#Local_News
Published - 27 July 2022

လူမှုကွန်ရက်စာမျက်နှာတွင် စာသင်ကျောင်းများပိတ်မည်ဆိုသည့်သတင်း ပျံ့နှံနေပြီး ယင်းသတင်းသည် ကောလဟာလသာဖြစ်ကြောင်း အခြေခံပညာဦးစီးဌာနမှ သိရသည်။

"အဲဒီသတင်း ကြားလည်းမကြားမဘူး။ fb ပေါ်မှာပျံ့နေတယ်ဆိုကတည်းက ၁၀၀ ရာခိုင်နှုန်း ကောလဟာဖြစ်ပါတယ်"ဟု အခြေခံပညာဦးစီးဌာနမှ တာဝန်ရှိသူတစ်ဦးက ပြောသည်။

ရန်ကုန်တိုင်းဒေသကြီးရှိ အ.ထ.က(၁)ဒဂုံ အပါအဝင် ပုဂ္ဂလိကစာသင်ကျောင်းတချို့ ရက်အကန့်အသတ်မရှိ ပိတ်လိုက်သည်ဆိုသည့်သတင်းမှာ ဇူလိုင် ၂၆ ရက်က လူမှုကွန်ရက်စာမျက်နှာများတွင် ပျံ့နှံနေခြင်းဖြစ်သည်။

၂၀၂၂-၂၀၂၃ ပညာသင်နှစ် အခြေခံပညာကျောင်းများအားလုံးကို မေ ၂၆ ရက်မှစ၍ ဇွန် ၁ ရက်အထိ ကျောင်းအပ်လက်ခံခဲ့ပြီး ဇွန် ၂ ရက်တွင် ကျောင်းစတင်ဖွင့်လှစ်ခဲ့ကြောင်း သိရသည်။

ymg/sth
#Yangon_Media_Group

#Local_News
Published_27 July 2022

မလေးရှားနိုင်ငံသို့ အလုပ်လုပ်ရန် သွားရောက်မည့် မြန်မာနိုင်ငံသား ၅၈ ဦးအား ဇူလိုင်လ ၂၆ ရက် ညပိုင်းက ထိုင်းနိုင်ငံ ရနောင်းမြို့တွင် ဖမ်းဆီးလိုက်ကြောင်း သိရသည်။

ယင်းတို့သည် ကော့သောင်းက တစ်ဆင့် ထိုင်းကို ခိုးဝင်လာကြခြင်း ဖြစ်ပြီး ရနောင်းခရိုင်အရောက်တွင် ထိုင်းစစ်တပ်က ဖမ်းဆီးလိုက်ခြင်း ဖြစ်ကြောင်း မြန်မာရွှေ့ပြောင်းအလုပ်သမားအရေး လုပ်ဆောင်နေသူများက ပြောသည်။

"သူတို့က မလေးကို သွားမလို့ လာကြတာ၊ ရနောင်းဘက်ကို ခိုးဝင်လာတာ။ ကရ ဘူရီမြို့နယ်၊ နမ်းကျွုတ်ကျေးရွာနားမှာ အဖမ်းခံရတာပေါ့။လူတစ်ယောက်ကို ပွဲစားခ ဘတ် ၃၅၀၀၀ ပေးပြီးတော့လာကြတာ။မကြာခဏ အဖမ်းခံနေရတာကို သိနေလည်း လာကြတာပဲ"ဟု အလုပ်သမားအရေးလိုက်ပါ ဆောင်ရွက်နေသူက ပြောသည်။

အဆိုပါ မြန်မာနိုင်ငံသားများအား သယ်ယူပို့ဆောင်ရာတွင် အသုံးပြုသည့် သက်သေခံ ကား (၃)စီးနှင့် ထိုင်းနိုင်ငံသား ပွဲစား(၃)ဦး၊ မြန်မာနိုင်ငံသား (၅၈) ဦးတို့ ထိုင်းနိုင်ငံ၏ ဥပဒေအရ အမှုဖွင့် အရေးယူခံရမည်ဖြစ်ကြောင်း သိရသည်။

ymg/mt
#Yangon_Media_Group

#Local_News
Published - 27 July 2022

ပြည်တွင်း၌ နိုင်ငံခြားငွေချွေတာနိုင်ရန်အတွက်ကန့်သတ်ထားသည့်သွင်းကုန်များကို တင်သွင်းခွင့်ပြုမည်မဟုတ်ကြောင်း နစကပြောရေးဆိုခွင့်ရှိသူ၊ ပြန်ကြားရေးဒုဝန်ကြီး ဗိုလ်ချုပ်ဇော်မင်းထွန်းကပြောကြားခဲ့သည်။

ဇူလိုင် ၂၆ ရက်တွင်ကျင်းပပြုလုပ်သည့်သတင်းစာရှင်းလင်းပွဲတွင် ထည့်သွင်း ပြောကြားခဲ့ခြင်းဖြစ်သည်။

"မိမိအစီအစဉ်နဲ့ နိုင်ငံခြားငွေ ရှာဖွေပြီး ငွေပေးချေနိုင်ရင်လည်း သက်ဆိုင်ရာဝန်ကြီးဌာန၊ ကော်မတီတို့က ကန့်သတ်ထားတဲ့ ကုန်စည်များကို တင်သွင်းခွင့်ပြုမှာ မဟုတ်ဘူး။ ခွင့်ပြုဖို့ အစီအစဉ်မရှိပါဘူး။ သွင်းကုန်တွေနဲ့ ပတ်သက်ပြီး စီးပွား/ကူးသန်း၊ စီမံ/ဘဏ္ဍာတို့က ကန့်သတ်ထားတဲ့ သွင်းကုန်တွေကို ဆောင်ရွက်ခွင့်ပေးဖို့ဆိုတာကို ပြုပြင်ဖို့ ယခုအချိန်အထိ မရှိသေးဘူးလို့ပဲ ပြောလိုပါတယ်"ဟု ယင်းကပြောကြားခဲ့သည်။

ဇူလိုင်လ ၂၂ ရက်တွင် ကုန်သွယ်ရေးဦးစီးဌာန၏ ထုတ်ပြန်ထားသည့်ကြေညာချက်အတွင်း ဆေးဝါးနှင့် ဆေးပစ္စည်းများ တင်သွင်းသည့်ကုမ္ပဏီများကို မိမိအစီအစဉ်ဖြင့် တစ်ဖက်ကုန်ရောင်းသူထံ ငွေပေးချေဆောင်ရွက်မည်ဆိုပါက သွင်းကုန်လိုင်စင် ထုတ်ယူနိုင်ကြောင်း ဖော်ပြထားသည်။

ymg/sth
#Yangon_Media_Group

#Local_News
Published _ 27 July 2022

ပြည်တွင်းဆီစက်များ၏ ဝယ်လိုအားများနှင့် ပြည်ပတင်ပို့ခွင့် ပြန်လည်ခွင့်ပြုလိုက်တာကြောင့် မြေပဲဆံဈေးများ ဆက်တိုက်မြင့်တက်လျက်ရှိပြီး ပျမ်းမျှ တစ်ပိဿာလျင် ကျပ် ၅၃၀၀ အထိ မြင့်တက်နေလျက်ရှိ ကြောင်း ကုန်စည်ဒိုင်အချို့မှ သိရသည်။

မြေပဲဆံတွေကို နယ်စပ်မှ ပြည်ပတင်ပို့ရာ၌ အမေရိကန်ဒေါ်လာဖြင့်သာ တင်ပို့ခွင့်ပြုထားသော်လည်း ဈေးကွက်အနေအထားတစ်ရပ်ရှိနေသည့်အတွက် ယခုလိုစျေးတွေဆက်တိုက်မြင့်တက်လာပြီး ယခု ဇူလိုင်လဆန်းပိုင်းထက် မြေပဲဆံတစ်ပိဿာလျင် ကျပ် ၈၀၀ ခန့်ပိုတက်လာကြောင်း ယင်းမှသိရသည်။

နယ်စပ်ကုန်သွယ်ရေး၌ ပြီးခဲ့သည့် ဇူလိုင်လ ၁ရက်က စပြီး ပဲ၊ ပြောင်းနှင့် ဆီထွက်သီးနှံများကို တင်ပို့သည့်အခါ အမေရိကန် ဒေါ်လာဈေးနှုန်းဖြင့်သာ ရောင်းဝယ်မှုလုပ်ကြရန် ကုန်သွယ်ရေးဦးစီးဌာနက မူဝါဒ သတ်မှတ်ထားရှိပြီး ဗဟိုဘဏ်က သတ်မှတ်ထားသည့် ဒေါ်လာဈေးနှုန်းနှင့် ငွေလဲကောင်တာများတွင် ဝယ်ရသည့် ဈေးနှုန်းကွာဟချက်ကြောင့် ပို့ကုန်လုပ်ငန်း လုပ်ကိုင်သူများ အနေဖြင့် အရှုံးပေါ်နေသည့် အခြေအနေများဖြင့် ရင်ဆိုင်နေရကြောင်း သိရှိရသည်၊၊

ymg/NN
#Yangon_Media_Group

#DailyNews
Published - 27 July 2022

၁။ ပုဂ္ဂလိကကျောင်းများ ရက်အကန့်အသတ်မရှိ ပိတ်မည်ဆိုသည်မှာ သတင်းမှားသာဖြစ်

၂။ ဈေးကွက်တွင် လက်ကျန်ကုန်ပစ္စည်းနည်းပါမှုကြောင့် ကြက်သွန်နီနှင့် ငြုတ်သီး အမြင့်ဈေးတွင်ရှိနေ

၃။ နေ့စဉ်မိုးလေဝသသတင်း။

၄။ သီရိလင်္ကာတွင် အစစအရာရာရှားပါးလာပြီး ကျန်းမာရေးစောင့်ရှောက်မှုစနစ် ပျက်သုဉ်းလုနီးပါးဖြစ်လာ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published - 27 July 2022

ပုဂံဒေသတွင်အမွေအနှစ်ကို မထိခိုက်စေဘဲ ဟိုတယ်နှင့်ခရီးသွားလုပ်ငန်းများလည်ပတ်နိုင်ရန် 'ဟိုတယ်မဟာဗျူဟာ'ရေးဆွဲနိုင်ရေးဆောင်ရွက်နေကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာနမှသိရသည်၊၊

ပုဂံဒေသအတွက်'ဟိုတယ်မဟာဗျူဟာ'ရေးဆွဲပြီး ကမ္ဘာ့အမွေ အနှစ်ကော်မတီကိုတင်ပြရမည်ဖြစ်၍ မြန်မာနိုင်ငံကဟိုတယ်ဆိုင်ရာကျွမ်းကျင်ပညာရှင် သြစတြေးလျနိုင်ငံသား Dr.Richard Mackay ကို ငှားရမ်းရေးဆွဲစေခဲ့သည်၊၊

Dr.Richard Mackayကို' ဟိုတယ်မဟာဗျူဟာ' ရေးဆွဲနေစဉ် Dr. Richard Mackay ၏ 'ဟိုတယ်မဟာဗျူဟာ'ပါ အချက်များနှင့် ကိုက်ညီမှု မရှိဖြစ်နိုင်ပါသဖြင့် 'ဟိုတယ်မဟာဗျူဟာ'ရေးဆွဲ မပြီးမီ ပုဂံတွင် ဟိုတယ်များအား ပြုပြင်ခြင်း၊ ထိန်းသိမ်းခြင်း၊ အသစ်တည်ဆောက်ခြင်း လုပ်ငန်းများကို ခေတ္တရပ်နားထားရန် ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ်က'ဟိုတယ်မဟာဗျူဟာ'ရေးဆွဲနိုင်ရေး အလုပ်ရုံဆွေးနွေးပွဲ၌ ထည့်သွင်းပြောကြားခဲ့သည်၊၊

ဇူလိုင်လ(၂၆)ရက်တွင် ပုဂံဒေသဆိုင်ရာ ဟိုတယ်မဟာဗျူဟာ ရေးဆွဲနိုင်ရေးအတွက် ဆက်လက် ဆောင်ရွက်ရမည့် လုပ်ငန်းစဉ်များရေးဆွဲသတ်မှတ်နိုင်ရေး အလုပ်ရုံဆွေးနွေးပွဲကို ပုဂံရှေးဟောင်း သုတေသနပြတိုက်၊ အစည်းအဝေးခန်းမ၌ကျင်းပပြုလုပ်ခဲ့သည်၊၊

အလုပ်ရုံဆွေးနွေးပွဲ၌ ရှေးဟောင်းသုတေသနနှင့် အမျိုးသားပြတိုက်ဦးစီးဌာန ညွှန်ကြားရေးမှူးချုပ်က အဖွင့်အမှာစကား ပြောကြားရာတွင်" ပုဂံဒေသအား ကမ္ဘာ့အမွေအနှစ် တင်သွင်းစဉ်က ဟိုတယ်နှင့် ပတ်သက်သည့် Bagan Hotel Strategy ရေးဆွဲဆောင်ရွက်ရန်၊ ဟိုတယ်နှင့် ပတ်သက်သည့် ကိစ္စရပ်များကို ရေတိုရေရှည်ချမှတ် ဆောင်ရွက်ရန်၊ ပုဂံဒေသအတွက် ယူနက်စကိုက ပေးပို့လာသော အကြံ ပြုချက် (၁၈) ချက်ထဲတွင်လည်း ပါရှိသည့်အတွက် အကြံပြုချက်ပါ ဟိုတယ်နှင့်ပတ်သက်သည်တို့ကို ဆောင်ရွက်ပြီး ၂၀၂၂ ခုနှစ်၊ ဒီဇင်ဘာလမှာ ကမ္ဘာ့အမွေအနှစ် ကော်မတီသို့ ပြန်လည်ပေးပို့ရမည်ဖြစ်သဖြင့် ဟိုတယ်မဟာဗျူဟာ စီမံကိန်းအတွက် အရှေ့တောင်အာရှတွင်နှင့် ကမ္ဘာတစ်ဝှမ်းလုံးတွင် Toursim Master Plan ရေးဆွဲနေသည့် မြန်မာနိုင်ငံ၏ အခြေအနေကို နားလည်သော ဟိုတယ်လုပ်ငန်းပိုင်းဆိုင်ရာကျွမ်းကျင် ပညာရှင် ဩစတြေးလျ နိုင်ငံသား Dr.Richard Mackay ကို ငှားရမ်းရေးဆွဲစေခဲ့ပါကြောင်း၊ (၂၀၂၂)ခုနှစ်၊ စက်တင်ဘာလ၊ အောက်တိုဘာလတွင် Dr. Richard Mackay ထံသို့ ပြန်လည်ပေးပို့ပေးရန်နှင့် လာမည့် (၄၆) ကြိမ်မြောက် ကမ္ဘာ့အမွေအနှစ် ညီလာခံတွင် တင်ပြသင့်ကြောင်းကို ပညာရှင်က အကြံပြုထားသဖြင့် ယနေ့အလုပ်ရုံဆွေးနွေးပွဲကို ကျင်းပရခြင်း ဖြစ်ပါကြောင်း၊ယခုဆွေးနွေးပွဲမှ ထွက်ပေါ်လာမည့် စည်းမျဉ်း/ စည်းကမ်းများကို BAGANCOM နှင့် မန္တလေးတိုင်းဒေသကြီး ယဉ်ကျေးမှုအမွေအနှစ်များ ကာကွယ်ထိန်းသိမ်းရေးကော်မတီ၊ ဥက္ကဋ္ဌတိုထံတင်ပြပြီး မိမိဌာနမှ စုစည်းထားသည့် ဟိုတယ်ဆိုင်ရာ အချက်အလက်များနှင့်အတူ Dr. Richard Mackay ထံသို့ အချိန်မီ ပြန်လည်ပေးပို့သွားမည်ဖြစ်ပါကြောင်း၊ ၎င်းကာလအတွင်း Dr. Richard Mackay ၏ Bagan Hotel Strategy ပါ အချက်များနှင့် ကိုက်ညီမှု မရှိဖြစ်နိုင်ပါသဖြင့် Bagan Hotel Strategy ရေးဆွဲမပြီးမီ ပုဂံတွင် ဟိုတယ်များအား ပြုပြင်ခြင်း၊ ထိန်းသိမ်းခြင်း၊ အသစ်တည်ဆောက်ခြင်း လုပ်ငန်းများကို ခေတ္တရပ်နားထားရန်ကိုလည်း ဆက်စပ်ဌာနများသို့ အကျိုးအကြောင်း ရေးသားပေးပိုထားပြီးဖြစ်ကြောင်း၊ Bagan Hotel Strategy (complete) အမြန်ဆုံး အပြီးသတ်ရေးဆွဲနိုင်ရန်အတွက် ဆက်စပ်ဌာနများ၏ ပူးပေါင်းဆောင်ရွက်မှုနှင့် ဝိုင်းဝန်းအကြံပြု ဆွေးနွေးချက်များ လိုအပ်ပါသဖြင့် အကြံပြုဆွေးနွေးပေးစေလိုပါကြောင်း " ပြောကြားခဲ့ပါသည်၊၊

ပုဂံဒေသဆိုင်ရာ ဟိုတယ်မဟာဗျူဟာ စီမံကိန်းအပြီးသတ် ရေးဆွဲနိုင်ရေး ဆက်လက်ဆောင်ရွက်ရမည့် လုပ်ငန်းစဉ်တစ်ခုဖြစ်သည့် ဟိုတယ် တည်ဆောက်မှုများအတွက် အဆောက်အအုံ၏ အမြင့်၊ ဒီဇိုင်းနှင့် ကြားခံဒေသအတွင်းရှိ ဟိုတယ်များနှင့် စပ်လျဉ်းသည့် စည်းမျဉ်း၊ စည်းကမ်း သတ်မှတ်ချက်များအား ချမှတ်၍ ပုဂံဒေသဆိုင်ရာ ဟိုတယ်မဟာဗျူဟာစီမံကိန်း အပြီးသတ်ရေးဆွဲနိုင်ရေး အလုပ်ရုံဆွေးနွေးပွဲဆုံးဖြတ်ချက်များအား အတည်ပြုခဲ့ကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန၏ ထုတ်ပြန်ချက်အရ သိရသည်၊၊

ymg/tthl
#Yangon_Media_Group