Published _17 April 2023

မြန်မာနှစ်ဆန်းတစ်ရက် ဧပြီလ ၁၇ ရက်တွင် နစက၏ ပြစ်ဒဏ်လွတ်ငြိမ်းခွင့် တွင် စီမံဘဏ္ဍာဝန်ကြီးဟောင်း ဦးကျော်ဝင်း ပြန်လည်လွတ်မြောက်လာကြောင်းသိရသည်။

ဦးကျော်ဝင်းသည် ဒေါ်အောင်ဆန်းစုကြည်၏ စီးပွားရေးအကြံပေး ပါမောက္ခရှောင်တာနယ်တို့နှင့် အတူ ထောင် ၃ နှစ် ချခံထားရခြင်းဖြစ်ပြီး ယနေ့တွင် ရမည်းသင်းအကျဉ်းထောင်မှ ပြန်လည် လွတ်မြောက်လာခြင်း ဖြစ်ကြောင်း ၊ကျန်းမာရေးလည်းကောင်းမွန်ကြောင်း ယင်း၏ မိသားစုနှင့် နီးစပ်သူက ပြောသည်။

ပြီးခဲ့သည့် ၂၀၂၁ ခုနှစ် ဖေဖော်ဝါရီလ ၁ ရက်နောက်ပိုင်းတွင် နစက မှ ဦးကျော်ဝင်းအား အစိုးရလျှို့ဝှက်ချက်အက်ဥပဒေပုဒ်မ ၃-၁(ဂ)ဖြင့် နစက က တရားစွဲသောကြောင့် အမှုရင်ဆိုင်ပြီးနောက် ၂၀၂၂ ခုနှစ် စက်တင်ဘာလ ၂၈ ရက်တွင် ထောင်ဒဏ် ၃ နှစ် ချမှတ်ခံခဲ့ရခြင်း ဖြစ်သည်။

ယနေ့တွင် ပြစ်ဒဏ်ကျခံနေရတဲ့ အကျဉ်းသား အကျဉ်းသူ ၃၀၁၅ ဦးကို ပြစ်ဒဏ်လွတ်ငြိမ်းခွင့်ပြုလိုက်ကြောင်း နစက က ထုတ်ပြန်ကြေညာထားသည်။ယင်းတွင်ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ (၁) အရ နောက်တစ်ကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည် ဟူသော စည်းကမ်းသတ်မှတ်ချက်ဖြင့်ယင်းတို့ကျခံရန်ကျန်ရှိသော ပြစ်ဒဏ်များအပေါ်လျှော့ပေါ့၍ ပြစ်ဒဏ်လွတ်ငြိမ်းခွင့်ပြုလိုက်ကြောင်းဖော်ပြထားသည်။

ymg/mt
Yangon_Media_Group

Published 17 April 2023

ကမ္ဘာတဝှမ်းမှနိုင်ငံများအပေါ် အမေရိကန်မှချမှတ်ထားတဲ့ စီးပွားရေးပိတ်ဆို့မှုများကြောင့် ဒေါ်လာတန်ဖိုး  ထိခိုက်လာနိုင်တဲ့ အန္တရာယ်ရှိနေကြောင်း အမေရိကန်ဘဏ္ဍာရေးဝန်ကြီး 'ဂျဲနတ်ယယ်လန်'က ပြောကြား လိုက်ပါတယ်။

အမေရိကန်က အရေးယူပိတ်ဆို့မှုများ ဆက်လက်လုပ်ဆောင်နေတဲ့အချိန်မှာ အဆိုပါနိုင်ငံများက အခြား  ရွေးချယ်  စရာငွေကြေးတွေကို ရှာကြံနေကြပြီး အမေရိကန်ဒေါ်လာနဲ့ တိုင်းပြည်ကို အန္တရာယ်ကျရောက်စေနိုင်တယ်လို့ ဆိုပါတယ်။

အချိန်ကြာလာတာနဲ့အမျှ ဒေါ်လာရဲ့အခန်းကဏ္ဍကို ထိခိုက်စေနိုင်တဲ့ ငွေကြေးပိတ်ဆို့မှုတွေကို ဆောင်ရွက်နေတာဟာ အန္တရာယ်များလှပါတယ်လို့ ယယ်လန်က CNN ကို ပြောကြားခဲ့ပါတယ်။

တရုတ်၊ ရုရှား၊ အီရန်တို့အနေနဲ့ အခြားငွေကြေးများ ရွေးချယ်စေဖို့အခွင့်အလမ်းဖြစ်လာပေမယ့် ကမ္ဘာလုံးဆိုင်ရာဒေါ်လာငွေကြေးနေရာမှာ အလွယ်တကူအစားထိုးလို့မရတဲ့ နိုင်ငံတွေလည်းရှိနေကြောင်း ပြောပြခဲ့ပါတယ်။

အမေရိကန်နဲ့ မဟာမိတ်များ အတူတကွအသုံးချမယ်ဆိုရင် ဒဏ်ခတ်ပိတ်ဆို့မှုတွေက အလွန်အရေးပါတဲ့ လက်နက်တစ်ခုဖြစ်ကြောင်း ယယ်လန်က ပြောကြားခဲ့ပါတယ်။

လက်ရှိယူကရိန်းစစ်ပွဲအတွက် ရုရှားကိုထိန်းချုပ်ကန့်သတ်နိုင်စေရန် တရုတ်၊ ယူအေအီး၊ တူရကီလုပ်ငန်းများအပါအဝင် ပစ်မှတ်ပေါင်း ၁၂၀ နီးပါးကို အမေရိကန်ဘဏ္ဍာရေးနှင့် နိုင်ငံခြားရေးဌာနမှ ဒဏ်ခတ်ပိတ်ဆို့မှုများပြုလုပ်ပြီး ရက်ပိုင်းမှာပဲ ယယ်လန်က အခုလိုပြောကြားလိုက်တာဖြစ်ပါတယ်။

အမေရိကန်မဟာမိတ်တွေဖြစ်တဲ့ တူရကီနဲ့ ယူအေအီးတို့မှ လုပ်ငန်းများကို အခုအချိန်မှာဒဏ်ခတ်ပိတ်ဆို့တာဟာ ဆိုးကျိုးသက်ရောက်မှုတွေ ရှိလာနိုင်တယ်လို့ ကျွမ်းကျင်သူများက သုံးသပ်နေကြပါတယ်။  တင်ပါ

အမေရိကန်ရဲ့လုပ်ရပ်ဟာ တရားမဝင်တဲ့လုပ်ရပ်ဖြစ်ကြောင်း တရုတ်က ထုတ်ပြန်လိုက်ပါတယ်။

"ဒါဟာ တစ်ဖက်သတ်ပိတ်ဆို့အရေးယူတာဖြစ်ပြီး လက်တံရှည်တရားစီရင်ခြင်းတစ်ခုဖြစ်ကာ လုပ်ငန်းတွေရဲ့ တရားဝင်အခွင့်အရေးနဲ့ အကျိုးစီးပွားတွေကို ဆိုးရွားစွာ ထိခိုက်စေတဲ့အပြင် ကမ္ဘာ့ထောက်ပံ့ရေးကွင်းဆက်ရဲ့ လုံခြုံရေးနဲ့တည်ငြိမ်မှုကိုလည်း ထိခိုက်စေပါတယ်" လို့ တရုတ်ကဆိုပါတယ်။

ပြီးခဲ့တဲ့လက အိန္ဒိယဟာ ရူပီးငွေဖြင့်ကုန်သွယ်ဖို့ နိုင်ငံ ၁၈ နိုင်ငံနဲ့ သဘောတူညီခဲ့ပါတယ်။

အီရန်ကတော့ တရုတ်၊ ရုရှားတို့နဲ့ကုန်သွယ်ရာမှာ ဒေါ်လာအသုံးမပြုတော့ပါဘူး။

Source: WION

#YangonMediaGroup

#အမေရိကန်ဒဏ်ခတ်ပိတ်ဆို့မှု

#အမေရိကန်ဘဏ္ဍာရေးဝန်ကြီးဂျဲနတ်ယယ်လန်

#အမေရိကန်ဒေါ်လာ

Published 16 April 2023

တောက်လျောက်ကျဆင်းလာနေတဲ့ တောင်ကိုရီးယားရဲ့ သန္ဓေအောင်နှုန်းကို ကုစားဖို့ လွန်ခဲ့တဲ့ ၁၅နှစ်ကစပြီး အစိုးရက ဒေါ်လာ ၂၁၂ ဘီလျံအထိသုံးစွဲခဲ့ပေမယ့် အဆိုပါကျဆင်းမှုရပ်တန့်သွားအောင် သိပ်မလုပ်နိုင်ခဲ့တဲ့အတွက် တောင်ကိုရီး ယားဟာ ယခုဆို နိုင်ငံရပ်ခြားအလုပ်သမားတွေပိုပြီးခေါ်ယူလာနေရပါတယ်။

သန္ဓေအောင်နှုန်းကျဆင်းမှုအကြပ်အတည်း တစ်စိတ်တစ်ပိုင်း ပါဝင်ပတ်သက်မှုကြောင့် ၂၀၅၀ အရောက်မှာ လူဦးရေ ထူထပ်တဲ့ အင်ဒိုနီးရှားနှင့် နိုင်ဂျီရီးယားတို့ဟာ စီးပွာရေးအရွယ်အစားအရ တောင်ကိုရီးယားကို ကျော်ဖြတ်လိမ့်မယ်လို့ ပညာရှင်တွေက ခန့်မှန်းထားကြပါတယ်။

နောက်အဆိုးမြင်တစ်ခုကတော့  ယခုပုံစံအတိုင်းမျိုးအောင်နှုန်းကျဆင်းနေမယ ၂၇၅၀ အရောက်မှာ တောင်ကိုးရီးယား    ဟာ နိုင်ငံအဖြစ်ကနေပါ ပျောက်ကွယ်သွားနိုင်တယ်ဆိုတာပဲဖြစ်ပါတယ်။

ဒေါ်လာဘီလျံချီသုံးစွဲခဲ့ပေမယ့် တောင်ကိုရီးယားရဲ့ ကလေးမွေးနှုန်းဟာ ဆက်လက်ကျဆင်းနေပါတယ်။ ၂၀၂၂ခုနှစ်မှာ တောင်ကိုရီးယားအမျိုးသမီးတစ်ဦးဟာ သူ့ဘဝတလျောက်လုံး ကလေးမွေးတာ တစ်ယောက်တောင်မပြည့်တဲ့ ( ၀.၇၈) အထိကျဆင်းနေပါတယ်။ ဆိုးလ်မြို့မှာဆိုရင် ဒီထက်ပင်ကျဆင်းနေပြီး (၀.၅၉)ပဲရှိပါတော့တယ်။

အချို့သောစီးပွားရေးကော်ပိုရေးရှင်းကြီးတွေက တောင်ကိုရီးယားရဲ့စီးပွားရေးမှာ မင်းမူနေပေမယ့် ကျန်တဲ့ ၉၉ ရာခိုင်နှုန်း ဟာ သူတို့နှင့်နှိုင်းယှဉ်ရင် အတော့်ကိုသေးငယ်တဲ့ ကုမ္ပဏီတွေဖြစ်နေကြပါတယ်။ ဒါပေမယ့် အဲဒီကုမ္ပဏီသေးတွေက လစာနိမ့်ပြီး အလုပ်ပင်ပန်းလွန်းလို့  တောင်ကိုးရီးယားလူငယ်တွေကြားထဲ သိပ်ပြီး ရေပန်းမစားလှပါဘူး၊ အဲဒါကြောင့် စိုက်ပျိုးရေး၊မွေးမြူရေးနှင့်ငါးလုပ်ငန်းတွေ၊ ကုန်ထုတ်လုပ်ငန်းတွေဟာ သူတို့လိုချင်တဲ့ အလုပ်သမားတွေ လုံလုံလောက် လောက်မရရှိကြဘဲဖြစ်နေကြပါတယ်။

အဲဒါကြောင့်လည်း အစိုးရဟာ နိုင်ငံခြားအလုပ်သမားတွေပိုပြီး ရှာဖွေနေကြရပါတယ်။

၁၉၉၀ပြည့်နှစ်မှာ တောင်ကိုရီးယာနိုင်ငံတွင် ကာလရှည်နေထိုင်ခွင့်ရတဲ့ နိုင်ငံခြားသား အရေအတွက်ဟာ ၄၉၀၀၀ ဦး ရှိပါတယ်။ ဒါပေမယ့် ရက်၉၀ အောက်နေကြတဲ့သူတွေအပါအဝင် အတည်တကျနေထိုင်တဲ့ နိုင်ငံခြားသားတွေဟာ ၂၀၂၉ခုနှစ်ကုန်ပိုင်းမှာ ၂.၅၂ သန်း အထိမြင့်တက်သွားခဲ့ပါတယ်။  ဒါဟာ တောင်ကိုရီးယားလူဦးရေ ၅၁သန်းရဲ့ ၄.၉ ရာခိုင် နှုန်းအထိရှိပါတယ်။

အဲဒီနိုင်ငံခြားသားတွေထဲက ၄၀ ရာခိုင်နှုန်းဟာ တရုတ်နိုင်ငံသားတွေဖြစ်ကြပြီး  ကိုရီးယားသွေးပါသူတွေဖြစ်ပါတယ်။  ကိုရီးယားတရုတ်တွေဟာ ဘာသာစကားတူ အစားအသောက်တူလို့ သူတို့ကိုပိုပြီးလိုချင်နေကြပါတယ်။ ဗီယက်နမ်လူမျိုး တွေဟာ ဒုတိယအများဆုံးဖြစ်ပြီး ထိုင်းက တတိယမြောက်အများဆုံးဖြစ်ကြပါတယ်။

၂၀၀၄ခုနှစ်မှာ တောင်ကိုရီးယားဟာ ကျွမ်းကျင်မှုနည်းတဲ့အလုပ်သမားတွေစတင်လက်ခံခဲ့ပါတယ်။ အဲဒီအစီအစဉ်အရ  အစိုးရဟာ အလုပ်ခန့်ထားခြင်းဆိုင်ရာ လုပ်ငန်းစဉ်အစအဆုံး ထိန်းချုပ်ထားပါတယ်။ စတင်ခန့်ရာကနေ သူတို့ကို အလုပ် နေရာချတာအလယ် သူတို့နိုင်ငံပြန်ပို့တာအဆုံးအားလုံးကိုထိန်းချုပ်ထားတာပါ။ အဲဒီအစီအစဉ်အောက်မှာ ကုန်ထုတ် လုပ်ငန်း၊ ဆောက်လုပ်ရေး၊ စိုက်ပျိုးရေး၊မွေးမြူရေး၊ဝန်ဆောင်မှုနှင့်ငါးလုပ်ငန်းတွေ ပါဝင်ပါတယ်။

အလုပ်သမားဈေးကွက်ကိုဖွင့်ပေးခြင်းလို့ ပညာရှင်တစ်ဦးကပြောတဲ့ အဆိုပါလှုပ်ရှားမှုမှာ နိုင်ငံခြာသားအလုပ်သမား တွေကို ပီအာရ်လို့ခေါ်တဲ့ အမြဲတမ်းအခြေချနေထိုင်ခွင့်ရသူတွေဖြစ်အောင်ကူညီဖို့ တေင်ကိုရီးယားအစိုးရက  နည်းမျိုးစုံနှင့်ပြင်ဆင်ခဲ့ပါတယ်။

နိုင်ငံတကာလက်ထပ်ထိမ်းမြားခြင်းမှတစ်ဆင့် နိုင်ငံခြားသားအလုပ်သမားတွေဟာ အခုဆို တရားဝင်အတည်တကျ နေထိုင်ခွင့် ဒါမှမဟုတ် ပီအာရ် အဆင့်အတန်းကို ယခုရရှိနေကြပြီဖြစ်ပါတယ်။ အဲဒါကြောင့်လည်း နိုင်ငံခြားသားအလုပ် သမားတွေနှင့် တောင်ကိုရီးယားနိုင်ငံသားတွေ လက်ထပ်ထိမ်းမြားမှုဟာ ၂၀၀၀ပြည့်နှစ်ကတည်းက တဟုန်ထိုး တိုး တက်လာခဲ့ပါတယ်။  တောင်ကိုရီးယား နိုင်ငံသား ၁၀ဦးလက်ထပ်ရင် တစ်ဦးဟာ နိုင်ငံခြားသားနှင့်လက်ထပ်တာ အထူး သဖြင့်တရုတ်နှင့်ဗီယက်နမ်နိုင်ငံသားတွေနှင့်လက်ထပ်တာအထိ ဆယ်ချိုးတစ်ချိုး ဖြစ်လာပါတယ်။

အဲသလိုနိုင်ငံသားဖြစ်လာသူတွေဟာ သူတို့ရဲ့ အိမ်ထောင်ဖက်နှင့် ကွာရှင်းလို့ပဲဖြစ်ဖြစ် သေဆုံးသွားလို့ပဲဖြစ်ဖြစ် နောက် တစ်ဦးနှင့် အိမ်ထောင်ထပ်ပြုရင် အိမ်ထောင်အသစ်ဟာ အလိုအလျောက် တောင်ကိုရီးယားနိုင်ငံသားဖြစ်လာပါတယ်။ ဒီလိုနည်းနှင့် တောင်ကိုးရီးယားနိုင်ငံသားဖြစ်လာကြတဲ့သူတွေထဲမှာ အရှေ့တောင်အာရှနိုင်ငံကလာသူတွေအရေ အတွက် ဟာ တစ်ဟုန်ထိုးတက်လာနေပါတယ်။

အစိုးရရဲ့ကျယ်ပြန်တဲ့အားပေးမှုတွေက နိုင်ငံခြားသားအလုပ်သမားတွေကို အမြဲတမ်းနေထိုင်ခွင့် သို့မဟုတ်ပီအာရ်အဆင့်   အတန်းရရှိ တာတွေတိုးပွားလာရခြင်းရဲ့ အဓိကအချက်တစ်ခုဖြစ်တယ်လို့  တောင်ကိုရီးယားလူဝင်မှုမူဝါဒစာအုပ်ရေးသား သူ ဆေကာဂွန်းတက္ကသိုလ် ပါမောက္ခ အီကူမီဟာရူကီကပြောပါတယ်။

“ နိုင်ငံတစ်လွှားက နေရာ ၃၁၉နေရာမှာ တောင်ကိုရီးယားဟာ အခမဲ့ ဘာသာစကားသင်တန်းတွေလုပ်ပေးနေတယ်” လို့ ဟာရူကီကပြောပါတယ်။

ဒါပေမယ့် အစိုးရက အဲသလိုဘတ်ဂျက်အကြီးအကျယ်သုံးနေတဲ့အပေါ် ပြည်သူတွေက မကျေမချမ်းဖြစ်လာနေပါတယ်။  လစာတွေက များပေမယ့် နိုင်ငံခြားသားအလုပ်သမားတွေဟာ အလုပ်ချိန်အရှည်ကြီးအလုပ်လုပ်နေကြရပြီး  နိုင်ငံရဲ့ အလုပ်သမားတွေနှင့်ဆက်ဆံရာမှာ ရှေးရိုးအစဉ်အလာလိုဖြစ်နေခဲ့တဲ့ ခွဲခြားဆက်ဆံခံရတာတွေနှင့် ထိပါး နှောက်ယှက်ခံနေရတာတွေကိုလည်း နိုင်ငံခြားသားအလုပ်သမားတွေကြုံတွေ့နေကြရပါတယ်။

ဒါပေမယ့်လည်း အရှေ့တောင်အာရှက လူငယ်တွေအတွက် တောင်ကိုရီးယားဟာ အလုပ်လုပ်ဖို့ ဆွဲဆောင်မှုရှိနေတဲ့ နေရာအဖြစ်ဆက်လက်တည်ရှိနေဆဲဖြစ်ပါတယ်။ အဲဒီအထဲမှာ ကေပေါ့ယဉ်ကျေးမှုနှင့် ကိုရီးယားဒရာမာဇာတ်လမ်း တွေကလည်း ကိုရီးယားကိုသွားဖို့ ဆွဲဆောင်နေတဲ့ အစိတ်အပိုင်းတစ်ခုပါပဲ။

မလုံလောက်မှုတွေရှိနေလင့်ကစား ကျဆင်းနေတဲ့ မွေးဖွားနှုန်းကြောင့်ဖြစ်ပေါ်လာတဲ့ စီးပွားရေးအကျိုးဆက်ကို သက်သာအောင်ဘယ်လိုလုပ်မယ်ဆိုတဲ့ တန်ဖိုးရှိလှတဲ့သင်ခန်းစာတွေကိုတော့ တောင်ကိုရီးယားရဲ့ နိုင်ငံခြား လုပ်သား မူဝါဒက ပေးကမ်းနေတုန်းပဲဖြစ်ပါတယ်။

Source” Nikkei Asia

#YangonMediaGroup

#SpecialReport

#အထူးဆောင်းပါး

#တောင်ကိုရီးယား

#တောင်ကိုရီးယားကလေးမွေးနှုန်းကျဆင်း

#တောင်ကိုရီးယားနိုင်ငံခြားသားအလုပ်သမား

Published -15 April 2023

စစ်ကိုင်းတိုင်းဒေသကြီး၊ အရာတော်မြို့နယ်ဓမ္မာရုံတစ်ခု၌ ယနေ့ သင်္ကြန်အကြတ်နေ့ ဧပြီလ ၁၅ ရက် ညနေ ၅ နာရီခွဲအချိန် သင်္ကြန်ရေကစားနေစဉ် Drop Bomb ၂ လုံး ဖြင့် တိုက်ခိုက်ခံခဲ့ရသည့်အတွက် ကလေး၃ဦးအပါအဝင် အရပ်သား ၁၃ ဦးဒဏ်ရာရရှိခဲ့ကြောင်း နစက သတင်းထုတ်ပြန်ရေးအဖွဲ့က သိရသည်။

ငွေတွင်းကျေးရွာရှိ ဓမ္မာရုံ၌ ကလေးသူငယ်များအပါအဝင် ကျေးရွာသူ၊ ကျေးရွာသားများက မဟာသင်္ကြန်အကြတ်နေ့၌ ရေကစားနေကြစဉ်အကြမ်းဖက်သမားများက Drone ယာဉ်တစ်စီးဖြင့် Drop Bomb ၂ လုံး ပစ်ချတိုက်ခိုက်ခဲ့ခြင်း ဖြစ်ကြောင်း နစက သတင်းထုတ်ပြန်ရေးအဖွဲ့က သိရသည်။

ယင်းကြောင့် အဆိုပါလူနာများအား အရာတော်မြို့ ပြည်သူ့ဆေးရုံသို့ပို့ဆောင် ကုသမှုခံယူစေလျက်ရှိကြောင်း ၊ယခုကဲ့သို့ ကလေးသူငယ်များနှင့် အပြစ်မဲ့ပြည်သူများ ရေကစားနေသည့် နေရာကို ရည်ရွယ်ချက်ရှိရှိဖြင့် Drop Bomb များ ပစ်ချတိုက်ခိုက်ခြင်းမှာ ဂျီနီဗာ ကွန်ဗန်းရှင်းနှင့် အပြည်ပြည်ဆိုင်ရာဥပဒေတို့အရ စစ်ရာဇဝတ်မှု(War Crime)ကို ကျူးလွန်ခြင်းဖြစ်၍ ကျူးလွန်သူများကို အမြန်ဆုံး ဖော်ထုတ်ဖမ်းဆီး၍ ဥပဒေနှင့်အညီ အပြစ်ပေးအရေးယူနိုင်ရန် လုပ်ဆောင်မည် ဖြစ်ကြောင်း သိရသည်။

ယင်းအပြင် သင်္ကြန်အကြတ်နေ့ နံနက်ပိုင်းကလည်း ကယားပြည်နယ်၊ လွိုင်ကော်မြို့နယ်ရှိ ပြည်နယ်အစိုးရအဖွဲ့ရုံးဗဟိုမဏ္ဍပ်၌ ကလေးသူငယ်များ အပါအဝင်အရပ်သားများ ရေကစားနေစဉ် Drop Bomb ဖြင့် ယပစ်ချတိုက်ခိုက်ခဲ့သဖြင့် မျိုး သား ၁၅ ဦးနှင့် အမျိုးသမီး ၁၃ ဦး၊ စုစုပေါင်း ၂၈ ဦး ထိခိုက်ဒဏ်ရာများ ရရှိခဲ့ကြကြောင်း သိရသည်။

၎င်းပေါက်ကွဲမှုများအပေါ် မြန်မာနိုင်ငံဂီတအစည်းအရုံး (ဗဟို) နှင့် မြန်မာနိုင်ငံသတင်းမီဒီယာကောင်စီတို့ကပြင်းထန်စွာ ကန့်ကွက်ရှုတ်ချကြောင်း ထုတ်ပြန်ထားသည်။

ymg/mt
Yangon_Media_Group

Published -15 April 2023

ကယားပြည်နယ်၊ လွိုင်ကော်မြို့နယ်ရှိ ပြည်နယ်အစိုးရအဖွဲ့ရုံးဗဟိုမဏ္ဍပ်တွင် ယနေ့နံနက်ပိုင်း မဟာသင်္ကြန်အကြတ်နေ့ ဧပြီလ ၁၅ ရက်က ကလေးသူငယ်များ အပါ အဝင် ပြည်သူများရေကစားနေစဉ်  Drop Bomb ဖြင့် တိုက်ခိုက်ခဲ့သောကြောင့် ၂၈ ဦး ထိခိုက်ဒဏ်ရာရရှိခဲ့ကြကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ယနေ့ နံနက် ၉ နာရီ ခွဲခန့်က အကြမ်းဖက်သမားများက Drone တစ်စီးဖြင့် Drop Bomb ၁ လုံး ပစ်ချတိုက်ခိုက်ခဲ့ခြင်းကြောင့် အမျိုးသား ၁၅ ဦးနှင့် အမျိုးသမီး ၁၃ ဦး၊ စုစုပေါင်း ၂၈ ဦး ထိခိုက်ဒဏ်ရာများ ရရှိခဲ့ကြောင်း ၊ယင်းဒဏ်ရာရသူများအား

လွိုင်ကော်မြို့ရှိ ပြည်သူ့ဆေးရုံသို့ ပို့ဆောင်ဆေးကုသမှုခံယူစေလျက်ရှိကြောင်းသိရသည်။

ယင်းသို့ ကလေးသူငယ်များအပါအဝင် အရပ်သားပြည်သူများ ရေကစားနေသည့်နေရာကို Drop Bomb များ ပစ်ချတိုက်ခိုက်ခြင်းမှာ ဂျီနီဗာကွန်ဗန်းရှင်း နှင့် အပြည်ပြည်ဆိုင်ရာဥပဒေတို့အရ စစ်ရာဇဝတ်မှု(War Crime)ကို ကျူးလွန်ခြင်း ဖြစ်သည့်အတွက် ကျူးလွန်ခဲ့သူများအားအမြန်ဆုံး ဖော်ထုတ်ဖမ်းဆီး၍ ဥပဒေနှင့်အညီ အပြစ်ပေးအရေးယူနိုင်ရေး လုပ်ဆောင်နေကြောင်း အဆိုပါထုတ်ပြန်ချက်တွင် ဖော်ပြထားသည်။

ymg/mt

Yangon_Media_Group

Published 15 April 2023

ဂျပန်ဝန်ကြီးချုပ် ဖူမီယိုကီရှီဒါဟာ  ယနေ့ ဧပြီ ၁၅ ရက်က ဂျပန်နိုင်ငံအနောက်ပိုင်းမှာ အပြင်ဘက်မှာ မိန့်ခွန်း  ပြော  နေတုန်း မီးခိုးဗုံးလို့ယူဆရတာ နှင့် လူတစ်ဦးကပစ်ပေါက်ခဲ့တဲ့အတွက် ဝန်ကြီးချုပ်ကို အနာတရမဖြစ်စေဘဲ ကယ်ထုတ်ခဲ့ရပါတယ်။

ကျယ်လောင်တဲ့ပေါက်ကွဲသံတစ်ခုကြားရပြီး  မြင်ကွင်းမှာ လူတစ်ဦးကို ရဲတွေက ထိန်းချုပ်လိုက်ကြပြီးနောက် ဝန်ကြီးချုပ် ကို ထိခိုက်မှုမရှိအောင် ကာကွယ်ပေးခဲ့ကြတယ်လို့ အင်န်အိတ်ချ်ကေက သတင်းထုတ်ပြန်ပါတယ်။

“ မိန့်ခွန်းပြောတဲ့နေရာမှာ ကျယ်လောင်တဲ့ပေါက်ကွဲသံနှင့်ပတ်သက်လို့ ရဲတွေက စုံစမ်းစစ်ဆေးမှုတွေလုပ်နေပြီ” လို့ သူ့ရဲ့ မဲဆွယ်မိန့်ခွန်းကိုပြန်ပြောတဲ့အခါ ကီရှီဒါက ထည့်သွင်းပြောကြားပါတယ်။ “ လူတော်တော်များများ စိတ်ပူသွားရတဲ့ အတွက် ကျွန်တော်စိတ်မကောင်းပါဘူး။ ကျွန်တော်တို့ဟာ ကျွန်တော်တို့နိုင်ငံရဲ့ အရေးကြီးတဲ့ ရွေးကောက်ပွဲတစ်ခုရဲ့ အလယ်မှာရှိနေကြပါတယ်။ ဒါကို အတူတူလုပ်ဆောင်ကြရမှာပါ” လို့သူကဆက်ပြောပါတယ်။

ခေတ်သစ်ဂျပန်နိုင်ငံကို အရှည်လျားဆုံး ဦးဆောင်ခဲ့တဲ့ ဝန်ကြီးချုပ်ဟောင်း ရှင်ဇိုအာဘေးဟာ ပါလီမန်ရွေးကောက်ပွဲ အတွက်မဲဆွယ်စဉ်  လက်လုပ်သေနတ်နှင့် ပစ်ခတ်ခံရမှုကြောင့် ပြီးခဲ့တဲ့နှစ် ဇူလိုင်က သေဆုံးခဲ့ရပါတယ်။ အဲဒါကြောင့် တစ်နိုင်ငံလုံးထိတ်လန့်တုန်လှုပ်ခဲ့ကြရပြီး နိုင်ငံရေးသမားတွေ လုံခြုံရေးအတွက် ပြန်လည်သုံးသပ်မှုတွေ လုပ်ခဲ့ကြပါတယ်။

ဂျပန်ပါလီမန်အတွက် ကြားဖြတ်ရွေးကောက်ပွဲတစ်ခုကို ဧပြီ ၂၃ရက်မှာပြုလုပ်သွားဖို့ရှိနေပါတယ်။

စနေနေ့ မနက်ပိုင်း မှာဖြစ်ခဲ့တဲ့ အဆိုပါဖြစ်ရပ်ဟာ  ဝါကာယာမာစီရင်စုက ဆိုင်ကာဇာကီ ငါးဖမ်းဆိပ်ကမ်းမှာ ဖြစ်ပွားခဲ့ တာပါ။ အဲဒီဖမ်းဆီးခံရသူဟာ ငါးဖမ်းသမအသင်းက ဝန်ထမ်းတစ်ဦးဖြစ်တယ်လို့ အဆာဟီသတင်းစာကရေးသားပါတယ်။ အဲဒီသူကိုရဲက မြေကြီးပေါ်ဆွဲပြီးလှဲလိုက်ပြီးနောက် ကီရှီဒါရပ်နေတဲ့အနားမှာ မီးခိုးလုံးတွေမြင်ကြရပါတယ်။

ပစ်ပေါက်လိုက်တဲ့ အရာဝတ္တုတစ်ခုကို အင်န်အိတ်ချ်ကေကထုတ်လွှင့်ပြသရာ အဲဒီပစ္စည်းက သတ္တုဆလင်ဒါတစ်ခု ဖြစ်ပုံရပါတယ်။

လူအုပ်တွေပြေးလွှားနေကြပြီး လူတစ်ဦးကိုရဲတွေက မြေကြီးပေါ်ချုပ်ထားတာကို အင်န်အိတ်ကေရုပ်သံမှာမြင်တွေ့ကြရ ပါတယ်။ အဲဒီသူဟာ အသက် ၂၀နှင့် ၃၀ဝန်းကျင်တစ်ဦးဖြစ်ပုံရတယ်လို့ မီဒီယာတွေကပြောပါတယ်။ ရဲတွေက အသက် ၂၄နှစ်အရွယ်အမျိုးသားတစ်ဦးကို ဖမ်းဆီးခဲ့တယ်လို့ ကျိုဒိုသတင်းဌာနကရေးပါတယ်။

ကီရှီဒါဟာ ဂျီဆဲဗင်း ထိပ်သီးအစည်းအဝေးကို လာမယ့်လာမှာ ဟီရိုရှီးမားမှာ ကျင်းပဖို့ရှိနေပါတယ်။ ဒီဖြစ်ရပ်ကြောင့် တနင်္ဂနွေနေ့မှာ ကာရူအီဇီဝါမှာကျင်းပမယ့် ဂျီဆဲဗင်း နိုင်ငံခြားရေးဝန်ကြီးများအစည်းအဝေး လုံခြုံရေးအစီအစဉ် ပြောင်း စရာမရှိဘူးလို့ ဂျပန်နိုင်ငံခြားရေးဝန်ကြီးဌာနကပြောပါတယ်။

Source Reuters

#ဂျပန်ဝန်ကြီးချုပ်ဖူမီယိုကီရှီဒါ

#ဂျပန်ဝန်ကြီးချုပ်မီးခိုးဗုံးဖြင့်အပစ်ခံရ