Published 13 June 2022
(Updated)
ငြိမ်းချမ်းရေးဆွေးနွေးပွဲသို့ ရောက်လာခြင်းမရှိသေးတဲ့ တိုင်းရင်းသားလက်နက်ကိုင်အဖွဲ့အစည်းတွေကို လာရောက်ဆွေးနွေးလိုတဲ့ ဆန္ဒရှိပါက ယခင်ဖိတ်ခေါ်ကမ်းလှမ်းချက်တွေအတိုင်း ထပ်မံဖိတ်ခေါ်နေတယ်လို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်ကပြောပါတယ်။
အဲသလိုဖိတ်ခေါ်ရာမှာ NCA လက်မှတ်ရေးထိုးထားသည့် အဖွဲ့တွေနှင့် ရေးထိုးထားခြင်းမရှိတဲ့ အဖွဲ့တွေ အားလုံးပါဝင်တယ်လို့ ပြောပါတယ်။
ဇွန်လ၁၃ရက် ယနေ့ မနက်ပိုင်းက နေပြည်တော်ရှိ ဘုရင့်နောင်ရိပ်သာတွင် ရခိုင်လွတ်မြောက်ရေးပါတီ ALP ဒုတိယ ဥက္ကဋ္ဌ ဒေါ်စောမြရာဇာလင်း ဦးဆောင်သည့် ငြိမ်းချမ်းရေးကိုယ်စားလှယ်အဖွဲ့နှင့် ငြိမ်းချမ်းရေးဆွေးနွေးရာမှာ ဗိုလ်ချူပ်မှူးကြီးက အဲသလိုပြောကြားခဲ့တာဖြစ်တယ်လို့ နစကရဲ့ သတင်းထုတ်ပြန်ချက်အရသိရှိရပါတယ်။
ယခုငြိမ်းချမ်းရေး ဆွေးနွေးပွဲတွင် တိုင်းပြည်၏ ပကတိအနေအထား နှင့် ကိုက်ညီပြီး ဖြစ်သင့်ဖြစ်ထိုက်သည်များ၊ တိုင်းရင်းသားလက်နက်ကိုင် အဖွဲ့ အစည်းများ၏ တောင်းဆိုချက်များ၊ အမှန်တကယ် ဖြစ်နိုင်ဖွယ်ရှိသည်များ စသည် တို့ကို အသေးစိတ်အကြေအလည်ဆွေးနွေး အဖြေရှာဆောင်ရွက်သွားမည့် အခြေအနေတွေကိုလည်း သူကရှင်းပြခဲ့တယ်လို့ သတင်းထုတ်ပြန်ပါတယ်။
အဲဒီအပြင်ဒီမိုကရေစီနှင့် ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက်ရေးဆိုင်ရာကိစ္စရပ်များ၊ ပါတီစုံဒီမိုကရေစီစနစ်ကို လျှောက်လှမ်းရာတွင် နိုင်ငံရေးအရ သဘောထားကွဲလွဲမှုများရှိမည်ဖြစ်သော်လည်း ငြိမ်းချမ်းသည့် နည်းလမ်း ဖြင့်သာ ဖြေရှင်းဆောင်ရွက်ရန်လိုသည့် အခြေအနေတွေကို ရခိုင်လွတ်မြောက်ရေးပါတီကို နစက ဥက္ကဋ္ဌက ရှင်းပြခဲ့တယ်လို့လည်းသိရပါတယ်။
ရခိုင်ပြည်လွတ်မြောက်ရေးပါတီ ALP ဒုတိယဥက္ကဋ္ဌနှင့်အဖွဲ့ဝင်တွေကလည်း ငြိမ်းချမ်းရေးဆွေးနွေးနိုင်ရန် ဖိတ်ခေါ်ခဲ့သည်ကို ရခိုင် ပြည်လွတ်မြောက်ရေးပါတီ ALP အနေနှင့် ထောက်ခံကြိုဆိုပြီး ရခိုင် ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေး တို့ကို ဆက်လက်ဆောင်ရွက်နိုင်မည့် အခြေအနေတွေ၊ပါတီစုံဒီမိုကရေစီ စနစ်ကျင့်သုံးရေး၊ ဒီမိုကရေစီနှင့် ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက်ရေးနှင့် ပတ်သက်၍ သဘောထား တူညီချက်အမြင်များကို ပြန်လည်ဆွေးနွေးခဲ့ပြီး ဒေသဖွံ့ဖြိုးတိုးတက်ရေးဆိုင်ရာကိစ္စတွေကို တင်ပြခဲ့တယ်လို့လည်း သတင်းမှာဖော်ပြထားပါတယ်။
ယနေ့ငြိမ်းချမ်းရေးတွေ့ဆုံဆွေးနွေးပွဲသို့ နစကဥက္ကဋ္ဌနှင့်အတူ ကောင်စီအဖွဲ့ဝင်များဖြစ်ကြသည့် ဗိုလ်ချုပ်ကြီး မြထွန်းဦး၊ ဒုတိယဗိုလ်ချုပ်ကြီး မိုးမြင့်ထွန်း၊ ဒုတိယဗိုလ်ချုပ်ကြီး ရာပြည့် တို့ တက်ရောက်ကြပြီး ရခိုင်ပြည်လွတ်မြောက်ရေးပါတီ ALP ဒုတိယဥက္ကဋ္ဌနှင့်အတူ ဗဟိုအလုပ်အမှုဆောင်ကော်မတီဝင်များဖြစ်ကြသည့် ခိုင်စိုးမြ နှင့် ခိုင်ပေါ်လင်း တို့ တက်ရောက်ကြတယ်လို့ သိရှိရပါတယ်။
တစ်နိုင်ငံလုံး ထာဝရငြိမ်းချမ်းရေးရရှိရန်နှင့် လက်နက်ကိုင်ပဋိပက္ခချုပ်ငြိမ်းရေးအတွက်ဧပြီ ၂၂ ရက်တွင် ဗိုလ်ချုပ်မှူးကြီး မင်းအောင်လှိုင်က တိုင်းရင်းသားလက်နက်ကိုင်အဖွဲ့အစည်းတွေနှင့် တွေ့ဆုံဆွေးနွေးဖို့ ဖိတ်ခေါ်ခဲ့ပြီးနောက် မေလ(၂၀)ရက်မှစတင်ပြီး တိုင်းရင်းသားလက်နက်ကိုင်အဖွဲ့အစည်းတွေနှင့် တွေ့ဆုံဆွေးနွေးမှုတွေ ဆက်တိုက်ပြုလုပ်ခဲ့တာဖြစ်ပါတယ်။
Published 12 June 2022
တရုတ်ပြည်သူ့လွတ်မြောက်ရေးတပ်မတော်ရဲ့ တောင်ပိုင်းစစ်နယ်ဌာနချုပ်လက်အောက်က ရေတပ်လေကြောင်း တပ်မဟာက ဗုံးကြဲတိုက်လေယာဉ်တွေဟာ စစ်ပွဲအစစ်မှာသုံးတဲ့ စွမ်းရည်အတိုင်း ရေကြောင်းပစ်ခတ်မှုတွေ စစ်ရေးလေ့ကျင့်ခဲ့ကြပါတယ်။
ခဲယမ်းမီးကျောက်တွေ တပ်ဆင်ထားတဲ့ ဗုံးကြဲတိုက်လေယာဉ်တွေဟာ ထွက်ခွာပျံသန်းပြီးနောက် လေထဲမှာ နည်းဗျူဟာမြောက်ဖွဲ့စည်းပျံသန်းမှုပြီးစီးတဲ့နောက်ပစ်မှတ်လေပိုင်နက်ထဲ ဝင်ရောက်ခဲ့ကြပါတယ်။
လေယာဉ်ပစ်အမြောက်တွေကို ရှောင်ရှားဖို့ ဖွဲ့စည်းမှုကို အနိမ့်မှာ ခပ်မြန်မြန်လုပ်ဆောင်ကြပြီးနောက် ပင်လယ်ပြင်ပေါ် အလွန်နိမ့်တဲ့ အမြင့်မှာပျံသန်းပြီး ကိုယ်ပျောက်ထိုးဖောက်မှုကို လေ့ကျင့်ခဲ့ကြပါတယ်။ပင်လယ်ထဲက ပစ်မှတ်နယ်ပယ်ထဲရောက်လာပြီးနောက် လေယာဉ်မှူးတွေဟာ ခပ်မြန်မြန် အမြင့်တက်ပျံသန်းကြပါတယ်။ ရာသီဥတုပြောင်းလဲမှုအရ တိုက်ခိုက်မှုလမ်းကြောင်းကို တည်ဆောက်ပြီး သင့်တော်တဲ့ ဒုံးကျည်ကိုပစ်လွှတ်ကြပါတယ်။ အဲဒီနောက် ကောင်းကင်ကနေ ငိုက်ဆင်းပြီး ပင်လယ်ထဲ ပေါလောပေါ်နေတဲ့ ပစ်မှတ်ကို တိုက်ခိုက်ပါတယ်။
“တကယ့်ပစ်ခတ်တိုက်ခိုက်တဲ့ လေ့ကျင့်မှုမှာ ရာသီဥတုက ရှုပ်ထွေးပြောင်းလဲနေလို့ ပင်လယ်ထဲက ပစ်မှတ်ကို မှတ်သားရတာ ကျွန်တော်တို့အတွက် ခက်ခဲပါတယ်။ ကျွန်တော်တို့ဟာ ဒုံးကျည်အမျိုးမျိုးကို ပစ်လွှတ်ရပါတယ်။ လက်နက်စစ်ဆင်ရေးဟာ ရှုပ်ထွေးပါတယ်။ ရှုပ်ထွေးတဲ့ စစ်မြေပြင်ဝန်းကျင်မှာ ကျွန်တော်တို့ မစ်ရှင်ကို ဆောင်ရွက်နိုင်တဲ့အရည်အချင်း လိုအပ်မှုက မြင့်မားပါတယ်” လို့ လေယာဉ်မှူး ချောင်းလေး ကပြောပါတယ်။
“ ရှုပ်ထွေးတဲ့ မိုးလေဝသရဲ့ အီလက်ထရိုမဂ္ဂနက်တစ်ဝန်းကျင်အောက်မှာ ပင်လယ်တွင်း လက်တွေ့ပစ်ခတ်မှုလေ့ကျင့်ခန်းအတွင်း အနိမ့်ပျံသန်းပြီး ကိုယ်ပျောက်ထိုးဖောက်မှုတွေဆောင်ရွက်ခဲ့ပါတယ် တည်ဆောက်ထားတဲ့ပစ်မှတ်တွေကို လက်နက်အစုံနှင့် အတိအကျတိုက်ခိုက်မှုပြီးစီးခဲ့ပါတယ်။ တကယ့်စစ်ပွဲအဆင့် အင်အားနှင့်အတူ တိုက်ပြီးနိုင်ဖို့ ကျွန်တော်တို့လေယာဉ်မှူးတွေရဲ့မြှင့်တင်ထားပြီးသားစွမ်းရည်တွေနှင့်အတူ စမ်းသပ်ခဲ့ကြပါတယ်” လို့ လေတပ်တပ်မှူး ပိုင်းစိန်း ကပြောပါတယ်။
Source: CCTV+
Published 12 June 2022
ကမ္ဘေဒီးယားက တရုတ်ထံမှ ငွေကြေးအထောက်အပံ့ရယူကာ တည်ဆောက်သည့်အတွက် အဝေဖန်ခံနေရသည့် ရီယမ် ရေတပ်အခြေစိုက်စခန်းသည် တရုတ်တစ်နိုင်ငံတည်း သီးသန့်သုံးဖို့မဟုတ်ကြောင်း ကမ္ဘောဒီးယားက ထပ်မံအတည်ပြု ပြောဆိုခဲ့ပါတယ်။
စင်္ကာပူမှာကျင်းပတဲ့ ရှန်ဂရီလာဒိုင်လော့လုံခြုံရေးကွန်ဖရင့်ရဲ့ မျက်နှာစုံညီအစည်းအဝေးမှာ ကမ္ဘောဒီးယား ကာကွယ်ရေးဝန်ကြီး ဗိုလ်ချူပ်ကြီး တီး ဘန်းက စနေနေ့တုန်းက ပြောကြားခဲ့တာဖြစ်ပါတယ်။ ကမ္ဘောဒီးယားဟာ လွတ်လပ်ပြီး အချုပ်အခြာအဏာပိုင် နိုင်ငံဖြစ်ပြီး ဖွဲ့စည်းပုံအခြေံခဥပဒေအရ မိမိကံကြမ္မာကို မိမိတို့ ဆုံးဖြတ်ခွင့် အပြည့်အဝရှိတယ် လို့လည်း သူကပြောပါတယ်။
“ ကံအကြောင်းမလှစွာပဲ၊ကမ္ဘောဒီးယားဟာ ဒီနေရာကို နိုင်ငံခြားသားတွေ သီးသန့်သုံးခွင့်ပြုတယ်လို့ စွပ်စွဲခံနေရတာပဲ။ ဒီလိုပြောဆိုမှုတွေဟာ အခြေအမြစ်မရှိဘဲ ပြဿနာဖြစ်အောင်စွပ်စွဲတာဖြစ်တယ်။ ကမ္ဘောဒီးယားအာဏာပိုင်နှင့် အစိုးရကို အလုံးစံ စော်ကားခြင်းဖြစ်ကြောင်း အလေးပေးပြောလိုတယ်” လို့ သူက ရှန်ဂရီလာပရိဿတ်ကိုပြောပါတယ်။
“ ကမ္ဘောဒီးယားဟာ ရီယမ်ရေတပ်အခြေစိုက်စခန်းရဲ့ ပိုင်ရှင်ဖြစ်တယ်ဆိုတာကို အသေအချာပြောလိုတယ်။ အခြေစိုက်စခန်း တည်ဆောက်မှုဟာ ဘယ်နိုင်ငံ ဘယ်ဒေသ နီးနီးဝေးဝေး လုံခြုံရေးခြိမ်းခြောက်မှု မရှိဘူး” လို့ ကမ္ဘောဒီးယားဗိုလ်ချုပ်ကြီးက ပြောပါတယ်။
“ ဒီစွပ်စွဲပြောဆိုမှုတွေဟာ ကမ္ဘောဒီးယားရဲ့ အကျိုးစီးပွားကို အနှောက်အယှက်ပေးဖို့ ဆင်ခြေတစ်ခုဖြစ်တယ်လို့ ကျွန်တော်တို့ သတ်မှတ်တယ်” လို့ ဗိုလ်ချူပ်ကြီး တီးဘန်းက ပြောပါတယ်။ သူဟာ ဗီယက်နန်၊ဖိလစ်ပိုင်တို့က ကာကွယ်ရေးဝန်ကြီးတွေနှင့်အတူ စစ်ရေးခေတ်မီစေမှုနှင့် ကာကွယ်ရေးစွမ်းရည်အသစ်များဆိုတဲ့ ခေါင်းစဉ်နှင့် ဆွေးနွေးတဲ့ အစီအစဉ်မှာ ယခုလိုပြောကြားခဲ့တာဖြစ်ပါတယ်။
ထိုင်းပင်လယ်ကွေ့မှာ တည်ဆောက်ထားတဲ့ ကမ္ဘောဒီးယားရဲ့ ရီယမ်ရေတပ်အခြေစိုက်စခန်းဟာ တရုတ်ရေတပ်အတွက် သီးသန့်ဖြစ်တယ်လို့ ဇွန်၆ ရက်နေ့က ဝါရှင်တန်ပို့စ်သတင်းဌာနက ရေးသားဖော်ပြခဲ့တာဖြစ်ပါတယ်။ဒီရေတပ်စခန်းကြောင့် ကမ္ဘောဒီးယားနှင့် အမေရိကန်ပြည်ထောင်စုတို့အကြား ဆက်ဆံရေး မပြေမလည်ဖြစ်နေခဲ့တာကြာပြီဖြစ်ကြောင်း သတင်းကရေးသားပါတယ်။
Source Straits Times
Published 11 June 2022
ဒီကနေ့ယူကရိန်းဟာ မနက်ဖန် အရှေ့အာရှဖြစ်သွားကောင်းဖြစ်သွားနိုင်တယ်လို့ ဂျပန်ဝန်ကြီးချုပ် ဖူမီရိုကီရှီဒါးက လုံခြုံရေး ထိပ်သီးအစည်းအဝေးတစ်ခုမှာ သောကြာနေ့က သတိပေးပြောကြားလိုက်ပါတယ်။ ဒီမိုကရေစီနည်းနှင့် ကိုယ်ပိုင်အုပ်ချုပ်နေတဲ့ထိုင်ဝမ်ကို တရုတ်တို့ ကျူးကျော်လာနိုင်တဲ့ စိတ်ပူပန်မှုတွေကြီးထွားလတဲ့အချိန်မှာ သူက အခုလိုပြောလိုက်တာပါ။ စင်္ကာပူမှာကျင်းပနေတဲ့ ရှန်ဂရီလာဒိုင်လော့ခ်လုံခြုံရေးထိပ်သီးအစည်းအဝေးမှာ ဂျပန်ဝန်ကြီးချုပ်က ပြောကြားခဲ့တာဖြစ်ပါတယ်။ ဂျပန်ဟာ ငြိမ်းချမ်းရေးမြတ်နိုးတဲ့ နိင်ငံဖြစ်တဲ့အတွက် ပြောင်းလဲလာနေတဲ့ ဒေသနှင့်ကမ္ဘာ့လုံခြုံရေးပုံစံတွေက ဂျပန်ရဲ့ ကိုယ်ပိုင်ကာကွယ်ရေးအနေအထားကို ပြန်လည်သုံးသပ်ဖို့ ချက်ခြင်းဖြစ်လာစေခဲ့ တယ်လို့ သူကပြောပါတယ်။
Source: AFP
Published 11 June 2022
အမေရိကန်ပြည်ထောင်စု သမ္မတ ရော်နယ်ရီဂင် လက်အောက်မှာ ဒုလက်ထောက်ကာကွယ်ရေးဝန်ကြီးတာဝန်ထမ်းဆောင်ခဲ့ပြီး ယခု ဂျွန်ဟော့ကင်းစ် တက္ကသိုလ်၊အရှေ့တောင်အာရှ လေ့လာရေးဌာနရဲ့ ဂုဏ်ထူးဆောင်ပါမောက္ခဖြစ်သူ ဒေါက်တာ ကာဒီဂျက်ဆန်ဟာ ယမန်နေ့ ဇွန်၁၀ရက် မနက်က ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးသိန်းစိုးနှင့်တွေ့ဆုံခဲ့ပါတယ်။
ဒေါက်တာကာဒီဂျက်ဆန်နှင့် ရွေး/ကော်ဥက္ကဋ္ဌတို့ တွေ့ဆုံခဲ့တာကို နစက,က သတင်းထုတ်ပြန်ခဲ့တာဖြစ်ပါတယ်။
အဲသလိုတွေ့ဆုံရာမှာ နစကရဲ့ရှေ့လုပ်ငန်းစဉ်(၅)ရပ် ဆောင်ရွက်နေတဲ့အခြေအနေတွေနှင့် ရွေးကောက်ပွဲအတွက် ဆောင်ရွက်နေတဲ့အခြေအနေတွေကို မေးမြန်းခဲ့တယ်လို့ သတင်းမှာဖော်ပြထားပါတယ်။
ပြည်ထောင်စုရွေးကောက်ပွဲကော်မရှင် ဥက္ကဋ္ဌက အချိုးကျကိုယ်စားပြုစနစ်ပြောင်းလဲကျင့်သုံးရေးဆောင်ရွက်နေတာတွေ၊ မဲဆန္ဒရှင်စာရင်းတွေ ပြည့်စုံမှန်ကန်ရေး ဆောင်ရွက်နေတာတွေ၊ရွေးကောက်ပွဲမှာ ပြည်တွင်းပြည်ပ လေ့လာသူတွေကိုဖိတ်ခေါ်သွားမယ့်အကြောင်းအပါအဝင် သိလိုသည်များကို ရှင်းပြခဲ့တယ်လို့ သိရပါတယ်။
တွေ့ဆုံပွဲမှာ ဂုဏ်ထူးဆောင် ပါမောက္ခ ဒေါက်တာ ကာဒီဂျက်ဆန်က ရွေးကောက်ပွဲကော်မရှင်ရဲ့ ဆောင်ရွက်နေတာတွေကို အထင်ကြီးလေးစားမိပြီး နိုင်ငံတကာကသိရှိအောင်သတင်းစကားပါးပေးမယ့်အကြောင်း လိုအပ်တာတွေကူညီမည့် အကြောင်းပြန်လည်ပြောကြားခဲ့တယ်လို့ သတင်းမှာဖော်ပြထားပါတယ်။
ဒေါက်တာကာဒီဂျက်ဆန်ဟာ အမေရိကန်ပြည်ထောင်စု သမ္မတ ရော်နယ်ရီဂင်နှင့် ဂျော့ ဘုရှ်တို့လက်ထက်မှာ အရှေ့အာရှနှင့်ပစိဖိတ်ဆိုင်ရာ ဒုလက်ထောက်ကာကွယ်ရေးဝန်ကြီး၊အမေရိကန်သမ္မတရဲ့ အထူးလက်ထောက်၊ အမျိုးသားလုံခြုံရေးကောင်စီ၊အာရှဆိုင်ရာ အကြီးတန်းညွှန်ကြားရေးမှူး၊ ဒုတိယသမ္မတရဲ့ အမျိုးသားလုံခြုံရေးအကြံပေးအဖြစ်ဆောင်ရွက်ခဲ့သူဖြစ်ကြောင်း ဂျွန်ဟော့ကင်းစ်တက္ကသိုလ်ရဲ့ ဝက်ဘ်ဆိုက်မှာ ဖော်ပြထားပါတယ်။
သို့သော် ပါမောက္ခ ဒေါက်တာကာဒီဂျက်ဆန်ရဲ့ ခရီးဟာ လွတ်လပ်သော ပုဂ္ဂလိကခရီးလား၊ မည်သို့ကိုယ်စားပြုသလဲဆိုတာကိုတော့ သတင်းထုတ်ပြန်ချက်မှာ ရှင်းလင်းစွာဖော်ပြထားခြင်းမရှိပါဘူး။
Published 11 June 2022
ထိုင်ဝမ်က လွတ်လပ်ရေးကြေညာလျှင် ဘေဂျင်းအနေဖြင့် စစ်ပွဲတစ်ခု စတင်ရန် တွေဝေနေမည်မဟုတ်ကြောင်း တရုတ်ကာကွယ်ရေးဝန်ကြီးက အမေရိကန်ကာကွယ်ရေးဝန်ကြီးကို ဇန်၁၀ရက်က သတိပေးလိုက်ပါတယ်။
ဒါဟာ ထိုင်ဝမ်ကျွန်းနှင့်ပတ်သက်လို့ မဟာအင်အားကြီးနှစ်နိုင်ငံအကြား နောက်ဆုံးပြင်းထန်စွာ တိုက်ခိုက်မှု တစ်ခုဖြစ်ပါတယ်။
စင်္ကာပူမှာ ကျင်းပနေတဲ့ ရှန်ဂရီလာဒိုင်လော့ခ်လုံခြုံရေးထိပ်သီးဆွေးနွေးပွဲနှင့်ယှဉ်လျက် တရုတ်ကာကွယ်ရေးဝန်ကြီး ဝေးဖင်ဟဲနှင့် အမေရိကန်ကာကွယ်ရေးဝန်ကြီးလွိုက်အော်စတင်တို့ မျက်နှာချင်းဆိုင်အစည်းအဝေးမှာ တရုတ်က ယခုလို သတိပေးခဲ့တာပါ။
ဒီမိုကရက်တစ်နှင့်ကိုယ်ပိုင်အုပ်ချုပ်တဲ့ ထိုင်ဝမ်နှင့်ပတ်သက်လို့ အမေရိကန်နှင့်တရုတ်တို့ တင်းမာမှုတွေ မြင့်တက်နေပါတယ်။ ဘေဂျင်းက ထိုင်ဝမ်ကျွန်းကို ယင်းရဲ့ပိုင်နက်အဖြစ် သတ်မှတ်ထားပါတယ်။
“ တစ်ဦးဦးက တရုတ်ကနေ ထိုင်ဝမ်ကိုခွဲထုတ်ရဲမယ်ဆိုရင် တရုတ်စစ်တပ်ဟာ ပေးဆပ်မှုဘယ်လောက်ဖြစ်ပါစေ စစ်ပွဲတစ်ပွဲစဖို့ လုံးဝတွေဝေနေမှာ မဟုတ်ဘူး” လို့ အစည်းအဝေးအတွင်း ဝေးက အော်စတင်ကိုသတိပေးခဲ့တယ်လို့ တရုတ် ကာကွယ်ရေးဝန်ကြီးဌာန ပြောရေးဆိုခွင့်ရ ဝူချင်းက ပြောပါတယ်။
ဘေဂျင်းဟာ ဘယ်လို ထိုင်ဝမ်လွတ်လပ်ရေး အကြံအစည်မျိုးမဆို အစိတ်စိတ်အမွှာမွှာဖြစ်အော် ဖြိုခွဲပစ်မှာဖြစ်ပြီး အမိမြေ ပေါင်းစည်မှုကို ခိုင်မာစွာ ထိန်းသိမ်းမှာဖြစ်တယ်လို့ တရုတ်ဝန်ကြီးက သန္နိဋ္ဌာန်ချထားတယ်လို့ တရုတ်ကာကွယ်ရေးဝန်ကြီးဌာနက ပြောပါတယ်။
တရုတ်ဝန်ကြီးက ထိုင်ဝမ်သည် တရုတ်ရဲ့ထိုင်ဝမ်ဖြစ်ပြီး ထိုင်ဝမ်ကိုအသုံးချပြီး တရုတ်ကိုထိန်းချုပ်ခြင်းကို ဘယ်တော့မှ ဖြစ်လာမှာမဟုတ်ဘူးလို့လည်း အလေးပေးပြောခဲ့ပါတယ်။
ထိုင်ဝမ်ရေလက်ကြားတစ်လျောက် ငြိမ်းချမ်းရေးနှင့်တည်ငြိမ်ရေး အရေးကြီးပြီး နေမြဲအခြေအနေကို တစ်ဖက်သတ်ပြောင်းလဲတာ ဆန့်ကျင်ကြောင်းနှင့် တရုတ်အနေနှင့် ထိုင်ဝမ်နှင့်ပတ်သက်လို့ နောက်ထပ်မတည်ငြိမ်မှုဖြစ်စမေယ့် နောက်ထပ်ဆောင်ရွက်မှုမျိုးရှောင်ရှားဖို့ ထပ်လောင်းအတည်ပြုပြောကြားခဲ့တယ်လို့ အမေရိကန်ကာကွယ်ရေးဝန်ကြီးဌာနက ပြောပါတယ်။
Source: AFP
Published 10 June 2022
ကုလသမဂ္ဂလုံခြုံရေးကောင်စီတွင် ဂျပန်နိုင်ငံသည် ၂၀၂၃မှ ၂၀၂၄ အထိ (၂)နှစ်သက်တမ်းအတွက် အလှည့်ကျအဖွဲ့ဝင်နိင်ငံငါးနိုင်ထဲက တစ်နိုင်ငံအဖြစ် ဇွန် ၉ရက်က ရွေးကောက်ခံရတယ်လို့သိရပါတယ်။
ဂျပန်နည်းတူ လာမယ့်သက်တမ်း(၂)နှစ်အတွက် ရွေးကောက်ခံရတဲ့ (၄)နိုင်ငံက ဆွစ်ဇာလန်၊မိုဇမ်ဘစ်၊မော်လ်တာနှင့် အီကွေဒေါတို့ဖြစ်ကြပါတယ်။
အဲဒီ(၅)နိုင်ငံဟာ လက်ရှိ အမြဲတမ်းမဟုတ်သော အလှည့်ကျအဖွဲ့ဝင်နိုင်ငံတွေဖြစ်တဲ့ အိန္ဒိယ၊နော်ဝေး၊ကင်ညာ၊မက္ကဆီကိုနှင့် အိုင်ယာလန်တို့ နေရာ အစားထိုးတာဝန်ယူကြမှာဖြစ်ပါတယ်။
ကုလသမဂ္ဂလုံခြုံရေးကောင်စီမှာ အဖွဲ့ဝင်(၁၅)နိုင်ငံရှိပါတယ်။ အဲဒီအထဲက (၅)နိုင်ငံကတော့ အမြဲတမ်းအဖွဲ့ဝင်နိုင်ငံတွေဖြစ်ကြပြီး အမေရိကန်ပြည်ထောင်စု၊ရုရှား၊တရုတ်၊ပြင်သစ်နှင့်ဗြိတိန်တို့ဖြစ်ကြပါတယ်။
အခြား(၁၀)နေရာကတော့အလှည့်ကျစနစ်နှင့် အခြားနိုင်ငံတွေက တာဝန်ယူကြပါတယ်။နှစ်တိုင်း (၅)နိုင်ငံစီ ပြန်ရွေးကြတာ ဖြစ်ပါတယ်။
ဂျပန်၊ဆွစ်ဇာလန်၊မိုဇမ်ဘစ်၊မော်လ်တာနှင့် အီကွေဒေါတို့ကို ကုလသမဂ္ဂ အထွေထွေညီလာခံကနေ လျို့ဝှက်မဲနှင့် ရွေးချယ်ပေးခဲ့ကြပါတယ်။
၁၉၃နိုင်ငံတက်ရောက်မဲပေးရာမှာ ဂျပန်က ၁၈၄မဲရခဲ့ပါတယ်။
ဂျပန်ရဲ့ ထိပ်တန်းဦးစားပေးကတော့ “ စွမ်းအင်နှင့် စားနပ်ရိက္ခာအပါအဝင် လုံခြုံရေးကိစ္စဖြစ်တယ်” လို့ ဂျပန်ဒုတိယနိုင်ငံခြားရေးဝန်ကြီး အိုဒါဝါယာကီယိုရှီကပြောပါတယ်။
မိုဇမ်ဘစ်ဟာ ကုလလုံခြုံရေးကောင်စီမှာ ပထမဆုံးရွေးချယ်ခံရတာဖြစ်ပြီး ၁၉၂မဲရခဲ့ပါတယ်။
ဆွစ်ဇာလန်က ၁၈၇မဲ၊မော်လ်တာက ၁၈၅မဲနှင့် အီကွေဒေါက ၁၉၀မဲရရှိခဲ့ကြပါတယ်။
Source: AFP
Page 163 of 207
