၂၄ ဧပြီ ၂၀၂၄

ရုရှား ဒုတိယကာကွယ်ရေးဝန်ကြီး တီမူအိုင်ဗန်နော့တ်ကို အဂတိလိုက်စားမှု သံသယနှင့်  ရုရှားနိုင်ငံရဲ့ စုံစမ်းစစ်ဆေးရေးကော်မတီက ဧပြီ ၂၃ ရက် အင်္ဂါနေ့က ဖမ်းဆီးလိုက်တယ်လို့ ကြေညာလိုက်ကြောင်း  RTသတင်းဌာနကသတင်းဖော်ပြပါတယ်။

အဲသလိုဖမ်းဆီးခဲ့တာနှင့်ပတ်သက်လို့ ရုရှားသမ္မတ ဗလာဒီမာပူတင်နှင့် ကာကွယ်ရေးဝန်ကြီး ဆာဂေးရှိုင်ဂူ တို့ကို အစီရင်ခံခဲ့ပြီးဖြစ်တယ်လို့ ကရင်မလင်ပြောရေးဆိုခွင့်ရသူ ဒီမစ်ထရီ ပက်စ်ကော့ဗ်က ရုရှားမီဒီယာတွေကိုပြောပါတယ်။

အင်္ဂါနေ့စောစောပိုင်းမှာပဲ အိုင်ဗန်နော့တ်ဟာ ကာကွယ်ရေးဝန်ကြီး ရှိုင်ဂူဦးဆောင်တဲ့ ဝန်ကြီးအဆင့် အစည်းအဝေးကို တက်ရောက်ခဲ့ပါသေးတယ်။ အဲဒီအစည်းအဝေးမှာ ရုရှားရဲ့အကြီးတန်းအရာရှိတွေနှင့် ထိပ်တန်းစစ်တပ် တပ်မှူးတွေတက်ရောက်ခဲ့ကြတာပါ။

စုံစမ်းစစ်ဆေးရေးကော်မရှင်က ကာကွယ်ရေးဒုတိယဝန်ကြီးကို ဖမ်းဆီးခဲ့တာနှင့်ပတ်သက်လို့ အသေး စိတ်အချက်အလက်မထုတ်ပြန်ပါဘူး။ ဒါပေမယ့် အိုင်ဗန်နော့တ်ဟာ ကြီးကြီးမားလား လာဘ်ယူမှုတွေ ရှိခဲ့တယ်လို့သံသယရှိတယ်လို့တော့ ကော်မတီကပြောပါတယ်။ ရုရှားနိုင်ငံမှာ အဲသလိုမျိုး ရုရှားငွေ အနည်းဆုံး ရူဘဲလ်တစ်သန်း လာဘ်ပေးလာဘ်ယူမှုပြုလုပ်ခဲ့မိလျှင်တော့ အိုင်ဗန်နော့တ်ဟာ ထောင်ဒဏ် ၁၅နှစ်အထိ အပြစ်ပေးခံရနိုင်ပါတယ်။

အိုင်ဗန်နော့တ်ဟာ ရုရှားရဲ့ စွမ်းအင်နှင့်ဆောက်လုပ်ရေးကဏ္ဍတွေမှာ ကာလရှည်ကြာပါဝင်ပတ်သက်ခဲ့ ပြီး နိုင်ငံပိုင် နာမည်ကျော် ကုမ္ပဏီတော်တော်များများမှာလည်း အလုပ်လုပ်ခဲ့ပါတယ်။ သူဟာ၂၀၁၃မှ ၂၀၁၆ အထိ ရုရှားစစ်တပ်ပိုင် ဆောက်လုပ်ရေးကုမ္ပဏီ အိုဘိုရိုစထရွိုင်းကိုဦးဆောင်ခဲ့ပါတယ်။ အဲဒီ  ကုမ္ပဏီဟာ ရုရှားစစ် သည်တွေအတွက် လူနေအိမ်တွေ အဓိကဆောက်လုပ်ပေးရတဲ့ ကုမ္ပဏီဖြစ်ပါ  တယ်။ အဲဒီနောက်သူဟာ ရုရှားစစ်တပ်ရဲ့ စစ်ဘက်ဆိုင်ရာ ဆောက်လုပ်ရေးတွေဦးဆောင်ဖို့ ယခု လက်ရှိ ဒုတိယကာကွယ်ရေးဝန်ကြီးတာဝန်ပေးအပ်ခြင်းခံခဲ့ရပါတယ်လို့သတင်းမှာဖော်ပြထားပါတယ်။

Source : RT

၂၃ ဧပြီ ၂၀၂၄

တော်ဝင်မလေးရှားရေတပ်စစ်ရေးပြအခမ်းအနားအတွက် အစမ်းလေ့ကျင့်နေကြတဲ့ ရေတပ်ရဟတ်    ယာဉ်နှစ်စီး ယနေ့ ဧပြီ ၂၃ရက် က လေပေါ်တွင် အချင်းချင်းတိုက်မိကြပြီး လူ၁၀ ဦးသေဆုံးခဲ့တယ်လို့ မလေးရှားရေတပ်က သတင်းထုတ်ပြန်ပါတယ်။

ဧပြီ၂၃ရက် မနက် ၉နာရီ၃၂မိနစ်မှာ မလေးရှားနိုင်ငံ အနောက်ပိုင်း ပါရက်ပြည်နယ်မှာရှိတဲ့ လမ်မတ် ရေတပ်အခြေစိုက်စခန်းမှာ အဆိုပါမတော်တဆမှုဖြစ်ပွားခဲ့တာဖြစ်ပြီး လေယာဉ်နှစ်စီးလုံးမှာလိုက်ပါလာ  သူ ၁၀ဦးစလုံးသေဆုံးသွားတယ်လို့ ရေတပ်ကပြောပါတယ်။

“ အခင်းဖြစ်တဲ့နေရာမှာပဲ အားလုံးသေဆုံးသံားကြပါတယ်။ သူတို့ကို လမ်မတ်စစ်ဆေးရုံကို ဘယ်သူဘယ်ဝါသတ်မှတ်အတည်ပြုဖို့ ပို့ဆောင်ပေးလိုက်ပါပြီ” လို့ ရေတပ်ကဆက်ပြောပါတယ်။

Source: Reuters

၂၂ ဧပြီ ၂၀၂၄

မြဝတီအနီးတစ်ဝိုက် တိုက်ပွဲတွေ မရှိတော့တဲ့အတွက် မဲဆောက်မှာရောက်နေတဲ့ မြန်မာစစ်ဘေးရှောင်တွေ နေရပ်ပြန်သွား ကြလို့ စစ်ဘေးရှောင် အရေအတွက်ဟာ တနင်္ဂနွေနေ့က ၃၀၀၀ဦးခန့်ရှိခဲ့ရာမှ ယခုဆို ၁၀၀၀ဦးခန့်ပဲကျန်ရှိတော့တယ်လို့  ထိုင်း  စစ်ဒေသအမှတ်(၃) တိုင်းမှူး ဒုတိယဗိုလ်ချုပ်ကြီး ပရာဆန် ဆေအင်ဆီရီယက် ကပြောတယ်လို့ ဘန်ကောက်ပို့စ်က သတင်း     ဖော်ပြပါတယ်။

ပဋိပက္ခမှာပါဝင်တဲ့ နှစ်ဘက်တပ်တွေဟာ အခုဆို ဆွေးနွေးညှိနှိုင်းမှုတွေစတင်လုပ်ဆောင်နေပြီး မြန်မာအစိုးရရဲ့ စစ်ကူ       တပ်တွေဟာ ကော့ကရိတ်ကနေ မြဝတီကိုမရောက်သေးဘူးလို့လည်း သူက ထိုင်း ပီဘီအက်စ်သတင်းဌာနကိုပြောပါတယ်။

စစ်ပွဲရှောင်လာကြတဲ့ မြဝတီက လူတော်တော်များမျာဟာ ယခုဆိုရင် မဲဆောက်ကနေ အိမ်ကိုပြန်နေကြပြီဖြစ်ပါတယ်။

အမှတ်(၁)ထိုင်းမြန်မာ ချစ်ကြည်ရေးတံတားဟာ ခြေလျှင်သွားသူတွေနှင့် စီးပွားရေးလုပ်ငန်းသုံးယာဉ်တွေအတွက် ဆက်လက် ဖွင့်ပေးထားပါတယ်။

ဒေသ(၃) စစ်တိုင်းအနေနှင့် နယ်စပ်တလျောက်အခြေအနေတွေကို အနီးကပ်စောင့်ကြည့်နေပြီး မဲဆောက်က အိမ်တစ်လုံး ပေါ် ကျည်ဆံကျလို့ လောလောဆယ်ကန့်ကွက်မှုပြုလုပ်ထားတယ်လို့လည်းဒေသတိုင်းမှူးက ပြောတဲ့အကြောင်း သတင်းမှာ ဖော်ပြထားပါတယ်။

@ymg/knl

၂၁ ဧပြီ ၂၀၂၄

မြန်မာ့တပ်မတော်နှင့် တိုင်းရင်းသားလက်နက်ကိုင်တပ်ဖွဲ့တွေအကြား စစ်ပွဲတွေကြောင့် မြဝတီမှ မဲဆောက်သို့ ထွက်ပြေးလာကြတဲ့ မြန်မာဒုက္ခသည် ၃၀၀၀ဦးခန့်ကို လက်ခံထားရတယ်လို့ ထိုင်းအရာရှိတွေရဲ့ ပြောဆိုချက်ကို ကိုးကားပြီး ဘန်ကောက်ပို့စ်သတင်းစာကရေးသားလိုက်ပါတယ်။

မဲဆောက်ကိုရောက်လာတဲ့ မြန်မာဒုက္ခသည် ၃၀၀၀ခန့်အထိ မြင့်တက်လာပြီး သူတို့ကို ပြည်ထဲရေးဝန်ကြီးဌာနရဲ့ စောင့်ကြပ်မှု အောက် ထားရှိထားတယ်လို့ ထိုင်း နိုင်ငံခြားရေးဝန်ကြီး ပန်ပရီဘာဟီဒါနူကာရာက ဧပြီ ၂၁ရက် တနင်္ဂနွေနေ့က ပြောဆိုတယ်လို့လည်း အဆိုပါသတင်းမှာဖော်ပြထားပါတယ်။

အရင်က မြန်မာဒုက္ခသည်တွေ မဲဆောက်မှာ တစ်သောင်းခန့်ရှိခဲ့ပြီး သူတို့နိုင်ငံမှာ အခြေအနေတွေပုံမှန်ဖြစ်ပြီးနောက် သူတို့ ပြန်သွားကြတယ်လို့ လည်း ထိုင်းနိုင်ငံခြားရေးဝန်ကြီးကပြောပါတယ်။

မဲဆောက်က သာဆိုင်းလုယတ်ခရိုင်ခွဲ ဘန်ဝမ်တက်ခီယမ်းရွာက ထိုင်းအိမ်တစ်အိမ်ကို  ကျဉ်ဆံတစ်ခုထိမှန်တဲ့အတွက် မြန်မာဘက်ကို သတိပေးထားတယ်လို့လည်း သူကဆက်ပြောပါတယ်။ ဒါပေမယ့် ထိခိုက်သူတစ်ဦးတစ်ယောက်မျှမရှိပါဘူး။

မြန်မာဒုက္ခသည်တွေရဲ့ ၄၀ ရာခိုင်နှုန်းခန့်ဟာ အမျိုးသမီးတွေ၊သက်ကြီးရွယ်အိုတွေနှင့် ကလေးသူငယ်တွေဖြစ်ကြပြီး အများစုဟာ အပူဒဏ်ခံစားနေကြရတယ်လို့ လုံခြုံရေးအဖွဲ့တွေကပြောပါတယ်။

လုံခြုံရေးအာဏာပိုင်တွေက အဲဒီဒုက္ခသည်တွေအတွက် မဲဆောက်မှာ ယာယီစခန်းခြောက်ခုဖွင့်လှစ်ထားရှိပေးပြီး သူတို့ကို ရှေးဦးသူနာပြုစုမှုနှင့် ဆေးဝါးကုသမှုတွေလုပ်ပေးနေတယ်လို့ သိရပါတယ်။

မြဝတီက ထိခိုက်ဒဏ်ရာရသူတွေကို မဲဆောက်ဆေးရုံမှာ ဆေးဝါးကုသပေးနေတယ်လို့လည်းဆိုပါတယ်။

နယ်စပ်တံတားအမှတ်(၁)ကို တနင်္ဂနွေနေ့မှာ ဆက်လက်ဖွင့်ပေးထားပြီး စနေနေ့ညနေမှာ မြဝတီက မဲဆောက်ကူး  လာကြသူတွေများလာပြီးတဲ့နောက် ယာဉ်ကြောနှေးကွေးနေတယ်လို့လည်းသိရပါတယ်။

ပြည်သူ့ကျန်းမာရေးစစ်ဆေးရေးအရာရှိချုပ် ဒေါက်တာဆိုဖွန်လမ်ဆီယစ်သာဝန်က လောလောဆယ်မှာ မြန်မာဒုက္ခသည် ၁၆၈၆ဦး စာရင်းဝင်နေပြီး ပိုရောက်လာဖို့ရှိနေတယ်လို့ပြောပါတယ်။ ကာကွယ်ရေဝန်ကြီးဆူတင် ကလန်ဆန်က မြဝတီမှာ စစ်ရှိန်မြင့်နေဆဲဖြစ်ပြီး ထိခိုက်ခံစားရသူတွေအတွက် ထိုင်းအစိုးရကလူသားချင်းဆိုင်ရာအကူအညီတွေပေးနေတယ်လို့ ပြောပါတယ်။ အလုံးစုံအခြေအနေကတော့ ထိုင်းအစိုးရ မျှော်လင့်ထားတဲ့ အတိုင်းပဲရှိနေပါသေးတယ်လို့ သူကပြောပါတယ်။ သူဟာ မဲဆောက်ကို လာမယ့်ရက်အနည်းငယ်အတွင်း သွားရောက်ဖို့စီစဉ်နေတယ်လို့သိရပါတယ်။

အင်္ဂါနေ့မှာ ဝန်ကြီးအဖွဲ့အစည်းအဝေးခေါ်ယူမယ်လို့ ထိုင်းဝန်ကြီးချုပ် ဆရက်သာ သာဗီဆင်က ဖေ့စ်ဘုတ်မှာ ရေးတင် ထားပါတယ်။ နယ်စပ်ကုန်သွယ်ရေးကိစ္စအပါအဝင်အခြေအနေတွေ စောင့်ကြပ်ကြည့်ရှုရအောင်နှင့် အဲဒီမှာရှိတဲ့ ဒေသခံတွေနှင့် လုံခြုံရေးအဖွဲ့တွေကို အားပေးဖို့အတွက် မဲဆောက်ကို သူသွားမယ်လို့လည်း ဝန်ကြီးချုပ်က ဆက်လက်ပြောကြားပါတယ်။

စစ်ပွဲဟာ ထိုင်းမြေကို မထိခိုက်စေဖို့အတွက် သူလိုလားပြီး မဲဆောက်ကိုပြေးလာကြသူတွေထဲ မြဝတီမှာ အလုပ်လုပ်နေကြတဲ့ လူလိမ်လူညာတွေပါမလာဖို့ အရာရှိတွေ စောင့်ကြည့်ဖို့လည်း သူက ဖေ့စ်ဘုတ်မှာရေးသားထားပါတယ်။

@ymg/knl

၂၁ ဧပြီ ၂၀၂၄

လေ့ကျင့်ခန်းပြုလုပ်နေစဉ်အတွင်း ဂျပန်ရေတပ်ရဲ့ ရဟတ်ယာဉ်နှစ်စီး ပင်လယ်ထဲပျက်ကျခဲ့ရာ  ရဟတ်   ယာဉ်ပါ တပ်သား(၈) ဦးအနက် အနည်းဆုံး (၁)ဦးသေဆုံးသွားရတယ်လို့ ကာကွယ်ရေးဝန်ကြီးဌာနက တနင်္ဂနွေနေ့က ပြောပါတယ်။

စနေနေ့ညက SH-60 ကင်းလှည့်ရဟတ်ယာဉ်နှစ်စီးဟာ ဂျပန်နိုင်ငံအလယ်ပိုင်းရှိ တောင်ပိုင်းကမ်းခြေ  အလွန် အီဇူးကျွန်းစု တိုရီရှီမာအနီးမှာ ရေငုပ်သင်္ဘော တိုက်ဖျက်ရေးလေ့ကျင့်ခန်းလုပ်ဆောင်နေစဉ် ပျက်  ကျခဲ့တာဖြစ်ပါတယ်။

ပျက်ကျရတဲ့အကြောင်းရင်းကို စစ်ဆေးနေဆဲဖြစ်တယ်လို့ ဂျပန်ကာကွယ်ရေးဝန်ကြီး မီနိုရူကီဟာရာက သတင်းစာရှင်းလင်းပွဲမှာပြောပါတယ်။ ပျံသန်းမှုအသံမှတ်တမ်း flight recorderနှစ်ခုကို တစ်ခုနှစ့်တစ်ခု နီးနီးကပ်ကပ်နေရာမှာ ရှာတွေ့ပြီး ဒါဟာ ရဟတ်ယာဉ်နှစ်စီးတိုက်မိတာဖြစ်ဖို့များတယ်လို့လည်း သူက ဆက်ပြောပါတယ်။

ဂျပန်ပင်လယ်ရေကြောင်းကိုယ်ပိုင်ကာကွယ်ရေးတပ် (MSDF) နှင့် ကမ်းခြေစောင့်တပ်တွေက ပျောက်ဆုံးနေတဲ့ ရဟတ်ယာဉ်ပါ စစ်သား (၇)ဦးကိုရှာဖွေနေပါတယ်။

အခြားနိုင်ငံတစ်နိုင်ငံက ဒီပျက်ကျမှုမှာပါဝင်ပတ်သက်တယ်လို့ သူမယုံကြည်ဘူးလို့ MSDF အကြီးအကဲ ယိုရှီတာကာ ဆာကေးက ပြောပါတယ်။

ဂျပန်နိုင်ငံဆိုင်ရာ အမေရိကန်သံအမတ်ကြီး ရမ်အီမန်နျူယယ်က အမေရိကန်နိုင်ငံအနေနှင့် ရှာဖွေ ကယ်ဆယ်ရေးလုပ်ငန်းမှာ ကူညီပေးပါမယ်လို့ ဆိုရှယ်မီဒီယာ အိစ်တ်စာမျက်နှာကနေ ကမ်းလှမ်းလိုက် ပါတယ်။

Source Reuters

၂၀ ဧပြီ ၂၀၂၄

အမှတ်(၂) ထိုင်း-မြန်မာ ချစ်ကြည်ရေးတံတား နှစ်နိုင်ငံနယ်စပ်အနီး လာရောက်ပစ်ခတ်တိုက်ခိုက်ခဲ့သည့် KNU KKO (ခွဲထွက်)အဖွဲ့နှင့် PDF ပူးပေါင်းအဖွဲ့သည်  အကျအဆုံးများစွာဖြင့် ယနေ့ ဧပြီ ၂၀ ရက်ညနေ ၅နာရီခန့်တွင် ပြန်လည်ဆုတ်ခွာသွားခဲ့ကြောင်း  နစကသတင်းထုတ်ပြန်ချက်အရသိရပါတယ်။

KNU အဖွဲ့မှ အကြမ်းဖက်မှုကိုလိုလားသူများ၊ KKO (ခွဲထွက်)အဖွဲ့နှင့် PDF ပူးပေါင်းအဖွဲ့တို့သည် ကရင်ပြည်နယ်၊ မြဝတီမြို့ နယ်၊ ထိုင်း-မြန်မာ အမှတ်(၂) ချစ်ကြည်ရေးတံတားအနီး လုံခြုံရေးဆောင်ရွက်လျက်ရှိသည့် တပ်ဖွဲ့ဝင်များအား ဧပြီ၂၀ ရက်မနက်ပိုင်းက စတင်ကာ လာရောက်ပစ်ခတ်တိုက်ခိုက်ခဲ့တာဖြစ်တယ်လို့ သတင်းထုတ်ပြန်ချက်မှာဖော်ပြထားပါတယ်။

ထိုအဖွဲ့သည် လက်နက်ကြီးများဖြင့်အဝေးမှပစ်ခတ်တိုက်ခိုက်ခြင်း၊ Drop ဗုံးများဖြင့် ပစ်ချတိုက်ခိုက်ခြင်းတို့ကို သာလွန်အင်အား အသုံးပြု၍ တိုက်ပွဲဖော်ဆောင်လာခဲ့တာဖြစ်တယ်လို့ သိရှိရပါတယ်။

ယင်းအတွက် လုံခြုံရေးတပ်ဖွဲ့ဝင်များက နှစ်နိုင်ငံနယ်စပ်ဒေသတည်ငြိမ်အေးချမ်းရေး၊ မလိုလားအပ်သော လက်နက်ကိုင်ပဋိပက္ခများ ဖြစ်ပေါ်လာမှုမရှိစေရေးတို့အတွက် ထိန်းထိန်းသိမ်းသိမ်းဖြင့် ပြန်လည် တုန့်ပြန်ဆောင်ရွက်လျက်ရှိပြီး လေကြောင်းပစ်ကူ ပစ်အားရယူ၍ အကြမ်းဖက်မှုတန်ပြန်နှိမ်နင်းရေးလုပ်ငန်းများ  ကို ဆောင်ရွက်ခဲ့ရာ အဆိုပါ ပူးပေါင်းအဖွဲ့သည် ယနေ့ ညနေ ၅ နာရီခန့်တွင် အကျအဆုံးများစွာဖြင့် အနောက်   ဖက်သို့ ပြန်လည်ဆုတ်ခွာသွားခဲ့ကြောင်း သတင်းထုတ်ပြန်ချက်မှာဖော်ပြထားပါတယ်။

@ymg/knl