#WorldNews
Published - 06 April 2022
ကိုဗစ်ကပ်ရောဂါကာလအတွင်း သေဆုံးသူများပြားလျက်ရှိကာ အသုဘအခမ်းအနားတွေနေ့စဉ်မပြတ်ရှိနေပြီး အစိုးရအာဏာပိုင်တွေကလည်း အသုဘခန်းမတွေထပ်ထည့်နိုင်ဖို့ ကြိုးပမ်းနေကြပါတယ်။
ဟောင်ကောင်မှာ အလောင်းတွေကို ထည့်သွင်းသဂြိုဟ်ကြတဲ့ သစ်သားအခေါင်းတွေဟာဆိုရင် ပစ္စည်းရှားပါးနေပြီဖြစ်ပါတယ်။
"အလောင်းတွေဒီလောက်ထိ စုပြုံနေတာ တစ်ခါမှမမြင်ဖူးပါဘူး။ မိသားစုဝင်တွေလည်း ဒီလောက်ထိစိတ်ပျက်လက်ပျက်ဖြစ်နေကြတာကို မတွေ့ဖူးပါဘူး" လို့ အသုဘအခမ်းအနားညွှန်ကြားရေးမှူး'လော့ချောင်'က ပြောပြပါတယ်။
အရင်ကတစ်လကို အလောင်း ၁၅ လောင်းလောက်သာရှိခဲ့ရာ အခုဆိုရင်မတ်လထဲမှာ အလောင်း ၄၀ လောက်ကို နေ့ညမပြတ်စီစဉ်နေရပါတယ်လို့ ရိုက်တာသတင်းဌာနကိုပြောကြားလိုက်ပါတယ်။
ကိုရိုနာဗိုင်းရပ်စ်ကူးစက်မှုပဉ္စမမြောက်လှိုင်းမှာ ဟောင်ကောင်အတွင်း ကူးစက်သူ ၁ သန်းကျော်ခဲ့ပြီး သေဆုံးသူ ၈ ထောင်ကျော်ရှိခဲ့ပါတယ်။
လူနာတွေရှိတဲ့နေရာရဲ့ဘေးက အရေးပေါ်အခန်းမှာအလောင်းတွေစုပြုံနေတဲ့မြင်ကွင်းက အံ့အားသင့်စရာဖြစ်နေပါတယ်။
သေတမ်းစာပြုလုပ်ဖို့ အချိန်ကြာမြင့်စွာစောင့်ဆိုင်းနေရခြင်းကလည်း 'လော့ချောင်'လိုလူမျိုးအတွက် အလုပ်နှောင့်နှေးစေပါတယ်။
တရုတ်အသုဘတွေမှာ ကွယ်လွန်သူတွေနောက်ဘဝကျရင် အသုံးပြုနိုင်အောင်ဆိုပြီး မီးရှို့ပေးရတဲ့ ပိုင်ဆိုင်မှု ပစ္စည်းပုံတူစာရွက်တွေဟာလည်း ရှားပါးနေပြီဖြစ်ပါတယ်။
နာရေးကိစ္စတွေနှောင့်နှေးရတဲ့အဓိကအကြောင်းအရင်းဟာ တရုတ်နိုင်ငံတောင်ပိုင်းရှင်ကျန်မြို့မှ ပို့ ဆောင်ရေးကြန့်ကြာနေလို့ဆိုပြီး အပြစ်တင်နေကြပါတယ်။
ရှင်ကျန်မြိုဟာ ဟောင်ကောင်ကို နာရေးထောက်ပံ့ရေးပစ္စည်းများပေးပို့နေခဲ့ပေမယ့် ကိုဗစ်ကပ်ရောဂါကြောင့် သူတို့ကိစ္စနဲ့သူတို့လည်း ရုန်းကန်နေကြရပါတယ်။
ကပ်ရောဂါကြောင့် ဟောင်ကောင်နဲ့ထိစပ်နေတဲ့နယ်စပ်အများစုနေရာကိုလည်း ပိတ်ပင်ထားပါတယ်။
အသုဘခန်းမတွေကဝန်ထမ်းတွေမှာလည်း ရောဂါကူးစက်မှုများရှိနေတာကြောင့် ပိုပြီးရုန်းကန်နေရတယ်လို့ အသုဘအခမ်းအနားညွှန်ကြားရေးမှူး'ဟေးဒီးစ်ချန်'က ပြောပြပါတယ်။
တရုတ်ကနေ ဟောင်ကောင်ကို နေ့စဉ်အခေါင်း ၂၅၀ မှ ၃၀၀ လောက်အထိ ထောက်ပံ့ပေးလျက်ရှိပါတယ်။
ဟောင်ကောင်အစိုးရက တရုတ်ပြည်မကြီးမှတာဝန်ရှိသူများနဲ့ပူးပေါင်းကာ မတ်လ ၁၄ ရက်မှ ၂၆ ရက်အတွင်း အခေါင်း ၃,၅၇၀ ခုလက်ခံရရှိခဲ့ပါတယ်။
သဂြိုဟ်စက် ၆ ခုဟာ အခုဆိုရင်နေ့ညမပြတ်အလုပ်လုပ်နေရပြီး တစ်နေ့ကို အလောင်း ၃၀၀ နီးပါးသဂြိုဟ်နေရပါတယ်။
အစိုးရမဟုတ်တဲ့အဖွဲ့အစည်း Forget Thee Not နဲ့ အခေါင်းဆောက်လုပ်ရေး LifeArt Asia တိုပူးပေါင်းကာ အခေါင်း ၃၀၀ နဲ့ အလောင်းထိန်းသိမ်းထားရှိရာမှာလိုအပ်တဲ့ပစ္စည်းသေတ္တာ ၁ ထောင်ကို ပြည်သူ့ဆေးရုံ ၆ ရုံထံ လှူဒါန်းပေးခဲ့ပါတယ်။
Source: Reuters
#WorldHealth
Published 06 April 2022
တရုတ်နိုင်ငံက ကာကွယ်ဆေးထုတ်လုပ်ရေးကုမ္ပဏီ CanSino Biologics မှထုတ်လုပ်တဲ့ mRNA အမျိုးအစားကိုဗစ်ကာကွယ်ဆေးကို လက်တွေ့စမ်းသပ်ထိုးနှံမှုပြုလုပ်ရန် တရုတ်နိုင်ငံဆေးဝါးအာဏာပိုင်များက တနင်္လာနေ့မှာ အသိအမှတ်ပြုလိုက်ပြီဖြစ်ပါတယ်။
တရုတ်နိုင်ငံဟာ အခြားနိုင်ငံတွေလိုမဟုတ်ဘဲ ဖိုင်ဇာ-ဘိုင်အိုတက်ခ်တို့လို နိုင်ငံခြားဖြစ် mRNA ကိုဗစ်ကာကွယ်ဆေးတွေကို အသိအမှတ်မပြုထားပါဘူး။
တရုတ်နိုင်ငံရှိ လူဦးရေ ၁.၄ ဘီလီယံရဲ့ ၈၈ ရာခိုင်နှုန်း ကာကွယ်ဆေးထိုးပြီးတဲ့အချိန်ကျမှ ပြည်တွင်းထုတ် mRNA ကာကွယ်ဆေးတွေကို နောက်ကနေလိုက်ပြီး ထုတ်လုပ်လျက်ရှိကာ ထိုထဲမှ ကာကွယ်ဆေးတစ်ခုဆိုရင် တတိတယအဆင့်လက်တွေ့စမ်းသပ်မှုတွေ ပြုလုပ်နေတာဖြစ်ပါတယ်။
CanSinoBIO ရဲ့ကာကွယ်ဆေးဟာ လက်တွေ့စမ်းသပ်မှုတွေမလုပ်ခင် လေ့လာစမ်းသပ်ချက်များအရ အိုမီခရွန်အပါအဝင် ကိုဗစ်မျိုးဗီဇကွဲအများအပြားကို ချေဖျက်နိုင်တဲ့ပဋိပစ္စည်း(antibody) အမြောက်အများထွက်ရှိစေနိုင်ကြောင်း သတင်းစာရှင်းလင်းပွဲမှာ ပြောကြားသွားပါတယ်။
CSPC ဆေးဝါးကုမ္ပဏီကထုတ်တဲ့ mRNA ကိုဗစ်ကာကွယ်ဆေး SYS6006 ကိုလည်း လက်တွေ့စမ်းသပ်မှုများပြုလုပ်ဖို့ တရုတ်အမျိုးသားဆေးဝါးကွပ်ကဲရေးအဖွဲ့က အသိအမှတ်ပြုခဲ့ပြီဖြစ်ပါတယ်။
Source: Reuters.
#Yangon_Media_Group
#WorldHealth
Published 06 April 2022
အသက် ၆၀ နဲ့ ၇၀ ဝန်းကျင်အသက်အရွယ်တွေမှာ စန္ဒရားတီးလေ့လာသင်ယူခြင်းက ဦးနှောက်ချို့ယွင်းမှုမဖြစ်လာအောင် ထိန်းသိမ်းပေးနိုင်ကြောင်း သုတေသီများကလေ့လာတွေ့ရှိခဲ့ပါတယ်။
မှတ်ဉာဏ်နဲ့ အာရုံစူးစိုက်မှုပြဿနာများဝင်လာတဲ့အခါ ဦးနှောက်ထဲကအာရုံကြောမျှင်လေးတွေတည်ရှိတဲ့ ဦးနှောက်အစိတ်အပိုင်းဟာ ချို့ယွင်းလာတတ်ပါတယ်။
စန္ဒရားတီးလေ့ကျင့်သင်ယူခြင်းဖြင့် ထိုဦးနှောက်အစိတ်အပိုင်းကို သန်မာအားကောင်းစေမှာဖြစ်ကြောင်း သိပ္ပံပညာရှင်များတွေ့ရှိခဲ့ကြပါတယ်။
အပတ်စဉ် စန္ဒရားတီးလေ့ကျင့်မှုများကို ၆ လတိုင်ပြုလုပ်ခြင်းဖြင့် အကျိုးအာနိသင်ခံစားလာရမှာဖြစ်ပါတယ်။
အင်္ဂလန်နိုင်ငံမှာ သတိမေ့လျော့ခြင်းဝေဒနာ(Dementia )အဖြစ်များလာတဲ့ ပြဿနာကြုံတွေ့နေရပြီး ၂၀၄၀ ခုနှစ်မှာ သတိမေ့လျော့ခြင်းဝေဒနာ ခံစားရနိုင်ဖွယ်ရှိတဲ့သက်ကြီးရွယ်အိုအရေအတွက်ဟာ ၈ သိန်းကနေ ၁ သန်းကျော်အထိ ရှိလာနိုင်ပါတယ်။
လေ့လာသုံးသပ်ချက်များအရ တေးဂီတတူရိယာတစ်ခုခုကို တီးမှုတ်လေ့ကျင့်ခြင်းက ထိုဝေဒနာကိုကာကွယ်နိုင်တယ်လို့ ဖော်ပြထားကြပါတယ်။
ဒါပေမဲ့လေ့လာခဲ့တဲ့သူတွေက ပညာရှင်တွေနဲ့ ငယ်စဉ်ကတည်းက တီးခတ်လာတဲ့သူတွေဖြစ်ပါတယ်။
ဒါကြောင့် အသက်ကြီးမှ စန္ဒရားတီးလေ့ကျင့်သင်ယူခြင်းက ဦးနှောက်ကို အထောက်အကူဖြစ်စေလားဆိုတာကို သိပ္ပံပညာရှင်တွေက လေ့လာခဲ့ကြပါတယ်။
ဂီတတူရိယာလုံးဝအသုံးမပြုဖူးတဲ့ အသက် ၆၀ မှ ၇၀ ဝန်းကျင်လူ ၁၂၁ ယောက်ကို လေ့လာသုံးသပ်ခဲ့ကြပါတယ်။
စမ်းသပ်မှုမလုပ်ခင်နဲ့ စမ်းသပ်မှုလုပ်ပြီးတဲ့အချိန်မှာ ဦးနှောက်ထဲရှိ fornix လို့ခေါ်တဲ့ အစိတ်အပိုင်းကို စကင်ဖတ်လိုက်ပါတယ်။
ထိုအစိတ်အပိုင်းဟာ အာရုံကြောအမျှင်လေးတွေရှိတဲ့နေရာဖြစ်ပြီး အသက်အရွယ်ကြီးလာတဲ့အခါ မှတ်ဉာဏ်သိရှိမှုအပိုင်းမှာ ချို့ယွင်းလာတတ်ပါတယ်။
ထိုလူတွေထဲမှတဝက်ကို အပတ်တိုင်းစန္ဒရားသင်ခန်းစာ ၁ နာရီဖြင့် ၆ လအထိသင်ကြားပေးခဲ့ပြီး အိမ်မှာတော့ နေ့စဉ်နာရီဝက်လေ့ကျင့်ခိုင်းခဲ့ပါတယ်။
နောက်ထပ်လူတဝက်ကိုတော့ သီချင်းဂီတအမျိုးမျိုးကို နားထောင်ခိုင်းခြင်းသာ ပြုလုပ်စေခဲ့ပြီး လိုက်လံသီဆိုခြင်း၊ တီးမှုတ်ခြင်း၊ လက်ခုပ်တီးခြင်းတို့ကိုတောင် မပြုလုပ်စေခဲ့ပါဘူး။
အဲဒီနောက်မှာတော့ စန္ဒရားတီးသင်ယူလေ့ကျင့်နေတဲ့သူတွေမှာ ဦးနှောက်လုပ်ဆောင်မှုကျဆင်းသွားခြင်းမရှိတာကို တွေ့ရှိခဲ့ကြပါတယ်။
စန္ဒရားတီးလေ့ကျင့်ခြင်းမရှိတဲ့သူတွေမှာတော့ အာရုံကြောမျှင်များကျဲပါးလာပြီး သတိမေ့လျော့ခြင်းနဲ့ မှတ်ဉာဏ်ချို့ယွင်းမှုတွေ ဖြစ်လာနိုင်ချေများနေတာကို တွေ့ခဲ့ရပါတယ်။
အသက်အရွယ်ကြီးတဲ့အချိန်မှ ဂီတတူရိယာလေ့ကျင့်သင်ယူခြင်းဟာ ထိရောက်မှုရှိပေမယ့် သင်ယူတဲ့နေရာမှာတော့ စိတ်ပါဝင်စားဖိုတော့လိုအပ်ပါတယ်။
ဦးနှောက်လုပ်ဆောင်မှုတိုးတက်လာခြင်းက စန္ဒရားတီးသင်ယူခြင်းနဲ့ဆက်စပ်နေပါတယ်လို့ သုတေသီများက ရေးသားဖော်ပြသွားပါတယ်။
Source: Dailymail.
#Yangon_Media_Group
#WorldWildlife
Published 05 April 2022
အီရတ်နိုင်ငံတောင်ပိုင်းရှိစိမ့်မြေတွေမှာ တိရိစ္ဆာန်ဆေးကုဆရာဝန်များက လယ်သမားများမွေးမြူထားတဲ့ကျွဲများကို အရေးပေါ်သွားရောက်ကုသဖို့အတွက် မော်တော်ဘုတ်ငယ်ဖြင့် သွားလာလေ့ရှိပါတယ်။
#Yangon_Media_Group
Published 5 April 2022
ဆွီဒင်နိုင်ငံ စတော့ဟုမ်းမြို့တော်ရဲ့ ဆင်ခြေဖုံးမှာ မကြာမီက ဖွင့်လှစ်ခဲ့တဲ့ ယူဆီယမ် "Youseum" လို့အမည်ပေးထားတဲ့ ပြတိုက်ဟာ လာရောက်ကြည့်ရှုတဲ့ ဧည့်သည်တွေအတွက် ဆဲလ်ဖီးဆွဲဖို့နှင့် ဗွီဒီယိုရိုက်ကူးဖို့ ပျော်စရာကောင်းတဲ့ နောက်ခံအပြင်အဆင်တွေ ဖန်တီးပေးထားပါတယ်။အဲဒီဆဲလ်ဖီးပြတိုက်ကို ကြိုက်နှစ်သက်သူတွေ အတော့်ကိုများနေပါတယ်။
ဒီစိတ်ကူးကို ၂၀၁၉ ခုနှစ်တုန်းက အမ်စတာဒမ်မှာစတင်ခဲ့ပြီး ယခုဆိုရင် ဂျာမနီနှင့် အရှေ့အလယ်ပိုင်းအပါအဝင် ကမ္ဘာအနှံ့ပျံ့နှံသွားပါပြီ။
Source AFP
#DailyNews
Published -4 April 2022
၁။ သင်္ကြန်ရက်များအတွင်း လျှပ်စစ်မီးပေးချိန်ထပ်တိုးနိုင်ရန် YESC စီစဉ်
၂။ နယ်လိုင်စင်ကားတွေ အဝယ်လိုက်နေပြီး ဈေးကွက်တွင် ကြိုက်ရောင်းကြိုက်ဝယ်ပုံစံဖြင့်အရောင်းအဝယ်တွေဖြစ်နေ
၃။ မိုးလေဝသ သတင်း
၄။ ကမ္ဘာ့အကြီးဆုံးမြစ်ဝကျွန်းပေါ်တွေထဲက တစ်ခုဖြစ်သော အီရတ်တောင်ပိုင်းစိမ့်မြေများရှိ ကျွဲနွားများကို ဆရာဝန်များက မော်တော်ဘုတ်ငယ်များအသုံးပြု ဆေးဝါးကုသပေးနေ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
#WorldPolitics
Published 05 April 2022
ယူကရိန်းနိုင်ငံဘူချာမြို့မှာ အရပ်သားပြည်သူတွေအသတ်ခံထားရတဲ့ပုံတွေ ထွက်ပေါ်လာပြီးတဲ့နောက် ရုရှားသမ္မတ'ဗလာဒီမီယာပူတင်'ကို စစ်ရာဇဝတ်ကောင်ဟုစွပ်စွဲလိုက်ပြီး တရားရုံးမှာအမှုရင်ဆိုင်ဖို့ အမေရိကန်သမ္မတ'ဂျိုးဘိုင်ဒန်'က သတိပေးလိုက်ပါတယ်။
ယူကရိန်းတပ်ဖွဲ့များက မြို့တော်ကိဗ်ကို ရုရှားတပ်ဖွဲ့များထံမှ ပြန်လည်သိမ်းယူခဲ့ပြီးနောက် မြို့အပြင်ဘက်ရှိဘူချာမြို့မှာ ကြိုးတုပ်ခံထားရပြီး အနီးကပ်ပစ်သတ်ခြင်းခံထားရတဲ့အရပ်သားပြည်သူများအား အစုလိုက်အပြုံလိုက်မြှုပ်နှံထားတာကို တွေ့ရှိခဲ့ကြပါတယ်။
ဒီလိုလုပ်ရပ်တွေကြောင့် အမေရိကန်နဲ့ဥရောပတို့က ရုရှားကိုနောက်ထပ်ဒဏ်ခတ်ပိတ်ဆို့ခြင်းတွေ ချမှတ်လာဖွယ်ရှိနေပါတယ်။
'ဘိုင်ဒန်'က ဒယ်လာဝဲပြည်နယ်ကနေ ဝါရှင်တန်သို့ ရဟတ်ယာဉ်ဖြင့်ပြန်လည်ရောက်ရှိလာခဲ့ပြီး သတင်းထောက်တွေကိုပြောကြားရာမှာ "ဘူချာမြို့ကအလောင်းတွေက တွေ့တဲ့အတိုင်းပါပဲ။ 'ပူတင်'က စစ်ရာဇဝတ်ကောင်ဆိုတာ ထင်ရှားနေပါတယ်။ ကျုပ်တိုသတင်းအချက်အလက်တွေစုဆောင်းရမယ်။ ယူကရိန်းတပ်ဖွဲ့တွေတိုက်ခိုက်တဲ့နေရာမှာ လိုအပ်မယ့်လက်နက်တွေကို ဆက်လက်ထောက်ပံ့သွားမှာပါ။ ရသမျှအချက်အလက်အကုန်လုံးစုစည်းပြီး စစ်ရာဇဝတ်မှုကျူးလွန်သူကိုတရားရုံးကို ပို့ဆောင်သွားရပါမယ်" လို့ ပြောသွားပါတယ်။
ရုရှားတိုဘက်ကတော့ ဘူချာမြို့အပါအဝင် အရပ်သားပြည်သူတွေကိုသတ်ဖြတ်တယ်ဆိုတဲ့ စွပ်စွဲချက်တွေကိုငြင်းဆန်လိုက်ကာ အလောင်းအစုလိုက်အပြုံလိုက်တွေ့ရှိခြင်းက ရုရှားဂုဏ်သိက္ခာကျဆင်းအောင် ယူကရိန်းတို့ဇာတ်လမ်းဆင်ခဲ့တာဖြစ်ကြောင်း တုန့်ပြန်လိုက်ပါတယ်။
စစ်ရာဇဝတ်မှုကိုတရားရုံးလျှောက်တင်ဖို့အတွက် လိုအပ်တဲ့အထောက်အထားတွေကို အမေရိကန်နဲ့မဟာမိတ်နိုင်ငံများ၊ စစ်မြေပြင်ရှိ ယူကရိန်းစောင့်ကြည့်ရေးအဖွဲ့များ၊ ကုလသမဂ္ဂအပါအဝင် နိုင်ငံတကာအဖွဲ့အစည်းများ၊ နိုင်ငံတကာမှ ဘက်မလိုက်သောမီဒီယာအင်တာဗျူးများကနေ အချက်အလက်များရယူစုဆောင်းသွားမှာဖြစ်ကြောင်း အမေရိကန်နိုင်ငံတော်လုံခြုံရေးအကြံပေးအရာရှိ'ဂျိတ်ခ်ဆာလီဗန်'က သတင်းထောက်တွေကို ပြောကြားလိုက်ပါတယ်။
အမေရိကန်တို့က ဒီအမှုကို နိုင်ငံတကာတရားရုံး(ICC) သို့မဟုတ် အခြားတရားရုံးတစ်ခုခုမှာ တင်ပြသွားဖို့ရှိနေပါတယ်။
ရုရှားက ကုလသမဂ္ဂလုံခြုံရေးကောင်စီမှာ အမြဲတမ်းအဖွဲ့ဝင်ဖြစ်နေတာကြောင့် ကုလကိုလျှောက်တင်သွားမှာတော့ မဟုတ်ပါဘူး။
တနင်္လာနေ့က ဂျာနယ်လစ်များ မြို့ထဲသို့လာပြီး ပျက်စီးဆုံးရှုံးမှုတွေကို စာရင်းပြုစုခဲ့ကာ ယူကရိန်းသမ္မတ'ဗိုလိုဒီမီယာဇယ်လန်စကီ'က ဘူချာမြို့က အစုလိုက်အပြုံလိုက်အသတ်ခံရခြင်းဟာ လူမျိုးတုံးသတ်ဖြတ်ခြင်းဖြစ်တယ်လို့ ပြောကြားခဲ့ပါတယ်။
လူမျိုးတုံးသတ်ဖြတ်တဲ့အဆင့်ရောက်နေပြီလားဆိုတာကို အမေရိကန်တို့က အထောက်အထားများဖြင့် ကြည့်ရှုစစ်ဆေးသွားရဦးမှာဖြစ်ပါတယ်။
ယူကရိန်းကို ရုရှားတို့ကျူးကျော်ကတည်းက 'ဘိုင်ဒန်'က 'ပူတင်'ကိုစစ်ရာဇဝတ်ကောင်လို သမုတ်ခဲ့ပြီး အမေရိကန်-ရုရှားဆက်ဆံရေးဟာလည်း ထိခိုက်ပျက်စီးခဲ့ရပါတယ်။
"စစ်ရာဇဝတ်မှုတွေဖန်တီးခဲ့တဲ့ 'ပူတင်'နဲ့အပေါင်းအပါတွေကို တာဝန်ယူဖြေရှင်းခိုင်းဖို့ နိုင်ငံတကာအသိုင်းအဝိုင်းအနေနဲ့ ပြတ်ပြတ်သားသားဆောင်ရွက်ရမှာဖြစ်ပါတယ်" လို့ နိုင်ငံခြားဆက်ဆံရေးအထက်လွှတ်တော်ကော်မတီမှ ရီပတ်ဘလစ်ကန်ဘက်တော်သား'ဂျင်မ်ရစ်ချ်'က ဖော်ပြခဲ့ပါတယ်။
ကော်မတီဥက္ကဌဖြစ်သူ ဒီမိုကရက်တစ်ဘက်တော်သား'ဘော့ဘ်မီနန်ဒက်ဇ်'ကလည်း "အရပ်သားပြည်သူတွေအပေါ် ကြမ်းတမ်းရက်စက်ခဲ့တဲ့လုပ်ရပ်တဲ့အတွက် 'ပူတင်'မှာတာဝန်ရှိပါတယ်" လို့ ပြောကြားခဲ့ပါတယ်။
ရုရှားကို ကုလလူ့အခွင့်အရေးကောင်စီကနေ ဆိုင်းငံ့ထားဖို့ကြိုးစားလျက်ရှိကြောင်း 'ဘိုင်ဒန်'ရဲ့ကုလကိုယ်စားလှယ်က ကြေညာခဲ့ပါတယ်။
Source: Reuters
#Yangon_Media_Group
Page 715 of 777