#WorldMilitary
Published 27 May 2022
အမေရိကန်နဲ့ မဟာမိတ်နိုင်ငံများက ယူကရိန်းကို ခေတ်မီလက်နက်များဖြင့် အရှိန်မြှင့်ထောက်ပံ့လျက်ရှိရာ အဆိုပါလက်နက်များအသုံးပြုပြီး ရုရှားအချက်အခြာနေရာများကို တိုက်ခိုက်ခဲ့ပါက တင်းမာမှုမြင့်တက်လာနိုင်တဲ့ အန္တရာယ်နဲ့ပတ်သက်ပြီး ယူကရိန်းနဲ့ဆွေးနွေးတိုင်ပင်ခဲ့ကြောင်း အမေရိကန်သံတမန်အရာရှိများက ရိုက်တာသတင်းဌာနကို ပြောကြားခဲ့ပါတယ်။
ထိုဆွေးနွေးမှုထဲမှာ ယူကရိန်းကိုထောက်ပံ့ပေးထားတဲ့ လက်နက်တွေရဲ့ နယ်မြေကန့်သတ်ထိန်းချုပ်ချက်တွေကို အတိအလင်းမဖော်ပြခဲ့ကြပါဘူး။
ဒါပေမဲ့ ဖြစ်ပေါ်လာနိုင်တဲ့ နိုင်ငံရေးတင်းမာမှုအန္တရာယ်တွေအကြောင်း နှစ်ဖက်စလုံးမှသိရှိနားလည်ခဲ့ကြတယ်လို့ အမေရိကန်အရာရှိ ၃ ဦးနဲ့ သံတမန်ရေးရာ သတင်းအရင်းအမြစ်များအရ သိရှိရပါတယ်။
“တင်းမာမှုမြင့်တက်လာနိုင်တာကို သိထားပေမယ့် ကျွန်တော်တို့ထောက်ပံ့ထားတဲ့လက်နက်တွေနဲ့ပတ်သက်ပြီး အရမ်းကြီးထိန်းချုပ်ကန့်သတ်တာမျိုး မလုပ်ချင်ပါဘူး” လို့ အရာရှိတစ်ဦးကဆိုခဲ့ပါတယ်။
ယူကရိန်းက ရုရှားတပ်ဖွဲ့တွေနဲ့တိုက်ခိုက်ရာမှာ အမေရိကန်ထောက်လှမ်းရေးအရာရှိများမျှော်လင့်ထားတာထက် ပိုမိုအောင်မြင်နေတာကြောင့် အမေရိကန်အုပ်ချုပ်ရေးအဖွဲ့နဲ့ မဟာမိတ်နိုင်ငံများက M777 ဟောင်ဝစ်ဇာများအပါအဝင် အကွာအဝေးပိုရောက်တဲ့ တာဝေးပစ်လက်နက်များ ထောက်ပံ့ဖို့ဆန္ဒရှိနေကြပါတယ်။
ယူကရိန်းရဲ့ပစ်ခတ်နိုင်စွမ်းမြင့်မားလာစေမယ့် ဟာပွန်းသင်္ဘောဖျက်ဒုံးကျည်များကို ဒိန်းမတ်ကထောက်ပံ့မယ်လို့ ပင်တဂွန်က ပြီးခဲ့တဲ့အပတ်က ကြေညာခဲ့ပါတယ်။
အစကတော့ အဆမတန်စစ်အင်အားကြီးမားတဲ့ရုရှားက ယူကရိန်းကိုအသာရသွားမယ်လို့ ခန့်မှန်းခဲ့ကြပေမယ့် လတ်တလောမှာ ယူကရိန်းကစစ်ပွဲအနိုင်ရနိုင်မယ်လို့ မျှော်လင့်လာနိုင်တာကြောင့် လက်နက်တပ်ဆင်ပေးချင်နေတာဖြစ်ပါတယ်။
ကီလိုမီတာရာကျော်လောက်အထိ ပစ်ခွင်းနိုင်မယ့် M142 HIMARS လက်နက်မျိုးကိုပါ အမေရိကန်အစိုးရအဖွဲ့က ထောက်ပံ့ပေးဖို့စဉ်းစားနေပါတယ်။
ဒါပေမဲ့တင်းမာမှုမြင့်တက်လာနိုင်တဲ့ အခြေအနေကိုလည်း အမေရိကန်ထောက်လှမ်းရေးများက သတိပေးလိုက်ပါတယ်။
အမေရိကန်က ရုရှားကိုတိုက်ရိုက်တိုက်ခိုက်တာမျိုး မလုပ်ပေမယ့် ပင်တဂွန်မှတပ်မှူးများက ယူကရိန်းခေါင်းဆောင်များနဲ့ ဆက်သွယ်ချိတ်ဆက်ကာ မြေပြင်နဲ့ရေပြင်တို့ရှိ ရုရှားတပ်များအား ပစ်မှတ်ထားနိုင်အောင် အရေးကြီးတဲ့ထောက်လှမ်းမှုများကို ပေးပို့ပေးနေပါတယ်။
အနောက်နိုင်ငံကလက်နက်သုံးစွဲမှု ကန့်သတ်ချက်ကိုလည်း နှစ်ဖက်စလုံးမှနားလည်သိရှိထားကြောင်း အမေရိကန်အရာရှိတစ်ဦးကဆိုပါတယ်။
ရုရှားပိုင်နယ်မြေများကိုပစ်ခတ်နိုင်တဲ့လက်နက်တွေနဲ့ ယူကရိန်းကိုထောက်ပံ့နေမယ်ဆိုရင် တင်းမာမှုများ မြင့်တက်လာလိမ့်မယ်လို့ ရုရှားနိုင်ငံခြားရေးဝန်ကြီး’ဆာဂျီလက်ဗ်ရော့ဗ်’က ကြာသပတေးနေ့က ဝက်ဘ်ဆိုက်မှာ ဖော်ပြခဲ့ပါတယ်။
Source: Reuters
#Yangon_Media_Group
Published 27 May 2022
ကိုးရီးယားရဲ့ K-pop ကြယ်ပွင့်တွေဖြစ်တဲ့ BTS ဟာ လာမယ့်အပတ်ထဲ အမေရိကန်ပြည်ထောင်စု အိမ်ဖြူတော်ကို လာရောက်ပြီး သမ္မတ ဂျိုးဘိုင်ဒင်နှင့်တွေ့ဆုံဖို့ရှိတယ်လို့ ကြာသပတေးနေ့က အိမ်ဖြူတော်က သတင်းထုတ်ပြန်ခဲ့ပါတယ်။
သူတို့အဖွဲ့ဟာ အာရှသားတွေနှင့် နွယ်ဖွားတွေကို ဦးတည်နေတဲ့ ရာဇဝတ်မှုခင်းတွေ ပြဿနာကို ဘိုင်ဒင်ထံ တင်ပြကြမယ်လို့ သိရပါတယ်။
ဘိုင်ဒင်ဟာ လာမယ့်အင်္ဂါနေ့မှာ BTS အဖွဲ့ကို လက်ခံတွေ့ဆုံပြီး ပြီးခဲ့တဲ့နှစ်များအတွင်း ပိုပြီးသိသာထင်ရှားလာတဲ့ အာရှကို မုန်းတီးတဲ့ ရာဇဝတ်မှုခင်းတွေနှင့် ခွဲခြားဆက်ဆံမှုတွေကို ဖြေရှင်းရာမှာ အာရှသားတွေ ကိုယ်စားပြုပါဝင်ရေး ဆွေးနွေးမယ်လို့ သတင်းထုတ်ပြန်ချက်ကဆိုပါတယ်။
အဖွဲ့ဝင်(၇)ဦးပါဝင်တဲ့ တောင်ကိုးရီးယား ယောကျ်ားလေးတေးဂီတဝိုင်းဟာ သူတို့ရဲ့ ရွှင်မြူးတဲ့သီချင်းတွေနှင့် အကတွေကြောင့် တစ်ကမ္ဘာလုံးမှာ သစ္စာရှိတဲ့ ပရိဿတ်ထုကြီးတစ်ခုရရှိထားပါတယ်။ ဖေဖော်ဝါရီလတုန်းကလည်း IFPI ရဲ့ ကမ္ဘာ့တေးသံသွင်းအနုပညာရှင်ဆုကို (၂)နှစ်ဆက်တိုက်ရရှိထားတဲ့ အဖွဲ့လည်းဖြစ်ပါတယ်။
K-pop ကြယ်ပွင့်တွေဖြစ်တဲ့ သူတို့အဖွဲ့ BTS ကို ၂၀၁၃ခုနှစ်ကတည်းက လူငယ်တွေကို လုပ်ပိုင်ခွင့်ပေးဖို့ရည်ရွယ်တဲ့ တေးစာသားတွေကို အသုံးပြုပြီး လူမှုလှုံဆော်မှုတွေလုပ်ခဲ့သူတွေအဖြစ်နှင့်လည်း သိကြပါတယ်။
“ ဘိုင်ဒင်နှင့် BTS တို့ဟာ ကွဲပြားခြားနားမှုနှင့်အာလုံးပါဝင်ဖို့၊ပြီးတော့ ကမ္ဘာတစ်လွှားမှာ မျှော်လင့်ယုံကြည်ချက်တွေနှင့် အကောင်းမြင်မှုတွေကို ပျံ့နှံ့စေဖို့ လူငယ်သံအမတ်တွေအဖြစ် BTSရဲ့ ပလက်ဖောင်းကို သုံးဖို့ ကိစ္စတွေကိုလည်း ဆွေးနွေးကြမှာဖြစ်တယ်လို့ အိမ်ဖြူတော် သတင်းထုတ်ပြန်ချက်မှာ ဖော်ပြထားပါတယ်။
Source:Insider
Published 27 May 2022
တက္ကဆပ် မူလတန်းကျောင်း အစုလိုက်အသတ်ခံနေရစဉ်အတွင်း တပည့်တွေကို ကာကွယ်ပေးရင်း အသက်ဆုံးရှုံးခဲ့ရတဲ့ သူရဲကောင်း စတုတ္ထတန်းဆရာမရဲ့ ခင်ပွန်းသည်ဟာ ရုတ်တရက်သေဆုံးသွားကြောင်း မိသားစုဝင်တွေကပြောပါတယ်။ သူ သေဆုံးရတာဟာဘနှလုံးဖောက်ပြန်ပြီးသေဆုံးရတာဖြစ်နိုင်ဖွယ်ရှိပါတယ်။
ဂျိုးဂါရှာဟာ အထက်တန်းကျောင်းတုန်းကတည်းငယ်ရည်းစား ဖြစ်ခဲ့တဲ့ သူ့ဇနီး အိုင်မာဂါရှာရဲ့ အသုဘအခမ်းအနားအတွက် မေ ၂၆ ရက် ကြာသပတေးနေ့က ပြင်ဆင်နေစဉ် ရုတ်တရက်လဲကျသေဆုံးသွားခဲ့တာဖြစ်ပါတယ်လို့ နယူးယောက်တိုင်းမ်စ်က ရေးပါတယ်။
ဆရာမအိုင်မာဂါရှားရဲ့ ညီအစ်မဝမ်းကွဲတော်သူ ဒီဘရာအော်စတင်က သူမထောင်ထားတဲ့ GoFundMe ပေ့ချ်ကနေ “ အရေးပေါ်ကျန်းမာရေးအခြေအနေကြောင့် အိုင်မာရဲ့ ခင်ပွန်းဂျိုးဟာ ဒီမနက်မှာကွယ်လွန်သွားခဲ့ပါပြီ” လို့ ရေးတင်ခဲ့တာပါ။
“ ဂျိုးဟာသူ့ဘဝမှာ ချစ်သူကိုဆုံးရှုံးခဲ့ရလို့ ရင်ကွဲနာကျပြီး သေဆုံးခဲ့တယ်လို့ ကျွန်မထင်ပါတယ်” လို့ သူမက ဖြည့်စွက်ပြောပါတယ်။
ဂါရှားရဲ့ တူဖြစ်သူ ဂျွံန် မာတင်နေ့ဇ်ကလည်း “ ကျွန်တော့် အဒေါ်ရဲ့ခင်ပွန်း ဂျိုးဂါရှာဟာ ပူဆွေးသောကကြောင့် ကွယ်လွန်ခဲ့ပါပြီ” လို့ တွစ်တာမှာရေးပါတယ်။
သူဟာ သူ့ဇနီးအိုင်မာဂါရှားရဲ့ အသုဘအတွက် လွမ်းသူ့ပန်းတွေ သွားပို့ပြီး အိမ်ပြန်အရောက်မှာ နသေဆုံးခဲ့ရတာ လို့ သူက ပြောပါတယ်။
သူတို့လင်မယားဟာ လက်ထပ်ခဲ့တာ ၂၄နှစ်ရှိပြီလို့ ရော့ဘ်မူလတန်းကျောင်း ဝက်ဘ်ဆိုက်မှာဖော်ပြထားပါတယ်။ သူတို့မှာ သားသမီး(၄)ဦးကျန်ရစ်ခဲ့ပါတယ်။
Source CNA
#WorldHealth
Published 27 May 2022
အဝလွန်တဲ့အမျိုးသားများ ကိုယ်အလေးချိန်လျော့ကျလာတဲ့အခါ သုတ်ပိုးကောင်ရေနှစ်ဆမျှများပြားလာကြောင်း သုတေသီများတွေ့ရှိခဲ့ပါတယ်။
ဒိန်းမတ်သိပ္ပံပညာရှင်တွေက အမျိုးသား ၅၆ ယောက်ကို လေ့လာခဲ့ရာမှာ အခုလိုအံ့ဩဖွယ်ရာရလာဒ်တွေ့ရှိခဲ့တာဖြစ်ပါတယ်။
စမ်းသပ်ခံသူအားလုံးကို အချိန် ၈ ပတ်ကြာ အစားအသောက်ထိန်းသိမ်းကျွေးမွေးခဲ့ပြီး တစ်နေ့ကို ၈၀၀ ကယ်လိုရီလောက်သာ စားသုံးစေခဲ့ပါတယ်။
စမ်းသပ်မှုမပြုလုပ်ခင် BMI အတိုင်းအတာအနည်းဆုံး ၃၂ ရှိတဲ့အမျိုးသားတွေဟာ ပျမ်းမျှ ၈ ပေါင်ခန့်အလေးချိန်လျော့ကျခဲ့ပြီး သူတို့ရဲ့သုတ်ပိုးကောင်ရေ ၄၁ ရာခိုင်နှုန်းပိုများလာခဲ့ပါတယ်။
တစ်နှစ်တာလောက်အထိ ကိုယ်အလေးချိန်လျော့ကျအောင် ထိန်းသိမ်းတဲ့လူတွေမှာ သုတ်ကောင်ရေနှစ်ဆနီးပါး များပြားလာပြီး ရေကူးသမားတွေဆီက ပမာဏလောက်အထိ ရှိနေတာဖြစ်ပါတယ်။
ဒါပေမဲ့ ဝမ်းဗိုက်အဆီပြန်ထွက်လာသူတွေကတော့ သုတ်ရည်အရည်အသွေးတိုးတက်မှု မရှိတော့ပါဘူး။
သုတ်ကောင်ရေထွက်ရှိမှုက အသက်အရွယ်ကြီးတာနဲ့အမျှကျဆင်းလာပြီး အသက် ၁၇ နှစ်ကစလို့ အသက် ၄၀ အတွင်း အမြင့်ဆုံးရှိတတ်ပါတယ်။
ပုံမှန်သုတ်ပိုးအရေအတွက်က သုတ်ရည် ၁ မီလီလီတာမှာ သုတ်ကောင်ရေ ၁၅ သန်းနဲ့အထက်ပါဝင်တာကို ဆိုလိုပါတယ်။
၁၉၇၀ နောက်ပိုင်း အမျိုးသားတွေမှာ သုတ်ပိုးအရေအတွက် ကျဆင်းလာကြကြောင်း ဥရောပ၊ မြောက်အမေရိက၊ ဩစတြေးလျတို့မှာ လေ့လာခဲ့ကြပါတယ်။
ခါးဗိုက်တုတ်ခြင်း၊ အစားအသောက်အဟာရဓာတ်မညီမျှခြင်း၊ ပတ်ဝန်းကျင်ညစ်ညမ်းလာခြင်းတို့က အဓိကစိုးရိမ်စရာ ဖြစ်လာပါတယ်။
အခုစမ်းသပ်မှုမှ စမ်းသပ်ခံသူတွေကို ကယ်လိုရီနည်းတဲ့အစားအသောက်တွေထုတ်လုပ်တဲ့ ကိမ်းဘရစ်ချ်မှ ကိုယ်အလေးချိန်လျှော့ချတဲ့အစီအစဉ်အတိုင်း စားသုံးစေခဲ့ပါတယ်။
ဦးဆောင်လေ့လာတဲ့ ပရော်ဖက်ဆာ'ဆစ်ဂ်နီတိုရီကော့ဗ်'က ဝိတ်ကျလာတဲ့အခါ သုတ်ပိုးအရည်အသွေး တိုးတက်လာတာက အံ့ဩစရာကောင်းတဲ့ တိုးတက်မှုဖြစ်တယ်လို့ ဆိုပါတယ်။
၂၀၁၉ ခုနှစ်က NHS ရဲ့အချက်အလက်တွေအရ အင်္ဂလန်မှာ ကိုယ်အလေးချိန်များသူ ၄၁ ရာခိုင်နှုန်းရှိပြီး အဝလွန်သူ ၂၇ ရာခိုင်နှုန်းရှိခဲ့ကာ အမေရိကန်နဲ့တူညီနေပါတယ်။
ယူကေမှာ ကိုယ်ဝန်မရတဲ့စုံတွဲတွေ ၃ ပုံ ၁ ပုံလောက်မှာ သုတ်ပိုးအကောင်ရေနည်းခြင်းက အဓိကပြဿနာ ဖြစ်နေပါတယ်။
အဝလွန်သူတွေမှာ ကျားဟော်မုန်းဖြစ်တဲ့ တက်စ်တိုစတီရုန်းပမာဏနည်းပါးခြင်းကြောင့် သုတ်ပိုးထုတ်လုပ်နိုင်စွမ်းလျော့နည်းသွားတာ ဖြစ်ပါတယ်။
အစောပိုင်းက အူတာတက္ကသိုလ်မှသိပ္ပံပညာရှင်များ လေ့လာရာမှာ အသက် ၆၀ ဝန်းကျင်ရှိ ကိုယ်အလေးချိန်များတဲ့ အမျိုးသားတွေဟာ ထိုအသက်အရွယ်တွေထဲက ကိုယ်အလေးချိန်နည်းသူများထက် သုတ်ပိုးကောင်ရေပိုနည်းတာကို တွေ့ရှိခဲ့ကြပါတယ်။
Source: DailyMail
#Yangon_Media_Group
#WorldHealth
Published 27 May 2022
ခွေးတွေက လူတွေအတွက်အကောင်းဆုံးမိတ်ဆွေဖြစ်တဲ့အပြင် ကိုဗစ်ရောဂါပိုးရှိသူများကိုလည်း အနံ့ခံဖော်ထုတ်နိုင်ကြောင်း BMJ Global Health မှာ တနင်္လာနေ့ကဖော်ပြခဲ့ပါတယ်။
အဆိုပါလေ့လာချက်ကို ဖင်လန်နိုင်ငံ ဟယ်လ်ဆင်ကီဗန်တာအပြည်ပြည်ဆိုင်ရာလေဆိပ်မှာ ပြုလုပ်ခဲ့တာဖြစ်ပါတယ်။
အရေပြားတို့ဖတ်စနမူနာတွေကို အသုံးပြုပြီး ကိုဗစ်ကူးစက်မှုတွေကိုရှာဖွေနိုင်အောင် ခွေးတွေကိုလေ့ကျင့်ပေးခဲ့ကြပါတယ်။
ကိုဗစ်ဗိုင်းရပ်စ်ပိုးရှိနေတဲ့ လူ ၁၁၄ ယောက်ရဲ့အရေပြားနမူနာနဲ့ ရောဂါပိုးမရှိသူ ၃၀၆ ယောက်တို့ရဲ့အရေပြားနမူနာတို့ကို စမ်းသပ်အနံ့ခံခိုင်းခဲ့ရာမှာ ၉၂ ရာခိုင်နှုန်းတိကျမှုရှိခဲ့ပါတယ်။
လေ့လာချက်ထဲမှာ လေ့ကျင့်ပေးတဲ့ ခွေး ၄ ကောင်ရှိပြီး ကိုဗစ်ရောဂါပိုးရှိသူတွေရဲ့ အရေပြားတို့ဖတ်စတွေကို အနံ့ခံခိုင်းကာ ဗိုင်းရပ်စ်ကိုရှာဖွေနိုင်အောင် လေ့ကျင့်ပေးထားပါတယ်။
ခွေးတွေနဲ့ စစ်ဆေးစမ်းသပ်ခြင်းက အချိန်ကုန်သက်သာသလို အခြားစမ်းသပ်နည်းတွေ မလုပ်နိုင်တဲ့အချိန်မှာလည်း အသုံးပြုနိုင်မှာပါ။
ဒီစမ်းသပ်နည်းဖြင့် လေဆိပ်တွေနဲ့ လူအများစုဝေးရာနေရာတွေမှာ ဗိုင်းရပ်စ်ရှာဖွေနိုင်အောင် လေ့ကျင့်ထားတဲ့ခွေးတွေနဲ့ ကိုဗစ်စစ်ဆေးမှုတွေ ပြုလုပ်သွားနိုင်မှာဖြစ်ပါတယ်။
ဗိုင်းရပ်စ်တွေ့ရှိအောင် လေ့ကျင့်ပေးရာမှာ ခွေးတွေကို ရောဂါပိုးအသားစနမူနာ ပါဝင်တဲ့သံဗူးများကို အနံ့ခံခိုင်းပြီး ရောဂါပိုးရှိတယ်ဆိုတာကို ညွှန်းနိုင်အောင် သင်ကြားပေးပါတယ်။
အဲဒီနောက် ရောဂါပိုးမရှိတဲ့ အသားစနမူနာကိုလည်း အနံ့ခံခိုင်းကာ ခွဲခြားသိရှိစေရန် သင်ကြားပေးခဲ့ပါတယ်။
ခွေးတွေကိုသာ အမိန့်ပေးနိုင်မယ်ဆိုရင် အသုံးဝင်တဲ့အကူအညီရရှိစေလာမှာဖြစ်ပါတယ်။
ခွေးတွေအနေနဲ့ ရောဂါပိုးရှာဖွေခြင်း ၅ ကြိမ်မှာ ၄ ကြိမ်မှန်ကန်ခဲ့တယ်ဆိုရင် ဟယ်လ်ဆင်ကီဗန်တာလေဆိပ်မှာ ဆက်လက်လေ့ကျင့်ပေးသွားမှာဖြစ်ပါတယ်။
လေ့ကျင့်ပေးတဲ့ ကာလတုန်းကတော့ ဖင်လန်နိုင်ငံမှာ ဗိုင်းရပ်စ်မျိုးဗီဇကွဲတွေ မပေါ်ပေါက်သေးပါဘူး။
Source: The Jerusalem Post
#Yangon_Media_Group
#WorldBusiness
Published 26 May 2022
လူငယ်ပိုင်းအိမ်မွေးတိရိစ္ဆာန်ပိုင်ရှင်တွေဟာ သူတိုရဲ့တိရိစ္ဆာန်လေးတွေကို ရေရှည်အထိထိန်းသိမ်းကာကွယ်ဖို အလေးထားလာကြပြီး တရုတ်အိမ်မွေးတိရိစ္ဆာန်အာမခံလုပ်ငန်းတွေဟာလည်း အာမခံသူအများအပြားရရှိဖို လုပ်ငန်းတိုးချဲ့ဆောင်ရွက်လာကြပါတယ်။
#Yangon_Media_Group
Published: 26 May 2022
ဆီနီဂေါနိုင်ငံ တီဗာဝမ်းမြို့အနောက်ဖက်က ဆေးရုံတစ်ရုံကို ဗုဒ္ဓဟူးနေ့ နှောင်းပိုင်းက မီးလောင်ခဲ့ရာ မွေးကင်းစ ကလေးငယ်(၁၁)ဦး သေဆုံးခဲ့ရတယ်လို့ သမ္မတ မစ်ကီဆဲလ်က ပြောပါတယ်။
“အစိုးရဆေးရုံတစ်ရုံရဲ့ မွေးကင်းစ အဆောင်ကို မီးလောင်ခဲ့လို့ မွေးကင်းစကလေးငယ်(၁၁)ဦးမီးလောင်သေဆုံးခဲ့ရတာ သိရလို့ ကျွန်တော်အလွန်ထိခိုက် တုန်လှုပ်ခံစားမိပါတယ်” လို့ သမ္မတဆဲလ်က တွစ်တာမှာ ညသန်းခေါင်မတိုင်ခင် ရေးတင်ခဲ့ပါတယ်။ သူတို့ရဲ့မိခင်တွေနှင့် မိသားစုတွေကို ကျွန်တော်ဝမ်းနည်းစာနာမိကြောင်းပြောပါရစေ လို့လည်း သူက ရေးပါတယ်။
တီဗာဝမ်းရဲ့ သယ်ယူပို့ဆောင်ရေး အချက်အခြာနေရာက မမ်မီးအက်ဒိုးအာဇစ်ဆိုင်ဒါဘက် ဆေးရုံမှာ လျှပ်စစ်ရှော့ ကြောင့် မီးလောင်ခဲ့ရတာဖြစ်တယ်လို့ ကျန်းမာရေးဝန်ကြီး အက်ဒေါင်းလေယီ ဒိုင်အော့ဆားက ပြောပါတယ်။ အဲဒီမွေးဖွားဆောင်က ကလေးငယ်၁၃ဦးမွေးဖွားနိုင်အောင် စီမံထားရှိတာဖြစ်ပါတယ်။
မီးလောင်တဲ့အချိန်မှာ ကလေးငယ်၁၁ဦးရဲ့အသက်ကို သူနာပြုတွေက ကယ်တင်နိုင်ခြင်းမရှိခဲ့ပါဘူး လို့ ဝန်ကြီးကပြောပါတယ်။
Source AFP
Page 817 of 930
