#WorldForensics
Published 22 March 2022

အီရတ်နိုင်ငံမြောက်ပိုင်း မိုဆူလ်မြို့တွင် အစ္စလာမ်အကြမ်းဖက်အဖွဲ့ဝင်တိုက်ခိုက်ရေးသမား ၈၅ ဦးနဲ့ သူတို့ဆွေမျိုးသားချင်းတွေရဲ့အလောင်းများကိုစစ်ဆေးရန် အလောင်းမြှုပ်နှံထားရာနေရာမှ တူးဖော်ခဲ့ကြကြောင်း အီရတ်မှတာဝန်ရှိသူများက တနင်္ဂနွေနေ့က ပြောကြားလိုက်ပါတယ်။

#Yangon_Media_Group

Published 22 March 2022
တနင်္လာနေ့က တရုတ်နိုင်ငံ တောင်ပိုင်း ကွမ်ရှီးကျွမ်း ကိုယ်ပိုင်အုပ်ချုပ်ခွင့်ရဒေသ ဝူဇောင်းမြို့အနီး ပျက်ကျခဲ့တဲ့  တရုတ် အရှေ့ပိုင်းလေကြောင်းလိုင်း ခရီးစဉ်အမှတ် MU5735ရဲ့ လေယာဉ်အစိတ်အပိုင်းတွေကို မြေပြင်မှာ တွေ့ရှိရပါတယ်။

ကယ်ဆယ်ရေးလုပ်ငန်းတွေကို လေယာဉ်ပျက်ကျတဲ့ အဓိက နေရာမှာ ဆက်လက်ပြီးဆောင်ရွက်နေပြီး စုံစမ်းစစ်ဆေးမှုတွေကိုလည်း ပြုလုပ်နေပါတယ်။

ခရီးသည် ၁၂၃ဦးနှင့်လေယာဉ်အမှုထမ်း(၉)ဦး စုစုပေါင်း ၁၃၂ဦးတင်ဆောင်လာတဲ့ ခြောက်နှစ်သက်တမ်းရှိ အဲဒီတရုတ်အရှေ့ပိုင်းလေကြောင်းလိုင်း ဘိုအင်း၇၃၇-၈၀၀ လေယာဉ်ဟာ  တနင်္လာနေ့ မွန်းလွဲ ၂နာရီ ၃၈မိနစ်မှာ တောင်များအပေါ်ပျက်ကျခဲ့ပြီး သေဆုံးဒဏ်ရာရသူမသိရသေးပါ။ နှစ်ပေါင်း၁၈နှစ်အတွင်း ဒါဟာ ပထမဆုံးအကြိမ် ဆိုးရွားသောပျက်ကျမှုဖြစ်ပါတယ်။လေယာဉ်ဟာ ကူမင်းလေဆိပ်ကနေ မွန်းလွဲ၁နာရီ၁၅မိနစ်မှာ ပျံတက်ခဲ့တာဖြစ်ပြီး ကွမ်ကျိုးကို ဦးတည်ပျံသန်းခဲ့တာဖြစ်ပါတယ်။

Source CMG

#DailyNews
Published - 22 Mar 2022

၁။ ငါးဖမ်းရာမှတွေ့ရှိသော နှစ်ပေါင်းထောင်ကျော်သက်တမ်းရှိနိုင်မည့် ရှေးဟောင်းစတူပါအား သက်ဆိုင်ရာက သွားရောက်စစ်ဆေးမည်

၂။ ဗဟိုမဏ္ဍပ် မဟာသင်္ကြန် ရေသဘင်ပွဲတော်အတွက်သာ စီစဉ်နေပြီး ပုဂ္ဂလိကမဏ္ဍပ်များကိစ္စ စည်ပင်ညွှန်ကြားချက်မရှိသေး

၃။ မိုးလေဝသ သတင်း

၄။ အီရတ်တွင် အစ္စလာမ်အကြမ်းဖက်အဖွဲ့ဝင်များ၏အလောင်းများ အစုလိုက်အပြုံလိုက်မြှုပ်နှံထားရာနေရာ တူးဖော်တွေ့ရှိ......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#WorldPolitics
Published 22 March 2022

အမေရိကန်သမ္မတ'ဂျိုးဘိုင်ဒန်'က ရုရှားသမ္မတ'ဗလာဒီမီယာပူတင်'ကို စစ်ရာဇဝတ်ကောင်လို့ ခေါ်ဝေါ်သမုတ်ခဲ့ရာ 'ဘိုင်ဒန်'ရဲ့ပြောကြားချက်က နှစ်နိုင်ငံဆက်ဆံရေးပျက်စီးစေတဲ့ သဘောသက်ရောက်နေကြောင်း ရုရှားတို့က အမေရိကန်သံအမတ်ကို တနင်္လာနေ့က သတိပေးအကြောင်းကြားခဲ့ကြပါတယ်။

"အမေရိကန်သမ္မတလို နိုင်ငံတော်အကြီးအကဲတစ်ယောက်ရဲ့ မဆင်မခြင်ပြောကြားချက်တွေကြောင့် ရုရှား-အမေရိကန်ဆက်ဆံရေးဟာ ပျက်စီးလုနီးပါးဖြစ်နေပါပြီ" လို့ နိုင်ငံခြားရေးဝန်ကြီးက ထုတ်ပြန်ဖော်ပြထားပါတယ်။

ရုရှားရဲ့မကျေနပ်ကြောင်းသဘောထားထုတ်ပြန်ချက်ကို အမေရိကန်သံအမတ်'ဂျွန်ဆာလီဗန်'ထံ တရားဝင်စာထုတ်ပြန်ပေးပို့ခဲ့တာဖြစ်ပြီး 'ဘိုင်ဒန်'ရဲ့ပြောဆိုချက်တွေက လက်ခံနိုင်စရာမရှိဘူးလို့ ဖော်ပြထားပါတယ်။

ရုရှားအပေါ် ရန်လိုတဲ့သဘောထားပြုမူမှုတွေကို ပြတ်ပြတ်သားသားတုန့်ပြန်သွားမှာဖြစ်တယ်လို့ သတိပေးထားပါတယ်။

ယူကရိန်းနိုင်ငံကို စစ်အင်အားသောင်းဂဏန်းဖြင့် ရုရှားတို့က ဝင်ရောက်ကျူးကျော်ခဲ့တာကြောင့် ပြီးခဲ့တဲ့အပတ်က 'ပူတင်'ကို စစ်ရာဇဝတ်တရားခံလို့ 'ဘိုင်ဒန်'ကသတ်မှတ်ပြောကြားခဲ့ပါတယ်။

ဝါရှင်တန်ရှိ နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ'နက်ဒ်ပရိုက်စ်'က "ရုရှားတို့က သူတို့ဘာသာ အကြောင်းပြချက်တွေဖန်တီးပြီး ကျူးကျော်ဖို့စီစဉ်ခဲ့တာပါ။ ယူကရိန်းအပေါ် တရားမျှတမှုမရှိဘဲ အကြောင်းမဲ့သက်သက်တိုက်ခိုက်ခဲ့ကြပါတယ်။ ယူကရိန်းအရပ်သားတွေကိုလည်း ခွဲခြားသတ်မှတ်ခြင်းမရှိဘဲ ရည်ရွယ်ချက်ရှိရှိ ပစ်မှတ်ထားတိုက်ခိုက်နေတဲ့ အထောက်အထားတွေ အတိုင်းသားမြင်တွေ့နေရပါတယ်" လို့ ပြောကြားသွားပါတယ်။

ပြီးခဲ့တဲ့အပတ်က 'ဘိုင်ဒန်'ကလည်း "ယူကရိန်းဟာ အပြစ်မဲ့အိမ်နီးချင်းနိုင်ငံဖြစ်တဲ့အပြင် ရုရှားကိုလည်း ဘာခြိမ်းခြောက်မှုမှလုပ်နေတာမဟုတ်ပါဘူး။ အဲဒါကို ရုရှားတို့က ရက်ရက်စက်စက်တိုက်ခိုက်ခဲ့ကြတယ်" လို့ မှတ်ချက်ပြုသွားပါတယ်။

ယခုလို ပဋိပက္ခတွေဖြစ်နေတဲ့အချိန်မှာ အဆက်အသွယ်မပြတ်ဖို့အရေးကြီးကြောင်း ပြောကြားလိုက်ပါတယ်။

အမေရိကန်သံတမန်တွေအနေနဲ့ ရုရှားမှာထိန်းသိမ်းခံထားရတဲ့ အမေရိကန်လူမျိုးတွေနဲ့ တွေ့ဆုံဆက်သွယ်ခွင့်မရကြောင်းကိုလည်း 'ဆာလီဗန်'က ထောက်ပြပြောဆိုခဲ့ပါတယ်။

ထိုအမေရိကန်လူမျိုးတွေထဲမှာ နာမည်ကျော်ဘတ်စ်ကတ်ဘောအားကစားမယ် 'ဘရစ်တနီဂရိုင်နာ'လည်းပါဝင်ကာ ဖေဖော်ဝါရီ ၁၇ ရက်နေ့က မော်စကိုလေဆိပ်မှာ သူ့ရဲ့လက်ဆွဲအိတ်ထဲက ဆေးခြောက်တွေပါဝင်တဲ့ Vape တွေ သယ်ဆောင်လာတာကို တွေ့ရှိခဲ့တာကြောင့် ထိန်းသိမ်းခံခဲ့ရပါတယ်။

နောက်ထပ်အမေရိကန် ၂ ယောက်ဖြစ်တဲ့ 'ပေါလ်ဝယ်လန်'နဲ့ 'ထရေဗာရိဒ်'တို့ကိုလည်း လုပ်ကြံစွပ်စွဲထားကြတယ်လို့ ဝါရှင်တန်ကဖော်ပြထားပါတယ်။

"သူတို့တွေနဲ့ ဆက်သွယ်ခွင့်မရတာ လနဲ့ချီနေပါပြီ။ ဒါလုံးဝလက်ခံနိုင်စရာမရှိပါဘူး" လို့ 'ပရိုက်စ်'ကဆိုပါတယ်။

Source: AFP
#Yangon_Media_Group

#WorldHealth
Published - 22 March 2022
အိုမီခရွန်နဲ့ အခြားမျိုးဗီဇကွဲတွေအား ကာကွယ်နိုင်မယ့် ကိုဗစ်ရောဂါကာကွယ်ဆေးတွေကို တရုတ်နိုင်ငံမှ ကာကွယ်ဆေးထုတ်လုပ်သူများက အဆင့်မြှင့်တင်ထုတ်လုပ်နေပြီဖြစ်ကြောင်း တာဝန်ရှိသူများကပြောကြားခဲ့ပါတယ်။

ဒါပေမဲ့ အပြီးသတ်ထုတ်လုပ်ခြင်းမပြုခင် ဘေးကင်းစိတ်ချရမှုရှိ/မရှိ စမ်းသပ်စစ်ဆေးသွားမှာဖြစ်ပါတယ်။ တရုတ်မှာအသုံးအများဆုံးကာကွယ်ဆေးတွေဟာ ဓာတ်ခွဲခန်းထုတ်သက်မဲ့ဗိုင်းရပ်စ်ဖြင့် ထုတ်လုပ်ထားတဲ့ကိုဗစ်ကာကွယ်ဆေးတွေဖြစ်ပြီး အိုမီခရွန်နဲ့ ဒယ်လ်တာအပါအဝင် မျိုးဗီဇကွဲ ၃ မျိုးအထိ ကာကွယ်ပေးနိုင်မယ့်ဆေးအဖြစ် ပြောင်းလဲစမ်းသပ်ထုတ်လုပ်နေတာဖြစ်ကြောင်း နိုင်ငံတော်ကျန်းမာရေးကော်မရှင်မှ ကိုဗစ်ကာကွယ်ဆေးထုတ်လုပ်မှုအပိုင်းကြီးကြပ်ရေးမှူး 'ကျန်ကျောင်းဝေ'က ပြောကြားလိုက်ပါတယ်။

မျိုးဗီဇကွဲ ၄ မျိုးကို ကာကွယ်နိုင်မယ့် ပရိုတိန်းအခြေပြုနောက်ထပ်ကာကွယ်ဆေးတစ်မျိုးကိုလည်း နိုင်ငံရပ်ခြားမှလူတွေနဲ့စမ်းသပ်ဖို့ ခွင့်ပြုချက်တောင်းခံထားပြီဖြစ်ပါတယ်။
အားလုံးက အိုမီခရွန်ကာကွယ်ဆေးအသုံးပြုချင်နေကြတယ်ဆိုတာ သိရှိနားလည်ထားကြောင်း၊ အိုမီခရွန်ကာကွယ်ဆေးထုတ်လုပ်ဖို့ အရှိန်မြှင့်ဆောင်ရွက်လျက်ရှိပြီး ဘေးကင်းစိတ်ချရဖို့ က ပထမဦးစားပေးဖြစ်ကြောင်း စနေနေ့က ပေကျင်းမှာပြုလုပ်တဲ့မီဒီယာရှင်းလင်းပွဲမှာ 'ကျန်ကျောင်းဝေ'က ပြောကြားခဲ့ပါတယ်။

လက်ရှိကာကွယ်ဆေးတွေရဲ့ ရောဂါခုခံနိုင်စွမ်းကို အိုမီခရွန်ကကျော်ဖြတ်နိုင်တယ်ဆိုတာ အချို့ တဝက်လောက်သာဖြစ်ပြီး ကိုဗစ်ကာကွယ်ဆေးအပြည့်ထိုးနှံခြင်းဖြင့် ဆေးရုံတက်ကုသခံယူရမှု၊ ရောဂါပြင်းထန်လာမှုနဲ့ အသက်သေဆုံးမှုတို့ ကို ထိထိရောက်ရောက်ကာကွယ်ပေးနိုင်ဆဲဖြစ်ကြောင်း၊ အားမြှင့်ကာကွယ်ဆေး(booster)ထိုးနှံပါက ရောဂါကူးစက်နိုင်ချေကို ပိုပြီးလျှော့ချပေးနိုင်ကြောင်း ရှင်းပြသွားပါတယ်။

အစောပိုင်းစမ်းသပ်ချက်များအရ တရုတ်ကုမ္ပဏီထုတ် ဆိုင်နိုဗက်နဲ့ ဆိုင်နိုဖန်တို့ လို သက်မဲ့ဗိုင်းရပ်စ်အခြေပြုကာကွယ်ဆေးတွေဟာ mRNA ကာကွယ်ဆေးအမျိုးအစားတွေဖြစ်တဲ့ ဖိုင်ဇာနဲ့ မိုဒါနာတို့ လောက် အိုမီခရွန်ကာကွယ်နိုင်စွမ်းမရှိဘူးလို့ တွေ့ရှိထားပါတယ်။

ဒါကြောင့် သက်မဲ့ဗိုင်းရပ်စ်အခြေပြုကာကွယ်ဆေးထိုးထားတဲ့သူတွေမှာ ဒီထက်ကာကွယ်နိုင်စွမ်းပိုကောင်းတဲ့ အားမြှင့်ကာကွယ်ဆေးအမျိုးအစားများထိုးနှံဖို့ သုတေသီများကအကြံပြုထားပါတယ်။

တရုတ်နိုင်ငံမှာ သက်မဲ့ဗိုင်းရပ်စ်ကာကွယ်ဆေးထိုးထားတဲ့သူတွေကို မတူညီတဲ့အားမြှင့်ကာကွယ်ဆေးအမျိုးအစားထိုးနှံဖို့ ခွင့်ပြုထားပါတယ်။ တရုတ်မှာပင် mRNA ကာကွယ်ဆေးအမျိုးအစားထုတ်လုပ်လျက်ရှိပြီး အမျိုးမျိုးသောကာကွယ်ဆေးတွေကို ရောစပ်ထိုးနှံခြင်းက အိုမီခရွန်ကိုဘယ်လောက်အထိ ကာကွယ်နိုင်လဲဆိုတဲ့အချက်အလက်တွေကို စုဆောင်းထားပါတယ်။

တရုတ်နိုင်ငံရှိလူဦးရေ ၁.၄ ဘီလီယံရဲ့ ၉၀ ရာခိုင်နှုန်းနီးပါးဟာ ကိုဗစ်ကာကွယ်ဆေးအပြည့်ထိုးနှံပြီးသားဖြစ်ပါတယ်။ ရောဂါကူးစက်ခံရသူ ၉၅ ရာခိုင်နှုန်းဟာလည်း ရောဂါအပျော့စားနဲ့ လက္ခဏာမပြသူများဖြစ်ပါတယ်။

ကိုဗစ်ရောဂါကူးစက်ခံရပြီး သေဆုံးခဲ့သူ ၂ ဦးဟာ အသက် ၆၀ ကျော်တွေဖြစ်ပြီး တစ်ယောက်က ကာကွယ်ဆေးမထိုးထားပါဘူး။ အဆိုပါ ၂ ယောက်စလုံးမှာ ကိုဗစ်ရောဂါအခြေအနေပြင်းထန်ခြင်းမရှိပေမယ့် အခြားရောဂါအခံတွေကြောင့် သေဆုံးရတာဖြစ်ကြောင်း တာဝန်ရှိသူများပြောကြားခဲ့ပါတယ်။

ဟောင်ကောင်မှာ ကိုဗစ်ကြောင့်သေဆုံးသူတွေထဲက ၉၀ ရာခိုင်နှုန်းကျော်က သက်ကြီးရွယ်အိုတွေဖြစ်ကာ ကိုဗစ်ကာကွယ်ဆေးမထိုးထားတဲ့သူတွေက ကာကွယ်ဆေးထိုးထားတဲ့သူတွေထက် အသက်သေဆုံးနိုင်ချေ အဆ ၃၀ ကျော်ပိုများပါတယ်။

Source: Bloomberg

#WorldHealth
Published - 22 March 2022
ကိုရိုနာဗိုင်းရပ်စ်ရဲ့ အိုမီခရွန်မျိုးဗီဇကွဲကူးစက်ခြင်းဖြင့် ကလေးငယ်များမှာ အသက်ရှူလမ်းကြောင်းဆိုင်ရာအန္တရာယ်ဖြစ်တဲ့ လည်ချောင်းရောင်ရမ်းခြင်းလက္ခဏာအဖြစ်များလာကြောင်း လေ့လာချက်အသစ်မှာဖော်ပြထားပါတယ်။

ဗိုင်းရပ်ကူးစက်ခြင်းဖြင့် အသက်ရှူလမ်းကြောင်းမှာ ရောင်ရမ်းလာပြီး အသက်ရှူရခက်ခဲတဲ့အခြေအနေဖြစ်လာနိုင်ပါတယ်။ အဲဒီနောက်အသက်ရှူတဲ့အခါမှာ စူးရှရှအသံမျိုးထွက်လာပြီး ချောင်းဆိုးသံကျယ်လာတတ်ပါတယ်။

ဘော့စ်တွန်ကလေးဆေးရုံမှ အရေးပေါ်ဆရာဝန်တွေက ကပ်ရောဂါစတင်တဲ့အချိန်ကနေ ၂၀၂၂ ဇန်နဝါရီလလယ်မတိုင်ခင်အထိ လည်ချောင်းရောင်ရမ်းခြင်းဖြစ်ပွားခဲ့တဲ့ ကလေးငယ် ၇၅ ယောက်ကို ကုသပေးခဲ့ပါတယ်။

ဒီကလေးတွေထဲက ၈၀ ရာခိုင်နှုန်းဟာ ၂၀၂၁ ဒီဇင်ဘာလအတွင်း အိုမီခရွန်စတင်ပျံ့ပွားပြီးနောက်ပိုင်းမှာ ဖြစ်ပွားခဲ့ကြတာဖြစ်ကြောင်း ကလေးအထူးကုဌာနများထံ အကြောင်းကြားခဲ့ကြပါတယ်။

ကလေးအများစုကို စတီးရွိုက်များဖြင့်ကုသပေးခဲ့ပြီး အိမ်ပြန်လွှတ်ပေးခဲ့ပေမယ့် အချို့ကလေးတွေကိုတော့ ဆေးရုံတက်ကုသမှုပေးခဲ့ရပါတယ်။ ယေဘုယျ ခြုံကြည့်လိုက်ရင် အခြားဗိုင်းရပ်စ်ပိုးများကြောင့် လည်ချောင်းရောင်ရမ်းခြင်းထက် ကိုရိုနာဗိုင်းရပ်စ်ကြောင့် လည်ချောင်းရောင်ရမ်းရတဲ့ကလေးတွေကို ဆေးကုသမှုများပိုမိုဆောင်ရွက်ပေးခဲ့ရကြောင်း ဆရာဝန်များသိရှိခဲ့ရပါတယ်။

အိုမီခရွန်စတင်ပျံ့ပွားလာတဲ့အချိန်မှာ လည်ချောင်းရောင်ရမ်းခြင်းဖြစ်ပွားခဲ့တဲ့လူနာတွေ စတင်များပြားလာတာကို ထင်ထင်ရှားရှားတွေ့မြင်ရပါတယ်လို့ ဦးဆောင်သုတေသနပြုလုပ်တဲ့ ဒေါက်တာ'ရိုင်ယန်ဘရူစတာ'က ဖော်ပြခဲ့ပါတယ်။

အခြားဗိုင်းရပ်စ်တွေကြောင့်လည်း လည်ချောင်းရောင်ရမ်းခြင်းဖြစ်တတ်ပေမယ့် ကလေးငယ်တွေမှာ အဲဒီလိုလက္ခဏာရှိပြီဆိုရင် ကိုဗစ်ရောဂါကူးစက်တာမျိုးဖြစ်နိုင်ချေရှိတာကို မိဘများသတိပြုမိဖို့ လိုအပ်ပြီး မိသားစုဝင်တွေလည်း ရောဂါပိုးစစ်ဆေးသင့်ပါတယ်လို့ သုတေသီများက အကြံပြုထားပါတယ်။

Source: Reuters