#DailyNews
Published -2 April 2022

၁။ သိန်း ၂၀၀ ပတ်ချာလည်ကားများ အဝယ်လိုက်နေပြီး ကားဈေးနှုန်းတွေမြင့်တက်နေ

၂။ ကျောက်စိမ်းရိုင်းတူးဖော်ထုတ်လုပ်ခွင့်ကို အမြဲတမ်းသဘောမျိုးပိတ်သိမ်း

၃။ မိုးလေဝသ သတင်း

၄။ ဆေးခြောက်ပြတိုက် ခရိုအေးရှားတွင်ဖွင့်လှစ်ပြသ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#LocalNews
Published - 2 April 2022

ငါးလအတွင်း စင်ကာပူနှင့် တရုတ်ရင်းနှီးမြှုပ်နှံမှုများ အများဆုံးဝင်ရောက်လာခဲ့ပြီး အီးယူ အပါအဝင် အနောက်နိုင်ငံများမှလည်း ပြန်လည်ဝင်ရောက်လာခဲ့တယ်လို့ ISP Myanmar ၏ သု တေသနစစ်တမ်းတစ်ရပ်မှာ ဖော်ပြခဲ့ပါတယ်။

နစက အစိုးရက မီနီဘတ်ဂျက်အဖြစ် သတ်မှတ်ခဲ့တဲ့ ၂၀၂၁ ခုနှစ် အောက်တိုဘာလကနေ ၂၀၂၂ ခုနှစ် ဖေဖော်ဝါရီလအထိ ငါးလအတွင်း စုစုပေါင်း နိုင်ငံခြားရင်းနှီးမြှုပ်နှံမှု အမေရိကန်ဒေါ်လာ သန်း ၅၃၀ ကျော် ဝင်ရောက်ခဲ့တဲ့အနက် အာဆီယံနိုင်ငံတွေက အမေရိကန်ဒေါ်လာ ၂၈၅ သန်းကျော်ဖြင့် အများဆုံးဝင်ရောက်ခဲ့တာဖြစ်တယ်လို့ သိရပါတယ်။

အဲ့ဒီအထဲမှာမှ စင်ကာပူနိုင်ငံက အမေရိကန်ဒေါ်လာ ၂၇၇ သန်းကျော်ဖြင့် အများဆုံးဝင်ရောက်ခဲ့တဲ့နိုင်ငံဖြစ်သလို တရုတ်နိုင်ငံကလည်း အမေရိကန်ဒေါ်လာ ၁၁၈ သန်းကျော်ဖြင့် ဒုတိယအများဆုံးဝင်ရောက်ခဲ့တာဖြစ်တယ်လို့ ISP Myanmar က ဖော်ပြပါတယ်။

ဒါ့အပြင် ထိုင်း၊ မလေးရှား တို့လို အခြားအာဆီယံနိုင်ငံတွေဆီကလည်း ရင်းနှီးမြှုပ်နှံမှု အမေရိကန်ဒေါ်လာ ခုနှစ်သန်းနဲ့ အမေရိကန်သုံးသိန်းကျော် အသီးသီးဝင်ရောက်ခဲ့ကြတယ်လို့ ဆိုပါတယ်။

ထို့အပြင် ဂျပန်နိုင်ငံကလည်း အမေရိကန်ဒေါ်လာ တသန်းကျော် ဝင်ရောက်ခဲ့ပြီး ထူးခြားတာကတော့ ငါးလအတွင်းမှာ ဥရောပသမဂ္ဂအဖွဲ့ဝင် နယ်သာလန်နိုင်ငံမှ အမေရိကန်ဒေါ်လာ လေးသန်း၊ ပြင်သစ်နိုင်ငံမှ အမေရိကန်ဒေါ်လာ လေးသိန်းကျော် စသဖြင့် ယခု နစက အစိုးရလက်ထက်မှာ အီးယူနိုင်ငံတွေကနေ ရင်းနှီးမြှုပ်နှံမှုတွေ ပထမဆုံး ပြန်လည်ဝင်ရောက်လာခဲ့တာ ဖြစ်ပါတယ်။

ဝင်လာတဲ့ရင်းနှီးမြှုပ်နှံမှုတွေကို ကဏ္ဍအလိုက် ခွဲခြမ်းစိတ်ဖြာကြည့်မယ်ဆိုပါက ဝန်ဆောင်မှုကဏ္ဍမှာ အမေရိကန်ဒေါ်လာ ၂၀၆ သန်းကျော်နဲ့ အများဆုံးဝင်ရောက်ထားတာကို တွေ့ရပါတယ်။

ဒါကြောင့် ဝန်ဆောင်မှုကဏ္ဍမှာ ၄၀ ရာခိုင်နှုန်းနီးပါးအထိရှိနေသလို ကုန်ထုတ်လုပ်ရေး ကဏ္ဍမှာ ဒုတိယအများဆုံး ဝင်ရောက်ထားတာဖြစ်ပြီး ပမာဏအားဖြင့် အမေရိကန်ဒေါ်လာ ၁၃၉ သန်းခန့် ရင်းနှီးမြှုပ်နှံထားတာဖြစ်ပါတယ်။

သတ္တုတူးဖော်ရေး၊ ရေနံနှင့် သဘာဝဓာတ်‌ငွေ့၊ အိမ်ခြံမြေ၊ စက်မှုဇုန်များ စတဲ့ ကဏ္ဍတွေမှာတော့ ရင်းနှီးမြှုပ်နှံမှုဝင်ရောက်ခြင်း လုံးဝမရှိခဲ့တာတွေ့ရတယ်လို့လည်း ISP Myanmar ၏ သုတေသနစစ်တမ်းမှာ ဖော်ပြထားပါတယ်။

ဓါတ်ပုံ - ISP Myanmar

ymg/kg
#Yangon_Media_Group

Published 2 April 2022

တရုတ်နှင့်မြန်မာတို့ဟာ အပြန်အလှန်နိုင်ငံရေးယုံကြည်မှု ရှေ့သို့တက်လှမ်းရေး၊အပြန်အလှန်အကျိုးအမြတ်နှင့် နှစ်ဖက်လုံး အောင်မြင်မှုရလာဒ်ရရှိရေး၊ ပြည်သူအချင်းချင်းအတုံအလှယ်ပြုမှုဖန်တီးရေး၊ယဉ်ကျေးမှုလှုပ်ရှားဆောင်ရွက်မှုများတွင် အပြန်အလှန်သင်ယူမှုတိုးမြှင့်ရေးတို့အတွက် အပြန်အလှန်ဖလှယ်မှုနှင့်ပူးပေါင်းဆောင်ရွက်မှုတို့ကို နက်ရှိုင်းစွာ ဆောင်ရွက်ကြဖို့ သဘောတူခဲ့ကြတယ်လို့ CCTV ကသတင်းထုတ်ပြန်ပါတယ်။

တရုတ်နိုင်ငံအရှေ့ပိုင်း အန်ဟွေးပြည်နယ်မှာ တရုတ်နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး မစ္စတာ ဝမ်ယီဟာ မြန်မာနိုင်ငံခြားရေးဝန်ကြီး ဦးဝဏ္ဏမောင်လွင်နှင့် သောကြာနေ့က တွေ့ဆုံဆွေးနွေးစဉ်မှာ အဲဒီသဘောတူညီချက်ရရှိခဲ့ကြတာဖြစ်ပါတယ်။

တရုတ်နိုင်ငံအနေနှင့်  အိမ်နီးချင်းသံတမန်ခင်းအရ မြန်မာနိုင်ငံကို အရေးကြီးတဲ့ နေရာမှာ အမြဲထားရှိတယ်လို့ တရုတ်နိုင်ငံခြားရေးဝန်ကြီး ဝမ်ကပြောပါတယ်။ အခြေအနေတွေ ဘယ်လိုပဲပြောင်းပြောင်း  မြန်မာနိုင်ငံက ယင်းရဲ့အချုပ်အခြာအဏာ၊လွတ်လပ်ရေးနှင့် နယ်မြေတည်တံ့ခိုင်မြဲမှုတို့ စောင့်ရှောက်ထိန်းသိမ်းမှု၊ပြီးတော့ နိုင်ငံရဲ့ အနေအထားနှင့် လိုက်ဖက်တဲ့ ဖွံ့ဖြိုးတိုးတက်ရေးလမ်းကြောင်းတစ်ခုဖော်ဆောင်မှု အပေါ် တရုတ်နိုင်ငံဟာ အမြဲ ထောက်ခံအားပေးတယ်လို့ သူကဆက်ပြောပါတယ်။ 

အတူမျှဝေခံစားတဲ့ အနာဂတ်နှင့်အတူ တရုတ်-မြန်မာ အသိုက်အဝန်းတည်ထောင်ရေး ရည်မှန်းချက်ရရှိဖို့အတွက် မြန်မာနှင့် အပြန်အလှန်ပူးပေါင်းဖလှယ်မှုနက်ရှိုင်းစွာဆောင်ရွက်ရေး တရုတ်က အသင့်ရှိနေတယ်လို့ ဝမ်ကပြောပါတယ်။

အဲဒီအပြင်  တရုတ်-မြန်မာ စီးပွားရေ စင်္ကြံ တည်ဆောက်မှုကို နှစ်ဖက်လုံးက  အရှိန်မြှင့်တင်ဆောင်ရွက်ဖို့ ဝမ်က တိုက်တွန်း နှိုးဆော်လိုက်ပါတယ်။ အဲဒီအတွက် အထင်ကရ အဓိကကျတဲ့ စီမံကိန်းတွေ ကိုပိုမိုလုပ်ဆောင်ဖို့နှင့် ကိုဗစ်-၁၉ ကပ်ရောဂါကို ညီညွတ်နက်ရှိုင်းစွာ တွန်းလှန်ကြဖို့လည်း သူက တိုက်တွန်းလိုက်ပါတယ်။

 ဦးဝဏ္ဏမောင်လွင်ကလည်း တရုတ်ရဲ့ ပဓာနကျတဲ့ အကျိုးစီးပွားနှင့်သက်ဆိုင်တဲ့ကိစ္စတွေအပေါ် တရုတ်ရပ်တည်ချက်ကို မြန်မာက အပြည့်အဝထောက်ခံကြောင်းနှင့် မြန်မာနိုင်ငံဖွံ့ဖြိုးတိုးတက်ရေးနှင့်ကပ်ဘေးတွန်းလှန်ရေးတို့မှာ တရုတ်ရဲ့ ကြီးမားတဲ့ အားပေးထောက်ခံမှုအတွက် တရုတ်နိုင်ငံကိုကျေးဇူးတင်တယ်လို့ပြောကြားခဲ့ပါတယ်။

မြန်မာနိုင်ငံအနေနှင့် စီးပွားရေးနှင့်ကုန်သွယ်ရေးပူးပေါင်းဆောင်ရွက်မှုတွေကို တိုးချဲ့ဆောင်ရွက်ဖို့ ဆန္ဒရှိကြောင်းနှင့် တရုတ်-မြန်မာ စီးပွားရေးစင်္ကြံတည်ဆော်ကရေးအရှိန်မြှင့်လိုကြောင်းပြန်လည်ပြောကြားခဲပါတယ်။ အဲဒီအပြင် ရပ်ဝန်းတစ်ခု လမ်းကြောင်းတစ်သွယ်မူဘောင်အတွင်းကနေ မြင်တွေ့လို့ရတဲ့ ရလာဒ်တွေပိုမိုရရှိဖို့ တွန်းအားပေးဆောင်ရွက်မယ်လို့လည်း သူကဆက်ပြောပါတယ်။

နှစ်ဦးစလုံးက တောင်တရုတ်ပင်လယ်နှင့် ယူကရိန်းကိစ္စတို့ကိုလည်း အမြင်ချင်းဖလှယ်ခဲ့ကြပါတယ်။

နိုင်ငံခြားရေးဝန်ကြီးနှစ်ဦးဟာ စီးပွားရေး၊နည်းပညာနှင့်စိုက်ပျိုးရေး နှစ်နိုင်ငံပူးပေါင်းဆောင်ရွက်မှုဆိုင်ရာ သဘောတူညီချက်တွေကို လက်မှတ်ရေးထိုးရာမှာ သက်သေအဖြစ်ပါဝင်ခဲ့ကြပြီး ချုံချင်းမြို့မှာ မြန်မာကောင်စစ်ဝန်ရုံးသစ် ဖွင့်လှစ်ပွဲသို့တက်ရောက်ခဲ့ကြပါတယ်။

Source CMG

#WorldMilitary
Published - 02 April 2022

အမေရိကန်အစိုးရအဖွဲ့နဲ့ မဟာမိတ်အဖွဲ့များပူးပေါင်းကာ ယူကရိန်းအရှေ့ပိုင်းဒွန်ဘက်စ်ဒေသသို့ ဆိုဗီယက်ထုတ်တင့်ကားများပေးပို့ကူညီသွားမှာဖြစ်ကြောင်း အမေရိကန်အရာရှိတစ်ဦးက သောကြာနေ့မှာပြောကြားလိုက်ပါတယ်။

ယူကရိန်းသမ္မတ'ဗိုလိုဒီမီယာဇယ်လန်စကီ'က စစ်ရေးအကူအညီတောင်းဆိုခဲ့ရာမှာ ယူကရိန်းတပ်ဖွဲ့များမောင်းနှင်နိုင်တဲ့ ဆိုဗီယက်ထုတ်တင့်ကားများကို အမေရိကန်တို့က ပို့ဆောင်ကူညီသွားမယ်လို့ အကြောင်းပြန်ခဲ့တာဖြစ်ပြီး ဒါဟာ ယခုစစ်ပွဲအတွင်း အမေရိကန်တို့ကတင့်ကားများဖြင့် ပထမဆုံးအကြိမ်ကူညီထောက်ပံ့တာဖြစ်ပါတယ်။

တင့်ကားများကို မကြာခင်လွှဲပြောင်းပေးသွားမှာဖြစ်ပြီး ပို့ဆောင်မယ့်တင့်ကားအရေအတွက်နဲ့ ပေးပို့မယ့်နိုင်ငံတွေကိုတော့ မဖော်ပြထားပါဘူး။
အဆိုပါလက်နက်တင့်ကားများဖြင့် ဒွန်ဘက်စ်ဒေသမှာရှိတဲ့ရုရှားတပ်ဖွဲ့တွေကို အဝေးကနေပစ်ခတ်သွားနိုင်မှာဖြစ်ပါတယ်။

စစ်ပွဲဖြစ်ပွားတာ အချိန် ၅ ပတ်မျှကြာမြင့်နေပြီဖြစ်ပြီး အခုလိုတင့်ကားများရောက်ရှိလာတော့မယ့်အခြေအနေက စစ်ပွဲပြင်းထန်မှုတိုးများလာဖွယ်ရှိနေပါတယ်။
ရုရှားတို့က မြေပြင်နဲ့လေကြောင်းတွေကနေ ယူကရိန်းမြို့တွေကို တိုက်ခိုက်နေဆဲဖြစ်ပါတယ်။

၂၀၁၄ ခုနှစ်ကတည်းက ရုရှားကျောထောက်နောက်ခံပြုခွဲထွက်ရေးသမားတွေနဲ့ ယူကရိန်းတပ်ဖွဲတွေ စဉ်ဆက်မပြတ်တိုက်ခိုက်နေခဲ့တဲ့ ယူကရိန်းအရှေ့ဘက်ခြမ်းကို ရုရှားတိုအာရုံပြန်စိုက်လာပြီဖြစ်ကြောင်း ရုရှားအရာရှိများပြောကြားခဲ့ပါတယ်။

သမ္မတ'ဇယ်လန်စကီ'က နေတိုး(NATO)အဖွဲ့ထံမှ တင့်ကားများနဲ့လေယာဉ်များပေးပို့ဖို့ တောင်းဆိုထားတဲ့အပြင် တင့်ကားဖျက်လက်နက်များနဲ့ ဝေဟင်ပစ်လက်နက်များကိုပါ ပေးပို့ဖို့တောင်းဆိုခဲ့ပါတယ်။

အမေရိကန်သမ္မတ'ဂျိုးဘိုင်ဒန်'နဲ့ ယူကရိန်းထိပ်သီးအရာရှိများ ပိုလန်မှာတွေ့ဆုံဆွေးနွေးကြပြီးနောက်တစ်နေ့မှာ 'ဇယ်လန်စကီ'က တင့်ကားထောက်ပံ့ပေးဖို့ အထူးတလည်တောင်းဆိုခဲ့ပြီး လက်နက်ထောက်ပံ့လွှဲပြောင်းခြင်းအချိန်ကြာနေတယ်လို့ ယူဆနေပါတယ်။

"လက်နက်ထောက်ပံ့ဖို့ကို တစ်ယောက်နဲ့တစ်ယောက်လွှဲချနေကြပါတယ်။ တိုက်လေယာဉ်နဲ့တင့်ကားလွှဲပေးဖို့ကို ၃၁ ရက်လောက်အချိန်ယူပြီး စဉ်းစားနေကြပါတယ်" လို့ 'ဇယ်လန်စကီ'က အနောက်နိုင်ငံကိုဒေါသတကြီးဝေဖန်ခဲ့ပါတယ်။

အရင်ကလည်း ယူကရိန်းကာကွယ်ရေးအတွက် လက်နက်များထောက်ပံ့ဖို့တောင်းဆိုရာမှာ လက်နက်ငယ်လေးတွေပေးပို့ဖို့ ကိုသာ အာရုံစိုက်နေကြတာကြောင့် အမေရိကန်အစိုးရအဖွဲ့ကို ဝေဖန်ခဲ့ကြပါသေးတယ်။

ဒါပေမဲ့စစ်ပွဲပိုမိုပြင်းထန်လာတဲ့အချိန်မှာ ကာကွယ်ရေးအပိုင်းမှာလည်း လက်နက်အင်အားပိုမိုလိုအပ်လာခဲ့ပါတယ်။ ယူကရိန်းက စစ်မြေပြင်အတွင်း ရုရှားတို့ ထံကနေ အနည်းဆုံးတင့်ကား ၁၆၁ စီးရရှိခဲ့ပြီး ရုရှားတို့ကလည်း ယူကရိန်းတင့်ကားအချို့ကို ဖျက်ဆီးနိုင်ခဲ့တယ်လို့ စစ်ရေးသုံးသပ်မှုတွေမှာဖော်ပြထားပါတယ်။

ရုရှားတို့တိုက်ခိုက်လာမှုကို ယူကရိန်းစစ်တပ်မှဆက်လက်ကာကွယ်တွန်းလှန်နေတဲ့အချိန်မှာပဲ တင့်ကားတွေရောက်ရှိလာတော့မှာဖြစ်ပါတယ်။
ရုရှားတပ်ဖွဲ့များက ယူကရိန်းနိုင်ငံအလယ်ပိုင်းကနေ ဆက်လက်မကျူးကျော်နိုင်ဘဲရှိနေတဲ့အပြင် မြို့တော်ကိဗ်ကိုလည်း သိမ်းပိုက်ဖို့ အခြေအနေမဟန်တာကြောင့် ဒွန်ဘက်စ်ဒေသမှာ ရုရှားတို့အခြေချလာနိုင်ကြောင်း ပန်တဂွန်မှအရာရှိများက အလျင်အမြန်ရိပ်မိခဲ့ကြပါတယ်။

ဗုဒ္ဓဟူးနေ့က သမ္မတ'ဂျိုးဘိုင်ဒန်'ပြောကြားရာမှာ အမေရိကန်ထောက်လှမ်းရေးသတင်းများအရ ယူကရိန်းမှာရှိတဲ့ ရုရှားတပ်ဖွဲ့ကိစ္စအခြေအနေနဲ့ပတ်သက်ပြီး ရုရှားသမ္မတ'ပူတင်'ကို သူ့ရဲ့အကြံပေးပုဂ္ဂိုလ်များ မှားယွင်းစွာသတင်းတင်ပြခဲ့ကြပြီး သမ္မတ'ပူတင်'နဲ့ ကာကွယ်ရေးဝန်ကြီးတို့ ကြား မကျေနပ်ချက်များရှိလာကြောင်း သိရှိရပါတယ်။

ရုရှားဘက်ကအရာရှိများကတော့ ဒီကိစ္စမှာ အခြေအနေနားလည်မှုလွဲမှားခဲ့သာဖြစ်ကြောင်း တုန့်ပြန်ပြောကြားသွားပါတယ်။

#Yangon_Media_Group

#WorldHealth
Published - 02 April 2022
American Heart Association ဂျာနယ်မှာဖော်ပြထားချက်အရ အပတ်တိုင်းထောပတ်သီးတစ်လုံးစာ စားသုံးခြင်းဖြင့် နှလုံးသွေးကြောပိတ်ခြင်းကို ရိုးရှင်းထိရောက်စွာကာကွယ်နိုင်ကြောင်း ဖော်ပြထားပါတယ်။

‌ထောပတ်သီးဟာ ဘယ်အချိန်စားစားအရသာရှိတဲ့ အစားအစာရှိပါတယ်။
ထောပတ်သီးမှာ အကျိုးပြုအဆီဓာတ်နဲ့ အာဟာရဓာတ်တွေပါဝင်နေပြီး အခုဆိုရင် ထောပတ်သီးကိုစားသုံးသင့်တဲ့အကြောင်းအရင်းတွေ ပိုမိုတွေ့ရှိလာပြီဖြစ်ပါတယ်။

တစ်ပတ်ကို ထောပတ်သီးတစ်လုံး ဒါမှမဟုတ် ထောပတ်သီးဖျော်ရည်တစ်ခွက် စားသုံးပေးခြင်းဖြင့် နှလုံးသွေးကြောပိတ်ဆို့ခြင်းကို ၂၁ ရာခိုင်နှုန်းလျှော့ချပေးနိုင်တယ်လို့ သုတေသီတွေက ထုတ်နှုတ်ဖော်ပြထားပါတယ်။

ထောပတ်၊ ချိစ်၊ အသင့်ထုတ်လုပ်ထားတဲ့အသားတွေအစား အကျိုးပြအဆီ ၈၀ ဂရမ်ပါဝင်တဲ့ထောပတ်သီးစားသုံးခြင်းဖြင့် အမျိုးသမီးတွေရော အမျိုးသားတွေမှာပါ နှလုံးရောဂါဖြစ်နိုင်ချေကို လျော့နည်းစေပါတယ်။

အမျိုးသမီး ၆၈,၀၀၀ နဲ့ အမျိုးသား ၄၁,၀၀၀ ကို နှစ် ၃၀ တိုင်အောင် လေ့လာစောင့်ကြည့်မှုများပြုလုပ်ကာ သုံးသပ်ခဲ့ကြပါတယ်။ သုတေသီတို့က သူတို့တစ်ဦးချင်းစီကို ဆယ်စုနှစ် ၃ ခုအတွင်း လေးနှစ်တစ်ကြိမ်ဖြင့် အစားအသောက်နဲ့ပတ်သက်ပြီး စစ်တမ်း‌မေးမြန်းကောက်ခံခဲ့ကြပါတယ်။

ထောပတ်သီး အလွယ်တကူမရရှိနိုင်တဲ့နေရာတွေမှာ ပဲ၊ ကုလားပဲ၊ ပဲနီကလေးတို့ အစားထိုးစားသုံးနိုင်ကြောင်း လူမှုဘဝကျန်းမာရေးဆရာဝန်'ဒေးဗစ်ကတ်ဇ်'က ပြောကြားလိုက်ပါတယ်။

နှလုံးရောဂါမဖြစ်အောင်ကာကွယ်ရာမှာ သကြားဓာတ်စားသုံးမှုလျှော့ချဖို့လိုအပ်သလို အသင့်ထုပ်ပိုးထားတဲ့အသားတွေနဲ့ ပြည့်ဝအဆီများစားသုံးခြင်းကို ရှောင်ရှားသင့်ပါတယ်။
ခွန်အားရရှိဖို့၊ ကိုယ်တွင်းအင်္ဂါများ ကောင်းမွန်စွာလည်ပတ်ဖို့အတွက် အကျိုးပြုအဆီများစားသုံးဖို့လိုအပ်ပါတယ်။

နှလုံးကိုကာကွယ်ပေးနိုင်တဲ့ အကျိုးပြုအဆီများမှာ သံလွင်ဆီ၊ ပဲဆီ၊ နှမ်းဆီ၊ ထောပတ်သီး၊ မြေပဲထောပတ်တို့ပါဝင်ပါတယ်။
Source: Martha Stewart

#WorldHealth
Published - 02 April 2022

ဖိုင်ဇာ-ဘိုင်အိုတက်ခ် ကိုဗစ်ကာကွယ်ဆေးထိုးနှံထားတဲ့ အသက် ၅ နှစ်မှ ၁၁ နှစ်ကြားကလေးငယ်တွေဟာ ကာကွယ်ဆေးမထိုးထားတဲ့ကလေးတွေနဲ့နှိုင်းယှဉ်ပါက အမေရိကန်မှာအိုမီခရွန်ကူးစက်မှုလွှမ်းမိုးစဉ်ကာလအတွင်း ဆေးရုံတက်ကုသခံယူရမှုနှုန်း ၆၈ ရာခိုင်နှုန်းလျှော့ချပေးနိုင်ကြောင်း လေ့လာတွေ့ရှိချက်ကို ဗုဒ္ဓဟူးနေ့မှာဖော်ပြထားပါတယ်။

ကာကွယ်ဆေးနှစ်ကြိမ်ထိုးထားတဲ့ အသက် ၁၂ နှစ်မှ ၁၈ နှစ်ကြားဆယ်ကျော်သက်တွေမှာတော့ အိုမီခရွန်မျိုးဗီဇကွဲကြောင့် ဆေးရုံတက်ကုသခံယူမှုကို ၄၀ ရာခိုင်နှုန်းလျှော့ချပေးနိုင်ကြောင်း အမေရိကန်ရောဂါထိန်းချုပ်ကာကွယ်ရေးစင်တာ(CDC)နဲ့ ဘော့စတွန်ကလေးဆေးရုံတို့မှ သိပ္ပံပညာရှင်များဖော်ထုတ်နိုင်ခဲ့ကြပြီး နယူးအင်္ဂလန်ဆေးပညာဂျာနယ်မှာဖော်ပြခဲ့ပါတယ်။

အသက်ရှူကိရိယာလိုအပ်ခြင်းနဲ့ အသက်သေဆုံးခြင်းလိုဖြစ်စဉ်တွေကိုတော့ ၈၀ ရာခိုင်နှုန်းနီးပါးအထိ လျှော့ချပေးနိုင်ပါတယ်။ "ကိုဗစ်ရောဂါနဲ့ အသက်ရှူလမ်းကြောင်းဆိုင်ရာရောဂါတွေဟာ ရောဂါပြင်းထန်ခြင်းအစားစားဖြစ်နိုင်ပါတယ်။ ဒါပေမဲ့ ရောဂါပြင်းထန်မှုကို ထိန်းချုပ်ကာကွယ်လို့ရပါတယ်" လို့ CDC မှ သုတေသီဒေါက်တာ'မန်နစ်ရှ်ပေတယ်လ်'က ဆိုပါတယ်။

ပြီးခဲ့တဲ့နှစ် ဒယ်လ်တာမျိုးဗီဇကွဲကူးစက်မှုလွှမ်းမိုးစဉ်ကာလအတွင်း ကာကွယ်ဆေးထိရောက်မှုက ပိုပြီးအားကောင်းနေခဲ့ပါတယ်။ ထိုစဉ်က ဆယ်ကျော်သက်တွေမှာ ကာကွယ်ဆေးထိုးနှံခြင်းဖြင့် ဆေးရုံတက်ကုသခံယူရမှုကို ၉၃ ရာခိုင်နှုန်းလျှော့ချနိုင်ခဲ့ပါတယ်။

၂၀၂၂ ဇန်နဝါရီလက ကာကွယ်ဆေးထိရောက်မှုက အသက်ငယ်ရွယ်သေးတဲ့ကလေးငယ်တွေမှာ ဆေးရုံတက်ရောက်ရမှုကို ၄၈ ရာခိုင်နှုန်းကာကွယ်ပေးနိုင်ပြီး ဆယ်ကျော်သက်တွေမှာတော့ ၇၃ ရာခိုင်နှုန်းလျှော့ချပေးနိုင်ပါတယ်။

"ရောဂါပြင်းထန်တဲ့ကလေးအများစုက ကာကွယ်ဆေးမထိုးထားကြပါဘူး။ ဒါကြောင့် ကာကွယ်ဖို့ အရိုးရှင်းဆုံးနည်းလမ်းက ကာကွယ်ဆေးထိုးဖို့ပါပဲ" လို့ 'ပေတယ်လ်'ကဆိုပါတယ်။
Source: The Jerusalem Post