Published 1 April 2022

အမေရိကန်နိုင်ငံသားတွေထဲက လိင်ပြောင်းထားသူတွေဟာ ဧပြီ၁၁ရက်ကစပြီး  နိုင်ငံကူးလက်မှတ်လျှောက်လွှာထဲက လိင်ရွေးချယ်မှု အပိုင်းမှာ  ကျား၊မ အခြား X အမှတ်အသား ကို ရွေးချယ်ပေးနိုင်တော့မယ်လို့ အမေရိကန်အစိုးရက ကြာသပတေးနေ့က ကြေညာပါတယ်။

သူတို့ဟာ သူတို့ရဲ့ မွေးစာရင်းနှင့် အခြားတရားဝင်စာရွက်စာတမ်းတွေမှာ လိင်အမျိုးအစားနှင့်ပတ်သက်လို့ ဘယ်လိုပဲ ရေးထားထား အမှတ်ကို ရွေးချယ်လျှောက်ထားနိုင်မှာဖြစ်ပါတယ်။

ဒီလိုလုပ်ဆောင်တာဟာ လိင်ပြောင်းထားတဲ့၊ကျားလိင် မလိင်မဟုတ်တဲ့ အမေရိကန်နိုင်ငံသားတွေအတွက် တိကျတဲ့ အသိအမှတ်ပြုစာရွက်စာတမ်းတွေရရှိဖို့ သမ္မတရဲ့ ကတိကဝတ်အပေါ် လုပ်ဆောင်ရာမှာ အဓိကကျတဲ့ ခြေလှမ်းဖြစ်တယ်လို့ အိမ်ဖြူတော်က ပြောပါတယ်။

Source AFP

#DailyNews
Published -1 April 2022

၁။ ပုဂံဒေသသို့ ခရီးသွားဝင်ရောက်မှု ၇၀ ရာခိုင်နှုန်းအထိ ပြန်လည်မြင့်တက်

၂။ မြန်မာပြောင်း တရုတ်နိုင်ငံကို တရားဝင်တင်ပို့ခွင့်ရလာတာကြောင့် နိုင်ငံတကာမှာ ရရှိနေသည့် ဈေးနှုန်းအတိုင်း ဈေးရရှိလာနိုင်

၃။ မိုးလေဝသ သတင်း

၄။ ယခုနှစ် ကမ္ဘာ့ဖလားပြိုင်ပွဲအတွက်ရည်ရွယ်၍ ကြီးမားခမ်းနားလှသော အားကစားပြတိုက်ကြီး ကာတာတွင်ဖွင့်လှစ်...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#WorldHealth
Published- 1 April 2022

လုံလောက်စွာအိပ်စက်အနားယူခြင်းမရှိပါက အဆီစုပုံလာနိုင်ပြီး အထူးသဖြင့် ဝမ်းဗိုက်မှာအဆီထွက်လာနိုင်ကြောင်း လေ့လာတွေ့ရှိထားပါတယ်။ စမ်းသပ်မှုပြုလုပ်ရာမှာ ကျန်းမာရေးကောင်းမွန်ပြီး အဆီမများတဲ့လူ ၁၂ ယောက်ကို ၂၁ ရက်အတွင်း လေ့လာစမ်းသပ်ခဲ့ကြပါတယ်။

အဲဒီနောက် အိပ်ချိန်အနည်းငယ်သာပေးထားတဲ့လူတွေမှာ ဝမ်းဗိုက်အဆီထွက်လာခြင်း ၉ ရာခိုင်နှုန်းပိုများလာပြီး ဝမ်းဗိုက်အတွင်းသားထဲအဆီစုပုံလာခြင်း ၁၁ ရာခိုင်နှုန်းပိုများလာတာကို တွေ့ရှိခဲ့ရပါတယ်။

ဝမ်းဗိုက်အတွင်းရှိ အတွင်းအင်္ဂါတွေနားမှာ အဆီစုပုံလာခြင်းဖြင့် နှလုံးရောဂါနဲ့ ဇီဝကမ္မဖြစ်စဉ်မူမမှန်ခြင်းများ ဖြစ်ပေါ်လာတတ်ကြောင်း အရင်ကတည်းက သိရှိထားပါတယ်။
ပုံမှန်အားဖြင့် ခန္ဓာကိုယ်အရေပြားအောက်မှာ အဆီစုပုံလာတတ်ပေမယ့် အိပ်ရေးမဝတဲ့အခါမှာတော့ အတွင်းအင်္ဂါတွေနားက ဝမ်းတွင်းနေရာတွေမှာပါ အဆီတွေရောက်ရှိလာတာဖြစ်ပြီး ကျန်းမာရေးပိုမိုထိခိုက်စေနိုင်ပါတယ်။

နောက်ထပ်သတိထားရမှာက အိပ်ရေးပျက်ပြီးနောက် အိပ်ရေးဝအောင်အစားထိုးအိပ်စက်ခြင်းဖြင့် ကယ်လိုရီတိုးမလာနိုင်ပေမယ့် ဝမ်းတွင်းအဆီတွေကတော့ ဆက်လက်စုပုံနေဆဲဖြစ်ပါတယ်။

ဒါကြောင့် အိပ်ရေးမဝခြင်းက ဝမ်းတွင်းအဆီစုပုံခြင်းဖြစ်ပေါ်စေပြီး အစားထိုးအိပ်စက်ခြင်းဖြင့် ဝမ်းတွင်းအဆီစုပုံလာခြင်းကို ပြန်လည်လျော့ကျစေမှာမဟုတ်ကြောင်း မင်နီဆိုတာရှိ မိုင်ယိုဆေးခန်းမှ နှလုံးအထူးကု'ဗာရန်းဆိုမာစ်'က ပြောကြားသွားပါတယ်။

ဝမ်းတွင်းအဆီစုပုံခြင်းကို စီတီစကင်ဖြင့်သာရှာဖွေတွေ့ရှိနိုင်ပြီး ကိုယ်အလေးချိန်တက်တဲ့အခါမှာလည်း တစ်ပေါင်ခန့်သာများလာတာကြောင့် မသိရှိဘဲဖြစ်နေတတ်ကြပါတယ်။
ဝမ်းဗိုက်မှာအဆီစုပုံလာခြင်းကို သိရှိဖိုခက်ခဲတာကြောင့် ကျန်းမာရေးအတွက်ပိုပြီးအန္တရာယ်ရှိစေပါတယ်။

ဦးနှောက်လုပ်ဆောင်ချက်တွေ၊ ခန္ဓာကိုယ်ရေဓာတ်ထိန်းသိမ်းခြင်းတွေ၊ အတိတ်မေ့ခြင်းမဖြစ်အောင် ကာကွယ်ခြင်းတွေ၊ အခြားစိတ်ပိုင်းဆိုင်ရာနဲ့ ရုပ်ပိုင်းဆိုင်ရာကျန်းမာရေးအခြေအနေတွေမှာ အိပ်ရေးဝအောင် အိပ်စက်အနားယူခြင်းက အရေးကြီးလှပါတယ်။
ယခုလေ့လာတွေ့ရှိချက်များအရ အိပ်ရေးပျက်တဲ့အခါ နောက်ထပ်ဆိုးကျိုးတွေပါဖြစ်ပေါ်လာနိုင်ကြောင်း သိရှိလာရပါတယ်။

ဝမ်းဗိုက်အဆီထွက်ခြင်းကိုကာကွယ်ဖို့ အတွက် အိပ်ချိန်မှန်ကန်စွာနဲ့ အိပ်ရေးဝအောင်အိပ်ဖို့လိုအပ်တဲ့အပြင် လေ့ကျင့်ခန်းပြုလုပ်ခြင်း၊ ကျန်းမာရေးနဲ့ညီညွတ်တဲ့အစားအစာ စားသောက်ခြင်းတို့ဖြင့် ထိန်းသိမ်းဖို့ကိုလည်း သုတေသီများကအကြံပြုထားပါတယ်။
ရေရှည်မှာ အိပ်ရေးပျက်ခြင်းကြောင့် အဝလွန်ခြင်း၊ နှလုံးသွေးကြောရောဂါနဲ့ ဇီဝကမ္မဖြစ်စဉ်ရောဂါများဖြစ်ပွားလာနိုင်ကြောင်း သတိထားဖို့ လိုအပ်ပါတယ်။
Source: ScienceAlert

#WorldPolitics
Published - 01 April 2022
ရုရှားနိုင်ငံမှဓာတ်ငွေ့များဝယ်ယူသူတွေအနေနဲ့ ဧပြီ ၁ ရက်နေ့(သောကြောနေ့)ကစတင်ကာ ရုရှားငွေရူဘယ်လ်ဖြင့်ဝယ်ယူပေးချေရမှာဖြစ်ပြီး ရူဘယ်လ်ဖြင့်မပေးချေနိုင်ပါက ဓာတ်ငွေ့ထောက်ပံ့မှုရပ်ဆိုင်းသွားမှာဖြစ်ကြောင်း ရုရှားသမ္မတ'ဗလာဒီမီယာပူတင်'က သတ်မှတ်ပြောကြားလိုက်ပါတယ်။

'ပူတင်'ရဲ့မိန့်ကြားချက်ကို ဥရောပမြို့ကြီးတွေက ငြင်းပယ်လိုက်ကြပြီး ဒါဟာ ခြိမ်းခြောက်မှုတစ်ခုဖြစ်တယ်လို့ ဂျာမနီတို့ကပြောဆိုလိုက်ပါတယ်။ ကြာသပတေးနေ့ကထုတ်ပြန်လိုက်တဲ့ 'ပူတင်'ရဲ့အမိန့်ကြောင့် ဥရောပအနေနဲ့ ဓာတ်ငွေ့ရရှိမှု ၃ ပုံ ၁ ပုံကျော်ကို လက်လွှတ်ဆုံးရှုံးရဖွယ်ရှိနေပါတယ်။

ဥရောပရဲ့စီးပွားရေးအင်အားအကြီးဆုံးဂျာမနီနိုင်ငံက ဓာတ်ငွေ့ရရှိဖို့ ရုရှားကိုအလွန်အမင်းမှီခိုနေရတာကြောင့် အခုဆိုရင် ဓာတ်ငွေ့ကိုခွဲတမ်းနဲ့အသုံးပြုဖို့ အရေးပေါ်အစီအစဉ်တွေစတင်လုပ်ဆောင်နေပြီဖြစ်ပါတယ်။

ရုရှားတို့ကယူကရိန်းကို ကျူးကျော်ခဲ့တာကြောင့် အနောက်နိုင်ငံတွေက ရုရှားဘဏ်တွေ၊ ကုမ္ပဏီတွေ၊ စီးပွားရေးလုပ်ငန်းရှင်တွေ၊ အစိုးရနဲ့ဆက်စပ်တဲ့သူတွေကို ဒဏ်ခတ်ပိတ်ဆို့မှုတွေပြင်းပြင်းထန်ထန်ချမှတ်ခဲ့ပါတယ်။

ထိုဒဏ်ခတ်ပိတ်ဆို့မှုတွေကိုတုန့်ပြန်ဖို့ 'ပူတင်'ကစွမ်းအင်လောင်စာတင်ပို့ခြင်းကဏ္ဍကို အဓိကအားထားလျက်ရှိပါတယ်။

"ရုရှားမှဓာတ်ငွေ့ဝယ်ယူမယ်ဆိုရင် ရုရှားဘဏ်တွေမှာ ရူဘယ်လ်အကောင့်စာရင်းဖွင့်ဖို့လိုပါတယ်။ ဧပြီ ၁ ရက်နေ့ကစပြီး ဓာတ်ငွေ့ဝယ်ယူမယ့်သူတွေ ဒီအကောင့်စာရင်းတွေကနေ ပေးချေရမှာဖြစ်ပါတယ်" လို့ 'ပူတင်'က ပြောကြားခဲ့ပါတယ်။

"ဒီလိုမျိုးမပေးချေဘူးဆိုရင် ဓာတ်ငွေ့ဝယ်ယူတယ်လို့ သတ်မှတ်မှာမဟုတ်ပါဘူး။ ဘယ်သူကမှ ပစ္စည်းတွေကိုအလကားမရောင်းကြသလို ကျုပ်တို့ကလည်း အလှူလုပ်နေတာမဟုတ်ပါဘူး။ ရူဘယ်လ်နဲ့မပေးချေဘူးဆိုရင် လက်ရှိစာချုပ်တွေရပ်ဆိုင်းသွားမှာပါ" လို့ ရုပ်သံကနေပြောကြားလိုက်ပါတယ်။

ရုရှားရဲ့ထုတ်ပြန်ချက်ကိုတုန့်ပြန်ဖို့ အီတလီက ဥရောပနိုင်ငံတွေနဲ့ ဆက်သွယ်ထားကြောင်းဆိုလိုက်ပြီး ရုရှားဓာတ်ငွေ့ပြတ်တောက်သွားလျှင် အရန်ဓာတ်ငွေ့သိုလှောင်ရေးဖြင့် စီးပွားရေးလုပ်ငန်းတွေဆက်လက်လုပ်ဆောင်သွားမယ်လို့ပြောကြားလိုက်ပါတယ်။
ဂျာမနီမှစွမ်းအင်ကုမ္ပဏီတွေကလည်း ဘာလင်နဲ့နီးနီးစပ်စပ်ဆွေးနွေးလျက်ရှိပြီး ရုရှားဓာတ်ငွေ့ထောက်ပံ့မှုရပ်တန့်သွားရင် နောက်ထပ်လမ်းကြောင်းဖြင့်ရယူသုံးစွဲဖို့ တိုင်ပင်နေကြပါတယ်။

ဓာတ်ငွေ့ဝယ်ယူမယ့်သူတွေက ရုရှားနိုင်ငံပိုင် Gazprom ဘဏ်မှာ အကောင့်စာရင်းဖွင့်ပြီးဝယ်ယူရမှာဖြစ်ပါတယ်။ Gazprom ဘဏ်က ဓာတ်ငွေ့ဝယ်ယူသူတွေကိုယ်စား ရူဘယ်လ်ငွေဝယ်ယူပေးမှာဖြစ်ပါတယ်။

ဧပြီလအတွင်းဓာတ်ငွေ့ထောက်ပံ့မှုအတွက် စာချုပ်အချို့မှာ ဧပြီလလယ် သို့မဟုတ် မေလမှစတင်သက်ရောက်မှာဖြစ်တာကြောင့် ဓာတ်ငွေ့ထောက်ပံ့မှုချက်ချင်းရပ်ဆိုင်းသွားမှာမဟုတ်ဘူးလို့ ယူဆရကြောင်း သတင်းအရင်းအမြစ်တစ်ခုက ရိုက်တာသတင်းဌာနကိုပြောကြားခဲ့ပါတယ်။

ဖေဖော်ဝါရီ ၂၄ ရက်နေ့ ယူကရိန်းကိုစတင်ကျူးကျော်ကတည်းက ရုရှားငွေရူဘယ်လ်တန်ဖိုးစံချိန်တင်ကျဆင်းခဲ့တာကြောင့် တန်ဖိုးပြန်တက်လာအောင် ရူဘယ်လ်ငွေဖြင့်ပေးချေခိုင်းဖို့ 'ပူတင်'ကဆုံးဖြတ်လိုက်တာဖြစ်ပါတယ်။

အနောက်နိုင်ငံများမှ အစိုးရတွေနဲ့ကုမ္ပဏီတွေကတော့ ဓာတ်ငွေ့ဝယ်ယူဖို့ စာချုပ်မှာ ငွေကြေးပြောင်းလဲပေးချေဖို့ အချက်ကို ငြင်းပယ်လိုက်ကြပါတယ်။

ရူဘယ်လ်ဖြင့်ပေးချေရမယ်ဆိုရင် အနောက်နိုင်ငံတွေမှအရေးယူချမှတ်ထားတဲ့ ရုရှားနိုင်ငံအပေါ်နိုင်ငံခြားငွေလဲလှယ်ခွင့်ပိတ်ပင်ခြင်းဟာ ထိရောက်မှုရှိတော့မှာမဟုတ်ပါဘူး။
ပြင်သစ်နဲ့ဂျာမနီတို့ ကတော့ ရုရှားဓာတ်ငွေ့ထောက်ပံ့မှုရပ်ဆိုင်းသွားနိုင်တဲ့အခြေအနေအပေါ် ကြိုတင်ပြင်ဆင်နေကြကြောင်း ပြင်သစ်စီးပွားရေးဝန်ကြီး'ဘရူနိုလီမိုင်ရာ'က ဆိုလိုက်ပါတယ်။

အနောက်နိုင်ငံက စီးပွားရေးနဲ့ဘဏ္ဍာရေးကဏ္ဍတွေကို အဓိကလက်ကိုင်တုတ်အဖြစ်အသုံးပြုနေပြီး ရုရှားမှာ ဒေါ်လာနဲ့ယူရိုငွေအသုံးပြုခြင်းရပ်ဆိုင်းလိုက်တာကြောင့် ထိုငွေများဖြင့်ဆက်လက်ရောင်းချသွားဖို့ မဖြစ်နိုင်ကြောင်း 'ပူတင်'က ပြောကြားခဲ့ပါတယ်။

သူတို့ကိုယ်တိုင်ရပ်ဆိုင်းလိုက်တဲ့ယူရိုငွေတွေနဲ့သာ ဆက်ပြီးရောင်းနေရမယ်ဆိုရင် ဥရောပကို ဓာတ်ငွေ့အလကားရောင်းချနေရသလိုဖြစ်နေကြောင်း ပြောကြားသွားပါတယ်။

ဒါပေမဲ့လည်း ရုရှားတို့က သူတို့ရဲ့စီးပွားရေးဂုဏ်သိက္ခာကိုတန်ဖိုးထားပြီး လက်ရှိစာချုပ်များအရ ဓာတ်ငွေ့ထောက်ပံ့ရေးတာဝန်ကျေအောင် ဆက်လက်လုပ်ဆောင်သွားမှာပါလို့ ပြောကြားခဲ့ပါတယ်။
Source: Reuters

#WorldHealth
Published - 1 April 2022
ကိုဗစ်ရောဂါနဲ့ တုပ်ကွေးရောဂါတပြိုင်တည်းဖြစ်ပွားခြင်းက ကိုဗစ်ရောဂါတစ်မျိုးတည်းဖြစ်ပွားခြင်းထက် ရောဂါလက္ခဏာ ပိုမိုဆိုးရွားနိုင်ပြီး အသက်အန္တရာယ်ပိုများကြောင်း သုတေသီများက The Lancet ဂျာနယ်မှာ သောကြာနေ့ကဖော်ပြခဲ့ပါတယ်။

ကိုဗစ်ရောဂါဖြင့် ဆေးရုံတက်ကုသခံနေရတဲ့လူနာ ၇,၀၀၀ နီးပါးကို စမ်းသပ်လေ့လာခဲ့ကြရာ ရောဂါနှစ်မျိုးစလုံးကူးစက်ခံနေရသူ ၂၂၇ ဦးပါဝင်ခဲ့ပါတယ်။

SARS-CoV-2 ဗိုင်းရပ်စ်နဲ့ တုပ်ကွေးဗိုင်းရပ်စ်နှစ်မျိုးစလုံးကူးစက်နေတဲ့သူတွေဟာ ကိုဗစ်ရောဂါတစ်မျိုးတည်းဖြစ်ပွားတဲ့သူတွေနဲ့ယှဉ်ရင် အသက်ရှူကိရိယာလိုအပ်မှု ၄ ဆပိုများပြီး အသက်သေဆုံးနိုင်မှု ၂.၄ ဆပိုများကြောင်း တွေ့ရှိခဲ့ကြပါတယ်။

အဆိုပါဗိုင်းရပ်စ်နှစ်မျိုးတပြိုင်တည်းကူးစက်ခြင်းက အလွန်အန္တရာယ်များကြောင်း အီဒင်ဘာ့ဂ်တက္ကသိုလ်မှ ဒေါက်တာ'ကန်းနက်ဘေလီ'က ပြောပြခဲ့ပါတယ်။

"ကိုဗစ်ဗိုင်းရပ်စ်က တုပ်ကွေးဗိုင်းရပ်စ်နဲ့ပါရောပြီး ကူးစက်လာနိုင်ပါတယ်။ ဒါကြောင့် ဆေးရုံပေါ်ကကိုဗစ်လူနာတွေကို ဆေးစစ်စမ်းသပ်ဖို့ အစီအစဉ်ပြောင်းလဲသတ်မှတ်သင့်ပြီး တုပ်ကွေးရောဂါကိုလည်း ကျယ်ကျယ်ပြန့်ပြန့်စစ်ဆေးသင့်ပါတယ်" လို့ 'ဘေလီ'က ဖော်ပြထားပါတယ်။

ကိုဗစ်ကာကွယ်ဆေးနဲ့ တုပ်ကွေးကာကွယ်ဆေးတို့ က အမျိုးအစားမတူညီတာကြောင့် လူတွေအနေနဲ့ ကာကွယ်ဆေးနှစ်မျိုးစလုံးထိုးနှံထားသင့်ကြောင်း အင်ပီရီယယ်ကောလိပ်လန်ဒန်မှ ဒေါက်တာ'ပီတာအိုပင်ရှော'က ထည့်လောင်းပြောကြားသွားပါတယ်။
Source: Reuters

#WorldEnvironment
Published 31 March 2022

အင်ဒိုနီးရှားဘေးမဲ့တောတစ်ခုမှာ ရှားပါးသတ္တဝါတစ်မျိုးဖြစ်တဲ့ ဆူမာထရာကြံ့တစ်ကောင်ကို အောင်မြင်စွာမွေးဖွားနိုင်ခဲ့ကြောင်း သဘာဝပတ်ဝန်းကျင်ထိန်းသိမ်းရေးအရာရှိတစ်ဦးက ပြောကြားလိုက်ပြီး မျိုးသုဉ်းပျောက်ကွယ်မည့်အန္တရာယ်ကြုံတွေ့နေရတဲ့ သတ္တဝါတွေကို ထိန်းသိမ်းစောင့်ရှောက်တဲ့နေရာမှာ အောင်မြင်မှုတစ်ခုရခဲ့တယ်ဆိုရမှာ ဖြစ်ပါတယ်။

#Yangon_Media_Group