#WorldHealth
Published 20 June 2022

စအိုကင်ဆာရောဂါခံစားနေရတဲ့လူနာ ၁၈ ဦးကို တူညီတဲ့ဆေးဖြင့် အသေးစားစမ်းသပ်မှု ပြုလုပ်ခဲ့ပါတယ်။

တွေ့ရှိလာတဲ့ရလာဒ်တွေက အံ့အားသင့်ဖွယ်ရာကောင်းပြီး ကင်ဆာရှာဖွေတဲ့ နည်းလမ်းပေါင်းစုံဖြင့် ရှာဖွေရာမှာ လူနာအားလုံးမှာ ရောဂါမတွေ့ရတော့ဘဲ ကင်ဆာပျောက်ကင်းသွားခဲ့ပါတယ်။

မမ်မိုရီယယ်လ်စလုန်းကက်တာရင်းကင်ဆာစင်တာမှ ဒေါက်တာ’လူးဝစ်ဒီယာ့ဇ်ဂျူနီယာ'က နယူးအင်္ဂလန်ဆေးပညာဂျာနယ်မှာ ဖော်ပြခဲ့ရာမှာ စမ်းသပ်ခဲ့တဲ့လူနာတိုင်းကင်ဆာပျောက်ကင်းသွားတယ်ဆိုတဲ့ တခြားစမ်းသပ်ချက်မျိုး တစ်ခါမှမတွေ့ဖူးကြောင်း၊ ကင်ဆာသမိုင်းမှာ ဒါပထမဆုံးအကြိမ်ဖြစ်‌‌ကြောင်း ဆိုပါတယ်။

ဆန်ဖရန်ဆစ္စကိုကယ်လီဖိုးနီးယားတက္ကသိုလ်မှ အစာအိမ်ဟောင်းလမ်းကြောင်းအထူးကု‌ဒေါက်တာ’အလန်ဗီနွတ်ခ်’ကလည်း ဒီလိုရလာဒ်မျိုးက ပထမဆုံးတွေ့ဖူးတာဖြစ်ကြောင်း ဆိုခဲ့ပါတယ်။

အဆိုပါ စအိုကင်ဆာလူနာတွေဟာ ဓာတုကုသနည်းများ၊ ဓာတ်ရောင်ခြည်ကုသနည်းများ၊ အချို့လူများဆိုရင် ခွဲစိတ်ခြင်းများပါ ပြုလုပ်ခဲ့ကြပါတယ်။

နောက်ထပ်အံ့အားသင့်စရာကောင်းတာက ဘယ်လူနာမှ နောက်ဆက်တွဲဆိုးကျိုးတွေ မခံစားရကြောင်း ဒေါက်တာ’ဗီနွတ်ခ်’က ဆိုပါတယ်။

လူနာ ၅ ဦးမှာ ၁ ဦးနှုန်းကတော့ ဆေးနဲ့မတည့်တာမျိုး ခံစားရပါတယ်။

ဆေးကို ၃ ပတ်တစ်ကြိမ်ဖြင့် ၆ လပေးခဲ့ရပြီး ဆေးတစ်စုံကို အမေရိကန်ဒေါ်လာ ၁၁,၀၀၀ ကျသင့်ပါတယ်။

ထိုဆေးတွေက ကင်ဆာဆဲလ်တွေကို မျက်နှာဖုံးခွာသလိုပြုလုပ်ပေးပြီး ကိုယ်ခံအားက တိုက်ခိုက်စေပါတယ်။

ဘေးထွက်ဆိုးကျိုးသိသိသာသာ မတွေ့ရတာကတော့ လူနာများများစားစားစမ်းသပ်ရတာ မဟုတ်သလို ကင်ဆာကရိုးရှင်းတာကြောင့်လည်း ဖြစ်နိုင်ပါတယ်။

ရလာဒ်တွေက မကြုံစဖူးသိသာကောင်းမွန်ပေမယ့် ထပ်မံစစ်ဆေးမှုများပြုလုပ်ရန် လိုအပ်သေးကြောင်း ဟားဗတ်ဒ်ဆေးတက္ကသိုလ်မှဒေါက်တာ’ကင်မီနိုင်’က ပြောကြားလိုက်ပါတယ်။

ပထမဆုံးစမ်းသပ်တဲ့လူနာက အသက် ၃၈ နှစ်ရှိ မစ္စ’စက်ချာရော့သ်’က ၂၀၁၉ ခုနှစ်မှာ စအိုကသွေးထွက်တာကြောင့် အစာအိမ်အူလမ်းကြောင်းအထူးကုနဲ့ပြသရာမှာ ကင်ဆာဖြစ်နေကြောင်းသိရှိခဲ့ရပါတယ်။

ဆေးဖြင့်စမ်းသပ်ခဲ့ပြီးရာမှာတော့ ကင်ဆာလုံးဝမရှိတော့ဘဲ နောက်ထပ် ၂ နှစ်ကြာတဲ့အထိ ကင်ဆာမတွေ့ရတော့ပါဘူး။

Source: Today
#Yangon_Media_Group

Published 19 June 2022

မကြာမီသမ္မတသက်တမ်းကုန်ဆုံးတော့မယ့် ဖိလစ်ပိုင်သမ္မတ ရိုဒရီဂို ဒူတာတီးရဲ့သမီး ဆာရာဒူတာတီး ကာပီယိုဟာ ဖိလစ်ပိုင်ရဲ့ ၁၅ ဦးမြောက် ဒုတိယသမ္မတအဖြစ် တနင်္ဂနွေနေ့ (ယနေ့)မှာ ကျမ်းသစ္စာပြုလိုက်ပြီး ရွေးကောက်ပွဲစည်းရုံးလှုံဆော်မှုတွေမှာ စိတ်ဝမ်းကွဲစေတဲ့ဖိလစ်ပိုင်မှာ အမျိုးသားညီညွတ်ရေးကို တောင်းဆိုလိုက်ပါတယ်။

“ ရှေ့လာမယ့်နေ့ရက်တွေဟာ ကျွန်မတို့အတွက်နိုင်ငံတစ်နိုင်ငံအနေနှင့် ပိုပြီးစည်းလုံးညီညွတ်ကြစေဖို့ တောင်းဆိုမယ့် စိန်ခေါ်မှုတွေ အပြည့်ပဲ” လို့ သူမရဲ့ ဇာတိမြို့ ဒါဗာအိုမှာ အခမ်းအနားမိန့်ခွန်းပြောကြားရာမှာ သူမက ထည့်သွင်းပြောကြားခဲ့ပါတယ်။ သူမဟာ အဲဒီမြို့မှာ မိဘနှစ်ပါး အနားမှာရပ်နေစေပြီး ကျမ်းသစ္စာကျိမ်ဆိုခဲ့တာပါ။

အသက် ၄၄ နှစ်အရွယ် ဒူတာတီးကာပီယိုဟာ ဇွန်၃၀ရက်မှာ သမ္မတအဖြစ် ကျမ်းကျိန်မယ့် ဖာဒီနန်မားကို့စ် ဂျူနီယာနှင့်အတူ မေ ၉ ရက် က ကျင်းပတဲ့ ဒုသမ္မတနေရာ တွဲဖက်ယှဉ်ပြိုင်ခဲ့တာပါ။ သူတို့နှစ်ဦးဟာ ဇွန်၃၀ ရက်ကစပြီး ခြောက်နှစ်ကြာ သက်တမ်းမှာ တာဝန်ထမ်းဆောင်ကြမှာ ဖြစ်ပါတယ်။

Source: Reuters

Published 19 June 2022

တက်စ်လာက အမေရိကန်က ယင်းရဲ့ ကား မိုဒယ်လ်အာလုံးရဲ့ ဈေးနှုန်းကိုသိသိသာသာ တိုးမြှင့်လိုက်ပြီး တရုတ်ပြည်တွင်းမှာ ထုတ်တဲ့ယင်းရဲ့ မိုဒယ်လ် Y ဂွင်ကျယ် အမျိုးအစားကားတွေကိုလည်း ဈေးတက်လိုက်ပါတယ်။ ကုန်ကြမ်းပစ္စည်းတွေနှင့် ထောက်ပို့ကွင်းဆက် ဈေးတွေတက်လာနေတာကြောင့်ဖြစ်ပါတယ်။

တက်စ်လာက ကားမိုဒယ်လ် လေးမျိုးကို အဓိက ရောင်းချနေပါတယ်။ မိုဒယ်လ် အက်စ်၊ မိုဒယ်လ်သရီး၊မိုဒယ်လ် အိတ်စ် နှင့် မိုဒယ်လ် ဝိုင်တို့ဖြစ်ကြပါတယ်။မိုဒယ်လ်တစ်ခုစီဟာ  ဖွဲ့စည်းစီစဉ်ပုံတွေ မတူခြားနားကြပါတယ်လို့ တက်စ်လာရဲ့ ဝက်ဘ်ဆိုက်ထဲမှာ ဖော်ပြထားပါတယ်။

အမေရိကန်မှာ တက်စ်လာ ကားတွေဟာ ဒေါ်လာ ၂၅၀၀ကနေ ၆၀၀၀ အကြားဈေးတက်သွားပါတယ်။ မိုဒယ်လ်သရီး ဂွင်ကျယ်အမျိုးအစား ဟာ ဒေါ်လာ ၂၅၀၀တိုးလာပြီး ယင်းက ဈေးအနည်းဆုံးတိုးထားတာဖြစ်ပါတယ်။ မိုဒယ်လ်သရီးရဲ့ အခြားအမျိုးအစားတွေက အပြောင်းအလဲမရှိဘူးလို့ ဝက်ဆိုက်မှာ ဖော်ပြထားပါတယ်။

မိုဒယ်လ်အိတစ်က မော်တာနှစ်လုံးတပ် all-wheel drive ဟာ အမြင့်ဆုံးဈေးတက်ထားပြီး ဒေါ်လာ ၆၀၀၀ မြင့်တက်လာပါတယ်။ တရုတ်က ဝိုင်မိုဒယ်လ်ကတော့ ငါးရာခိုင်နှုန်းဖြစ်တဲ့ ယွမ် ၁၉၀၀၀ ဈေးတက်သွားပြီး ယွမ်၃၉၄၉၀၀ ဖြစ်လာပါတယ်။အခြားမိုဒယ်လ်တွေက ဈေးအပြောင်းအလဲမရှိပါဘူး။

ဈေးတက်ရတဲ့အကြောင်းရင်းကို တက်စ်လာက ကြေညာတဲ့အထဲ ထည့်ပြောမသွားပါဘူး။ ရိုက်တာရဲ့ သုံးသပ်ချက်အရတော့ ဒါဟာ ငွေကြေးဖောင်းပွမှုကြောင့်နှင့် ၊ပြီးတော့ လျှပ်စစ်ကားတွေရဲ့ ဖရိမ်တွေနှင့် ဘက်ထရီတွေမှာ မရှိမဖြစ်သုံးတဲ့ အလျူမီနီယမ်နှင့် လစ်သီယမ်အပါအဝင် ကုန်ကြမ်းတွေဈေးတက်လာကြောင့်ဖြစ်တယ်လို့ဆိုပါတယ်။ ဈေးတက်တာဟာ ကုန်ကြမ်းတွေဈေးတက်တာကြောင့်အပြင် ထောက်ပံ့မှုနည်းပါးမှုတာကြောင့်လည်းဖြစ်ပါတယ်။ အချိန်တိုတိုအတွင်း ပစ္စည်းသွင်းမယ့်သူတွေ ထပ်ရှာဖို့ အခက်အခဲလည်းရှိနေပါတယ်။

အချို့သော တက်စ်လာမိုဒယ်လ်တွေကို အမေရိကန်မှာ ပေးပို့တဲ့အချိန်ဟာ တစ်လနောက်ကျနေတယ်လို့လည်းသိရပါတယ်။

Source CCTV+

Published 19 June 2022

ယူကရိန်းစစ်ပွဲဟာ နှစ်ပေါင်းများစွာ ကြာမြင့်နိုင်တယ်လို့ နေတိုးအကြီးအကဲက တနင်္ဂနွေနေ့က ပြောလိုက်ပါတယ်။ ကိဗ်ကို ဥရောပသမဂ္ဂထဲဝင်ဖို့ ကိုယ်စားလှယ်လောင်းဖြစ်လာစေအောင် အီးယူကထောက်ခံပေးလိုက်ပြီးနောက် ရုရှားက တိုက်ခိုက်မှုတွေမြှင့်တင်လာတဲ့အချိန်မှာ နေတိုးအကြီးအကဲက ယခုလိုပြောခဲ့တာပါ။

ခေတ်မီဆန်းပြားတဲ့ လက်နက်တွေ ယူကရန်းတပ်ကို ပံ့ပိုးပေးခြင်းဟာ အရှေ့ပိုင်းဒေသကို ရုရှားထိန်းချုပ်မှုမှ လွတ်မြောက်စေမယ့်အခွင့်အရေးကို တိုးမြှင့်ပေးလိမ့်မယ်လို့ ဂျင်းန်စတိုလ်တင်ဘတ်ခ်က ပြောတဲ့အကြောင်း ဂျာမနီက ဘိုင်းအမ်ဆွန်တက် သတင်းစာကရေးသားပါတယ်။

“ စစ်ပွဲဟာ နှစ်ပေါင်းများစွာကြာနိုင်တယ်ဆိုတဲ့ အချက်အတွက် ကျွန်တော်တို့ ကြိုတင်ပြင်ဆင်ထားရမယ်။ ယူကရိန်းကို ထောက်ခံတာတွေ လျော့ကျလာလို့မဖြစ်ဘူး” လို့ နေတိုး အတွင်းရေးမှူးချုပ်ဖြစ်တဲ့ သူကပြောပါတယ်။

“ စစ်ရေးထောက်ပံ့မှုတွေတင်မကဘဲ စွမ်းအင်နှင့်စားနပ်ရိက္ခာဈေးနှုန်းတွေမြင့်တက်လာပြီး ကုန်ကစရိတ်တွေမြင့်လာတယ် ဆိုဦး ဆက်ထောက်ပံ့ရမယ်” လို့ သူကပြောပါတယ်။

သောကြာနေ့က ကိဗစ်ကိုသွားရောက်ခဲ့တဲ ဗြိတိန်ဝန်ကြီးချုပ် ဘောရစ်ဂျွန်ဆင်ကလည်း ရေရှည်စစ်ပွဲအတွက် ပြင်ဆင်ဖို့ လိုတယ်လို့ပြောထားပါတယ်။

လက်နက်တွေ၊ကိရိယာတွေ၊ခဲယမ်းတွေနှင့် သင်တန်းတွေကို ယူကရိန်းဟာ ကျူးကျော်သူထက် ပိုမြန်မြန်ရဖို့ အာမခံတဲ့ သဘောဖြစ်တယ်လို့ လန်ဒန်မှာ ထုတ်ဝေတဲ့ ဆန်းဒေးတိုင်းမ်သတင်းစာမှာ သူက ထင်မြင်ချက်ဆောင်းပါးရေးသားပါတယ်။

“အချိန်က သေရေးရှင်ရေးသမျှ အရေးကြီးတဲ့ အချက်ပဲ”လို့ သူကရေးပါတယ်။

“ ရုရှားက သူ့ရဲစွမ်းရည်ကို ပြန်မြှင့်တင်နေချိန်ထက် ယူကရိန်းက ဘယ်လောက်ခပ်မြန်မြန်အင်အားတောင့်တင်းလာမလဲ ဆိုတဲ့ အချက်ပေါ် အရာအားလုံးမှီတည်နေတယ်” လို့ သူကဆက်ရေးပါတယ်။

“ယူကရိန်းကိစ္စစိတ်ပျက်ငြီးငွေ့” လာမှာကို ရှောင်ရှားကြရမယ်လို့ ဂျွန်ဆင်က  သတင်းထောက်တွေကို စနေန့က ပြောပါတယ်။

ရုရှားတပ်တွေက ရှေ့ကိုတစ်လှမ်းချင်းတိုးလာနေတဲ့အချိန်မှာ ယူကရိန်းကို ကာလရှည်ကြာ ထောက်ခံအားပေးမယ်ဆိုတာကို ယူကရိန်းပြည်သူတွေသိအောင် မဟာမိတ်တွေက ပြသရမယ် လို့သူကပြောပါတယ်။

Source: Reuters

Published 19 June 2022

အမေရိကန်သမ္မတ ဂျိုးဘိုင်ဒင်ဟာ ဒီလာဝဲပြည်နယ်က ရီဟိုဘုတ်ကမ်းခြေကိုသွားရောက်တဲ့ အားလပ်ရက်ခရီးအတွင်း စနေနေ့မှာ ထောက်ခံသူတွေကို တွေ့ဆုံနှုတ်ဆက်ဖို့ သူကိုယ်တိုင်နင်းလာတဲ့စက်ဘီးကို ရပ်လိုက်ပြီး စက်ဘီးပေါ်က အဆင်းမှာ လိမ့်ကျခဲ့ပါတယ်။

သူဟာ ထိခိုက်ဒဏ်ရာရပုံတော့မရှိပါဘူး။ လဲကျပြီးနောက် ချက်ခြင်း ပြန်ထလာပြီး “ ကျွန်တော်ဘာမှမဖြစ်ဘူး” လို့  အသက်၇၉နှစ်အရွယ်ရှိသူကပြောပါတယ်။သတင်းထောက်တွေရှေ့မှောက်မှာမှ ဒီအဖြစ်အပျက် ဖြစ်ခဲ့တာပါ။ ခြေချော်သွားတာလို့ သူကပြောပါတယ်။

စက်ဘီးစီးဦးထုပ်ဆောင်းထားတဲ့ သမ္မတ ဘိုင်ဒင်ဟာ သူစက်ဘီးပေါ်က ခြေချောင်းအိမ်ကလေးကို ဖြုတ်သင့်တယ်လို့ ပြောလိုက်ပါတယ်။

အဲဒီနောက် ဘိုင်ဒင်ဟာ သူစက်ဘီးစီးတာကိုလာအားပေးကြတဲ့  ပြည်သူတွေနှင့် မိနစ်များစွာ အချိန်ပေးစကားပြောခဲ့ပါတယ်။

ဘိုင်ဒင်နှင့် သမ္မတကတော် ဂျီလ်ဘိုင်ဒင်တို့ဟာ ဒီလာဝဲလ်ကမ်းခြေက ဂေါဒွန်ရေကန်အနီးတစ်ဝိုက် နံနက်စောစော စက်ဘီးစီးနင်းတာတွေပြီးစီးခဲ့ကြပါတယ်။ သူတို့ဟာ သူတို့ရဲ့ မင်္ဂလာသက် ၄၅နှစ် အမှတ်တရပွဲ သောကြာနေ့က ဆင်နွှဲခဲ့ကြပါတယ်။

သမ္မတဟာ ဆေးဝါးကုသစရာမလိုအပ်ပါဘူးလို့ အိမ်ဖြူတော်က သတင်းထုတ်ပြန်ပါတယ်။

Source: Reuters

Published 19 June 2022

လိင်တူချင်းနှစ်သက်မှုကို နှိမ်နှင်းတဲ့အနေနှင့် ဆော်ဒီအရာရှိတွေက မြို့တော်ရီယာဒ်မှာရှိတဲ့ ဆိုင်တွေကနေ သက်တန့်ရောင် အရုပ်တွေနှင့် အဝတ်အစားမျိုးစုံတို့ကို သိမ်းဆည်းခဲ့တယ်လို့ နိုင်ငံပိုင်မီဒီယာက ကြေညာပါတယ်။

ရှေးရိုးအစွဲရှိတဲ့ ဘုရင့်နိုင်ငံတော်ဆော်ဒီအာရေဗျဟာ ၂၀၂၉ခုနှစ်ကစပြီး ကမ္ဘာလှည့်တွေကို တံခါးဖွင့်ခဲ့ပေးမယ့် အခြား ပင်လယ်ကွေ့နိုင်ငံတွေလိုပဲ လိင်တူနှစ်သက်မှုကို တရားမဝင်သတ်မှတ်ထားတာနှင့် သေဒဏ်တွေရှိနေတာနှင့်ပတ်သက်လို့ လူ့အခွင့်အရေးမှတ်တမ်းမှာ ဝေဖန်ပြောဆိုခံနေရတာပါ။

သိမ်းဆည်းရမိတာတွေအထဲမှာ သက်တန့်ရောင်ဖဲပြားတွေ၊စကတ်တွေ၊ဦးထုတ်တွေနှင့် ခဲတံဘူးတွေပါဝင်ပါတယ်။ အများစုကတော့ ကလေးငယ်တွေအတွက် ဖြစ်ပုံရတယ်လို့ နိုင်ငံပိုင်ရုပ်သံ အယ်အီဘာရီယာသတင်းက ပြောပါတယ်။

“အစ္စလမ်ရဲ့ ကိုးကွယ်ယုံကြည်မှုကိုဆန့်ကျင်ပြီး အကျင့်စာရိတ္တထိခိုက်တဲ့၊ပြီးတော့ လူငယ်တွေကို ပစ်မှတ်ထားတဲ့ လိင်တူ အရောင်တွေကို အားပေးမြှင့်တင်တဲ့ ပစ္စည်းတွေကို သိမ်းဆည်းခဲ့ပါတယ်” လို့ ကူးသန်းရောင်းဝယ်ရေးဝန်ကြီးဌာနက အရာရှိတစ်ဦးက ပြောပါတယ်။

ရီယတ်ဈေးတွေထဲကဈေး တစ်ဈေးမှာ  လိင်တူအလံတွေကို တွေ့ရတယ်လို့ သတင်းထောက်တစ်ဦးကလည်းပြောပါတယ်။

ဒီအရောင်တွေဟာ ကလေးတွေကို အဆိပ်သင့်စေတဲ့ သတင်းစကားတွေပို့နေတာဖြစ်တယ်လို့ သတင်းမှာဖော်ပြထားပါတယ်။

ဧပြီလာက ဆော်ဒီအာရေဗျဟာ ဒစ်စနေရဲ့ နောက်ဆုံးရုပ်ရှင် Marvel ထဲက သက်တန့်ရောင်ဖဲပြားတွေဟာ LGBTQ ကို ကိုယ်စားပြုလို့ ဖြတ်တောက်ပေးဖို့ပြောခဲ့ပေမယ့် ဒစ်စနေက ငြင်းဆန်ခဲ့ပါတယ်။

အဲဒီအချိန်က အစိုးရက ဒစ်စနေနှင့် ညှိနှိုင်းအဖြေရှာဖို့ကြိုးစားခဲ့ပေမယ့် နောက်ဆုံးမတော့ ဆော်ဒီရုပ်ရှင်ရုံတွေမှာ ပြသခြင်း မပြုခဲ့ပါဘူး။

ဒစ်စနေရဲ့ နောက်ဆုံးကာတွန်းကား "Lightyear”မှာ လိင်တူချင်းနမ်းတဲ့အခန်းပါလို ဆော်ဒီအာရေဗျနှင့် နိုင်ငံပေါင်း (၁၂)နိုင်ငံကျော်မှာ ပြသခွင့်ပိတ်ခဲ့ပါတယ်။

ဆော်ဒီအာရေဗျဟာ လူမှုပြုပြင်ပြောင်းလဲမှုအစိတ်အပိုင်းတစ်ခုအဖြစ် ဆယ်စုနှစ်တစ်စုကြာပိတ်ထားတဲ့ ရုပ်ရှင်ရုံတွေကို ၂၀၁၇နှောင်းပိုင်းမှာ ပြန်လည်ဖွင့်လှစ်ခဲ့ပါတယ်။ အဲဒီအချိန်ကစပြီး ဆော်ဒီမှာရုပ်ရှင်ဈေးကွက်ကြီးထွားလာခဲ့ပါတယ်။ ၂၀၂၁ခုနှစ်မှာ ဝင်ငွေ ဒေါ်လာ  ၂၃၈ သန်းရရှိခဲ့ပါတယ်။ ယခင်နှစ်ထက် ၉၅ ရာခိုင်နှုန်းတိုးတက်လာတာဖြစ်တယ်လို့ သိရပါတယ်။

Source: AFP