Published 1 August 2022

နိုင်ငံတကာ ရာဇဝတ်တရားရုံး ICC (အိုင်စီစီ)ကို ဖိလစ်ပိုင်အနေနှင့် ပြန်ဆက်သွယ်ဖို့ အစီအစဉ် မရှိဘူးလို့ ဖိလစ်ပိုင်သမ္မတ ဖာဒီနန် မားကို့စ် ဂျုနီယာက တနင်္လာနေ့မှာ ပြောလိုက်ပါတယ်။  ကြောက်မက်ဖွယ် မူးယစ်စစ်ပွဲအတွက် သမ္မတဟောင်းအပေါ် စုံစမ်းစစ်ဆေးမှုတစ်ခုကို တရားလိုရှေ့နေတွေက ပြန်လည်စတင်ဖို့ ကြံဆနေကြချိန်မှာ သမ္မတရဲ့ သဘောထား ထွက်ပေါ်လာတာဖြစ်ပါတယ်။

“ ဖိလစ်ပိုင်အနေနှင့် အိုင်စီစီကို ပြန်ဆက်သွယ်ဖို့ ရည်ရွယ်ချက်မရှိဘူး” လို့  စုံစမ်းစစ်ဆေးမှုတွေကို သူပူးပေါင်းမှာ မဟုတ်တဲ့အကြောင်း ယခင်ကတည်းက အရိပ်အယောင်ပြပြောဆိုခဲ့ဖူးတဲ့ သမ္မတမားကို့စ်ဂျူနီယာ က သတင်းထောက်တွေကို ပြောခဲ့တာပါ။

Source AFP

#Philippines_ICC_Probe

#Drug_War_Philippines

#Ferdinand_Marcos_Jr

Published 1 August 2022

ငြိမ်းချမ်းရေးအတွက် တံခါးကျယ်ကျယ်ဖွင့်ထားတယ်လို့ နစက ဥက္ကဋ္ဌလည်းဖြစ်၊ တပ်မတော် ကာကွယ်ရေးဦးစီးချုပ်လည်းဖြစ်တဲ့ ဗိုလ်ချူပ်မှူးကြီးမင်းအောင်လှိုင်က တိုင်းရင်းသားလက်နက်ကိုင်အဖွဲ့အစည်းတွေကို ဖိတ်ခေါ်လိုက်ပါတယ်။

နစက ၁၈လတာကာလ တာဝန်ထမ်းဆောင်ခြင်းဆိုင်ရာ မိန့်ခွန်းတစ်ရပ်ကို ဒီကနေ့ ဩဂုတ်(၁)ရက်နေ့က ပြောကြားရာမှာ ဗိုလ်ချူပ်မှူးကြီးက အဲသလိုပြောကြားခဲ့တာပါ။

တိုင်းရင်းသားလက်နက်ကိုင်အဖွဲ့အစည်းတွေကို သူကိုယ်တိုင် ဖိတ်ခေါ်ဆွေးနွေးခဲ့ရာမှာ ဆွေးနွေးပြီးသမျှတွေကို  တိုင်းရင်းသား လက်နက်ကိုင်အဖွဲ့တွေက လက်ခံကြတယ်လို့လည်း သူကပြောပါတယ်။

အခြေခံဥပဒေကိုပြင်ဆင်ရာမှာ လွှတ်တော်ကသာ ပြင်ဆင်နိုင်တဲ့အတွက် တိုင်းရင်းသားပါတီတွေ ဒေသပါတီတွေ လွှတ်တော်ထဲရောက်လာဖို့လိုအပ်တယ်လို့လည်း နစက ဥက္ကဋ္ဌက ဆက်လက်ပြောပါတယ်။

မြန်မာနိုင်ငံမှာကျင်းပမယ့် လာမယ့်ရွေးကောက်ပွဲမှာ လက်ရှိအသုံးပြုနေတဲ့ နိုင်သူအကုန်ယူ FPTP စနစ်အပြင် အချိုးကျ ကိုယ်စားပြုစနစ် PR ကိုပါ ထည့်သွင်းဆောင်ရွက်သွားကြဖို့ ပြည်ထောင်စုရွေးကောက်ပွဲကော်မရှင်က ကြိုတင်ပြင်ဆင်မှုတွေ ပြုလုပ်နေတာဖြစ်ပါတယ်။

#Senior_generl_Min_Aung_Hlaing

#Myanmar_Politics

#Myanmar_Peace_Process

Published 1 August 2022

အပြစ်မဲ့သေဆုံးသူများအတွက် များစွာစိတ်မကောင်းဖြစ်မိပြီး အကြမ်းဖက် တိုက်ခိုက်သူတွေကို ထိရောက်စွာ အရေးယူ ဆောင်ရွက်သွားမယ်လို့ နစက ဥက္ကဋ္ဌက ပြောကြားလိုက်ပါတယ်။

နစကရဲ့ ၁၈လတာ ကာလ တာဝန်ထမ်းဆောင်ခဲ့မှုနှင့်ပတ်သက်တဲ့ မိန့်ခွန်းတစ်ရပ်ကို နစက ဥက္ကဋ္ဌ ဗိုလ်ချူပ်မှူးကြီး မင်းအောင်လှိုင်က ဩဂုတ် ၁ရက် မနက်က နိုင်ငံတော်ကိုပြောကြားရာမှာ ယခုလိုထည့်သွင်းပြောကြားခဲ့တာဖြစ်ပါတယ်။

၂၀၂၁ ခုနှစ် ဖေဖော်ဝါရီ(၁)ရက်မှ ၂၀၂၂ခုနှစ် ဇူလိုင် ၂၃ ရက်အထိ ၁၈ လတာနီးပါးအတွင်း တစ်နိုင်ငံလုံးမှာ လက်ပစ်ဗုံး/လက်လုပ်ဗုံး ပစ်ခတ်ခံရမှု၊ မိုင်းခွဲမှု ၇,၂၄၆ ကြိမ်၊ တိုက်ခိုက်/ သတ်ဖြတ်ခံရမှု ၆,၅၆၇ ကြိမ်၊ မီးရှို့ခံရမှု ၁,၀၉၄ ကြိမ်၊ စုစုပေါင်း ၁၄,၉၀၇ ကြိမ် ဖြစ်ပွားခဲ့ပါတယ်။ ရဟန်း/သံဃာ/သီလရှင်တွေ၊ အစိုးရဝန်ထမ်းတွေ၊ အုပ်ချုပ်ရေး ဆိုင်ရာတာဝန်ရှိသူတွေ၊ ကလေးသူငယ်အပါအဝင် အပြစ်မဲ့အရပ်သား ၃,၄၈၃ ဦး သေဆုံး ခဲ့ပြီး ၃,၀၆၅ ဦး ဒဏ်ရာရရှိ၍ ၄၁ ဦး ပျောက်ဆုံးမှုရှိခဲ့ပါတယ် လို့ ဗိုလ်ချူပ်မှူးကြီးကပြောပါတယ်။

အဲသလိုဖြစ်ပွားခဲ့တဲ့အထဲမှာ စစ်ကိုင်းတိုင်းဒေသကြီး၊ ရန်ကုန်တိုင်းဒေသကြီး၊ မန္တလေးတိုင်းဒေသကြီး နှင့် မကွေးတိုင်းဒေသကြီးတွေမှာ အများဆုံးဖြစ်ပွားခဲ့တယ်လို့လည်းသိရပါတယ်။

စစ်ကိုင်းတိုင်းဒေသကြီးမှာ ၄,၀၂၆ ကြိမ်၊ ရန်ကုန်တိုင်းဒေသကြီးမှာ ၂,၄၄၂ ကြိမ်၊ မန္တလေးတိုင်းဒေသကြီးမှာ ၂,၁၉၄ ကြိမ်၊ မကွေးတိုင်းဒေသကြီးမှာ ၁,၃၉၅ ကြိမ်တို့နဲ့ အများဆုံးဖြစ်ပွားခဲ့တဲ့အတွက် အဆိုပါ ဒေသတွေအတွင်း မူလအခြေအနေတွေအတိုင်း လုံခြုံမှု၊ တည်ငြိမ်အေးချမ်းမှု၊ တရား ဥပဒေ စိုးမိုးမှုရှိအောင်ဆက်လက်ဆောင်ရွက်သွားမှာဖြစ်ပါတယ်”လို့ လည်း မိန့်ခွန်းမှာဖော်ပြထားပါတယ်။

“ အဆိုပါ ဒေသတွေအတွင်း မူလအခြေအနေတွေအတိုင်း လုံခြုံမှု၊ တည်ငြိမ်အေးချမ်းမှု၊ တရား ဥပဒေ စိုးမိုးမှုရှိအောင်ဆက်လက်ဆောင်ရွက်သွားမှာဖြစ်ပါတယ်။ ကျွန်တော့်အနေနဲ့ တရား ဥပဒေ စိုးမိုးရေးအတွက် အလွန်အရေးကြီးတဲ့ မြို့နယ်အချို့မှအပ စစ်အုပ်ချုပ်ရေး မလုပ်ခဲ့ပါဘူး၊ အုပ်ချုပ်ရေး၊ တရားစီရင်ရေးနဲ့ ဥပဒေပြုရေးအာဏာသုံးရပ်ကို မည်သို့ပင် အပ်နှင်းထားစေကာမူ အခြေခံဥပဒေပါပြဋ္ဌာန်းချက်၊ တည်ဆဲဥပဒေများနှင့်အညီသာ ဆောင်ရွက်ပါတယ်” လို့ ဗိုလ်ချူပ်မှူးကြီးကပြောပါတယ်။

၊၁၈ လတာကာလအတွင်း မြန်မာ နိုင်ငံအတွင်းကို နည်းမျိုးစုံနဲ့ သွင်းယူခဲ့တဲ့ လက်နက်တွေနဲ့ အကြမ်းဖက်တွေနဲ့ ထိတွေ့ပစ်ခတ်မှုတွေမှာ ဖမ်းဆီးရမိခဲ့တဲ့ လက်နက် ဟာ လက်နက်မျိုးစုံ ၆,၃၁၁ လက်၊ ခဲယမ်းမျိုးစုံ ၃၃၅,၁၈၄ တောင့်နဲ့ လက်ပစ်ဗုံး/မိုင်း ၁၁,၇၁၅ လုံး သိမ်းဆည်းရမိခဲ့ပါတယ်။  အကြမ်းဖက်သူ ၆၂၃၆ ဦးကို ဖမ်းဆီးရမိခဲ့ပါတယ်လို့လည်း မိန့်ခွန်း အရသိရပါတယ်။

ymg/knl/

Published 1 August 2022

အာဆီယံဘုံသဘောတူညီချက် ၅ ရပ်ထဲက ဦးစားပေး ဆောင်ရွက်နိုင်တာတွေကို အဖြစ်နိုင်ဆုံး အာဆီယံမူဘောင်နှင့်အညီ ဆောင်ရွက်သွားမှာဖြစ်ပြီး နိုင်ငံပုံမှန်အခြေအနေဖြစ်လာတာနှင့်အမျှ တိုးတက်ဆောင်ရွက်မှုတွေရှိလာမှာဖြစ်တယ်လို့  နစက ဥက္ကဋ္ဌက ပြောကြားလိုက်ပါတယ်။

နစက ၁၈လတာ တာဝန်ထမ်းဆောင်မှုနှင့်ပတ်သက်လို့ ဩဂုတ်(၁)ရက်က ပြောကြားတဲ့မိန့်ခွန်းမှာ ဗိုလ်ချူပ်မှူးကြီး မင်းအောင်လှိုင်က အဆိုပါအချက်ကိုထည့်သွင်းပြောကြားခဲ့တာဖြစ်ပါတယ်။

“ယခုနှစ်မှာတော့ အခြေအနေအားလုံး တိုးတက်လာပြီဖြစ်တဲ့အတွက် ဘုံသဘောတူညီချက် ၅ ရပ်ထဲက ဦးစားပေးဆောင်ရွက်နိုင်တာတွေ အဖြစ်နိုင်ဆုံး အာဆီယံမူဘောင်နဲ့အညီ ဆောင်ရွက်သွားပါမယ်။ နိုင်ငံအနေနဲ့ မိမိပြည်တွင်းရေး၊ တရားစီရင်ရေး၊ ဥပဒေပြုရေး၊ အုပ်ချုပ်ရေး ၃ ရပ်ပါဝင်တဲ့ အချုပ်အခြာအာဏာကို ထိပါးမယ့်ကိစ္စတွေမဖြစ်အောင် သုံးသပ်ဆောင်ရွက်နေပါတယ်၊နိုင်ငံပုံမှန်အခြေအနေဖြစ် လာတာနဲ့အမျှ တိုးတက်ဆောင်ရွက်မှုတွေ ရှိလာမှာဖြစ်ပါတယ်” လို့ ဗိုလ်ချူပ်မှူးကြီးက ပြောကြားခဲ့တာဖြစ်ပါတယ်။

ပြီးခဲ့တဲ့နှစ်ကာလ အတွင်း မှာ မြန်မာနိုင်ငံမှာ ကိုဗစ်-၁၉ ရောဂါဒုတိယလှိုင်းနဲ့ တတိယလှိုင်းမှာ ပြင်းထန်စွာခံစား ခဲ့ရပြီး ကိုဗစ်-၁၉ ကပ်ဘေးရောဂါကျော်လွှားဖို့ အပြင်းအထန်လုံးပန်းနေရသလို ပြည်တွင်း ဆူပူဆန္ဒပြအကြမ်းဖက်မှုများကို ဖြေရှင်းဆောင်ရွက်နေရတဲ့အတွက် နိုင်ငံ တည်ငြိမ်မှုမရှိလို့ အာဆီယံဘုံသဘောတူညီချက် အကောင်အထည်ဖော်နိုင်ဖို့ အခက်အခဲရှိခဲ့တယ်လို့လည်း သူကပြောပါတယ်။

၂၀၂၁ ခုနှစ်၊ ဧပြီလ ၂၄ ရက်က ပြုလုပ်ခဲ့တဲ့ အာဆီယံထိပ်သီးအစည်းအဝေးကနေ မြန်မာနိုင်ငံနှင့်ပတ်သက်လို့  ဘုံသဘောတူညီချက် ၅ ရပ် ချမှတ်ခဲ့တာဖြစ်ပါတယ်။

မြန်မာနိုင်ငံဆိုင်ရာ အာဆီယံအထူးကိုယ်စားလှယ် ကမ္ဘောဒီးယားနိုင်ငံ ဒုတိယဝန်ကြီးချုပ်နှင့် နိုင်ငံခြားရေးဝန်ကြီး ပရက် ဆော့ခွန်ဟာ ပြီးခဲ့တဲ့ မတ်လနင့်ဇွန်လများအတွင်း မြန်မာနိုင်ငံကို လာရောက်ခဲ့ပြီး အာဆီယံဘုံသဘောတူညီချက်(၅)ရပ် အကောင်အထည်ဖော်ရေး ဆွေးနွေးမှုတွေလုပ်ခဲ့ပါတယ်။ ယခုလည်း စက်တင်ဘာလခန့်မှာ ထပ်မံလာရောက်ဦးမယ်လို့ ကမ္ဘောဒီးယားအခြေစိုက် သတင်းမီဒီယာများက‌ ရေးသားနေကြပါတယ်။

-ymg/knl

#ASEAN_Myanmar

#SG_Min_Aung_Hlaing

Published 31 July

နိုင်ငံတော် အမျိုးသား ကာကွယ်ရေးနှင့်လုံခြုံရေးကောင်စီအစည်းအဝေး၂/၂၀၂၂ကို ဇူလိုင်(၃၁)ရက်က ကျင်းပပြီး ယာယီသမ္မတ ဦးမြင့်ဆွေက ဖွဲ့စည်းပုံအခြေခံ ဥပဒေ ပုဒ်မ ၄၂၁ (ခ)အရ နစက အား ပေးအပ်ထားတဲ့ တာဝန်ကို သက်တမ်းနောက်ထပ်(၆)လ ထပ်မံတိုးမြှင့်ပေးလိုက်တယ်လို့ နစကရဲ့ သတင်းထုတ်ပြန်ချက်အရသိရပါတယ်။

အဆိုပါအစည်းအဝေးကို ယာယီသမ္မတ ဦးမြင့်ဆွေ၊ ပြည်သူ့လွှတ်တော်ဥက္ကဋ္ဌ ဦးတီခွန်မြတ်၊ တပ်မတော်ကာကွယ်ရေးဦးစီးချုပ် ဗိုလ်ချူပ်မှူးကြီး မင်းအောင်လှိုင်၊ ဒုတိယ တပ်မတော်ကာကွယ်ရေးဦးစီးချုပ် ဒုတိယဗိုလ်ချူပ်မှူးကြီး စိုးဝင်းနှင့် နိုင်ငံတော် အမျိုးသား ကာကွယ်ရေးနှင့်လုံခြုံရေးကောင်စီဝင်များတက်ရောက်ခဲ့ကြပြီး ဒုတိယသမ္မတ ဦးဟန်နရီဗန်ထီးယူ ကျန်းမာရေးအရ ခွင့်ပန်ကြားခဲ့ပါတယ်။

နစက ဥက္ကဋ္ဌက တိုင်းပြည်၏ လက်ရှိအခြေအနေများနှင့် နစက၏ လုပ်ဆောင်များကို အစီရင်ခံသုံးသပ်တင်ပြခဲ့ပြီး လုပ်ငန်းတာဝန်များကို အောင်မြင်ပြီးမြောက်သည်အထိ ထမ်းဆောင်နိုင်ရေးအတွက် နစကကို  နောက်ထပ်(၆)လသက်တမ်း ထပ်မံတိုးမြှင့်ပေးနိုင်ပါရန် ဆက်လက်တင်ပြခဲ့တာဖြစ်ပါတယ်။

ဖွဲ့စည်းပုံအခြေခံဥပဒေ ပုဒ်မ ၄၂၅ အရ အချိန်ကာလတိုးမြှင့်ပေးရန်ကိစ္စနှင့်စပ်လျဉ်း၍ ဖွဲ့စည်းပုံအခြေခံ ဥပဒေ ပုဒ်မ ၄၂၁ ပုဒ်မခွဲ (ခ)၏ လုပ်ပိုင်ခွင့်များအရလည်းကောင်း၊ ပုဒ်မ ၄၂၅ နှင့်အညီ နိုင်ငံအရေးပေါ်အခြေအနေကြေညာထားသည့်ကာလကို နောက်ထပ်ခြောက်လတိုးမြှင့်သတ်မှတ်ရတင်ပြမှုကို  နိုင်ငံတော်အမျိုးသား ကာကွယ်ရေးနှင့် လုံခြုံရေးကောင်စီက သဘောတူညီခဲ့ကြကြောင်း သတင်းထုတ်ပြန်ချက်အရသိရပါတယ်။

ပြည်တွင်းပြည်ပ တားဆီးနှောက်ယှက်မှုများ၊ အခက်အခဲများကြားမှ ကြံ့ကြံခံပြီး နိုင်ငံတော်ရဲ့ အမျိုသား အကျိုးစီးပွားဖြစ်တဲ့ အမျိုးသား အကျိုးစီးပွားကို ကာကွယ်စောင့်ရှောက်ပေးခဲ့တဲ့အတွက် နစကရဲ့လုပ်ဆောင်မှုတွေကို အသိအမှတ်ပြုတယ်လို့ ယာယီသမ္မတ ဦးမြင့်ဆွေက အစည်းအဝေးမှာ ပြောကြားခဲ့တယ်လို့ သတင်းထုတ်ပြန်ချက်မှာ ဖော်ပြထားပါတယ်။

ယခုသက်တမ်း(၆)လတိုးမြှင့်တဲ့အတွက် နစကဟာ ၂၀၂၃ ခုနှစ် ဇန်နဝါရီ (၃၁)ရက်အထိ တာဝန်တွေ ဆက်လက်ထမ်းဆောင်ခွင့်ရရှိသွားတာဖြစ်ပါတယ်။

ymg/knl

Published 31 July 2022

တရုတ်ပြည်သူ့လွတ်မြောက်ရေး တပ်မတော်(PLA)ရဲ့ စစ်နယ်တိုင်းကြီး (၃)တိုင်းဟာ  ပင်လယ်ဝါ၊ အရှေ့တရုတ်ပင်လယ်နှင့် အခြား တရုတ်ရေပိုင်နက်တွေမှာ တကယ်စစ်ပွဲပုံစံ ရေကြောင်းစစ်ရေးလေ့ကျင့်မှုတွေကို အရှိန်မြှင့်ပြုလုပ်ခဲ့ပါတယ်။

အဲဒီလိုလေ့ကျင့်မှုဟာ စစ်ပွဲအတွက် တိုက်ပွဲဝင်  အဆင်သင့်အနေအထား အသင့်ပြင်ဆင်ထားခြင်းဖြစ်တယ်လို့ CCTV က ပြောပါတယ်။

တရုတ်တပ်မတော် မြောက်ပိုင်းစစ်နယ်တိုင်း ရေတပ်ဟာ ပင်လယ်ဝါထဲမှာ လက်တွေ့ပစ်ခတ်ပြီး လေ့ကျင့်မှုတွေပြုလုပ်ခဲ့ကြပါတယ်။ အလားတူ အရှေ့ပိုင်းစစ်နယ်တိုင်းကလည်း အရှေ့တရုတ်ပင်လယ်ထဲမှာ ရေတပ်သင်္ဘော အုပ်စုနှင့်အတူ ပစ်ခတ်တိုက်ခတ် လေ့ကျင့်ခဲ့ကြပါတယ်။ တောင်ပိုင်းစစ်နယ်တိုင်းကလည်း အလားတူ စစ်ရေးလေ့ကျင့်မှုတွေကို ပြီးခဲ့တဲ့ရက်များအတွင်း ပြုလုပ်ခဲ့ကြပါတယ်။

Source: CCTV Plus

#China_ PLA_combat_ready_drill

#China_Taiwan_Tension

#China_US_Pelosi_Visit