Published_ 25 July 2023

မြန်မာနိုင်ငံရှိ သီလဝါအထူးစီးပွားရေးဇုန်၌ စွမ်းအင်သစ်သုံး မော်တော်ယာဉ် ထုတ်လုပ်တပ်ဆင်သည့် စက်ရုံများတည်ထောင်၍ လာရောက်ရင်းနှီးမြှုပ်နှံရန် ဖိတ်ခေါ် ပါကြောင်း Guangxi Institute of Science and Technology မှ ညွှန်ကြားရေးမှူး Ms. Cai Xuping နှင့် နန်နင်းမြို့ မြန်မာကောင်စစ်ဝန်ချုပ် ဦးကျော်စိုးသိန်းတို့ ဇူလိုင် ၂၄ ရက်တွင် တွေ့ဆုံစဉ် ဆွေးနွေးပြောကြားခဲ့ကြောင်းသိရပါတယ်။

မြန်မာနိုင်ငံနှင့် တရုတ်နိုင်ငံ၊ ကွမ်ရှီးကျွမ့်ကိုယ်ပိုင်အုပ်ချုပ်ခွင့်ရဒေသတို့အကြား စံချိန်စံနှုန်းဆိုင်ရာနှင့် နည်းပညာကဏ္ဍများ၌ ပူးပေါင်းဆောင်ရွက်နိုင်ရန်အတွက် Guangxi Institute of Science and Technology မှ ညွှန်ကြားရေးမှူး Ms. Cai Xuping ဦးဆောင်တဲ့ ကိုယ်စားလှယ်အဖွဲ့သည် မြန်မာကောင်စစ်ဝန်ချုပ်ရုံးသို့ လာရောက်တွေ့ဆုံခဲ့တာ ဖြစ်ပါ တယ်။

ထိုသို့တွေ့ဆုံရာတွင် Ms. Cai Xuping က အောက်တိုဘာ (၁၂)နှင့်(၁၃) ရက်တို့တွင် ကွမ်ရှီးဒေသ၊ လျှိုကျိုးမြို့၌ကျင်းပမည့် (၃)ကြိမ်မြောက် China-ASEAN Standardization Cooperation Forum သို့ ကောင်စစ်ဝန်ချုပ်အပါအဝင် မြန်မာနိုင်ငံမှဌာနဆိုင်ရာ အကြီးအကဲများ တက်ရောက်ရန် ဖိတ်ကြားပါကြောင်း ပြောကြားခဲ့ပါတယ်။

ကောင်စစ်ဝန်ချုပ်မှ ဖိုရမ်၌ ဆွေးနွေးမည့် ခေါင်းစဉ်များအနက် “စွမ်းအင်သစ်သုံး မော်တော်ယာဉ်” ခေါင်းစဉ်တွင် လာရောက်လေ့လာနိုင်ရန် မြန်မာနိုင်ငံရှိ သက်ဆိုင်ရာ ဝန်ကြီးဌာနမှ ကိုယ်စားလှယ်များ၊ လုပ်ငန်းရှင်များကိုလည်း ဖိတ်ခေါ်တက်ရောက် စေလိုပါကြောင်း ပြောကြားခဲ့ပါတယ်။

မြန်မာနိုင်ငံသည် တရုတ်နိုင်ငံမှ လျှပ်စစ်သုံးမော်တော်ယာဉ်များ အများဆုံး တင်သွင်းလျက်ရှိပြီး၊ လျှိုကျိုးမြို့သည် လျှပ်စစ်သုံးမော်တော်ယာဉ် အဓိကထုတ်လုပ်သည့် မြို့တစ်မြို့ဖြစ်ရာ ထိုသို့ လာရောက်လေ့လာနိုင်ခြင်းဖြင့် နှစ်ဖက်လုပ်ငန်းရှင်များအကြား လုပ်ငန်းချိတ်ဆက်မှုများရရှိကာ ပူးပေါင်းဆောင်ရွက်မှုများ မြှင့်တင်နိုင်မှာ ဖြစ်ပါတယ်။

Ms. Cai Xuping က မြန်မာကိုယ်စားလှယ်အဖွဲ့ လျှိုကျိုးမြို့တွင် “စွမ်းအင်သစ်သုံး မော်တော်ယာဉ်” ထုတ်လုပ်သည့်စက်ရုံသို့ သွားရောက်လေ့လာနိုင်ရေး စီစဉ်ဆောင်ရွက် ပေးမည်ဖြစ်ပါကြောင်းနှင့် “စွမ်းအင်သစ်သုံးမော်တော်ယာဉ်” နှင့် ဆက်စပ်သည့် ဖိုရမ် တစ်ခုကိုလည်း စီစဉ်သွားမှာ ဖြစ်တယ်လို့ ဆိုပါတယ်။
ygm_mnn
#local_news
#YMG #Yangon_Times

မဲခေါင်ဒေသနိုင်ငံများဖြစ်တဲ့ တရုတ်၊ ကမ္ဘောဒီးယား၊ လာအို၊ မြန်မာ၊ ထိုင်းနဲ့ ဗီယက်နမ် (၆)နိုင်ငံက မီဒီယာများ တက်ရောက်ခဲ့သော တရုတ်နိုင်ငံမှာ ကျင်းပခဲ့တဲ့ လန်ချန်း-မဲခေါင် (၁၀)ရက်ကြာ ခရီးစဥ်အတွင်း ဇူလိုင်(၄)ရက်မှာ ခရီးစဉ်နောက်ဆုံးနေ့အဖြစ် ယူနန်ပြည်နယ် ဖူယွမ်ခရိုင်ရှိ မဂ္ဂါဝပ် ၈၀၀ ထွက်ရှိသော တောင်ပေါ် လေအားလျှပ်စစ်ထုတ်လုပ်ရေးလုပ်ငန်းခွင်သို့ သွားရောက်လေ့လာခွင့်ရခဲ့ပါတယ်။

အဆိုပါစီမံကိန်းမှာ တရုတ်နိုင်ငံအတွင်း တောင်ပေါ်ဒေသမှာ တည်ဆောက်ထားသော လေအားတာဘိုင် စီမံကိန်းများတွင် အကြီးဆုံးဖြစ်တယ်လို့သိရပြီး တရုတ်နိုင်ငံရဲ့ ဖွံ့ဖြိုးဆဲတောင်ပေါ်ဒေသတွေ အမြန်ဆုံးဖွံ့ဖြိုးစေဖို့ လေတိုက်နှုန်းကောင်းတဲ့ တောင်ပေါ်ဒေသတွေမှာ အဆင့်မြင့်လေအားတာဘိုင်များကို အသုံးပြုကာ လျှပ်စစ်ဓာတ်အားများ ထုတ်လုပ်နေခြင်းပဲဖြစ်ပါတယ်။

ယူနန်ပြည်နယ် ဖူယွမ်ခရိုင်ရှိ မဂ္ဂါဝပ် ၈၀၀ ထွက်ရှိမယ့် တောင်ပေါ် လေအားလျှပ်စစ် ထုတ်လုပ်ရေး စီမံကိန်းဟာဆိုရင် ၂၀၂၃ ခုနှစ် မေလ ၈ ရက်မှာ စီမံကိန်းကို အပြည့်အဝလည်ပတ်ခဲ့တာဖြစ်ပြီး ဒီစီမံကိန်းမှာဆိုရင် ၆ ဒသမ ၇ မဂ္ဂါဝပ်ထုတ်လုပ်နိုင်တဲ့ လေအားတာဘိုင်ပေါင်း ၁၃၅ ခု တည်ဆောက်ပြီးတော့ လျှပ်စစ်ဓာတ်အား ထုတ်လုပ်နေတာဖြစ်ပါတယ်။

လေအားတာဘိုင်တစ်ခုကနေ လျှပ်စစ်ဓာတ်အား ၆ ဒသမ ၇ မဂ္ဂါဝပ် ထုတ်လုပ်နိုင်ဖို့ တာဘိုင်တစ်ခုရဲ့ ဗဟိုချက်အမြင့် (ပင်မတိုင်)ကို ၁၁၀ မီတာ၊ မော်တာအချင်း ၁၉၁ မီတာနဲ့ အမြင့်ဆုံးအလေးချိန် တန် ၁၅၀ အထိ တည်ဆောက်ခဲ့ရတာဖြစ်ပြီး တရုတ်နိုင်ငံမှာ လေရဟတ်တာဘိုင်များ ဆောက်လုပ်မှုစံချိန်သစ် ‌ရေးထိုးနိုင်ခဲ့တာဖြစ်တယ်လို့လည်း လေ့လာခွင့်ရရှိခဲ့ပါတယ်။

အဆိုပါစီမံကိန်းကနေ တရုတ်နိုင်ငံရဲ့ မဟာဓာတ်အားလိုင်းသို့ နှစ်စဥ် လျှပ်စစ်ဓာတ်အား ၂,၀၆၀ ဂစ်ဂါဝပ်နာရီ(GWh) ထုတ်လုပ်ပေးနိုင်မှာဖြစ်ပြီး အခွန်ငွေ ယွမ်သန်း ၁၀၀ ကျော်ရရှိမယ်လို့ မျှော်မှန်းထားတာပါ။ ဒါ့အပြင် စံကျောက်မီးသွေးတန်ချိန် ၆၄၁,၀၀၀ ကို ကယ်တင်နိုင်ပြီး ကာဗွန်ဒိုင်အောက်ဆိုဒ် ထုတ်လွှတ်မှု တန်ချိန် ၁ ဒသမ ၇ သန်းကျော်နှင့် ဆာဖာဒိုင်အောက်ဆိုဒ် ထုတ်လွှတ်မှု တန်ချိန် ၁,၁၀၀ ကျော် ‌လျော့ကျစေမှာဖြစ်တယ်လို့ ဖော်ပြထားတဲ့ အချက်အလက်များအရ သိရပါတယ်။

ဒီလိုစံချိန်အသစ်တွေ ရေးထိုးနိုင်ခဲ့တဲ့ လေအားလျှပ်စစ်စီမံကိန်းကိုတော့ တရုတ်နိုင်ငံရဲ့ ကုမ္ပဏီတစ်ခုဖြစ်သော နိုင်ငံတော်လျှပ်စစ်ဓါတ်အား ရင်းနှီးမြှုပ်နှံမှုကော်ပိုရေးရှင်းလီမိတက်(SPIC)ရဲ့ SPIC Yunnan International Power Investment Co., Ltd (SPICYN)က တည်ဆောက်ခဲ့တာဖြစ်ပါတယ်။

SPIC က PV စွမ်းအင်၊ လေအားလျှပ်စစ်၊ နျူကလီးယားစွမ်းအင်၊ ရေအားလျှပ်စစ်၊ ကျောက်မီးသွေးစွမ်းအင်၊ သဘာဝဓါတ်ငွေ့စွမ်းအင်နဲ့ ပြန်လည်ပြည့်ဖြိုးမြဲစွမ်းအင် စတဲ့စွမ်းအင်မျိုးဆက်နဲ့ သက်ဆိုင်တဲ့လုပ်ငန်းတွေကို ဆောင်ရွက်နေတဲ့ ကုမ္ပဏီတစ်ခုဖြစ်ပါတယ်။

လန်ချန်း-မဲခေါင် စီမံကိန်းတွေထဲက တစ်ခုအဖြစ် SPICYN ကနေ မြန်မာပြည်မြောက်ပိုင်း ချီဖွေမြို့နယ်အတွင်း ဧရာဝတီမြစ်အဖျားပိုင်းတွင် အဓိကစတင်မြစ်ဖျားခံရာမေခမြစ်ရဲ့  မြစ်လက်တက်ဖြစ်သော ချီဖွေမြစ်ပေါ်မှာ ချီဖွေငယ် ရေအားလျှပ်စစ်စီမံကိန်းကို တည်ဆောက်ခဲ့တာဖြစ်ပါတယ်။

ချီဖွေငယ် ရေအားလျှပ်စစ်စီမံကိန်းကတော့ ၉၉ မဂ္ဂါဝပ် လျှပ်စစ်ဓာတ်အား ထုတ်လုပ်နိုင်သော စက်တပ်ဆင်ထားပြီး စက်ရုံကနေထွက်ရှိသော လျှပ်စစ်ဓာတ်အားရဲ့ ၆၉ ရာခိုင်နှုန်းကို မြန်မာနိုင်ငံမြောက်ပိုင်းသို့ ထောက်ပံ့ပေးထားတာဖြစ်ပြီး  ၂၀၂၂ ခုနှစ် နှစ်အကုန်အထိ မြန်မာနိုင်ငံမြောက်ပိုင်း ဓာတ်အားကွန်ယက်စနစ်အတွင်းသို့ ၁၉,၀၀၀ ဂစ်ဂါဝပ်နာရီ (GWh) ပို့လွှတ်ပေးနိုင်ခဲ့တယ်လို့ လေ့လာသိရှိခဲ့ရပါတယ်။

ချီဖွေငယ် ရေအားလျှပ်စစ်စီမံကိန်းက ပန်းဝါစစ်ဆေးရေးဂိတ်မှ ကီလိုမီတာ ၈၀ နဲ့ မြစ်ကြီးနားမြို့မှ ကီလိုမီတာ ၁၂၀ ကွာဝေးပြီး ကချင်ပြည်နယ်အတွင်း အဓိကရေထောက်ပံ့ရာစီမံကိန်းဖြစ်တာကြောင့် မြစ်ကြီးနားမြို့ရဲ့ မြို့ပြဧရိယာ၊ မိုးကောင်း၊ မိုးညှင်းနဲ့ ဖားကန့်နယ်မြေများကိုပါ လျှပ်စစ်ဓာတ်အား ထောက်ပံ့ပေးနိုင်ခဲ့တာပါ။

ထို့အတူ မြန်မာနိုင်ငံအနောက်ပိုင်း ရခိုင်ပြည်နယ်အတွင်းမှာလည်း တရုတ်-မြန်မာ ပူးပေါင်းပြီးတော့ လေအားလျှပ်စစ်စီမံကိန်းတွေ တည်ဆောက်ဖို့ စီစဥ်နေတယ်လို့ သိရပါတယ်။ ဒီလိုပူးပေါင်းမှု ခြေလှမ်းအဖြစ် ရခိုင်ပြည်နယ်အတွင်း အမ်းမြို့၊ ဂွမြို့နဲ့ သံတွဲမြို့တို့မှာ စုစု‌ပေါင်းမဂ္ဂါဝပ် ၃၆၀ ထွက်ရှိမယ့် လေအားလျှပ်စစ် စီမံကိန်းသုံးခုအတွက် သဘောတူညီမှုစာချွန်လွှာ (MOA)ကို ၂၀၂၃ ခုနှစ် မတ်လ ၁ ရက်မှာ လက်မှတ်ရေးထိုးခဲ့တာဖြစ်ပါတယ်။

အဆိုပါ သဘောတူညီမှုစာချွန်လွှာ (MOA)အရ အမ်းလေအားလျှပ်စစ်စီမံကိန်း ၁၅၀ မဂ္ဂါဝပ်၊ ဂွလေအားလျှပ်စစ်စီမံကိန်း ၁၀၀ မဂ္ဂါဝပ်၊ သံတွဲလေအားလျှပ်စစ်စီမံကိန်း ၁၁၀ မဂ္ဂါဝပ်တို့ဖြစ်ပါတယ်။ ၂၀၂၃ ခုနှစ် ဒီဇင်ဘာလအတွင်းမှာ ဂွစီမံကိန်းရဲ့ ပထမအဆင့် ၅၀ မဂ္ဂါဝပ်ကို စတင်ဆောင်ရွက်မှာဖြစ်ပြီးတော့ စီမံကိန်းသုံးခုလုံးကို လာမယ့် ၂၀၂၅ ခုနှစ်အတွင်းမှာ လျှပ်စစ်ဓာတ်အား ထုတ်လုပ်နိုင်မှာဖြစ်တယ်လို့ လျှပ်စစ်စွမ်းအားဝန်ကြီးဌာနက သိရပါတယ်။

ပြီးခဲ့တဲ့ ၂၀၂၂ ခုနှစ် နှစ်ဆန်းပိုင်းအထိ ရရှိတဲ့အချက်အလက်များအရ မြန်မာနိုင်ငံရဲ့ လျှပ်စစ်ဓာတ်အား ထုတ်လုပ်မှုမှာတော့ သဘာဝဓာတ်ငွေ့မှ ၅၆ ရာခိုင်နှုန်း၊ ရေအားမှ ရာခိုင်နှုန်း ၄၀ ၊ ကျောက်မီးသွေးမှ သုံးရာခိုင်နှုန်း၊ ပြန်ပြည့်မြဲစွမ်းအင် အရင်းအမြစ်များမှ တစ်ရာခိုင်နှုန်း ထုတ်လုပ်လျက်ရှိပါတယ်။

 မြန်မာနိုင်ငံအနေဖြင့် လာမယ့် ၂၀၃၀ ပြည့်နှစ်မှာတော့ တစ်နိုင်ငံလုံး လျှပ်စစ်ဓာတ်အား ရရှိရေးစီမံချက် ဆောင်ရွက်နေပြီး လျှပ်စစ်ဓာတ်အား ထုတ်လုပ်မှုရဲ့ ကိုးရာခိုင်နှုန်းကို နေစွမ်းအင် (Solar Energy)၊ လေအားလျှပ်စစ် (Wind Energy) စတဲ့ ပြန်ပြည့်မြဲစွမ်းအင်အရင်းအမြစ်တွေကနေ လျှပ်စစ်ဓာတ်အားထုတ်လုပ်နိုင်ရေး ရည်မှန်းထားတာဖြစ်ပါတယ်။

ဒီလို တရုတ်-မြန်မာ ပူးပေါင်းဆောင်ရွက်မယ့် လေအားလျှပ်စစ်စီမံကိန်းတွေကနေ မြန်မာနိုင်ငံရဲ့ လျှပ်စစ်ထုတ်လုပ်မှုအပေါ် ဘယ်လောက်အထိ ထဲထဲဝင်ဝင် ပါဝင်နိုင်မလဲဆိုတာကိုတော့ ဆက်လက်စောင့်ကြည့်ရမှာဖြစ်ပါတယ်။

ဇယျေ ရေးသားသည်

Published_ 12 July 2023

ယူနန်ပြည်နယ်နှင့် မြန်မာနိုင်ငံအကြား ပူးပေါင်းဆောင်ရွက်မှုများ မြှင့်တင်ရေး၊ မြန်မာ-တရုတ် နှစ်နိုင်ငံ ကုန်သွယ်ရေး နယ်စပ်ဂိတ်များနှင့် စပ်လျဉ်းသည့် ကိစ္စရပ်များ၊ နယ်စပ်ကုန်သွယ်ရေး၌ ပဲ/နှမ်း တင်ပို့ရောင်းချခြင်းအပါအဝင် အခြားပို့ကုန်တင်ပို့ ရောင်းချ ခြင်းကိစ္စရပ်များကို မြန်မာသံအမတ်ကြီးနှင့် ယူနန်ပြည်နယ် ဒုတိယအုပ်ချုပ်ရေးမှူးတို့ ဆွေးနွေးခဲ့ကြောင်း သိရပါတယ်။

တရုတ်နိုင်ငံဆိုင်ရာ မြန်မာသံအမတ်ကြီး ဦးတင်မောင်ဆွေသည် ဇူလိုင် ၁၁ ရက်၌ ကူမင်းမြို့ရှိ ယူနန်ကျန်းကျွမ်းဧည့်ဂေဟာရှိ ကျင်းကွေ့ဧည့်ခန်းမတွင် ယူနန်ပြည်နယ် အစိုးရ၏ ဒုတိယအုပ်ချုပ်ရေးမှူး မစ္စတာ ဝမ်ဟောက် ဦးဆောင်သည့်အဖွဲ့နှင့် တွေ့ဆုံဆွေးနွေးခဲ့တာ ဖြစ်ပါတယ်။

ထို့ပြင် နှစ်နိုင်ငံနယ်စပ်ဒေသရှိ တိုင်းရင်းသား လက်နက်ကိုင်များ နှင့် ပတ်သက် သည့် ကိစ္စရပ်များအပြင် မြန်မာ-တရုတ် နှစ်နိုင်ငံနိုင်ငံသားများ၏ အကျိုးနှင့် ပတ်သက်၍ လက်ရှိဆောင်ရွက်နေသည့် လုပ်ငန်းစဉ်များနှင့် တွေ့ကြုံနေရသည့် အခက်အခဲများကို အပြန်အလှန် ဆွေးနွေးညှိနှိုင်းခဲ့ကြပါတယ်။

ဆက်လက်၍ ပိုမိုထိရောက်စွာ ချစ်ကြည်ရင်းနှီးမှု မြှင့်တင်ရေးအတွက် ပူးပေါင်း ဆောင်ရွက်နိုင်မည့် နည်းလမ်းများကို နှစ်နိုင်ငံပူးပေါင်း၍ အကောင်အထည်ဖော် ဆောင်ရွက်သွားနိုင်ရန် ဆွေးနွေးခဲ့ကြပါတယ်။

အဆိုပါတွေ့ဆုံပွဲသို့ မြန်မာသံအမတ်ကြီးနှင့်အတူ ကူမင်းမြို့ ကောင်စစ်ဝန်ချုပ် ဦးသော်တာအောင်နှင့်အဖွဲ့ တက်ရောက်ခဲ့ပြီး၊ ယူနန်ပြည်နယ် အစိုးရမှ သံအမတ်ကြီး ဦးဆောင်သည့် ကိုယ်စားလှယ်အဖွဲ့အား အလုပ်သဘောညစာဖြင့် တည်ခင်းဧည့်ခံခဲ့ ကြောင်း သတင်းရရှိပါတယ်။
Yangon_Times/mnn
#Local_News
#YMG #Yangon_Times

Published_ 11 July 2023

တရုတ်နိုင်ငံ ပေကျင်းမြို၌ ရောက်ရှိနေသော ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေးဝန်ကြီးဌာနဝန်ကြီး ဒေါက်တာကံဇော်သည် ဇူလိုင် ၁၀ ရက် နံနက်ပိုင်းက တရုတ်နိုင်ငံ နိုင်ငံတကာဖွံဖြိုးတိုးတက်ရေးနှင့် ပူးပေါင်းဆောင်ရွက်ရေး အေဂျင်စီ၊ ဒုတိယဥက္ကဋ္ဌ Mr. Deng Boqing နှင့် သီးခြားတွေ့ဆုံ၍ နှစ်နိုင်ငံစီးပွားရေး ပူးပေါင်း ဆောင်ရွက်မှုတိုးမြှင့်ရေး၊ တရုတ်နိုင်ငံ၏အကူအညီဖြင့် အကောင်အထည်ဖော် ဆောင်ရွက်ဆဲစီမံကိန်းများ၊ အဆိုပြုစီမံကိန်းများနှင့် ရှေ့ဆက်ဆောင်ရွက်မည့် လုပ်ငန်း စဉ်များကို ဆွေးနွေးခဲ့ကြောင်း သိရပါတယ်။

ဇူလိုင် ၁၀ ရက်တွင် “ဖွံဖြိုးမှုမျှဝေခြင်းအတွက် ကမ္ဘာလုံးဆိုင်ရာ ဆောင်ရွက်ချက် ဖိုရမ်၏ ပထမအကြိမ် အဆင့်မြင့်ညီလာခံ” ကို “Global Development Initiative: Echo the Development Agenda and Call for Global Action” ခေါင်းစဉ်ဖြင့် ကျင်းပရာ ဝန်ကြီး ဒေါက်တာကံဇော် တက်ရောက်ခဲ့ပါတယ်။

အဆိုပါညီလာခံသို တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲဝင်၊ ဗဟိုနိုင်ငံခြားရေးရာ ကော်မရှင်ရုံး အကြီးအကဲ Mr. Wang Yi ၊ တရုတ်နိုင်ငံ နိုင်ငံတကာ ဖွံဖြိုးတိုးတက်ရေးနှင့် ပူးပေါင်းဆောင် ရွက်ရေးအေဂျင်စီ ဥက္ကဋ္ဌ Mr. Luo Zhao-hui ၊ ဖိတ်ကြားထားသော အာရှ၊ အာဖရိက၊ လက်တင်အမေရိက နိုင်ငံပေါင်း ၂၀ ကျော်မှ ကိုယ်စားလှယ်အဖွဲများနှင့် ကုလသမဂ္ဂနှင့် နိုင်ငံတကာအဖွဲအစည်း ၃၆ ခုတိုမှ အဆင့်မြင့်ကိုယ်စားလှယ်များ တက်ရောက်ခဲ့ကြပါတယ်။

ညီလာခံတွင် ကမ္ဘာလုံးဆိုင်ရာ ဖွံဖြိုးရေးကိစ္စများနှင့်စပ်လျဉ်း၍ ဘုံအကျိုးအမြတ် ရရှိစေရန် ရည်ရွယ်၍ ဖိုရမ်ခွဲလေးခု ဆက်လက်ကျင်းပခဲ့ရာ “ဆင်းရဲမှုလျှော့ချရေးနှင့် စိုက်ပျိုးရေး အသွင်ကူးပြောင်းမှုအတွက်ကမ္ဘာလုံးဆိုင်ရာ အများပြည်သူပိုင် ပစ္စည်းများ နှင့်စပ်လျဉ်း၍ ဖွံဖြိုးဆဲနိုင်ငံများအချင်းချင်း ပူးပေါင်းဆောင်ရွက်မှု ဖိုရမ်ခွဲ” သို့ တက်ရောက်၍ ဝန်ကြီးဒေါက်တာကံဇော်က အမှာစကား ပြောကြားခဲ့ပါတယ်။

အဆိုပါ ညီလာခံအပြီးတွင် ပါဝင်တက်ရောက်သည့် နိုင်ငံများ၏ သဘောတူညီမှုဖြင့် ပေကျင်းထုတ်ပြန်ချက်ကို ကြေညာခဲ့ကြောင်း သတင်းရရှိပါတယ်။
ygm_mnn
#local_news
#YMG #Yangon_Times

-ဇေယျရေးသားသည်

တရုတ်နိုင်ငံ၊ ကူမင်းမြို့က ယူနန်တက္ကသိုလ်ကို လေ့လာခွင့်ရတဲ့အချိန်မှာတော့ မြန်မာနိုင်ငံက ကျောင်းသားများအပြင် မြန်မာစာကို စိတ်ဝင်စားစွာ ‌လေ့လာသင်ယူနေသော တရုတ်လူမျိုး ကျောင်းသားတွေကိုပါ တွေ့လိုက်ရတာဟာ  မြန်မာနိုင်ငံသားတစ်ယောက်အနေနဲ့ အလွန်ပင် ဝမ်းသာကြည်နူးခဲ့ရပါတယ်။

ဒါ့အပြင် ယူနန်တက္ကသိုလ်ရဲ့ စာကြည့်တိုက်ထဲမှာ “မြန်မာစာအုပ်များ”ဆိုတဲ့ ဆိုင်းဘုတ်‌နဲ့ စာအုပ်စင်တစ်ခုကို တွေ့လိုက်တဲ့အချိန်မှာတော့ ဝမ်းသာကြည်နူးမှုနဲ့အတူ တဖက်မှာလည်း ဒီစာအုပ်စင်မှာ စာအုပ်လေးတွေ အပြည့်အဝမရှိဘဲ လိုအပ်ချက်လေးတွေ ရှိနေတာကို သတိထားမိခဲ့ပါတယ်။

 ယူနန်တက္ကသိုလ်ရဲ့  “မြန်မာစာအုပ်များ” ဆိုတဲ့ စာအုပ်စင်လေးမှာ စာအုပ်တွေနည်းနေရတဲ့ အကြောင်းအရင်းကတော့ ယူနန်တက္ကသိုလ်က ပါမောက္ခတွေ မြန်မာနိုင်ငံကို လာရောက်တဲ့အခါမှာ လက်ဆောင်ရရှိခဲ့တဲ့ စာအုပ်လေးတွေကိုသာ ကျောင်းသား/ကျောင်းသူများ ဖတ်ဖို့ထားပေးနိုင်ပြီး လိုအပ်တဲ့စာအုပ်တွေ ထပ်မံမရရှိတာနဲ့ လှူဒါန်းသူမရှိတာကြောင့် ဖြစ်တယ်လို့ သိခဲ့ရပါတယ်။

ဒီစာအုပ်စင်လေးအတွက် စာအုပ်လှူဒါန်းချင်တဲ့ မြန်မာလူမျိုးတစ်ယောက်အနေနဲ့ စုံစမ်းကြည့်မိတဲ့အခါမှာတော့ ယူနန်တက္ကသိုလ် မြန်မာစာဌာနနဲ့ ဆက်သွယ်ပြီး လှူဒါန်းလို့ရတယ်လို့ သိခဲ့ရပြီး ဒီလိုလှူဒါန်းမယ်ဆိုရင် ယူနန်တက္ကသိုလ်မှာ မြန်မာစာဘာသာ သင်ကြားနေတဲ့ ကျောင်းသားများအတွက် မြန်မာနိုင်ငံအကြောင်းကို ပိုမိုသိရှိစေမယ့် စာအုပ်တွေလှူဒါန်းပေးစေလိုတယ်လို့လည်း ကျောင်းသားတွေက ပြောပြပါတယ်။

ယူနန်တက္ကသိုလ်မှာ ဓာတုဗေဒပညာရပ်ကို အထူးပြုသင်ကြားနေတဲ့ မြန်မာကျောင်းသူ မချောစုစုထွေးနဲ့ တွေ့ဆုံမေးမြန်းခဲ့ရာမှာ “ဒီမှာကတော့ မြန်မာနိုင်ငံကို အများဆုံးသိသွားစေမယ့် စာအုပ်မျိုးတွေ တော်တော်များများကိုတော့ လှူစေချင်တယ်။ မြန်မာစာဘာသာကို လေ့လာနေတဲ့ တရုတ်ကျောင်းသားတွေလည်း များနေတယ်ဆိုတော့ မြန်မာနိုင်ငံကို လူအများသိသွားစေချင်တဲ့ စာအုပ်မျိုးတွေကို လှူစေချင်တယ်” လို့ သူမရဲ့ဆန္ဒကို ပြောပြခဲ့ပါတယ်။

ယူနန်တက္ကသိုလ်မှာ မြန်မာစာသင်ကြားဖို့ နှစ်နှစ်တစ်ကြိမ်ခေါ်ယူပြီး အတန်းတစ်တန်းမှာတော့ ကျောင်းသားဦးရေ ၂၀ ဝန်းကျင်ရှိကာ ဘွဲ့ရဖို့အတွက် လေးနှစ်တက်ရတာဖြစ်ပါတယ်။  ၂၀၂၃ ခုနှစ် ဇွန်လမှာတော့ ပထမဦးဆုံးအကြိမ် ဘွဲ့နှင်းသဘင်ကို ကျင်းပနိုင်ခဲ့တယ်လို့ ယူနန်တက္ကသိုလ်၊ မြန်မာစာဌာနရဲ့ ဌာနမှူး Pang Juncai က ရှင်းပြခဲ့ပါတယ်။

ယူနန်တက္ကသိုလ်တွင် မြန်မာစာကို သင်ကြားပေးရာမှာတော့ ပထမနှစ်ရဲ့ ပထမနှစ်ဝက်မှာ မြန်မာအက္ခရာဗျည်း ၃၃ လုံး အသံထွက်နဲ့ အက္ခရာရေးနည်းကို သင်ကြားပေးပြီး ဒုတိယနှစ်ဝက်မှာတော့ ဝါကျများလေ့လာနိုင်ပြီဖြစ်ကြောင်း Pang Juncai က ဆိုပါတယ်။

မြန်မာစာကို လေ့လာနေတဲ့ တရုတ်ကျောင်းသားများကတော့ ပါဠိစာလေ့လာရတာနဲ့ စာတမ်းများပြုစုရာမှာ မြန်မာနိုင်ငံနဲ့ပတ်သက်တဲ့ စာအုပ်စာပေများနဲ့ အချက်အလက်များ ရှာဖွေရာမှာ အဓိကအခက်အခဲရှိနေတယ်လို့လည်း သိခဲ့ရပါတယ်။

ဒီလိုအခက်အခဲနဲ့ပတ်သက်ပြီးတော့ ယူနန်တက္ကသိုလ်တွင် မြန်မာစာသင်ကြားနေသော တရုတ်လူမျိုး တတိယနှစ်ကျောင်းသား Qiu Yue က “ကျွန်‌တော်တို့ မြန်မာစာသင်တဲ့အချိန်မှာ သတင်းအချက်အလက်ရှာရာမှာ အခက်အခဲရှိတယ်။ ဥပမာ အခုချိန်မှာ ကျွန်တော်က စာတမ်းကိုရေးရတယ်။ ဒါပေမဲ့ ဒီစာတမ်းနဲ့ဆိုင်တဲ့ သတင်းတွေရဖို့ ခက်ခဲတယ်” လို့ သူက ရှင်းပြပါတယ်။

ယူနန်တက္ကသိုလ်မှ မြန်မာစာမေဂျာနဲ့ ကျောင်းပြီးတဲ့ ကျောင်းသားများအနေနဲ့ကတော့ နိုင်ငံခြားရေးဌာန၊ မြန်မာနိုင်ငံနဲ့သက်ဆိုင်တဲ့ ကုမ္ပဏီတွေမှာ အလုပ်ဝင်ကြတာဖြစ်ပြီး မြန်မာအကြောင်းကို ပိုမိုသိလိုတဲ့ ကျောင်းသားများကတော့ မဟာတန်း (Master)  ဆက်တက်ကြတာဖြစ်လို့ ပြည်ပနိုင်ငံသားတွေ မြန်မာစာပေကို ထိထိရောက်‌ရောက် ကျယ်ကျယ်ပြန့်ပြန့် လေ့လာနိုင်ဖို့အတွက် ယူနန်တက္ကသိုလ်က “မြန်မာစာအုပ်စင်” လေးမှာ မြန်မာစာပေချစ်သူများ ဆက်သွယ်လှူဒါန်းနိုင်အောင် ဖော်ပြပေးလိုက်ပါတယ်။

#Local_News
Published_ 8 July 2023

ကမ္ဘာလုံးဆိုင်ရာ ယဉ်ကျေးမှုအဆိုပြုချက်များကို လက်တွေ့ကျင့်သုံးနိုင်ရေးအတွက် ရန်ကုန်မြို့၌ဆွေးနွေးပွဲ တစ်ရပ်ကျင်းပခဲ့ကြောင်း မြန်မာနိုင်ငံဆိုင်ရာတရုတ်သံရုံးမှသိရသည်၊၊

အဆိုပါဆွေးနွေးပွဲကို ‘ကမ္ဘာလုံးဆိုင်ရာယဉ်ကျေးမှုအဆိုပြုချက်အား လက်တွေ့ကျင့်သုံး၍ တရုတ်-မြန်မာယဉ်ကျေးမှု ကူးလူးဖလှယ်ရေးနှင့်အပြန်အလှန် လေ့လာအတုယူမှုနက်ရှိုင်းစေခြင်း’ခေါင်းစဉ်ဖြင့် ဇူလိုင်လ ၇ ရက်နေ့ကရန်ကုန်တရုတ်ယဉ်ကျေးမှုစင်တာ၌ကျင်းပခဲ့ခြင်းဖြစ်သည်။

ဆွေးနွေးပွဲတွင် သံမှူး Mr.Pan Fengက သမ္မတMr.Xi Jinpingသည် ကမ္ဘာလုံးဆိုင်ရာယဉ်ကျေးမှုအဆိုပြုချက်ကို အဆိုပြုခဲ့ပြီး နိုင်ငံအသီးသီးမှပြည်သူများစည်းလုံးညီညွတ်စွာပူးပေါင်းဆောင်ရွက်မှုကိုတိုးမြှင့်ကြရန်၊ဘုံရန်သူ စိန်ခေါ်မှုများကိုအတူလက်တွဲရင်ဆိုင်ဖြေရှင်းရန်ဆိုသည့်အရေးကြီးလိုအပ်ချက်များအတွက် အချိန်မီ တုံ့ပြန်ခဲ့ကြောင်း၊ ၄င်းတွင်ကမ္ဘာ့ယဉ်ကျေးမှုမတူကွဲပြားမှုများကိုလေးစားရန်၊ လူသားအားလုံး၏ ဘုံတန်ဖိုးများကို ပြန့်ပွားစေရန်၊ယဉ်ကျေးမှုအမွေဆက်ခံခြင်းနှင့်ဆန်းသစ်တီထွင်ခြင်းကိုအလေးထားရန်၊နိုင်ငံအသီးသီးမှပြည်သူများ၏ အပြန်အလှန်သိရှိနားလည်မှုနှင့် ချစ်ကြည်ရင်းနှီးမှုများကိုတိုးမြှင့်ရန်ဆိုသည့် ကဏ္ဍလေးရပ် အဆိုပြုမှုများပါဝင်ကြောင်း ထည့်သွင်းပြောကြားခဲ့သည်၊၊

ရန်ကုန်တက္ကသိုလ်ဒုတိယပါမောက္ခဒေါ်ချိုချိုက သမ္မတMr.Xi Jinping ၏ ဆွေးနွေးညှိနှိုင်းပူးပေါင်း ဆောင်ရွက်ရန်အဆိုပြုမှုကို ထောက်ခံကြောင်း၊ အဆိုပြုချက်ကိုလက်တွေ့ကျင့်သုံးခြင်းဖြင့် နှစ်နိုင်ငံ ပြည်သူများအကြားနားလည်မှုနှင့်လေးစားမှုများကို ပိုမိုနက်ရှိုင်းစေမည်ဟုယုံကြည်ကြောင်း ပြောသည်၊၊

မြန်မာနိုင်ငံခရီးသွားလုပ်ငန်းအဖွဲ့ချုပ်ဥက္ကဌ ဦးရန်ဝင်းကတရုတ်နိုင်ငံ၏ အဆိုပြုချက်မှုနှင့်လမ်းညွှန်မှု အောက်၌ကပ်ရောဂါအလွန်တရုတ်-မြန်မာခရီးသွားလုပ်ငန်းကူးလူးဖလှယ်ရေးများကို အမြန်ဆုံးမျှော်လင့်ကြောင်းပြောသည်၊၊

မြန်မာနိုင်ငံအပြည်ပြည်ဆိုင်ရာ ထေရဝါဒဗုဒ္ဓသာသနာပြုတက္ကသိုလ် ဒုတိယပါမောက္ခချုပ် ဦးစိန်မော်တော်ကယဉ်ကျေးမှုအဆိုပြုချက်တွင် အဆိုပြုထားသည့်တန်းတူညီမျှမှု၊ အားလုံးပါဝင်မှုသဘောတရားနှင့် ဗုဒ္ဓဘာသာယဉ်ကျေးမှုတို့သည် မတူကွဲပြားသော်လည်း အကျိုးရလဒ်များတူညီကြောင်း၊ အဆိုပြုချက်ကို လက်တွေ့ကျင့်သုံးစဉ်အတွင်း တရုတ်-မြန်မာဗုဒ္ဓရေစက်နှင့်ချစ်ကြည်ရင်းနှီးမှုကို လက်ဆင့်ကမ်းအမွေဆက်ခံပြီး ပြန့်ပွားအောင်ဆောင်ရွက်နိုင်မည်ဟုမျှော်လင့်ကြောင်း ပြောကြားခဲ့သည်၊၊

ယင်းဆွေးနွေးပွဲတွင် နှစ်နိုင်ငံကြား ယဉ်ကျေးမှု၊ ခရီးသွားလာရေး၊ ဗုဒ္ဓဘာသာ၊ စာပေ၊ ပညာရေးစသည့် ကဏ္ဍများကူးလူးဖလှယ်ရေးဆိုင်ရာများ၊ အပြန်အလှန်လေ့လာအတုယူမှုများ ပိုမိုနက်ရှိုင်းစေရေးအတွက် ဘက်ပေါင်းစုံမှအကြံပြုဆွေးနွေးခဲ့ကြောင်း သိရသည်၊၊

#tthl #Local_News #ကမ္ဘာလုံးဆိုင်ရာ ယဉ်ကျေးမှုအဆိုပြုချက်
#Yangon_Times