ရှမ်းပြည်နယ်(မြောက်ပိုင်း)ကိုးကန့်ဒေသတိုက်ပွဲဖြစ်စဉ်များနှင့် ထိုတိုက်ပွဲတွေဘာကြောင့်ဖြစ်ခဲ့ရသလဲ ဆိုသည်ကို နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောကြားထားတာဖြစ်ပါတယ်။ အဆိုပါ ပြောကြားချက်ကို အပိုင်း(၃)ပိုင်းခွဲ၍ သတင်းထုတ်ပြန်ရေးအဖွဲ့မှရရှိခဲ့ရာ မူရင်းအတိုင်းပြန်လည်ဖော်ပြပေးပါတယ်။
၁ နိုဝင်ဘာ ၂၀၂၃
ကေအိုင်အေထိန်းချုပ်ထားတဲ့ လိုင်ဇာမြို့အနီးကို ယနေ့ နိုဝင်ဘာ ၁ရက်မှာ ဒုတိယမြောက် နေ့အဖြစ် မြန်မာ့တ့ပ်မတော် ဂျက်တိုက်လေယာဉ်တစ်စီးက ဗုံးကြဲတိုက်ခိုက်ခဲ့တယ်လို့ ကေအိုင်အေပြောရေးဆိုခွင့်ရသူ ဗိုလ်မှူးကြီး နော်ဘူက ပြောတယ်လို့ အေအက်ဖ်ပီသတင်းဌာနက သတင်းရေးသားခဲ့ပါတယ်။
နိုဝင်ဘာ ၁ရက် ယနေ့ မွန်းလွဲ ၁၂နာရီ၄၅မိနစ်မှာ ကချင်ပြည်နယ် လိုင်ဇာအနီး ကို မြန်မာ့ တပ်မတော် ဂျက်လေယာဉ်တစ်စီးက လာရောက်ဗုံးကြဲတိုက်ခိုက်ခဲ့တာဖြစ်တယ်လို့ ဗိုလ်မှူးကြီး နော်ဘူက ပြောခဲ့တာဖြစ်ပါတယ်။ အဆိုပါတိုက်ခိုက်မှုကြောင့်ထိခိုက်သေဆုံးမှု မသိရသေးဘူးလို့ သူက အေအက်ဖ်ပီကို ဆက်ပြောပါတယ်။ ဒါပေမယ့် ယမန်နေ့(အောက်တိုဘာ၃၁)ရက် ဗုံးကြဲတိုက်ခိုက်မှုမှာတော့ တစ်ဦးသေဆုံးပြီး ဆယ့်နှစ်ဦးထိခိုက်ဒဏ်ရာရရှိခဲ့တယ်လို့ သူကဆက်ပြောပါတယ်။
နစကရဲ့ သတင်းထုတ်ပြန်ရေးအဖွဲ့က အဆိုပါ အေအက်ဖ်ပီသတင်းပါကိစ္စနှင့် ပတ်သက်၍ ယခုသတင်းရေးသားသည့်အချိန်အထိ သတင်းထုတ်ပြန်ခြင်းမရှိသေးပါဘူး။
ယမန်နေ့က KIA အဖွဲ၏ လက်နက် ၊ ခဲယမ်း နှင့် မိုင်း ထုတ်လုပ်သည့် နေရာများနှင့် သိုလှောင်သည့်နေရာများကို တုန့်ပြန် တိုက်ခိုက်မှုများ ဆောင်ရွက်ခဲ့ကြောင်း နစကသတင်းထုတ်ပြန်ရေးအဖွဲ့က တရားဝင်သတင်းထုတ်ပြန်ခဲ့ပြီး
ပြည်သူလူထုနှင့် ပတ်သက်၍ နှောင့်ယှက် ထိပါးစေသော အကြမ်းဖက်လုပ်ရပ်များ ထပ်မံ ဆောင်ရွက်လာပါက လိုအပ်သော ပြန်လည် တုန့်ပြန်မှုများ ဆောင်ရွက်သွားမည်ဖြစ်ကြောင်းလည်း သတိပေးထားသည်။
Source AFP
၃၁ အောက်တိုဘာ ၂၀၂၃
အမေရိကန်နိုင်ငံခြားရေးဝန်ကြီး အန်တိုနီဘလင်ကင်သည် အစ္စရေးစစ်ပွဲအတွက် အရေးပေါ်အကူအညီပေးရန် ဆီးနိတ်ကြားနာမှုတစ်ခုကို အောက်တိုဘာ ၃၁ရက်က ပြုလုပ်နေစဉ်အတွင်း ဒါဇင်ခန့်ရှိတဲ့ စစ်ဆန့်ကျင်ရေး ဆန္ဒပြသူတွေဟာ ကြားဖြတ်ဆန္ဒပြဟစ်အော်ခဲ့တဲ့အတွက် ထိန်းသိမ်းခံခဲ့ရပါတယ်။
အဆိုပါဆီးနိတ်ကြားနာမှုမှာ အမေရိကန်နိုင်ငံခြားရေးဝန်ကြီး အန်တိုနီဘလင်ကင်နှင့် ကာကွယ်ရေးဝန်ကြီး လွိုက် ဩစတင်တို့ တက်ရောက်ပြီး အစ္စရေးနှင့် ယူကရိန်းအတွက် အမေရိကန်ဒေါ်လာ ၁၀၅ဘီလျံ အရေးပေါ်ရန်ပုံငွေ ထောက်ပံ့ရေးတင်ပြခဲ့ကြတာဖြစ်ပါတယ်။
ဆန္ဒပြသူတွေဟာ “ အပစ်အခတ်အခုရပ်” ဆိုပြီး ဟစ်ကြွေးခဲ့ကြပါတယ်။ တစ်ချို့ဟာ သူတို့ရဲ့လက်တွေကို ဆေးနီတွေခြယ်ပြီး လက်များဆန့်တန်းဆန္ဒပြခဲ့ကြပါတယ်။ သူတို့ဟာ ဆီးနိတ်ကြားနာမှုများအတွင်း ကြိမ်ဖန်များစွာ ကန့်ကွက်ဆန္ဒပြမှုတွေပြုလုပ်ခဲ့ကြပါတယ်။ ဘလင်ကန်နှစ့် ဩစတင်တို့က ဟားမားစ်ကိုတိုက်ခိုက်နေတဲ့ အစ္စရေး အတွက် ဒေါ်လာ ၁၄ ဘီလျံနှင့် ဂါဇာအပါအဝင်ဒေသတစ်ဝိုက်အတွက် လူသားချင်းစာနာထောက်ထားမှုဆိုင်ရာ အကူအညီ ၉.၁ ဘီလျံပေးဖို့ ဖြစ်ပါတယ်။
Source dailynews
၃၁ အောက်တိုဘာ ၂၀၂၃
အမေရိကန်ပြည်ထောင်စုက မြန်မာ့ရေနံနှင့်သဘာဝဓာတ်ငွေ့လုပ်ငန်းအပေါ် စီးပွားရေးပိတ်ဆို့ကန့်သတ်မှုပုံစံတစ်ခု ချမှတ်ခဲ့တယ်လို့ အမေရိကန်ဘဏ္ဍာရေးဝန်ကြီးဌာနကပြောတဲ့အကြောင်း ရိုက်တာကသတင်းပေးပို့ပါတယ်.
ဒါပေမယ့် အဆိုပါ စီးပွားရေးပိတ်ဆို့ကန့်သတ်မှုပုံစံဟာ လက်ရှိစစ်အစိုးရရဲ့ အဓိကနိုင်ငံခြားငွေရရှိနေတဲ့အရင်းအမြစ်ဖြစ်တဲ့ အဲဒီဌာနအပေါ် အပြည့်အဝပိတ်ဆို့အရေးယူမှုအထိမရောက်ရှိဘဲ အတိုင်းအတာတစ်ခုမှာရပ်ထားခဲ့တာဖြစ်တယ်လို့လည်း သတင်းကရေးပါတယ်။
ဒီဇင်ဘာ ၁၅ ရက်မှာစတင်မယ့် ယခုပိတ်ဆို့ကန့်သတ်မှုပုံစံဟာ နိုင်ငံတော်ပိုင် မြန်မာ့ရေနံနှင့်သဘာဝဓာတ်ငွေ့လုပ်ငန်း MOGE အပေါ် အမေရိကန်တွေရဲ့ အချို့သော ဘဏ္ဍာရေးလုပ်ငန်းတွေကိုသာ ကန့်သတ်လိုက်တာဖြစ်ပါတယ်လို့ သတင်းထုတ်ပြန်ချက်မှာ ဖော်ပြထားပါတယ်။ ဒါဟာ နိုင်ငံပိုင်စီးပွားရေးလုပ်ငန်းတစ်ခုကို အမေရိကန်က တိုက်ရိုက်အရေးယူခြင်းဖြစ်ပြီး ယခင်က ခေါင်းဆောင်တွေကိုသာ ဦးတည်အရေးယူခဲ့တာဖြစ်ပါတယ်။
ကန့်သတ်လိုက်တဲ့ ဘဏ္ဍာရေးလုပ်ငန်းတွေဆိုတာ ချေးငွေ၊ငွေစာရင်း၊အာမခံလုပ်ငန်း၊ရင်းနှီးမြှပ်နှံမှုနှင့် အခြားလုပ်ငန်းတွေ ဖြစ်တယ်လို့ ဘဏ္ဍာရေးဝန်ကြီးဌာန သတင်းထုတ်ပြန်ချက်အရသိရပါတယ်။
အရေးယူမှုကြောင့် MOGE ဟာ အမေရိကန်ရဲ့ ဘဏ်စနစ်ထဲကထုတ်ပယ်ခံရပြီး အမေရိကန်နှင့်ကုန်သွယ်ရေးကိုပိတ်ပင်ထား ကာ အမေရိကန်မှာရှိတဲ့ ယင်းရဲ့ပိုင်ဆိုင်မှုတွေကိုလည်း ထိန်းချုပ်လိုက်မှာဖြစ်ပါတယ်။
ယင်းအပြင် မြန်မာစစ်တပ်နှင့်အဆက်အသွယ်ရှိတဲ့ လုပ်ငန်း(၃)ခုနှင့် လူပုဂ္ဂိုလ် (၅)ဦးတို့ကိုလည်း အမေရိကန်က စီးပွားရေး ကန့်သတ်အရေးယူမှုပြုလုပ်ခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။ ယခုဆောင်ရွက်မှုတွေကို ဗြိတိန်နှင့် ကနေဒါနိုင်ငံတို့နှင့်အတူညှိနှိုင်းချမှတ်ဆောင်ရွက်တာလို့လည်းပြောပါတယ်။
ကနေဒါက မြန်မာစစ်အစိုးရကိုထောက်ခံတဲ့ လူပုဂ္ဂိုလ်၃၉ဦးနှင့် လုပ်ငန်း ၂၂ခုကို ပိတ်ဆို့ကန့်သတ်မှုလုပ်ခဲ့ပါတယ်။ ဗြိတိန်က မြန်မာအစိုးရကို ဘဏ္ဍာရေးလုပ်ငန်းတွေဝန်ဆောင်မှုပေးခဲ့တဲ့ ဒါမှမဟုတ် လေယာဉ် အစိတ်အပိုင်းတွေအပါအဝင် ကန့်သတ်ထားတဲ့ပစ္စည်းတွေရောင်းပေးတဲ့ လူပုဂ္ဂိုလ်(၅)ဦးနှင့် လုပ်ငန်း(၁)ခုကို ပိတ်ဆို့ကန့်သတ်ခဲ့ကြောင်းကြေညာပါတယ်။ နှစ်နိုင်ငံစလုံးက သူတို့ရဲ့သတင်းထုတ်ပြန်ချက်ထဲမှာ MOGE ကို ညွှန်းဆိုဖော်ပြမထားပါဘူးလို့ ရိုက်တာကရေးသားပါတယ်။
Soure Reuters
-ymg/knl
အောက်တိုဘာ၃၁၊၂၀၂၃
မြန်မာနှင့် တရုတ် နှစ်နိုင်ငံပူးတွဲ တရားဥပဒေစိုးမိုးရေးနှင့် လုံခြုံရေးအဖွဲ့ ဖွဲ့စည်းနိုင်ရေးအခြေအနေကို နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တရုတ်ပြည်သူ့သမ္မတနိုင်ငံ၊ ကွန်မြူနစ်ပါတီ ဗဟိုကော်မတီ၏ အတွင်းရေးမှူးချုပ်ရုံးအဖွဲ့ဝင်၊ နိုင်ငံတော်ကောင်စီဝင်နှင့် ပြည်သူ့လုံခြုရေးဝန်ကြီး Wang Xiaohong တို့ ဆွေးနွေးခဲ့ကြတယ်လို့ သိရပါတယ်။
နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် တရုတ်ပြည်သူ့သမ္မတနိုင်ငံ၊ ကွန်မြူနစ်ပါတီ ဗဟိုကော်မတီ၏ အတွင်းရေးမှူးချုပ်ရုံးအဖွဲ့ဝင်၊ နိုင်ငံတော်ကောင်စီဝင်နှင့် ပြည်သူ့လုံခြုရေးဝန်ကြီး Wang Xiaohong ဦးဆောင်သောကိုယ်စားလှယ်အဖွဲ့ကို အောက်တိုဘာ ၃၁ရက် မနက်က နေပြည်တော်ရှိ နစက ဥက္ကဋ္ဌရုံး သံတမန်ဆောင် ဧည့်ခန်းမ၌ လက်ခံတွေ့ဆုံစဉ် အထက်ပါကိစ္စ ဆွေးနွေးခဲ့ကြတာဖြစ်တယ်လို့ နစကရဲ့သတင်းထုတ်ပြန်ချက်မှာဖော်ပြထားတာဖြစ်ပါတယ်။
ရှမ်းပြည်နယ်မြောက်ပိုင်းဒေသည် မြန်မာနိုင်ငံလွတ်လပ်ရေးရရှိပြီးချိန်ကတည်းက တိုင်းရင်းသား အဖွဲ့များ အချင်းချင်း အားပြိုင်မှုများဖြစ်ပေါ်ကာ တိုင်းရင်းသား လက်နက်ကိုင်ပဋိပက္ခများ ဖြစ်ပေါ်ခဲ့မှု၊ အချို့တိုင်းရင်း သားလက်နက်ကိုင်အဖွဲ့များ အနေဖြင့် အဆိုပါဒေသအတွင်း မူးယစ်ဆေးဝါးများ ထုတ်လုပ်ရောင်းချလျက်ရှိမှု၊ ကိုးကန့်ဒေသအတွင်း “ဖုန်” / “ရန်”အဖွဲ့တို့ အရေးအခင်း ဖြစ်ပွားခဲ့မှု၊ “ပယ်”အဖွဲ့အား တာဝန်ပေးအပ်ခဲ့မှု
တွေကိုလည်း ဗိုလ်ချုပ်မှူးကြီးနှင့် မစ္စတာWang Xiaohong တို့ ဆက်လက်ဆွေးနွေးခဲ့ကြပါတယ်။
ဆက်လက်ပြီး ထိုအဖွဲ့များ၏ အာဏာရလိုမှု၊ လက်နက်ခဲယမ်းများထုတ်လုပ်နေမှု၊ လက်နက် ခဲယမ်းများ ဝင်ရောက်မှုများကြောင့် ဒေသတွင်းနှင့် နယ်စပ်ဒေသတည်ငြိမ် အေးချမ်း ရေးကို ထိခိုက်ပျက်စီးစေလျက်ရှိမှု၊ နယ်စပ်ဒေသတွင် တရားမဝင်အွန်လိုင်း လောင်း ကစားမှုများနှင့် ဆက်သွယ်ရေး လိမ်လည်မှုများ ဖြစ်ပေါ်လျက်ရှိမှုတို့ကို ထိထိရောက်ရောက် တင်းတင်းကြပ်ကြပ် အရင်းအမြစ် ကစ၍ နှိမ်နင်းဖော်ထုတ် ဆောင်ရွက်သွားမည့်အခြေအနေများ၊ အဆိုပါ ဒေသအတွင်းရှိ ဥပဒေနှင့်ညီညွတ်မှု မရှိသည့်လုပ်ငန်းများကို စိစစ်ဖော်ထုတ်သွားမည့် အခြေအနေများကိုလည်း အမြင်ချင်းဖလှယ်ဆွေးနွေးခဲ့ကြတယ်လို့ သတင်းထုတ် ပြန်ချက်မှာ ဖော်ပြထားပါတယ်။
မြန်မာနိုင်ငံသည် တရုတ်နိုင်ငံအတွက် ယုံကြည်စိတ်ချရ သည့် နိုင်ငံတစ်နိုင်ဖြစ်သကဲ့သို့ တရုတ်နိုင်ငံသည် မြန်မာနိုင်ငံအတွက် ယုံကြည် စိတ်ချရသည့် နိုင်ငံတစ်နိုင်ငံဖြစ်သည့် အခြေအနေများ၊ နှစ်နိုင်ငံအကြား ချစ်ကြည်ရင်းနှီးမှုနှင့် သံတမန်ဆက်ဆံမှုများ တိုးတက်ကောင်းမွန်လျက်ရှိသည့်အခြေအနေများ၊ မြန်မာနိုင်ငံ ၏ အရှေ့မြောက်ပိုင်းဒေသတွင် MNDAA သောင်းကျန်းသူများက နယ်မြေ တည်ငြိမ်အေးချမ်းမှု ပျက်ပြားစေ ရန်ရည်ရွယ်၍ လုံခြုံရေးစခန်းများအား တိုက်ခိုက်မှုများ ဆောင်ရွက်လာသည့်အခြေအနေများကိုလည်း ဆွေးနွေးခဲ့ကြတယ်လို့သိရပါတယ်။
ယင်းအပြင် လောက်ကိုင်ဒေသတွင် ကိုယ်ကျိုးစီးပွား အတွက် အွန်လိုင်းလောင်းကစားများ၊ ဆက်သွယ်ရေး လိမ်လည်မှုများ၊ မူးယစ်ဆေးဝါး ထုတ်လုပ်မှုနှင့်ရောင်းဝယ်မှုများ ဆောင်ရွက်နေမှုများအား နှစ်နိုင်ငံပူးပေါင်း၍ ဖော်ထုတ်အရေးယူ ဆောင်ရွက်သွားမည့်အခြေအနေများ၊ မြန်မာ့နိုင်ငံရေးအပါအဝင် အခြားကမ္ဘာ့နိုင်ငံအရေး များ၌ ကမ္ဘာ့အင်အားကြီးနိုင်ငံတစ်ခုမှ ဝင်ရောက်စွက်ဖက်၍ ၎င်းတို့နိုင်ငံ၏ အကျိုးအတွက်သာကြည့်ပြီး အခြားနိုင်ငံများအပေါ် Double Standard ဖြင့် ချယ်လှယ်ဆောင်ရွက်နေသည့်အခြေအနေများကိုလည်း ဆက်လက်ဆွေးနွေးခဲ့ကြတယ်လို့ နစကသတင်းထုတ်ပြန်ရေးအဖွဲ့က သတင်းထုတ်ပြန်ပါတယ်။
အဆိုပါတွေ့ဆုံပွဲသို့ ဗိုလ်ချုပ်မှူးကြီးနှင့်အတူ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ ကောင်စီဝင်နှင့် ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်၊ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်နှင့် နိုင်ငံခြားရေးဝန်ကြီးဌာန ဒုတိယဝန်ကြီး ဦးလွင်ဦး တို့တက်ရောက်ကြပြီး တရုတ် ပြည်သူ့သမ္မတနိုင်ငံ၊ ကွန်မြူနစ်ပါတီ ဗဟိုကော်မတီ၏ အတွင်းရေးမှူးချုပ်ရုံးအဖွဲ့ဝင်၊ နိုင်ငံတော်ကောင်စီဝင်နှင့် ပြည်သူ့လုံခြုံရေးဝန်ကြီးနှင့်အတူ မြန်မာနိုင်ငံဆိုင်ရာ တရုတ်နိုင်ငံသံအမတ်ကြီး Mr. Chen Hai နှင့် အဖွဲ့ဝင်များ တက်ရောက်ခဲ့ကြပါတယ်။
-ymg/knl
၃၁ အောက်တိုဘာ ၂၀၂၃
မူစလင်အမေရိကန်တွေနှင့် အချို့သော ဒီမိုကရက်တစ်ပါတီကလှုပ်ရှားတက်ကြွသူတွေက သမ္မတဂျိုးဘိုင်ဒင်အနေနှင့် ဂါဇာ အပစ်အခတ်ရပ်စဲရေးအတွက် ချက်ခြင်းအရေးယူဆောင်ရွက်မှုမလုပ်ဘူးဆိုရင် ၂၀၂၄ သမ္မတရွေးကောက်ပွဲမှာ ဂျိုးဘိုင်ဒင် ကို ငွေလည်းလှူမှာမဟုတ်သလို မဲလည်းပေးမှာမဟုတ်ဘူးလို့ အကြပ်ကိုင်လိုက်ကြပါတယ်။
ဒီမိုကရက်တစ်ပါတီခေါင်းဆောင်တွေပါဝင်တဲ့ အမျိုးသားမူစလင်ဒီမိုကရက်တစ်ကောင်စီက အင်္ဂါနေ့ ညနေငါးနာရီနောက်ဆုံး ထားပြီး အစ္စရေးနယ်စပ်မှာ အပစ်အခတ်ရပ်စဲဖို့ ဘိုင်ဒင်က သူ့ရဲ့ ဩဇာအရှိန်အဝါကိုအသုံးပြုပေးဖို့ တောင်းဆိုလိုက်ကြတာ ဖြစ်ပါတယ်။ အဲဒီကောင်စီမှာပါတဲ့ ဒီမိုကရက်တစ်ပါတီ အမတ်တွေဟာ အကြိတ်အနယ်ယှဉ်ပြိုင်ရပြီး ရွေးကောက်ပွဲရလာဒ်ကို အဆုံးအဖြတ်ပေးနိုင်ဖွယ် ရှိကြတဲ့ မီချီကန်၊အိုဟိုင်းအိုနှင့်ပင်ဆီဗန်းနီးယားစတဲ့ ပြည်နယ်တွေက ဖြစ်ကြပါတယ်။
“၂၀၂၃ အပစ်အခတ်ရပ်စဲရေးရာဇသံ” လို့ အမည်ပေးထားတဲ့ အဆိုပါ အိတ်ဖွင့်ပေးစာမှာ မူစလင်ခေါင်းဆောင်တွေဟာ ပါလက်စတိုင်းပြည်သူတွေအပေါ် အစ္စရေးရဲ့ တိုက်ခိုက်မှုတွေကို ထောက်ခံမှုပေးတဲ့ မည်သည့် သမ္မတလောင်းကိုမဆို ထောက်ခံခြင်း၊မဲပေးခြင်းတွေ မပြုလုပ်ဖို့ မူဆလင်မဲဆန္ဒရှင်တွေကို ဆော်ဩစည်းရုံးသွားမယ်လို့ ကတိပြုခဲ့ကြပါတယ်။
“ ခင်ဗျားအစိုးရရဲ့အကြွင်းမဲ့ထောက်ခံမှု၊ ရန်ပုံငွေနှင့် လက်နက်ထောက်ပံ့မှုတွေဟာ အရပ်သားတွေ သေကြေထိခိုက်မှုဖြစ်ရတဲ့ အကြမ်းဖက်မှုတွေကို ထပ်တလဲလဲဖြစ်ပေါ်အောင် သိသာထင်ရှားတဲ့ အခန်းကဏ္ဍမှာရှိနေတယ်” လို့ ကောင်စီက ရေးသားထားပါတယ်။
အမေရိကန်လွှတ်တော်အမတ်ဟောင်းနှင့် မီနီဆိုတာရဲ့ ရှေ့နေချုပ် ကိတ်အယ်လီဆင် နှင့် အင်ဒီယာနာအမတ် အင်ဒရီကာဆွန်တို့ဟာ အဆိုပါကောင်စီကို တည်ထောင်ခဲ့တဲ့ ပူးတွဲ ဥက္ကဋ္ဌတွေဖြစ်ကြပါတယ်။
ယခုအိတ်ဖွင့်ပေးစာဟာ အောက်တိုဘာ ၇ ရက်နေ့ ဟားမာ့စ်စစ်သွေးကြတွေရဲ့ တိုက်ခိုက်မှုတစ်ခုအပေါ် အစ္စရေးက ဂါဇာ ကမ်းမြောင်မှာ တိုက်ခိုက်နေမှုအပေါ် ဘိုင်ဒင်အနေနှင့် ရှုတ်ချဖို့ ပျက်ကွက်နေခြင်းအပေါ် အာရပ်နှင့် အမေရိကန်မူစလင် အသိုက်အဝန်းရဲ့ ဒေါသတွေကြီးထွားလာနေတာကို ပြသတဲ့ နောက်ဆုံးလက္ခဏာတစ်ခုဖြစ်ပါတယ်။
Source Reuters
၃၀ အောက်တိုဘာ၊၂၀၂၃
နယ်စပ်ဒေသတွေ လုံခြုံတည်ငြိမ်ရေးအတွက် မြန်မာနိုင်ငံအနေဖြင့် တရုတ်နိုင်ငံနှင့်အတူ လက်တွဲလုပ်ဆောင်မယ်လို့ ယုံကြည် ကြောင်း တရုတ်ဗဟိုစစ်ကော်မရှင် ဒုတိယဥက္ကဋ္ဌ ကျန်ယူရှားက မြန်မာအစိုးရ ဒုတိယဝန်ကြီးချုပ်နှင့် ကာကွယ်ရေးဝန်ကြီးဌာန ပြည်ထောင်စုဝန်ကြီး ဗိုလ်ချုပ်ကြီးတင်အောင်စန်းကို ဘေဂျင်းမြို့မှာ ပြောကြားလိုက်ပါတယ်။
Source CCTV+
Page 56 of 193