Published 31 July 2022

အမေရိကန်သမ္မတ ဂျိုးဘိုင်ဒင်ဟာ စနေနေ့ မနက်မှာ ကိုဗစ်-၁၉ စစ်ဆေးရာမှာ ပေါ့စတစ်အဖြေထွက်ခဲ့တယ်လို့ သမ္မတရဲ့ ဆရာဝန် ဒေါက်တာ ကီဗင် အိုကော်နာက စာထုတ်ပြန်ပါတယ်။ ဒီလို ထပ်မံကူးစက်မှုတွေ့ရတာဟာ ပြန်ကန်"rebound" ကူးစက်မှုဖြစ်နိုင်ကာ ပက်လိုဗစ်ဆေးနှင့်ကုသတဲ့ လူနာတွေထဲက  ရာခိုင်နှုန်းအနည်းငယ်ဆီမှာ ဒီလို ပြန်ကန်ကူးစက်မှုမျိုး တွေ့ရတတ်တယ်လို့လည်း ဒေါက်တာကပြောပါတယ်။

ဘိုင်ဒင်ဟာ ရောဂါလက္ခဏာပြန်ပေါ်ပေါက်တာမျိုးမရှိဘဲ နေထိုင်ကောင်းနေတယ်လို့လည်း ဆရာဝန်ကပြောပါတယ်။

ဘိုင်ဒင်ဟာ  ကိုဗစ်ကူးစက်ခံခဲ့ရပြီးနောက် ပြီးခဲ့တဲ့ အင်္ဂါနေ့ညနေပိုင်းက စစ်ဆေးရာ နဂ္ဂတစ်အဖြေထွက်ခဲ့ပြီး နေ့စဉ်ဆက်လက် စစ်ဆေးရာမှာ  ဗုဒ္ဓဟူးနေ့မနက်၊ကြာသပတေးနေ့မနက်နှင့် သောကြာနေ့မနက်တွေမှာလည်း နဂ္ဂတစ် အဖြေပဲထွက်ခဲ့ပါတယ်။ စနေမနက်ထပ်စစ်တော့မှ ပေါ့စတစ်အဖြေ ပြောင်းထွက်ခဲ့တာဖြစ်ပါတယ်။

“ သူနေကောင်းပေမယ့် ပေါ့စတစ်ထွက်ထားလို့ သူ့ကို တင်းကြပ်တဲ့ သီးသန့်ခွဲထားတဲ့ လုပ်ငန်းစဉ်တွေအတိုင်း ပြန်လည် ထားရှိမှာဖြစ်တယ်” လို့ ဒေါက်တာကပြောပါတယ်။

ဗုဒ္ဓဟူးနေ့မှာ ဘိုင်ဒင်ငဟာ နဂ္ဂတစ်အဖြေထွက်ခဲ့ပြီးနောက် သူဟာ သီးသန့်ခွဲနေတာတွေရပ်တန့်ခဲ့ပါတယ်။  အိမ်ဖြူတော် နှင်းဆီဥယျဉ်မှာတောင် သူပြန်လာတဲ့ အထိမ်းအမှတ် လုပ်ခဲ့ပါသေးတယ်။

Source: CNN

#Biden_Covid_Rebound_Infection

#Biden_Covid_positive _again

Published 28 July 2022

ယူကရိန်းစစ်တပ်က ပိုလန်နိုင်ငံလုပ် ခရက်ဘ် ဟောင်ဝစ်ဇာ အမြောက်တွေကို ရုရှားနှင့်စစ်ဖြစ်နေတဲ့ နိုင်ငံအရှေ့ပိုင်း ရှေ့တန်းကို ပေးပို့လိုက်ပါတယ်။

ပိုလန်နိုင်ငံက အဲဒီဟောင်ဝစ်ဇာ အမြောက် ၁၈ လက်ကို လှုဒါန်းခဲ့တာဖြစ်ပြီး တစ်လအကြာမှာ နောက်ထပ် ဟောင်ဝစ်ဇာ အမြောက် အလက်(၆၀)ကို ယူရိုသန်း ၆၅၀နှင့်ရောင်းချမယ်လို့ကြေညာခဲ့ပါတယ်။

ခရက်ဘ်ဟာ self-propelled tracked gun အမျိုးအစား ဟောင်ဝစ်ဇာဖြစ်ပြီး ၁၅၅ မီလီမီတာရှိတဲ့ အမြောက်တပ်ဆင်ထားပါတယ်။

Source: AFP

#Polish-made_howitzers

#Ukraine_war

#Russia_Ukraine_Conflict

Published 28 July 2022

မြောက်ကိုးရီးယားနိုင်ငံသည် ယင်းရဲ့ နျူကလီးယားစစ်အဟန့်အတားတွေကို တိုက်ခိုက်ရန်ပြင်ဆင်ဖို့နှင့် အမေရိကန်ရဲ့ စစ်ရေး ထိပ်တိုက်ဖြစ်မှုကိုတန်ပြန်ဖို့ အဆင်သင့်ဖြစ်နေပြီလို့ ခေါင်းဆောင် ကင်မ်ဂျုန်အမ်က ပြောလိုက်ပါတယ်။

တောင်ကိုးရီးယားသမ္မတအသစ်ကိုလည်း ပထမဆုံးအဖြစ် ဝေဖန်ပြစ်တင်လိုက်ပြီး ဆိုးလ်ဟာ စစ်ပွဲရဲ့နှုတ်ခမ်းဝ ရောက်အောင် တွန်းပို့နေတယ်လို့ သူကပြောလိုက်ပါတယ်။

ဇူလိုင်၂၇ရက်နေ့ ကိုးရီးယားစစ်ပွဲ ရပ်စဲမှု ၆၉နှစ်ပြည့် အခမ်းအနားမှာ ကင်မ်က မိန့်ခွန်းပြောကြားရာမှာ ယခုလိုပြောခဲ့တာ ဖြစ်ပါတယ်။  ကိုးရီးယားစစ်ပွဲရပ်စဲခဲ့ပေမယ့် နည်းပညာသဘောအရ စစ်ကဆက်လက်ဖြစ်နေတာပါ။

၁၉၅၀-၅၃ စစ်ပွဲကတည်းက အမေရိကန်ပြည်ထောင်စုနှင့် ထိပ်တိုက်တွေ့ခဲ့ပြီး မြောက်ကိုးရီးယားအဖို့ အရေးတကြီး သမိုင်းပေးတာဝန်တစ်ခုပေါက်မြောက်ဖို့လိုအပ်လာတဲ့အတွက်  ကိုယ်ပိုင်ကာကွယ်ရေးကို တိုးမြှင့်လုပ်ဆောင်ခဲ့ရတယ်လို့ ကင်မ်ကပြောပါတယ်။

“ ကျွန်တော်တို့တပ်တွေဟာ ဘယ်လိုအကျပ်အတည်းမဆို တုန့်ပြန်ဖို့ ပြင်ဆင်ထားရှိပြီးဖြစ်တယ်။  ကျွန်တော်တို့နိုင်ငံရဲ့ နျူကလီးယားအဟန့်အတားအစီအမံတွေဟာ ယင်းရဲ့မစ်ရှင်ကိုအတိအကျချက်ခြင်းလုပ်ဆောင်နိုင်အောင်  စစ်ပြင်ဆင်ဖို့ အပြည့်အဝအဆင်သင့်ဖြစ်နေပြီ” လို့ သူကပြောပါတယ်။

ပထမဆုံးနျူကလီးယားစမ်းသပ်မှုပြုလုပ်ဖို့ ဆိုးလ်နှင့် ဝါရှင်တန်တို့ဟာ ပြင်ဆင်မှုတွေကို ၂၀၁၇ခုနှစ်ကတည်းက ပြီးစီးနေပြီး ဖြစ်တယ်လို့  တောင်ကိုးရီးယားနှင့် အမေရိကန်အရာရှိတွေက ပြောဆိုပြီးနောက် မြောက်ကိုးရီးယာခေါင်းဆောင်ကင်မ်က ယခုလိုပြောကြားလာတာဖြစ်ပါတယ်။

နျူကလီးယာစမ်းသပ်မှုကို စစ်ရပ်စဲရေးနှစ်ပတ်လည်နေ့ ဝန်းကျင်မှာပြုလုပ်နိုင်တယ်လို့ တောင်ကိုးရီးယား ပြန်လည်ပေါင်းစည်းရေးဝန်ကြီးက အင်္ဂါနေ့တုန်းကပြောထားပါတယ်။ ဒါပေမယ့် စစ်အရာရှိကြီးတွေကတော့ လတ်တလောမှာ အဲဒီအရိပ်လက္ခဏာမတွေ့ရသေးဘူးလို့ဆိုပါတယ်။

တကယ်လို့ မြောက်ကိုးရီးယားက နျူကလီးယားစမ်းသပ်မှုလုပ်လာရင် ဆိုက်ဘာတိုက်ခိုက်မှုအစီအမံတွေအပါအဝင် အခြားသော ပြင်းထန်တဲ့ ပိတ်ဆို့အရေးယူမှုတွေ နှင့်ရင်ဆိုင်ရဖွယ်ရှိတယ်လို့ တောင်ကိုရီးယား ဝန်ကြီးက ပြောထားပါတယ်။

အမေရိကန်နိုင်ငံဟာ စစ်ရေးလှုပ်ရှားမှုတွေအပေါ် စံနှုန်းနှစ်ခုထားနေတယ်လို့ မြောက်ကိုးရီးယားက နှစ်ရှည်လများ ဝေဖန်နေခဲ့ပါတယ်။

“ ကျွန်တော်တို့တပ်တွေရဲ့ ပုံမှန်ဆောင်ရွက်မှုတွေကို ရန်လိုတာ ခြိမ်းခြောက်တာအဖြစ် အမေရိကန်က အထင်အမြင်မှား‌ေ အာင်လုပ်နေပြီး အဲဒီအချိန်မှာပဲ ကျွန်တော်တို့ရဲ့လုံခြုံရေးကို အကီဲးအကျယ်ခြိမ်းခြောက်တဲ့ ကြီးမားတဲ့ စစ်ရေးလေ့ကျင့်မှုတွေကို သူကလုပ်ပြနေတယ်။ ဒါဟာ တကယ့်ကို ဓားပြတိုက်မှုတစ်ခုပဲ” လို့ ကင်မ်က ပြောပါတယ်။

Source: Reuters

#North_Korea

#Nuclear_war_deterrent_ready

#North_South_Korea_US

Published:28 July 2022

ရီပတ်ဘလီကင်နှင့်ဒီမိုကရက်ပါတီ အရာရှိဟောင်းတွေက အမေရိကန်နိုင်ငံရဲ့ နိုင်ငံအဆင့် တတိယမြောက် နိုင်ငံရေးပါတီ တစ်ခုကို ဗုဒ္ဓဟူးနေ့က တည်ထောင်လိုက်ကြကြောင်း ကြေညာလိုက်ပါတယ်။ အမေရိကန်နိင်ငံမှာ လုပ်ဆောင်မှု  ချိုယွင်းနေတဲ့ နှစ်ပါတီစနစ်လို့ သူတို့ကမြင်ထားကြတဲ့ လက်ရှိနိုင်ငံရေးစနစ်အပေါ် တုန်လှုပ် ချောက်ခြားနေကြတဲ့ သန်းပေါင်းများစွာသော မဲဆန္ဒရှင်တွေရဲ့ စိတ်ကို ဆွဲဆောင်နိုင်စေဖို့ဖြစ်ပါတယ်လို့ဆိုပါတယ်။

ပါတီအသစ်ကို  Forward ဖော်ဝတ်ဒ်(ရှေ့သို့)လို့ အမည်ပေးလိုက်ပြီး  ဒီမိုကရက်ပါတီသမ္မတလောင်းဟောင်း အင်ဒရူးယန်းနှင့် ရီပတ်ဘလီကင်ပါတီ နယူးဂျာစီအုပ်ချုပ်ရေးမှူးဟောင်း ခရစ်စတင်း တော့ဒ်ဝှိုက်မင်းတို့က ပူးတွဲ ဥက္ကဋ္ဌအဖြစ် ဦးဆောင်ကြမှာ ဖြစ်ပါတယ်။ သူတို့ရဲ့ပါတီအသစ်ဟာ အမေရိကန်နိုင်ငံရေးမှာ မင်းမူကြီးစိုးနေကြတဲ့ ရီပတ်ဘလီကင်နှင့် ဒီမိုကရက်တစ်ပါတီတွေအစား အခြား ကျေနပ်စရာရွေးချယ်မှုတစ်ခုဖြစ်လာလိမ့်မယ်လို့ ယုံကြည်ထားတယ်လို့ တည်ထောင်သူတွေက ရိုက်တာသတင်းဌာနကို ပြောပါတယ်။

ပါတီခေါင်းဆောင်တွေဟာ ဒီနှစ်ဆောင်းဦးရာသီမှာ မြို့ပေါင်း နှစ်ဒါဇင်ကို သွားရောက်ပြီး ပါတီဖွင့်လှစ်တဲ့ အခမ်းအနားတွေ ဆက်တိုက်ပြုလုပ်သွားပြီး ထောက်ခံသူတွေကို ဆွဲဆောင်သွားမယ်လို့ သိရပါတယ်။ စက်တင်ဘာ ၂၄ရက်နေ့မှာ သူတို့ဟာ ဟောက်စတန်မှာ ပါတီကို တရားဝင်တည်ထောင်ခြင်းအခမ်းအနားပြုလုပ်သွားမှာဖြစ်ပြီး  လာမယ့်နွေရာသီမှာတော့ အမေရိကန်ရဲ့ မြို့ကြီးတစ်မြို့မှာ ပါတီရဲ့ အမျိုးသား ကွန်ဗင်းရှင်းကြီးကို ကျင်းပသွားပါလိမ့်မယ်။

အမေရိကန်နိုင်ငံရေးစနစ်မှာ နှစ်ခြမ်းကွဲပြီး ဝိရောဓိဖြစ်မှုတွေ တိုးပွားလာနေတဲ့အပေါ် တုန့်ပြန်မှုတွေ ပြီးခဲ့တဲ့ နှစ်တွေမှာ ပေါ်ပေါက်လာခဲ့တဲ့ နိုင်ငံရေးအုပ်စု(၃)စုနှင့် ပါတီအသစ်ကို ဖွဲ့စည်းတည်ထောင်ထားတာဖြစ်ပါတယ်။ ပြီးခဲ့တဲ့နှစ်က Gallup စစ်တမ်းအရ အမေရိကန်နိုင်ငံမှာ တတိယနိုင်ငံရေးပါတီတစ်ခု လိုအပ်တယ်လို့ အမေရိကန်ပြည်သူတွေရဲ့ သုံးပုံနှစ်ပုံက ယုံကြည်နေတယ်လို့ ပြဆိုခဲ့ပါတယ်။

အမေရိကန် သမ္မတဟောင်းတွေဖြစ်တဲ့ ရော်နယ်ရီဂင်၊ဂျော့အိတ်ချ်ဒဗလျူဘုရှ်၊ ဂျော့ ဒဗလျူဘုရှ်နှင့်ဒေါ်နယ်ထရမ့်တို့ အစိုးရ လက်ထက်က အရာရှိဟောင်းတွေစုစည်းထားပြီး ၂၀၂၁ မှာ ဖွဲ့စည်းခဲ့တဲ့ Renew America Movement အမေရိကန်ပြန်လည် ဆန်းသစ်ခြင်းလှုပ်ရှားမှု ၊ ၂၀၂၁ခုနှစ်မှာ ဒီမိုကရက်တစ်ပါတီကထွက်ခဲ့ပြီး တစ်သီးပုဂ္ဂလကဖြစ်ခဲ့တဲ့ အင်ဒရူး ယန်းတည်ထောင်တဲ့ ဖော်ဝတ်ဒ်ပါတီနှင့် ဒီမိုကရက်၊ရီပတ်ဘလီကင်နှင့် တသီးပုဂ္ဂလတွေပူးပေါင်းထားပြီး ရီပတ်ဘလီကင်ကွန်ဂရက်အမတ်ဟောင်း ဒေးဗစ်ဂျိုလီအမှုဆောင်ဒါရိုက်တာလုပ်တဲ့ Serve America Movement တို့က ယခုပါတီသစ်ပေါင်းစပ်ဖွဲ့စည်းမှုနှင့် ဆက်နွယ်ပတ်သက်နေပါတယ်။

ပါတီအသစ်ကို  ထောက်တိုင်နှစ်ခုနှင့်ဖွဲ့စည်းထားပြီး အဲဒီနှစ်ခုက မျှတပြီးကြီးပွားတိုးတက်တဲ့စီးပွားရေးတစ်ရပ်ကို ပြန်လည် သန်စွမ်းစေရန်နှင့် အမေရိကန်ပြည်သူတွေကို ရွေးကောက်ပွဲမှာ ရွေးချယ်မှုပိုမိုပေးပြီး အလုပ်ဖြစ်သော အစိုးရတစ်ရပ်တွင် ပိုမိုယုံကြည်မှုရှိကာ အနာဂတ်တွင်ပိုမိုပြောဆိုနိုင်ရန် တို့ဖြစ်ပါတယ်။

မျှတတဲ့ နိုင်ငံရေးအမြင် centrist ရှိတဲ့ပါတီအဖြစ် တည်ထောင်လိုက်တဲ့ ယခုပါတီအသစ်မှာ တိကျတဲ့မူဝါဒတွေကိုတော့ မထုတ်ပြန်သေးပါဘူး။ “ အမေရိကန်ရင်ဆိုင်နေရတဲ့ ပြဿနာကြီးတွေကို ဘယ်လိုဖြေရှင်းကြမလဲ၊ ဘယ်ဘက်မဟုတ်၊ညာဘက်မဟုတ်၊ ရှေ့သို့နှင့် သာဖြစ်တယ်” လို့ သူတို့ကပြောကြပါတယ်။

သမိုင်းအရ နှစ်ပါတီစနစ် အမေရိကန်ပြည်ထောင်စုမှာ တတိယပါတီတစ်ခုဟာ ရှင်သန်လေ့မရှိကြပါဘူး။ သူတို့ဟာ သမ္မတ ရွေးကောက်ပွဲကိုတော့ ထိခိုက်မှုဖြစ်စတေတ်ပါတယ်။၂၀၀၀ပြည့်နှစ်ရွေးကောက်ပွဲမှာ  ရပ်ဗ်နေဒါရဲ့ ဂရင်းပါတီက ဒီမိုကရက်တစ်သမ္မတလောင်း အယ်ဂိုးရဲ့ မဲတွေကို ခွဲထုတ်ယူပြီး  ရီပတ်ဘလီကင် သမ္မတလောင်း ဂျော့ဒဗလျူဘုရှ် အနိုင်ရသွားစေခဲ့တာမျိုးရှိခဲ့တယ်လို့ သုံးသပ်သူတွေကပြောပါတယ်။

ပါတီအသစ်ဖြစ်တဲ့ ဖော်ဝတ်ဒ်ပါတီဟာ ဘက်တွေကွဲပြားနေကြတဲ့ အမေရိကန်နိုင်ငံမှာ ရွေးကောက်ပွဲအပေါ် ဘယ်လို အကျိုးသက်ရောက်မှုရှိမလဲဆိုတာ သိပ်ရှင်းရှင်းလင်းလင်းမသိနိုင်သေးပေမယ့် အောင်မြင်မှုရဖို့အတွက်တော့ နိုင်ငံရေးသုံးသပ်သူတွေက သံသယရှိနေကြပါတယ်။

အင်တာဗျူတစ်ခုမှာ ပါတီဟာ ဘတ်ဂျက် ဒေါ်လာာ ငါးသန်းနှင့် စတင်မယ်လို့ ယန်းက ပြောထားပါတယ်။  အလှုရှင်တွေ တန်းစီနေပြီး အုပ်စုသုံးစုရဲ့ အောက်ခြေအဖွဲ့ဝင်တွေပေါင်းရင် ထောင်သောင်းမက ရှိနေတယ်လို့လည်း သူကပြောပါတယ်။

“ ကျွန်တော်တို့ ငွေကြေးဘဏ္ဍာတောင့်တင်းစွာနှင့်စတင်မှာပါ။ ငွေကြေးအထောက်အပံ့က ပြဿနာမရှိဘူး” လို့ ယန်းက ပြောပါတယ်။

“ စိတ်ကူးကတော့ မဲဆန္ဒရှင်တွေကို သန်စွမ်းပြီး ယုံကြည်စိတ်ချရတဲ့ နိုင်ငံအဆင့် တတိယမြောက်ပါတီတစ်ခု ပေးအပ်ဖို့ပဲ ဖြစ်တယ်” လို့ ဖော်ဝတ်ဒ်ဖန်တီးရာမှာပါဝင်ခဲ့တဲ့ ထရမ့်အစိုးရလက်ထက်က အမိမြေလုံခြုံရေးအရာရှိဟောင်းတစ်ဦးဖြစ်တဲ့ မိုင်းလ်စ်တေလာ ကပြောပါတယ်။

တတိယပါတီတွေဟာ အတိတ်တုန်းက ကျရှုံးခဲ့တာတွေရှိခဲ့ပေမယ့် အခြေခံတွေက ပြောင်းလဲသွားပြီလို့ တေလာကပြောပါတယ်။ အတိတ်တုန်းက တတိယပါတီလှုပ်ရှားမှုတွေဟာ ပြည်သူတွေ အပြောင်းအလဲမတောင်းဆိုတဲ့ စနစ်တစ်ခုအတွင်းပေါ်ပေါက်ခဲ့တာဖြစ်ပြီး ယခုအချိန်မှာတော့ အမေရိကန်တွေက တတိယပါတီလိုချင်တယ်လို့ ပြောနေကြတာဖြစ်တယ်လို့လည်း သူကပြောပါတယ်။

ပါတီစွဲမရှိတဲ့ ဝါရင့် နိုင်ငံရေးသုံးသပ်သူ စတု ရိုသန်ဘတ်ကတော့ တတိယပါတီတည်ထောင်တယ်ဆိုတာာ အပြောလွယ်သလောက် လက်တွေ့ခက်တယ်လို့ ဝေဖန်ပါတယ်။

ပါတီကြီးနှစ်ခုမှာ ကြီးမားတဲ့ အားသာချက်တွေရှိနေကြတယ်။ ဆယ်စုနှစ်များစွာမှာ ပြည်နယ်၅၀မှာပါတီတွေ တည်ဆောက်နိုင်ခဲ့တာတွေအပါအဝင်ပေါ့ လို့ သူကပြောပါတယ်။

၁၉၈၀တုန်းက ဂျွန်အင်ဒါဆန်၊ ၁၉၉၂ နှင့် ၁၉၉၆ တုန်းက ရောပစ်ပါရော့တို့လို တတိယပါတီရဲ့ သမ္မတလောင်းတွေဟာ မှေးမှိန်သွားရတာပဲ၊ အမျိုးသားနိုင်ငံရေးမှာ အဆင့်ပြကိန်းတစ်ခုဖြစ်လာမယ့် တတိယပါတီတွေတည်ထောင်တာ ကျရှုံး ခဲ့ကြတယ် လို့ သူကပြောပါတယ်။

Source_Reuters

#Third_Political_party-in_America

#Forward_party

#Andrew_Yang

Published: 27 July 2022

အင်ဒိုနီးရှားသမ္မတ ဂျိုကို ဝီဒိုဒိုနှင့် ဘေဂျင်းမှာ အင်္ဂါနေ့က တွေ့ဆုံစဉ် တရုတ်သမ္မတရှီကျင့်ဖျင်က ဂျာကာတာနှင့် ဘန်ဒေါင်းအကြား မြန်နှုန်းမြင့် ရထာလမ်းစီမံကိန်းအပါအဝင် နှစ်နိုင်ငံပူးပေါင်းဆောင်ရွက်ရေး စီမံကိန်းတွေဟာ အဆင်ပြေ ချောမွေ့စွာတိုးတက်နေတယ်လို့ယုံကြည်ကြောင်းပြောကြားခဲ့ရာ ဝီဒိုဒိုကလည်း မြန်နှုန်းမြင့် ရထားလမ်းစီမံကိန်းဟာ နှစ်နိုင်ငံချစ်ကြည်ရေးမှာ နောက်ထပ် မှတ်တိုင်တစ်ခုဖြစ်တယ်လို့ သုံးနှုံးပြန်ကြားခဲ့ပါတယ်။

တရုတ်ရဲ့ ရပ်ဝန်းတစ်ခု လမ်းကြောင်းတစ်သွယ်စီံမံကိန်းတစ်ခုအဖြစ် ဒီလစောစောပိုင်းမှာ ဂျာကာတာ-ဘန်ဒေါင်း မြန်နှုန်းမြင့် ရထားလမ်း စီမံကိန်းအတွက် အဓိကလိုင်းပိုင်းမှာ အောက်ခြေသံလမ်းတွေ စတင်ခင်းရင်းစတင်ခဲ့ကြပါတယ်။ဒါဟာ တရုတ်နှင့် အင်ဒိုနီးရှားအကြား အပြုသဘောဆောင်တဲ့ ပူးပေါင်းဆောင်ရွက်မှုဖြစ်တယ်လို့ CGTNကရေးသားပါတယ်။

တရုတ်နည်းပညာနှင့်တည်ဆောက်မယ့် အဲဒီရထားလမ်းမှာ ရထားတွေကိုတစ်နာရီ ၃၅၀ ကီလိုမီတာ အမြန်နှုန်း  မောင်းနှင်  နိုင်အောင် ဒီဇိုင်းလုပ်ထားပါတယ်။ အဲဒါကြောင့် ဂျာကာတာနှင့် အင်ဒိုနီးရှားရဲ့ စတုတ္ထအကြီးဆုံး မြို့တစ်မြို့ ဖြစ်တဲ့  ဘန်ဒေါင်းအကြား သုံးနာရီကြာရထားခရီးကနေ မိနစ်၄၀ပဲ ကြာတော့မှာဖြစ်ပါတယ်။

“ တရုတ်နှင့် အင်ဒိုနီးရှားတို့ဟာ တူညီတဲ့ ဖွံ့ဖြိုးတိုးတက်မှုအဆင့်တွေရှိကြတယ်။ ပြီးတော့ ရစ်ပတ်ယှက်နွယ်ထားတဲ့ အကျိုး စီးပွားတွေလည်း ရှိကြတယ်။တူညီတဲ့အတွေးအခေါ်နှင့် ဖွံဖြိုးတိုတက်ရေးလမ်းကြောင်းနောက်လိုက်ပါရင်း နီးကပ်ချိတ်ဆက်  တဲ့ အနာဂတ်ကို အတူခံစားကြမယ်” လို့ သမ္မတရှီကပြောပါတယ်။ တရုတ်-အင်ဒိုနီးရှား လူ့အဖွဲ့အစည်းကို မျှဝေခံစားတဲ့ အနာဝတ်နှင့်အတူတွဲရှိကြခြင်းဟာ နှစ်နိုင်ငံပြည်သူတွေအတွက် တူညီတဲ့ ရည်မှန်းဆန္ဒတွေနှင့်‌ မျှော်လင့်ချက်တွေ ဖြစ်ကြ တယ်”လို့ ရှီက ဖြည့်စွက်ပြောပါတယ်။

ဝီဒိုဒိုဟာ တရုတ်နိုင်ငံ ဘေဂျင်းဆောင်းရာသီအိုလံပစ်နောက်ပိုင်း တရုတ်နိုင်ငံကို ပထမဆုံးလာရောက်တဲ့ နိုင်ငံခြားတိုင်းပြည် တစ်ခုက နိုင်ငံခေါင်းဆောင်တစ်ဦးဖြစ်ပါတယ်။ ဝီဒိုဒိုအတွက် အရှေ့အာရှခရီးစဉ်ရဲ့ ပထမဆုံးခရီးတစ်ထောက်လည်း ဖြစ်ပါတယ်။

တရုတ်ဟာ အင်ဒိုနီးရှားရဲ့ အကြီးဆုံးကုန်သွယ်ဖက်အဖြစ် ၂၀၂၁ခုနှစ်မှာ ဆက်လည်တည်ရှိနေပြီး နှစ်နိုင်ငံအကြား ကုန်သွယ်မှု တန်ဖိုးဟာ အမေရိကန်ဒေါ်လာ ၁၂၄.၃ ဘီလျံရှိနေပါတယ်။ကုန်သွယ်မှုဟာ နှစ်စဉ်တိုးတက်မှု ၅၈.၄ ရာခိုင်နှုန်းရှိနေပါတယ်။

#Source CGTN

#China_Indonesia

#Indonesia_Prsident_Visits_China

#Xi_ Widodo

Published 25 July 2022

ဒရိုပါဒီ မာမူဟာ အိန္ဒိယနိုင်ငံရဲ့ သမ္မတအဖြစ် တနင်္လာနေ့က ကျမ်းသစ္စာကျိန်ဆိုခဲ့ပါတယ်။ မာမူဟာ အိန္ဒိယနိုင်ငံရဲ့ ဘေးဖယ်ခံထားရတဲ့ လူမျိုးစုနွယ်တွေထဲမှာ ပထမဆုံး နိုင်ငံခေါင်းဆောင်ဖြစ်လာသူတစ်ဦးပါ။

ကျောင်းဆရာမဟောင်းနှင့် ပြည်နယ်အုပ်ချုပ်ရေးမှူးဟောင်းတစ်ဦးဖြစ်တဲ့ မာမူဟာ အိန္ဒိယပါလီမန်နှင့်ပြည်နယ်လွှတ်တော်တွေရဲ့ ၆၄ ရာခိုင်နှုန်းထောက်ခံမဲနှင့် အိန္ဒိယရဲ့ အဆောင်အယောင် သမ္မတရာထူးကို ရရှိခဲ့တာဖြစ်ပါတယ်။

ဆန်သာ မျိုးနွယ်စုက လာတဲ့မာမူဟာ အိန္ဒိယနိုင်ငံ ဩရိသပြည်နယ်မှာ မွေးဖွားခဲ့ပါတယ်။ သူမဟာ ကျမ်းသစ္စာမကျိန်ဆိုခင်မှာ အိန္ဒိယလွတ်လပ်ရေးသူရဲကောင်း မဟတ္တမ ဂန္ဒီကို ရည်စူးထားတဲ့ အမှတ်တရနေရာ သွားရောက်ပြီး အလေးပြုခဲ့ပါတယ်။

မျိးနွယ်စုရွာကလေးတစ်ရွာကနေ ကျွန်မရဲ့ဘဝခရီးကိုစတင်ခဲ့ပါတယ် လို့ အသက် ၆၄နှစ်အရွယ်ရှိပြီဖြစ်တဲ့ မာမူက ပါလီမန်မှာ ကျမ်းသစ္စာကျိန်ပြီးတဲ့နောက်  ပြောပါတယ်။

“ကျွန်မလာခဲ့တဲ့ နောက်ခံကိုကြည့်ရင် ကျွန်မလိုလူမျိုးအတွက် မူလတန်းစာသင်ဖို့တောင် အိပ်မက်တစ်ခုပါ” လို့လည်း သူမက ပြောပါတယ်။

“ ဒါပေမယ့် အခက်အခဲအတားအဆီးတွေကြားထဲကပဲ ကျွန်မရဲ့ ဆုံးဖြတ်ချက်ဟာ ခိုင်မာလျက်ရှိတယ်။ ကျွန်မဟာ ရွာကနေ ကောလိပ်တက်တဲ့ ပထမဆုံးသမီးတစ်ယောက်ဖြစ်လာခဲ့တယ်” လို့ မာမူကပြောပါတယ်။

မာမူရဲ့အနိုင်ရမှုဟာ သေချာခဲ့တဲ့ကိစ္စပါ။ ဘာဖြစ်လို့လဲဆိုတော့ အာဏာရပါတီ ဘာရာတီရာ ဂျန်နာတာနှင့် ယင်းရဲ့ မဟာမိတ်ပါတီတွေရဲ့အင်အားကြောင့်ဖြစ်ပါတယ်။

မာမူ သမ္မတဖြစ်လာခြင်းဟာ ၂၀၂၄ ရွေးကောက်ပွဲမှာ ဝန်ကြီးချုပ် နာရင်ဒရာမိုဒီ ပြန်အရွေးခံရဖို့ သူ့ရဲ့ ဆင်းရဲသား မျိုးနွယ်စုအခြေခံအင်အားတွေ ချဲ့ထွင်ပေးလိုက်သလိုဖြစ်သွားပါတယ်လို့ သုံးသပ်သူတွေကဆိုပါတယ်။

“ သူမ  သမ္မတဖြစ်လာတာဟာ အိန္ဒိယ အထူးသဖြင့် ဆင်းရဲသားတွေ၊အပယ်ခံတွေနှင့် နင်းပြားတွေ အတွက် အရေးပါတဲ့ အခိုက်အတန့်တစ်ခုဖြစ်တယ်” လို့ မာမူရဲ့မိန့်ခွန်းအပြီးမှာ ဝန်ကြီးချုပ်မိုဒီက တွစ်တာမှာပို့စ်တင်ပါတယ်။

သူမရွေးကောက်ခံရတာဟာ အိန္ဒိယရဲ့လက်ရှိဖွံ့ဖြိုးတိုးတက်မှုရဲ့ နောက်မှာကျန်ရစ်ခဲ့ရသူတွေကို မျှော်လင့်ချက်တွေ ဖြစ်စေတယ် လို့ မာမူက ပြောပါတယ်။

“ ရာစုနှစ်များစွာ ချို့တဲ့နွမ်းပါးခဲ့ရသူတွေအတွက်  ဖွံ့ဖြိုတိုးတက်မှုရဲ့အကျိုးခံစားခွင့်တွေနှင့် ဝေးနေရသူတွေဟာ ကျွန်မအပေါ် အလေးအနက်ထားရှိကြတာကို  ကျွန်မ အထူးပဲ နှစ်ထောင်းအားရဖြစ်ပါတယ်” လို့ သူမကပြောပါတယ်။

အိန္ဒိယနိုင်ငံမှာ ဝန်ကြီးချုပ်ဟာ အုပ်ချုပ်ရေးအာဏာကို စွဲကိုင်ထားပါတယ်။ ဒါပေမယ့် အချို့သောပါလီမန်ဥပဒေကြမ်းတွေကို သမ္မတအနေနှင့် ပါလီမန်ကိုပြန်ပို့နိုင်ပါတယ်။အဲဒီ့အပြင် အစိုးရဖွဲ့စည်းတဲ့ လုပ်ငန်းစဉ်မှာလည်း ကွပ်ကဲကြီးကြပ်သူအဖြစ် ပါဝင်ရပါတယ်။

မာမူဟာ အိန္ဒိယနိုင်ငံမှာ ၂၀၀၇ခုနှစ်ကနေ ငါးနှစ်တာဝန်ယူခဲ့တဲ့ သမ္မတ ပရက်တီဘာပက်တီလ် ပြီးရင် ဒုတိယမြောက် အမျိုးသမီး သမ္မတတစ်ဦးဖြစ်ပါတယ်။

မာမူဟာ  ဟိန္ဒိူဇာတ်ခွဲခြားမှုစနစ်အခြေခံတဲ့ ဒါလစ်လူ့အဖွဲ့အစည်းရဲ့ ဒုတိယမြောက်သမ္မတဖြစ်သူ ရမ်နတ်ကိုဗင်းရဲ့ အရိုက်အရာ ကို ဆက်ခံသူဖြစ်ပါတယ်။

#Source_AFP

#India’s_First_Tribal_President

#Droupadi_Murmu

#India_Politics