Published -15 April 2023

ကယားပြည်နယ်၊ လွိုင်ကော်မြို့နယ်ရှိ ပြည်နယ်အစိုးရအဖွဲ့ရုံးဗဟိုမဏ္ဍပ်တွင် ယနေ့နံနက်ပိုင်း မဟာသင်္ကြန်အကြတ်နေ့ ဧပြီလ ၁၅ ရက်က ကလေးသူငယ်များ အပါ အဝင် ပြည်သူများရေကစားနေစဉ်  Drop Bomb ဖြင့် တိုက်ခိုက်ခဲ့သောကြောင့် ၂၈ ဦး ထိခိုက်ဒဏ်ရာရရှိခဲ့ကြကြောင်း နစက သတင်းထုတ်ပြန်ရေးအဖွဲ့က ထုတ်ပြန်လိုက်သည်။

ယနေ့ နံနက် ၉ နာရီ ခွဲခန့်က အကြမ်းဖက်သမားများက Drone တစ်စီးဖြင့် Drop Bomb ၁ လုံး ပစ်ချတိုက်ခိုက်ခဲ့ခြင်းကြောင့် အမျိုးသား ၁၅ ဦးနှင့် အမျိုးသမီး ၁၃ ဦး၊ စုစုပေါင်း ၂၈ ဦး ထိခိုက်ဒဏ်ရာများ ရရှိခဲ့ကြောင်း ၊ယင်းဒဏ်ရာရသူများအား

လွိုင်ကော်မြို့ရှိ ပြည်သူ့ဆေးရုံသို့ ပို့ဆောင်ဆေးကုသမှုခံယူစေလျက်ရှိကြောင်းသိရသည်။

ယင်းသို့ ကလေးသူငယ်များအပါအဝင် အရပ်သားပြည်သူများ ရေကစားနေသည့်နေရာကို Drop Bomb များ ပစ်ချတိုက်ခိုက်ခြင်းမှာ ဂျီနီဗာကွန်ဗန်းရှင်း နှင့် အပြည်ပြည်ဆိုင်ရာဥပဒေတို့အရ စစ်ရာဇဝတ်မှု(War Crime)ကို ကျူးလွန်ခြင်း ဖြစ်သည့်အတွက် ကျူးလွန်ခဲ့သူများအားအမြန်ဆုံး ဖော်ထုတ်ဖမ်းဆီး၍ ဥပဒေနှင့်အညီ အပြစ်ပေးအရေးယူနိုင်ရေး လုပ်ဆောင်နေကြောင်း အဆိုပါထုတ်ပြန်ချက်တွင် ဖော်ပြထားသည်။

ymg/mt

Yangon_Media_Group

Published 15 April 2023

ဂျပန်ဝန်ကြီးချုပ် ဖူမီယိုကီရှီဒါဟာ  ယနေ့ ဧပြီ ၁၅ ရက်က ဂျပန်နိုင်ငံအနောက်ပိုင်းမှာ အပြင်ဘက်မှာ မိန့်ခွန်း  ပြော  နေတုန်း မီးခိုးဗုံးလို့ယူဆရတာ နှင့် လူတစ်ဦးကပစ်ပေါက်ခဲ့တဲ့အတွက် ဝန်ကြီးချုပ်ကို အနာတရမဖြစ်စေဘဲ ကယ်ထုတ်ခဲ့ရပါတယ်။

ကျယ်လောင်တဲ့ပေါက်ကွဲသံတစ်ခုကြားရပြီး  မြင်ကွင်းမှာ လူတစ်ဦးကို ရဲတွေက ထိန်းချုပ်လိုက်ကြပြီးနောက် ဝန်ကြီးချုပ် ကို ထိခိုက်မှုမရှိအောင် ကာကွယ်ပေးခဲ့ကြတယ်လို့ အင်န်အိတ်ချ်ကေက သတင်းထုတ်ပြန်ပါတယ်။

“ မိန့်ခွန်းပြောတဲ့နေရာမှာ ကျယ်လောင်တဲ့ပေါက်ကွဲသံနှင့်ပတ်သက်လို့ ရဲတွေက စုံစမ်းစစ်ဆေးမှုတွေလုပ်နေပြီ” လို့ သူ့ရဲ့ မဲဆွယ်မိန့်ခွန်းကိုပြန်ပြောတဲ့အခါ ကီရှီဒါက ထည့်သွင်းပြောကြားပါတယ်။ “ လူတော်တော်များများ စိတ်ပူသွားရတဲ့ အတွက် ကျွန်တော်စိတ်မကောင်းပါဘူး။ ကျွန်တော်တို့ဟာ ကျွန်တော်တို့နိုင်ငံရဲ့ အရေးကြီးတဲ့ ရွေးကောက်ပွဲတစ်ခုရဲ့ အလယ်မှာရှိနေကြပါတယ်။ ဒါကို အတူတူလုပ်ဆောင်ကြရမှာပါ” လို့သူကဆက်ပြောပါတယ်။

ခေတ်သစ်ဂျပန်နိုင်ငံကို အရှည်လျားဆုံး ဦးဆောင်ခဲ့တဲ့ ဝန်ကြီးချုပ်ဟောင်း ရှင်ဇိုအာဘေးဟာ ပါလီမန်ရွေးကောက်ပွဲ အတွက်မဲဆွယ်စဉ်  လက်လုပ်သေနတ်နှင့် ပစ်ခတ်ခံရမှုကြောင့် ပြီးခဲ့တဲ့နှစ် ဇူလိုင်က သေဆုံးခဲ့ရပါတယ်။ အဲဒါကြောင့် တစ်နိုင်ငံလုံးထိတ်လန့်တုန်လှုပ်ခဲ့ကြရပြီး နိုင်ငံရေးသမားတွေ လုံခြုံရေးအတွက် ပြန်လည်သုံးသပ်မှုတွေ လုပ်ခဲ့ကြပါတယ်။

ဂျပန်ပါလီမန်အတွက် ကြားဖြတ်ရွေးကောက်ပွဲတစ်ခုကို ဧပြီ ၂၃ရက်မှာပြုလုပ်သွားဖို့ရှိနေပါတယ်။

စနေနေ့ မနက်ပိုင်း မှာဖြစ်ခဲ့တဲ့ အဆိုပါဖြစ်ရပ်ဟာ  ဝါကာယာမာစီရင်စုက ဆိုင်ကာဇာကီ ငါးဖမ်းဆိပ်ကမ်းမှာ ဖြစ်ပွားခဲ့ တာပါ။ အဲဒီဖမ်းဆီးခံရသူဟာ ငါးဖမ်းသမအသင်းက ဝန်ထမ်းတစ်ဦးဖြစ်တယ်လို့ အဆာဟီသတင်းစာကရေးသားပါတယ်။ အဲဒီသူကိုရဲက မြေကြီးပေါ်ဆွဲပြီးလှဲလိုက်ပြီးနောက် ကီရှီဒါရပ်နေတဲ့အနားမှာ မီးခိုးလုံးတွေမြင်ကြရပါတယ်။

ပစ်ပေါက်လိုက်တဲ့ အရာဝတ္တုတစ်ခုကို အင်န်အိတ်ချ်ကေကထုတ်လွှင့်ပြသရာ အဲဒီပစ္စည်းက သတ္တုဆလင်ဒါတစ်ခု ဖြစ်ပုံရပါတယ်။

လူအုပ်တွေပြေးလွှားနေကြပြီး လူတစ်ဦးကိုရဲတွေက မြေကြီးပေါ်ချုပ်ထားတာကို အင်န်အိတ်ကေရုပ်သံမှာမြင်တွေ့ကြရ ပါတယ်။ အဲဒီသူဟာ အသက် ၂၀နှင့် ၃၀ဝန်းကျင်တစ်ဦးဖြစ်ပုံရတယ်လို့ မီဒီယာတွေကပြောပါတယ်။ ရဲတွေက အသက် ၂၄နှစ်အရွယ်အမျိုးသားတစ်ဦးကို ဖမ်းဆီးခဲ့တယ်လို့ ကျိုဒိုသတင်းဌာနကရေးပါတယ်။

ကီရှီဒါဟာ ဂျီဆဲဗင်း ထိပ်သီးအစည်းအဝေးကို လာမယ့်လာမှာ ဟီရိုရှီးမားမှာ ကျင်းပဖို့ရှိနေပါတယ်။ ဒီဖြစ်ရပ်ကြောင့် တနင်္ဂနွေနေ့မှာ ကာရူအီဇီဝါမှာကျင်းပမယ့် ဂျီဆဲဗင်း နိုင်ငံခြားရေးဝန်ကြီးများအစည်းအဝေး လုံခြုံရေးအစီအစဉ် ပြောင်း စရာမရှိဘူးလို့ ဂျပန်နိုင်ငံခြားရေးဝန်ကြီးဌာနကပြောပါတယ်။

Source Reuters

#ဂျပန်ဝန်ကြီးချုပ်ဖူမီယိုကီရှီဒါ

#ဂျပန်ဝန်ကြီးချုပ်မီးခိုးဗုံးဖြင့်အပစ်ခံရ

Published 14 April 2023

တရုတ်သမ္မတရှီကျင့်ဖျင်ဟာ တရုတ်ပြည်သူ့လွတ်မြောက်ရေးတပ်မတော် တောင်ပိုင်းတိုင်းရေတပ်ဌာနချုပ်ကို ဧပြီ၁၁ ရက်က သွားရောက်ခဲ့ပြီး တရုတ်စစ်တပ်ရဲ့ မျက်နှာစာအားလုံးမှာ ခေတ်မီအောင် အဆင့်မြှင့်တင်ကြဖို့ အလေးပေး ပြောဆိုသွားတယ်လို့ တရုတ်နိုင်ငံပိုင်မီဒီယာတွေက သတင်းထုတ်ပြန်ပါတယ်။

တရုတ်ကွန်မြူနစ်ပါတီရဲ့  ဗဟိုကော်မတီ အထွေထွေအတွင်းရေးမှူးအပြင်  ဗဟိုစစ်ကော်မရှင်ရဲ့ ဥက္ကဋ္ဌ လည်းဖြစ်တဲ့ ရှီ က မျက်နှာစာအားလုံးခေတ်မီအောင်အဆင့်မြှင့်ဖို့နှင့် လေ့ကျင့်ရေးနှင့် တိုက်ပွဲဝင်အသင့်အနေအထားဖြစ်အောင် တိုးမြှင့် လုပ်ဆောင်ကြဖို့လည်း တိုက်တွန်းသွားပါတယ်။

Source CCTV+

#တရုတ်သမ္မတရှီကျင့်ဖျင်

#တရုတ်ပြည်သူ့လွတ်မြောက်ရေးတပ်မတော်_တောင်ပိုင်းတိုင်းရေတပ်ဌာနချုပ်

#YangonMediaGroup

Published 12 April 2023

တူရကီနိုင်ငံက  အပေါ့စားလေယာဉ်တွေနှင့် စစ်သုံးဒရုန်းယာဉ်တွေသယ်ဆောင်မယ့် ကုန်းရေနှစ်သွယ်တိုက်ခိုက်ရေး ရေယာဉ်တစ်စီးကို ဧပြီ ၁၀ ရက် တနင်္လာနေ့က ပွဲထုတ်ပြသလိုက်ပါတယ်။

TCG Anadolu တီစီဂျီအန်နာဒိုလူ လို့အမည်ပေးထားတဲ့ အဆိုပါစစ်သင်္ဘောဟာ အလျား ၇၅၈ ပေရှိပြီး ဗျက် ၁၀၅ ပေရှိပါတယ်။ တင့်ကား ၁၃စီးအပါအဝင်  တိုက်ခိုက်ရေးရဟတ်ယာဉ်တွေနှင့် စစ်သုံးဒရုန်းယာဉ်တွေ အစီး ၉၄ စီးအထိ တင်ဆောင်နိုင်ပါတယ်။

Source AFP

#YangonbMediaGroup

#တူရကီဒရုန်းတင်စစ်ရေယာဉ်

#တူရကီကာကွယ်ရေးလုပ်ငန်း

Published_ 13 April 2023

ကုလသမဂ္ဂအထွေထွေအတွင်းရေးမှူးချုပ်၏ ပြောရေးဆိုခွင့်ရှိသူအပါအဝင် နိုင်ငံကြီး (၇) နိုင်ငံ က ပဇီကြီးကျေးရွာ တိုက်ခိုက်ချေမှုန်းခံရမှုနှင့်ပတ်သက်၍  ဖြစ်စဉ်အမှန်ကို လစ်လျူရှုကာ ကန့်ကွက်ရှုတ်ချမှုများပြုလုပ်နေတာဖြစ်တယ်လို့ နစက,က ပြောပါတယ်။

ကန့်ဘလူမြို့နယ်၊ ပဇီကြီးကျေးရွာတွင် ဧပြီ (၁၁)ရက်နေ့က လုံခြုံရေးတပ်ဖွဲ့ဝင်များ၏ လေကြောင်းမှ တိုက်ခိုက်မှုများကြောင့် ကလေးသူငယ်များအပါအဝင်အရပ်သားများ သေဆုံးရမှု အပေါ် ကုလသမဂ္ဂ၊အမေရိကန်၊ဗြိတိန်နှင့် အာဆီယံ ဥက္ကဋ္ဌအင်ဒိုနီးရှားနိုင်ငံအပါအဝင် နိုင်ငံအချို့က ပြင်းထန်စွာကန့်ကွက်ရှုတ်ချကြောင်း ပြောဆိုထားကြပါတယ်။

အဆိုပါ ရှုတ်ချပြောဆိုမှုများအပေါ်  နစက,က ယခုလို ပြန်လည်တုန့်ပြန်ပြောဆိုလာခြင်းဖြစ်ပြီး အဆိုပါ နိုင်ငံကြီးများအနေဖြင့် အရှေ့အလယ်ပိုင်းဒေသအပါအဝင် ဖြစ်ပွားနေ သော ကမ္ဘာ့ရေးရာ ပဋိပက္ခများတွင် မိမိတို့၏ ကိုယ်ကျိုးစီးပွားများနှင့် ရနိုင်သည့် အခွင့်အလမ်းအပေါ်မူတည်၍ ရေငုံနှုတ်ပိတ်နေလျက်ရှိသည်ကိုလည်း တွေ့ရှိရတယ်လို့ နစကရဲ့ သတင်းထုတ်ပြန်ချက်မှာ ဖော်ပြထားပါတယ်။

အဆိုပါ နိုင်ငံကြီးများအနေဖြင့် အရှေ့အလယ်ပိုင်းဒေသအပါအဝင် ဖြစ်ပွားနေ သော ကမ္ဘာ့ရေးရာ ပဋိပက္ခများတွင် မိမိတို့၏ ကိုယ်ကျိုးစီးပွားများနှင့် ရနိုင်သည့် အခွင့်အလမ်းအပေါ်မူတည်၍ ရေငုံနှုတ်ပိတ်နေလျက်ရှိသည်ကိုလည်း တွေ့ရှိရကြောင်း၊ဒီမိုကရေစီနှင့် ပြည်သူ ဟု ကြွေးကြော်နေသော်လည်း မြန်မာနိုင်ငံ၏ လက်ရှိ ပကတိအခြေအနေကို မှန်ကန်စွာမသုံးသပ်ဘဲ အကြမ်းဖက်အဖွဲ့၏ လုပ်ရပ်များကို သွယ်ဝိုက်၍သော် လည်းကောင်း၊ တိုက်ရိုက်သော်လည်းကောင်း အားပေးအားမြှောက်ပြု၍ နိုင်ငံငယ်များ အပေါ် ကြီးနိုင်ငယ်ညှင်း အနိုင်ကျင့် နှိပ်ကွပ်လျက်ရှိကြောင်း ယင်းထုတ်ပြန်ချက်ကဆိုပါတယ်။

လုံခြုံရေးတပ်ဖွဲ့ဝင်များကို  အကြမ်းဖက်ချေမှုန်းရေးစစ်ဆင်ရေးဆိုင်ရာ ဒေသအလိုက်ထိတွေ့ တိုက်ခိုက်မှု စည်းမျဉ်းများ(Rules of Engagement-ROE)ကိုလည်း ထုတ်ပြန်ပေး ထားပြီး ယင်းအတိုင်းလိုက်နာဆောင်ရွက်ကာ အဆိုပါအကြမ်းဖက်ဌာနချုပ် ဖွင့်လှစ်ရန် လျာထား သည့် ပဇီကြီးကျေးရွာကို လုံခြုံရေးတပ်ဖွဲ့ဝင်များက အပြီးသတ် ရှင်းလင်းရန် ဆောင်ရွက်နေဆဲဖြစ်တယ်လို့လည်း နစကရဲ့သတင်းထုတ်ပြန်ချက်အရသိရပါတယ်။

ကန့်ဘလူမြို့နယ်၊ ပဇီကြီးကျေးရွာ ဝန်းကျင်သည် KIA သောင်းကျန်းသူနှင့် PDFအမည်ခံ အကြမ်းဖက်သမားများ ပူးပေါင်း၍ စစ်ကိုင်းတိုင်းမြောက်ခြမ်း အဓိက စစ်ရေးလှုပ်ရှားရာနှင့် စစ်ကိုင်းတိုင်းတောင်ခြမ်းသို့ လက်နက်/ခဲယမ်းများနှင့် လေ့ကျင့်ပြီးအကြမ်းဖက်သမားစေလွှတ်ရာ လမ်းကြောင်းပေါ်ရှိ အဓိက စခန်းထောက်နေရာ ဖြစ်ကြောင်း၊ ဆက်သွယ်ရေးမြောင်းများဖြင့် စစ်အခြေချစခန်းသဖွယ် တည်ဆောက်ထားပြီး မိုင်းများလည်း ပတ်လည်ထောင်ထားကြောင်း၊ တိုက်ခိုက်မှုဖြစ်စဉ် ဖြစ်ပွားခဲ့သောနေရာတွင် PDF အရေးကြီးခေါင်းဆောင်နှင့် KIA သောင်းကျန်းသူများ၊ PDFအမည်ခံ အကြမ်းဖက်သမားများ စုဝေးရောက်ရှိနေကြောင်းတို့ကို သတင်းအတိအကျရရှိသဖြင့် ကျေးရွာအပြင်ဘက်တွင် သီးခြားတည်ရှိနေသော စစ်ဘက်ပစ်မှတ်တစ်ခုအနေဖြင့် တိုက်ခိုက်ခဲ့ခြင်းဖြစ်ကြောင်းဖြင့် သတင်းထုတ်ပြန်ချက်မှာ ဖော်ပြထားပါတယ်။

ymg/mt

Yangon_Media_Group

Published 11 April 2023

ရှမ်းပြည်နယ်တွင် ရှိခဲ့သည့် စော်ဘွားများ၏ သမိုင်းကိုလည်း ဖော်ထုတ်ထိန်းသိမ်းသင့်သည်ဟု ယူဆသည့်အတွက် ဒေသတွင်းရှိ တိုင်းရင်းသားများ၏ စည်းလုံးညီညွတ်မှုပြယုဂ်တစ်ခုဖြစ်သည် ဟော်နန်း ကို ရှေးမူမပျက်စေဘဲ မူလပုံစံအတိုင်း ပြန်လည် တည်ဆောက်ပေးခြင်းဖြစ်တယ်လို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်က သိန္နီစော်ဘွားကြီး ခွန်ဆန်တုန်ဟုန်း၏ ဟော်နန်းတော်(ဟော်ခမ်းသျှမ်းဝီ)ကို အသစ်ပြန်လည်တည်ဆောက်ပြီးစီး၍ သိန္နီဟော်နန်းယဉ်ကျေးမှုပြတိုက်အဖြစ်ဖွင့်လှစ်သည့် အခမ်းအနားတွင်ပြောကြားခဲ့ပါတယ်။

ရှမ်းပြည်နယ် သိန္နီမြို့တွင် ဧပြီ(၁၁)ရက်နံနက်ပိုင်းကအဆိုပါ သိန္နီဟော်နန်းယဉ်ကျေးမှုပြတိုက် ကမ္ပည်းမော်ကွန်းကို ဗိုလ်ချုပ်မှူးကြီးက စက်ခလုပ်နှိပ်ဖွင့်လှစ်ပေးခဲ့တာဖြစ်ပါတယ်။

အတိတ်သမိုင်းက မြောက်သိန္နီစော်ဘွားကြီး အဆက်ဆက်၏ စည်းရုံး ဦးဆောင်မှုဖြင့် နယ်သူနယ်သားများ၊ ဒေသခံ တိုင်းရင်းသားများသည် စည်းလုံးညီညွတ်စွာနှင့်နိုင်ငံတော်ကာကွယ်ရေး၊ နယ်ချဲ့ကျူးကျော်စစ် ခုခံတွန်းလှန်ရေး၊ ဖက်ဆစ်ဆန့်ကျင်တော်လှန်ရေးများကို ခေတ်အဆက်ဆက် ပါဝင်ဆင်နွှဲခဲ့ကြပါကြောင်း၊ ယင်းကို အသိအမှတ်ပြုသောအားဖြင့် သိန္နီနယ်၏ စည်းလုံးညီညွတ်မှု ပြယုဂ်တစ်ခုလည်းဖြစ်၊ သမိုင်းဝင် အဆောက်အဦ တစ်ခုလည်းဖြစ်သည့် သိန္နီဟော်နန်းကြီးကို ဒေသခံပြည်သူများ၏ဆန္ဒနှင့်အညီ နိုင်ငံတော်နှင့် တပ်မတော်မှ ရှေးမူမပျက် ပြန်လည်တည်ဆောက်ပေးနိုင်ခြင်းအတွက် များစွာ ဂုဏ်ယူမိတယ်လို့လည်း နစက ဥက္ကဋ္ဌက အခမ်းအနားမှာပြောကြားခဲ့ တယ်လို့ သတင်းထုတ်ပြန်ချက်မှာ်ဖော်ပြထားပါတယ်။

အလားတူ မိုင်းပွန်ဟော်နန်းကိုလည်း ပြန်လည်ပြုပြင်ထိန်းသိမ်းထားပြီး ကျိုင်းတုံဟော်နန်းကြီးကိုလည်း ပုံစံတူပြန်လည်တည်ဆောက်ရေး ဆောင်ရွက်နေတယ်လို့လည်း ဗိုလ်ချူပ်မှူးကြီးက  ဆက်လက်ပြောကြားခဲ့ပါတယ်။

သမိုင်းဟူသည်မှာ ဖျောက်ဖျက်၍မရသကဲ့သို့ အတိတ်သမိုင်းကို သင်ခန်းစာရယူပြီး ပိုမိုကောင်းမွန်သည့် ခေတ်စနစ်မျိုးကို လျှောက်လှမ်းကြရမည် ဖြစ်ပါကြောင်း၊ သမိုင်းကိုလည်း အသိအမှတ်ပြုရမည်ဖြစ်တယ်လို့လည်း နစက ဥက္ကဋ္ဌက ပြောပါတယ်။

အဲဒီနောက် သိန္နီဟော်နန်း ပြည်လည်တည်ဆောက်မှု ပူးပေါင်းဆောင်ရွက်ရေးကော်မတီ ဥက္ကဋ္ဌဖြစ်တဲ့ ဒေသခံ ဦးစိုင်းမျိုးညွန့်က သိန္နီမြို့ရှမ်း စာပေနှင့် ယဉ်ကျေးမှုအသင်းအနေဖြင့် ဒေသတွင်းရှိ ရဟန်းရှင်လူ ပြည်သူအပေါင်း၏ ဆန္ဒကိုခံယူပြီး ဒုတိယကမ္ဘာစစ်ကာလအတွင်း ဗုံးဒဏ်ကြောင့် မီးလောင်မြေခခဲ့သည့် ရှေးဟောင်းသမိုင်းဝင် ယဉ်ကျေးမှုအမွေအနှစ်အဆောက်အဦ တစ်ခုဖြစ်သော စော်ဘွားကြီး ခွန်ဆန်တုန်ဟုန်း၏ ဟော်နန်းအား ရှေးမူရင်းလက်ရာမပျက်အသစ်တစ်ဖန်ပြန်လည်တည်ဆောက်နိုင်ရေးအတွက် တပ်မတော်ကို တင်ပြအကူအညီတောင်းခံခဲ့ကြောင်း၊ ယခုဟော်နန်းကြီး၏ မူလအလှူရှင်ဖြစ်သော နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီး မင်းအောင်လှိုင်၏ ဦးဆောင်လမ်းညွှန်မှုဖြင့် နိုင်ငံတော်နှင့် တပ်မတော်မှ ယခုဟော်နန်းကြီးကို ကူညီတည်ဆောက်ပေးခဲ့သည့်အတွက် ဒေသခံ ပြည်သူလူထု အားလုံးကိုယ်စား အထူးကျေးဇူးတင်ဝမ်းမြောက်တယ်လို့ အခမ်းအနားမှာ ကျေးဇူးတင်စကားပြောခဲ့တယ်လို့ သတင်းထုတ်ပြန်ချက်အရသိရပါတယ်။

အဆိုပါ သိန္နီဟော်နန်းကို အေဒီ ၁၉၁၀ ခုနှစ်၊ သက္ကရာဇ် ၁၂၇၂ ခုနှစ်တွင်ဒသဓမ္မရာဇာ နိဂြောဓာ မဟာမင်းခေါင်ဘွဲ့တော်ရ သိန္နီစော်ဘွားကြီး ခွန်ဆန်တုန်ဟုန်းက ကြီးကျယ်ခမ်းနားထည်ဝါသည့် ဟော်နန်းအသစ်ကြီးအဖြစ် တည်ဆောက်

ခဲ့ခြင်းဖြစ်ကြောင်း၊ ကျွန်းသားအစစ်များဖြင့် မန္တလေးနန်းတော်ပုံစံအတိုင်းဆောက်လုပ်ထားပြီး အဆောက်အဦကြီး တစ်ခုထဲတွင် တစ်ခုနှင့် တစ်ခု ဆက်သွယ်ထားသောအဆောက်အဦများစွာ ပါဝင်သည့် ပုံစံဖြစ်ကြောင်း၊ အလယ်တည့်တည့်တွင်ညီလာခံခန်းမကြီးတစ်ခုနှင့် မြေပေါက်ပလ္လင်တော်တစ်ခုလည်း ပါရှိကြောင်း၊ စော်ဘွားကြီးသည် နှလုံးလေဟပ်သည့် ရောဂါဖြင့် နန်းတက်ကာလ ၃၃ နှစ်၊ အေဒီ ၁၉၁၆ ခုနှစ်၊သက္ကရာဇ် ၁၂၇၇ ခုနှစ်၊ တန်ခူးလဆန်း ၂ ရက်၊ အင်္ဂါနေ့ ညသန်းခေါင်ကျော် နံနက် ၁နာရီတွင် နတ်ရွာစံကံတော်ကုန်ခဲ့ကြောင်း၊ အေဒီ ၁၉၃၇ ခုနှစ်၊ သက္ကရာဇ် ၁၂၉၉ခုနှစ်တွင် ဂျပန်လေတပ်များက ရှမ်းပြည်နယ်(မြောက်ပိုင်း) တစ်ခွင်လုံးကို ဗုံးကျဲတိုက်ခိုက်မှုများ ပြုလုပ်ခဲ့ပြီး အေဒီ ၁၉၄၀ ခုနှစ်တွင် သိန်းနီကို ဂျပန်တို့က အပြီးအပိုင်သိမ်းပိုက်ခဲ့ကြောင်း၊ အေဒီ ၁၉၄၄ ခုနှစ်တွင် အမေရိကန် စစ်လေယာဉ်များသည်သိန်းနီ-နမ္မတူ ချောင်းကူးတံတားကို ဗုံးကြဲဖျက်ဆီးခဲ့ပြီး သိန်းနီမြို့ကိုလည်း ဗုံးများကြဲချတိုက်ခိုက်ခဲ့ကြောင်း၊ ထိုသို့ ဗုံးများကြဲချတိုက်ခိုက်ခြင်းကြောင့် ထိခိုက်ပျက်စီးဆုံးရှုံးမှု များစွာ ဖြစ်ပေါ်ခဲ့ပြီး သမိုင်းတွင်ထင်ရှားခဲ့သည့် သိန်းနီစော်ဘွားကြီး ခွန်ဆန်တုန်ဟုန်း၏ ဟော်နန်းကြီးသည်လည်း မြေခပျက်စီးဆုံးရှုံးခဲ့ရတာ ဖြစ်ကြောင်းသိရှိရပါတယ်။

အဲဒီနောက် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ၏လမ်းညွှန်ချက်အရ ၂၀၁၉ ခုနှစ် ဒီဇင်ဘာလ ၅ ရက်နေ့တွင် ဟော်နန်းပြန်လည်တည်ဆောက်ရေးလုပ်ငန်းကို စတင်ဆောင်ရွက်ခဲ့ခြင်းဖြစ်ကြောင်း၊ ဟော်နန်းအဆောက်အဦသစ်ကို မူလအဆောက်အဦဟောင်းမြေနေရာ၏ လက်ဝဲဘက် ၆၃ ပေအကွာ၌ ဆောက်လုပ်ခဲ့ခြင်းဖြစ်ကြောင်းနှင့် ယနေ့တွင် အသစ်ပြန်လည်တည်ဆောက်ပြီးစီးခဲ့သည့် သိန္နီစော်ဘွားကြီး ခွန်ဆန်တုန်ဟုန်း၏ ဟော်နန်းတော်(ဟော်ခမ်းသျှမ်းဝီ)ကို သိန္နီဟော်နန်း ယဉ်ကျေးမှုပြတိုက်အဖြစ် ဖွင့်လှစ်ပွဲအခမ်းအနားအား အောင်မြင်စွာ ကျင်းပပြုလုပ်ခဲ့ခြင်းဖြစ်ကြောင်းသတင်းရရှိပါတယ်။

#ymg/knl

#ဗိုလ်ချူပ်မှူးကြီးမင်းအောင်လှိုင်

#သိန္နီဟော်နန်းယဉ်ကျေးမှုပြတိုက်

#YangonMediaGroup