#World_News
Published 09 January 2025

▪️ ဗုဒ္ဓဟူးနေ့က လော့စ်အိန်ဂျလိစ်(LA)မှာ တောမီး အပြင်းအထန် လောင်ကျွမ်းသဖြင့် အနည်းဆုံး လူ ၅ ဦးသေဆုံးပြီး အိမ်ရာနဲ့ချီ ပျက်စီးကာ မီးသတ်ရေးပစ္စည်းများနဲ့ ရေများကို အဆုံးအထိ တိုးမြှင့်ထားရတဲ့အပြင် လူပေါင်း ၁ သိန်းကျော်ကို ဘေးလွတ်ရာ ပြောင်းရွှေ့ရန် ညွှန်ကြားထားပါတယ်။

▪️ ဟာရီကိန်း တိုက်ခတ်လေကြောင့် မီးသတ်လုပ်ငန်းများ အဟန့်အတားဖြစ်ရကာ အင်္ဂါနေ့တည်းက စတင်လောင်ကျွမ်းခဲ့ရာမှာ အတားအဆီးမရှိ ပျံ့နှံ့နေခဲ့ပါတယ်။

▪️ ခြောက်သွေ့လာတဲ့လေကြောင့် ခြောက်သွေ့မြေပြင်တွေမှာ မီးတောက်များ ဖြစ်လာစေပြီး ဗုဒ္ဓဟူးနေ့ နေဝင်လာတာနဲ့အမျှ အန္တရာယ်အများဆုံး မီးလောင်ကျွမ်းမှုနှစ်ခု ဆက်လက်ကြီးထွားလာခဲ့တယ်လို့ တာဝန်ရှိသူများ ပြောပြပါတယ်။

▪️ ဗုဒ္ဓဟူးနေ့ညနေက လော့စ်အိန်ဂျလိစ် ဟောလိဝုဒ်ဟေးလ်စ်အပိုင်းမှာ နောက်ထပ်မီးတစ်ခု လောင်ကျွမ်းခဲ့ပြီး နောက်ထပ် ထွက်ပြေးတိမ်းရှောင်ဖို့ ညွှန်ကြားခဲ့ရကာ လော့စ်အိန်ဂျလိစ်ကောင်တီမှာ တောမီးလောင်ကျွမ်းမှု ၆ ခုအထိ ရှိလာတယ်လို့ မီးသတ်အကြီးအကဲ ခရစ္စတင်ခရော်လေက မီဒီယာရှင်းလင်းပွဲမှာ ပြောသွားပါတယ်။

▪️ အနောက်ပိုင်းက ပယ်လီဆိတ်စ်မီးကြောင့် ဆန်တာမော်နီကာနဲ့ မယ်လီဘူကြား တောင်ကုန်းတွေမှာ ၁၅၈၃၂ ဧကနဲ့ အဆောက်အအုံ ၁ ထောင်ခန့် ပျက်စီးသွားပါတယ်။

▪️ အရှေ့ပိုင်းမှာ အီတန်မီးကြောင့် ဆန်ဂေဘရီယယ်တောင်ခြေက ၁၀၆၀၀ ဧကနဲ့ အဆောက်အအုံ ၁ ထောင်ခန့် ပျက်စီးခဲ့ပြီး အနည်းဆုံး လူ ၅ ဦးသေဆုံးခဲ့တယ်လို့ တာဝန်ရှိသူများ ပြောပါတယ်။

▪️ သမိုင်းဝင် သဘာဝဘေးကပ်ဆိုးကြီးနဲ့ ရင်ဆိုင်နေရတယ်လို့ လော့စ်အိန်ဂျလိစ် အရေးပေါ်ထိန်းသိမ်းရေး ညွှန်ကြားရေးမှူး ကယ်ဗင်မက်ဂိုဝမ်က ပြောပြပါတယ်။

▪️ လော့စ်အိန်ဂျလိစ်ကောင်တီမှာ နေအိမ်နဲ့ စီးပွားလုပ်ငန်းပေါင်း ၁ သန်းနီးပါး လျှပ်စစ်ဓာတ်အားမရဘဲ ဖြစ်နေပါတယ်။

▪️ LAမှာ မီးသတ်သမား မလုံလောက်တာကြောင့် အခြားပြည်နယ် ၆ ခုမှ မီးသတ်သမားများ ကယ်လီဖိုးနီးယားသို့ ရောက်လာကြပြီး နောက်ထပ် မီးသတ်ကုမ္ပဏီ ၂၅၀ က အင်အား ၁ ထောင်ခန့်ဖြင့် ရောက်ရှိလာကြပါတယ်။

▪️ မီးသတ်ရေပိုက်ခေါင်းတွေမှာ ရေပြတ်လပ်လာသဖြင့် လူနေရပ်ကွက်မှ ရေများကိုအသုံးပြုကြလာကြပါတယ်။

▪️ ပစိဖိတ်ပယ်လီဆိတ်စ်ဟာ အမေရိကန်မှာ တန်ဖိုးအကြီးဆုံးရပ်ကွက်တွေထဲက တစ်ခုဖစ်ပြီး သာမန်အိမ်တစ်အိမ်လျှင် ဒေါ်လာ ၃.၇ သန်းခန့် တန်ဖိုးရှိပါတယ်။

▪️ သမ္မတဂျိုးဘိုင်ဒင်က ကယ်လီဖိုးနီးယားအတွက် ကပ်ဘေးကြီးအဖြစ် ကြေညာထားကာ ဇန်နဝါရီ ၂၀ ရက်နေ့ အာဏာမလွှဲခင်အထိ ရသမျှအကူအညီများ တောင်းခံထားပါတယ်။

#Source: Reuters

#World_Health
Published 09 January 2025

▪️ ဗိုက်တာမင်-ဘီ၁၂ ချို့တဲ့ခြင်းကြောင့် လက္ခဏာအများအပြား ဖြစ်ပေါ်နိုင်ပြီး လူသိနည်းတာတစ်ခုက ခြေထောက်မှာဖြစ်တဲ့ လက္ခဏာတစ်မျိုး ဖြစ်ပါတယ်။
ဘီ၁၂ကို ကြက်ဥ၊ အမဲသား၊ ကြက်သား၊ ချိစ်တို့ကနေ အဓိကရရှိကာ အစာခြေစနစ်သို့ စုပ်ယူသွားပါတယ်။

▪️ ဗိုက်တာမင်-ဘီတွေက ခန္ဓာကိုယ်ထဲမှာ အောက်ဆီဂျင် လှည့်ပတ်မှုကို အားပေးတဲ့ သွေးနီဥဆဲလ်တွေကို ထုတ်လုပ်ပေးပြီး ဒဏ်ရာအနာတရ သက်သာအောင် ကူညီတဲ့အပြင် အမြင်အာရုံ၊ ကိုယ်ခံအားစနစ်၊ ပရိုတိန်း စုပ်ယူမှု၊ ဒီအင်န်အေ ထုတ်လုပ်မှုတို့ကိုလည်း ထိန်းသိမ်းပေးပါတယ်။

▪️ ဗိုက်တာမင်-ဘီ၁၂ ချို့တဲ့ပါက ဒဏ်ရာသက်သာမှုကို နှောင့်နှေးစေပါတယ်။
ခြေထောက်မှာ စူးရှတဲ့ခံစားမှုမျိုး ကြုံတွေ့ပါက ဗိုက်တာမင်-ဘီ ချို့တဲ့တဲ့လက္ခဏာဖြစ်ပြီး ဆရာဝန်နဲ့ ပြသသင့်တယ်လို့ နော်တင်ဂမ်တက္ကသိုလ်မှ ကျွမ်းကျင်သူတစ်ဦးက ဖော်ပြသွားပါတယ်။

▪️ ချို့တဲ့မှုအခြေအနေပေါ် မူတည်ပြီး ဗိုက်တာမင်-ဘီ၁၂ ဖြည့်စွက်ဆေးများ၊ ဆေးထိုးမှုများ ပြုလုပ်နိုင်ပါတယ်။

▪️ ဘီ၁၂ ချို့တဲ့မှုကို ဖြေရှင်းရန်လိုအပ်ပြီး လျစ်လျူရှုထားပါက အာရုံကြောပြဿနာများနဲ့ သွေးကြောပြဿနာများ ဖြစ်လာနိုင်ပါတယ်။

▪️ ဗိုက်တာမင်-ဘီ၁၂ ချို့တဲ့ခြင်းက တဖြည်းဖြည်းနဲ့မှ ပိုသိသာလာတာဖြစ်ပြီး ကိုယ်အလေးချိန်ကျ ခွဲစိတ်မှု ပြုလုပ်ပြီးနောက် ဘီ၁၂ ချို့တဲ့မှု ဖြစ်ပေါ်နိုင်တယ်လို့ ဟားဗတ်ဆေးတက္ကသိုလ်က သတိပေးထားပါတယ်။

▪️ ရင်ပူသက်သာဆေးများ အလွန်အကျွံ သုံးစွဲပါက ဗိုက်တာမင်-ဘီ၁၂ စုပ်ယူမှုအတွက် အရေးပါတဲ့ အစာအိမ်အက်ဆစ်ထုတ်လုပ်မှု လျော့နည်းစေပါတယ်။

#Source: SurreyLive

#World_Science
Published 09 January 2025

▪️ ယခုဆယ်စုနှစ်ကုန်လောက်မှာ နိုင်ငံတွေနဲ့ ပုဂ္ဂလိကကုမ္ပဏီတွေ လဂြိုဟ်မျက်နှာပြင်မှာ သတ္တုတူးဖော်ရှာဖွေသွားဖွယ် ရှိနေပါတယ်။

▪️ တိုင်းပြည်တွေနဲ့ ကော်ပိုရေးရှင်းလုပ်ငန်းတွေ အာကာသကို သွားလာရောက်ရှိနေကြတာကြောင့် အဲဒီနေရာတွေမှာ ဘာလုပ်ချင်ကြလဲဆိုတာ ဆန်းစစ်ဖို့ လိုလာပါတယ်။

▪️ အာကာသမှာ လူသားတွေ မျှဝေသုံးစွဲနိုင်မယ့် အနာဂတ်နဲ့ ပတ်သက်လို့ ကာကွယ်ဖို့အတွက် စည်းမျဉ်းစည်းကမ်းတွေ ဖန်တီးသင့်ပြီး လာမယ့်မျိုးဆက်သစ်များအတွက် ပြယုဂ်တစ်ခု ဖြစ်နေရပါမယ်။

▪️ နာဆာတို့ တရုတ်တို့ဟာ လဂြိုဟ်ပေါ်မှာ တူးဖော်ရေးစီမံကိန်းများ ပြုလုပ်ရန် ကြံရွယ်နေကြပြီး လပေါ်မှ သယံဇာတများကို ဘယ်လိုထုတ်ယူရမလဲဆိုတာ ကုမ္ပဏီများ အပြိုင်အဆိုင်ဖြစ်လာကာ အစိုးရတွေထံ ပြန်လည်ရောင်းချလာနိုင်ပါတယ်။

▪️ အာကာသမှာ စူးစမ်းရှာဖွေဖို့ ထောက်ပံ့ပစ္စည်းတွေကို ကမ္ဘာမြေကနေ သယ်ပို့ရပေမယ့် အလွန်ကုန်ကျစရိတ် ကြီးမားပါတယ်။

▪️ ဒါပေမဲ့ လပေါ်က ရေခဲကို ဟိုက်ဒရိုဂျင်နဲ့ အောက်ဆီဂျင်အဖြစ်သို့ ပြောင်းလဲနိုင်ရင် ရောက်တဲ့နေရာမှာပဲ အာကာသယာဉ်ကို လောင်စာပြန်ဖြည့်နိုင်မှာဖြစ်ပြီး ခရီးပိုတွင်မှာ ဖြစ်ပါတယ်။

▪️ နည်းပညာပစ္စည်းတွေအတွက် မရှိမဖြစ်လိုအပ်တဲ့ ကမ္ဘာပေါ်မှ ရှားပါးသတ္တုတွေလည်း လပေါ်မှာ ပေါများတာကြောင့် အစိုးရအာကာသအဖွဲ့တွေထက် ပုဂ္ဂလိကကုမ္ပဏီတွေက လက်ဦးမှုရယူပြီး လပေါ်မှာ တူးဖော်ရှာဖွေနိုင်ဖွယ် ရှိနေပါတယ်။

▪️ လမျက်နှာပြင်မှ ပစ္စည်းများတူးဖော်ထုတ်ယူတဲ့အခါ ထွက်လာတဲ့ အမှုန်တွေက အကွာအဝေးတစ်ခုအထိ ရောက်သွားနိုင်ပြီး ကျန်ခဲ့တဲ့နေရာတွေမှာ ပိုမိုတောက်ပတဲ့ အသွင်သဏ္ဍာန် မြင်ရနိုင်ပါတယ်။

▪️ တူးဖော်ရေးလုပ်ငန်း အသေးစားပြုလုပ်ရင်တောင် မြင်သာတဲ့ပြောင်းလဲမှုမျိုး ဖြစ်နိုင်တာကြောင့် ရေရှည်တည်တံ့ပြီး ထိခိုက်မှုအနည်းဆုံးဖြစ်မယ့် တူးဖော်ရေးလမ်းစဉ်ပြုလုပ်ဖို့ ထိန်းသိမ်းဆောင်ရွက်ရမှာ ဖြစ်ပါတယ်။

▪️ ၁၉၆၇ အာကာသ သဘောတူညီချက်အရ လကိုဘယ်နိုင်ငံမှ မပိုင်ဆိုင်ပေမယ့် ကုမ္ပဏီတစ်ခုခုက လပေါ်မှာ တူးဖော်ထုတ်ယူတာမျိုးက ချိုးဖောက်ရာကျလားဆိုတာ မရှင်းလင်းထားပါဘူး။

▪️ နောက်ပိုင်းမှာတော့ အာကာသ သဘောတူညီချက်ဟာ အာကာသ စူးစမ်းရှာဖွေရေးက ကမ္ဘာပေါ်မှ လူအားလုံးအတွက် အကျိုးရှိသင့်ပြီး ပိုမိုကြွယ်ဝချမ်းသာတဲ့ တိုင်းပြည်တွေ လုပ်ငန်းတွေပဲ ရောက်ရှိရုံမဟုတ်ဘူးလို့ သတ်မှတ်လာပါတယ်။

▪️ လဂြိုဟ်ပေါ်မှာ အလုပ်သွားလုပ်သူတွေအနေနဲ့ လရဲ့ဆွဲငင်အား နည်းပါးခြင်းကြောင့် အရိုးနဲ့ ကြွက်သားဆုံးရှုံးခြင်း၊ အရိုးပွခြင်း၊ ကျောက်ကပ်နဲ့ နှလုံးသွေးကြော ထိခိုက်ခြင်း၊ ကိုယ်ခံအားချို့ယွင်းခြင်းတို့ ခံစားရနိုင်ပါတယ်။

▪️ ဒါကြောင့် လပေါ်မှာ အလုပ်လုပ်မယ့်သူတွေရဲ့ ကျန်းမာရေးအတွက် စည်းမျဉ်းဥပဒေကောင်းတွေ လိုအပ်ပါတယ်။

▪️ လဂြိုဟ်ဟာ လူသားမျိုးနွယ် စူးစမ်းရှာဖွေရေးအတွက် ခြေလှမ်းတစ်ခုဖြစ်နိုင်ပြီး ကမ္ဘာပေါ်မှ သက်ရှိများ တည်တံ့ဖို့ သယံဇာတရင်းမြစ်များ ရှိနေပါတယ်။

#Source: NDTV

တစ်နာရီ ၄၀၀ ကီလိုမီတာနှုန်းဖြင့် မောင်းနှင်နိုင်တဲ့ တရုတ်မျိုးဆက်သစ် ကျည်ဆံရထား ထုတ်လုပ်နိုင်ခြင်းဟာ ရထားနည်းပညာ အဆင့်အတန်းကို နောက်တစ်ဆင့်ရောက်အောင် ကြိုးပမ်းနေတဲ့ တိုင်းပြည်ရဲ့ စိတ်ပိုင်းဖြတ်မှုရဲ့ ရလဒ်ဖြစ်တယ်လို့ အကြီးတန်းသုတေသီတစ်ဦးဖြစ်တဲ့ ကျောင်ဟောင်ဝေက ပြောပါတယ်။
#Asia_Industry
Published 8 January 2025
#လျှပ်စစ်ကျည်ဆံရထားသစ် #တစ်နာရီ(၄၀၀)ကီလိုမီတာနှုန်း
#YMG #Yangon_Times #Yangon_Media_Group

#Daily_News
Published 8 January 2025

၁။ ရွှေတိဂုံစေတီတော်မြတ်ကြီးသို့ ပြည်ပခရီးသွားတစ်သောင်းခန့်လာရောက်ဖူးမျှော်

၂။ တရုတ်သို့တင်ပို့မည့် စိုက်ပျိုးရေးအပါအဝင် ပို့ကုန်အချို့ကို Manual စနစ်ဖြင့် မှတ်ပုံတင်ရမည်

၃။ ကိုရီးယားသို့ထွက်ခွာခဲ့သည့် လုပ်သားများ၏ ငွေလွှဲပို့ အထောက်အထားများ တင်ပြရမည်

၄။ တစ်နာရီ(၄၀၀)ကီလိုမီတာနှုန်းဖြင့် မောင်းနှင်နိုင်မည့် လျှပ်စစ်ကျည်ဆံရထားသစ်ရှေ့ပြေးပုံစံ တရုတ်၌ထုတ်လုပ်... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 08 January 2025

▪️ သန့်စင်အမွန်မြတ်ဆုံး တိဘက်မြို့တွေထဲက တစ်မြို့အနီး ဟိမဝန္တာတောင်ခြေမှာ အင်္ဂါနေ့က အင်အားပြင်းမြေငလျင် လှုပ်ခတ်ခဲ့သဖြင့် အနည်းဆုံး လူ ၁၂၆ ဦးသေဆုံးကာ အိမ်ရာနဲ့ချီ ပျက်စီးခဲ့ကြောင်း တရုတ်အာဏာပိုင်များ ထုတ်ပြန်လိုက်ပါတယ်။

▪️ ငလျင်ပြင်းအားအဆင့် ၆.၈ ရှိတဲ့ ဗဟိုချက်ဟာ ကမ္ဘာ့အမြင့်ဆုံး ဧဝရတ်တောင် မြောက်ဘက်မိုင် ၅၀ ခန့်မှာ ရှိခဲ့ပါတယ်။

▪️ ငလျင်တုန်ခါမှုက အိမ်နီးချင်း နီပေါ၊ ဘူတန်၊ အိန္ဒိယတို့ရှိ အဆောက်အဦတွေကိုပါ ရိုက်ခတ်စေခဲ့ပါတယ်။

▪️ တိဘက်မှ လူဦးရေ ၈ သိန်းခန့်ရှိတဲ့ တိဘက်ဗုဒ္ဓဘာသာ ထွန်းကားရာ ရှီဂတ်ဇဲဒေသတလျှောက် ငလျင်ဒဏ်ခံစားခဲ့ရတာ ဖြစ်ပါတယ်။

▪️ ထွက်ပေါ်လာတဲ့ ဗီဒီယိုတွေထဲမှာ ရှီဂတ်ဇဲမြို့မှ နေအိမ်အများအပြား ပျက်စီးသွားပြီး ကယ်ဆယ်ရေးတွေက အိမ်အပျက်အစီးတွေကြားမှာ ရှာဖွေနေကြကာ ဒဏ်ရာရသူကို ကယ်ထုတ်နေတာ မြင်တွေ့ရပါတယ်။

▪️ နေအိမ်ပျက်စီးသွားရတဲ့အထဲမှာ ထိုဒေသရှိ အပူချိန်က အနုတ် ၆ ဒီဂရီဆဲလ်စီးယပ်စ်အထိ ကျဆင်းနေပါတယ်။

▪️ တရုတ်မြေငလျင်ကွန်ရက်စင်တာက ဧဝရတ်ဒေသ မြောက်ဘက်အဝင်နေရာလို့ခေါ်တဲ့ တင်ဂရီကောင်တီမှာ ဗဟိုချက်ကို သတ်မှတ်ခဲ့ပြီး မြေအနက် ၆.၂ မိုင်ရှိပါတယ်။

▪️ တိဘက်မှ အနည်းဆုံး လူ ၁၂၆ ဦးနဲ့ ၁၈၈ ဦးဒဏ်ရာရခဲ့တယ်လို့ တရုတ်ပြည်မှ ရှင်ဟွာသတင်းဌာနကနေ ဖော်ပြထားပါတယ်။

▪️ နိုဘယ်လ်ငြိမ်းချမ်းရေးဆုရှင် တိဘက်ဘာသာရေးခေါင်းဆောင် ဒါလိုင်လာမာက အသက်ဆုံးရှုံးသူများအတွက် အမျှဝေပေးပြီး ဒဏ်ရာရသူတွေ အမြန်ဆုံးသက်သာစေဖို့ ဆုတောင်းပေးနေကြောင်း ဖော်ပြထားပါတယ်။

▪️ ထိခိုက်ဆုံးရှုံးမှု အနည်းဆုံးဖြစ်စေရန်နဲ့ ငလျင်ဒဏ်ခံရသူများ ပြန်လည်အခြေချနိုင်ရန် ရှာဖွေရေးနဲ့ ကယ်ဆယ်ရေးများ ပြုလုပ်သင့်တယ်လို့ တရုတ်သမ္မတ ရှီကျင့်ဖျင်က ပြောပါတယ်။

▪️ ဖြစ်ပွားရာနေရာသို့ မီးသတ်နဲ့ ကယ်ဆယ်ရေးလုပ်သားပေါင်း ၁၅၀၀ ကျော် စေလွှတ်ထားကာ တဲ၊ ကုတ်အင်္ကျီ၊ ဂွမ်းကပ်၊ အိပ်ရာတို့အပါအဝင် ပစ္စည်းပေါင်း ၂၂၀၀၀ ခန့်ကိုလည်း ပေးထားတယ်လို့ ရှင်ဟွာက ဖော်ပြပါတယ်။

▪️ အမြင့်မီတာ ၄၀၀၀-၅၀၀၀ ခန့်ရှိတဲ့ တင်ဂရီရွာတွေမှာ ငလျင်လှုပ်ခတ်ပြီးနောက် ပြင်းအားအဆင့် ၄.၄ လောက်ရှိတဲ့ နောက်ဆက်တွဲရိုက်ခတ်မှု ၁၅၀ ကျော်ရှိခဲ့တယ်လို့ သိရပါတယ်။

#Source: Reuters