၁၈ ဩဂုတ် ၂၀၂၄

ထိုင်းဘုရင်မင်းမြတ်က  ပါလီမန်က ရွေးကောက်လိုက်တဲ့ ပါအေတုံတန်ရှင်နာဝတ်တရာကို  ထိုင်းဝန်ကြီးချုပ်အဖြစ် ဩဂုတ် ၁၈ ရက် တနင်္ဂနွေနေ့က အတည်ပြု ပေးလိုက်ပါတယ်။ အဲဒါကြောင့် သူမဟာ လာမယ့်ရက်သတ္တပတ်တွေမှာ ဝန်ကြီးအဖွဲ့ကို ပြန်လည်ဖွဲ့စည်းဖို့ လမ်းပွင့်သွားပြီဖြစ်တယ်လို့ရိုက်တာကရေးပါတယ်။

ထိုင်းနိုင်ငံရဲ့ အသက်အငယ်ဆုံးဝန်ကြီးချုပ်ဖြစ်လာတဲ့ အသက် ၃၇နှစ်အရွယ် ပါအေတုံတန်ဟာ  ယခင်ဝန်ကြီးချုပ်ဟောင်း သက်ဆင်ရှင်နာဝတ်တရာရဲ့ သမီးထွေးနှင့် ဝန်ကြီးချုပ်ဟောင်း ယင်လတ်ရှင်တာဝတ်တရာရဲ့ တူမလည်းဖြစ်ပါတယ်။

ယနေ့ ဘန်ကောက်မှာပြုလုပ်တဲ့ အခမ်းအနားမှာ ပါအေတုံတန်ဟာ တရားဝင် အခမ်းအနား ဝတ်စုံကို ဆင်မြန်းထားပါတယ်။ သူမဟာ ဘရင်မင်းမြတ်ရဲ့ ရုပ်ပုံရှေ့မှာ ဒူးထောက်ပြီး အလေးအမြတ်ပြုပါတယ်။ အောက်လွှတ်တော်အတွင်းရေးမှူး အာပက် ဆူခန်နန်က ဘုရင်မင်းမြတ်ရဲ့ အတည်ပြုစာလွှာကို ဖတ်ကြားပါတယ်။

“ အုပ်ချုပ်ရေးမဏ္ဏိုင်ရဲ့ အကြီးအကဲတစ်ဦးအနေနှင့် ကျွန်မဟာ ကျွန်မရဲ့တာဝန်တွေကို အမတ်တွေနှင့်အတူ ပွင့်လင်းတဲ့ နှလုံးသားနှင့် အတူတကွဆောင်ရွက်ပါမယ်” လို့ ဝန်ကြီးချုပ်သစ် ပါအေတုံတန်ကမိန့်ခွန်းထဲမှာ ထည့်ပြောသွားပါတယ်။ ကျွန်မတို့နိုင်ငံကို တည်တည်ငြိမ်ငြိမ်နှင့် ရှေ့ဆက်သွားနိုင်အောင် ထင်မြင်ယူဆချက်တွေအားလုံးကို ကျွန်မနားထောင်ပါမယ် လို့လည်း သူမကဆက်ပြောပါတယ်။

အစိုးရအလုပ်မလုပ်ဖူးတဲ့ ပါအေတုံတန်အနေနှင့် မျက်နှာစာအစုံရဲ့ စိန်ခေါ်မှုတွေကို ရင်ဆိုင်ရပါလိမ့်မယ်။ စီးပွားရေးတွေ အယောင်ယောင်အမှားမှားဖြစ်နေတာတွေ ၊ ဖွေထိုင်းပါတီအပေါ်လူကြိုက်များမှုကျဆင်းလာနေတာတွေနှင့် ပါတီရဲ့ အထင် ကရလုပ်ငန်းတစ်ခုဖြစ်တဲ့  ဘတ်ဘီလျံ ၅၀၀ တန် ဒစ်ဂျစ်တယ်ပိုက်ဆံအိတ်အစီအစဉ် မစတင်နိုင်တာတွေစသဖြင့် အများကြီး ဖြစ်ပါတယ်။

ဘုရင်မင်းမြတ်ရဲ့ အတည်ပြုခန့်အပ်မှုခံယူပြီးတဲ့နောက် ပါအေတုံတန်ဟာ ဖခင်ဖြစ်သူ သက်ဆင်နှင့် မိသားစုကို ပွေ့ဖက် လိုက်ပါတယ်။ သူမအနေနှင့် ယခင်ဝန်ကြီးချုပ် ဆာရက်သာရဲ့ မူဝါဒအားလုံးကို ဆက်လုပ်မယ်လို့လည်းပြောပါတယ်။  အစိုးရအနေနှင့် ဒစ်ဂျစ်တယ်ပိုက်ဆံအိတ်အစီအစဉ်ကို လက်မလွှတ်သေးကြောင်းနှင့် နောက်ထပ်‌ရွေးချယ်လုပ်ဆောင်စရာ တွေကို လေ့လာနားထောင်ဦးမယ်လို့လည်း ဆိုပါတယ်။ သူမအနေနှင့် ဖခင်သက်ဆင်ကို ဘယ်အစိုးရ ရာထူးနေရာမှ ပေးမှာ မဟုတ်ကြောင်း ဒါပေမယ့် ဖခင်ရဲ့အကြံဉာဏ်ကိုတော့ ယူမှာဖြစ်ကြောင်း ပါအေတုံတန်ကဆက်ပြောပါတယ်။

လာမယ့်လမှာ သူ့အစိုးရရဲ့ အသေးစိတ်မူဝါဒကို ထုတ်ပြန်ကြေညာပေးမယ်လို့လည်း သူမကပြောပါတယ်။

Ref: Reuters

၁၇ ဩဂုတ် ၂၀၂၄

အမေရိကန်နိုင်ငံခြားရေးဝန်ကြီးဌာန အကြံပေး တွမ်ဆူလီဗန်၊ USAID လက်ထောက်အုပ်ချုပ်ရေးမှူး မိုက်ကယ်ရှစ်ဖာတို့ဟာ NUG နှင့် NUCC ၊အဓိကခုခံရေးအဖွဲ့တွေ၊ KNU ၊ KNPP နှင့်  CNFတို့မှ ဦးဆောင်သူတွေနှင့် ဩဂုတ် ၁၆ ရက်သောကြာနေ့က အွန်လိုင်းပေါ်ကနေ တွေ့ဆုံခဲ့တယ်လို့ အမေရိကန် နိုင်ငံခြားရေးဝန်ကြီးဌာနရဲ့ သတင်းထုတ်ပြန်ချက်ကို ကိုးကားပြီး ရိုက်တာ သတင်းက ဖော်ပြရေးသားပါတယ်။

အွန်လိုင်းအစည်းအဝေးမှာ အရပ်သားအစိုးရ အသွင်ကူးပြောင်းရေးကို ကူညီဖို့နှင့် လက်ရှိ နစက ကို ဖိအား ဆက်လက်ပေးနေဖို့ သဘောတူခဲ့ကြတယ်လို့လည်း အဆိုပါသတင်းအရသိရပါတယ်။

တရုတ်နိုင်ငံခြားရေးဝန်ကြီး ဝမ်ယိ မြန်မာနိုင်ငံလာရောက်ပြီးဗိုလ်ချုပ်မှူးကြီးမင်းအောင်လှိုင်နှင့်တွေ့ဆုံကာ နောက်တစ်ရက် မှာ လာအို၊မြန်မာနှင့်ထိုင်းနိုင်ငံခြားရေးဝန်ကြီးတွေနှင့်အတူ ထိုင်းနိုင်ငံ ချင်းမိုင်မြို့မှာ မြန်မာနိုင်ငံကိုအကူအညီပေးဖို့  ဝမ်ယိ  က တိုက်တွန်းခဲ့အပြီးမှာ အမေရိကန်အရာရှိများနှင့် အတိုက်အခံတွေ အွန်လိုင်း အစည်းအဝေးလုပ်ခဲ့ကြတာဖြစ်ပါတယ်။

အစည်းအဝေးမှာ နစကကို ဖိအားဆက်ပေးနေဖို့ အရေးကြီးတယ်လို့ သဘောတူခဲ့ကြပါတယ်။

“ အမေရိကန်အနေနှင့် သူတို့ပေါင်းစည်းညီညွတ်မှုကို တည်ဆောက်ရာမှာ ကူညီနိုင်ဖို့အတွက် ဒီမိုကရေစီလိုလားသူတွေကို တိုက်ရိုက်အကူအညီတွေတိုးချဲ့ပေးသွားမှာဖြစ်ပါတယ်။ပြည်သူဝန်ဆောင်မှုအလုပ်တွေနှင့် လိုအပ်နေတဲ့နေရာတွေမှာ လူသားချင်းစာနာထောက်ထား မှု အကူအညီတွေကို ပေးအပ်နိုင်ဖို့ သူတို့ရဲ့လုပ်နိုင်စွမ်းတွေတိုးတက်အောင်ကူညီမှာပါ” လို့ အမေရိကန်အရာရှိတွေက ပြောတယ်လို့ ရိုက်တာကရေးပါတယ်။

နှစ်ဘက်စလုံးက မြန်မာနိုင်ငံရဲ့ အကျပ်အတည်း အဆုံးသတ်စေဖို့အတွက်   ကုလသမဂ္ဂရဲ့ မြန်မာနိုင်ငံဆိုင်ရာ   အထူး   ကိုယ်စားလှယ်တွေနှင့် အာဆီယံတို့အပါအဝင် နိုင်ငံတကာ အသိုက်အဝန်းနှင့် လက်တွဲလုပ်ဆောင်ဖို့လည်း သဘောတူခဲ့  ကြတယ်လို့ဆိုပါတယ်။

ခပ်စောစောပိုင်းကလည်း တရုတ်နိုင်ငံခြားရေးဝန်ကြီးဝမ်ယိက မြန်မာနိုင်ငံအခြေအနေဟာ စိတ်ပူစရာဖြစ်ပြီး အိမ်နီးချင်း နိုင်ငံတွေအနေနှင့်   ပဋိပက္ခတွေတားဆီးဖို့အတွက် စီးပွားရေးနှင့်လူမှုအခြေအနေတွေဖန်တီးရေးကူညီရာမှာ မြန်မာ နိုင်ငံနှင့် ပူးပေါင်းဆောင်ရွက်မှုတွေတိုးမြှင့်လုပ်ဆောင်ကြဖို့ တိုက်တွန်းခဲ့ပါတယ်လို့ ရိုက်တာက သတင်းဖော်ပြပါတယ်။

မြန်မာနိုင်ငံရဲ့ ဒီမိုကရေစီအတွင်းကူပြောင်းရေးကို အားပေးထောက်ခံပြီး လက်ရှိအကျပ်အတည်းကိုဖြေရှင်းမယ့်နည်းလမ်း ရှာဖွေနေတဲ့ ဒေသဆိုင်ရာ အစီအစဉ်ကိုလည်း ထောက်ခံတယ်လို့ ဝမ်ယိကပြောထားတာဖြစ်ပါတယ်။

Ref: Reuters

၁၆ ဩဂုတ် ၂၀၂၄

မြန်မာနိုင်ငံတွင် ပြည်တွင်း မတည်မငြိမ်ဖြစ်မှုနှင့်ပြည်တွင်းစစ် ဖြစ်ပွား၍ မရကြောင်း တရုတ် ကွန်မြူနစ်ပါတီ ဗဟို  ကော်မတီ နိုင်ငံရေးရာဗျူရိုအဖွဲ့ဝင်နှင့် နိုင်ငံခြားရေးဝန်ကြီး မစ္စတာဝမ်ယိက ထိုင်း၊လာအိုနှင့် မြန်မာနိုင်ငံခြားရေးဝန်ကြီး     များနှင့် လေးပွင့်ဆိုင် အလွတ်သဘောဆွေးနွေးရာတွင် တိုက်တွန်းပြောကြားခဲ့တယ်လို့သိရပါတယ်။

လက်ရှိတွင် မြန်မာနိုင်ငံအခြေအနေသည် စိတ်ပူပန်ရစေကြောင်းနှင့် မြန်မာနိုင်ငံအရေးကိစ္စတွင် ကျော်လွန်၍မရတဲ့ စည်း   သုံးခုကို ခိုင်မာစွာထိန်းသိမ်းရမှာဖြစ်ပြီး ယင်းတို့မှာ မြန်မာနိုင်ငံတွင် ပြည်တွင်း မတည်မငြိမ်ဖြစ်မှုနှင့် ပြည်တွင်းစစ်  ဖြစ်ပွား   ၍မရခြင်း၊ အာဆီယံမိသားစု၏ လမ်းကြောင်းမှ ကင်းကွာသွား၍မရခြင်း၊ ပြင်ပအင်အားစုများ ထင်သလိုစိမ့်ဝင်၍ ဝင်ရောက်   စွက်ဖက်မှုကို ခွင့်မပြုခြင်းတို့ပင်ဖြစ်တယ်လို့ ဝမ်ယိကပြောကြားခဲ့တာဖြစ်ကြောင်း မြန်မာနိုင်ငံဆိုင်ရာ တရုတ်ပြည်သူ့သမ္မတ နိုင်ငံသံရုံးရဲ့ သတင်းထုတ်ပြန်ချက်မှာဖော်ပြထားပါတယ်။

ဩဂုတ်လ ၁၆ ရက် ယနေ့တွင် တရုတ်၊ လာအို၊ မြန်မာ၊ ထိုင်းနိုင်ငံ လေးနိုင်ငံမှ နိုင်ငံခြားရေးဝန်ကြီးများသည် ထိုင်းနိုင်ငံ ချင်းမိုင်မြို့၌ အလွတ်သဘော တွေ့ဆုံဆွေးနွေးမှုကျင်းပခဲ့ရာမှာ တရုတ်နိုင်ငံခြားရေးဝန်ကြီးက ယခုလို ဆွေးနွေး တိုက်တွန်း     လိုက်တာ ဖြစ်ပါတယ်။

တရုတ်၊ လာအို၊ မြန်မာ၊ ထိုင်းသည် အိမ်နီးချင်းနိုင်ငံများဖြစ်ကြပြီး “တစ်လှေတည်းစီးကာ တစ်မြစ်တွင်းရေအတူသောက်သုံး” ကြကြောင်း၊ မိမိတို့အကြားတွင် ရှည်လျားလှသော နယ်စပ်မျဉ်းနှင့် သမိုင်းကြောင်းကြာရှည်သည့် ဆက်ဆံရေးသမိုင်း  ရှိသဖြင့် အခြားနိုင်ငံများထက် မြန်မာနိုင်ငံ၏ ထူးခြားသောနိုင်ငံအခြေအနေကို ပိုမိုနားလည်ကာ မြန်မာနိုင်ငံအား ကူညီပေးရန် စွမ်းရည် နှင့်ဆန္ဒပိုမိုရှိကြကြောင်းလည်း မစ္စတာဝမ်ယိကဆက်လက်ပြောကြားပါတယ်။

မြန်မာနိုင်ငံ ပြန်လည်တည်ငြိမ် ဖွံ့ဖြိုးတိုးတက်ရန် မြန်မာနိုင်ငံ၏ အိမ်နီးချင်းထက်ပိုလိုလားသောသူ မရှိပါကြောင်း၊ မိမိတို့  သည် စိတ်ရင်းအမှန်စေတနာဖြင့် မြန်မာနိုင်ငံ၏ အခြေအနေအရှိန်လျော့ ပြန်လည်တည်ငြိမ်လာရေးကို ကူညီဆောင်ရွက်   ပေး   ရန် မျှော်လင့်ပါတယ်လို့လည်း သူက ပြောပါတယ်။

တရုတ်နိုင်ငံ၏ မြန်မာနိုင်ငံအပေါ်ထားရှိသည့် ချစ်ကြည်ရေးမူဝါဒသည် မြန်မာနိုင်ငံ ပြည်သူတစ်ရပ်လုံးကိုမျက်နှာမူကြောင်း၊ မိမိတို့သည် ပြည်တွင်းရေးကိုဝင်ရောက်မစွက်ဖက်ခြင်း အခြေခံမူကို အမြဲတစေလက်ကိုင်ထားပြီး မြန်မာနိုင်ငံက အချုပ်    အခြာအာဏာနှင့် နိုင်ငံတစ်သားတည်းဖြစ်မှုအား ကာကွယ်ထိန်းသိမ်းရေးကို ထောက်ခံအားပေးပါကြောင်း မစ္စတာ  ဝမ်ယိက    ပြောကြားတယ်လို့ သတင်းထုတ်ပြန်ချက်မှာဖော်ပြထားပါတယ်။

ယင်းအပြင် မြန်မာနိုင်ငံက တွေ့ဆုံဆွေးနွေးမှုဖြင့် ပြည်တွင်းပြန်လည်သင့်မြတ်မှုဖော်ဆောင်ရန် ထောက်ခံအားပေးပါ ကြောင်း၊ မြန်မာနိုင်ငံက မိမိနိုင်ငံအခြေအနေနှင့်ကိုက်ညီသည့် ဖွံ့ဖြိုးတိုးတက်မှု လမ်းကြောင်းရှာဖွေတွေ့ရှိမှုကို အားပေးပါ    ကြောင်းလည်း တရုတ်နိုင်ငံခြားရေးဝန်ကြီးက ဆွေးနွေးပါတယ်။

တရုတ်နိုင်ငံခြားရေးဝန်ကြီးက မြန်မာအရေးကိစ္စနှင့်ပတ်သက်၍ အဆိုပြုချက်အချို့ကို ဆွေးနွေးပွဲတွင် တင်ပြခဲ့တယ်လို့လည်း သိရပါတယ်။ ယင်းတို့မှာ-

၁။ မြန်မာနိုင်ငံက ပြည်တွင်းငြိမ်းချမ်းရေးနှင့် ပြန်လည်သင့်မြတ်ရေးလုပ်ငန်းစဉ်ကို တရားဥပဒေနှင့်အညီ စနစ်တကျ ပြန်လည်  ဖော်ဆောင်ရန် အတူတကွထောက်ခံအားပေးခြင်း

မြန်မာနိုင်ငံဘက်က အဆိုပြုသည့် “ရှေ့လုပ်ငန်းစဉ်ငါးရပ်” တတိယဗားရှင်းသည် အဆိုပါရည်မှန်းချက်ကို ဖော်ဆောင်ရန် အထောက်အကူပြုသဖြင့် နားလည်လေးစားပေးသင့်သည်။ တစ်ချိန်တည်းတွင် “ရှေ့လုပ်ငန်းစဉ်ငါးရပ်”အသစ်နှင့် အာဆီယံ ၏ “ဘုံသဘောတူညီချက်ငါးရပ်” ၏ ကိုက်ညီသည့်အချက်ကို တက်တက်ကြွကြွဆွေးနွေးကာ အပြန်အလှန်မြှင့်တင်၍ စုပေါင်းအင်အားအဖြစ်ဖော်ဆောင်ရမည်။

၂။ မြန်မာပြည်သူများ လက်ရှိအခက်အခဲကျော်ဖြတ်နိုင်ရန် အတူတကွထောက်ခံအားပေးခြင်း

ဘက်အသီးသီးက မြန်မာနိုင်ငံထံ လူသားချင်းစာနာထောက်ထားမှုအကူအညီများ ပေးအပ်ရန် ကြိုဆိုပြီး မည်သည့်ကူညီမှုမဆို မြန်မာနိုင်ငံအစိုးရနှင့် ပြည်သူများ၏ဆန္ဒကို လေးစားသင့်သည်။ ကူညီမှုများကို အတိုက်အခံပဋိပက္ခပြုလုပ်ရာတွင် အသုံး   မပြုဘဲ ပြည်သူလူနေမှုဘဝကို အာမခံရာတွင် အမှန်တကယ်အသုံးပြုရမည်ဖြစ်သည်။ မြန်မာနိုင်ငံနှင့် လက်တွေ့ကျ ပူးပေါင်း   ဆောင်ရွက်မှုကိုမြှင့်တင်ကာ မြန်မာနိုင်ငံက မိမိစွမ်းရည်မြှင့်တင်ရန် ကူညီပေး၍ ပဋိပက္ခများဖြစ်ပွားမှုကို တားဆီးရန်အတွက် အကျိုးရှိသော လူမှုရေးနှင့်စီးပွားရေး အခြေအနေဖန်တီးပေးရမည်။

၃။ အာဆီယံပုံစံဖြင့် မြန်မာနိုင်ငံ အရေးကိစ္စကို ကောင်းမွန်စွာဖြေရှင်းရန် အတူတကွထောက်ခံအားပေးခြင်း၊

အာဆီယံက စည်းလုံးညီညွတ်မှု ထိန်းသိမ်းထားမှုနှင့် အာဆီယံ၏ဗဟိုတည်နေရာကို ထောက်ခံအားပေးခြင်းနှင့် ဒေသတွင်း   ပြင်ပအင်အား  များက အခြေအနေပျက်အောင် နှောင့်ယှက်ခြင်းကြောင့် ပဋိပက္ခပိုမိုဆိုးရွားလာမှုကို သတိထားရမည်ဖြစ်သည် လို့  သတင်း  ထုတ်ပြန်ချက်အရသိရပါတယ်။

မြန်မာနိုင်ငံကဆွေးနွေးရာတွင်-

လက်ရှိအခြေအနေနှင့် မြန်မာနိုင်ငံအစိုးရက ပြည်တွင်းတည်ငြိမ်မှု ကာကွယ်ထိန်းသိမ်းရန်အတွက် ကြိုးပမ်းမှုများကို မြန်မာ   ဘက်ကမိတ်ဆက်ပေးခဲ့ပြီး သုံးနိုင်ငံက ချစ်ကြည်ရင်းနှီးသော အိမ်နီးချင်းနိုင်ငံအနေဖြင့် မြန်မာနိုင်ငံ အခက်အခဲ   ကြုံတွေ့   ချိန်တွင် ကူညီသောလက်ကမ်းပေးမှုကို ကျေးဇူးတင်ရှိပါကြောင်း၊ အလွတ်သဘောတွေ့ဆုံဆွေးနွေးမှုကို ကောင်းမွန်စွာအသုံး    ပြု၍ ပူးပေါင်းဆောင်ရွက်မှုကိုမြှင့်တင်ကာ နားလည်မှုတိုးမြှင့်ပြီး ပြည်တွင်းတည်ငြိမ်မှုနှင့် နိုင်ငံရေးပြန်လည်သင့်မြတ်မှုကို ဆောလျင်စွာဖော်ဆောင်ရန် ဆန္ဒရှိကြောင်း ပြောကြားခဲ့ပါတယ်။

ထိုင်းနိုင်ငံဆွေးနွေးရာတွင်-

မြန်မာနိုင်ငံသည် ငြိမ်းချမ်းမှု၊ တစ်သားတည်းဖြစ်မှုနှင့် တည်ငြိမ်မှုကို ထိန်းသိမ်းထားရန် တွေ့မြင်လိုပါကြောင်း၊ မြန်မာနိုင်ငံက မိမိနည်းလမ်းဖြင့် ပြည်တွင်းရေးပြဿနာအား ဖြေရှင်းမှုကိုလေးစားပါကြောင်း၊ မြန်မာပြည်သူများကဦးဆောင်၍ မြန်မာ ပြည်သူများကပိုင်ဆိုင်မှုကို လိုက်နာပါကြောင်း၊ ဘက်အသီးသီးနှင့်ချိတ်ဆက်မှုကို ထိန်းသိမ်းကာ မြန်မာနိုင်ငံကို အတတ် နိုင်ဆုံးကူညီပေး၍ အာဆီယံလုပ်ငန်းစဉ်နှင့်အတူ အပြန်အလှန်ဖြည့်စွက်မှုဖြစ်လာပြီး ကောင်းမွန်စွာဖြေရှင်းသည့်    နည်းလမ်း  ကို ရှာဖွေတွေ့ရှိရန် ကြိုးပမ်းသွားလိုသည့် ဆန္ဒရှိကြောင်း ပြောကြားခဲ့ပါတယ်။

လာအိုနိုင်ငံကဆွေးနွေးရာတွင်-

လေးနိုင်ငံသည်ဘုံနယ်စပ်များရှိကြပြီး အေးအတူပူအမျှဖြစ်ကြကြောင်း၊ မြန်မာနိုင်ငံ၏အိမ်နီးချင်းနှင့် မိတ်ဆွေအနေဖြင့် မြန်မာနိုင်ငံက တည်ငြိမ်မှုနှင့် ဖွံ့ဖြိုးတိုးတက်မှုကို ထိန်းသိမ်းထားရန် မျှော်လင့်ပြီး မြန်မာနိုင်ငံကို ကူညီပေးရန် ဆန္ဒ   ရှိပါကြောင်း၊ လေးနိုင်ငံမှ အလွတ်သဘောတွေ့ဆုံဆွေးနွေးမှုသည် မြန်မာနိုင်ငံအခြေအနေကို ပိုမိုနားလည်ပြီး ကောင်းမွန်    စွာဖြေရှင်းရန်နည်းလမ်း အတူတကွရှာဖွေရန် အထောက်အကူပြုပါကြောင်း၊ တရုတ်နိုင်ငံက ပြည်တွင်းရေးကို မစွက်ဖက်သည့် အခြေခံမူအား လိုက်နာသည့် သဘောထားကို လုံးဝသဘောတူပါကြောင်း၊ မြန်မာနိုင်ငံပြဿနာကို မြန်မာပြည်သူများကသာ ဖြေရှင်းနိုင်ကြောင်း၊ ပြင်ပအင်အားများက စွက်ဖက်မှုကို ကာကွယ်ရမည်ဖြစ်ကြောင်း ပြောကြားခဲ့ပါတယ်။

ဆွေးနွေးပွဲသို့ တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရိုအဖွဲ့ဝင်  နိုင်ငံခြားရေးဝန်ကြီး Mr. Wang Yi၊ လာအိုနိုင်ငံ ဒုတိယဝန်ကြီးချုပ်၊ နိုင်ငံခြားရေးဝန်ကြီး Mr. Saleumxay Kommasith ၊ မြန်မာနိုင်ငံ ဒုတိယဝန်ကြီးချုပ်၊ နိုင်ငံခြားရေးဝန်ကြီးဌာန ပြည်ထောင်စုဝန်ကြီး ဦးသန်းဆွေ၊ ထိုင်းနိုင်ငံခြားရေးဝန်ကြီးဌာန အမြဲတမ်းအတွင်းဝန် Ms. Eksiri Pintaruchi တို့တက်ရောက်ခဲ့ကြပါတယ်။

@ymg/knl

၁၆ ဩဂုတ် ၂၀၂၄
🔸ထိုင်းပါလီမန်က ဝန်ကြီးချုပ်ဟောင်း သက်ဆင်ရှင်နာဝါထရာ၏ သမီးထွေး ပါအေတုံတန် ရှင်နာဝါထရာကို ထိုင်းနိုင်ငံ၏ အငယ်ဆုံးဝန်ကြီးချုပ်တစ်ဦးအဖြစ် ယနေ့ ဩဂုတ် ၁၆ ရက်သောကြနေ့က မဲပေးရွေးချယ်လိုက်ကြပါတယ်။
ဝန်ကြီးချုပ်ဖြစ်လာမယ့် အသက် ၃၇နှစ်အရွယ် ပါအေတုံတန်ဟာ အစပိုင်းမှာ အိုးနင်းခွက်နင်းအဖြစ်မျိုးနှင့် ကြုံရနိုင်စရာရှိတယ်လို့ ရိုက်တာကရေးပါတယ်။
🔸သူမဟာ ထိုင်းနိုင်ငံရဲ့ ဒုတိယမြောက် အမျိုးသမီးဝန်ကြီးချုပ်ဖြစ်ပြီး ပထမဆုံးအမျိုးသမီးဝန်ကြီးချုပ်က သက်ဆင်ရဲ့ နှမ ယင်လတ်ရှင်နာဝါထရာဖြစ်ပါတယ်။ အဲဒီအပြင် ရှင်နာဝါထရာမိသားစုထဲမှာ ပါအေတုံတန်ဟာ တတိယမြောက်ဝန်ကြီးချုပ် ဖြစ်လာသူလို့လည်း ဆိုရမှာဖြစ်ပါတယ်။
Ref: Reuters

၁၅ ဩဂုတ် ၂၀၂၄

တရုတ်နိုင်ငံသည် မြန်မာနိုင်ငံအပေါ် ပြည်ပ မှ ဝင်ရောက်စွက်ဖက်နေခြင်းကို ပြင်းထန်စွာဆန့်ကျင်ပြီး  အခြေခံဥပဒေ  မူဘောင်အောက်တွင် ပြည်တွင်းနိုင်ငံရေးသင့်မြတ်မှုအတွက် မြန်မာ၏ ကြိုးပမ်းအားထုတ်မှုတွေကို တရုတ်က ဆက်လက်ထောက်ခံအားပေးသွားမယ်လို့ မြန်မာနိုင်ငံကိုရောက်ရှိနေတဲ့ တရုတ်နိုင်ငံခြားရေးဝန်ကြီး ဝမ်ယိက မြန်မာ ခေါင်းဆောင်ဟောင်း အငြိမ်းစားဗိုလ်ချုပ်မှူးကြီး သန်းရွှေကို ပြောကြားပါတယ်။

တရုတ်နိုင်ငံခြားရေးဝန်ကြီးလည်းဖြစ် တရုတ်ကွန်မြူနစ်ပါတီဗဟိုကော်မတီ နိုင်ငံရေးရာဗျူရိုအဖွဲ့ဝင်လည်းဖြစ်တဲ့ ဝမ်ယိဟာ ယမန်နေ့ ဩဂုတ် ၁၄ရက်က မြန်မာနိုင်ငံရဲ့ နိုင်ငံတော်အေးချမ်းသာယာရေးနှင့်ဖွံ့ဖြိုးရေးကောင်စီဥက္ကဋ္ဌဟောင်း အငြိမ်းစား ဗိုလ်ချုပ်မှူးကြီးသန်းရွှေနှင့်တွေ့ဆုံရာမှာ ပြောကြားခဲ့တာလို့ ဆင်ဟွာသတင်းဌာနက သတင်းထုတ်ပြန်ပါတယ်။

တွေ့ဆုံစဉ်အတွင်း ဝမ်ယိက တရုတ်နိုင်ငံအနေဖြင့် မြန်မာနိုင်ငံကို ပြည်ပ မှ ဝင်ရောက်စွက်ဖက်မှုတွေနှင့် စိမ့်ဝင်မှုတွေကို ဆန့်ကျင်တယ်။ပြီးတော့ မြန်မာနိုင်ငံရဲ့ တည်ငြိမ်ရေးနှင့်ဖွံ့ဖြိုးတိုးတက်ရေးကို ဟန့်တားတဲ့ မည်သည့် ‌အပြော မည်သည့်အလုပ်တွေကိုမဆိုလည်း ဆန့်ကျင်တယ်လို့ ဆက်ပြောပါတယ်။

တရုတ်နိုင်ငံအနေဖြင့် မြန်မာလွတ်လပ်ရေး၊အချုပ်အခြာအာဏာ၏၊ အမျိုးသားစည်းလုံးညီညွတ်ရေးနှင့် နယ်မြေတည်တံ့ခိုင်မြဲရေးတွေ ကာကွယ်စောင့်ရှောက်ထိန်းသိမ်းနေတာတွေကို ဆက်လက်ထောက်ခံအားပေးသွားမယ်လို့ ဝမ်က ပြောပါတယ်။ ပြီးတော့ ဖွဲ့စည်းပုံအခြေခံဥပဒေမူဘောင်အောက်ကနေ  ပြည်တွင်း နိုင်ငံရေးအရပြန်လည်သင့်မြတ်ရေး၊ ရွေးကောက်ပွဲကျင်းပရေးနှင့် ဒီမိုကရေစီအသွင်ကူးပြောင်းရေးတွေမှာ မြန်မာနိုင်ငံရဲ့ကြိုးပမ်းအားထုတ်မှုတွေကိုလည်း တရုတ်က ထောက်ခံအားပေးကြောင်း ထပ်လောင်းအတည်ပြုတယ်လို့ လည်းသူကဆက်ပြောပါတယ်။

တွေ့ဆုံမှုအတွင်း ဗိုလ်ချုပ်မှူးကြီး(ငြိမ်း)သန်းရွှေက မြန်မာနိုင်ငံအပေါ် တရုတ်နိုင်ငံက ဘက်စုံ ရေရှည် ကိုယ်ကျိုးမငဲ့ ကူညီဆောင်ရွက်ပေးနေမှုတွေကို ကျေးဇူးတင်တယ်လို့ ဝမ်ယိကိုပြန်လည်ပြောကြားခဲ့ပါတယ်။

တရုတ်နိုင်ငံဟာ မြန်မာနိုင်ငံရဲ့ ပေါက်ဖော်ဖြစ်ပြီး အိမ်နီးချင်းဖြစ်ကြောင်းနှင့် နှစ်နိုင်ငံဟာ တစ်နိုင်ငံနှင့်တစ်နိုင်ငံ ချစ်ကြည်ရေးအခြေခံပြီးအမြဲဆက်ဆံခဲ့ကြတယ်၊ နှစ်နိုင်ငံအကြား ငြိမ်းချမ်းစွာ ရှေရှည်အတူယှဉ်တွဲနေထိုင်ရေးဟာ ဘယ်တော့မှပြောင်းလဲမှာမဟုတ်ဘူးလို့လည်း အငြိမ်းစားဗိုလ်ချုပ်မှူးကြီးကဆက်လက် ပြောဆိုကြောင်း  သတင်းမှာ   ဖော်ပြထားပါတယ်။

သူ့အနေနှင့် မြန်မာနိုင်ငံကို တရုတ်ကဆက်လက်ထောက်ခံအားပေးလိမ့်မယ်လို့ယုံကြည်ပြီး ပြင်ပဝင်ရောက်စွက်ဖက်မှုကို  စောင့်ကြပ်ရာမှာနှင့် ပြည်တွင်းတည်ငြိမ်ရေးထိန်းသိမ်းရာမှာ မြန်မာကိုကူညီလိမ့်မယ်လို့လည်းယုံကြပါတယ်လို့ အငြိမ်းစား ဗိုလ်ချုပ်မှူးကြီးကပြောပါတယ်။

တရုတ်-မြန်မာ ပေါက်ဖော်ချစ်ကြည်ရင်းနှီးမှုသည် နိုင်ငံတကာမျက်နှာစာမှာ လောကဓံကိုကြံကြံ့ခိုင်နိုင်ခဲ့ပြီး အချိန်နှင့်အမျှ ပိုပြီးခိုင်မာတောင့်တင်းလာပါတယ်လို့ ဝမ်ယိက ပြန်လည်ပြောကြားပါတယ်။

တရုတ်နိုင်ငံဟာ ယင်းရဲ့ အိမ်နီးချင်းသံတမန်ရေးရာမှာ တရုတ်-မြန်မာဆက်ဆံရေးဖွံ့ဖြိုးတိုးတက်ရေး ကို အရေးကြီး အနေအထားအဖြစ် အမြဲထားရှိတယ်လို့လည်းဝမ်ကပြောပါတယ်။

အေးအတူပူအမျှ တရုတ်-မြန်မာအသိုက်အဝန်းတည်ဆောက်ရာမှာ သိသာထင်ရှားတဲ့ရလာဒ်တွေပိုမိုရရှိစေဖို့ တရုတ်နိုင်ငံဟာ မြန်မာနိုင်ငံနှင့်လက်တွဲဆောင်ရွက်လိုတယ်လို့လည်း တရုတ်နိုင်ငံခြားရေးဝန်ကြီးကပြောပါတယ်။

ဝမ်ယိဟာ မြန်မာနိုင်ငံကို ဗုဒ္ဓဟူးနေ့မှာရောက်ရှိခဲ့ပြီးနောက် ကိုးကြိမ်မြောက် လန်ချန်း-မဲခေါင် ပူးပေါင်းဆောင်ရွက်ရေး နိုင်ငံခြားရေးဝန်ကြီးများအစည်းအဝေးကိုတက်ဖို့ထိုင်းနိုင်ငံကိုဆက်လက်သွားရောက်မှာဖြစ်ပါတယ်။ ထိုင်းနိုင်ငံမှာ  တရုတ်၊ လာအို၊မြန်မာနှင့်ထိုင်း နိင်ငံခြားရေးဝန်ကြီးတွေ အလွတ်သဘော တွေ့ဆုံဆွေးနွေးကြဖို့လည်းရှိနေပါတယ်။

Ref: Xinhua

၁၄ ဩဂုတ် ၂၀၂၄

တရုတ်ပြည်သူ့သမ္မတနိုင်ငံအနေဖြင့် ရှမ်းပြည်နယ် မြောက်ပိုင်းတွင်  EAO အဖွဲ့များအနေဖြင့် မြို့ရွာများအပေါ် တိုက်ခိုက်မှု ဖြစ်စဉ်များကို ဆန့်ကျင်တယ်လို့ တရုတ်ကွန်မြူနစ်ပါတီ ဗဟိုကော်မတီ နိုင်ငရေး ဗျူရိုအဖွဲ့ဝင်နှင့် နိုင်ငံခြားရေးဝန်ကြီး မစ္စတာ ဝမ်ယိက ပြောကြားပါတယ်။

နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်သည် ယနေ့ ဩဂုတ် ၁၄ ရက် မွန်းလွဲပိုင်းက နေပြည်တော်ရှိ နစက ဥက္ကဋ္ဌရုံး သံတမန်ဆောင်ဧည့်ခန်းမတွင် နေပြည်တော်သို့ရောက်ရှိနေသည့် တရုတ်ကွန်မြူနစ်ပါတီ ဗဟိုကော်မတီ နိုင်ငရေး ဗျူရိုအဖွဲ့ဝင်နှင့် နိုင်ငံခြားရေးဝန်ကြီး မစ္စတာ ဝမ်ယိနှင့်အဖွဲ့အား တွေ့ဆုံ၍ နှစ်နိုင်ငံ   တွေ့ဆုံ  ဆွေးနွေးခဲ့ရာမှာ ယင်းအချက်ကိုထည့်သွင်း ဆွေးနွေးခဲ့တာဖြစ်ပါတယ်။

ယခုလိုတွေ့ဆုံဆွေးနွေးမှုသည် နှစ်နိုင်ငံအကြားချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများကို ပိုမိုတိုးတက်အောင် ဆောင်ရွက်နိုင်မှာဖြစ်တယ်လို့ ဗိုလ်ချုပ်မှူးကြီးမင်းအောင်လှိုင်က နှုတ်ခွန်းဆက်စကားပြောကြားပါတယ်။

မစ္စတာဝမ်ယိက မြန်မာနိုင်ငံသည် တရုတ်နိုင်ငံ၏အိမ်နီးချင်းကောင်း ၊မိတ်ဆွေဟောင်း၊မိတ်ဆွေကောင်းနိုင်ငံဖြစ်ပြီး မြန်မာနိုင်ငံ၏ လွတ်လပ်ရေးနှင့် အချုပ်အခြာအာဏာတည်တံ့ခိုင်မြဲမှုကို အခိုင်အမာထောက်ခံတယ်လို့လည်း  ဆက်လက် ပြောကြားပါတယ်။နစကရဲ့ ရှေ့လုပ်ငန်းစဉ်တွေနှင့် ပါတီစုံဒီမိုကရေစီအထွေထွေရွေးကောက်ပွဲအတွက် ကြိုတင်ပြင်ဆင် ဆောင်ရွက်နေမှုတွေကို ထောက်ခံတယ်လို့လည်း တရုတ်နိုင်ငံခြားရေးဝန်ကြီးကဆက်လက်ပြောကြားပါတယ်။

ယင်းနောက် နှစ်နိုင်ငံအကြားချစ်ကြည်ရင်းနှီးမှုဆိုင်ရာကိစ္စရပ်များ၊ ကာကွယ်ရေးဆိုင်ရာ ပူးပေါင်းဆောင်ရွက်မှုကိစ္စရပ်များ၊ မြန်မာနိုင်ငံ၏ ပြည်တွင်းငြိမ်းချမ်းရေးဆိုင်ရာကိစ္စရပ်များနှင့် နယ်စပ်ဒေသတည်ငြိမ်အေးချမ်းရေးဆိုင်ရာကိစ္စရပ်များ၊အွန်လိုင်း လောင်းကစားမှုများ၊အွန်လိုင်းလိမ်လည်မှုများ၊အခြားငွေကြေးလိမ်လည်မှုများနှင့်တရားမဝင်လုပ်ငန်းများပပျောက်စေရေး နှစ်နိုင်ငံပူးပေါင်းဆောင်ရွက်မယ့်ကိစ္စရပ်များ၊တရားမျှတသည့်ပါတီစုံဒီမိုကရေစီအထွေထွေရွေးကောက်ပွဲကျင်းပရေးကြိုတင်ပြင်ဆင်ဆောင်ရွက်လျက်ရှိတဲ့အခြေအနေတွေကို ရင်းနှီးပွင့်လင်းစွာ အမြင်ချင်းဖလှယ်ခဲ့ကြတယ်လို့ သတင်းထုတ်ပြန်ချက်မှာ ဖော်ပြထားပါတယ်။

ဗိုလ်ချုပ်မှူးကြီးမင်းအောင်လှိုင်နှင့်အတူ နစက တွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး ၊ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဦးသန်းဆွေ၊ နစက ဥက္ကဋ္ဌရုံးဝန်ကြီးဌာန(၂) ပြည်ထောင်စုဝန်ကြီးဦးကိုကိုလှိုင်၊ပြန်ကြားရေးဝန်ကြီးဌာန ဒုတိယ ဝန်ကြီးဗိုလ်ချုပ်ဇော်မင်းထွန်းနှင့် တာဝန်ရှိသူတွေ တက်ရောက်ခဲ့ကြပါတယ်။

မစ္စတာဝမ်ယီနှင့်အတူ တရုတ်နိုင်ငံခြားရေးဝန်ကြီးဌာနမှ တာဝန်ရှိသူများ၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီးအဖြစ် ခန့်အပ်ရန် သဘောတူပြီးဖြစ်သည့် Ms Ma Jia မစ္စမာကျား၊နိုင်ငံခြားရေးဝန်ကြီးဌာန ဒုတိယဝန်ကြီး  Mr. Sun Weidong ၊အာရှရေးရာအထူးကိုယ်စားလှယ် Mr. Deng Xijunမစ္စတာတိန့်ရှီကျွင်းနှင့်သံရုံးမှ တာဝန်ရှိသူများ  တက်ရောက်ခဲ့ကြပါတယ်။

မစ္စတာဝမ်ယိ၏ ယခုမြန်မာနိုင်ငံခရီးစဉ်သည်  တရုတ်-မြန်မာ ကဏ္ဍအသီးသီးတွင် အကျိူးတူပူးပေါင်းဆောင်ရွက်မှုကို နက်ရှိုင်းစေပြီး နှစ်နိုင်ငံပြည်သူများ၏ ချစ်ကြည်ရင်းနီးသော သံယောဇဉ်ကို ခိုင်ခဲ့စေကာ တရုတ်-မြန်မာ  အေးအတူ ပူအမျှ  အသိုက်အဝန်းတည်ဆောက်မှု နက်ရှိုင်းခိုင်မာစေရေး မြှင့်တင်ဖို့ဖြစ်တယ်လို့ တရုတ်နိုင်ငံခြားရေးဝန်ကြီးဌာနက ခရီးစဉ် မတိုင်ခင် သတင်းထုတ်ပြန်ခဲ့ပါတယ်။

@ymg/knl