#WorldHealth
Published 10 April 2022

အသက်အရွယ်အရအိုမင်းရင့်ရော်လာတဲ့ လူအသားအရည်ဆဲလ်တွေကို နှစ် ၃၀ လောက်ပြန်လည်နုပျိုလာစေမယ့်နည်းလမ်းကို သုတေသီများဖော်ထုတ်လျက်ရှိပြီး ဒီနည်းလမ်းဟာ အရင်နည်းလမ်းတွေထက် ပိုမိုနုပျိုစေကာ ဆဲလ်တွေလည်းသူတို့ရဲ့ မူလလုပ်ဆောင်ချက်တွေ ဆုံးရှုံးစေမှာမဟုတ်ပါဘူး။

ဆဲလ်အဟောင်းတွေရဲ့ လုပ်ဆောင်ချက်တွေကို တချို့တပိုင်းပြန်လည်ပြုပြင်ပြီး ဇီဝသက်တမ်းထပ်မံတိုးချဲ့နိုင်ဖို့ ပြုလုပ်သွားမှာဖြစ်ပါတယ်။

အရေပြားဒဏ်ရာတစ်ခုအတိုင်း ပုံစံတူပြုလုပ်ပြီး စမ်းသပ်ရာမှာ ပြန်လည်နုပျိုသွားတဲ့ဆဲလ်တွေက ငယ်ရွယ်ကျန်းမာတဲ့ဆဲလ်တွေအတိုင်း ပြုမူလုပ်ဆောင်ကြကြောင်း ဖော်ပြထားပါတယ်။

Epigenetics သုတေသနလုပ်ငန်းမှ ဦးဆောင်သုတေသီ ပရော်ဖက်ဆာ'ဝုဖ်ရိတ်ခ်'က ဒီနည်းလမ်းပုံဖော်ခြင်းက တကယ်စိတ်လှုပ်ရှားဖွယ်ကောင်းကြောင်း ပြောပြလိုက်ပါတယ်။

"ရင့်ရော်ခြင်းဖြစ်စဉ်ကိုလျှော့ချဖို့ ပြန်လည်ညွှန်ကြားစရာမလိုတဲ့ မျိုးဗီဇဆဲလ်တွေကို တဖြည်းဖြည်းတွေ့ရှိလာတော့မှာဖြစ်ပါတယ်။ ဒီနည်းလမ်းကနေ အလွန်တန်ဖိုးရှိတဲ့တွေ့ရှိချက်တွေ ထွက်ပေါ်လာနိုင်ပါတယ်"

ပရော်ဖက်ဆာ'ရိတ်ခ်'ဓာတ်ခွဲခန်းမှ သုတေသီဒေါက်တာ'ဒီလ်ဂျိဂီးလ်'က ဆဲလ်တွေကို မူလလုပ်ဆောင်ချက်မပျက်စီးစေဘဲ ပြန်လည်နုပျိုအောင်ပြုလုပ်နိုင်ကြောင်း သက်သေပြထားနိုင်ခဲ့ပြီး ဆဲလ်အဟောင်းတွေရဲ့ လုပ်ဆောင်ချက်တွေကို ပြန်လည်အသက်ဝင်စေမှာဖြစ်ကြောင်း ပြောပြပါတယ်။

လူတွေအသက်ကြီးလာတဲ့အခါ ဆဲလ်စွမ်းဆောင်ရည်တွေကျဆင်းလာပြီး မျိုးရိုးဗီဇများ၊ ဒီအင်န်အေများ လုပ်ဆောင်ချက်ကျဆင်းလာကာ အိုမင်းလာစေတာဖြစ်ပါတယ်။

ယခုပြန်လည်နုပျိုစေတဲ့နည်းလမ်းက ဆဲလ်များကိုပြုပြင်ခြင်း အစားထိုးခြင်းများဖြင့်လုပ်ဆောင်သွားဖို့ ရည်ရွယ်ထားပါတယ်။

နဂို ဆဲလ်လုပ်ဆောင်ချက်တွေကို မပျက်စီးစေဘဲ ဆဲလ်တွေကိုပြန်လည်ငယ်ရွယ်စေမှာဖြစ်ပါတယ်။

အဆိုပါတွေ့ရှိချက်ကြောင့် အခြားဆေးပညာပိုင်းဆိုင်ရာ တွေ့ရှိချက်တွေပါ ထွက်ပေါ်လာနိုင်ချေရှိနေပါတယ်။

အယ်လ်ဇိုင်းမားရောဂါနဲ့ မျက်လုံးအတွင်းတိမ်လိုရောဂါတွေမှာပါ ဆဲလ်တွေကိုပြန်လည်နုပျိုအောင်ပြုလုပ်နိုင်ဖို့ ရှိနေပါတယ်။

Source: The National.
#Yangon_Media_Group

#WorldHealth
Published 10 April 2022

လူအတော်များများက သူတိုနဲ့ရင်းနှီးကျွမ်းဝင်တဲ့ သူငယ်ချင်းမိတ်ဆွေတွေနဲ့တွေ့တဲ့အခါ ကိုဗစ်ရောဂါကူးစက်မှုအန္တရာယ်ကို သတိပေါ့လျော့စွာနေထိုင်တတ်ကြကြောင်း လေ့လာချက်အသစ်တစ်ခုတွေ့ရှိခဲ့ပါတယ်။

မိတ်ဆွေအပေါင်းအသင်းတွေနဲ့တွေ့ဆုံမှုက ကိုဗစ်ရောဂါအပေါ်ဘယ်လောက်သက်ရောက်မှုရှိသလဲဆိုတာကို Eline L.E. De Vries နဲ့ Hyunjung Crystal Lee တို့က Experimental Psychology ဂျာနယ်မှာ ရေးသားဖော်ပြခဲ့ပါတယ်။

သူငယ်ချင်းမိတ်ဆွေတွေရှိနေတဲ့အခါ လူတစ်ယောက်အနေနဲ့ ရောဂါကာကွယ်ရေးလုပ်ငန်းစဉ်တွေကို လိုက်နာမှုလျော့နည်းလာသလားဆိုတာကိုလည်း လေ့လာခဲ့ကြပါတယ်။

ကပ်ရောဂါနှစ်နှစ်တာကာလအတွင်း လူအများစုဟာ သူတို့ရဲ့ အရင်းနှီးဆုံးမိတ်ဆွေတွေနဲ့ ပြောဆိုဆက်ဆံမှုကန့်သတ်ခြင်းခံခဲ့ရတာက ဒီလိုအကျိုးဆက်တွေဖြစ်လာရတဲ့ အကြောင်းအရင်းဖြစ်နေနိုင်ပါတယ်။

စမ်းသပ်လေ့လာမှုများပြုလုပ်ပြီးနောက် မိတ်ဆွေသူငယ်ချင်းတွေနဲ့ ရင်းနှီးတဲ့ဆက်ဆံရေးကြောင့် ဗိုင်းရပ်စ်ကူးစက်နိုင်ချေနည်းနိုင်တယ်ဆိုတဲ့ စိတ်ပိုင်းဆိုင်ရာထင်မြင်မှုရှိနေတတ်ကြပြီး သူစိမ်းတွေ ဒါမှမဟုတ် သိပ်ပြီးမရင်းနှီးတဲ့သူတွေနဲ့ တွေ့ဆုံရာမှာတော့ အဲဒီလိုစိတ်ပိုင်းဆိုင်ရာထင်မြင်မှုမျိုး မတွေ့ရဘူးလို့သုံးသပ်ထားပါတယ်။

ပထမစမ်းသပ်မှုမှာ စမ်းသပ်ခံမယ့်သူ ၄၉၅ ဦးကို အဖွဲ့နှစ်ဖွဲ့ခွဲလိုက်ပါတယ်။တစ်ဖွဲ့ကို ရင်းနှီးတဲ့မိတ်ဆွေတစ်ယောက်နဲ့ပတ်သက်တဲ့ အဖြစ်အပျက်တွေကို ရေးချခိုင်းပြီး နောက်တစ်ဖွဲ့ကလူတွေကိုတော့ သိပ်မရင်းနှီးတဲ့လူတစ်ယောက်နဲ့ပတ်သက်တဲ့ အကြောင်းအရာတွေကို ချရေးခိုင်းလိုက်ပါတယ်။

ထို့နောက် နှစ်ဖွဲစလုံးကလူတွေကို ကိုဗစ်ရောဂါဆိုးရွားစွာဖြစ်စေနိုင်တဲ့ ကျန်းမာရေးနဲ့မညီညွတ်တဲ့စားသောက်ခြင်းအကြောင်းနဲ့ ရောဂါကာကွယ်ခြင်းအပြုအမူများအကြောင်းပါဝင်တဲ့ သတင်းဆောင်းပါးကို ဖတ်ခိုင်းခဲ့ပါတယ်။

အဲဒီနောက် စမ်းသပ်ခံသူတွေအတွက် သုတေသီများစီစဉ်ထားတဲ့ အွန်လိုင်းစတိုးကနေ ပစ္စည်းတစ်ခုကို ရွေးချယ်ဝယ်ယူခိုင်းပါတယ်။

ထိုပစ္စည်းတွေထဲမှာ အစားအစာမုန့်တွေနဲ့ ကိုဗစ်ကာကွယ်ရေးပစ္စည်းများဖြစ်တဲ့ နှာခေါင်းစည်း၊ လက်ဆေးရည်စတဲ့ပစ္စည်းများ ပါဝင်ပါတယ်။

ရင်းနှီးတဲ့မိတ်ဆွေအကြောင်းရေးထားတဲ့သူတွေထဲက ၂၇ ရာခိုင်နှုန်းဟာ ကျန်းမာရေးနဲ့မညီညွတ်တဲ့စားစရာကို ရွေးချယ်ခဲ့ကြပြီး သိပ်ပြီးမရင်းနှီးတဲ့သူအကြောင်းရေးထားတဲ့သူတွေထဲကတော့ ၂၁ ရာခိုင်နှုန်းကသာ စားစရာကိုရွေးချယ်ခဲ့ပါတယ်။

ဒါကြောင့် မိတ်ဆွေအပေါင်းအသင်းအကြောင်းရေးတဲ့သူတွေက ကူးစက်မှုအန္တရာယ်ပိုဖြစ်နိုင်တဲ့ အပြုအမူကိုပြုလုပ်နိုင်ချေပိုများနေတာကိုတွေ့ရှိရပါတယ်။

ဒါ့အပြင်မိတ်ဆွေအပေါင်းအသင်းထံမှ ရောဂါကူးစက်တယ်လို မြင်ယောင်ကြည့်ခိုင်းတဲ့အခါ သိပ်ပြီးဂရုစိုက်တဲ့ပုံမပေါ်ကြောင်းလည်း တွေ့ရှိရပါတယ်။

မိတ်ဆွေတွေထံမှ ရောဂါကူးစက်ဖူးတဲ့လူတွေက ရောဂါထပ်မံကူးစက်နိုင်ချေနည်းပါးတယ်လို့ ယူဆတတ်ကြပါတယ်။

အဆိုပါတွေ့ရှိချက်များအရ ကိုဗစ်ရောဂါကာကွယ်ရေးအစီအစဉ်တွေမှာ မိသားစုဝင်တွေ မိတ်ဆွေအပေါင်းအသင်းတွေနဲ့ရှိနေခိုက် သတိပေါ့လျော့တတ်ခြင်းကိုလည်း သတိပေးသင့်ကြောင်း ဖော်ပြထားပါတယ်။

Source: The Jerusalem Post
#Yangon_Media_Group

Published 10 April 2022

ပါကစ္စတန်ဝန်ကြီးချုပ် အီမရန်ခန်းဟာ တနင်္ဂနွေနေ့က ပါလီမန်မှာပြုလုပ်တဲ့ အယုံအကြည်မရှိအဆို မဲခွဲရာ မှာ ရှုံးနိမ့်သွားပြီးနောက် ရာထူးမှ ဖြုတ်ချခံလိုက်ရပါတယ်။ သူ့ရဲ့ စီးပွားရေး ပြိုလဲပျက်စီးမှုနှင့် သူ့ရဲ့ မဲဆွယ်ပွဲ ကတိပေးတွေအပေါ် ပျက်ကွက်ခဲ့မှုတွေကြောင့် သူ့ရဲ့မဟာမိတ်တွေက သူ့ကိုစွန့်ခွာခဲ့ပြီးနောက် ယခုလို အယုံအကြည်မရှိမဲခွဲခဲ့တာဖြစ်ပါတယ်။

နှောင့်နှေးမှုတွေခဏခဏဖြစ်ခဲ့ရတဲ့ ၁၃နာရီကြာ ပါလီမန်အစည်းအဝေးအပြီး ဒေသစံတော်ချိန် မနက်(၁)နာရီမတိုင်ခင်မှာ အောက်လွှတ်တော်ဥက္ကဋ္ဌက အာယက်ဆာဒစ်က မဲရလာဒ်ကို ကြေညာခဲ့ပါတယ်။

အမတ်၃၄၂ဦးပါဝင်တဲ့ အောက်လွှတ်တော်မှာ အတိုက်အခံပါတီတွေက မဲ၁၇၄မဲဖြင့် အများစုမဲ ရအောင်ဆောင်ရွက်နိုင်ခဲ့တယ်လို့ ဆာဒစ်က ပြောပါတယ်။

ဝန်ကြီးချုပ်အသစ်ရွေးချယ်ဖို့ ပါလီမန်ကို တနင်္လာနေ့မှာ ခေါ်ယူထားပါတယ်။

အသက်(၆၉)နှစ်အရွယ် ဝန်ကြီးချုပ် အီမရန်ခန်းဟာ လူဦးရေသန်း၂၂၀ရှိပြီး ၇၅နှစ်ခန့်ကြာသမိုင်းမှာ နှစ်တွေရဲ့တစ်ဝက်ခန့် စစ်တပ်အုပ်ချုပ်ခဲ့တဲ့  နျူကလီးယားလက်နက်ပိုင် ပါကစ္စတန်နိုင်ငံကို ၃နှစ်ခွဲကြာ အုပ်ချုပ်ပြီးနောက် အဖယ်ရှားခံလိုက်ရတာ ဖြစ်ပါတယ်။

တစ်ခါက ခရစ်ကက်ကြယ်ပွင့်ဖြစ်ခဲ့ပြီး နိုင်ငံရေးသမားဘဝ ရောက်လာတဲ့ အီမရန်ခန်က သူ့ကိုဖြုတ်ချဖို့ အမေရိကန်က လျှို့ဝှက်ပူးပေါင်းကြံစည်နေတယ်လို့ ပြောခဲ့ပါတယ်။

ပါကစ္စတန်ရဲ့ ဩဇာအာဏာကြီးမားလှတဲ့ စစ်တပ်ဦးစီးချုပ် ကာမာဂျာဗက် ဘဂျာဝါနှင့် ဝန်ကြီးချုပ်ခန်တို့တွေ့ဆုံအပြီးမှာ မဲခွဲဖို့ဖြစ်လာတာလို့ အမည်မဖော်လိုတဲ့ သတင်းအရင်းအမြစ်နှစ်ခုက ရိုက်တာသတင်းဌာနကိုပြောပါတယ်။

ပါကစ္စတန်ဝန်ကြီးချုပ်အသစ်ဖြစ်လာနိုင်တဲ့ ခန်းကိုဖြုတ်ချခဲ့သူ ရှီဘက်ဇ်ရှာရစ်ဟာ အသစ်စဖို့ အခွင့်အလမ်းတစ်ခုဖြစ်ပါတယ်။

“ အာရုံသစ်ဟာ စတင်ခဲ့ပြီ။ မဟာမိတ်တွေက ပါကစ္စတန်ကို ပြန်လည်တည်ဆောက်မယ်” လို့ အသက်၇၀ အရွယ် ရှာရစ်က ပါလီမန်မှာပြောပါတယ်။

ရှာရစ်ဟာ ပါကစ္စတန်ဝန်ကြီးချုပ် သုံးကြိမ်ဖြစ်ခဲ့တဲ့ နာဝတ်ဇ်ရှာရစ်ရဲ့ ညီအငယ်ဆုံးဖြစ်ပြီး အုပ်ချုပ်ရေးတော်တယ်လို့  အမည်ကောင်းရှိပါတယ်။

ခန်းကိုဖြုတ်ချခဲ့တာဟာ  ပါကစ္စတန်ရဲ့ နိုင်ငံရေးမတည်ငြိမ်မှုအတွက် အားကျစရာမဟုတ်တဲ့ မှတ်တမ်းအသစ်တစ်ခု ဖြစ်ပါတယ်။ ဗြိတိသျှတို့ထံမှ ၁၉၄၇ခုနှစ်မှာ လွတ်လပ်ရေးရပြီးကတည်းက ပါကစ္စတန်မှာ ဘယ်ဝန်ကြီးချုပ်မှ သက်တမ်းပြည့်တဲ့ အထိ တာဝန်ထမ်းဆောင်ခြင်း မပြုနိုင်ခဲ့ပါဘူး။

ပါလီမန်ဟာ ၂၀၂၃ ဩဂုတ်လတိုင်အောင် သက်တမ်းရှိနပါတယ်။ ဒါပေမယ့် အတိုက်အခံတွေက ရွေးကောက်ပွဲကို ခပ်စောစောပြုလုပ်လိုကြပါတယ်။ ဒါပေမယ့် ခန်းရှုံးနိမ့်ပြီးတဲ့နောက် သူတို့က ရွေးကောက်ပွဲဟာ လွတ်လပ်မျှတဖို့ လိုတယ်လို့ ပြောဆိုလာကြပါတယ်။

Source Reuters

Published 9 April 2022

ဂိုစတိုမဲလ် လေဆိပ်မှာရှိတဲ့ ကြေမွပျက်စီးနေတဲ့ လခြမ်းကွေးသဏ္ဍာန် လေယာဉ်ရပ်နားရုံအောက်က ကမ္ဘာ့အကြီးဆုံး လေယာဉ်ကြီးဟာ ကြေမွ ကျိုးကွဲနေပါတယ်။

အန်တိုနော့ဗ် An-225 အမ်ရီယာ ကုတင်လေယာဉ်ကြီးဟာ လက်ရှိပျံသန်းနေတဲ့ လေယာဉ်တွေထဲမှာ အကြီးဆုံးဖြစ်ပြီး တောင်ပံ တစ်ဖက်နှင့်တစ်ဖက်အကြား ၈၈ မီတာ အကျယ်ရှိပါတယ်။ ရုရှားတို့ တိုက်ခိုက်မှုကြောင့် တစ်စစီကျိုးပဲ့သွားရတာဖြစ်ပါတယ်။

အမ်ရီယာဆိုတာ ယူကရိန်းဘာသာအရ အိပ်မက်လို့ အဓိပ္ပါယ်ရပါတယ်။ လေယာဉ်ဦးပိုင်းမှာ အဲဒီစာကိုပုံနှိပ်ထားခဲ့တာဖြစ်ပေမယ့် အခုတော့ သတ္တူအပိုင်းအစအများအပြားထိမှန်မှုကြောင့် အဲဒီအမည် မရှိတော့ပါဘူး။

တစ်ကြိမ်တစ်ခါက အမျိုးသား ဂုဏ်သိက္ခာတစ်ခုရဲ့ ဇာစ်မြစ်တစ်ခုအဖြစ် အဲဒီလေယာဉ်ဟာရှိခဲ့ပါတယ်။ ဒါပေမယ့် အဲဒီလေယာဉ်ဟာ  ရုရှားတပ်တွေကို မြို့ပြင်ဂိတ်တွေမှာ ဆက်ထိန်းထားဖို့ တိုက်ပွဲဆင်ရာမှာ စတေးလိုက်ရတာဖြစ်ပါတယ်။

Source AFP

Published 9 April 2022

ရုရှား-ယူကရိန်းပဋိပက္ခကြောင့် ဂျပန်ရဲ့ တစ်ပတ်ရစ်ကားဟောင်းတင်ပို့တဲ့လုပ်ငန်းကို ထိခိုက်မှုတွေရှိနေပါတယ်။

ဖေဖော်ဝါရီလကုန်ပိုင်းလောက်ကစပြီး ဂျပန်နိုင်ငံ ချီးဘားစီရင်စုမှာ ရုရှားကိုတင်ပို့မယ့် တစ်ပတ်ရစ်ကားပေါင်း ၃၀၀၀ ကျော် စုပုံနေပါတယ်။

ပြီးခဲ့တဲ့လက လုပ်ငန်းတွေရဲ့ ၉၀ ရာခိုင်နှုန်းကျုံ့သွားတယ်လို့ အချို့ ကားရောင်းလုပ်ငန်းလုပ်ကိုင်နေသူတွေက ပြောပါတယ်။  ဒီကားဟောင်းတွေနှင့် ဘာဆက်လုပ်ရမယ်မှန်းမသိဘူးလို့ ဆိုပါတယ်။

ယူကရိန်းနှင့် အထူးစစ်ဆင်ရေးစတင်ကတည်းက ရုရှားကို သင်္ဘောတင်ပို့လုပ်ငန်းတွေ ပြတ်တောက်ခဲ့ရပါတယ်။ ရုရှား ဘဏ်တွေကို ပိတ်ဆို့အရေးယူမှုတွေရဲ့ ရူဘဲလ်ငွေတန်ဖိုးကျဆင်းနေမှုတွေက ဂျပန်ရဲ့ တစ်ပတ်ရစ်ကား တင်ပို့မှု စီးပွားဝန်းကျင်ကို ပိုမိုဆိုးရွားနေစေတာဖြစ်ပါတယ်။

Source CMG

#WorldHealth
Published - 09 April 2022
ကလေးအများစုဟာ ကျောင်းကိုလမ်းလျှောက်မသွားချင်လို့ အကြောင်းပြချက်မျိုးစုံပေးလေ့ရှိပေမယ့် 'ကာလမ်ကော့တ်နေ'ဆိုတဲ့ကလေးကတော့ တကယ်ကိုလမ်းလျှောက်သွားလို့မရလောက်တဲ့အထိ ကျန်းမာရေးပြဿနာရှိနေပါတယ်။

အက်ဆက်စ်ခရိုင် ဘေဆယ်ဒုံမြို့ရှိ အသက် ၁၄ နှစ်အရွယ်ကလေးဟာ အအေးနဲ့ဓာတ်မတည့်တဲ့ဝေဒနာခံစားနေရပြီး အပူချိန် ၂၄ ဒီဂရီဆဲလ်စီးယပ်စ်အောက်မှာ ၁၅ မိနစ်ထက်ပိုပြီးနေမိပါက အင်ပျဉ်တွေထလာတတ်ပါတယ်။

သူ့မိဘတွေက သူတို့ရဲ့ကလေးဓာတ်မတည့်ခြင်းဖြစ်ပွားမှာစိုးတဲ့အတွက် တစ်နေကုန်နွေးထွေးအောင်ထားပေးရပြီး ကျောင်းကိုလည်းကားမောင်းပို့ပေးပါတယ်။
ကလေးမိဘတွေပြောကြားချက်အရ 'ကာလမ်'ညအိပ်နေရင်း ခြေထောက်ဖြစ်ဖြစ် လက်ဖြစ်ဖြစ် စောင်လွတ်သွားတယ်ဆိုရင်တောင် မျက်နှာ၊ လက်တွေ၊ ခြေထောက်တွေမှာ အင်ပျဉ်တွေထလာပါတယ်။

သူ့တစ်ကိုယ်လုံးကို အအေးဒဏ်မှကာကွယ်နိုင်အောင် အင်္ကျီလက်ရှည်ဘောင်းဘီရှည်တွေ ဝတ်ပေးထားရပြီး သူဝါသနာပါတဲ့ဘောလုံးကိုတောင် ကစားလို့ မရဘဲဖြစ်နေပါတယ်။

အင်ပျဉ်ထပြီးယားယံတာလောက်ကဖြစ်တတ်ပေမယ့် အအေးနဲ့ဓာတ်မတည့်ခြင်းက အသက်အန္တရာယ်ပါထိခိုက်လာနိုင်တဲ့ anaphylaxis ဓာတ်မတည့်ခြင်းမျိုး ဖြစ်ပွားတတ်ပါတယ်။

အဲဒီလိုဓာတ်မတည့်ခြင်းမျိုးက အခုအချိန်မှာမဖြစ်ပေမယ့် အချိန်မရွေးဖြစ်နိုင်တဲ့အန္တရာယ်ရှိနေကြောင်း အမေဖြစ်သူကပြောပြပါတယ်။

မစ္စ'ကော့တ်နေ'က သူ့သားအကြောင်းပြောပြရာမှာ မိုးရေထဲသွားမိလို့ ရေစိုသွားရင် ပိုဆိုးလာတတ်ကြောင်း၊ ကျောင်းသွားရင် တီရှပ်အင်္ကျီလောက်နဲ့ သွားလို့မရကြောင်း၊ အေးနေတဲ့စားပွဲခုံနဲ့ ထိတွေ့နေတယ်ဆိုရင် အင်ပျဉ်ထလာမှာဖြစ်ကြောင်း ပြောပြသွားပါတယ်။

"အအေးနဲ့ဓာတ်မတည့်ခြင်းက 'ကာလမ်'ရဲ့နေ့စဉ်နေထိုင်မှုဘဝကို သက်ရောက်မှုရှိနေပါတယ်။ အပြင်သွားလို့ မရဘူး၊ အားကစားတွေဘာတွေလုပ်လို့ မရဘူး။ အပြင်ထွက်ပြီးဘောလုံးကစားတယ်ဆိုရင် မျက်နှာဖူးရောင်လာပါတယ်။ ခန္ဓာကိုယ်ရဲ့ဘယ်အပိုင်းဖြစ်ဖြစ် အအေးထိတွေ့ပြီဆိုတာနဲ့ အင်ပျဉ်ထလာပါတယ်" လို့ အသက် ၃၈ နှစ်အရွယ်ရှိ မစ္စ'ကာလမ်'ကပြောပြပါတယ်။

အင်ပျဉ်တွေထလာရင် နေမထိထိုင်မသာဖြစ်ရကြောင်း၊ ယားယံသလိုဖြစ်ပြီး ဆူးသလိုလည်းခံစားရကြောင်း 'ကာလမ်'ကရှင်းပြပါတယ်။

'ကာလမ်'အသက် ၄ နှစ်အရွယ်မှာ မင်္ဂလာပွဲတစ်ခုအပြင်ဘက်မှာဆော့ကစားရင်း အအေးနဲ့ဓာတ်မတည့်ခြင်းကို ပထမဆုံးခံစားခဲ့ရတာဖြစ်ပါတယ်။

အပင်တွေ ပန်းပွင့်တွေနဲ့ထိတွေ့လို ဓာတ်မတည့်တာမျိုးဖြစ်တယ်လို့ပဲ ယူဆခဲ့ကြပါတယ်။
အဲဒီနောက် ဓာတ်မတည့်ခြင်းက ဆက်တိုက်ဖြစ်ပေါ်နေခဲ့ပြီး အထူးသဖြင့်ဆောင်းရာသီရောက်လာတဲ့အခါ သိသာလာခဲ့ပါတယ်။

ဆယ်စုနှစ်တစ်ခုလောက်ကြာတဲ့အခါမှာတော့ 'ကာလမ်'ရဲ့အခြေအနေကိုကုသပေးဖို့ တိုင်ပင်လာကြပါတယ်။

အအေးဒဏ်ကိုရှောင်နိုင်ဖို့ ဆရာဝန်တွေက နေထိုင်မှုဘဝပုံစံပြောင်းလဲရန်အကြံပေးခဲ့ပေမယ့် မစ္စ'ကော့တ်နေ'က နိုင်ငံရပ်ခြားသွားပြီး နေထိုင်မှုပုံစံပြောင်းလဲလို့ မဖြစ်ကြောင်း ဆိုခဲ့ပါတယ်။

အအေးနဲ့ဓာတ်မတည့်ခြင်းက ငယ်ရွယ်တဲ့အမျိုးသမီးတွေမှာ ပိုဖြစ်တတ်ပြီး ကုသဖို့ နည်းလမ်းမရှိပါဘူး။ အလိုအလျောက်ပြန်ကောင်းသွားတတ်ပြီး နှစ်ပေါင်းများစွာကြာတဲ့အခါ ဝေဒနာပျောက်ကင်းသွားတတ်ပါတယ်။
Source: DailyMail