Published 7 Oct 2022

ထိုင်းဝန်ကြီးချုပ် ပရာရွတ် ချန်အိုချာဟာ အနည်းဆုံး လူ၃၆ ဦးသေဆုံးခဲ့ရတဲ့ ထိုင်းနိုင်ငံ အရှေ့မြောက် နောင်ဘွာလမ်ဖူးပြည်နယ်မှာရှိတဲ့ ကလေးထိန်းဌာနနေရာကို သွားရောက်ခဲ့ပါတယ်။

ထိုင်းဝန်ကြီးချုပ်ဟာ အရာရှိတွေခြံရံလျက် ထိုင်းနိုင်ငံရဲ့ အဆိုးရွားဆုံး အစုလိုက်သတ်မှုတွေထဲကတစ်ခုမှာ သေဆုံးခဲ့ကြရသူတွေအတွက် လွမ်းသူ့ပန်းစည်းချခဲ့ပါတယ်။

ဒီမနက်စောစောပိုင်းမှာ ထိုင်းဘုရင်မင်းမြတ်ကိုယ်စား အဖြူရောင်ယူနီဖောင်းဝတ်ဆင်ထားတဲ့ အရာရှိငယ်တစ်ဦးကလည်း ကြီးမားတဲ့ လွမ်းသူ့ပန်းခွေလာရောက်ချခဲ့ပါတယ်။

နှလုံးကြေကွဲနေကြတဲ့ မိဘတွေဟာ နေဝင်တော့မယ့်အလင်းရောင်အောက်က ကလေးထိန်းဌာနရဲ့ လှေကားထစ်တွေပေါ် အဖြူရောင်နှင်းဆီပွင့်တွေ လာရောက်ချခဲ့ကြပါတယ်။

သေဆုံးသူတွေထဲမှာ ကလေး၂၄ ဦးပါဝင်ပြီး ယောကျ်ားလေး ၂၁ ဦးနှင့် မိန်းကလေး၃ ဦးတို့ဖြစ်ပါတယ်။ ကျန်၂၁ ဦးကလူကြီးတွေဖြစ်ပါတယ်။

အလုပ်ထုတ်ခံရတဲ့ ရဲကြပ်ပြီးပန်ယာခါရက်ဟာ တရားဝင်ဝယ်ထားတဲ့ ၉ မမပစ္စတိုနှင့် ဓားတစ်လက်ကိုင်ဆိုင်ပြီး အဲဒီ ကလေးထိန်းဌာနကို ကြာသပတေးနေ့ မွန်းလွဲ ၁၂နာရီခွဲမှာ ဝင်ရောက်ပစ်ခတ်တိုက်ခိုက်ခဲ့တာဖြစ်ပါတယ်။

အီဲဒနောက် အိမ်ကိုပြန်ပြီး ဇနီးနှင့်သားကိုပါပစ်သတ်ကာ ကိုယ့်ကိုကိုယ်ပါ သေနတ်နှင်ပစ်ပြီး အဆုံးစီရင်ခဲ့တာဖြစ်ပါတယ်။

Source AFP

#Thailand
#Thailand_Nursery_Mass_Shooting

#Prayut_Chan-O-Cha

Published 6 Oct 2022

ဥရောပမှ လျှပ်စစ်ဓာတ်အားတင်သွင်းလို့မရခဲ့လျှင်၊လောင်စာဓာတ်ငွေ့လျှပ်စစ်ဓာတ်အားပေးစက်ရုံများအတွက် လုံလောက်တဲ့ သဘာဝဓာတ်ငွေ့တွေမရခဲ့လျှင် ယခုနှစ်ဆောင်းရာသီတွင် ဗြိတိန်နိုင်ငံတွင် တစ်ရက်လျင် သုံနာရီကြာ လျှပ်စစ်မီးဖြတ်တောက်မှုနှင့် ကြုံရနိုင်ကြောင်း ဗြိတိန်နိုင်ငံရဲ့ အမျိုးသား လျှပ်စစ်ဓာတ်အားကွန်ယက်လိုင်း National Grid ကုမ္ပဏီက သတိပေးလိုက်တဲ့အကြောင်း ရိုက်တာကသတင်းရေးသားပါတယ်။

ဗြိတိန်ဝန်ကြီးချုပ် လစ်ထရပ်ဇ်က ဥရောပအနေဖြင့် စွမ်းအင်တင်ပို့စီးဆင်းမှုကို ဆောင်းရာသီအတွင်း ဆက်လက်ထိန်းသိမ်းထားရန် တောင်းဆိုခဲ့အပြီး လျှပ်စစ်ဓာတ်အားဖြတ်တောက်မယ့်အလားအလာတွေရှိလာတာဖြစ်ပါတယ်။

ဥရောပတစ်လွှားက နိုင်ငံတွေက ယူကရိန်းနှင့်စစ်ပွဲကြောင့် ရုရှားထံမှ ဓာတ်ငွေ့တွေ ပြတ်တောက်မှုဖြစ်လာတဲ့အခါ ဆောင်းရာသီအရေးပေါ်အစီအစဉ်တွေ ရေးဆွဲနေပါတယ်။  အဲသလိုဆိုရင် ခွဲတမ်းတွေဖြစ်လာနိုင်ပြီး အခြားနိုင်ငံတွေကို လောင်စာဆီတင်ပို့တာတွေလည်း ဖြတ်တောက်ရဖွယ်ရှိနေပါတယ်။

ဥရောပကဓာတ်ငွေ့တွေ မလုံလောက်တာနှင့် ပြင်သစ်ရဲ့နျူကလီးယားဓာတ်အားပေးစက်ရုံတော်တော်များများ ပြုပြင်မွမ်းမံနေရတဲ့အတွက် အဲဒါတွေဟာ ဗြိတိန်အတွက် လုံလောက်တဲ့ ဓာတ်ငွေ့ရရှိဖို့ ခက်ခဲလာနေပါတယ်။ အဲဒါကြောင့် လျှပ်စစ်ဓာတ်အားကို ပုံမှန်အားဖြင့်ရရှိတဲ့ ပြင်သစ်၊ဘယ်ဂျီယံနှင့် နယ်သာလန်တို့ကနေ့ တင်သွင်းဖို့လိုအပ်နေပါတယ်။

“အလားအလာမရှိတဲ့ အရေးကြီးဖြစ်ရပ်နှင့် အနေအထားမှာကြုံနေရတယ်။ ဆိုလိုတာက အချို့သော ကျွန်တော်တို့ရဲ့ ဖောက်သည်တွေဟာ ရက်တစ်ရက်ရဲ့ ကြိုတင်ကြေညာထားတဲ့အချိန်တွေမှာ လျှပ်စစ်မီးပြတ်တောက်တာဖြစ်နိုင်တယ်။  ယေဘုယျအားဖြင့်တော့ သုံးနာရီကြာအလှည့်ကျပြတ်တောက်တာမျိုးပေါ့” လို့ အမျိုးသား လျှပ်စစ်ဂရစ်စနစ်အော်ပရေတာ(ESO)က ယင်းရဲ့ဆောင်းရာသီအခြေအနေခန့်မှန်းချက်မှာ ဖော်ပြထားတာဖြစ်ပါတယ်။

ဒါပေမယ့် ဗြိတိန်အစိုးရကတော့ ဆောင်းရာသီမှာ လုံလောက်တဲ့ လျှပ်စစ်ဓာတ်အားရရှိဖို့ သူယုံကြည်နေတယ်လို့ ပြောပါတယ်။

“ ယူကေဟာ လုံခြုံစိတ်ချရပြီးကွဲပြားတဲ့ စွမ်းအင်စနစ်တစ်ခုရှိပါတယ်။ ဒီနှစ်ဆောင်းရာသီမှာ အိမ်ထောင်စုတွေနင့်စီးပွားရေးလုပ်ငန်းတွေကို လျှပ်စစ်မီးအပြည့်ရရှိစေဖို့ ကျွန်တော်တို့ ယုံကြည်မှုရှိပါတယ်” လို့ အစိုးရရဲ့ ပြောရေးဆိုခွင့်ရသူကပြောပါတယ်။

ပိုပြီးစိတ်ချရအောင် အစီအစဉ်တွေလည်းချပြီးပါပြီ။ ဗြိတိန်ရဲ့ မြောက်ပင်လယ် ဓာတ်ငွေ့အရန်တွေ၊ ပြီးတော့ နော်ဝေနှင့် သန့်ရှင်းတဲ့စွမ်းအင်အရင်းအမြစ်တွေလိုမျိုးပေါ့ လို့ သူက ထပ်မံဖြည့်စွက်ပြောပါတယ်။

Source Reuters

#Britain

#Electricity_Shortage

#Russia_gas

Published 6 Oct 2022

မကြာမီရောက်ရှိတော့မယ့် နွေစပါးရာသီအတွက် ဧက ၈ ဒသမ ၅ သိန်းတွင် အကျိုးတူလယ်ယာစနစ် (Contract Farming) ဆောင်ရွက်ရန်အတွက် နိုင်ငံတော်က တစ်ဧကကိုကျပ် ၂ သိန်းနှုန်းဖြင့် အထူးချေးငွေစီစဉ်ပေးမယ်လို့ သိရပါတယ်။

အဲဒီအတွက် ဆန်စပါးသီးနှံ အတွက် ငွေကျပ် ၁၄၀ ဘီလီယံအထိ ထောက်ပံ့ပေးအပ်သွားရန် စီစဉ်ပေးထားတာဖြစ်တယ်လို့လည်း  သိရပါတယ်။

အဆိုပါ အထူးချေးငွေစီစဉ်ပေးမယ့်အကြောင်း နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်က ယနေ့ အောက်တိုဘာ ၆ ရက်က နေပြည်တော်မှာပြုလုပ်တဲ့ မြန်မာ့ဆန်စပါး ညီလာခံ -၂၀၂၂ (Myanmar Rice Conference – 2022) ဖွင့်ပွဲမှာ ထုတ်ဖော်ပြော  ကြားခဲ့တာဖြစ်ပါတယ်။

မြန်မာနိုင်ငံဆန်စပါးစိုက်ပျိုးထုတ်လုပ်မှုနှင့် စီးပွားလုပ်ငန်းဖွံ့ဖြိုးတိုးတက်ရေးအတွက် အစိုးရနှင့် ပုဂ္ဂလိကကဏ္ဍများမှ  ဆောင်ရွက် ရမယ့် လုပ်ငန်းအစီအစဉ်များကို ဆွေးနွေးဖော်ထုတ်ရန် ရည်ရွယ်၍ “နိုင်ငံ့စီပွားမြှင့်တင်ဖို့၊ ဆန်စပါးဖြင့် ကြိုးပမ်းစို့” ဟူသည့် ခေါင်းစဉ်ဖြင့်  မြန်မာ့ဆန်စပါး ညီလာခံ -၂၀၂၂ကို မြန်မာအပြည်ပြည်ဆိုင်ရာ ကွန်ဗင်းရှင်း (ဗဟိုဌာန-၂)၌ စတင်ကျင်းပနေပါတယ်။

စိုက်ပျိုးထုတ်လုပ်သူ တောင်သူ လယ်သမားများနှင့် ပြည်ပတင်ပို့သူ ကုမ္ပဏီများအကြား အကျိုးတူလယ်ယာ စနစ် (Contract Farming)ဖြင့် တစ်ဧက အထွက်နှုန်းတိုးတက်ပြီး ဝင်ငွေ တိုးတက်ရေးနှင့် ကုန်ထုတ်လုပ်မှုတိုးတက်ရေး၊ ဆန်စပါးအထူးပြုကုမ္ပဏီကြီးများ ထူထောင်ဆောင်ရွက်ကြဖို့ကို ဗိုလ်ချူပ်မှူးကြီးက တိုက်တွန်းသွားပါတယ်။

အရည်အသွေးကောင်းဆန်များကို အရေ အတွက် ပိုမိုထုတ်လုပ်နိုင်ပြီး ပြည်ပဈေးကွက်ကို တိုးတက်တင်ပို့နိုင်‌ရေး၊ ဆန်စပါး ကဏ္ဍတွင် ဒီဂျစ်တယ်နည်းပညာများ ထိရောက်စွာ အသုံးပြုနိုင်ရေးတို့အတွက် ကျယ်ကျယ် ပြန့်ပြန့်ဆွေးနွေးပေးကြ ဖို့ကိုလည်း နစက ဥက္ကဋ္ဌက ဆန်စပါးစိုက်ပျိုးထုတ်လုပ်သူတွေကိုလည်း ဆက်လက် တိုက်တွန်းသွားပါတယ်။

မြန်မာနိုင်ငံသည် ဘင်္ဂလားဒေ့ရှ်နိုင်ငံသို့ တတိယအကြိမ်အဖြစ် ဆန်တန်ချိန် ၂ သိန်း ရောင်းချနိုင်ရန် ဆောင်ရွက်လျက်ရှိပြီး တန်းမြင့်ဆန်တစ်ချို့ကိုလည်း အာဖရိကနိုင်ငံသာမ ကတရုတ်ပြည်သူ့သမ္မတ နိုင်ငံကို ပါတိုးမြှင့်တင်ပို့နိုင်ရန် ဆောင်ရွက်နေတယ်  လို့ သတင်းထုတ်ပြန်ချက်အရသိရှိရပါတယ်။

၂၀၂၂ - ၂၀၂၃ဘဏ္ဍာနှစ် ၆ လတာကာလအတွင်း ဆန်တန်ချိန်  ၅  သိန်း ကျော်နှင့် ဆန်ကွဲတန်ချိန် ၃ ဒသမ ၆ သိန်း၊ စုစုပေါင်းတန်ချိန် ၈ ဒသမ ၆ သိန်းကျော် ကိုနိုင်ငံ ၃၈ နိုင်ငံကိုတင်ပို့နိုင်ခဲ့ပြီး ယခင်နှစ်ကာလတူထက် ဆန် ၊ ဆန်ကွဲ တန်ချိန် ၂ သိန်းကျော် ပိုမိုတင်ပို့ခဲ့ပါတယ်။

ပြည်ပနိုင်ငံအချို့ကို ပေါင်းဆန်တင်ပို့ရာတွင် တစ်တန်လျှင် အမေရိကန် ဒေါ်လာ ၄၆၀ မှ ၅၀၅ အထိ ဈေးရရှိခဲ့ပြီး ဘဏ္ဍာနှစ် ၆ လပတ်အတွင်း ဆန်တင်ပို့မှု တန်ချိန် ၈ ဒသမ ၆ သိန်းအနက်ပေါင်းဆန် ၅ ရာခိုင်နှုန်း၊ ဆန်ကွဲ ၄၂ ရာခိုင်နှုန်း၊ ပုံမှန်ဆန်တင်ပို့မှု ၅၃ ရာခိုင်နှုန်းရှိခဲ့တယ်လို့လည်း သတင်းထုတ်ပြန် ထားပါတယ်။

“နိုင်ငံအတွင်း စားသုံးမှုသည်လက်ရှိ စပါးစိုက်ပျိုးမှုနှင့် ဖူလုံပိုလျှံမှုရှိပါတယ်။ လက်ရှိစပါးစိုက်ပျိုးဧကအတိုင်း သီးထပ် အပြည့် အဝစိုက်ပျိုးနိုင်မည်ဆိုပါက များစွာပိုလျှံပြီး ပြည်ပသို့ပိုမိုတင်ပို့နိုင်မှာဖြစ်ပါတယ်။အဲဒါကြောင့် စပါးစိုက်ဧကတိုးချဲ့ရေးထက် လက်ရှိစပါးစိုက်မြေများတွင် စပါးပြီးစပါး၊ စပါး ပဲ  စပါး၊ စပါး နေကြာ စပါး စသဖြင့် မိမိတို့နှစ်သက်ရာသီးနှံများဖြင့် တွဲဖက်ပြီး သီးထပ်အဖြစ် စိုက်ပျိုးသွားကြရန် တိုက်တွန်းလိုပါတယ်” လို့ ဗိုလ်ချူပ်မှူးကြီးက ထပ်မံပြောကြားခဲ့ပါတယ်။

၂၀၂၀-၂၀၂၁ ခုနှစ်တွင် စုစုပေါင်း စပါးစိုက်ပျိုးဧက ၁၇ သန်းခန့် စိုက်ပျိုးနိုင်ခဲ့ပြီး ၂၀၂၁-၂၀၂၂ ခုနှစ်တွင် မိုးစပါးစိုက်ဧက  ၁၅ သန်းခန့် နှင့် နွေစပါးစိုက်ဧက ၂ ဒသမ ၄ သန်း၊ စုစုပေါင်းစပါးစိုက်ပျိုးဧက ၁၇ ဒသမ ၄ သန်းခန့် စိုက်ပျိုးနိုင်ခဲ့တယ်လို့လည်း သိရှိရပါတယ်။

မြန်မာ့ဆန်စပါးညီလာခံ ၂၀၂၂မှာ သက်ဆိုင်ရာ ပြည်ထောင်စုဝန်ကြီးတွေ၊တိုင်းဒေသကြီးနှင့်ပြည်နယ်တွေက  စီးပွားရေးရာဝန်ကြီး တွေ၊မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်(UMFCCI)၊ မြန်မာနိုင်ငံဆန်စပါးအသင်းချုပ်၊ မြန်မာ နိုင်ငံဆန်စပါးကုန်သည်များအသင်း၊ မြန်မာနိုင်ငံဆန်စပါး စိုက်ပျိုးထုတ်လုပ်သူများအသင်း၊ ပုဂ္ဂလိကဘဏ်များနှင့် မြန်မာနိုင်ငံ  ဆန်စက်လုပ်ငန်းရှင်များအသင်း၊ ပြည်တွင်း/ပြည်ပ စိုက်ပျိုးရေး ကျွမ်းကျင်ပညာရှင်တွေတက်ရောက်ဆွေးနွေးကြတာဖြစ်ပါတယ်။

မြန်မာ့ဆန်စပါးညီလာခံ၂၀၂၂ ခုနှစ်ကို  စီးပွားရေးနှင့် ကူးသန်းရောင်းဝယ်ရေးဝန်ကြီးဌာနနှင့် မြန်မာ နိုင်ငံဆန်စပါး အသင်းချုပ်(MRF)တို့ ပူးပေါင်းကျင်းပနေတာဖြစ်ပြီး အောက်တိုဘာ (၇)ရက်အထိ ဆက်လက်ကျင်းပသွားမယ်လို့ သတင်း ရရှိပါတယ်။

Source MNA

#Myanmar_Agriculture

#Myanmar_Economy

#Myanmar_Rice_Conference

Published 5 Oct 2022

အိုပက်နှင့်အပေါင်း OPEC+ နိုင်ငံတွေဟာ  အမေရိကန်ပြည်ထောင်စုက ဖိအားပေးနေတဲ့ကြားထဲက ရေနံထုတ်လုပ်မှုတွေကို ၂၀၂၀ ကိုဗစ်-၁၉ ကပ်ဘေးစသည့်အချိန်ကစလျှင် အနက်ရှိုင်းဆုံး ဖြတ်တောက်ရန် ဗုဒ္ဓဟူးနေ့က ဗီယင်နာမှာကျင်းပတဲ့ အစည်းအဝေးတစ်ခုအတွင်း သဘောတူခဲ့ကြပါတယ်။

အိုပက်နှင့်အပေါင်း နိုင်ငံတွေဟာ အိုပက်အဖွဲ့ဝင်နိုင်ငံတွေနှင့် အိုပက်အဖွဲ့ဝင်မဟုတ်တဲ့အခြားနိုင်ငံ ၁၀နိုင်ငံတို့ ပူးပေါင်း ဖွဲ့စည်းထားပြီး နိုင်ငံပေါင်း ၂၄နိုင်ငံပါဝင်တာပါ။

ဒီလိုရေနံထုတ်လုပ်မှုဖြတ်တောက်ဖို့ ဆုံးဖြတ်လိုက်တဲ့အတွက် လွန်ခဲ့တဲ့သုံးလက ရေနံတစ်စည် ဒေါ်လာ ၁၂၀ရှိရာကနေ ဒေါ်လာ၆၀အထိကျဆင်းလာခဲ့တဲ့အပေါ် ရေနံဈေးနှုန်းပြန်လည်ကောင်းမွန်လာဖို့ တွန်းအားဖြစ်လာစေပါလိမ့်မယ်။

အမေရိကန်က အိုပက်အဖွဲ့ကြီးကို ရေနံထုတ်လုပ်မှု မဖြတ်တောက်ပစ်ဖို့ တွန်းအားပေးခဲ့တယ်လို့ ဒီကိစ္စတွေနှင့်နီးစပ်တဲ့ သတင်းအရင်းအမြစ်တစ်ခုက ရိုက်တာကိုပြောပါတယ်။

အခုဖြတ်တောက်ပစ်မယ့်ပမာဏာထဲမှာ ဆော်ဒီအာရေဗျတို့လို သူ့နိုင်ငံအလိုက် ဆန္ဒအလျောက်ထုတ်လုပ်မှုလျော့ချထား တာတွေပါဝင်သလား၊ အဖွဲ့အနေနှင့် လက်ရှိထုတ်လုပ်နေတဲ့အပေါ်လား ဆိုတာတော့ ရှင်းရှင်းလင်းလင်းမသိရပါဘူး။

အိုပက်အဖွဲ့နှင့်အပေါင်း နိုင်ငံတွေဟာ ဩဂုတ်လတုန်းက ရည်မှန်းထားတာတဲ့လျော့နည်းပြီး တစ်ရက်ကို ရေနံစည် ၃.၆သန်းထုတ်လုပ်ခဲ့ကြပါတယ်။ အခုတစ်ရက်ကို ရေနံစည် (၂)သန်းပဲထုတ်မယ်လို့ သဘောတူခဲ့ကြတာဖြစ်ပါတယ်။

“ဖြတ်တောက်မှုသိသာခဲ့လို့ ရေနံဈေးနှုန်းတက်လာရင် အမေရိကန်ရဲ့ သက်တမ်းအလယ် ရွေးကောက်ပွဲမတိုင်ခင်မို့ ဘိုင်ဒင်အစိုးရအတွက် ဒေါသထွက်စရာဖြစ်လိမ့်မယ်” လို့ Citi analysts ကမှတ်ချက်ပေးပါတယ်။

“ ဒါဆိုရင် အမေရိကန်ဆီကနေ နောက်ထပ် နိုင်ငံရေးတုန့်ပြန်ဆောင်ရွက်မှုတွေလာနိုင်တယ်။ အဲဒီအထဲမှာ NOPEC ဥပဒေကြမ်းကို အတည်ပြုတာမျိုးနှင့်အတူ မဟာဗျူဟာအရသိုလှောင်ထားရှိတဲ့ ရေနံတွေကို ထပ်ပြီး အပြင်ထုတ်ရောင်းပေးတာမျိုး လုပ်လာနိုင်တယ်” လို့ စီတီကဆက်ပြောပါတယ်။ အဲဒီ NOPEC ဥပဒေကြမ်းဆိုတာ အိုပက်အပေါ် စီးပွားရေးလက်ဝါးကြီးအုပ်မှုတိုက်ဖျက်ရေး antitrust ဥပဒေတစ်ခုဖြစ်ပါတယ်။

Pmorgan ကလည်း ဝါရှင်တန်ဟာ သူ့ရဲ့ လှောင်ထားတဲ့ရေနံတွေကို ပိုထုတ်ရောင်းတာမျိုးလုပ်လိမ့်မယ်လို့ ပြောပါတယ်။

ဆုံးဖြတ်ချက်ဟာ နည်းပညာအရသာဖြစ်တယ် နိုင်ငံရေးမဟုတ်ဘူးလို့ ယူအေအီး စွမ်းအင်ဝန်ကြီး ဆူဟေးလ် အယ်လ် မက်ရိုယီကပြေပါတယ်။ ဒါကို နိုင်ငံရေးအဖွဲ့အစည်းအနေနှင့်သုံးမှာမဟုတ်ဘူးလို့ သူကဆက်ပြောပါတယ်။

အဆိုပါအစည်းအဝေးသို့ အိုပက်နှင့်အပေါင်း နိုင်ငံတွေထဲက တစ်နိုင်ငံဖြစ်တဲ့ ရုရှားနိုင်ငံရဲ့  ဒုတိယဝန်ကြီးချုပ် အလက်ဇင်းဒါး နိုဗက်လည်း တက်ရောက်ခဲ့ပါတယ်။

Source: Agencies

#OPEC+

#US_Oil_Politics

#US_Vs_OPEC

Published 5 Oct 2022

ကမ္ဘာ့အမွေအနှစ် သရေခေတ္တရာယဉ်ကျေးမှုဇုန် တစ်ခုလုံးအား ခြုံငုံမြင်တွေ့ လေ့လာ၍ ရနိုင်သည့် View Point မျှော်စင်တစ်ခုကို စည်းမျဉ်းစည်းကမ်းများနှင့်အညီ ဆောက်လုပ်နိုင်ရန် နစက ဥက္ကဋ္ဌက တာဝန်ရှိသူတွေကို ပြောကြားခဲ့တယ်လို့ နစကရဲ့ သတင်းထုတ်ပြန်ချက်အရသိရပါတယ်။

နစက ဥက္ကဋ္ဌဟာ အောက်တိုဘာ ၅ ရက်က သရေခေတ္တရာမြို့ဟောင်း ကမ္ဘာ့အမွေအနှစ်ဒေသသို့ သွားရောက်စဉ် တာဝန်ရှိ သူတွေကို အဲဒီအချက်ကို  မှာကြားခဲ့တာဖြစ်ပါတယ်။

အဲဒီအပြင် ရှေးဟောင်းယဉ်ကျေးမှုနေရာတွေကို Protection Area အဖြစ် ကာရံပေးနိုင်ဖို့နှင့် ယဉ်ကျေးမှု နယ်မြေကို မြန်မာ့သမိုင်းကို ခိုင်ခိုင်မာမာ အဆင့်ရှိရှိ ပြသနိုင်သည့် ကမ္ဘာ့အဆင့်မီ ယဉ်ကျေးမှုဇုန်ဖြစ်ရမည်ဖြစ်ဖို့ကိုလည်း ပြောကြားခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

အဲဒီအပြင် သရေခေတ္တရာ ယဉ်ကျေးမှုဇုန်အတွင်းရှိတဲ့ သီရိခေတ္တရာပြတိုက်ကို ဒစ်ဂျစ်တယ်ပြတိုက်အဖြစ် အဆင့်မြှင့်  တင်ဆောင်ရွက်ဖို့လည်း အကြံပြုမှာကြားခဲ့တယ်လို့ သိရှိရပါတယ်။

“ ပြတိုက်အတွင်းခင်းကျင်းပြသထားတဲ့ ဓာတ်ပုံတွေနှင့် ခုနှစ်သက္ကရာဇ်တွေ၊တူးဖော်ရရှိတဲ့ နေရာတွေကို အလွယ်တကူလေ့လာ သိရှိဖို့ ရှင်းလင်းစွာစာတန်းထိုးထားဖို့ လိုအပ်ပါတယ်။ပျူစာဖြင့်ရေးထိုးထားတဲ့ကျောက်စာတွေကို သမိုင်းပညာရှင်များဖြင့် ဘာသာ ပြန်ဆိုပြီး အများပြည်သူ လေ့လာနိုင်ရေးထားရှိဖို့၊ရှေးခေတ်လက်ရာ ဒင်္ဂါးပြား များ၊ လက်ဝတ်ရတနာများကို အနီးကပ်ကြည့်ရှု လေ့လာနိုင်ရေးအတွက်လည်း ခေတ်မီနည်းစနစ်များ အသုံးပြု၍ LED Screen များဖြင့် လေ့လာကြည့်ရှုနိုင်အောင် ဆောင်ရွက်ပေးထားဖို့နှင့် ပြတိုက်ကို  Digital Museum အဖြစ် အဆင့်မြှင့်တင်နိုင်ရေးဆောင်ရွက်ပေးဖို့” ဗိုလ်ချူပ်မှူးကြီးက ပြောကြားခဲ့ပါတယ်။

အိန္ဒိယနိုင်ငံ၊ ဗီဇကာပတ်တနန်မြို့တွင်လည်း ရှေးဟောင်းယဉ်ကျေးမှုဆိုင်ရာ နေရာ တစ်ခုရှိပြီး ၎င်းတို့ တူးဖော်ရရှိထားသည့် အဆောက်အဦများ၊ စေတီပုထိုးများ၊ ရှေးဟောင်း ပစ္စည်းတွေဟာ  မြန်မာနိုင်ငံရှိ ဟန်လင်း၊ ဗိဿနိုး၊ သရေခေတ္တရာ မြို့ဟောင်း များတွင် တူးဖော်ရရှိထားသည့် လက်ရာများနှင့် များစွာ တူညီမှုရှိနေတဲ့အတွက် ရှေးဟောင်းသုတေသနနှင့် အမျိုးသားပြတိုက် ဦးစီးဌာနမှ ရှေးဟောင်းယဉ်ကျေးမှု ဆိုင်ရာတာဝန်ရှိသူများအနေဖြင့် သွားရောက်လေ့လာပြီး သမိုင်းကြောင်းတွေ့ရှိမှု များကို သုတေသနပြု ဆောင်ရွက်ရန်လိုကြောင်း၊ ရာဇကုမာရ်ကျောက်စာတွင် ဗမာ စာပေကို အမှီပြု၍ မွန်၊ ပျူ၊ ပါဠိဘာသာများဖြင့် ထပ်မံဘာသာပြန်ဆိုရေးထိုးထားသည်ကို  တွေ့ရှိရသဖြင့် ပုဂံခေတ်တွင် မွန်၊ ပျူ၊ ဗမာ တို့၏ စပ်ဆက်မှုများ၊ ပျူ တို့၏ ယဉ်ကျေးမှု  များကို သုတေသနပြု ဖော်ထုတ်ရန်လိုကြောင်းကိုပါ ပြောကြားခဲ့ကြောင်း သတင်းထုတ်ပြန်ချက်မှာ ဖော်ပြထားပါတယ်။

သရေခေတ္တရာမြို့ဟောင်းသည် မြန်မာနိုင်ငံတွင်ရှိသည့် ပျူမြို့ဟောင်း များအနက် အကြီးဆုံးနှင့် သက်တမ်းအရှည်ဆုံးမြို့ဖြစ်ပြီး သရေခေတ္တရာဟူသော အမည်သည် “ကျက်သရေမင်္ဂလာအပေါင်းနှင့် ပြည့်စုံသောမြို့”ဟု အဓိပ္ပါယ်ရပါတယ်။ ပဲခူးတိုင်းဒေသကြီး၊ ပြည်မြို့ အရှေ့တောင်ဘက် ၅ မိုင်ခန့်အကွာ မှော်ဇာရွာတွင် တည် ရှိပြီး သရေခေတ္တရာမြို့ဟောင်းသည် အဝန်းအဝိုင်း   ပုံသဏ္ဍာန်ရှိကာ မြို့ရိုးသည် အရှည် ၁၄ ကီလိုမီတာ၊ အကျယ် ၄ မီတာနှင့် အမြင့် ၁၀ မီတာ ရှိပါတယ်။ မြို့ဟောင်းအတွင်း မှော်ဇာ ရွာအပါအဝင် ကျေးရွာပေါင်း ၁၇ ရွာ ပါဝင်ကြောင်း၊ ဒေသရာဇဝင်များအဆိုအရ  သရေခေတ္တရာမြို့တည်ပုံမှာ သာသနာတော် သက္ကရာဇ်(၁၀၁)ခုနှစ်တွင် ဂဝံပတိရသေ့၊ သိကြား၊ ဂဠုန်၊ နဂါး၊ ဂမ္ဘာန်၊ စန္ဒီ၊ ပရမေသုရာ စသည့် သူမြတ် ၇ ဦးတို့သည် မြတ်စွာ ဘုရား ဗျာဒိတ်တော်ရှိသည်နှင့်အညီ မြို့ကို တည်အံ့သော အကြောင်းကို စုရုံးတိုင်ပင် ကြ၍ သာယာညီညွတ်လှစွာသော မြေအပြင်ဝယ် သိကြားမင်းသည် စက်တိုင်၌ ရပ်နေပြီးလျှင် နဂါးကိုစက်ကြိုးပြု၍ပတ်စေခဲ့ပါတယ်။ ထိုအဝန်းအဝိုင်းကိုပင် သရေခေတ္တရာ မြို့တော်၏ ပမာဏအဖြစ် စတင်တည်ထောင်ခဲ့ပြီး ဒွတ္တပေါင်မင်းကြီးကို နန်းတင် မြှောက်ခဲ့သည်ဟု အဆိုရှိခဲ့ ပါတယ်။

သရေခေတ္တရာမြို့ဟောင်းသည် ပျူတိုက်၊ သင်္ချိုင်း၊ ကုန်း၊ စေတီ၊ ဂူဘုရား၊ နန်းတော်၊ မြို့ဝင်ပေါက်၊ ကျုံး၊ မြို့ရိုး ကဲ့သို့သော အဆောက်အဦ အကြွင်းအကျန်များနှင့်အတူ လက်ရှိအချိန်အထိ လူနေထိုင်ဆဲမြို့ပြ တစ်ခု ဖြစ်ပါတယ်။၊ မြို့ဟောင်း တူးဖော်မှုလုပ်ငန်းနှင့် ကွင်းဆင်းသုတေသနလုပ်ငန်း များကို ၁၉၀၇ ခုနှစ်မှ စတင်၍ ယခုအချိန်အထိ ရှေးဟောင်းသုတေသနဦးစီးဌာနက ဆက်လက်ဆောင်ရွက်လျက်ရှိကြောင်း သတင်းရရှိပါတယ်။

Source: MNA

#SG_Min_Aung_Hlaing

#Myanmar_Culture

#Myanmar_Heritage

Published 5 Oct 2022

အိန္ဒိယနိုင်ငံဟာ ပြည်တွင်းထုတ် တိုက်ခိုက်ရေးရဟတ်ယာဉ် ပထမတစ်သုတ်ကို တနင်္လာနေ့က ထုတ်ဖော်ပြသလိုက်ပါတယ်။ အဆိုပါ တိုက်ခိုက်ရေး ရဟတ်ယာဉ်ဟာ ဟိမဝန္တာလိုနေရာမျိုးမှာ  အသုံးပြုနိုင်မယ့် အမြင့်ပျံရဟတ်ယာဉ်အမျိုးအစားအဖြစ် အခြေခံ ဒီဇိုင်းထုတ်ထားတာဖြစ်ပါတယ်။

အပေါ့စား တိုက်ခိုက်ရေး ရဟတ်ယာဉ်တွေဟာ ရုရှားကနေမှီခိုနေရတာကို လျှော့ချတဲ့ အိန္ဒိယရဲ့ ကြိုးပမ်းအားထုတ်မှု ဖြစ်ပါတယ်။

ယခုတိုက်ခိုက်ရေးရဟတ်ယာဉ်တွေကို ဟင်ဒူစတန်အဲရိုနော့တစ်လိမိတက် (အိတ်ချ်အေအယ်လ်)က ထုတ်လုပ်တာဖြစ်ပြီး  အိန္ဒိယလေတပ်ရဲ့ တိုက်ပွဲစွမ်းရည်တွေကို ကြီးမားစွာမြှင့်တင်ပေးမှုတစ်ရပ်ပဲဖြစ်တယ် လို့ ကာကွယ်ရေးဝန်ကြီး ရာချ်နက် ဆင်းက  အိန္ဒိယအနောက်ပိုင်း ဂျိုပါး လေတပ်အခြေစိုက်စခန်းမှာ သတင်းထောက်တွေကိုပြောပါတယ်။

“ အလွန်အရေးပါတဲ့အခမ်းအနားဖြစ်တယ်။ အထူးဂုဏ်ယူစရာ  ပြီးတော့ ဆယ်စုနှစ်နှစ်စုမှာ လုံ့လဝီရိယရှိရှိ သုတေသနှင့်ဖွံ့ဖြိုးတိုးတက်ရေးလုပ်ခဲ့တဲ့ အကျိုးရလာဒ်တစ်ခုဖြစ်တယ်” လို့ ဆင်းကပြောပါတယ်။

ရဟတ်ယာဉ်ကို ပင်လယ်ရေမျက်နှာပြင်အထက် အမြင့်ပေ တစ်သောင်းခြောက်ထောင် အထိ စမ်းသပ်ပျံသန်းပေးပြီးပြီလို့ အရာရှိတွေကပြောပါတယ်။

အိန္ဒိယဟာ ပြည်တွင်းကာကွယ်ရေးဆိုင်ရာစက်မှုလုပ်ငန်းကို တည်ဆောက်နေတာဖြစ်ပါတယ်။ ပြီးခဲ့တဲ့လကလည်း ပြည်တွင်းထုတ် လေယာဉ်တစ်စီးကို ထုတ်ဖော်ပြသခဲ့ပါသေးတယ်။

Source AFP

#Hindustan_Aeronautics_Limited

#India_made_Light_Combat_Helicopters

#India_Defence_Industry