#Daily_News

Published 17 March 2025

၁။ YPS ကတ်များငွေဖြည့်သွင်းခြင်းကို mobile money မှတဆင့် ဖြည့်သွင်းနိုင်ရန်ဆောင်ရွက်နေ

၂။ ရည်ညွန်းဈေး ဆက်တိုက်ကျဆင်းနေသည့် စားအုန်းဆီပြင်ပပေါက်ဈေးကျဆင်းရန်လို

၃။ ကမ္ဘာ့ရွှေ စံချိန်တင်မြင့်တက်နေသော်လည်း ရည်ညွှန်းဈေးကျပြီး အရောင်းအဝယ်အေးနေ

၄။ အမေရိကန်စစ်မှုထမ်းဟောင်းများ ဝါရှင်တန်ဒီစီကပ်ပီတိုလ်လွှတ်တော်ရှေ့၌ဆန္ဒထုတ်ဖော် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 17 March 2025

▪️ မြောက်မက်ဆီဒိုးနီးယား ကိုကာနီမြို့မှာ တနင်္ဂနွေနေ့ အစောပိုင်းက လူပြည့်ကျပ်နေတဲ့ လိုင်စင်မဲ့နိုက်ကလပ်တစ်ခု မီးလောင်ကျွမ်းသဖြင့် လူ ၅၉ ဦးသေဆုံးကာ ၁၅၀ ကျော်ဒဏ်ရာရရှိခဲ့တယ်လို့ တာဝန်ရှိသူများ ပြောပါတယ်။

▪️ မျက်နှာကျက်တလျှောက် မီးပျံ့နှံ့ချိန်မှာ အခန်းငယ်လေးရဲ့ တစ်ခုတည်းသော ထွက်ပေါက်ကိုပဲ လူရာနဲ့ချီ အသည်းအသန် ထွက်ပြေးကြရသဖြင့် အများအပြား ပိတ်မိနေခဲ့ပါတယ်။

▪️ ဗီဒီယိုတစ်ခုထဲမှာဆိုရင် ဂီတအဖွဲ့က စင်ပေါ်မှာဖျော်ဖြေနေစဉ် မီးတောက်နှစ်ခုကနေ မီးပွားထွက်လာပြီး မျက်နှာကျက်ကို စွဲသွားကာ ခဏအကြာမှာပဲ ဝရုန်းသုန်းကား ဖြစ်သွားပါတယ်။

▪️ "မီးစွဲသွားတဲ့အခါ လူတွေအော်ဟစ်နေကြပြီး ထွက်သွားကြဖို့ အော်ပြောနေကြပါတယ်။ ညီမဖြစ်သူတော့ ဆုံးပါးသွားတယ်" လို့ အသက် ၂၂ နှစ်ရှိ မာရီဂျာတက်ဆီဗာက ရိုက်တာသတင်းဌာနကို ပြောပြပါတယ်။

▪️ မီးလောင်ကျွမ်းမှုနဲ့ ဆက်စပ်နေတဲ့ လူ ၂၀ ကို အာဏာပိုင်များ ဖမ်းဆီးထားကာ အစိုးရအရာရှိများနဲ့ တရားဝင်လိုင်စင်မရှိတဲ့ Pulseနိုက်ကလပ်ရဲ့ မန်နေဂျာတို့လည်း ပါဝင်တယ်လို့ ပြည်ထဲရေးဝန်ကြီး ပန့်စ်တို့စ်ကော့ဗ်စကီက မီဒီယာရှင်းလင်းပွဲမှာ ပြောပါတယ်။

▪️ ဒဏ်ရာရသူ ၂၀ ကျော်နဲ့ သေဆုံးသူ ၃ ဦးတို့က အသက် ၁၈ နှစ်အောက်တွေ ဖြစ်ပါတယ်။

▪️ နိုက်ကလပ်လိုင်စင်ကို စီးပွားရေးဝန်ကြီးဌာနမှ တရားမဝင် ထုတ်ပေးထားတာဖြစ်ကာ ဒီအတွက် တာဝန်ရှိသူတွေအနေနဲ့ တရားစီရင်မှု ရင်ဆိုင်ရမယ်လို့ ဝန်ကြီးချုပ် ဟရစ္စတီယန်မစ်ကိုစကီက ကတိပြုပြောကြားလိုက်ပါတယ်။

▪️ နံနက် ၃ နာရီဝန်းကျင်မှာ မီးစတင်လောင်ကျွမ်းတာဖြစ်ပြီး ထိုအချိန် ကလပ်ထဲမှာ လူ ၅၀၀ ခန့်ရှိနေခဲ့ပါတယ်။

▪️ ရိုက်တာမှဖော်ပြတဲ့ ဓာတ်ပုံတွေထဲမှာ ကလပ်ရဲ့ခေါင်မိုး လောင်ကျွမ်းပြိုကျနေကာ အထဲအထိ မြင်တွေ့ရပါတယ်။

▪️ ကမ္ဘာ့ခေါင်းဆောင်အချို့နဲ့ ပုပ်ရဟန်းမင်းတို့က ထပ်တူပူဆွေးမိကြောင်း ဖော်ပြလာကြပါတယ်။

▪️ ဒီဖြစ်ရပ်ကို ရှေ့နေ ၅ ဦးမှ စုံစမ်းစစ်ဆေးသွားမှာဖြစ်ပြီး အထောက်အထားများ စုစည်းကာ လူတွေကို မေးမြန်းသွားမယ်လို့ မြောက်မက်ဆီဒိုးနီးယား ပြည်သူ့ရှေ့နေ ယက်ကိုကိုချက်စကီက ပြောခဲ့ပါတယ်။

▪️ တီးဝိုင်းအဖွဲ့ဝင်တွေ၊ ကလပ်ပိုင်ရှင်ရဲ့သား၊ အစိုးရအရာရှိတို့ကို ဖမ်းဆီးထိန်းသိမ်းထားတယ်လို့လည်း ဆိုပါတယ်။

#Source: Reuters

#World_Health
Published 17 March 2025

▪️ လူသားတွေရဲ့ ဦးနှောက်တစ်ရှူးထဲမှာ မိုက်ခရိုပလတ်စတစ်အမှုန်များ စုပြုံလာတာတွေ အဖြစ်များလာတာကို သိပ္ပံပညာရှင်များ တွေ့ရှိလာကြပါတယ်။

▪️ လေ့လာချက်အရ ဒီမန်ရှာရောဂါ ရှိတဲ့သူတွေမှာ မိုက်ခရိုပလတ်စတစ်နဲ့ နာနိုပလတ်စတစ်တွေက သာမန်လူတွေထက် ၃-၅ဆလောက် ပိုများနေပါတယ်။

▪️ ဒီမန်ရှာဆိုတာက ဦးနှောက်ပျက်ယွင်းလာတဲ့ အခြေအနေဖြစ်ပြီး အသက်ကြီးလာတာနဲ့အမျှ ဦးနှောက်ထဲကဆဲလ်တွေ စတင်ချို့ယွင်းလာကာ မှတ်ဉာဏ်ဆုံးရှုံးခြင်း၊ စဉ်းစားတွေးတောရခက်ခြင်းတို့ ဖြစ်လာတတ်ပါတယ်။

▪️ ဒါ့အပြင် တခြားအင်္ဂါတွေထက် ဦးနှောက်က ပလတ်စတစ်အမှုန်တွေ ၇-၃၀ ဆလောက် ပိုမိုပါဝင်နေတတ်ပါတယ်။

▪️ ဒါတွေဟာ ပတ်ဝန်းကျင်မှာ မိုက်ခရိုပလတ်စတစ်ပမာဏ မြင့်မားလာတာကို ဖော်ပြနေတယ်လို့ အော့တာဝါတက္ကသိုလ် စိတ်ကျန်းမာရေးဌာနမှ ဒေါက်တာ နီကိုလတ်စ်ဖေဘီယာနိုက ပြောပါတယ်။

▪️ အရွယ်အစား ၂၀၀ နာနိုမီတာအောက်ရှိတဲ့ ပလတ်စတစ်အမှုန်ငယ်တွေဟာ သွေးစီးကြောင်းထဲဝင်ပြီး ကိုယ်ခံအားစနစ်ကို နှောင့်ယှက်နိုင်စွမ်းရှိပါတယ်။

▪️ ရေသန့်ဗူးအသုံးပြုရာကနေ ဘေစင်ရေပြောင်းသုံးပါက တစ်နှစ်ကို မိုက်ခရိုပလတ်စတစ် ဝင်ရောက်မှု အမှုန်ပေါင်း ၉ သောင်းကနေ ၄ ထောင်အထိ လျှော့ချနိုင်မယ်လို့ သိပ္ပံပညာရှင်များ အကြံပြုထားပါတယ်။

▪️ အစားအစာများကို အပူပေးခြင်း၊ သိမ်းဆည်းခြင်းတို့ကလည်း သက်ဆိုင်သလို ဖန်နဲ့ စတီးလ်ပစ္စည်းများဖြင့် စားသုံးခြင်းက ပလတ်စတစ်အမှုန်များ ထွက်ရှိခြင်းကို လျှော့ချနိုင်ပါတယ်။

▪️ ဒါ့အပြင် ချွေးထွက်ခြင်းဖြင့် ခန္ဓာကိုယ်ကနေ ပလတ်စတစ်ဆက်စပ်ဒြပ်ပေါင်းများကို ဖယ်ရှားနိုင်ဖွယ် ရှိတယ်လို့လည်း ဖော်ပြထားပါတယ်။

#Source: India Today

#World_Health
Published 17 March 2025

▪️ ပါးစပ်ထဲက ဘက်တီးရီးယားတွေ ကစီဓာတ်ကို တုံ့ပြန့်ရာမှာ အရေးပါတဲ့ AMY1 gene အရေအတွက်က အချို့လူတွေမှာ သွားပိုးစားခြင်းနဲ့ သွားဖုံးရောဂါတို့ ဖြစ်နိုင်ခြေများစေနိုင်ကြောင်း လေ့လာချက်အသစ်တစ်ခုမှာ တွေ့ရပါတယ်။

▪️ အချိုဓာတ် အစားများသူတွေနဲ့ AMY1 အရေအတွက်များသူတွေက ပိုမိုသွားတိုက်သန့်ရှင်းပေးဖို့ သတိပေးလိုကြောင်း ကော်နယ်လ်တက္ကသိုလ်မှ တွဲဖက်ပရော်ဖက်ဆာ အိန်ဂျလာပူးလ်က ပြောပါတယ်။

▪️ AMY1 geneက ပါးစပ်ထဲမှာ ကစီဓာတ်ချေဖျက်ရာမှာ ကူညီပေးတဲ့ salivary amylase ထုတ်လုပ်ပေးဖို့ တာဝန်ရှိပါတယ်။

▪️ လေ့လာချက်အတွက် သုတေသီတွေက လူ ၃၁ ယောက်ထံမှ တံတွေးနမူနာများ ရယူခဲ့ကာ AMY1အရေအတွက်တွေက အမျိုးမျိုးဖြစ်နေပြီး ကစီဓာတ်ထည့်ပေးခဲ့ပါတယ်။

▪️ AMY1အရေအတွက် များတဲ့နမူနာတွေမှာ ကစီဓာတ်က Atopobium နဲ့ Veillonella ဘက်တီးရီးယားကို သိသိသာသာ လျှော့ချပေးကာ Streptococcus ပမာဏကတော့ မြင့်တက်စေပါတယ်။

▪️ အဆိုပါ ဘက်တီးရီးယား ၃ မျိုးစလုံးက သွားပိုးစားခြင်းနဲ့ သွားဖုံးရောဂါတို့နဲ့ ဆက်စပ်နေပါတယ်။

▪️ ကစီဓာတ်ပါတဲ့ အစားအစာတွေက အာဟာရမျှတစွာ စားတဲ့နေရာမှာ အရေးပါပြီး စွမ်းအင်နဲ့ အမျှင်ဓာတ်များ ပေးစွမ်းနိုင်သလို ဗိုက်တာမင်နဲ့ သတ္တုဓာတ်များလည်း ပါဝင်ပါတယ်။

▪️ AMY1များတဲ့သူတွေဟာ ကစီဓာတ်အစာများကို လွယ်ကူစွာ ချေဖျက်နိုင်ပါတယ်။

▪️ ဒါပေမဲ့လည်း အချိုကြိုက်တဲ့ ဘက်တီးရီးယားတွေကတော့ ပါးစပ်ထဲမှာ ပိုမိုပေါက်ဖွားလာမှာ ဖြစ်ပါတယ်။

▪️ ခံတွင်းကျန်းမာရေး မကောင်းတဲ့အခါ နှလုံးရောဂါ၊ ဆီးချို၊ အယ်လ်ဇိုင်းမားနဲ့ အချို့သောကင်ဆာများ အပါအဝင် ကျန်းမာရေးပြဿနာများနဲ့ ဆက်စပ်လာနိုင်ပါတယ်။

▪️ ဒါ့အပြင် ခံတွင်းမကောင်းတဲ့အခါ ရှက်ရွံ့စိတ်၊ ယုံကြည်မှုမရှိခြင်း၊ စိုးရိမ်ခြင်းစတဲ့ စိတ်ပြဿနာများ ဖြစ်လာနိုင်ပြီး လူမှုအထီးကျန်ခြင်း၊ နေထိုင်မှုအရည်အသွေး ကျဆင်းခြင်းတို့ပါ ဖြစ်လာနိုင်ပါတယ်။

#Source: New York Post

#World_Science
Published 16 March 2025

▪️ ဇီဝနည်းပညာကုမ္ပဏီ Colossal Biosciencesမှ သိပ္ပံပညာရှင်များက ရှေးခေတ်သားရဲတိရိစ္ဆာန်များကို ပြန်လည်ဖော်ဆောင်ဖို့ ကြိုးစားနေကာ အမွှေးရှည်ဆင်များကဲ့သို့ မျိုးသုဉ်းမျိုးစိတ်များနဲ့ ဆင်တူတဲ့ မျိုးဗီဇပြုပြင် သက်ရှိသတ္တဝါများကို ကြိုးပမ်းနေပါတယ်။

▪️ အမွှေးရှည်ဆင်တွေဟာ လွန်ခဲ့တဲ့နှစ် ၄,၀၀၀ ခန့်က မျိုးမသုဉ်းခင်အထိ ဥရောပ၊ အာရှ၊ မြောက်အမေရိကန်တို့မှ အေးခဲနေတဲ့ တန်ဒြာတွေမှာ လှည့်လည်နေထိုင်ခဲ့ကြပါတယ်။

▪️ Colossalကုမ္ပဏီက ၂၀၂၁မှာ အမွှေးရှည်ဆင်နဲ့ ဒိုဒိုငှက်တို့ကို ပြန်အသက်သွင်းမယ့် အစီအစဉ်ကို ချပြခဲ့ပြီး ယမန်နှစ်က တက်စ်မာနီယန်ကျားကို ပြန်လည်ဖော်ဆောင်ဖို့ ကြိုးပမ်းရာမှာ အောင်မြင်မှုရှိလာတယ်လို့ ဆိုပါတယ်။

▪️ ရှေးခေတ် DNAများကို လေ့လာပြီး မျိုးသုဉ်းသွားတဲ့ တိရိစ္ဆာန်တွေရဲ့ အဓိကဝိသေသလက္ခဏာများကို ရှာဖွေဖို့ အာရုံစိုက်ထားကြောင်း စီအီးအို ဘင်လမ်းက ပြောပါတယ်။

▪️ ပြင်ပသိပ္ပံပညာရှင်တွေကြားမှာတော့ ဒီလိုမျိုးသုဉ်းရှေးဟောင်းမျိုးစိတ်တွေကို ပြန်အသက်သွင်းမယ့် အစီအစဉ်က ပတ်ဝန်းကျင် ထိန်းသိမ်းခြင်းအတွက် အကူအညီဖြစ်စေမှာလားဆိုတာ အမြင်အမျိုးမျိုး ဖြစ်နေကြပါတယ်။

▪️ အင်္ဂါနေ့က Colossalဟာ ကြွက်သန္ဓေသားမှာ မျိုးဗီဇ ၇ ခုကို တပြိုင်တည်းပြုပြင်ခဲ့ပြီး Colossal အမွှေးရှည်ကြွက်လို့ခေါ်တဲ့ အမွှေးရှည်ရှည်ပွပွကြွက်တွေကို ဖန်တီးမယ်ဆိုပြီး ကြေညာခဲ့ပါတယ်။

▪️ သိပ္ပံပညာရှင်တွေက ၁၉၇၀ ဝန်းကျင်တွေတည်းက မျိုးဗီဇပြုပြင်မှုများ ပြုလုပ်နေပေမယ့် CRISPRလိုမျိုး နည်းပညာအသစ်တွေက ပိုမိုထိရောက်လွယ်ကူနိုင်စေမယ်လို့ ဘက်ဖလိုတက္ကသိုလ်မှ ဇီဝဗေဒပညာရှင် ဗင်းဆင့်လင့်ချ်က ပြောပါတယ်။

▪️ အာတိတ်ရေခဲခေတ်တုန်းက အမွှေးရှည်ဆင်များ အသက်ရှင်နိုင်စေတဲ့ အအေးဒဏ်ခံနိုင်ရည်စွမ်းလိုမျိုး ဗီဇပြောင်းလဲမှုများကြောင့် လက္ခဏာ ၂ မျိုးကို သိပ္ပံပညာရှင်များ ရွေးချယ်ခဲ့ကြပါတယ်။

▪️ ကြွက်တွေကို အရင်ဆုံးအာရုံစိုက်လုပ်ဆောင်မှာဖြစ်ပြီး ဒီနောက်မှာမှ အမွှေးရှည်ဆင်တွေနဲ့ အနီးစပ်ဆုံးဖြစ်တဲ့ အာရှဆင်တွေရဲ့ သန္ဓေတွေကို ပြုပြင်မှာဖြစ်တယ်လို့ Colossalကပြောပါတယ်။

▪️ မွန်တာနာတက္ကသိုလ်မှ ပရက်စ်တန်က အမွှေးရှည်ဆင်မျိုးကို ပြန်ခေါ်တာမျိုး မဟုတ်ဘဲ အာရှဆင်ကို ပြောင်းလဲတာသာ ဖြစ်နိုင်တယ်လို့ ဆိုပါတယ်။

▪️ ဒီလိုနည်းလမ်းများဖြင့် လူတွေမှာ ရောဂါတိုက်ဖျက်နိုင်ဖို့ အကူအညီဖြစ်စေနိုင်မယ်လို့ လမ်းက ပြောပါတယ်။

#Source: CBS News

#World_Health
Published 16 March 2025

▪️ ဆယ်ကျော်သက်တွေနဲ့ လူငယ်တွေမှာ ဖြစ်တတ်တဲ့ ဝက်ခြံက အရွယ်ရောက်ပြီး လူကြီးတွေမှာလည်း ဖြစ်တတ်ပါတယ်။

▪️ လူကြီးတွေမှာ ဝက်ခြံထွက်ရတဲ့ အကြောင်းအရင်းများစွာ ရှိပါတယ်။
- ဓမ္မတာစက်ဝန်းအချိန်၊ ကိုယ်ဝန်ဆောင်ချိန်စတဲ့ ဟော်မုန်းအပြောင်းအလဲကြောင့် ဖြစ်နိုင်ပါတယ်။

- စိတ်ဖိစီးမှု မထိန်းချုပ်နိုင်ခြင်းကြောင့် ဟော်မုန်းမညီမမျှဖြစ်ကာ အဆီပိုမိုထွက်စေပါတယ်။

- ဂလူးကို့စ်မြင့်မားတဲ့ အစားအစာတွေနဲ့ နို့ထွက်ပစ္စည်းတွေက ဝက်ခြံဖြစ်ပေါ်ခြင်းကို အားပေးပါတယ်။

- ကိုယ်ဝန်တားဆေးလိုမျိုး အချို့သောဆေးဝါးတွေက ဝက်ခြံကိုပိုဆိုးစေပါတယ်။

- အင်ဆူလင်ယဉ်ပါးခြင်းနဲ့ သိုင်းရွိုက်ရောဂါတို့လို ကျန်းမာရေးပြဿနာတွေက ဝက်ခြံဖြစ်စေနိုင်ပါတယ်။

▪️ လူကြီးတွေမှာထွက်တဲ့ ဝက်ခြံတွေကို ထိန်းသိမ်းနိုင်မယ့် နည်းလမ်းတွေထဲမှာ..

- Retinoids ၊ benzoyl peroxide ၊ salicylic acidနဲ့ ပဋိဇီဝဆေးတို့ကို လိမ်းဆေးအဖြစ် အသုံးပြုနိုင်ပြီး ကျွမ်းကျင်သူတွေနဲ့ အသင့်လျော်ဆုံးကို တိုင်ပင်သင့်ပါတယ်။

- ညီညွတ်မျှတစွာ စားသုံးခြင်း၊ စိတ်ပြေလျော့စေတဲ့ နည်းနာများဖြင့် ဖိစီးမှုကို ထိန်းချုပ်ခြင်း၊ အရေပြားထိန်းသိမ်းခြင်းစသဖြင့် အစားအသောက်နဲ့ နေထိုင်စားသောက်မှုပုံစံ ပြောင်းလဲခြင်းဖြင့် သက်သာစေနိုင်ပါတယ်။

- ရှားစောင်းလက်ပတ်ဂျယ်၊ နနွင်း၊ လက်ဖက်ပင်ဆီ၊ လက်ဖက်စိမ်းဆီတို့လို အိမ်တွင်းလိမ်းဆေးများက အရေပြားကို အထောက်အကူဖြစ်စေပါတယ်။

- ဓာတုကုထုံး၊ လေဆာကုထုံးစတဲ့ ဆေးဘက်ဆိုင်ရာ ကုသမှုတွေလည်း ရွေးချယ်နိုင်ပါတယ်။

▪️ ဝက်ခြံသက်သာစေတဲ့ နည်းလမ်းများစွာရှိပေမယ့် အကောင်းဆုံးက မိမိရဲ့ အရေပြားနဲ့ ဝက်ခြံပြင်းထန်မှုအပေါ် မူတည်ပါတယ်။

#Source: DoctorNDTV