Published 22 April 2023

နေပြည်တော်ကောင်စီနယ်မြေ၊ လယ်ဝေးမြို့နယ်အတွင်း ဧပြီ ၂၁ ရက် ညက လေဆင်နှာမောင်းတိုက်ခတ်ခံခဲ့ရတဲ့  အောင်မြင်ကုန်းကျေးရွာနှင့် တံတားဦးကျေးရွာတွေကို နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ဟာ ယနေ့ ဧပြီလ(၂၂)ရက် နံနက်ပိုင်းတွင်သွားရောက်ခဲ့ပြီး ကျေးရွာရှိပြည်သူတွေကို အားပေးကာ လိုအပ်တာတွေ ကူညီဆောင်ရွက်ပေးခဲ့တယ် လို့ နစကရဲ့သတင်းထုတ်ပြန်ချက်အရသိရပါတယ်။

ဧပြီ၂၁ရက် ည၆နာရီ မိနစ်၂၀ခန့်မှာ တိုက်ခတ်တဲ့ လေဆင်နှာမောင်းကြောင့် လယ်ဝေးမြို့နယ်အတွင်း ရှိ အောင်မြင်ကုန်းကျေးရွာရှိ လူနေအိမ် ၁၅၅ လုံး၊ စာသင်ကျောင်း ၁ ကျောင်း၊ ကျေးလက်ဆေးပေးခန်း ၁ လုံး၊ဘုန်းတော်ကြီးကျောင်း ၁ ကျောင်းနှင့် တံတားဦးကျေးရွာရှိ လူနေအိမ် ၇၇ လုံး၊ဘုန်းတော်ကြီးကျောင်း ၁ ကျောင်းတို့ ပျက်စီးဆုံးရှုံးခဲ့ပြီး ဒေသခံပြည်သူ ၁၁၃ ဦးထိခိုက်ဒဏ်ရာများ ရရှိခဲ့ကြောင်းနှင့် သေဆုံးသူ ၆ ဦးရှိပြီဖြစ်ကြောင်းလည်း သတင်းထုတ်ပြန်ထားပါတယ်။

လေပြင်းတိုက်ခတ်မှုကြောင့်ပျက်စီးခဲ့ရသည့် စာသင်ကျောင်းများကို လာမည့်ကျောင်းဖွင့်ချိန်အမီ ပြီးစီးအောင်ပြန်လည်တည်ဆောက်ပေးရန်၊ ဘုန်းတော်ကြီးကျောင်းကိုလည်း ကောင်းမွန်အောင်ပြန်လည်ဆောင်ရွက်ပေးရန်နှင့် လူနေအိမ်များကိုလည်း အိမ်ရာကွက်စနစ်တကျပြန်လည်ဖော်ဆောင်၍ နေအိမ်များ ပြန်လည်တည်ဆောက်နေထိုင် နိုင်စေရေးအတွက်လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ နေပြည်တော်ကောင်စီနှင့် နေပြည်တော်တိုင်းစစ်ဌာနချုပ်တို့မှ လိုအပ်သည်များကို ကူညီဆောင်ရွက်ပေးရန်၊ ကျေးရွာရှိ လေဘေးသင့်ပြည်သူများ လတ်တလောစားရေးအဆင်ပြေစေရေးအတွက်လည်း လိုအပ်သည်များကို ကူညီထောက်ပံ့ဆောင်ရွက်ပေးရန်ဗိုလ်ချုပ်မှူးကြီးက တာဝန်ရှိသူတွေကို မှာကြားခဲ့ပါတယ်။

အဲဒီအပြင် လေဆင်နှာမောင်းတိုက်ခတ်မှုကြောင့် သေဆုံးခဲ့ရသည့်အောင်မြင်ကုန်းကျေးရွာနှင့် တံတားဦးကျေးရွာမှ ပြည်သူများအတွက် ထောက်ပံ့ငွေများကို ပေးအပ်ခဲ့ပါတယ်။

နစက ဥက္ကဋ္ဌသည် နေပြည်တော် အထွေထွေရောဂါကုဆေးရုံကြီး ခုတင်(၁၀၀၀) သို့သွားရောက်ပြီး  ဆေးရုံတက်ရောက် ဆေးဝါးကုသမှုခံယူလျက်ရှိသည့် လေဘေးသင့်ပြည်သူများအား တစ်ဦးချင်း ရင်းရင်းနှီးနှီး အားပေးစကားပြောကြားကာ စားသောက်ဖွယ်ရာများ ထောက်ပံ့ ပေးအပ်ပြီး လိုအပ်သည်များ ညှိနှိုင်းဆောင်ရွက်ပေးခဲ့တယ်လို့လည်း သတင်းထုတ်ပြန် ထားပါတယ်။

-ymg/knl

#YangonMediaGroup

#ဗိုလ်ချုပ်မှူးကြီးမင်းအောင်လှိုင်

#လယ်ဝေးမြို့နယ်၊အောင်မြင်ကုန်းနှင့်တံတာဦးကျေးရွာများလေဆင်နှာမောင်းတိုက်ခတ်ခံရ

Published 21 April 2023

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ဟာ မြန်မာနိုင်ငံသို့ရောက်ရှိနေတဲ့ ထိုင်းနိုင်ငံ  ဒုတိယဝန်ကြီးချုပ်နှင့် နိုင်ငံခြားရေးဝန်ကြီး H.E. Mr.Don Pramudwinai နှင့် နေပြည်တော်မှာတွေ့ဆုံကာ နှစ်နိုင်ငံ နယ်စပ်ဒေသတည်ငြိမ် အေးချမ်းရေးနှင့် လက်နက်ကုန်သွယ်မှုများပပျောက်ရေးအပါအဝင် နှစ်နိုင်ငံပူးပေါင်းဆောင်ရွက်ရန် ကိစ္စတွေကို ဆွေးနွေးခဲ့တယ်လို့ နစကရဲ့သတင်းထုတ်ပြန်ချက်အရသိရပါတယ်။

ဗိုလ်ချုပ်မှူးကြီးမင်းအောင်လှိုင်သည် ထိုင်းနိုင်ငံ၊ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး H.E. Mr.Don Pramudwinai ဦးဆောင်သည့် ကိုယ်စားလှယ်အဖွဲ့အား ယနေ့ ဧပြီ၂၁ရက် မွန်းလွဲပိုင်းတွင်နေပြည်တော်ရှိ နစကဥက္ကဋ္ဌရုံး၊ သံတမန်ဆောင် ဧည့်ခန်းမ၌လက်ခံတွေ့ဆုံခဲ့တာဖြစ်ပါတယ်။

နစက ဥက္ကဋ္ဌဟာ ထိုင်းနိုင်ငံ ဒုတိယဝန်ကြီးချုပ်နှင့်နိုင်ငံခြားရေးဝန်ကြီးနှင့်ဆွေးနွေးရာမှာ မြန်မာနိုင်ငံ၊ ထိုင်းနိုင်ငံနှင့် လာအိုနိုင်ငံတို့အကြား နယ်စပ်ဖြတ်ကျော်မီးခိုးမြူငွေ့ ညစ်ညမ်းမှုဆိုင်ရာ လျှော့ချရေးအတွက် ပူးပေါင်းဆောင်ရွက်လျက်ရှိမှု အခြေအနေများ၊ နှစ်နိုင်ငံနယ်စပ်ဒေသတည်ငြိမ်အေးချမ်းရေး၊ တရားမဝင်လူကုန်ကူးမှုများ၊ မူးယစ်ကုန်သွယ်မှုများနှင့် လက်နက်ကုန်သွယ်မှုများ ပပျောက်ရေးအတွက် ပူးပေါင်းဆောင်ရွက်သွားမည့် ကိစ္စရပ်များနှင့် စပ်လျဉ်းပြီးရင်းရင်းနှီးနှီးဆွေးနွေးခဲ့ကြတာဖြစ်တယ်လို့ သတင်းထုတ်ပြန်ချက်မှာဖော်ပြထားပါတယ်။

-အဆိုပါတွေ့ဆုံပွဲသို့ နစက ဥက္ကဋ္ဌနှင့်အတူ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးသန်းဆွေ၊ အပြည်ပြည် ဆိုင်ရာပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကိုကိုလှိုင်နှင့် တာဝန်ရှိသူများတက်ရောက်ကြပြီး ထိုင်းနိုင်ငံ၊ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး နှင့်အတူမြန်မာနိုင်ငံဆိုင်ရာ ထိုင်းနိုင်ငံ သံအမတ်ကြီး H.E. Mr. Mongkol Visitstump နှင့်တာဝန်ရှိသူများ တက်ရောက်ခဲ့ကြတာဖြစ်ပါတယ်။

-ymg/knl

#YangonMediaGroup

#ဗိုလ်ချုပ်မှူးကြီးမင်းအောင်လှိုင်

#ထိုင်းနိုင်ငံဒုတိယဝန်ကြီးချုပ်နှင့်နိုင်ငံခြားရေးဝန်ကြီး H.E. Mr.Don Pramudwinai

Published _17 April 2023

နိုင်ငံစီးပွားရေး အနုတ်လက္ခဏာမှ အပေါင်း ၃ ရာခိုင်နှုန်းခန့် တိုးတက်လာခဲ့ကြောင်း နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင် က ယနေ့ ဧပြီလ ၁၇ ရက် (နှစ်ဆန်းတစ်ရက်)မြန်မာနှစ်သစ်ကူး နှုတ်ခွန်းဆက်မင်္ဂလာစကားတွင် ထည့်သွင်းပြောကြားခဲ့သည်။

"ကျွန်တော်တို့နိုင်ငံမှာ ၂၀၂၁ ခုနှစ်အတွင်း စီးပွားရေးအကြပ်အတည်းများ ရှိခဲ့ပါတယ်။ ၂၀၂၂ ခုနှစ်မှာ ကျွန်တော်တို့ပြည်တွင်းအားတွေ စုစည်းမှုကောင်းလာသောကြောင့် ကုန်ထုတ်လုပ်မှုတွေ ကောင်းမွန်လာပါတယ်။ နယ်စပ်ကုန်သွယ်မှုတွေကို အတိုင်းအတာတစ်ခုအထိ ဖွင့်လှစ်လာနိုင်ခြင်းတွေကြောင့် လုပ်ငန်းတွေပြန်လည်လည်ပတ်လာနိုင်ပြီး နိုင်ငံရဲ့စီးပွားရေးဟာ အနုတ်လက္ခဏာမှ အပေါင်း ၃ ရာခိုင်နှုန်းနီးပါး တိုးတက်လာခဲ့ပါတယ်” ဟု သူက နှစ်သစ်ကူးနှုတ်ခွန်းဆက်စကားတွင်ထည့်သွင်းပြောကြားခဲ့ခြင်းဖြစ်သည်။

“စီးပွားရေးမြှင့်တင်မှုတွေဆောင်ရွက်ရာမှာ ခိုင်မာတဲ့စီးပွားရေးလုပ်ငန်းတွေကို ဆောင်ရွက်ရန်လိုအပ်ပြီး ပြည်တွင်းကုန်ထုတ်လုပ်မှုလုပ်ငန်းတွေကို အားပေးခြင်းဟာ နိုင်ငံ့စီးပွားမြှင့်တင်ရေးကို အားပေးခြင်းဖြစ်ပါတယ်။ MSME လုပ်ငန်းတွေကိုအားပေး ဆောင်ရွက်လျက်ရှိပါတယ်။ ထုတ်ကုန်တွေ ပိုမိုတင်ပို့နိုင်ဖို့ ကျွန်တော်တို့ပြည်သူတွေက ပိုမိုကြိုးပမ်းဆောင်ရွက်ခဲ့ရင် ဒီနှစ်ဟာ ယခင်နှစ်တွေကထက် စီးပွားရေးတိုးတက်မှုအား ပိုကောင်းလာမယ်လို့ ကျွန်တော်အပြည့်အဝ ယုံကြည်ပါတယ်” ဟုလည်း ဗိုလ်ချူပ်မှူးကြီးက ဆက်လက်ပြောကြားခဲ့သည်။

သို့ရာတွင် အကြမ်းဖက်မှုဖြစ်စဉ်တွေရှိနေသည့် နိုင်ငံတွေသည် တိုးတက်မှုနှောင့်နှေးနေသည်ဟုလည်း နစက ဥက္ကဋ္ဌက ပြောဆိုသွားသည်။

စားရေရိက္ခာဖူလုံရေးအတွက် အဓိကအသက်မွေး မြူရေးလုပ်ငန်းဖြစ်သော စိုက်ပျိုးရေးနှင့်မွေးမြူရေးကိုအခြေခံသည့် ကုန်ထုတ်လုပ်မှုလုပ်ငန်းတွေကို အမျိုးသားရေးရည်မှန်းချက်အဖြစ် ချမှတ်၍ အားပေးမြှင့်တင်ဆောင်ရွက်လျက် ရှိကြောင်းလည်း နစက ဥက္ကဌက နှုတ်ခွန်းဆက်စကားတွင် ထည့်သွင်းပြောဆိုသွားခဲ့သည်။

ymg/mt

#YangonMediaGroup

#နစကဥက္ကဋ္ဌ

#ဗိုလ်ချူပ်မှူးကြီးမင်းအောင်လှိုင်

#မြန်မာ့နှစ်သစ်ကူးနှုတ်ခွန်းဆက်စကား

Published _17 April 2023

မြန်မာနှစ်ဆန်းတစ်ရက် ဧပြီလ ၁၇ ရက်တွင် နစက၏ ပြစ်ဒဏ်လွတ်ငြိမ်းခွင့် တွင် စီမံဘဏ္ဍာဝန်ကြီးဟောင်း ဦးကျော်ဝင်း ပြန်လည်လွတ်မြောက်လာကြောင်းသိရသည်။

ဦးကျော်ဝင်းသည် ဒေါ်အောင်ဆန်းစုကြည်၏ စီးပွားရေးအကြံပေး ပါမောက္ခရှောင်တာနယ်တို့နှင့် အတူ ထောင် ၃ နှစ် ချခံထားရခြင်းဖြစ်ပြီး ယနေ့တွင် ရမည်းသင်းအကျဉ်းထောင်မှ ပြန်လည် လွတ်မြောက်လာခြင်း ဖြစ်ကြောင်း ၊ကျန်းမာရေးလည်းကောင်းမွန်ကြောင်း ယင်း၏ မိသားစုနှင့် နီးစပ်သူက ပြောသည်။

ပြီးခဲ့သည့် ၂၀၂၁ ခုနှစ် ဖေဖော်ဝါရီလ ၁ ရက်နောက်ပိုင်းတွင် နစက မှ ဦးကျော်ဝင်းအား အစိုးရလျှို့ဝှက်ချက်အက်ဥပဒေပုဒ်မ ၃-၁(ဂ)ဖြင့် နစက က တရားစွဲသောကြောင့် အမှုရင်ဆိုင်ပြီးနောက် ၂၀၂၂ ခုနှစ် စက်တင်ဘာလ ၂၈ ရက်တွင် ထောင်ဒဏ် ၃ နှစ် ချမှတ်ခံခဲ့ရခြင်း ဖြစ်သည်။

ယနေ့တွင် ပြစ်ဒဏ်ကျခံနေရတဲ့ အကျဉ်းသား အကျဉ်းသူ ၃၀၁၅ ဦးကို ပြစ်ဒဏ်လွတ်ငြိမ်းခွင့်ပြုလိုက်ကြောင်း နစက က ထုတ်ပြန်ကြေညာထားသည်။ယင်းတွင်ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ (၁) အရ နောက်တစ်ကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည် ဟူသော စည်းကမ်းသတ်မှတ်ချက်ဖြင့်ယင်းတို့ကျခံရန်ကျန်ရှိသော ပြစ်ဒဏ်များအပေါ်လျှော့ပေါ့၍ ပြစ်ဒဏ်လွတ်ငြိမ်းခွင့်ပြုလိုက်ကြောင်းဖော်ပြထားသည်။

ymg/mt
Yangon_Media_Group

Published 17 April 2023

ကမ္ဘာတဝှမ်းမှနိုင်ငံများအပေါ် အမေရိကန်မှချမှတ်ထားတဲ့ စီးပွားရေးပိတ်ဆို့မှုများကြောင့် ဒေါ်လာတန်ဖိုး  ထိခိုက်လာနိုင်တဲ့ အန္တရာယ်ရှိနေကြောင်း အမေရိကန်ဘဏ္ဍာရေးဝန်ကြီး 'ဂျဲနတ်ယယ်လန်'က ပြောကြား လိုက်ပါတယ်။

အမေရိကန်က အရေးယူပိတ်ဆို့မှုများ ဆက်လက်လုပ်ဆောင်နေတဲ့အချိန်မှာ အဆိုပါနိုင်ငံများက အခြား  ရွေးချယ်  စရာငွေကြေးတွေကို ရှာကြံနေကြပြီး အမေရိကန်ဒေါ်လာနဲ့ တိုင်းပြည်ကို အန္တရာယ်ကျရောက်စေနိုင်တယ်လို့ ဆိုပါတယ်။

အချိန်ကြာလာတာနဲ့အမျှ ဒေါ်လာရဲ့အခန်းကဏ္ဍကို ထိခိုက်စေနိုင်တဲ့ ငွေကြေးပိတ်ဆို့မှုတွေကို ဆောင်ရွက်နေတာဟာ အန္တရာယ်များလှပါတယ်လို့ ယယ်လန်က CNN ကို ပြောကြားခဲ့ပါတယ်။

တရုတ်၊ ရုရှား၊ အီရန်တို့အနေနဲ့ အခြားငွေကြေးများ ရွေးချယ်စေဖို့အခွင့်အလမ်းဖြစ်လာပေမယ့် ကမ္ဘာလုံးဆိုင်ရာဒေါ်လာငွေကြေးနေရာမှာ အလွယ်တကူအစားထိုးလို့မရတဲ့ နိုင်ငံတွေလည်းရှိနေကြောင်း ပြောပြခဲ့ပါတယ်။

အမေရိကန်နဲ့ မဟာမိတ်များ အတူတကွအသုံးချမယ်ဆိုရင် ဒဏ်ခတ်ပိတ်ဆို့မှုတွေက အလွန်အရေးပါတဲ့ လက်နက်တစ်ခုဖြစ်ကြောင်း ယယ်လန်က ပြောကြားခဲ့ပါတယ်။

လက်ရှိယူကရိန်းစစ်ပွဲအတွက် ရုရှားကိုထိန်းချုပ်ကန့်သတ်နိုင်စေရန် တရုတ်၊ ယူအေအီး၊ တူရကီလုပ်ငန်းများအပါအဝင် ပစ်မှတ်ပေါင်း ၁၂၀ နီးပါးကို အမေရိကန်ဘဏ္ဍာရေးနှင့် နိုင်ငံခြားရေးဌာနမှ ဒဏ်ခတ်ပိတ်ဆို့မှုများပြုလုပ်ပြီး ရက်ပိုင်းမှာပဲ ယယ်လန်က အခုလိုပြောကြားလိုက်တာဖြစ်ပါတယ်။

အမေရိကန်မဟာမိတ်တွေဖြစ်တဲ့ တူရကီနဲ့ ယူအေအီးတို့မှ လုပ်ငန်းများကို အခုအချိန်မှာဒဏ်ခတ်ပိတ်ဆို့တာဟာ ဆိုးကျိုးသက်ရောက်မှုတွေ ရှိလာနိုင်တယ်လို့ ကျွမ်းကျင်သူများက သုံးသပ်နေကြပါတယ်။  တင်ပါ

အမေရိကန်ရဲ့လုပ်ရပ်ဟာ တရားမဝင်တဲ့လုပ်ရပ်ဖြစ်ကြောင်း တရုတ်က ထုတ်ပြန်လိုက်ပါတယ်။

"ဒါဟာ တစ်ဖက်သတ်ပိတ်ဆို့အရေးယူတာဖြစ်ပြီး လက်တံရှည်တရားစီရင်ခြင်းတစ်ခုဖြစ်ကာ လုပ်ငန်းတွေရဲ့ တရားဝင်အခွင့်အရေးနဲ့ အကျိုးစီးပွားတွေကို ဆိုးရွားစွာ ထိခိုက်စေတဲ့အပြင် ကမ္ဘာ့ထောက်ပံ့ရေးကွင်းဆက်ရဲ့ လုံခြုံရေးနဲ့တည်ငြိမ်မှုကိုလည်း ထိခိုက်စေပါတယ်" လို့ တရုတ်ကဆိုပါတယ်။

ပြီးခဲ့တဲ့လက အိန္ဒိယဟာ ရူပီးငွေဖြင့်ကုန်သွယ်ဖို့ နိုင်ငံ ၁၈ နိုင်ငံနဲ့ သဘောတူညီခဲ့ပါတယ်။

အီရန်ကတော့ တရုတ်၊ ရုရှားတို့နဲ့ကုန်သွယ်ရာမှာ ဒေါ်လာအသုံးမပြုတော့ပါဘူး။

Source: WION

#YangonMediaGroup

#အမေရိကန်ဒဏ်ခတ်ပိတ်ဆို့မှု

#အမေရိကန်ဘဏ္ဍာရေးဝန်ကြီးဂျဲနတ်ယယ်လန်

#အမေရိကန်ဒေါ်လာ

Published 16 April 2023

တောက်လျောက်ကျဆင်းလာနေတဲ့ တောင်ကိုရီးယားရဲ့ သန္ဓေအောင်နှုန်းကို ကုစားဖို့ လွန်ခဲ့တဲ့ ၁၅နှစ်ကစပြီး အစိုးရက ဒေါ်လာ ၂၁၂ ဘီလျံအထိသုံးစွဲခဲ့ပေမယ့် အဆိုပါကျဆင်းမှုရပ်တန့်သွားအောင် သိပ်မလုပ်နိုင်ခဲ့တဲ့အတွက် တောင်ကိုရီး ယားဟာ ယခုဆို နိုင်ငံရပ်ခြားအလုပ်သမားတွေပိုပြီးခေါ်ယူလာနေရပါတယ်။

သန္ဓေအောင်နှုန်းကျဆင်းမှုအကြပ်အတည်း တစ်စိတ်တစ်ပိုင်း ပါဝင်ပတ်သက်မှုကြောင့် ၂၀၅၀ အရောက်မှာ လူဦးရေ ထူထပ်တဲ့ အင်ဒိုနီးရှားနှင့် နိုင်ဂျီရီးယားတို့ဟာ စီးပွာရေးအရွယ်အစားအရ တောင်ကိုရီးယားကို ကျော်ဖြတ်လိမ့်မယ်လို့ ပညာရှင်တွေက ခန့်မှန်းထားကြပါတယ်။

နောက်အဆိုးမြင်တစ်ခုကတော့  ယခုပုံစံအတိုင်းမျိုးအောင်နှုန်းကျဆင်းနေမယ ၂၇၅၀ အရောက်မှာ တောင်ကိုးရီးယား    ဟာ နိုင်ငံအဖြစ်ကနေပါ ပျောက်ကွယ်သွားနိုင်တယ်ဆိုတာပဲဖြစ်ပါတယ်။

ဒေါ်လာဘီလျံချီသုံးစွဲခဲ့ပေမယ့် တောင်ကိုရီးယားရဲ့ ကလေးမွေးနှုန်းဟာ ဆက်လက်ကျဆင်းနေပါတယ်။ ၂၀၂၂ခုနှစ်မှာ တောင်ကိုရီးယားအမျိုးသမီးတစ်ဦးဟာ သူ့ဘဝတလျောက်လုံး ကလေးမွေးတာ တစ်ယောက်တောင်မပြည့်တဲ့ ( ၀.၇၈) အထိကျဆင်းနေပါတယ်။ ဆိုးလ်မြို့မှာဆိုရင် ဒီထက်ပင်ကျဆင်းနေပြီး (၀.၅၉)ပဲရှိပါတော့တယ်။

အချို့သောစီးပွားရေးကော်ပိုရေးရှင်းကြီးတွေက တောင်ကိုရီးယားရဲ့စီးပွားရေးမှာ မင်းမူနေပေမယ့် ကျန်တဲ့ ၉၉ ရာခိုင်နှုန်း ဟာ သူတို့နှင့်နှိုင်းယှဉ်ရင် အတော့်ကိုသေးငယ်တဲ့ ကုမ္ပဏီတွေဖြစ်နေကြပါတယ်။ ဒါပေမယ့် အဲဒီကုမ္ပဏီသေးတွေက လစာနိမ့်ပြီး အလုပ်ပင်ပန်းလွန်းလို့  တောင်ကိုးရီးယားလူငယ်တွေကြားထဲ သိပ်ပြီး ရေပန်းမစားလှပါဘူး၊ အဲဒါကြောင့် စိုက်ပျိုးရေး၊မွေးမြူရေးနှင့်ငါးလုပ်ငန်းတွေ၊ ကုန်ထုတ်လုပ်ငန်းတွေဟာ သူတို့လိုချင်တဲ့ အလုပ်သမားတွေ လုံလုံလောက် လောက်မရရှိကြဘဲဖြစ်နေကြပါတယ်။

အဲဒါကြောင့်လည်း အစိုးရဟာ နိုင်ငံခြားအလုပ်သမားတွေပိုပြီး ရှာဖွေနေကြရပါတယ်။

၁၉၉၀ပြည့်နှစ်မှာ တောင်ကိုရီးယာနိုင်ငံတွင် ကာလရှည်နေထိုင်ခွင့်ရတဲ့ နိုင်ငံခြားသား အရေအတွက်ဟာ ၄၉၀၀၀ ဦး ရှိပါတယ်။ ဒါပေမယ့် ရက်၉၀ အောက်နေကြတဲ့သူတွေအပါအဝင် အတည်တကျနေထိုင်တဲ့ နိုင်ငံခြားသားတွေဟာ ၂၀၂၉ခုနှစ်ကုန်ပိုင်းမှာ ၂.၅၂ သန်း အထိမြင့်တက်သွားခဲ့ပါတယ်။  ဒါဟာ တောင်ကိုရီးယားလူဦးရေ ၅၁သန်းရဲ့ ၄.၉ ရာခိုင် နှုန်းအထိရှိပါတယ်။

အဲဒီနိုင်ငံခြားသားတွေထဲက ၄၀ ရာခိုင်နှုန်းဟာ တရုတ်နိုင်ငံသားတွေဖြစ်ကြပြီး  ကိုရီးယားသွေးပါသူတွေဖြစ်ပါတယ်။  ကိုရီးယားတရုတ်တွေဟာ ဘာသာစကားတူ အစားအသောက်တူလို့ သူတို့ကိုပိုပြီးလိုချင်နေကြပါတယ်။ ဗီယက်နမ်လူမျိုး တွေဟာ ဒုတိယအများဆုံးဖြစ်ပြီး ထိုင်းက တတိယမြောက်အများဆုံးဖြစ်ကြပါတယ်။

၂၀၀၄ခုနှစ်မှာ တောင်ကိုရီးယားဟာ ကျွမ်းကျင်မှုနည်းတဲ့အလုပ်သမားတွေစတင်လက်ခံခဲ့ပါတယ်။ အဲဒီအစီအစဉ်အရ  အစိုးရဟာ အလုပ်ခန့်ထားခြင်းဆိုင်ရာ လုပ်ငန်းစဉ်အစအဆုံး ထိန်းချုပ်ထားပါတယ်။ စတင်ခန့်ရာကနေ သူတို့ကို အလုပ် နေရာချတာအလယ် သူတို့နိုင်ငံပြန်ပို့တာအဆုံးအားလုံးကိုထိန်းချုပ်ထားတာပါ။ အဲဒီအစီအစဉ်အောက်မှာ ကုန်ထုတ် လုပ်ငန်း၊ ဆောက်လုပ်ရေး၊ စိုက်ပျိုးရေး၊မွေးမြူရေး၊ဝန်ဆောင်မှုနှင့်ငါးလုပ်ငန်းတွေ ပါဝင်ပါတယ်။

အလုပ်သမားဈေးကွက်ကိုဖွင့်ပေးခြင်းလို့ ပညာရှင်တစ်ဦးကပြောတဲ့ အဆိုပါလှုပ်ရှားမှုမှာ နိုင်ငံခြာသားအလုပ်သမား တွေကို ပီအာရ်လို့ခေါ်တဲ့ အမြဲတမ်းအခြေချနေထိုင်ခွင့်ရသူတွေဖြစ်အောင်ကူညီဖို့ တေင်ကိုရီးယားအစိုးရက  နည်းမျိုးစုံနှင့်ပြင်ဆင်ခဲ့ပါတယ်။

နိုင်ငံတကာလက်ထပ်ထိမ်းမြားခြင်းမှတစ်ဆင့် နိုင်ငံခြားသားအလုပ်သမားတွေဟာ အခုဆို တရားဝင်အတည်တကျ နေထိုင်ခွင့် ဒါမှမဟုတ် ပီအာရ် အဆင့်အတန်းကို ယခုရရှိနေကြပြီဖြစ်ပါတယ်။ အဲဒါကြောင့်လည်း နိုင်ငံခြားသားအလုပ် သမားတွေနှင့် တောင်ကိုရီးယားနိုင်ငံသားတွေ လက်ထပ်ထိမ်းမြားမှုဟာ ၂၀၀၀ပြည့်နှစ်ကတည်းက တဟုန်ထိုး တိုး တက်လာခဲ့ပါတယ်။  တောင်ကိုရီးယား နိုင်ငံသား ၁၀ဦးလက်ထပ်ရင် တစ်ဦးဟာ နိုင်ငံခြားသားနှင့်လက်ထပ်တာ အထူး သဖြင့်တရုတ်နှင့်ဗီယက်နမ်နိုင်ငံသားတွေနှင့်လက်ထပ်တာအထိ ဆယ်ချိုးတစ်ချိုး ဖြစ်လာပါတယ်။

အဲသလိုနိုင်ငံသားဖြစ်လာသူတွေဟာ သူတို့ရဲ့ အိမ်ထောင်ဖက်နှင့် ကွာရှင်းလို့ပဲဖြစ်ဖြစ် သေဆုံးသွားလို့ပဲဖြစ်ဖြစ် နောက် တစ်ဦးနှင့် အိမ်ထောင်ထပ်ပြုရင် အိမ်ထောင်အသစ်ဟာ အလိုအလျောက် တောင်ကိုရီးယားနိုင်ငံသားဖြစ်လာပါတယ်။ ဒီလိုနည်းနှင့် တောင်ကိုးရီးယားနိုင်ငံသားဖြစ်လာကြတဲ့သူတွေထဲမှာ အရှေ့တောင်အာရှနိုင်ငံကလာသူတွေအရေ အတွက် ဟာ တစ်ဟုန်ထိုးတက်လာနေပါတယ်။

အစိုးရရဲ့ကျယ်ပြန်တဲ့အားပေးမှုတွေက နိုင်ငံခြားသားအလုပ်သမားတွေကို အမြဲတမ်းနေထိုင်ခွင့် သို့မဟုတ်ပီအာရ်အဆင့်   အတန်းရရှိ တာတွေတိုးပွားလာရခြင်းရဲ့ အဓိကအချက်တစ်ခုဖြစ်တယ်လို့  တောင်ကိုရီးယားလူဝင်မှုမူဝါဒစာအုပ်ရေးသား သူ ဆေကာဂွန်းတက္ကသိုလ် ပါမောက္ခ အီကူမီဟာရူကီကပြောပါတယ်။

“ နိုင်ငံတစ်လွှားက နေရာ ၃၁၉နေရာမှာ တောင်ကိုရီးယားဟာ အခမဲ့ ဘာသာစကားသင်တန်းတွေလုပ်ပေးနေတယ်” လို့ ဟာရူကီကပြောပါတယ်။

ဒါပေမယ့် အစိုးရက အဲသလိုဘတ်ဂျက်အကြီးအကျယ်သုံးနေတဲ့အပေါ် ပြည်သူတွေက မကျေမချမ်းဖြစ်လာနေပါတယ်။  လစာတွေက များပေမယ့် နိုင်ငံခြားသားအလုပ်သမားတွေဟာ အလုပ်ချိန်အရှည်ကြီးအလုပ်လုပ်နေကြရပြီး  နိုင်ငံရဲ့ အလုပ်သမားတွေနှင့်ဆက်ဆံရာမှာ ရှေးရိုးအစဉ်အလာလိုဖြစ်နေခဲ့တဲ့ ခွဲခြားဆက်ဆံခံရတာတွေနှင့် ထိပါး နှောက်ယှက်ခံနေရတာတွေကိုလည်း နိုင်ငံခြားသားအလုပ်သမားတွေကြုံတွေ့နေကြရပါတယ်။

ဒါပေမယ့်လည်း အရှေ့တောင်အာရှက လူငယ်တွေအတွက် တောင်ကိုရီးယားဟာ အလုပ်လုပ်ဖို့ ဆွဲဆောင်မှုရှိနေတဲ့ နေရာအဖြစ်ဆက်လက်တည်ရှိနေဆဲဖြစ်ပါတယ်။ အဲဒီအထဲမှာ ကေပေါ့ယဉ်ကျေးမှုနှင့် ကိုရီးယားဒရာမာဇာတ်လမ်း တွေကလည်း ကိုရီးယားကိုသွားဖို့ ဆွဲဆောင်နေတဲ့ အစိတ်အပိုင်းတစ်ခုပါပဲ။

မလုံလောက်မှုတွေရှိနေလင့်ကစား ကျဆင်းနေတဲ့ မွေးဖွားနှုန်းကြောင့်ဖြစ်ပေါ်လာတဲ့ စီးပွားရေးအကျိုးဆက်ကို သက်သာအောင်ဘယ်လိုလုပ်မယ်ဆိုတဲ့ တန်ဖိုးရှိလှတဲ့သင်ခန်းစာတွေကိုတော့ တောင်ကိုရီးယားရဲ့ နိုင်ငံခြား လုပ်သား မူဝါဒက ပေးကမ်းနေတုန်းပဲဖြစ်ပါတယ်။

Source” Nikkei Asia

#YangonMediaGroup

#SpecialReport

#အထူးဆောင်းပါး

#တောင်ကိုရီးယား

#တောင်ကိုရီးယားကလေးမွေးနှုန်းကျဆင်း

#တောင်ကိုရီးယားနိုင်ငံခြားသားအလုပ်သမား