Published 16 Oct 2022

နိုင်ငံပေါင်း(၉)နိုင်ငံမှာ နျူကလီးယားထိပ်ဖူးပေါင်း၁၂၇၀၀ နှင့်အတူ ကမ္ဘာကြီးမှာ နျူကလီးယားစစ်ပွဲအန္တရာယ်တစ်ခုဟာ အမြဲတမ်းရှိနေပါတယ်၊

အန္တရာယ်ဖြစ်နိုင်ချေက နည်းပါးသေးပေမယ့် ယူကရိန်းစစ်ပွဲတစ်ဝိုက်မှာ တင်းမာမှုတွေကတော့မြင့်တက်နေပါတယ်။  ယူကရိန်းစစ်ပွဲမှာ တိုးတက်မှုအတွက် အတော်ရုန်းကန်နေရတဲ့အလျောက် ရုရှားသမ္မတပူတင်က  သေရေးရှင် ရေးဖြစ်လာရင် နျူကလီးယားလက်နက်သုံးမယ့်သဘော အရိပ်အယောင်ပြလာခဲ့ပါတယ်။

ကျွမ်းကျင်သူတွေကတေ့ ပူတင်ဟာ အဲဒီအဆင့်အထိသုံးမယ့်ပုံမပေါ်ဘူးလို့ သုံးသပ်ကြပေမယ့် ကမ္ဘာ့ခေါင်းဆောင် တွေကတော့ အဲဒီအပေါ်အရေးတကြီးဖြစ်နေကြပါတယ်။

တကယ်လို့များ အဆိုးဆုံးကိစ္စကြီးဖြစ်လာပြီဆိုရင် နျကလီးယားအန္တရာယ်ကို လျှော့ချပေးနိုင်မယ့် လွယ်ကူတဲ့နည်းလမ်းတွေကို မှတ်သားထားသင့်ပါတယ်။

“ ရေဒီယိုသတ္တိကြွကြောင့်ဖြစ်တဲ့ ထိခိုက်သေဆုံးမှုတွေကို တကယ့်ကို ကာကွယ်နိုင်ပါတယ်” လို့ လောရင့် လစ်ဗာမိုး အမျိုးသားဓာတ်ခွဲခန်းက ရေဒီယိုသတ္တိကြွနှင့် အရေးပေါ်ပြင်ဆင်ရေးဆိုင်ရာ ကျန်းမာရေးပညာရှင် ဘရွတ်ဘာဒီမီယာက Insider ကို ၂၀၁၈ ခုနှစ်တုန်းက ပြောခဲ့ပါတယ်။

“ နျူကလီးယားတိုက်ခိုက်ခံရပြီးနောက် ဘာလုပ်ရမယ်ဆိုတာသိရင် ဓာတ်ရောင်ခြည်ကြောင့် လူတွေ ရာထောင်ပေါင်း များစွာကို ဖျားနာသေဆုံးခြင်းကနေ ကယ်တင်နိုင်ပါတယ်” လို့ သူကပြောပါတယ်။

အဲဒါကြောင့် အောက်ဖော်ပြပါ ကာကွယ်ရေးဆိုင်ရာ အကြံပြုချက် (၁၇)ချက်ကို တင်ပြလိုက်ရပါတယ်။

လျှပ်ပြက်၊ပေါက်ကွဲခြင်း

အရေးပေါ်စီမံခန့်ခွဲမှု ဖက်ဒရယ်အေဂျင်စီ FEMA အဆိုအရ နျူကလီးယားလက်နက်ရဲ့ အကျိုးဆက်တစ်ခုအတွင်း အရေးကြီးတဲ့ အဆင့် (၆)ဆင့်ရှိတယ်လို့သိရပါတယ်။ အဲဒါတွေက..

၁။ မီးအလုံးကြီးကြောင့်ဖြစ်ပေါ်တဲ့ တောက်ပတဲ့လျှပ်ရောင်ဟာ ယာယီမျက်စေ့ကွယ်စေနိုင်ပါတယ်

၂။ ပေါက်ကွဲတဲ့လှိုင်းကြောင့် အဆောက်အဦတွေပြားပြားဝပ်သွားစေနိုင်ပြီး အကြီးအကျယ်ဒဏ်ရာရတာ၊ သေဆုံးတာဖြစ်နိုင်ပါတယ်။ အဲဒီလှိုင်းဟာ ကိုယ့်ဆီကိုရောက်ဖို့ စက္ကန့်အနည်းငယ်ကြာတတ်ပါတယ်။

၃။ နျူကလီးယား ဓာတ်ရောင်ခြည်ရဲ့ လှုပ်ခတ်မှု

၄။ မီးနှင့်အပူ- အဲဒါကြောင့် ငြှိမ်းသတ်မနိုင်တဲ့ မီးလောင်ကျွမ်းမှုဖြစ်စေတတ်ပါတယ်။

၅။ လျှပ်စစ်သံလိုက်ဓာတ်-ယင်းကြောင့် မိုင်ပေါင်းများစွာပတ်လည်က အီလက်ထရွန်းနစ်ပစ္စည်းတွေ သုံးမရဖြစ်စေတတ်ပါတယ်။

၆။ရေဒီယိုသတ္တိကြွအမှုန်များ-ယင်းတို့က ပေါက်ကွဲမှုမှတစ်ဆင့်လေထဲပျံနှံ့ပြီး ၁၅မိနစ်ခန့်အကြာတွင် ကိုယ့်ဆီရောက်လာနိုင်ပါတယ်။ ခပ်မြင့်မြင့်မှာတိုက်တဲ့လေကြောင့်လည်း စတုရန်းမိုင်ရာပေါင်းများစွာအပေါ် ဖြန့်ကျက်စေနိုင်ပါတယ်။ပေါက်ကွဲတဲ့နေရာမှာတော့ အပြင်းထန်ဆုံးဖြစ်ပါတယ်။

နျူကလီးယားလက်နက်တွေဟာ သိပ်ကြောက်စရာကောင်းပါတယ်။ မြို့ကြီးတစ်မြို့ကိုကျရောက်တာနှင့်လူ ရာထောင်  များစွာ သေကြေပျက်စီးနိုင်ပါတယ်။

ဒါပေမယ့် အဆိုးရွားဆုံးပျက်စီးမှုတွေမှာတော့ အသက်ရှင်ကျန်မယ့်သူမရှိသလောက်ပါပဲ။အဲဒါကို အဆိုးရွားဆုံး အပျက်အစီးဇုန်လို့ခေါ်ပါတယ်လို့ သူကပြောပါတယ်။ ၁၀ ကီလိုတန်ပေါက်ကွဲမှုဆိုရင် ဟီရိုရှီးမားဗုံးပြင်းအားရဲ့ သုံးပုံနှစ်ပုံပါ။ မိုင်ဝက်အချင်းရှိတဲ့ပေါက်ကွဲမှုပါ။

ခင်ဗျားရဲ့မြို့ကို နျူကလီးယားဗုံးတစ်လုံး ကြဲချပြီဆိုရင် ဖြစ်နိုင်ချေအင်မတန်နည်းတဲ့ အနေအထားတစ်ခုမှာ အသက်ရှင်ကျန်ဖို့ အခွင့်အလမ်းကို တိုးမြှင့်ရယူနိုင်မယ့် နည်းလမ်းတွေတော့ရှိပါတယ်။

ဟီရိုရှီးမား ဗဟိုချက်ရဲ့ မီတာ ၃၀၀(ပေ၉၀၀)အတွင်း အသက်ရှင်ကျန်ရစ်သူတွေရှိခဲ့ပါတယ်လို့ ဘရွတ်ဘာဒီမီယာက ပြောပါတယ်။

ဘယ်လိုပြင်ဆင်ရမလဲ

အရေးပေါ်အရန်အသင့် ကိရိယာတစ်စုံ ရှိထားသင့်တယ်လို့ အမေရိကန်ကြက်ခြေနီအသင်းက အကြံပြုထားပါတယ်။ အဲဒီ တစ်စုံထဲမှာ ရေ၊အစားအစာ၊လက်နှိပ်ဓာတ်မီး၊ဆေးဝါးနှင့် အခြားပစ္စည်းတွေပါဝင်ပါတယ်။ အသေးစိတ်ကို ဒီမှာ ဆက်ကြည့်နိုင်ပါတယ်။

အန္တရာယ်ဆိုးကျိုးတစ်ခုခုအတွက် အမိုးအကာတွေ ကိုယ့်နေတဲ့ရပ်ကွက်မှာ ရှိသလား ရှာထားပါ။ ကိုယ့်မိသားစုအတွက် အကယ်လို့ ဘေးအန္တရာယ်ကြုံလာရင်ခိုနားလို့ရမယ့် အမိုးအကာတည်ဆောက်မယ့် အစီအစဉ်ရေးဆွဲထားပါ။အရေး ကြုံရင် ဘယ်သူနှင့်ဆက်သွယ်ရမလဲ(ဥပမာကြက်ခြေနီအသင်း) စဉ်းစားထားပါ။

မကြာမီတိုက်ခိုက်ခံရတော့မယ်လို့ သတိပေးမှုရရှိရင် ဘာလုပ်မလဲ

မကြာမီတိုက်ခိုက်မှာလာတော့မယ်လို့ သတိပေးချက်ရရှိရင် ပထမဆုံးအလုပ်က ခိုနားရာ အမိုးအကာကိုရှာဖို့ပဲဖြစ်တယ်။ အဲဒီနေရာက ခင်ဗျားကို ပေါက်ကွဲမှုကြောင့် ခန္တာကိုယ်ထိခိုက်နိုင်တာရော ဓာတ်ရောင်ခြည်တွေအန္တရာယ်ကရော အထိုက်အ‌လျောက်ကာကွယ်ပေးနိုင်ပါလိမ့်မယ်။

ကိုယ်ကကားမောင်းနေတယ်ဆိုရင် လမ်းဘေးချက်ခြင်းရပ်၊ကားပေါ်ကထွက် အဆောက်အဦတစ်ခုခုသွားမယ့် လမ်းကိုရှာ ပြီးသွားပါလို့ သူက အကြံပြုပါတယ်။

အတွင်းခန်းအမိုးအကာကိုရှာပါ။ ပိုကောင်းတာက မြေအောက်ခန်းပဲဖြစ်တယ်။ အုတ်သို့မဟုတ် ကွန်ကရစ် အဆောက် အအုံ ဖြစ်တယ်လို့  ကြက်ခြေနီနှင့် FEMA  တို့က အကြံပြုထားပါတယ်။ အဆောက်အအုံရဲ့ အလယ်မှာ ကြိုးစားပြီးနေပါ။ ဥပမာ- လှေကားခွင်လိုနေရာမျိုးပေါ့။

အဆောက်အဦအတွ်း ပိုနိမ့်ပြီး ပိုနက်တဲ့နေရာမှာ နေနိုင်ပါတယ်။ ပြတင်းတွေနှင့် ဝေးဝေးနေပါ(ကွဲရှနိုင်)။ တံခါးတွေနှင့် ဝေးဝေးနေပါ(ပွင့်ထွက်နိုင်)။ အပြင်နံရံတွေနင့်ဝေးဝေးနေပါ( ပြိုလဲကျနိုင်)။

“ လေဆင်နှာမောင်းတိုက်ရင် ပုန်းသလိုမျိုးအတူတူသဘောပါပဲ” လို့ သူကပြောပါတယ်။

မီးလုံးကြီးကို မကြည့်မိပါစေနှင့်။ အဲဒီအလင်းရောင်ဟာ အမြင်အာရုံကို ခေတ္တကွယ်စေနိုင်တယ်လို့ FEMA က သိရပါတယ်။

ညွှန်ကြားချက်တွေကို အဆက်မပြတ်ပါစေနှင့်။မိုဘိုင်းဖုန်းတွေက ပြန်တောက်သွာနိုင်တယ်။ ဒါပေမယ့် ရေဒီယိုတွေက ဆက်အလုပ်လုပ်နေပါဦးမယ်။

လူသားတွေနှင့်အိမ်မွေးတိရိစ္ဆာန်တွေအားလုံးဟာ အာဏာပိုင်တွေဆီက ဘာညွှန်ကြားချက်မှ မလာသေးဘဲနှင့် အဆောက်အဦအတွင်းမှာပဲ အနည်းဆုံး ၂၄ နာရီနေပေးရပါမယ်လို့ ကြက်ခြေနီအဖွဲ့ကဆိုပါတယ်။

ပေါက်ကွဲမှုဖြစ်တဲ့အချိန် အပြင်မှာရှိနေရင်ဘာလုပ်ရမလဲ

အပြင်မှာ ခင်ဗျားရောက်နေရင် ပထမဦးစားပေးလုပ်ရမှာက ပေါက်ကွဲမှုလှိုင်းတွေကို ကာကွယ်နိုင်အောင် ကိုယ့်ကိုကိုယ် မိုးကာရမှာဖြစ်ပါတယ်။ ကိုယ့်ကိုကာလို့ရတဲ့ အရာမှန်သမျှနှင့်ကာထားပါ။ အဲဒီနောက် မြေပြင်မှာ ဆန့်လှဲချလိုက်ပြီး ခေါင်းကို ဖုံးကာထားပေးပါလို့ ကြက်ခြေနီအဖွဲ့က ဆိုပါတယ်။

ပေါက်ကွဲတာတွေက ကိုယ့်ကိုကျော်သွားပြီလို့ ဘယ်တော့မှ မမှတ်ယူပါနှင့်။ လှိုင်းတွေကိုယ့်ဆီရောက်ဖို့ ၃၀စက္ကန့်လောက် ကြာတတ်ပါတယ်လို့လည်း ကြက်ခြေနီအဖွဲ့ကပြောပါတယ်။

ပေါက်ကွဲလှိုင်းတွေဖြတ်သွားပြီးတဲ့နောက် ဓာတ်ရောင်ခြည်ထိတွေ့မှု အကန့်အသတ်ဖြစ်ဖို့လိုပါတယ်။

အပြင်မှာပဲဆက်ရှိနေတုန်းပဲဆိုရင် ကိုယ့်ရဲ့ပါးစပ်ကို အဝတ်သို့မဟုတ် မျက်နှာသုတ်ပဝါစဖြင့် ဖုံးအုပ်ထားပါ။ အဲသလို လုပ်ပေးခြင်းဖြင့် ရေဒီယိုသတ္တိကြွအမှုန်တွေက အသက်ရှုသွင်းတဲ့အထဲ ပါဝင်မှုကို လျော့ချပေးနိုင်ပါတယ်။

ကိုယ်ကပေါက်ကွဲတဲ့နေရာနှင့် ဘယ်လောက်ပင်ဝေးနေပါစေ အမိုးအကာအောက်ရောက်နိုင်သမျှရောက်အောင်လုပ်ပါ။ ရေဒီယိုသတ္တိကြွတွေ အမှုန်တွေဟာ မိုင်ပေါင်းရာချီခရီးသွားနိုင်လို့ဖြစ်ပါတယ်လို့ ကြက်ခြေနီက ပြောပါတယ်။ အတွင်းထဲ ရောက်လို့ အန္တရာယ်ကင်းပြီဆိုရင်တော့ အပေါ်ကဖုံးကာထားတာတွေကို ဖယ်ရှားလိုက်ပါ။

အမိုးအကာတွေ့ပြီဆိုတာနှင့် ဘာလုပ်ရမလဲ

အပြင်မှာခင်ဗျားရှိနေရင် ခန္ဓာကိုယ်က ရေဒီယိုသတ္တိကြွအမှုန်တွေ နှင့် ဝေးလို့ရနိုင်သလောက်ဝေးအောင်လုပ်ပါ။

အချိန်တိုတိုအတွင်း အများကြီးနှင့်ထိတွေ့မိရင် ခန္ဓာကိုယ်ကို ပျက်စီးစေပါလိမ့်မယ်။ မိမိခန္ဓာက မိမိကိုယ်မိမိ ပြန်ပြုပြင်တာကို ကန့်သတ်သွားပါလိမ့်မယ်။ ကူးစက်ရောဂါတွေကို ပြန်လည်တိုက်ခိုက်တာနှင့် အခြားသော လုပ်ဆာင်မှု တွေကို ကန့်သတ်စေပြီး အဲဒါက အန္တရာယ်ရှိတဲ့အခြေအနေဖြစ်တဲ့ အမြဲတမ်း ဓာတ်ရောင်ခြည်အဆိပ်သင့်ဖျားနာမှုကို ဦးတည် သွားစေပါလိမ့်မယ်။

နာရီအနည်းငယ်အတွင်း ထိတွေတဲ့ပမာဏ ၇၅၀ millisieverts လောက်ရှိရင် လူကို နာမကျန်းဖြစ်စေပါတယ်။ ဒါဟာ နှစ်စဉ် သာမာန်အမေရိကန်တစ်ဦး သဘာဝနှင့်ဆေးဝါးကရတဲ့ ဓာတ်ရောင်ခြည်ပမာဏထက်  အဆ၁၀၀ခန့် များနေပါတယ်။ ၁၀ ကီလိုတန်ပေါက်ကွဲမှုဟာ အချင်းဝက် တစ်မိုင်အတွင်း ဒီလောက်များတဲ့ ထိတွေ့မှုကို ဖြစ်ပေါ်စေပါ တယ်။

 အဝတ်အစားရဲ့ အပေါ်က အလွှာကို ဖယ်ထုတ်ပစ်လိုက်ခြင်းက ရေဒီယိုသတ္တိကြွမှုန်တွေ ညစ်ညမ်းခြင်းကို ၉၀ ရာခိုင်နှုန်း အထိလျှော့ချပေးနိုင်တယ်လို့ ကြက်ခြေနီကပြောပါတယ်။

ဖြစ်နိုင်ရင်တော့ အဲဒီစွန်းပေနေတဲ့အဝတ်တွေအားလုံးကို ပလပ်စတစ်အိတ်ထဲထည့်ပြီး အခြားသူတွေနှင့် အိမ်မွေးတိရိစ္ဆာန် တွေနှင့် ဝေးရာမှာ သွားထားလိုက်ပါ။ အဝတ်အစားတွေက ဓာတ်ရောင်ခြည်ကို ဆက်ပြီးလွှတ်ထုတ်ပေးနိုင်လို့ဖြစ်ပါတယ်။

ဆံပင်နှင့် အရေပြားကို  ဆပ်ပြာတွေ ခေါင်းလျှော်ရေတွေအများကြီးနှင့် ပြီးတော့ ရေဖြင့် ဆေးကြောပစ်ပါ။ အရေပြားကို မကုတ်ခြစ်ပါနှင့်။ ဆံပင်ပြုပြင်ဆေး conditioner မသုံးပါနှင့်။ အဲဒီဆေးတွေက ရေဒီယိုသတ္တိကြွပစ္စည်းတွေနှင့် ဆံပင်ကို တွယ်ကပ်စေလို့ဖြစ်ပါတယ်လို့ ကြက်ခြေနီက ပြောပါတယ်။

အညစ်အကြေးတွေ ပိတ်မိနေနိုင်တဲ့ နှာခေါင်းကို ညင်ညင်သာသာ မှုတ်ထုတ်ပစ်ပြီး နားရွက်တွေကိုလည်း သုတ်ပစ်ဖို့ လိုပါ တယ်။

ရေချိုးလိုက်တာက အကောင်းဆုံးပါပဲ။ ဒါပေမယ့် ရေမချိုးနိုင်ရင် ရေစိုနေတဲ့အဝတ်နှင့် ပွတ်တိုက်ပေးပါ။  အဲဒီအဝတ် ကလည်း အပြင်မှာထားတာမဟုတ်တဲ့ အဝတ်ဖြစ်ရပါမယ်လို့ FEMA ကပြောပါတယ်။

ကိုယ့်ရဲ့တိရိစ္ဆာန်လေးတွေက အပြင်မှာရှိရင် သူတို့မှာကပ်ငြိပါလာတဲ့ ရေဒီယိုသတ္တိကြွအမှုန်တွေက သူတို့နှင့် ခင်ဗျားကို ထိတွေ့မိစေပါလိမ့်မယ်။ ကိုယ့်အိမ်မွေးတိရိစ္ဆာန်တွေရဲ့ အမွှေးတွေကို ဖီးပေးပြီး ဆပ်ပြာနှင့်ရေနှင့် သူတို့ကို ရေချိုးပေးပါ။

ဖြစ်နိုင်ရင် ပြတင်းနှင့် မီးလင်းဖိုတွေကိုပိတ်ထားပါ။ပန်ကာတွေနှင့်လေအေးပေးစက်တွေပိတ်ပါလို့ ကြက်ခြေနီက ဆိုပါတယ်။

အမိုးအကာအတွက် ပြင်ဆင်ထားပါ

လှုပ်ရှားဖို့က အန္တရာယ်ရှိမရှိမသေချာရင် ပေါက်ကွဲနေတဲ့ အမိုးအကာအထဲ ကိုယ်ကိုနိမ့်နိုင်သမျှနိမ့်အောင် ခိုဝင်ပါ။

ဒီအချိန်မှာ မီးတွေနှင့် အပျက်အစီးအပုံတွေက ပြန့်ကျဲနေနိုင်တယ်လို့ ဘရွတ်ဘာဒီမီယာက ပြောပါတယ်။

ထုတ်ပိုးထားပြီးသား အစားအသောက်တွေကိုပါ စားသောက်ပါ။ ဒါမှမဟုတ် အဆောက်အဦအတွင်းက အစားအစာတွေ  ကိုပဲစားသုံးပါလို့ FEMA ကပြောပါတယ်။

မိမိရဲ့ စိတ်ပိုင်းဆိုင်ရာကျန်းမာရေးနှင့် ကလေးတွေရဲ့ကျန်းမာရေးအတွက် ဂရုစိုက်ပါ။ အပြုသဘောဆောင်တဲ့လှုပ်ရှားမှု တွေကို အာရုံစိုက်ပါ။ ကြောက်စရာကောင်းတဲ့ မီဒီယာသတင်းပေးပို့ချက်တွေကို ကလေးတွေမသိအောင်ကန့်သတ်ပါ။  စားဖို့သောက်ဖို့သတိရနေပါ။ အခြားသူတွေအပေါ်စိတ်ရှည်ပါလို့ ကြက်ခြေနီက အကြံပြုပါတယ်။

ပေါက်လောင်မှုတွေဖြစ်တာပဲဖြစ်ပစေ၊ရေဒီယိုသတ္တိကြွအမှုန်တွေ ရောက်လာတာပဲဖြစ်ပစေ နှစ်မျိုးစလုံးအတွက် အရေးအကြီးဆုံးက အတွင်းထဲမှာ နေထိုင်ကြဖို့ပဲဖြစ်ပါတယ်လို့ ဘရွတ်ဘာဒီမီယာက ပြောပါတယ်။

Source Insider

#Nuclear_war

#Radiation_illness

#Tips_For_Minimize_risks

Published 11 Oct 2022

ဂျပန်နိုင်ငံမှာ စတားလင့်ခ် Starlink အင်တာနက်ဝန်ဆောင်မှုလုပ်ငန်းကို စတင်နေပြီလို့  အမေရိကန်လုပ်ငန်းရှင် အီလွန်မတ်စ်ရဲ့ စပေ့ရှ်အိတ်စ် SpaceXကုမ္ပဏီကကြေညာပါတယ်။

စတားလင့်ခ်ဟာ ဂျပန်နိုင်ငံရဲ့ တောင်ထူထပ်တဲ့ဒေသတွေနှင့် အင်တာနက် မရတစ်ချက် ရတစ်ချက်ဖြစ်နေပြီး ဆက်သွယ်ရခက်ခဲတဲ့ ကျွန်းတွေရဲ့ လိုအပ်ချက်တွေကို ဖြည့်ဆည်းပေးပါလိမ့်မယ်။

စပေ့ရှ်အိတ်စ်က ယင်းရဲ့ တွစ်တာစာမျက်နှာကနေ ကြေညာတာဖြစ်ပါတယ်။ တရားဝင်ဝက်ဆိုက်မှာပါတဲ့ အချက်အလက်တွေအရ စပေ့ရှ်အိတ်စ်အင်တာနက်ရဲ့ လစဉ်ကြေးဟာ ၈၄ ဒေါ်လာ ( ၁၂၃၀၀ ယန်း)ဖြစ်ပါတယ်။ အဲဒီအပြင် ဟာ့ဒ်ဝဲကုန်ကျစရိတ်ကလည်း ယန်းငွေ ၇၃၀၀၀ ကုန်ကျမှာဖြစ်ပါတယ်။

စတားလင့်ခ်ဟာ  ဂြိုဟ်တုကနေတစ်ဆင့် မြန်နှုန်းမြင့်ပြီး စောင့်ဆိုင်းချိန်နည်းပါးတဲ့ အင်တာနက်ဝန်ဆောင်မှုလုပ်ငန်း ကို ဆောင်ရွက်ပေးနေပါတယ်။ ရုရှားတိုက်ခိုက်ပြီးကတည်းက ယူကရိန်းမှာ စတားလင့်ခ်ရဲ့ ဂြိုဟ်တုအင်တာနက်ဟာ အရေးကြီးတဲ့ အခန်းကဏ္ဍကနေ ပါဝင်နေတာဖြစ်ပါတယ်။

ဥရောပနှင့် အမေရိကန်အပြင်  အာရှနှင့် အခြားဒေသတွေကိုပါ ဂြိုဟ်တုအင်တာနက်လုပ်ငန်းဝန်ဆောင်မှုပေးဖို့ စတင်းလင့်ခ်က စီစဉ်နေပါတယ်။

ဖိလစ်ပိုင်မှာ အစိုးရဟာ ယင်းရဲ့ အခမဲ့ ဝိုင်ဖိုင်အစီအစဉ်အတွက် စတားလင့်ခ်ကို စာရင်းသွင်းဖို့ စဉ်းစားနေပါတယ်။ စပေ့ရှ်အိတ်ခ်ဟာ ဒီဇင်ဘာနောက်ဆုံးထားပြီး  စီးပွားဖြစ်လုပ်ငန်းဆောင်ရွက်ဖို့ ကြိုးစားနေပါတယ်လို့ ကုမ္ပဏီရဲ့ အစိုးရဆက်ဆံရေး အကြီးတန်းအရာရှိ ရီဘက်ကာဟန်တာကပြောပါတယ်။

Source: Nikkei Asia

#Starlink internet

#Japan_Internet

#Elon_Musk

Published 5 Oct 2022

အိန္ဒိယနိုင်ငံဟာ ပြည်တွင်းထုတ် တိုက်ခိုက်ရေးရဟတ်ယာဉ် ပထမတစ်သုတ်ကို တနင်္လာနေ့က ထုတ်ဖော်ပြသလိုက်ပါတယ်။ အဆိုပါ တိုက်ခိုက်ရေး ရဟတ်ယာဉ်ဟာ ဟိမဝန္တာလိုနေရာမျိုးမှာ  အသုံးပြုနိုင်မယ့် အမြင့်ပျံရဟတ်ယာဉ်အမျိုးအစားအဖြစ် အခြေခံ ဒီဇိုင်းထုတ်ထားတာဖြစ်ပါတယ်။

အပေါ့စား တိုက်ခိုက်ရေး ရဟတ်ယာဉ်တွေဟာ ရုရှားကနေမှီခိုနေရတာကို လျှော့ချတဲ့ အိန္ဒိယရဲ့ ကြိုးပမ်းအားထုတ်မှု ဖြစ်ပါတယ်။

ယခုတိုက်ခိုက်ရေးရဟတ်ယာဉ်တွေကို ဟင်ဒူစတန်အဲရိုနော့တစ်လိမိတက် (အိတ်ချ်အေအယ်လ်)က ထုတ်လုပ်တာဖြစ်ပြီး  အိန္ဒိယလေတပ်ရဲ့ တိုက်ပွဲစွမ်းရည်တွေကို ကြီးမားစွာမြှင့်တင်ပေးမှုတစ်ရပ်ပဲဖြစ်တယ် လို့ ကာကွယ်ရေးဝန်ကြီး ရာချ်နက် ဆင်းက  အိန္ဒိယအနောက်ပိုင်း ဂျိုပါး လေတပ်အခြေစိုက်စခန်းမှာ သတင်းထောက်တွေကိုပြောပါတယ်။

“ အလွန်အရေးပါတဲ့အခမ်းအနားဖြစ်တယ်။ အထူးဂုဏ်ယူစရာ  ပြီးတော့ ဆယ်စုနှစ်နှစ်စုမှာ လုံ့လဝီရိယရှိရှိ သုတေသနှင့်ဖွံ့ဖြိုးတိုးတက်ရေးလုပ်ခဲ့တဲ့ အကျိုးရလာဒ်တစ်ခုဖြစ်တယ်” လို့ ဆင်းကပြောပါတယ်။

ရဟတ်ယာဉ်ကို ပင်လယ်ရေမျက်နှာပြင်အထက် အမြင့်ပေ တစ်သောင်းခြောက်ထောင် အထိ စမ်းသပ်ပျံသန်းပေးပြီးပြီလို့ အရာရှိတွေကပြောပါတယ်။

အိန္ဒိယဟာ ပြည်တွင်းကာကွယ်ရေးဆိုင်ရာစက်မှုလုပ်ငန်းကို တည်ဆောက်နေတာဖြစ်ပါတယ်။ ပြီးခဲ့တဲ့လကလည်း ပြည်တွင်းထုတ် လေယာဉ်တစ်စီးကို ထုတ်ဖော်ပြသခဲ့ပါသေးတယ်။

Source AFP

#Hindustan_Aeronautics_Limited

#India_made_Light_Combat_Helicopters

#India_Defence_Industry

Published 2 October 2022

တရုတ်နိုင်ငံရဲ့ ပထမဆုံး ပြည်တွင်းထုတ် ပင်မလိုင်း ဂျက်လေယာဉ်ကြီး C919 ဟာ  အန္တရာယ်ကင်းရှင်းရေး၊ သက်သောင့်သက်သာဖြစ်မှုနှင့် စွမ်းအင်စွမ်းရည်တို့ တိုးတက်မှုကို အာရုံစိုက်ကာ နည်းပညာနှင့် ဒီဇိုင်းအားဖြင့် တည်ဆောက်ထားတာဖြစ်တယ်လို့ လေယာဉ်ပျံရဲ့ ဒီဇိုင်းအင်ဂျင်နီယာချုပ် က ပြောပါတယ်။

C919 ဟာ လေးနှစ်ကြာစမ်းသပ်မှုတွေပြုလုပ်ပြီးနောက်  ကြာသပတေးနေ့က တရုတ်နိုင်ငံ လေကြောင်းအာဏာပိုင်ထံမှ ပျံသန်းခွင့်လက်မှတ်ရရှိခဲ့ပါတယ်။

အဲဒီပျံသန်းခွင့်လက်မှတ်အပ်နှင်းတဲ့အခမ်းအနားကို ဘေဂျင်းနိုင်ငံတကာလေဆိပ်မှာကျင်းပခဲ့ရာမှာ တရုတ် မြို့ပြ လေကြောင်းအာဏာပိုင်အဖွဲ့က လေယာဉ်ကို ပျံသန်းခွင့်လက်မှတ်ထုတ်ပေးခဲ့ပါတယ်။

တရုတ်အင်ဂျင်နီယာအကယ်ဒမီက ပညာရှင်လည်းဖြစ်၊ C919 ရဲ့ ဒီဇိုင်းအင်ဂျင်နီယာချုပ်လည်းဖြစ်တဲ့ ဝူကွမ်ဟွေးက ဒီဇိုင်းအဖွဲ့အတွက် လေယာဉ်ရဲ့စိတ်ချလုံခြုံမှုတိုးတက်ကောင်းမွန်ရေးဟာ အဓိက အရေးအကြီးဆုံးဖြစ်တယ်လို့ ပြောပါတယ်။

“ အားလုံးထဲမှာ ပထမဦးစားပေးက လုံခြုံစိတ်ချရဖို့ဖြစ်တယ်။  စံချိန်စံညွှန်းတွေအကြောင်းပြောရမယ်ဆိုရင် ကျွန်တော်တို့ဟာ နောက်ဆုံးပေါ် လေယာဉ်ပျံသန်းမှုဆိုင်ရာ သတ်မှတ်ချက်တွေနှင့် ကိုက်ညီမှုရှိပါတယ်။ ဥပမာ .. ငှက်တွေဝင်တိုက်တာမျိုးကို ခံနိုင်ရည် တိုးတက်အောင်ပြုလုပ်ထားတာ၊ အရေးပေါ်ထွက်ခွာနိုင်စွမ်းတိုးတက်မှုရှိအောင်လုပ်ထားတာမျိုးဖြစ်တယ်။ လေယာဉ်ပြန်ပေးဆွဲတာမျိုးလိုမျိုးနှင့်တောင် ပြန်လည်တုန့်ပြန်နိုင်စွမ်းတွေပါဝင်ပါတယ်။  အဲဒါကြောင့် လုံခြုံစိတ်ချမှုအာမခံနိုင်ဖို့ တစ်ခုတည်းအတွက်နှင့် ကျွန်တော်တို့လေယာဉ်ဟာ  ယခင်လေယာဉ်တွေထက် စမ်းသပ်မှုတွေ အများကြီးပိုလုပ်ခဲ့တယ်လို့တောင်ပြောလို့ရပါတယ်” လို့သူကပြောပါတယ်။

အရပ်သုံးလေယာဉ်တစ်စီးအတွက် ကုန်ကျစရိတ်ဟာ အလွန်အရေးကြီးတယ်လို့ ဝူက ပြောပါတယ်။ အဲဒါကြောင့် C919 ဒီဇိုင်းအဖွဲ့ဟာ ခေတ်မီပြီးဖြစ်တဲ့ ဒီဇိုင်နှင့်နည်းပညာများစွာကို ရယူခဲ့တယ်လို့ သူကပြောပါတယ်။

“ဥပမာအားဖြင့် အဲရိုဒိုင်းနမစ်ဒီဇိုင်းလိုမျိုး လောင်စာဆီသက်သာအောင် ကျွန်တော်တို့စနစ်သစ်တစ်ခုရယူခဲ့တယ်။ သုံးရတာ စရိတ်သက်သာသလောက် ထိန်းသိမ်းဖို့လည်း လွယ်ကူတယ်လို့ ပြောတယ်။ ခုခံမှုနည်းတော့ ပျံသန်းနေစဉ်အတွင်း ကန်အားများများစားစားမလိုတော့ ဆီစားသက်သာတယ်။ ဒီလေယာဉ်ဟာ အလေးချိန်ပေါ့ပါးတဲ့ အတွက် ကုန်စည်များများတင်နိုင်တယ်” လို့ ဝူကဆက်ပြောပါတယ်။

C919 ဒီဇိုင်းထုတ်လုပ်သူတွေဟာ ခရီးသည်တွေ သက်သောင့်သက်သာထိုင်နိုင်အောင်ကိုပါ အရေးကြီးကိစ္စတစ်ခုအဖြစ် မှတ်ယူဒီဇိုင်းလုပ်ခဲ့ပါတယ်။

“ဥပမာ.. ကျွန်တော်တို့ဟာ နေရာပိုကျဉ်းတဲ့ လေယာဉ်ထဲမှာ အလယ်ခုံမှာ မထိုင်ချင်ကြဘူးမဟုတ်လား။ အဲဒါကြောင့် အလယ်ကလူပိုသက်သောင့်သက်သာဖြစ်အောင် အလယ်ခုံကို ပိုပြီးကျယ်ကျယ်ပေးထားလိုက်တယ်” လို့ ဝူကပြောပါတယ်

အဲဒီအပြင် အရပ်နိမ့်တဲ့လူတွေက ပစ္စည်းထည့်ဖို့အံကို ဆွဲယူရတာခက်တာမျိုးရှိခဲ့တော့ အဲဒီအံကိုဖွင့်လို့ရတဲ့ လက်ကိုင်ကို လူတိုင်းလက်လှမ်းမီနိုင်တဲ့ နေရာမှာထားပေးထားပါတယ်။

C919ဟာ ဆီစားသက်သာတဲ့အတွက် ကာဘွန်ထုတ်လုပ်မှုကိုလည်း လျှော့ချပေးနိုင်ပါတယ်။ တစ်ပြိုင်နက်တည်း  ကျွန်တော်တို့ဟာ ပတ်ဝန်းကျင်ထိန်းသိမ်းရေးအထောက်အကူပြုတဲ့ ပစ္စည်းတွေ ထည့်ထားပေးတယ် လို့ သူကဆိုပါတယ်။

ဒီလေယာဉ်ကို ပြည်တွင်းအတွက်သာမက နိုင်ငံတကာဈေးကွက်အတွက်ပါ ရည်ရွယ်ထုတ်လုပ်တာဖြစ်တယ်လို့သိရပါတယ်။

လေယာဉ်ဟာ  ၁၅၈ခုံမှ ၁၆၈ခုံအထိရှိပါတယ်။ ဝယ်ယူသူ ၂၈ နေရာမှ အစီးရေ ၈၁၅ စီးကြိုတင်အမှာရရှိပြီးဖြစ်တယ်လို့ သိရပါတယ်။

Source CCTV+

Published 2 Oct 2022

ပေါ်တူဂီ ဘောလုံးအကျော်ဇေယျဖြစ်တဲ့ လူးဝစ် ဖီဂိုနှင့် နိုင်ငံတကာ ဘောလုံးသမားတွေပါဝင်တဲ့ အသင်းတစ်သင်းဟာ အမြင့်မှာကစားတဲ့ ဘောလုံးပွဲအတွက် ဂင်းနက်စ်၏ ကမ္ဘာ့မှတ်တမ်းစံချိန်ချိုးဖို့ ကမ္ဘာ့ဆွဲအားသုည(ကမ္ဘာ့ဆွဲအားမရှိ)တဲ့ အခြေအနေတစ်ခုမှာ သူတို့ရဲ့ ကျွမ်းကျင်မှုတွေကို ပြသခဲ့ကြပါတယ်။

မာစတာကတ်က ကမကထပြုလုပ်ပေးတဲ့ ဂင်းနက်စ် ကမ္ဘာ့မှတ်တမ်းစံချိန်တင်ကြိုးပမ်းမှုအဖြစ် ဖီဂိုနှင့် ကမ္ဘာတစ်လွှားက အားကစားသမားတွေဟာ ဩဂုတ်လ(၂၀)ရက်မှာလေယာဉ်ပေါ် ဘောလုံးကွင်းတစ်ကွင်း အထူးဖန်တီးပေးထားတဲ့ လေယာဉ်တစ်စီးဖြင့် လိုက်ပါ ခဲ့ကြပါတယ်။ အမြင့်ပေ ၂၀၂၃၀ မှာ ကမ္ဘာ့ဆွဲအားကင်းမဲ့ဘောလုံးကစားနိုင်အောင် လေယာဉ်ဟာ မျဉ်းကွေး ပျံသန်းမှု  လမ်းကြောင်း parabolic flight path အတိုင်း ပျံသန်းပေးပြီး သုညကမ္ဘာ့ဆွဲအားဖြစ်အောင် ဖန်တီးပေးပါတယ်။ လေယာဉ် ပေါ်ပါ ဘောလုံးကွင်း ကလေးထဲမှာ သူတို့ အသင်းနှစ်သင်းခွဲ ဘောလုံး  ကစားခဲ့ကြပါတယ်။ သူတို့ဟာ ကမ္ဘာ့ဆွဲအားသုညparabolic flight path ဖြင့် အမြင့်ဆုံးပျံသန်း ဘောလုံးကစားကြသူများအဖြစ် ဂင်းနက်စ် မှတ်တမ်း စံချိန်ချိုးခဲ့ပါတယ်။

“ဘောလုံးဟာ နယ်စည်းတွေကို ကျော်လွန်ပြီး ကမ္ဘာအနှံ့က ပြည်သူတွေကို ညီညွတ်စေတယ်။ ယဉ်ကျေးမှုတွေ၊ နိုင်ငံသားတွေဆိုတာတွေကို ဖြတ်ကျော်ပြီး စိတ်လှုပ်ရှားမှုတွေပြင်းထန်ပေါက်ကွဲတဲ့ သွင်းပြင်အခြေအနေရှိတဲ့ ဘောလုံး ကွင်းတွေမှာ ကျွန်တော် ဘောလုံးကစားကြတယ်။  မြေပြင်အထက် အမြင့်ပေနှစ်သောင်းမှာ ဒီ လှပတဲ့ ကစားပွဲကစားရ တာ အတွေ့အကြုံအတူတူလို့ခံစားရတယ်။  ကြောက်ရွံခြင်းကင်းတဲ့ ဘောလုံးအရူးအမူးဖြစ်သူတွေဟာ မကြုံစဖူး အမြင့် မှာ အားကစားပွဲအတွက် သူတို့ရဲ့ ပြင်းပြတဲ့ ဇောအဟုန်တွေနှင့် ကစားခဲ့ကြတယ်” လို့ အသက် ၄၉နှစ်အရွယ်ရှိပြီဖြစ်တဲ့ ဖီဂိုက သတင်းထုတ်ပြန်ပါတယ်။

လေယာဉ်ပျံအတွင်းထဲမှာ တည်ဆောက်ထားတဲ့ ဘောလုံးကွင်းက ၇၅ စတုရန်းမီတာကျယ်ဝန်းပါတယ်။လေယာဉ်ကို အပေါ်တက်အောက်ဆင်း စက်ဝန်းပြတ်ပုံစံပျံသန်းပေးခြင်း parabolic flight path ဖြင့် ကမ္ဘာ့ဆွဲအားမဲ့အောင်ဖန်တီးယူ ရတာဖြစ်ပါတယ်။

တစ်ဖက်လေးဦးစီနှင်ကစားကြရမှာ ဖီဂိုပါတဲ့ အသင်းက နှစ်ဂိုး တစ်ဂိုးနှင့် အနိုင်ရရှိခဲ့ပါတယ်။ သူနင့်အတူ ကစားကြသူတွေဟာ ဥရောပ၊လက်တင်အမေရိကနှင့် အရှေ့အလယ်ပိုင်းကကစားသမားတွေဖြစ်ကြပါတယ်။

Source UPI/ESPN

#Oddly_News

#Zero_gravity_Soccer

#Luis_Figo

Published 29 Sept 2022

ဘရာဇီးနိင်ငံ မြောက်ပိုင်း အမေဇုန်နာ့စ်ပြည်နယ်၊ကဲရီယိုမြို့ က တံတားတစ်စင်း  ဗုဒ္ဓဟူးနေ့က ပြိုကျခဲ့ရာ အနည်းဆုံး လူ(၃)ဦး သေဆုံးကာ ၁၅ ဦးပျောက်ဆုံးနေပါတယ်။

အမေဇုန်နာ့စ် မီးသတ်ဌာနဟာ ပျောက်ဆုံးနေသူတွေကို ဆက်လက်ရှာဖွေနေပါတယ်။ အဲဒီံတံတားဟာ ကဲရီယိုမြို့ကို ဖြတ်သွားတဲ့ BR-319 အမြန်လမ်းမကြီးပေါ်မှာ ရှိပါတယ်။ ကဲရီယိုမြို့ဟာ ပြည်နယ်မြို့တော် မန်နော့စ်မြို့မှ ၆၂ မိုင် အကွာမှာရှိပါတယ်။

တံတားပြိုကျချိန်မှာ အချို့ကားတွေဟာ တံတားပေါ်ကဖြတ်သန်းမောင်နှင်နေတာကြောင့် လူ(၁၄)ဦး ထိခိုက်ဒဏ်ရာရရှိခဲ့ပါသေးတယ်။ တံတားမပြိုကျခင် တံတားပေါ်မှာ ယာဉ်ကြောပိတ်ဆို့မှုရှိခဲ့လို့ တံတားဟာ အက်ကြောင်းရာထင်ခဲ့တယ်လို့ မျက်မြင်သက်သေတော်တော်များများကပြောကြပါတယ်။

Source AFP/Reuters

#Amazonas_Brazil

#Bridge_Collapse

#Brazil