Published 26 February 2022

အမေရိကန်အစိုးရ က ယူကရိန်းသမ္မတ ဗိုလိုဒီမီယာ ဇီလင်စကီးကို တိုးဝင်လာနေတဲ့ ရုရားတပ်တွေဖမ်းမိတာ ဒါမှမဟုတ်အသတ်ခံရမှာ ရှောင်ရှားပြီး  ကိဗ်ကနေထွက်ခွာဖို့အတွက် ကူညီပေးဖို့ အဆင်သင့်ပြင်ဆင်ထားတယ်လို့ အမေရိကန်နှင့် ယူကရိန်းအရာရှိတွေကို ကိုးကားပြီး ဝါရှင်တန်ပို့စ်သတင်းစာကြီးက သတင်းရေးသားလိုက်ပါတယ်။ ယခုအထိတော့ ယူကရိန်းသမ္မတက ထွက်ခွာဖို့ ငြင်းဆန်နေဆဲဖြစ်တယ်လို့လည်း သတင်းကဆိုပါတယ်။

“ ကျွန်တော်တို့ရရှိထားတဲ့သတင်းအချက်အလက်တွေအရ ရန်သူတွေဟာ ကျွန်တော့်ကို ပစ်မှတ်(၁)၊ကျွန်တော့်မိသားစုကို ပစ်မှတ်(၂)အဖြစ်သတ်မှတ်ထားတယ်လို့သိရပါတယ်”လို့ သမ္မတဇီလင်စကီးက နံနက်စောစော မိန့်ခွန်းမှာ ယူကရိန်းပြည်သူတွေကို ပြောကြားထားပါတယ်။ သူတို့ဟာ နိုင်ငံ့ခေါင်းဆောင်ကို ဖျက်ဆီးပစ်ပြီး ယူကရိန်းကို နိုင်ငံရေးအရ ဖျက်ဆီးလိုနေကြတယ်လို့လည်း သူကပြောပါတယ်။

ရက်သတ္တပတ်များစွာမှာ ဇီလင်စကီးဟာ အမေရိကန်အရာရှိတွေထံမှ ဒီသတင်းပေးချက်တွေရရှိနေခဲ့တာဖြစ်ပါတယ်။

စီအို်အေညွှန်ကြားရေးမှူး ဝီလီယံဂျေဘန်းစ်က ဇန်နဝါရီလတုန်းက ယူကရိန်းကို သွားခဲ့ပြီး ဇီလင်စကီးနှင့်တွေ့ဆုံခဲ့ကာ ရုရှားတွေ သူ့နိုင်ငံကိုခြိမ်းခြောက်မှုကြီးထွားလာနေတာကို ပြောခဲ့ပါတယ်။ အဲဒီအခါ ယူကရိန်းသမ္မတက သူနှင့်သူ့မိသားစုတွေ ပုဂ္ဂိုလ်ရေးအရ အန္တရာယ်ရှိနေသလားလို့ မေးခဲ့ပါတယ်လို့ ဇီလင်စကီးရဲ့ လက်ထောက်တစ်ဦးက ဝါရှင်တန်ပို့စ်ကိုပြောပါတယ်။ ရုရှားတွေက သူ့ကိုသတ်ဖို့ကြိုးစားနေတယ်ဆိုတဲ့အပေါ်မှာတော့ သူက အယုံအကြည်မရှိခဲ့ဘူးလို့လည်း အဆိုပါ လက်ထောက်ကပြောပါတယ်။

ဘန်းက အဲဒီတုန်းက တိကျတဲ့သတင်းအချက်အလက်တွေကိုတော့ မပေးခဲ့ဘဲ ဇီလင်စကီးအနေနှင့် ပုဂ္ဂိုလ်ရေးလုံခြုံမှုကို အရေးတကြီးလုပ်ဆောင်ဖို့လိုတယ်လို့ပဲ ပြောခဲ့တယ်လို့ သူကပြောပါတယ်။

အဲဒီအချက်အပေါ် စီအိုင်အေကို ဝါရှင်တန်ပို့စ်က မေးခဲ့ပေးမယ့် မှတ်ချက်ပေးဖို့စီအိုင်အေက  ငြင်းဆိုခဲ့ပါတယ်။

အမေရိကန်အရာရှိတွေဟာ ဇီလင်စကီးကို လုံခြုံရေးကိစ္စများစွာကို ပြောခဲ့ရာမှာ အဝေးရောက်ယူကရိန်းအစိုးရကိုဆက်ရှိနေဖို့ သမ္မတကို အလုံခြုံဆုံးနေရာကိုထားရှိပေးဖို့လည်းပါဝင်တယ်လို့ ဆိုကြောင်း ဝါရှင်တန်ပို့စ်ကို ကိုးကားပြီး RT သတင်းတစ်ရပ်မှာဖော်ပြထားပါတယ်။

Source:Washington Post/RT

#WorldPolitics
Published 26 February 2022

အခုဖြစ်ပျက်နေတဲ့ စစ်ရေးပဋိပက္ခတွေနဲ့ပတ်သက်ပြီး ရုရှားနှင့် အပစ်အခတ်ရပ်စဲရေး စတင်ညှိနှိုင်းသွားဖို့ ယူကရိန်းသမ္မတ'ဗိုလိုဒီမီယာဇဲလန်စကီ'အသင့်ရှိနေကြောင်း သူ့ရဲ့ပြောရေးဆိုခွင့်ရပုဂ္ဂိုလ်က ပြောကြားလိုက်ပါတယ်။

ဒါ့အပြင် ဆွေးနွေးပွဲကျင်းပသွားမယ့်နေရာနဲ့အချိန်ကို ညှိနှိုင်းဖို့ ယူကရိန်းဘက်က ရုရှားနဲ့ဆက်သွယ်ပြောဆိုနေကြောင်း အခိုင်အမာပြောကြားခဲ့ပါတယ်။

ညှိနှိုင်းချက်တွေဆွေးနွေးဖို့ ကနဦးသဘောတူပြီးတဲ့အချိန်မှာ ယူကရိန်းခေါင်းဆောင်ဘက်က အသံတိတ်နေခဲ့တယ်လို့ ရုရှားတို့က အကြောင်းကြားထားပါတယ်။

"ညှိနှိုင်းဖို့ပျက်ကွက်တယ်ဆိုတဲ့ စွပ်စွဲချက်ကို ကျွန်တော်တို့ချေပသွားမှာပါ" လို့ 'ဇဲလန်စကီ'ရဲ့ပြောရေးဆိုခွင့်ရှိသူ 'ဆာဂျီနိုက်ကီဖိုရော့ဗ်'က စနေနေ့က ဖေ့စ်ဘွတ်မှာရေးသားထားပါတယ်။

ရုရှားတို့နဲ့ဆွေးနွေးရာမှာ အစ္စရေးလ်ကို ကြားနေဖျန်ဖြေသူအဖြစ် ဆောင်ရွက်ပေးဖို့ 'ဇဲလန်စကီ'နဲ့ အစိုးရအဖွဲ့က တောင်းဆိုခဲ့ကြောင်းလည်း ယူကရိန်းဘက်ကအတည်ပြုထားပါတယ်။

ဒီအကြောင်းနဲ့ပတ်သက်ပြီး အစ္စရေးနိုင်ငံဆိုင်ရာ ယူကရိန်းသံအမတ်'ယက်ဗ်ဟန်ကော်ညီချက်'က New York Times သတင်းဌာနကိုပြောကြားရာမှာ အစ္စရေးလ်က တုန့်ပြန်ဖြေကြားခြင်းမရှိသေးကြောင်း၊ မကူညီဘူးလို့ ဆိုလိုတာမဟုတ်ကြောင်း၊ ဒီပွဲမှာ သူတို့ကဘယ်နေရာက ပါဝင်ရမလဲဆိုတာကို မှန်းဆနေတာဖြစ်နိုင်ကြောင်း၊ ယူကရိန်းရော ရုရှားနဲ့ပါ ဆက်ဆံရေးအဆင်ပြေတဲ့ တစ်ခုတည်းသောဒီမိုကရက်တစ်နိုင်ငံက အစ္စရေးလ်သာဖြစ်တယ်လို့ ယုံကြည်ထားကြောင်း ရှင်းပြသွားပါတယ်။

ဒီမတိုင်ခင်နေ့တုန်းက သောကြာနေ့မှာ ဆွေးနွေးညှိနှိုူင်းဖို့ကိစ္စကို ယူကရိန်းဘက်က ငြင်းဆိုလိုက်ကြောင်း၊ ဆွေးနွေးဖို့ကိစ္စကို စနေနေ့ရောက်တဲ့အထိရွှေ့ဆိုင်းဖို့ ယူကရိန်းကအကြံပြုခဲ့ကြောင်း ရုရှားနိုင်ငံခြားဝန်ကြီးဌာနမှ ပြောရေးဆိုခွင့်ရှိသူ'မာရီယာဇာခါရိုဗာ'က ပြောဆိုခဲ့ပါတယ်။

ရုရှားတို့က ဆွေးနွေးပွဲပြုလုပ်မယ့်နေရာကို ဘီလာရုစ်မြို့တော်မင့်စ်က်မှာပြုလုပ်ဖို့ အကြံပြုခဲ့ပေမယ့် 'ဇဲလန်စကီ'က ပိုလန်မြို့တော်ဝါဆောမှာ ပြုလုပ်ဖို့ပြောခဲ့ပြီးနောက် အသံတိတ်နေခဲ့တယ်လို့ ရုရှားစစ်အစိုးရအဖွဲ့မှပြောရေးဆိုခွင့်ရှိသူ 'ဒီမစ်ထရီပက်စ်ကော့ဗ်'က သောကြာနေ့အစောပိုင်းက ဆိုပါတယ်။

ယူကရိန်းတို့ရဲ့ အမျိုးသားရေးဝါဒကိုလည်းစွပ်စွဲလိုက်ကာ လူနေအရပ်တွေမှာ ဒုံးကျည်လက်နက်တွေတပ်ဆင်ထားခြင်းက အရပ်သားထိခိုက်မှုတွေရှိလာနိုင်တယ်လို့ သတိပေးခဲ့ပါတယ်။

သောကြာနေ့အစောပိုင်းက ယူကရိန်းသမ္မတ နိုင်ငံတော်မိန့်ခွန်းပြောကြားရာမှာ ယူကရိန်းတို့ကြားနေရေးကိစ္စနဲ့ပတ်သက်ပြီး ရုရှားနဲ့တွေ့ဆုံဆွေးနွေးဖို့ ကြောက်ရွံ့နေမှာမဟုတ်ကြောင်း၊ သို့ပေမယ့် ပြင်ပအဖွဲ့အစည်းတစ်ခုမှ လုံခြုံရေးအာမခံချက်အလိုရှိကြောင်း၊ နေတိုး(NATO)တပ်ဖွဲ့တွေနဲ့ ဥရောပခေါင်းဆောင်တွေကလည်း ယူကရိန်းကိုစွန့်ခွာသွားကြပြီး တစ်ယောက်တည်းခုခံနေရကြောင်း ပြောကြားသွားပါတယ်။

ယူကရိန်းအုပ်ချုပ်မှုအောက်မှခွဲထွက်လာပြီး လွတ်လပ်တဲ့နယ်မြေများအဖြစ် အသိအမှတ်ပြုခြင်းခံထားရတဲ့ ဒိုနက်စ်ပြည်သူ့သမ္မတနိုင်ငံနဲ့ လူဟန့်စ်ပြည်သူ့သမ္မတနိုင်ငံတို့က ရုရှားသမ္မတ'ပူတင်'ထံ စစ်ရေးအကူအညီတောင်းခံခဲ့ပါတယ်။

ယူကရိန်းရဲ့ စစ်တပ်အင်အားကိုဖြိုခွင်းပြီး ရန်လိုတိုက်ခိုက်မှုတွေကနေ ပြည်သူတွေကိုကာကွယ်ပေးရန် အကြောင်းပြချက်နဲ့ ကြာသပတေးနေ့နံနက်အစောပိုင်းမှာ ရုရှားတို့က ဒွန်ဘက်စ်ဒေသသို့ အထူးစစ်ဆင်ရေးဆောင်ရွက်ချက်ဖြင့် ကျူးကျော်တိုက်ခိုက်လာပါတယ်။

စစ်ဆင်ရေးပစ်မှတ်အတိအကျအတိုင်း ယူကရိန်းနိုင်ငံရှိ စစ်ရေးအချက်အခြာနေရာတွေကို ဖြိုခွင်းခဲ့ပြီးနောက် ရုရှားတပ်တွေက အဓိကမြို့ကြီးများသို့ ဆက်လက်ချီတက်လာခဲ့ကာ မြို့တော်ကိဗ်နဲ့ နီးစပ်လာနေပြီဖြစ်ပါတယ်။

ဒီကျူးကျော်မှုကိုတုန့်ပြန်တဲ့အနေနဲ့ အနောက်နိုင်ငံတွေက ရုရှားစီးပွားရေးအဖွဲ့အစည်းတွေ၊ အကြီးတန်းအရာရှိတွေ၊ ဥပဒေလွှတ်တော်အမတ်တွေ၊ မီဒီယာအဖွဲ့အစည်းတွေကိုပစ်မှတ်ထားကာ ပြင်းထန်တဲ့ပိတ်ဆို့မှုတွေ ဆက်တိုက်ချမှတ်ခဲ့တဲ့အပြင် ရုရှားသမ္မတ'ပူတင်'နဲ့ နိုင်ငံခြားရေးဝန်ကြီး'ဆာဂျီလက်ဗ်ရော့ဗ်'တို့ကိုလည်း ဒဏ်ခတ်ပိတ်ဆိုမှုတွေပြုလုပ်ခဲ့ပါတယ်။

Source: RT
#Yangon_Media_Group

Published 25 February 2022

တရုတ်သမ္မတ ရှီကျင့်ဖျင်နှင့် ရုရှားသမ္မတဗလက်ဒီမီယာပူတင်တို့ဟာ ယူကရိန်းအကျပ်အတည်းနှင့်ပတ်သက်လို့ ဖေဖော်ဝါရီ(၂၅)ရက် သောကြာနေ့မွန်းလွဲပိုင်းမှာ တယ်လီဖုန်းဆက်သွယ်ပြောဆိုခဲ့ကြပါတယ်။

ရုရှားရဲ့သမ္မတပူတင်က အမေရိကန်နှင့်နေတိုးအဖွဲ့ဟာ ရုရှားရဲ့ တရားဝင် လုံခြုံရေးရာစိတ်ပူပန်မှုကိုမျက်ကွက်ပြုပြီး ရုရှားရဲ့ မဟာဗျူဟာမျဉ်းနီကို စိန်ခေါ်ခဲ့တယ်လို့ပြောလိုက်ပြီး ယူကရိန်းနှင့်အဆင့်မြင့်အပိုင်းဆွေးနွေးဖို့ဆန္ဒရှိတယ်လို့ပြောပါတယ်။ တရုတ်သမ္မတရှီကလည်း ရုရှားရဲ့ စေ့စပ်ဆွေးနွေးမှုက တစ်ဆင့်ဖြေရှင်းမယ်ဆိုတာကို ထောက်ခံတယ်လို့ပြန်လည်ဆွေးနွေးခဲ့ပါတယ်။

Source CMG

Published 25 February 2022

ရုရှားကျူးကျော်တိုက်ခိုက်မှုအပေါ်  ဥရောပသမဂ္ဂ၏ တုန့်ပြန်မှုဟာ သိပ်ပြီးနှေးကွေးလွန်းတယ်လို့ ယူကရိန်းသမ္မတ ဗိုလိုဒီမီယာဇီလင်စကီး က ဖေဖော်ဝါရီ ၂၅ရက်က ဝေဖန်ပြောကြားလိုက်ပါတယ်။ လက်စားချေတုန့်ပြန်မယ့်အစီအစဉ်တွေဟာ အဆင်သင့်ရှိနေရမယ်လို့သူကတောင်းဆိုလိုက်ပါတယ်။

Source AFP

Published 25 February 2022

အိမ်နီးချင်းဥရောပနိုင်ငံတွေဟာ ယူကရိန်းနိုင်ငံသားတွေ ထွက်ပြေးဖို့ ပိုသင့်တော်တဲ့နေရာတွေဖြစ်ပေမယ့် အမေရိကန်ပြည်ထောင်စုအနေနှင့်လည်း ယူကရိန်းက ဒုက္ခသည်တွေကို လက်ခံဖို့ပြင်ဆင်နေတယ်လို့ အိမ်ဖြူတော် သတင်းပြန်ကြားရေးမှူး ဂျင်းနစ်ဆာကီက ပြောပါတယ်။ ဒါပေမယ့် ယူကရိန်းအများစုကတော့ ဥရောပမှာပဲ အခြေချချင်ကြမှာြဖစ်တယ်လို့ သူမက စောဒကတက်လိုက်ပါတယ်။

ဖေဖော်ဝါရီ၂၄ရက်ကပြုလုပ်တဲ့သတင်းစာရှင်းလင်းပွဲမှာ “ အမေရိကန်အနေနှင့် ယူကရိန်းဒုက္ခသည်တွေကို လက်ခံမှာလား” ဆိုတဲ့ မေးခွန်းကို ဆာကီက တုန့်ပြန်ပြောဆိုခဲ့တာဖြစ်ပါတယ်။

“ ဒါပေမယ့် အများစုကတော့ အိမ်နီးချင်းဥရောပနိုင်ငံတွေကိုပဲသွာချင်ကြမယ်လို့ ကျွန်မတို့ အသေအချာမျှော်လင့်ထားပါတယ်” လို့ သူမကပြောပါတယ်။

ဘိုင်ဒင်ရဲ့အစိုးရအနေနှင့် သူတို့ရဲ့လိုအပ်ချက်တွေက ဘာတွေဖြစ်မလဲ၊ ဒုက္ခသည်တွေအတွက် သူတို့လက်ခံနိုင်မယ့်နေရာက  ဘယ်မှာလဲဆိုတာတွေနှင့်ပတ်သက်ပြီး ဥရောပနိုင်ငံတွေနှင့်အလုပ်လုပ်နေတယ်လို့လည်း သူမကဆက်ပြောပါတယ်။

ဥပမာပြရရင် ပိုလန်နိုင်ငံဆိုရင် လွန်ခဲ့သော ၂၄နာရီကတည်းက ယူကရိန်းတွေ အလုံးလိုက်အရင်းလိုက်ဝင်ရောက်လာနေတဲ့ အတွေ့အကြုံတွေရှိနေပြီ လို့လည်းသူမက ရည်ညွှန်းပြောဆိုပါတယ်။

ဒုက္ခသည်တွေကို အမေရိကန်ကိုယ်တိုင်က လက်ခံဖို့ ပြင်ဆင်နေပြီလားလို့ ထပ်မေးတဲ့အခါ “ သမ္မတအနေနှင့် ဒါအတွက် အသေအချာပြင်ဆင်မှာပါ”လို့ သူမကဖြေပါတယ်။  အိမ်နီးချင်းဥရောပနိုင်ငံတော်တော်များများဟာ ဒုက္ခသည်တွေအတွက်ဖွင့်ပေးမယ်လို့ပြောဆိုထားပါတယ်။ ယူကရိန်းနိုင်ငံသားတော်တော်များများကတော့ ဥရောပနိုင်ငံတွေကိုပဲသွာချင်ကြမှာပါ လို့သူမကပြောပါတယ်။

ရုရှားသမ္မတပူတင်က လူဟန့်နှင့်ဒွန်ညက်တို့ကို ကာကွယ်ဖို့ ဒွန်ဘတ်စ်ဒေသမှာ အထူးစစ်ဆင်ရေးလုပ်မယ်လို့ ကြေညာပြီးတဲ့နောက် ရုရှးဟာ ကြာသပတေးနေက ယူကရိန်းကို‌ လေကြောင်း တိုက်ခိုက်မှုတွေစတင်ခဲ့ပါတာဖြစ်ပါတယ်။

ယူကရိန်းနိုင်ငံသားတော်တော်များများဟာ နိုင်ငံကထွက်ခွာနေကြတာကို ဗွီဒီယိုတွေမှာမြင်တွေ့ကြရပါတယ်။ အများစုကတော့ ပိုလန်နှင့် အိမ်နီးချင်ဥရောပနိုင်ငံတွေဘက် ဦးတည်သွားနေကြတာဖြစ်ပါတယ်။

 Source RT

Published 25 February 2022

လွန်ခဲ့တဲ့သုံးနှစ်ကျောက်က ရုပ်ရှင်မင်းသား၊ဟာသသရုပ်ဆောင်နှင့် ဖျော်ဖြေရေးကုမ္ပဏီအမှုဆောင်တစ်ဦးအဖြစ် လူသိထင်ရှားဖြစ်ခဲ့တဲ့ ဗိုလိုဒီမီယာ ဇီလင်စကီးဟာ အခုတော့ ယူကရိန်းသမ္မတအဖြစ်နှင့် ရုရှားနှင့်စစ်ဖြစ်ပွားနေတဲ့ နိုင်ငံကို ဦးဆောင်သူဖြစ်နေရပြီလို့ NPR သတင်းဌာနကသတင်းရေးသားလိုက်ပါတယ်။

ရွေးကောက်ပွဲမဝင်ခင်က ဇီလင်စကီးဟာ နာမည်ကျော် Servant Of the People ပြည်သူတို့၏ အစေခံ ဆိုတဲ့ ရုပ်သံဇာတ်လမ်းတွဲမှာ ဇာတ်လိုက်အဖြစ် သရုပ်‌ဆောင်ခဲ့ပါတယ်။ အဲဒီဇာတ်ကားကို သူကိုယ်တိုင်ထုတ်လုပ်ခဲ့တာဖြစ်ပြီး အသက်၃၀ကျော်အရွယ် အထက်တန်းကျောင်းက သမိုင်းဆရာကလေးတစ်ဦးအဖြစ်သရုပ်ဆောင်ခဲ့ပါတယ်။ တစ်ရက်မှာ သူဟာ အတန်းထဲမှာ အစိုးရရဲ့ အကျင့်ပျက်ခြာစားမှုတွေကို လှောင်ပြောင်ဝေဖန်ပြောဆိုခဲ့တာကို အတန်းထဲက တပည့် တစ်ဦးက ဆိုရှယ်မီဒီယာ ပေါ်တင်လိုက်တဲ့အတွက် နေ့ချင်းညချင်းနာမည်ကြီးသွားပြီး အဲဒီကနေ သမ္မတအဖြစ် အရွေးခံရတဲ့  သရော်တဲ့ ဇာတ်လမ်းဖြစ်ပါတယ်။

သူဟာ အသက်(၁၇)နှစ်အရွယ်ကတည်းက KVN လို့ခေါ်တဲ့ ပြည်တွငး်က ဟာသသရုပ်ဆောင်ပြိုင်ပွဲအဖွဲထဲ ဝင်ရောက်ခဲ့ရင်း ရုပ်ရှင်နှင့်ရုပ်သံလောကထဲရောက်ရှိလာသူပါ။ သူဟာ ရုပ်သံဇာတ်လမ်းတွေမှာ သရုပ်ဆောင်အဖြစ်ပါဝင်ခဲ့ပြီး ၂၀၁၅မှာ ထုတ်လွှင့်ပြသခဲ့တဲ့ Servant Of the People ဇာတ်လမ်းတွဲမှာတော့ ယူကရိန်းသမ္မတအဖြစ် သရုပ်ဆောင်ရင်း နာမည်ကျော်လူကြိုက်များခဲ့တာပါ။

အဲဒီအောင်မြင်မှုကိုရယူရင်း ၂၀၁၈ခုနှစ်မှာ သူဟာ သူရဲ့ Kvartal 95 ရုပ်သံထုတ်လုပ်ရေးကုမ္ပဏီကအဖွဲ့သားတွေနှင့်အတူတူ Servant Of the People အမည်နှင့်ပဲ နိုင်ငံရေးပါတီတည်ထောင်ခဲ့ပါတယ်။အဲဒီကမှတစ်ဆင့် လူကြိုက်များမှုအပေါ်အခြေခံကာ သမ္မတရွေးကောက်ပွဲအဆင့်ဆင့်ဖြတ်ကျော်ရင်း ယူကရိန်းသမ္မတဖြစ်လာခဲ့ပါတယ်။

တကယ်တမ်းအပြင်မှာ သူသမ္မတဖြစ်ခဲ့ရတာကတော့ တကယ့်ကိုမမျှော်လင့်ဘဲ ဖြစ်ခဲ့ရတာပါလို့ နယူးယောက်ကာသတင်းစာရဲ့ မော်စကိုသတင်းထောက် ဂျိုရှားယာဖာက ပြောပါတယ်။

ဒွန်ဘတ်စ်မှာဖြစ်ခဲ့တဲ့စစ်ရဲ့ရလာဒ်အဖြစ် ၂၀၁၉ခုနှစ်အထိ ယူကရိန်းမှာဖြစ်ခဲ့တဲ အားလျော့စိတ်ပျက်မှုတွေရဲ့အပေါ် သူက အမြတ်ထုတ်နိုင်ခဲ့ပြီး သမ္မတဖြစ်လာခဲ့တာပါ။အဲဒီပြသနာတွေက အခုထက်ထိဖြေရှင်းလို့လည်းမရသေးပါဘူးလို့ ယာဖာက ပြောပါတယ်။

“အဲဒီအချိန် ယူကရိန်းပြည်သူတွေက အခြားအပြောင်းလဲတစ်ခုကို အငမ်းမရလိုချင်ကြတယ်။အဲဒီအချိန်မှာ ဇီလင်စကီးက နိုင်ငံရေးမြင်ကွင်းမှာ ပေါ်လာပြီး သူရဲ့ နည်းပါးတဲ့အတွေ့အကြုံက အကျိုးရှိသွားစေတာလို့ ပွင့်ပွင့်လင်းလင်းပြောနိုင်တယ်” လို့ သူကဆက်ပြောပါတယ်။

“ရုရှားရဲ့ ယူကရိန်းအပေါ်ကျူးကျော်မှုဟာ ဇီလင်စကီးအတွက် ကြီးမားတဲ့ စိန်ခေါ်မှုတစ်ခု အသေအချာပဲ။ဒါပေမယ့် သူအစကနဦဲးမှာ အရင်ဆုံးရင်ဆိုင်ရတာက ရုပ်သံဇာတ်လမ်းထဲက သမ္မတနှင့် အပြင်က တကယ့်သမ္မတမတူတဲ့ ခက်ခဲရှုပ်ထွေးမှုတွေကို ထိန်းကျောင်းဆောင်ရွက်ရတဲ့ စိန်ခေါ်မှုပဲဖြစ်တယ်” လို့ ယာဖာကဆက်ပြောပါတယ်။

“အဲဒါကြောင့် သူ့ရဲ့သမ္မတအလုပ်ဟာ တကယ့်ကိုဖရိုဖရဲနှင့်အခက်အခဲတွေကြုံရတယ်။ဒါကို ဇီလင်စကီးနှင့် သူ့မိတ်ဆွေတွေက ကောင်းကောင်းသဘောပေါက်လိမ့်မယ်လို့ ကျွန်တော်တော့မထင်ဘူး။ လှည့်ဖျားမှုနှင့်ရှုပ်ထွေးမှုတွေအမျိုးမျိုးတွေနှင့် တကယ်တမ်းတော့ နိုင်ငံကိုအုပ်ချုပ်ရတာဖြစ်တယ်” လို့ယာဖာကပြောပါတယ်။

ယခုအချိန်မှာတော့ အသက်၄၄နှစ်ရှိပြီဖြစ်တဲ့ သမ္မတ ဇီလင်စကီးဟာ   နိုင်ငံခြားသံရုံးတွေ ကိဗ်ကနေ ထွက်ပြေးနေတာ၊နိုင်ငံခြားသားကျွမ်းကျင်သူ တွေ၊ရင်းနှီးမြှပ်နှံသူတွေ ထွက်ပေးသွားကြတာကို စောင့်ကြည့်နေရတယ်။ နိုင်ငံခြားရင်းနှီးမြှပ်နှံမှုအသစ်ဆိုရင်လည်း ရပ်သွားပြီ” လို့ သူကဆက်ပြောပါတယ်။

“ပူတင်၊အနောက်နိုင်ငံတွေနှင့် ယူကရိန်းနိုင်ငံတွင်းက ပြည်တွင်း ဂိုဏ်းဂဏတွေအကြား သူ့အနေနှင့် ဖြေရှင်းပေးဖို့ အတော်မဖြစ်နိုင်ဘူး။ဒီစစ်ပွဲကို ဇီလင်စကီးမရပ်နိုင်ရတဲ့ ကြီးမားတဲ့အကြောင်းရင်းတစ်ခုကတော့ ဗလက်ဒီမာပူတင်ပဲ ဖြစ်ပါတယ် “လို့သူကပြောလိုက်ပါတယ်။

Source NPR/Wiki