 2024

▪️ နောက်ထပ်ကပ်ရောဂါဘေး ဖြစ်လာနိုင်မယ့် ရောဂါပိုးအရေအတွက်ဟာ ၃၀ အထိ မြင့်တက်လာပါတယ်။

▪️ ထိုထဲမှာမှ တုပ်ကွေး-အေဗိုင်းရပ်စ်၊ သွေးလွန်တုပ်ကွေး၊ ဗိုင်းရပ်စ်၊ မျောက်ကျောက်ဗိုင်းရပ်စ်တို့က အဓိကရောဂါပိုးတွေအဖြစ် WHO ကသတ်မှတ်ထားပါတယ်။

▪️ ဒီလိုစာရင်းထုတ်ပြန်ရခြင်းဟာ ကုသမှုတွေ၊ ကာကွယ်ဆေးတွေ၊ ရောဂါရှာဖွေရေးတွေ ထုတ်ဖော်ရာမှာ ပိုပြီးကြိုးပမ်းအားထုတ်ကြဖို့ ရည်ရွယ်ပါတယ်။

▪️ ဒီစာရင်းက အထောက်အထားတွေအပေါ် အခြေခံထားတာဖြစ်ပြီး ရောဂါပိုးတွေက အလွန်ကူးစက်မြန်ကာ ထိရောက်တဲ့ ကုသမှု မရရှိသေးပါဘူး။

▪️ အရေးကြီးတာတွေကို အစဉ်လိုက်သိရှိခြင်းဖြင့် ပြဿနာဖြေရှင်းဖို့ လိုအပ်တဲ့ ဟာကွက်တွေကို သိရှိစေမှာဖြစ်တယ်လို့ အန်နာမာရီယာဟဲနိုရီစထရက်ပိုက ပြောသွားပါတယ်။

▪️ လွန်ခဲ့တဲ့ ၂ နှစ်အတွင်း သိပ္ပံပညာရှင် ၂၀၀ ကျော်ဟာ ရောဂါပိုးမျိုးစိတ်ပေါင်း ၁၆၅၂ မျိုးကျော်ကို လေ့လာခဲ့ပါတယ်။

▪️ ဒီနောက် အဓိကအရေးကြီးတဲ့ ရောဂါပိုး ၃၀ ကို ဖော်ထုတ်ခဲ့ကြကာ SARS-CoV-2 နဲ့ မာဘီကိုဗိုင်းရပ်စ်တို့လည်း ပါဝင်ခဲ့ပါတယ်။

▪️ ၂၀၂၂ ခုနှစ်ကပျံ့ပွားခဲ့တဲ့ မျောက်ကျောက်ဗိုင်းရပ်စ်နဲ့ ၁၉၈၀ လောက်က ပပျောက်ခဲ့ပြီဖြစ်တဲ့ ရေကျောက်ဗိုင်းရပ်စ်တို့လည်း ပါဝင်နေပါတယ်။

▪️ ဒါ့အပြင် ဒီဗိုင်းရပ်စ်တွေကို ဇီဝလက်နက်အဖြစ် အကြမ်းဖက်သမားတွေ အသုံးပြုနိုင်ဖွယ်ရှိတယ်လို့လည်း သတိပေးထားပါတယ်။

▪️ တုပ်ကွေး-အေဗိုင်းရပ်စ်တွေထဲက မျိုးစိတ်ဒါဇင်ဝက်လောက်လည်း စာရင်းထဲ ပါဝင်ပါတယ်။

▪️ ရာသီဥတုပြောင်းလဲမှုနဲ့ မြို့ပြလူဦးရေ ထူထပ်လာခြင်းတို့က ဗိုင်းရပ်စ်ကူးစက်နိုင်ခြေ များစေတယ်လို့ သိပ္ပံပညာရှင်များ ဆိုပါတယ်။

#Source: WION

#World_Health
Published 14 August 2024

▪️ ကမ္ဘာမြေကြီးဟာ နည်းလမ်းမျိုးစုံဖြင့် ညစ်ညမ်းမှုခံစားနေရပြီး အစားအစာနဲ့ ရေတို့မှာတွေ့ရတဲ့ မိုက်ခရိုပလတ်စတစ်မှုန်တွေလည်း ပါဝင်ပါတယ်။

▪️ ထိုမိုက်ခရိုပလတ်စတစ်မှုန်တွေဟာ လူ့ကျန်းမာရေးကို အလွန်အန္တရာယ်ဖြစ်စေတယ်လို့ သတ်မှတ်ပြီး နှလုံးရောဂါ၊ ဟော်မုန်းမညီမျှခြင်း၊ ကင်ဆာတို့ပင် ဆက်စပ်ဖြစ်ပေါ်စေပါတယ်။

▪️ မကြာသေးမီက လေ့လာချက်မှာလည်း ပလတ်စတစ်ဘူးထဲမှ ရေကိုသောက်ခြင်းဟာ သွေးကြောထဲသို့ မိုက်ခရိုပလတ်စတစ်များ ဝင်ရောက်ပြီး သွေးပေါင်ချိန်မြင့်နိုင်ဖွယ်ရှိတယ်လို့ တွေ့ရှိထားပါတယ်။

▪️ ဩစတြီးယား ဒါနုဘယ်ပုဂ္ဂလိကတက္ကသိုလ် ဆေးပညာဌာနမှ လေ့လာမှုပြုတာဖြစ်ပြီး ပလတ်စတစ်ဗူးတွေထဲမှာ မထိန်းသိမ်းထားတဲ့ ရေတွေကို စမ်းသပ်ခံတွေ သောက်သုံးစေခဲ့ရာမှာ သွေးပေါင်ချိန် သိသိသာသာ လျော့နည်းတာကို တွေ့ခဲ့ကြပါတယ်။

▪️ ဒါဟာ သွေးကြောထဲမှာ ပလတ်စတစ်အမှုန်ပမာဏ နည်းပါးတာကြောင့်လို့ ဖော်ပြခဲ့ပါတယ်။

▪️ ပလတ်စတစ်ဝင်ရောက်မှု နည်းတဲ့အခါ သွေးပေါင်ချိန်လည်း ကျဆင်းသွားကာ သွေးထဲမှာ ပလတ်စတစ်မှုန်တွေက သွေးပေါင်ချိန်ကို တက်စေတယ်လို့ ယူဆထားပါတယ်။

▪️ ပလတ်စတစ်ဗူးနဲ့ ထည့်ထားတဲ့ အချိုရည်တွေကိုလည်း ရှောင်ရှားကြဖို့ အကြံပြုထားပါတယ်။
လူတွေဟာ ပလတ်စတစ်ဗူးတွေဖြင့် ရေသောက်ခြင်းကနေ တစ်ပတ်ကို မိုက်ခရိုပလတ်စတစ် ၅ ဂရမ်ခန့် ဝင်ရောက်နိုင်တယ်လို့ သိပ္ပံပညာရှင်များ တွေ့ရှိဖူးပါတယ်။

▪️ ဒီအတွက် ရေကိုကြိုချက်ပြီး စစ်ယူသောက်သုံးခြင်းဖြင့် ပလတ်စတစ်မှုတွေကို ၉၀ ရာခိုင်နှုန်းနီးပါး လျှော့ချနိုင်ပါတယ်။

#Source: India Today

ဇင်ဘာဘွေအစိုးရက နိုင်ငံအတွင်း ရောင်းဝယ်မှုများအတွက် အမေရိကန်ဒေါ်လာ အသုံးပြုနေခြင်းကို ဖြတ်တောက်ပြီး ရွှေတုံးအခြေပြု ZiG ငွေကြေးအသစ်ဖြင့် အစားထိုးဖို့လမ်းစကို မီးစိမ်းပြလိုက်ပြီ ဖြစ်ပါတယ်။
#World_Currency
Published 13 August 2024
#ဇင်ဘာဘွေ #ပြည်တွင်းငွေကြေးသစ်စတင်သုံး
#YMG #Yangon_Times #Yangon_Media_Group

#Daily_News
Published 13 August 2024

၁။ ဆီလီကွန်ပုံတူပန်းပုရုပ်တုလုပ်ငန်းအတွက် ကုန်ကြမ်းပြတ်ပြီး ဈေးနှုန်းတက်နေ

၂။ ရေလွှမ်းဒဏ်ခံရသည့် မိုးစပါးစိုက်ဧက တစ်သန်းခန့်သာရှိသည့်အပြင် လက်ကျန်နှင့်အရန်ဆန်များပါရှိသောကြောင့် ပြည်တွင်းစားသုံးမှုဖူလုံဟုဆို

၃။ မန္တလေးတိုင်းတွင်နေရာကွက်ပြီး မိုးကြီးနိုင်ပြီး ‌ရှမ်း၊ ကရင်၊ မွန်တို့တွင်နေရာအနှံ့အပြားမိုးရွာနိုင်မည်

၄။ ဇင်ဘာဘွေတွင် ဒေါ်လာအစား ပြည်တွင်းငွေကြေးသစ်စတင်အသုံးပြုမည်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

၁၃ ဩဂုတ် ၂၀၂၄

ဘင်္ဂလားဒေ့ရှ် ဝန်ကြီးချုပ် ရှိတ်ဟာဆီနာကို ဖြုတ်ချတဲ့ကိစ္စမှာ အမေရိကန်ပါဝင်ပတ်သက်မှုမရှိဘူးလို့ အိမ်ဖြူတော်က တနင်္လာနေ့မှာ ငြင်းချက်ထုတ်ပါတယ်။  အမေရိကန်စွက်ဖက်မှုလို့ စွပ်စွဲနေတာတွေဟာ အမှားတွေသာဖြစ်တယ်လို့ အိမ်ဖြူတော်က ပြောပါတယ်။

“ ကျွန်မတို့ ဘာတစ်ခုမှ ပါဝင်ပတ်သက်ခြင်းမရှိပါဘူး။ ဒီဖြစ်ရပ်မှာ အမေရိကန်အစိုးရ ပတ်သက်နေတယ်ဆိုတဲ့ သတင်းတွေ၊ ကောလဟာလတွေဟာ တကယ်တမ်းတော့ အမှားတွေပါ” လို့ အိမ်ဖြူတော် ပြောခွင့်ရသူ ကရင်ဂျင်း ပီယဲက  သတင်းစာရှင်းလင်းပွဲမှာ အမေရိကန်ပါဝင်ပတ်သက်နေသလားဆိုတဲ့မေးခွန်းကို ပြန်ဖြေကြားခဲ့တာဖြစ်ပါတယ်။

အိန္ဒိယနိုင်ငံထုတ် အီကော်နောမစ်တိုင်းမ်သတင်းစာကြီးမှာ တနင်္ဂနွေက ဟာဆီနာရဲ့ပြောကြားချက်ကို ကိုးကားပြီး သတင်းတစ်ပုဒ်ဖော်ပြခဲ့ရာမှာ အမေရိကန်အနေနှင့်  ဘင်္ဂလားပင်လယ်အော်ထဲက ဘင်္ဂလားဒေ့ရှ်ပိုင် စိန့်မာတင်ကျွန်းကို ထိန်းချုပ်လိုတဲ့အတွက် သူမကို ဖြုတ်ချရမှာ အမေရိကန်က ပတ်သက်ပါဝင်ခဲ့တာလို့ ပြောထားပါတယ်။  အဲဒီသတင်းစကားကို ဟာဆီနာက သူမရဲ့ အရင်းနှီးဆုံးမိတ်ဆွေတွေကတစ်ဆင့် သတင်းပါးခဲ့တာဖြစ်ပါတယ်လို့ သတင်းစာက ရေးသားပါတယ်။

ဒါပေမယ့် ဟာဆီနာရဲ့ သား ဆာဂျီဝါဇက်ကတော့ သူ့အမေ အဲဒီလိုစကားမျိုး ဘယ်တော့မှမပြောခဲ့ဘူးလို့ ဆိုရှယ်မီဒီယာ အိတ်စ်မှာ ပို့စ်ရေးတင်ခဲ့ပါတယ်။

“ ဘင်္ဂလားဒေ့ရှ်ရဲ့အနာဂတ်ကို ဘင်္ဂလားဒေ့ရှ်ပြည်သူတွေသာ ဆုံးဖြတ်သင့်တယ်လို့ ကျွန်တော်တို့ယုံကြည်ပါတယ်။ အဲဒီလို ကျွန်တော်တို့ရပ်တည်ပါတယ်” လို့ အိမ်ဖြူတော်က ပြောပါတယ်။

ငြိမ်းချမ်းရေးနိုဘယ်ဆုရှင် မူဟာမက်ယူနွတ်ဦးဆောင်တဲ့ ဘင်္ဂလားဒေ့ရှ်ကြားဖြတ်အစိုးရဟာ ရွေးကောက်ပွဲပြုလုပ်ဖို့ ရည်ရွယ်ချက်နှင့် ပြီးခဲ့တဲ့ ကြာသပတေးနေ့က ကျမ်းကျိန်ခဲ့ကြပါတယ်။

အစိုးရအလုပ်ရဲ့ အစိတ်အပိုင်းတော်တော်များများကို အချို့သောအုပ်စုတွေအတွက် ချန်ထားပေးတဲ့ အစိုးရရဲ့ ခွဲတမ်းကို ဆန့်ကျင်တဲ့အနေနှင့် ပြီးခဲ့တဲ့လကစပြီး ကျောင်းသားတွေဆန္ဒပြခဲ့ရာမှ ဟာဆီနာကိုဖြုတ်ချဖို့အထိ  အကြမ်းဖက်မှုတွေ ဖြစ်ပွားခဲ့ပါတယ်။

သူမဟာ ဇန်နဝါရီလရွေးကောက်ပွဲမှာ စတုတ္တမြောက်သက်တမ်းအတွက် ဆက်တိုက် အနိုင်ရခဲ့ပါတယ်။ အဲဒီရွေးကောက်ပွဲကို အတိုက်အခံတွေက သပိတ်မှောက်ခဲ့ပြီး အမေရိကန်အစိုးရက လွတ်လပ်မျှတမှုရှိတဲ့ရွေးကောက်ပွဲမဟုတ်ဘူးလို့ ပြောခဲ့ပါတယ်။

သူမဟာ ၁၅နှစ်ကြာအုပ်ချုပ်ခဲ့ရပြီးနောက် နောက်ဆုံးမှာ အိန္ဒိယသို့ထွက်ပြေးခဲ့ရပါတယ်။

Ref: Reuters

#World_Technology
Published 13 August 2024

▪️ မာ့ခ်ဇူကာဘက်ရဲ့ အဖေဖြစ်သူ သွားဆရာဝန် ထောက်ပံ့ထားတဲ့ ဘော့စ်တွန်အခြေစိုက် နည်းပညာကုမ္ပဏီက ကမ္ဘာ့ပထမဆုံး စက်ရုပ်ထိန်းချုပ် သွားခွဲစိတ်ခြင်းလုပ်ငန်းကို အောင်မြင်စွာ ပြုလုပ်နိုင်ခဲ့ပါတယ်။

▪️ ပါဆက်ပ်တစ်ကုမ္ပဏီရဲ့ ဉာဏ်ရည်တု ပုံရိပ်ဖော်ဆော့ဖ်ဝဲကို စက်ရုပ်လက်ဖြင့် ပေါင်းစပ်ထားတာ ဖြစ်ပြီး ဆေးဘက်ဆိုင်ရာ နည်းပညာပိုင်းမှာ စွန့်စားအောင်မြင်မှုတစ်ခု ဖြစ်လာပါတယ်။

▪️ ကိုလံဘီယာ ဘာရန်ကွီလာမှာ စတင်ပြုလုပ်ခဲ့ပြီး စက်ရုပ်က လူနာရဲ့သွားကို ထိုးဖောက်ဖြတ်တောက်ခဲ့ပါတယ်။

▪️ သွားကုသခြင်း လုပ်ငန်းစဉ်တွေမှာ ထိရောက်တိကျမှု မြှင့်တင်ပေးနိုင်ပြီး လူနာတွေအတွက် ပိုမိုကောင်းမွန်တဲ့ သွားနဲ့ခံတွင်း စောင့်ရှောက်မှု ရွေးချယ်နိုင်ခွင့်ရစေမယ်လို့ ကုမ္ပဏီစီအီးအို ဒေါက်တာ ခရစ္စစီရီယဲလိုက ပြောသွားပါတယ်။

▪️ နောက်ဆုံးရည်မှန်းချက်အနေနဲ့ အလိုအလျောက်စက်တွေ အသုံးပြုပြီး သွားအစားထိုးခြင်းနဲ့ အလားတူကုသမှုတွေကို ၁၅ မိနစ်တည်းဖြင့် ပြုလုပ်နိုင်ရန် ဖြစ်တယ်လို့ ကုမ္ပဏီက ကြေညာသွားပါတယ်။

▪️ ထိုနည်းပညာဟာ စက်ရုပ်လက်များဖြင့် ခွဲစိတ်မှုမပြုလုပ်ခင် လူနာသွားဖုံးအောက်ကို ပုံရိပ်ဖတ်ပြီး AI ကိုအသုံးပြုကာ ဆန်းစစ်သွားတာ ဖြစ်ပါတယ်။

▪️ AIစက်ရုပ်စနစ်ဟာ ရောဂါရှာဖွေရေးနဲ့ ကုသစီစဉ်မှုအတွက် သုံးဖက်မြင်အချက်အလက်များ အသုံးပြုပြီး စောစီးတိကျစွာ ရှာဖွေနိုင်မှာဖြစ်ပါတယ်လို့ ဖော်ပြထားပါတယ်။

▪️ ဒီစနစ်ဟာ အထူးစမ်းသပ်ဖန်တီးထားတာဖြစ်ပြီး သွားဆရာဝန်များအနေနဲ့ လူနာတွေကို ဘေးကင်းစွာ ကုသနိုင်ဖို့ အကူအညီပေးနိုင်ကြောင်း ဒေါက်တာ အက်ဒ်ဝပ်ဇူကာဘက်က ပြောပြပါတယ်။

▪️ မာ့ခ်ဇူကာဘက်ရဲ့အဖေက ပါဆက်ပ်တစ်အတွက် ဒေါ်လာသန်း ၃၀ ထောက်ပံ့ပေးထားသူတွေထဲက တစ်ဦးဖြစ်ပါတယ်။

▪️ ဒီနည်းပညာဖြင့် ပိုမိုဘေးကင်းတိကျတဲ့ ရောဂါရှာဖွေမှုတွေ ပြုလုပ်နိုင်လိမ့်မယ်လို့ ဟားဗတ်ဆေးတက္ကသိုလ်မှ ဂျာမန်ဂယ်လူချီက ပြောပြသွားပါတယ်။

#Source: New York Post