Published 29 April 2023

နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည်  ဇနီးဒေါ်ကြူကြူလှနှင့် အဖွဲ့ဝင်များလိုက်ပါပြီး ဗန်းမော်ဆရာတော်ဘုရားကြီးနှင့် နဂါးနှစ်ကောင်ဆရာတော်ဘုရားကြီးတို့ကို ယနေ့ ဧပြီလ ၂၉)ရက်က သွားရောက်ဖူးမျှော်ကြည်ညိုပြီး ကျန်းမာရေးဆိုင်ရာကိစ္စတွေ မေးမြန်း လျှောက်ထားခဲ့တယ်လို့ နစကရဲ့သတင်းထုတ်ပြန်ချက်အရသိရပါတယ်။

ဗိုလ်ချုပ်မှူးကြီးနှင့်အဖွဲ့သည် မန္တလေးမြို့၊ အထွေထွေရောဂါကုဆေးရုံကြီးတွင် တက်ရောက် ဆေးကုသမှု ခံယူလျက်ရှိသည့် နိုင်ငံတော်သံဃမဟာနာယကအဖွဲ့ဥက္ကဋ္ဌ၊ မန္တလေးမြို့၊ ဗန်းမော် ကျောင်းတိုက်ဆရာတော်၊ အဂ္ဂမဟာပဏ္ဍိတ အဂ္ဂမဟာဂန္ထဝါစကပဏ္ဍိတ အဘိဓဇမဟာ ရဋ္ဌဂုရု အဘိဓဇအဂ္ဂမဟာသဒ္ဓမ္မဇောတိက ဘဒ္ဒန္တ ကုမာရာဘိဝံသ အား  ယနေ့ဧပြီလ(၂၉)ရက် နံနက်ပိုင်းတွင် သွားရောက်ဖူးမြော်ကြည်ညိုခဲ့ပါတယ်။

အဲဒီနောက် ကျန်းမာရေးအခြေအနေများကို မေးမြန်းလျှောက်ထားပြီး ဆေးဝါးကုသမှုပေးထားသည့် အခြေအနေများနှင့် ဆွမ်းကိစ္စ များ အဆင်ပြေစေရေးအတွက် ဆောင်ရွက်ပေးထားသည်များကို ဆေးရုံအုပ်ကြီးနှင့် တာဝန်ရှိသူများအား မေးမြန်းကာ လိုအပ်သည်များ ဖြည့်ဆည်းဆောင်ရွက်ပေးရန် မှာကြားခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

ထို့အပြင် ရှမ်းပြည်နယ် (အရှေ့ပိုင်း)၊ တာချီလိတ်မြို့၊ နဂါးနှစ်ကောင်ကျောင်းတိုက်ပဓာန နာယက နိုင်ငံတော်ဩဝါဒါစရိယ အဘိဓဇမဟာရဋ္ဌဂုရု အဘိဓဇအဂ္ဂမဟာ သဒ္ဓမ္မ ဇောတိက အဂ္ဂမဟာပဏ္ဍိတ ဒေါက်တာ ဘဒ္ဒန္တဓမ္မသီရိ အား ကျန်းမာရေးစောင့်ရှောက် မှုပေးထားသည့် အခြေအနေများကိုလည်း ဗိုလ်ချုပ်မှူးကြီးမင်းအောင်လှိုင်သည် ဇနီးဒေါ်ကြူကြူလှနှင့် တာဝန်ရှိသူများလိုက်ပါ၍ ယနေ့နံနက်ပိုင်းတွင် သွားရောက် ကြည့်ရှုခဲ့ပါတယ်။

ဗိုလ်ချူပ်မှူးကြီးနှင့်အဖွဲ့သည် ဆရာတော်ကြီးအား ဖူးမြော်ကြည်ညို၍ ကျန်းမာရေး စောင့်ရှောက် မှုဆောင်ရွက်ပေးထားသည့် အခြေအနေများကိုကြည့်ရှုရာ တာဝန်ရှိသူများက ဆရာတော်ကြီး၏ ကျန်းမာရေးအခြေအနေများကို ရှင်းလင်းတင်ပြခဲ့ကြပါတယ်။ တင်ပြမှုတွေအပေါ် နစက ဥက္ကဋ္ဌက ဆရာ တော်ကြီး၏ ကျန်းမာရေးအခြေအနေများကို မပြတ်စောင့်ကြည့်၍ လိုအပ်သည်များကို ဖြည့်ဆည်းဆောင်ရွက်ပေးရန်၊ ကိုယ်ခံစွမ်းအားရှိစေရေး၊ တစ်ကိုယ်ရည် သန့်ရှင်းရေး တို့ အတွက်ကိုလည်း ဆောင်ရွက်ပေးရန်နှင့် အခြားလိုအပ်သည်များကို အလေးထား မှာကြားခဲ့တယ်လို့ သိရှိရပါတယ်။

#ymg/knl

#ဗန်းမော်ဆရာတော်ဘုရားကြီး

#ဗိုလ်ချူပ်မှူးကြီးမင်းအောင်လှိုင်

#နဂါးနှစ်ကောင်ဆရာတော်ဘုရားကြီး

Published_ 28April 2023

နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ဟာ  ရုရှား-မြန်မာ ချစ်ကြည်ရေးနှင့်ပူးပေါင်းဆောင်ရွက်ရေးအသင်း ဒုတိယဥက္ကဋ္ဌ Mr. Anatoly Bulochnikov ဦးဆောင်သောကိုယ်စားလှယ်အဖွဲ့နှင့် ဧပြီ ၂၉ရက်က နေပြည်တော်ရှိ နစကဥက္ကဋ္ဌရုံး၊ ဧည့်ခန်းမ၌ တွေ့ဆုံပြီး နှစ်နိုင်ငံပူးပေါင်းဆောင်ရွက်မှုပိုမိုတိုးတက်ကောင်းမွန်လာတဲ့အခြေအနေတွေနှင့် ဆက်လက်ဆောင်ရွက်နိုင်မယ့် ကိစ္စတွေကို ဆွေးနွေးခဲ့ကြတယ်လို့ နစကရဲ့သတင်းထုတ်ပြန်ချက်အရသိရပါတယ်။

မြန်မာနိုင်ငံသို့ရောက်ရှိနေတဲ့ ရုရှား-မြန်မာ ချစ်ကြည်ရေးနှင့်ပူးပေါင်းဆောင်ရွက်ရေးအသင်း ဒုတိယဥက္ကဋ္ဌ Mr. Anatoly Bulochnikov ဦးဆောင်သောကိုယ်စားလှယ်အဖွဲ့က ဧပြီ၂၈ ရက်က  နေပြည်တော်တွင် နစက ဥက္ကဋ္ဌထံလာရောက် ဂါရဝပြုတွေ့ဆုံစဉ်ဆွေးနွေးခဲ့ကြတာဖြစ်ပါတယ်။

ထိုသို့တွေ့ဆုံရာတွင် မြန်မာ-ရုရှား နှစ်နိုင်ငံချစ်ကြည်ရင်းနှီးမှု၊ ပူးပေါင်းဆောင်ရွက်မှုများနှင့် ကဏ္ဍစုံတွင်ပူးပေါင်းဆောင်ရွက်မှုများ ပိုမိုတိုးတက်ကောင်းမွန်လာမှုအခြေအနေများ၊ ရေအားလျှပ်စစ်ဓာတ်အားထုတ်လုပ်ရေး စီမံကိန်းများတွင် ပူးပေါင်းဆောင်ရွက်သွားမည့်အခြေအနေများ၊ စိုက်ပျိုးရေးလုပ်ငန်းများ ဖွံ့ဖြိုးတိုးတက်ရေးပူးပေါင်းဆောင်ရွက်သွားမည့် အခြေအနေများ၊ နှစ်နိုင်ငံအကြားခရီးသွားလုပ်ငန်းများဖွံ့ဖြိုးတိုးတက်ရေး ဆက်လက်ဆောင်ရွက်သွားမည့် အခြေအနေများ၊ နှစ်နိုင်ငံအကြားယဉ်ကျေးမှုဖလှယ်ရေးဆိုင်ရာကိစ္စရပ်များ၊ နှစ်နိုင်ငံဆက်ဆံမှုများ တိုးတက်စေရေးအတွက်ရုရှားနိုင်ငံ၌ မြန်မာနိုင်ငံကောင်စစ်ဝန်ရုံးများ တည်ဆောက်လျက်ရှိမှု၊ နှစ်နိုင်ငံအကြားကူးလူးဆက်ဆံမှုများ တိုးမြှင့်ရေးနှင့် နှစ်နိုင်ငံကုန်သွယ်မှုလုပ်ငန်းများယခုထက် ပိုမိုတိုးတက်အောင် ဆက်လက်ဆောင်ရွက်သွားမည့်အခြေအနေများနှင့်ပညာ ရေးဆိုင်ရာပူးပေါင်းဆောင်ရွက်မှုများ မြှင့်တင်ရေးတို့နှင့် ပတ်သက်၍ ရင်းရင်းနှီးနှီး ဆွေးနွေးခဲ့ကြတယ်လို့ သတင်းထုတ်ပြန်ချက်မှာဖော်ပြထားပါတယ်။

အဆိုပါတွေ့ဆုံပွဲသို့ ဗိုလ်ချူပ်မှူးကြီးနှင့် အတူ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး ပြည်ထောင်စုဝန်ကြီးများဖြစ်ကြတဲ့ ဒေါက်တာကံဇော်၊ ဦးကိုကိုလှိုင်၊ ဦးအောင်သော်နှင့်တာဝန်ရှိသူများနှင့် ရုရှား-မြန်မာ ချစ်ကြည်ရေးနှင့် ပူးပေါင်းဆောင်ရွက်ရေးအသင်း ဒုတိယဥက္ကဋ္ဌနှင့်အတူ အဆိုပါကိုယ်စားလှယ်အဖွဲ့မှ တာဝန်ရှိသူများတက်ရောက်ခဲ့ကြတာဖြစ်ပါတယ်။

#ymg/knl

#ရုရှား-မြန်မာချစ်ကြည်ရေးအသင်း

#ဗိုလ်ချူပ်မှူးကြီးမင်းအောင်လှိုင်

#မြန်မာ-ရုရှားဆက်ဆံရေး

Published 28 April 2023

ဘီဘီစီ ဥက္ကဋ္ဌ ရစ်ချတ်ရှပ်ဟာ သူ့ကိုအလုပ်ခန့်ထားတဲ့ လုပ်ငန်းစဉ်အတွင်း အကျိုးစီးပွား ပဋိပက္ခဖြစ်တဲ့ အကြောင်းအရာ နှစ်ခုကို ကြေညာရန်ပျက်ကွက်ခဲ့တယ်လို့ အစီရင်ခံစာတစ်ခုထွက်ပေါ်ပြီးနောက် ဘီဘီစီကော်ပိုရေးရှင်းဥက္ကဋ္ဌရာထူးကနေ နှုတ်ထွက်ခဲ့ရပါတယ်။

ရှပ်ဟာ ဗြိတိန်ကွန်ဆာဗေးတစ်ပါတီရဲ့ အလှုရှင်တစ်ဦးဖြစ်ပြီး  အဲဒီတုန်းက ဝန်ကြီးချုပ်ဘောရစ်ဂျွန်ဆင်နှင့် ဝန်ကြီးချုပ် ကို ပုဂ္ဂိုလ် ရေးချေးငွေပေးမယ့် လူတစ်ဦးနှင့် တွေ့ဆုံဖို့ သူက ကူညီစီစဉ်ပေးခဲ့ပါတယ်။

သူက သူ့အနေနှင့် ဘီဘီစီဥက္ကဋ္ဌအလုပ်လုပ်ချင်တယ်လို့ ဝန်ကြီးချုပ်ကိုကြိုပြောခဲ့ပြီး ခန့်အပ်ရေးအဖွဲ့ကိုလည်း သူဟာ ဝန်ကြီးတွေထောက်ခံတဲ့ တစ်ဦတည်းသော ကိုယ်စားလှယ်လောင်းဖြစ်တယ်လို့ပြောခဲ့ပါတယ်။

အဲဒီအပြင် သူ့ရဲ့ငယ်သူငယ်ချင်း ကနေဒါစီးပွားရေးလုပ်ငန်းရှင် ဆမ်ဘလင့်တ်ဟာ ရှပ်ဆီကိုလာခဲ့ပြီး ၂၀၂၀ခုနှစ်မှာ ဝန်ကြီးချုပ်ငွေကြေးအခက်ခဲရုန်းကန်နေရတာတွေကို ကူညီမယ်လို့ ကမ်းလှမ်းခဲ့ပါတယ်။

သူဟာ အများပြည်သူနှင့်ဆိုင်တဲ့အလုပ်ခန့်ထားခြင်းဆိုင်ရာ အစိုးရရဲ့ ကျင့်ဝတ်တွေကို ချိုးဖောက်ခဲ့တယ်လို့ အစီရင်ခံစာက ဆိုပေမယ့် သူကတော့ ဒီချိုးဖောက်မှုဟာ သူ့အလုပ်ခန့်ထားတာကို တရားမဝင်တော့အောင်လုပ်ဖို့အထိ မလိုအပ်ဘူးလို့ပြန်ပြောခဲ့ပါတယ်။

Source agaencies

#ဘီဘီစီဥက္ကဋ္ဌရစ်ချတ်ရှပ်ရာထူးမှနှုတ်ထွက်

#ဗြိတိန်နိုင်ငံရေး

#YangonMediaGroup

Published_ 25 April 2023

ရန်ကုန်တိုင်းဒေသကြီး၊ခရမ်းမြို့နယ်အတွင်း PDF အဖွဲ့ဝင် ၇ ဦး ကို လက်နက်မျိုးစုံ ၁၈ လက်၊ ကျည်အိမ်မျိုးစုံ ၃၀ ခု၊ ကျည်မျိုးစုံ ၁၆၀၇ တောင့်၊ ၄၀ မမ ဗုံးသီး ၂၄ လုံး၊ လက်လုပ် လက်ပစ်ဗုံး ၆ လုံးတို့ဖြင့် ဖော်ထုတ်ဖမ်းဆီးရမိခဲ့ကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ဧပြီလ ၁၉ ရက် နေ့လယ်ပိုင်းက သန်လျင်မြို့နယ်၊ ပေါက်တောကျေးရွာအနီး ပိတ်ဆို့ရှာဖွေရှင်းလင်း ခဲ့ရာ ခရမ်း PDF အဖွဲ့ဝင် ရီထွေးအား AK-47 ၁ လက်၊ Type-056 ၁ လက်၊ Glock-19 ၁ လက်၊ ကျည်အိမ်မျိုးစုံ ၅ ခု၊ ၇.၆၂ ကျည် ၆၈ တောင့်၊ ၉ မမ ကျည် ၃၆၉ တောင့်၊ ပွိုင့်-၃၈၀ ကျည် ၁၅ တောင့်တို့နှင့်အတူ ဖမ်းဆီးရမိခဲ့ပြီးနောက် ဧပြီလ ၂၂ ရက် နေ့လယ်ပိုင်းတွင် မရမ်းကုန်းမြို့နယ်၊ အမှတ်(၂) ရပ်ကွက်၊ အထက်ဗဟိုလမ်း၊ မုဒိတာအိမ်ရာ၊ တိုက်အမှတ်(C)၊ (၄)လွှာ၊ အခန်း (၄၀၉)မှထက်ရဲလင်း(ခ)အေးမောင်၊ စိုးထက်အောင်(ခ) သာလိကာ၊ ကျော်မင်းထက်(ခ)စာကလေးတို့ ၃ ဦးကိုလည်းကောင်း၊ယင်းနေ့ ညနေပိုင်းတွင် ဒေါပုံမြို့နယ်၊ ဗိုလ်ထွန်းဇံရပ်ကွက်၊ ဗိုလ်အောင်ကျော်လမ်း၊တိုက်အမှတ်(၃၆)၊ (၄)လွှာ၊ အခန်း(A)၌ အကြမ်းဖက်အဖွဲ့ဝင်များဖြစ်သည့် မိုးပြည့်စုံကျော် (ခ)ဒေဝ(ခ)မှတ်ကြီး၊ အောင်မျိုးလွင်(ခ)DK(ခ)ဇော်ကြီးသားနှင့် သန့်ဇင်ဦး(ခ)ဗိုက်ကလေး တို့ ၃ ဦးကိုလည်းကောင်း အသီးသီး ဖမ်းဆီးရမိခဲ့ကြောင်း အဆိုပါ ထုတ်ပြန်ချက်တွင် ဖော်ပြထားသည်။

ဖမ်းဆီးရမိသူ ထက်ရဲလင်း(ခ)အေးမောင်၏ ထွက်ဆိုချက်အရ ဧပြီလ ၂၃ ရက် နံနက်ပိုင်းတွင် ခရမ်းမြို့နယ်၊ မကျည်းကုန်းကျေးရွာနှင့် သုံးခွမြို့နယ်၊ ဆည်ကြီးကုန်းကျေးရွာအကြားရှိ လယ်ကွင်းအတွင်း သိုဝှက်မြှုပ်နှံထားသော BA-63၂ ၂ လက်၊ ကျည်အိမ် ၂ ခု၊ ၇.၆၂ ကျည် ၂၅ တောင့်ကိုလည်းကောင်း၊ ခရမ်းမြို့နယ်၊ ညောင်ပင် ကျေးရွာနှင့် အလယ်ကျေးရွာအကြားရှိ လယ်ကွင်းအတွင်း သိုဝှက်မြှုပ်နှံ ထားသော ပွိုင့်- ၃၈၀ ပစ္စတို ၁ လက်၊ Beretta ပစ္စတို ၁ လက်၊ M-4 ကာဘိုင် ၂ လက်၊ M-22 ၁ လက်၊ ပွိုင့်- ၃၀ ကာဘိုင် ၁ လက်၊ ၄၀ မမ ဗုံးပစ်လောင်ချာ ၁ လက်၊ ပွိုင့်-၂၂ လက်လုပ်သေနတ် ၁ လက်၊ ပွိုင့်-၃၈၀ ကျည် ၇ တောင့်၊ ၉ မမ ကျည် ၈ တောင့်၊ ပွိုင့်-၃၀ ကျည် ၂၅ တောင့်၊ ၅.၅၆ ကျည် ၁၂၀ တောင့်၊ ၇.၆၂ ကျည် ၂၀၀ တောင့်၊ ၄၀ မမ ဗုံးသီး ၅ လုံး၊ ပစ္စတို ကျည်အိမ် ၂ ခု၊ ပွိုင့်-၃၀ ကာဘိုင်ကျည်အိမ်(အရှည်/အတို) ၂ ခု၊ M-4 ကာဘိုင်ကျည်အိမ် ၅ ခု၊ M-22 ကျည်အိမ် ၅ ခု၊ လက်လုပ်လက်ပစ်ဗုံး ၆ လုံး တို့ကိုလည်းကောင်း၊ ဧပြီလ ၂၄ ရက် ညပိုင်းတွင် ခရမ်းမြို့နယ်၊ ကန်သာကျေးရွာ၏ အနောက်ဘက်ရှိ ကောက်ရိုးပုံအတွင်းမှ M-16 ၂ လက်၊ M4A1 ၁ လက်၊ ၁၂ ဗို့ ၁ လက်၊ ၄၀ မမ လက်လုပ်ဗုံးပစ်လောင်ချာ ၁ လက်၊ ပွိုင့်-၃၈၀ ကျည် ၂၆ တောင့်၊ ၉ မမ ကျည် ၆၈ တောင့်၊ ၅.၅၆ ကျည် ၄၈၀ တောင့်၊ ၇.၆၂ ကျည် ၁၉၆ တောင့်၊ ၁၂ ဗို့ကျည် ၄၀ တောင့်၊ ၄၀ မမ ဗုံးသီး ၁၉ လုံး၊ စနိုက်ပါကျည်အိမ် ၁ ခု၊ M-22 ကျည်အိမ် ၁ ခု၊ M-16 ကျည်အိမ် ၃ ခု၊ ၁၂ ဗို့ကျည်အိမ် ၂ ခု၊ M4A1 ကျည်အိမ် ၂ ခုတို့ကို လည်းကောင်း ဖော်ထုတ်သိမ်းဆည်းရမိခဲ့ကြောင်း သိရသည်။

ymg/pl

#YangonMediaGroup

#ခရမ်းPDF

#မြန်မာ့နိုင်ငံရေး

Published 24 April 2023

ပါကစ္စတန်ရဲ့လက်ရှိ နိုင်ငံရေးနှင့်စီးပွားရေးအကျပ်အတည်းတွေက စစ်တပ်က အာဏာရယူမည့်အခြေအနေသို့ ဦးတည်သွားနိုင်တယ်လို့ ပါကစ္စတန်ဝန်ကြီးချုပ်ဟောင်းက သတိပေးပြောကြားလိုက်ပါတယ်။

လက်ရှိဖြစ်ပေါ်နေတဲ့ ပြဿနာတွေ ခပ်မြန်မြန်အဆုံးမသတ်ဘူးဆိုရင် စစ်တပ်က အာဏာယူဖို့ ဖြစ်နိုင်ချေရှိနေတယ်လို့ ဝန်ကြီးချုပ်ဟောင်း ရှာဟစ်ခါကန်အက်ဘာဆီက အရုဏ်ဦးသတင်းဌာနကို ပြောကြားခဲ့ပါတယ်။

ဘက်ဘာဆီက ပါကစ္စတန်ရဲ့ စစ်အုပ်ချုပ်ရေးရှည်ကြာခဲ့တဲ့ကာလတွေကို ရည်ညွှန်းပြောဆိုခဲ့ပြီး စစ်တပ်ဟာ သိပ်ပြီးဆိုးရွားမှုမရှိတဲ့အခြေအနေမှာတောင် အာဏာကို ထိန်းချုပ်ရယူတာမျိုးတွေရှိခဲ့တယ်လို့ပြောပါတယ်။

ဒီလိုအဖြစ်မျိုးကို ဟန့်တားနိုင်ဖို့အတွက် ထိပ်ပိုင်းခေါင်းဆောင်တွေဟာ တွေ့ဆုံဆွေးနွေးမှုတွေစတင်ဖို့လိုအပ်နေပြီလို့ သူကအလေးပေးပြောဆိုပါတယ်။ အဖွဲ့အစည်းတွေနှင့်အခြေအနေအကြား ပဋိပက္ခကို မဖြေရှင်းနိုင်ဘူးဆိုရင် စစ်အုပ်ချုပ် ရေးဥပဒေဟာ ဖြစ်လာနိုင်တယ်လို့လည်း သူကပြောပါတယ်။

“ စနစ်က အလုပ်မဖြစ်တော့တဲ့အခါ ဒါမှမဟုတ် အဖွဲ့အစည်း institutions  တွေနှင့် နိုင်ငံရေးခေါင်းဆောင်မှုအကြား ပဋိပက္ခတစ်ခုရှိနေတဲ့အခါ ပြီးတော့ နိုင်ငံရေးခေါင်းဆောင်တွေက ရှေ့ကိုမတိုးနိုင်တော့ရင် စစ်အုပ်ချုပ်ရေးဟာ ဖြစ်နိုင်ချေ ရှိနေတုန်းပဲ” လို့  ပါကစ္စတန်အာဏာရပါတီဖြစ်တဲ့ ပါကစ္စတန်မူစလင်အဖွဲ့ချုပ်-နာဝက်ဇ်ရဲ့ အကြီးတန်းခေါင်းဆောင်   လည်းဖြစ်တဲ့ သူကပြောပါတယ်။

ပါကစ္စတန်ရဲ့လက်ရှိအကျပ်အတည်းမှာ အဓိကကစားသမား(၃)ဦးရှိနေတယ်လို့သူကပြောပါတယ်။ အဲဒီသူတွေက ပါကစ္စတန်တီဟရက်အိုင်အင်ဆပ်(ပီတီအိုင်)ရဲ့ ဥက္ကဋ္ဌ အင်မရန်ခန်၊ ပါကစ္စတန်မူစလင်အဖွဲ့ချုပ် နာဝက်ဇ်ရဲ့ ခေါင်းဆောင် နာဝက်ဇ်ရှာရစ်နှင့် စစ်တပ်အကြီးအကဲ ဗိုလ်ချူပ်ကြီး အာဆင်မူနီယာတို့ဖြစ်ကြပြီး သူတို့ဟာ ကိုယ့်ရဲ့အကျိုးစီးပွားတွေ ကိုဘေးဖယ်ထားပြီး အတူတကွထိုင်ဆွေးနွေးဖို့လိုအပ်တယ်လို့လည်း ဆက်ပြောပါတယ်။

လက်ရှိ ပါကစ္စတန်ရဲ့ စီးပွားရေးနှင့်နိုင်ငံရေးအခြေအနေတွေဟာ အရင်တွေထက် ပိုပြီးဆိုရွားနေပြီး ဒီလိုအခြေအနေမျိုး ယခင်ကရှိခဲ့တိုင်း စစ်တပ်က အာဏာရယူလေ့ရှိတယ်လို့လည်း သူက အလေးပေးပြောဆိုပါတယ်။

ပါကစ္စတန်ရဲ့လက်ရှိ စီးပွားရေးနှင့်နိုင်ငံရေးအခြေအနေတွေက တိုးတက်လာမယ့် အရိပ်အယောင်မတွေ့ရဖြစ်နေပါတယ်။ စစ်တပ်က ကြားဝင်တာဖြစ်လာမှာမဟုတ်ဘူးလို့ သူမျှော်လင့်ကြောင်းနှင့် ကြားဝင်စွက်ဖက်လိုက်ရင် အခြေအနေက ပိုဆိုး သွားလိမ့်မယ်လို့လည်းသူကဆိုပါတယ်။

နိုင်ငံရေးအရအဖြေရှာခြင်းကသာ တိုးတက်မှဒရှိစေနိုင်မှာဖြစ်တယ်လို့လည်း သူကဆက်လက်ပြောဆိုပါတယ်။

အဲဒီအပြင် အမေရိကန်တို့၊ဗြိတိန်တို့လို နိုင်ငံခြားတိုင်းပြည်တွေက ပြဿနာတွေပြေငြိမ်းအောင် ဝင်ရောက် ဖျန်ဖြေပေးတဲ့ စိတ်ကူးကိုလည်း အက်ဘာဆီက ပယ်ချခဲ့ပါတယ်။ အဖြေဟာ ပြည်တွင်းထဲကပဲ လာဖို့လိုအပ်တယ်လို့ သူကပြောပါတယ်။

Source WION

#ပါကစ္စတန်အကျပ်အတည်း

#ပါကစ္စတန်ဝန်ကြီးချုပ်ဟောင်းရှာဟစ်ခါကန်အက်ဘာဆီ

#YangonMediaGroup

Published 24 April 2023

တရုတ်နိုင်ငံ ရှန်ဟိုင်းမြို့ရှိ ကမ္ဘာခန်းမကြီးတွင် တရုတ်ပုံစံခေတ်မီတိုးတက်ရေးနှင့်ကမ္ဘာဆိုတဲ့ခေါင်းစဉ်နှင့် Lanting ဖိုရမ်ကို  ပြီးခဲ့တဲ့သောကြာနေ့ကကျင်းပခဲ့ရာ တရုတ်သမ္မတရှီကျင့်ဖျင်က ဂုဏ်ပြုသဝဏ်လွှာပါးခဲ့တယ်လို့ တရုတ်မီဒီယာတွေကသတင်းရေးသားပါတယ်။

တရုတ်ကွန်မြူနစ်ပါတီအနေနှင့်  နိုင်ငံတစ်ဝန်းရှိ တိုင်းရင်းသားပြည်သူအသီးသီးကို စည်းလုံးညီညွတ်စွာ ဦးဆောင်ပြီး ကာလကြာရှည်စွာ ခက်ခဲကြမ်းတမ်းမှုများကို ဖြတ်သန်းခဲ့ပြီးနောက် တရုတ်နိုင်ငံအခြေအနေနှင့် ကိုက်ညီသော ဖွံ့ဖြိုးတိုးတက်ရေးလမ်းကြောင်းကို ရှာဖွေတွေ့ရှိခဲ့တယ်လို့ရှီက ပြောပါတယ်။

တရုတ်နိုင်ငံအနေနှင့်  နိုင်ငံအသီးသီးနှင့်အတူ တရုတ်ပုံစံခေတ်မီမှု အောင်မြင်မှုအသစ်များဖြင့် ကမ္ဘာကြီး ဖွံ့ဖြိုးတိုးတက်ရေးအတွက် အခွင့်အလမ်းသစ်များ ပံ့ပိုးပေးနိုင်ရန် ကြိုးပမ်းရင်း ခေတ်မီမှုလမ်းကြောင်းနှင့် ပိုမိုကောင်းမွန်သော လူ့အဖွဲ့အစည်းစနစ်ကို လူသားများ ရှာဖွေတွေ့ရှိနိုင်ရေးအတွက် အားသစ်လောင်းပေးကာ အေးအတူပူအမျှအသိုက်အဝန်း တည်ဆောက်ရန် မြှင့်တင်ဆောင်ရွက်မယ်လို့လည်း သမ္မတရှီက သူ့ရဲ့ သဝဏ်လွှာထဲမှာ ဖော်ပြထားပါတယ်။

အဆိုပါဖိုရမ်ကို နိုင်ငံပေါင်း ၈၀ခန့်က အစိုးရကိုယ်စားလှယ်တွေ၊ဉာဏ်ကြီးရှင်အဖွဲ့တွေနှင့် မီဒီယာတွေတက်ရောက်ခဲ့ကြပါတယ်။

တရုတ်နိုင်ငံဟာ ယင်းရဲ့ကိုယ်ပိုင်ပုံစံနှင့်ပဲ ခေတ်မီဖွံ့ဖြိုးတိုးတက်ရေးလမ်းကြောင်းကိုလျှောက်လှမ်းမယ်လို့ တရုတ်ခေါင်းဆောင်တွေက ထပ်ခါတလဲလဲ ပြောကြားခဲ့ကြတာဖြစ်ပါတယ်။

Source CCTV

#Lantingဖိုရမ်၊

#တရုတ်နိုင်ငံကိုယ်ပိုင်ပုံစံဖြင့်ခေတ်မီခြင်း

#YangonMediaGroup