#DailyNews
Published - 16 May 2022

၁။ တိုင်းရင်းသားကျေးရွာကို အပန်းဖြေသင်္ဘောများ ဆိုက်ကပ်နိုင်ရေး ဆိပ်ခံဗောတံတားတည်ဆောက်ရန် တင်ဒါခေါ်ယူမည်။

၂။ မုတ်သုန်အဝင်မိုးရာသီမှာ ဖြစ်ပွားနိုင်သည့်သဘာဝဘေးများအတွက် ကြိုတင်ပြင်ဆင်ထား။

၃။ နေ့စဉ်မိုးလေဝသသတင်း။

၄။ အမေရိကန်မှ ယူကရိန်းသို့ပေးပို့သည့်လက်နက်များ မှောင်ခိုဈေးကွက်သို့ ရောက်ရှိလာနိုင်ဟု စုံစမ်းရေးမှူးသတိပေး။... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Ukraine_Crisis
Published 17 May 2022

ယူကရိန်းနိုင်ငံမှ မာရီယူပိုလ်ဆိပ်ကမ်းမြို့ကို ရုရှားတပ်များဝိုင်းရံပြီး လနဲ့ချီအောင်ဗုံးကျဲတိုက်ခိုက်ခဲ့ကြပြီးနောက် ရုရှားလက်ထဲသို့ ပေးအပ်လိုက်ရပြီဖြစ်ကာ အဆိုပါမြို့ရှိ ယူကရိန်းနောက်ဆုံးခံတပ်မှ ကျန်ရှိနေတဲ့တပ်သားများကို ကယ်ထုတ်ခဲ့ကြကြောင်း ယူကရိန်းစစ်တပ်က အင်္ဂါနေ့မှာ ပြောကြားလိုက်ပါတယ်။

ရာနဲ့ချီတဲ့ တိုက်ခိုက်ရေးသမားတွေထဲမှာ ဒဏ်ရာရသူများလည်းပါဝင်နေပြီး သူတို့ကို ရုရှားထိန်းချုပ်ရာမြို့များသို့ ကယ်ဆယ်ပို့ဆောင်ခဲ့ကြရာ ယူကရိန်းစစ်ပွဲအတွင်း အကြာရှည်ဆုံးနဲ့ အသေကြေအများဆုံး တိုက်ပွဲဖြစ်ခဲ့ပြီး ယူကရိန်းအတွက်တော့ အတော်လေးအထိနာခဲ့ရပါတယ်။

အဆိုပါမြို့ကို ရုရှားတို့တိုက်ခိုက်ခဲ့ပြီးနောက် တစ်မြို့လုံးပျက်စီးကြေမွသွားပြီး မြို့ထဲရှိလူပေါင်းသောင်းနဲ့ချီသေဆုံးခဲ့တယ်လို့ ယူကရိန်းဘက်က ထုတ်ပြန်လိုက်ပါတယ်။

မာရီယူပိုလ်ရှိကျန်တဲ့နေရာတွေ ရုရှားထိန်းချုပ်မှုအောက်ရောက်ရှိသွားချိန်မှာ ယူကရိန်းတပ်ဖွဲ့ဝင်တွေနဲ့ အရပ်သားရာဂဏန်းလောက်ဟာ အာဇော့ဗ်စတယ်လ် သံမဏိစက်ရုံမြေအောက်မှာ ပုန်းအောင်နေခဲ့ရပါတယ်။

လတ်တလောရက်သတ္တပတ်များအတွင်း မြေအောက်ထဲမှာ ပုန်းအောင်းနေတဲ့အရပ်သားတွေကို ကယ်ထုတ်နိုင်ခဲ့သလို တပ်ဖွဲ့ဝင် ၂၆၀ ကျော်နဲ့ ဒဏ်ရာရသူအချို့ကို ရုရှားထိန်းချုပ်ရေးနယ်မြေများထံသို့ တနင်္လာနေ့က ပို့ဆောင်ခဲ့ပါတယ်။

ယူကရိန်းစစ်တပ်ရဲ့စစ်ဦးစီးချုပ်က မာရီယူပိုလ်ခံတပ်ဟာ ခုခံတိုက်ခိုက်ရေး တာဝန်ကို အပြည့် အဝဆောင်ရွက်နိုင်ခဲ့ကြောင်း၊ စစ်မှုထမ်းတွေကိုကယ်တင်ဖို့ အာဇော့ဗ်စတယ်လ်မှာ အခြေချထားတဲ့ တပ်မှူးများကို စစ်ရေးအထက်ပိုင်းက အမိန့်ပေးခဲ့ကြောင်း၊ မာရီယူပိုလ်မှ ခုခံသူတွေက အခုတိုက်ပွဲရဲ့ သူရဲကောင်းများဖြစ်ကြောင်း ထုတ်ပြန်ကြေညာလိုက်ပါတယ်။

သံမဏိစက်ရုံမှ ဒဏ်ရာရစစ်သည် ၅၃ ဦးကို အရှေ့ဘက် ၃၂ ကီလိုမီတာ ရုရှားထိန်းချုပ်ရေးနယ်မြေ နိုဗိုအာဇော့ဗ်စ်ရှိ ဆေးရုံသို့ခေါ်ဆောင်သွားခဲ့ကြောင်း ယူကရိန်းဒုတိယကာကွယ်ရေးဝန်ကြီးက ပြောကြားခဲ့ပါတယ်။

နောက်ထပ် ၂၁၁ ဦးကိုတော့ ရုရှားကျောထောက်နောက်ခံပြုခွဲထွက်ရေးသမားများ အုပ်ချုပ်ရာ အိုလေနစ်ဗ်ကာမြို့သို့ ခေါ်ဆောင်သွားခဲ့ပါတယ်။

ကယ်ထုတ်ခံရသူများဟာ ရုရှားနဲ့အကျဉ်းသားလဲလှယ်ရေးကိစ္စမှာ အကျုံးဝင်ပတ်သက်နေမှာဖြစ်ပါတယ်။

"ကျွန်တော်တို့လူတွေကို ကျွန်တော်တို့ကယ်ဆယ်နိုင်ဖို့ မျှော်လင့်ပါတယ်။ သူတို့ထဲမှာ ဒဏ်ရာအလွန်ပြင်းထန်တဲ့သူတွေလည်း ပါနေပါတယ်။ အခုတော့ ပြုစုစောင့်ရှောက်ခံနေရပါပြီ။ ယူကရိန်းရဲ့သူရဲကောင်းတွေကို အသက်ရှင်လျက်ပြန်လိုချင်ပါတယ်" လို့ ယူကရိန်းသမ္မတ'ဗိုလိုဒီမီယာဇယ်လန်စကီ'က နံနက်ခင်းမိန့်ခွန်းမှာ ပြောကြားသွားပါတယ်။

တနင်္လာနေ့နှောင်းပိုင်းမှာ ယူကရိန်းတပ်ဖွဲ့ဝင်တွေကို သယ်ဆောင်လာတဲ့ ဘတ်စ်ကား ၅ စီးဟာ အာဇော့ဗ်စတယ်လ်မှ ထွက်လာပြီး နိုဗိုအာဇော့ဗ်သို့ရောက်ရှိလာတာကို ရိုက်တာသတင်းဌာနက တွေ့ရှိလိုက်ရပါတယ်။

ရုရှားကျူးကျော်ရေးသင်္ကေတဖြစ်တဲ့ 'Z'အမှတ်တံဆိပ်ပါကားပေါ်မှာ တပ်သားတွေကို လူနာသယ်ထမ်းစင် ၃ ဆင့်ဖြင့်ထပ်ထားတာကိုတွေ့ရပါတယ်။

လူတစ်ဦးဆိုရင် ဘီးတပ်ကုလားထိုင်ဖြင့်နေနေရပြီး ခေါင်းကိုပတ်တီးထူထူဖြင့် တင်းတင်းကြပ်ကြပ်ပတ်ထားတာကို တွေ့မြင်ခဲ့ရပါတယ်။

Source: Reuters.
#Yangon_Media_Group

#WorldHealth
Published 17 May 2022

ဆယ်ကျော်သက်မိန်းကလေးတစ်ဦးဟာ ရေနဲ့ဓာတ်မတည့်ဘဲ အလွန်နာကျင်ရတဲ့ အင်ပျဉ်တွေထွက်လာတတ်တာကြောင့် ပုံမှန်ရေချိုးခြင်းမပြုလုပ်နိုင်တဲ့အပြင် မျက်ရည်ကျလို့တောင် မရတဲ့ အခြေအနေဖြစ်ပါတယ်။

အရီဇိုးနား တက်ခ်ဆန်မှ အသက် ၁၅ နှစ်ရှိ'အက်ဘီဂေးလ်ဘက်ခ်'ဟာ လွန်ခဲ့တဲ့ ၃ နှစ်ကတည်းက အဆိုပါလက္ခဏာတွေခံစားခဲ့ရပေမယ့် ပြီးခဲ့တဲ့လကမှ ရေနဲ့ဓာတ်မတည့်တဲ့ရောဂါရှိကြောင်း သိရှိလိုက်ရပါတယ်။

လူအယောက်သန်း ၂၀၀ မှာ တစ်ယောက်ဖြစ်တတ်တဲ့ အလွန်ရှားပါးဝေဒနာမျိုးဖြစ်ပြီး အရေပြားကိုရေနဲ့ထိတွေ့မိတဲ့အခါ အင်ပျဉ်များဖြစ်ပေါ်လာတတ်ပါတယ်။

မိုးရေစိုတဲ့အခါ ဒါမှမဟုတ် ရေချိုးလိုက်တဲ့အခါတိုင်း အက်ဆစ်နဲ့ပက်သလိုခံစားရတာကြောင့် ၂ ရက်နေမှ ရေချိုးရကြောင်း 'အက်ဘီဂေးလ်'ကဆိုပါတယ်။

ရေသောက်တဲ့အခါမှာလည်း ပြန်ပြီးအန်ထွက်တာကြောင့် ရေတစ်ခွက်အပြည့်မသောက်ရတာ တစ်နှစ်ကျော်နေပါပြီ။

အဲဒီအစား အဟာရအချိုရည်နဲ့ ရေဓာတ်ပါဝင်မှုနည်းတဲ့ သလဲသီးဖျော်ရည်ကိုသာ သောက်သုံးနေရပါတယ်။

ရောဂါအခြေအနေတိုးတက်မလာဘူးဆိုရင် ပုံမှန်အားဆေးသွင်းခြင်းနဲ့ ရေဓာတ်ပြည့်ဝမယ့်ဆေးတွေ အသုံးပြုသင့်ကြောင်း ဆရာဝန်တွေကအကြံပြုထားပါတယ်။

'အက်ဘီဂေးလ်'ဟာ အပျိုဖော်ဝင်စအချိန် အသက် ၁၃ နှစ်မှာ စပြီး ဒီလက္ခဏာတွကို ခံစားခဲ့ရပါတယ်။

ဒီလိုဖြစ်ရပ်မျိုး အယောက် ၁၀၀ အောက်ဖြစ်ဖူးကြောင်း မှတ်တမ်းများရှိနေပြီး အရွယ်ကူးပြောင်းချိန်တွေမှာ ဖြစ်လေ့ရှိပါတယ်။

ဖြစ်ရတဲ့အကြောင်းအရင်းကို သေချာမသိရသေးပေမယ့် ရေထဲမှာပါဝင်တဲ့ဓာတ်ပစ္စည်းတစ်မျိုးကြောင့် ကိုယ်ခံအားတုန့်ပြန်တဲ့ သဘောဖြစ်နိုင်ပါတယ်။

ရှားပါးဝေဒနာတစ်ခုဖြစ်တာကြောင့် အကောင်းဆုံးကုသရမယ့်နည်းလမ်းကိုလည်း မသိရှိကြသေးပါဘူး။

သက်သာအောင်ကုသတဲ့နည်းလမ်းတွေကတော့ အန်တီဟစ္စတမင်း၊ ခရမ်းလွန်ရောင်ခြည်၊ စတီးရွိက်၊ အရေပြားကာကွယ်ပေးတဲ့ခရင်မ်နဲ့ ဆိုဒီယမ်ဘိုင်ကာဗွန်နိတ်ဖြင့် ရေချိုးခြင်းတို့ ဖြစ်ပါတယ်။

အစပိုင်းမှာ အနည်းငယ်သာခံစားရပေမယ့် တဖြည်းဖြည်းနဲ့ဆိုးရွားလာခဲ့ပြီး မိုးရေထိရင်တောင် အက်ဆစ်နဲ့ထိသလို ခံစားရကြောင်း ပြောပြလာပါတယ်။

အခုဆိုရင် ရေချိုးခြင်း၊ အားကစားလုပ်ခြင်း စတဲ့နေ့စဉ်ဘဝလှုပ်ရှားမှုတွေကို မပြုလုပ်နိုင်တဲ့အပြင် မျက်ရည်ကျလို့တောင်မရပါဘူး။

ရေသောက်လိုက်တယ်ဆိုရင်လည်း ရင်ဘတ်ကနာ၊ နှလုံးခုန်ကမြန်လာပြီး အန်ထွက်လေ့ရှိပါတယ်။

"တစ်နေ့နေ့တစ်ခုခုဖြစ်သွားရင် ဘာလုပ်ရမလဲတောင် မသိပါဘူး။ အနားကတစ်ယောက် ယောက်က အကောင်းဆုံးကူညီပေးလိမ့်မယ်လို့ စိတ်ထဲမှတ်ယူထားပါတယ်" လို့ 'အက်ဘီဂေးလ်'ကဆိုပါတယ်။

'အက်ဘီဂေးလ်'က ဒီရောဂါအကြောင်းလူတွေသိရှိလာအောင် အသိပေးနေပြီး ဒီအကြောင်းပိုမိုနားလည်လာအောင် ရှင်းပြနေရပါတယ်။

Source: DailyMail
#Yangon_Media_Group

#WorldHealth
Published 17 May 2022

ပြီးခဲ့တဲ့ဆောင်းရာသီက ကမ္ဘာပေါ်မှာ အိုမီခရွန်ကူးစက်လှိုင်းဖြစ်ပွားခဲ့ပြီးနောက် ကိုဗစ်ကူးစက်မှုများခဏတာ ငြိမ်သက်သွားမယ်လို့ ထင်ခဲ့ကြပါတယ်။

ဒါပေမဲ့အမေရိကန်မှာ လက်ရှိကိုဗစ်ကူးစက်မှုများ တဖြည်းဖြည်းပြန်လည်များပြားလာပြီဖြစ်ပါတယ်။

အချို့လူတွေမှာ ကိုဗစ်ရောဂါကို ၂ ကြိမ်၊ ၃ ကြိမ်၊ ၄ ကြိမ်လောက်အထိကူးစက်နေတာမျိုး ရှိလာပါပြီ။

လတ်တလောရောဂါကြောင့် ဖျားနာဝေဒနာခံစားရခြင်းဖြင့် ကိုဗစ်ရောဂါ မကူးစက်တော့ဘူးဆိုတဲ့ အာမခံချက်မျိုးမရှိပါဘူး။

အိုမီခရွန်မှ ထပ်မံခွဲထွက်လာတဲ့မျိုးနွယ်ခွဲဗိုင်းရပ်စ်တွေဟာ ဒယ်လ်တာကူးစက်မှုနဲ့ မူလအိုမီခရွန်ကူးစက်မှုတို့မှရရှိတဲ့ ပဋိပစ္စည်းတွေကိုပါ ရှောင်ရှားသွားနိုင်တယ်လို့ လေ့လာတွေ့ရှိထားပါတယ်။

"ကိုဗစ်ကူးစက်မှုတွေ ခဏလောက်လျော့ပါးသွားမယ်လို့ထင်ခဲ့ပေမယ့် တကယ်ကတော့ သိပ်ပြီးအဆင်ပြေမနေပါဘူး" လို့ မာဆာချူဆက်စ်အထွေထွေဆေးရုံကြီးမှ ကူးစက်ရောဂါကျွမ်းကျင် ဒေါက်တာ'ဂျိတ်ခ်လမ်မစ်'က ဆိုပါတယ်။

ထပ်မံကူးစက်ခြင်းတွေ ဘယ်လောက်အထိဖြစ်နေကြသလဲဆိုတာ မသိရသလို ဘယ်မျိုးဗီဇကွဲတွေလဲဆိုတာကိုလည်း မသိရပါဘူး။

ထပ်မံကူးစက်မှုတွေကို လိုက်လံစောင့်ကြည့်ဖို့ ပြည်နယ်ကျန်းမာရေးဌာနအနည်းငယ်ကို အသိပေးထားပြီး ဆောင်ရွက်နေပေမယ့် ထပ်မံကူးစက်မှုတွေဟာ အကြောင်းကြားသိရှိရတာထက် ပိုနည်းနေနိုင်ပါတယ်။

သူတိုရဲ့ထုတ်ဖော်ထားတဲ့ အချက်အလက်တွေအရ ထပ်မံကူးစက်ခြင်းတွေက ပိုပြီးအဖြစ်များလာတယ်ဆိုတာကို အထူးသတိပေးထားပါတယ်။

ကိုလိုရာဒိုပြည်နယ်မှာ ကပ်ရောဂါကာလအတွင်း ထပ်မံကူးစက်သူ ၄၄,၀၀၀ ဦးရှိခဲ့ကြောင်း ကျန်းမာရေးစောင့်ရှောက်မှုဌာနက မှတ်တမ်းရရှိထားပါတယ်။

ကိုဗစ်ကာကွယ်ဆေးမထိုးထားတဲ့သူတွေမှာ ထပ်မံကူးစက်ခြင်းမျိုး အများဆုံးတွေ့ရှိရကာ ၃ ပုံ ၁ ပုံကျော်က ကာကွယ်ဆေးနှစ်ကြိမ်ထိုးပြီးသားသူတွေဖြစ်ပြီး ၁၆ ရာခိုင်နှုန်းလောက်ကတော့ အားမြှင့်ကာကွယ်ဆေး(booster)ထိုးပြီးသား လူတွေဖြစ်ပါတယ်။

မြောက်ကယ်ရိုလိုင်းနားမှာ မတ်လနှောင်းပိုင်းကတည်းက ထပ်မံကူးစက်မှုမြင့်တက်လာခဲ့ပြီး ဧပြီ ၃၀ ရက်နေ့အထိ ပြည်နယ်အတွင်း ကိုဗစ်ကူးစက်သူ စုစုပေါင်းရဲ့ ၈ ရာခိုင်နှုန်းက ထပ်မံကူးစက်သူတွေဖြစ်ပါတယ်။

အင်ဒီယာနာနဲ့ အိုင်ဒါဟိုတို့မှာလည်း ထပ်မံကူးစက်သူ ၁၂ ရာခိုင်နှုန်းကျော်နဲ့ ၁၈.၅ ရာခိုင်နှုန်းအသီးသီးရှိခဲ့ပါတယ်။

ဝါရှင်တန်မှတင်ပြချက်အရ ထပ်မံကူးစက်သူတွေထဲမှာ ဆေးရုံတက်ကုသရသူတွေလည်း ရှိနေပါတယ်။

ထပ်မံကူးစက်မှု အများဆုံးဖြစ်လေ့ရှိသူတွေမှာ အသက် ၁၈ မှ ၃၄ နှစ်အတွင်းဖြစ်ပြီး အသက် ၆၅ နှစ်နဲ့ အထက်လူကြီးတွေကတော့ ဆေးရုံတက်ကုသခံယူရလေ့ရှိပါတယ်။

"လူတစ်ယောက်က ရောဂါမကူးစက်အောင် ဘယ်လိုပဲသတိထားပြီးနေနေ ပထမဆုံးအကြိမ် ကိုဗစ်စဖြစ်ပြီဆိုရင် အံ့ဩစရာတော့မဟုတ်တော့ပါဘူး။ ကူးစက်လှိုင်းရောက်လာရင် ကျွန်တော်တို့ဘာမှမတတ်နိုင်ပါဘူး" လို့ ဆန်ဖရန်ဆစ္စကို ကယ်လီဖိုးနီးယားမှ ဥက္ကဌ'ဘော့ဘ်ဝက်ချ်တာ'က ပြောပြသွားပါတယ်။

Source: Bloomberg
#Yangon_Media_Group

#WorldRecycle
Published 16 May 2022

ပြင်သစ်နိုင်ငံ အိုလေရွန်ကျွန်းမှာ ရူလ်မာဖရစ်-၁၇ ဆိုတဲ့ စွန့်ပစ်ပစ္စည်းဝန်ဆောင်မှုအဖွဲ့အစည်းက နေရာအနှံမှ အသုံးပြုပြီးသား ဟင်းချက်ဆီများကို ၁၅ နှစ်တိုင်အောင် စုဆောင်းလာခဲ့ပါတယ်။

#Yangon_Media_Group

Published 16 May 2022

နိုင်ငံမှာ ကိုဗစ်လှိုင်းနှင့်ရင်ဆိုင်နေရတဲ့ အလျောက်  မြောက်ကိုးရီးယားခေါင်းဆောင် ကင်မ်ဂျုန်အန်ဟာ အခြားအရာရှိတွေနှင့် အတူ မေလ(၁၆)ရက်က ဆေးဆိုင်တွေကို သွားရောက်ကြည့်ရှုခဲ့ပါတယ်။

ပြည်သူတွေကြားထဲ ရောဂါကူးစက်မှု အရှိန်ကိုလျှော့ချဖို့အတွက် ခေါင်းဆောင်ကင်မ်က နိုင်ငံတစ်ဝှမ်း လော့ခ်ဒေါင်းလုပ်ဖို့ အမိန့်ပေးထားပေမယ့် မြောက်ကိုးရီးယားနိုင်ငံမှာ လူပေါင်းတစ်သန်းကျော်ဟာ အစိုးရကပြောတဲ့ “အဖျား”ရောဂါနှင့်နေမကောင်းဖြစ်နေကြပါတယ်။

ကပ်ရောဂါတားဆီးကာကွယ်ရေးမှာ ဖြစ်ကတတ်ဆန်း တုန့်ပြန်တယ်ဆိုပြီး ကင်မ်က ကျန်းမာရေးအရာရှိတွေကို ပြင်းထန်စွာ ဝေဖန်ထားပါတယ်။ အထူးသဖြင့်ဆေးဆိုင်တွေဟာ ၂၄နာရီဖွင့်ပြီးဆေးတွေရောင်းချဖို့ပျက်ကွက်ခဲ့တာကိုဖြစ်ပါတယ်။

မြောက်ကိုးရီးယားမှာ ယခုအထိလူ(၅၀)အထိသေဆုံးခဲ့ရပြီးနောက် သူဟာ မြို့တော်ပြုံယမ်းမှာ ဆေးဝါးတွေဖြန့်ချိမှု တည်ငြိမ်ရေးဆောင်ရွက်ဖို့ စစ်တပ်ကိုအမိန့်ပေးလိုက်ပါတယ်။

Source AFP