#Local_News
Published_10 Aungust 2022
မလေးရှားနိုင်ငံတွင် တံတားပေါ်မှပြုတ်ကျခဲ့သည့် သားအဖလေးယောက်ဖြစ်စဉ်မှ ဆလာယန်းဆေးရုံ၌ဆေးကုသမှုခံယူနေရသော ဒဏ်ရာရ ၃ နှစ်သားကလေးငယ် Shadrah Vabeichopha ကျန်းမာရေးမှာအသက်ရှူပုံမှန် ပြန်ဖြစ်လာပြီးနောက် ယခုအခါ အရေးပေါ်အခန်းမှ သီးသန့်ဆောင်သို့ပြောင်းရွေ့ခွင့်ရပြီဖြစ်ကြောင်း မလေးရှား မြန်မာလူမှုကူညီရေးအသင်း ကသိရသည်။
"ကလေးငယ်ဟာ သူ့အမေကိုသိတဲ့ အသိစိတ်ပြန်လည်ဝင်ရောက်လာပြီး သတိရခါစပြုလာခဲ့ပါပြီ၊ အဖက်ဖက်ကလိုလေသေးမရှိအောင် ဆရာဝန်၊ ဆရာမတွေရဲ့ ကူညီမှုကြောင့် ဒီနေ့ (ICU)အရေးပေါ်ကုသနေသောအခန်းကနေ သီးသန့်ဆောင်ကို ပြောင်းရွေ့ခဲ့နိုင်ပါပြီ။ သူ့အမေနဲ့ တွေ့ခါစမှာ ကလေငယ်က အဖေ ၊ အမနဲ့ အကိုတွေကို တွေ့ချင်တယ်လို့ ဖြေးဖြေးလေး မေးခဲ့ပါတယ်၊ ကလေးငယ်ဒီထက်ကောင်းမွန်လာစေဖို့ရန် ဆေးဆက်လက်ကုသရပါအုံးမယ်။ ကိုယ်ခန္ဓာအတွင်းပိုင်း နံရိုး နှင့် ခြေထောက်တွေ ၊ ဦးခေါင်းပိုင်းတွေကို ဆေးဆက်လက် ကုသသွားရပါအုံးမယ်"ဟု အဆိုပါ အသင်းတာဝန်ရှိသူကပြောသည်။
ပြီးခဲ့သည့် ဩဂုတ်လ ၂ ရက်နံနက်၅နာရီခွဲခန့်အချိန်က မလေးရှားနိုင်ငံတွင် မြန်မာနိုင်ငံမှ ချင်းတိုင်းရင်းသား အသက် ၃၈ နှစ်အရွယ်ရှိဖခင်ဖြစ်သူ Cholei က အသက် ၈ နှစ်အရွယ် သမီး Vadetisoh ၊ အသက် ၆ နှစ်အရွယ် သား Vabiechose နှင့် ၃ နှစ်အရွယ် သား Shadrah Vabiechopha တို့ကို မလေးရှားနိုင်ငံ ကပုန်းမြို့နယ် (Taman Desa jaya)လမ်းထိပ်ရှိ ဟိုင်းဝေး မိုးပျံတံတားပေါ်မှ အရင်ဆုံးပစ်ချကာ သူ့ကိုယ်သူလည်း ခုန်ချမှု ဖြစ်ပွားခဲ့ခြင်း ဖြစ်သည်။
ယင်းကြောင့် ဖခင်ဖြစ်သူ Cholei နှင့် အသက် ၈ နှစ်အရွယ် သမီး Vadetisoh ၊ အသက် ၆ နှစ်အရွယ် သား Vabiechose တို့ နေရာ၌ပင် ပွဲချင်းပြီးသေဆုံးသွားသောကြောင့် သြဂုတ်လ ၄ ရက်က စလန်းကောပြည်နယ် (စမုံညှင်းမြို့) ခရစ်ယာန်သင်္ချိုင်းတွင် ဆုတောင်းပွဲကျင်းပကာ မြေသို့ အပ်နှံသင်္ဂြိုလ်ပြီးစီးခဲ့ပြီး ဖြစ်သည်။
photo-Kepongfreefuneralserv
ymg/mt
#Yangon_Media_Group
#Local_News
Published -10 August 2022
မလေးရှားနိုင်ငံ ဆယ်လန်ဂေါပြည်နယ် ကာဂျမ်းမြို့တွင် တရားမဝင်နေထိုင်သည့် မြန်မာအလုပ်သမား ၁၀၀ ကျော် ဩဂုတ် ၉ ရက် ည၌ မလေးရှားလူဝင်မှုကြီးကြပ်ရေးဌာန (JIM)ရဲ့ ဝင်ရောက်စီးနင်း ဖမ်းဆီးခံရကြောင်း အဆိုပါဌာနက ထုတ်ပြန်ထားသည်။
နိုင်ငံခြားသားများ တရားမဝင်နေထိုင်နေသည်ဆိုသည့် သတင်းပေးချက်အရ လဝက စီမံချက်ဖြင့် ဝင်ရောက်စီးနင်းဖမ်းဆီးခဲ့ခြင်းဖြစ်ကြောင်း သိရသည်။
အဆိုပါ ညက လူနေအဆောက်အအုံ ခြောက်ခုရှိ နိုင်ငံခြားသား ၄၂၅ ဦးကို ညသန်းခေါင်အချိန်မှာ ဝင်ရောက်စစ်ဆေးခဲ့ ခြင်းဖြစ်ပြီး သော့ပိတ်ထားသည့်အခန်းများကို ထုရိုက်ဖွင့်ပြီးရှာဖွေမှုများ လုပ်ခဲ့ကာ ကြမ်းကြမ်းတမ်းတမ်း ဖမ်းဆီးခဲ့ခြင်းဖြစ်သည်။
အဆိုပါ အော်ပရာစီ စီမံချက်ကနေ တရားမဝင် နိုင်ငံခြားသား အမျိုးသား ၁၃၂ ဦး၊ အမျိုးသမီး ၄၁ ဦး၊ ကလေး ၂ ဦးတို့ကို ဖမ်းမိခဲ့ပြီး ဖမ်းဆီးခံရသူတွေထဲမှာ အသက် ၂ နှစ်အရွယ်ကနေ ၅၅ နှစ်အရွယ် အထိပါဝင်ကြောင်း ထုတ်ပြန်ချက်တွင် ဖော်ပြထားသည်။
ယင်းဖမ်းဆီးခံရသူတွေများမှာ မြန်မာနိုင်ငံသား ၁၁၅ ဦး၊ အင်ဒိုနီးရှား ၃၃ ဦး၊ ဘင်္ဂလားဒေ့ရှ် ၁၃ ဦး၊ နီပေါ ၉ ဦး၊ သီရိလင်္ကာ ၄ ဦးနှင့် အိန္ဒိယနိုင်ငံသား ၁ ဦးတို့ပါဝင်ကြောင်း သိရသည်။
ယင်းအပြင် ဖမ်းဆီးခံရသူအများစုသည် အထောက်အထားမရှိ ခြင်း၊ အလည်ဗီဇာသက်တမ်းကုန်နေ ခြင်း၊ Work Permit သက်တမ်းကုန်နေ ခြင်းများတွေ့ရှိရသလို မြန်မာအလုပ်သမားအချို့မှာ UNHCR က ထုတ်ပေးထားသည့် ဒုက္ခသည်ကတ် ကိုင်ဆောင်ပြီး မိသားစုအလိုက် နေထိုင်နေကြကြောင်းလဝက ထုတ်ပြန်ချက်တွင် ဖော်ပြထားသည်။
ယင်းဖမ်းဆီးခံရသူများကို ဆက်လက်မေးမြန်းစစ်ဆေးရန်အတွက် စမန်နရီ (Semenyih) လူဝင်မှုကြီးကြပ်ရေး ထိန်းသိမ်းရေးစင်တာသို ခေါ်ဆောင်ခဲ့ပြီး မလေးရှားလူဝင်မှုကြီးကြပ် ရေးဥပဒေများအရ အရေးယူခြင်းခံရမည်ဖြစ်ကြောင်း ထုတ်ပြန်ထားသည်။
ပြည်တွင်း၌ အလုပ်အကိုင်ရှားပါးမှုကြောင့် ထိုင်းနိုင်ငံနှင့်မလေးရှားနိုင်ငံသို တရားမဝင်သွားရောက်အလုပ်လုပ်ကိုင်သူများပြားနေ ကြောင်း အလုပ်သမားအရေးဆောင်ရွက်သူများ၏ ပြောပြချက်အရ သိရသည်။
ymg/sth
#Yangon_Media_Group
#Local_News
Published_10 August 2022
ဝန်ကြီးချုပ်ဟောင်း ဦးနု၏သမီးဒေါ်သန်းသန်းနုအား ဒီမိုကရက်တစ်ပါတီ (မြန်မာ) ၏ ဥက္ကဌအဖြစ် တာဝန်ပေးကြောင်း အဆိုပါ ပါတီက သိရသည်။
ပြီးခဲ့သည့် မေလ ၁၈ ရက် ည ၇ နာရီခန့်က ဥက္ကဌ ဦးသုဝေ ကွယ်လွန်သွားပြီးနောက် ဒီမိုကရက်တစ်ပါတီ (မြန်မာ) ၏ လစ်လပ်နေသော ဥက္ကဌ တာဝန်ကို ပါတီ၏ အထွေထွေအတွင်းရေးမှူးချုပ်တာဝန်ယူထားသူ ဒေါ်သန်းသန်းနုအား လွှဲပြောင်းပေးခဲ့ကြခြင်းလည်း ဖြစ်သည်။
"တည်ထောင်သူဥက္ကဌကြီး (ဟောင်း) ဦးသုဝေ ကွယ်လွန်ပြီးတဲ့နောက် အထွေထွေအတွင်းရေးမှူးချုပ်ဖြစ်ခဲ့သူ ဒေါ်သန်းသန်းနုကို ဒီမိုကရက်တစ်ပါတီ (မြန်မာ)ရဲ့ ဥက္ကဌကြီးအဖြစ် ပါတီဝင်များအားလုံးက တစ်ညီတစ်ညွတ်တည်း ရွေးချယ်တင်မြှောက်ခဲ့ပြီးဖြစ်ပါတယ်။ ပါတီအရေး၊ နိုင်ငံ့အရေး၊ ဒီမိုကရေစီအရေးကိစ္စတွေကို ဆက်လက်ဆောင်ရွက်သွားတော့မှာပါ"ဟု အဆိုပါ ပါတီ တာဝန်ရှိသူက ပြောသည်။
ဒီမိုကရက်တစ်ပါတီ (Democratic Party (Myanmar) ကို ဦးသုဝေ ဥက္ကဋ္ဌ အဖြစ်တာဝန်ယူပြီး ယခင် ဝန်ကြီးချုပ်ဟောင်းများ၏ သမီးများ ဖြစ်ကြသော ဒေါ်သန်းသန်းနု (ဦးနု၏သမီး)၊ ဒေါ်ချိုချိုကျော်ငြိမ်း (ဦးကျော်ငြိမ်း၏သမီး)၊ ဒေါ်နေရီဗဆွေ(ဦးဗဆွေ၏သမီး) တို့အပါအဝင် စုစုပေါင်း (၂၁) ဦးဖြင့် ၂၀၁၀ ပြည့်နှစ်တွင် စတင်ဖွဲ့စည်းခဲ့ခြင်း ဖြစ်သည်။
ယခုအခါ မြန်မာနိုင်ငံ ဝန်ကြီးချုပ်ဟောင်း ဦးနု၏ သမီးဖြစ်သူ ဒေါ်သန်းသန်းနု အနေဖြင့် ဦးနုဒေါ်မြရီ ဖောင်ဒေးရှင်းကိုတည်ထောင်ထားပြီး ကျန်းမာရေးနှင့် ပညာရေး ကဏ္ဍများအတွက် ထောက်ပံ့မှုများ ပြုလုပ်လျက်ရှိရာ ခြေလက်မသန်စွမ်းသူများအတွက် ခြေတု လက်တု အစားထိုးပေးခြင်း၊ ကျန်းမာရေးအတွက် အရေးပေါ် လိုအပ်သော ဆေးဝါးများ ပေးလှူခြင်း၊ ပညာရေးအတွက် စာအုပ်စာတမ်းများ၊ ကျောင်းသုံးပစ္စည်းများ ပေးလှူခြင်း၊ ပညာရေး ရန်ပုံငွေ အဆောက်အဦး ရန်ပုံငွေများ ပေးလှူခြင်း၊ အရေးပေါ် လိုအပ်သော စားသောက်ဖွယ်ရာ၊ အသုံးအဆောင် အဝတ်အထည်များ ပေးလှူခြင်း စသည်တို့ကို ကူညီဆောင်ရွက်ပေးနေကြောင်းလည်း သိရသည်။
ymg/mt
#Yangon_Media_group
#Local_News
Published -10 August 2022
ယခုနှစ်နွေစပါးစိုက်ပျိုးမှုနှင့် ပဲတီစိမ်းစိုက်ပျိုးမှုအတွက် နိုင်ငံတော်က ငွေကြေးစိုက်ထုတ်မှုတွေ လုပ်ပေးရန်အတွက် သီးသန့်ရန်ပုံငွေ ကျပ် ၄၀၀ ဘီလီယံ ထူထောင်ပေးသွားမည်ဖြစ်ကြောင်းနစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
စီမံကိန်းနှင့် ဘဏ္ဍာရေးဝန်ကြီးဌာနက အမျိုးသား သဘာဝဘေးအန္တရာယ်ဆိုင်ရာ စီမံခန့်ခွဲမှုရန်ပုံငွေကနေ ငွေကျပ် ၄၀၀ ဘီလီယံကို သီးသန့်ရန်ပုံငွေထူထောင်ပြီး စိုက်ပျိုးရေးလုပ်ငန်းတွေကို ထောက်ပံ့သွားမည်ဖြစ်ကြောင်း ပြောကြားခဲ့သည်။
အဆိုပါ ရန်ပုံငွေကနေ ပထမဦးစားပေးအနေဖြင့် ယခုနှစ် နွေစပါးစိုက်ပျိုးမှုနှင့် ပဲတီစိမ်းစိုက်ပျိုးမှုအတွက် ငွေကြေးစိုက်ထုတ်ပေးပြီး တောင်သူတွေကို စိုက်ပျိုးရေးအတွက်လိုအပ်သည့် မြေဩဇာမျိုးတွေနှင့် စက်မောင်းဆီတွေ ရရှိရေး စီမံဆောင်ရွက်ပေးသွားမည်ဖြစ်ကြောင်း နစက ဥက္ကဋ္ဌက ပြောကြားခဲ့သည်။
အဆိုပါ စိုက်ပျိုးဧကတွေကနေ ထွက်ရှိလာမည့် စပါးနှင့် ပဲတီစိမ်းများကို ပြည်ပသို့ တင်ပို့သွားမည်ဖြစ်ကြောင်း ယင်းကပြောကြားခဲ့သည်။
ymg/sth
#Yangon_Media_Group
#Local_News
Published _ 10 August 2022
မြန်မာနိုင်ငံ လူမှုဝန်ထမ်း ဦးစီးဌာနအနေဖြင့် သင်တန်းကာလသုံးလကြာမြင့်မည့် အသက်မွေးဝမ်းကျောင်းပညာများကို မသန်စွမ်းသူများအတွက် နေစားစရိတ်ငြိမ်း အခမဲ့စနစ် ဖြင့် ရန်ကုန်မြို့ရှိ မသန်စွမ်းသက်ကြီး သင်တန်းကျောင်းတွင် သင်ကြားပေးသွားမည်ဖြစ်ကြောင်း သိရသည်။
ယင်းအစီအစဉ်ကို လာမည့် စက်တင်ဘာ ၁၂ ရက်တွင် စတင်မည်ဖြစ်ပြီး၊ သင်တန်း သား ၁၀၀ ဦးအထိ လက်ခံသင်ကြားပေးမည်ဖြစ်ကာ စက်ချုပ်သင်တန်း၊ တံဆိပ်ရိုက်သင်တန်း၊ ဓာတ်ပုံသင်တန်း၊ ဆံသသင်တန်း၊ ကွန်ပျူတာသင်တန်းများကို သင်ကြားပေးသွားမည်ဖြစ်ကြောင်း သိရသည်။
သင်တန်းတက်ရောက်ခွင့်ရသူ တစ်ဦးချင်းကို သင်ထောက်ကူပစ္စည်းများ ထောက်ပံ့မည်ဖြစ်ပြီး နယ်ကလာရောက်သူများကို အသွားအပြန် ခရီးစရိတ်ထောက်ပံ့မည်ဖြစ်သည်။
အသေးစိတ်အချက်အလက်များကို ရန်ကုန်မြို့၊ မရမ်းကုန်းမြို့နယ်၊ ကျိုက်ဝိုင်းဘုရားလမ်း၊ အမှတ် ၆၅ လူမှုဝန်ထမ်း အတတ်သင် သိပ္ပံကျောင်းဝင်း အတွင်းရှိ မသန်စွမ်းသက်ကြီး သင်တန်းကျောင်း ဖုန်း ၀၁-၉၆၆၁၇၁၂၊ ၀၉-၂၅၀၄၀၂၃၉၂၊ ၀၉-၄၂၁၀၀၃၅၆၀ သို ရုံးချိန် အတွင်း ဆက်သွယ်စုံစမ်းနိုင်ကြောင်း သိရသည်။
ymg/NN
#Yangon_Media_Group
#Local_News
Published _ 10 August 2022
ရွှေတိဂုံစေတီတော်မြတ်ကြီးသို့ ပြီးခဲ့သည့် ဇူလိုင်အတွင်း နိုင်ငံခြားသား ခရီးသွားဧည့်သည်ဦးရေ ၁၈၀ဝ ကျော် လာရောက် ဖူးမြော်ကြည်ညိုခဲ့ကြောင်း ရွှေတိဂုံစေတီတော် ဘဏ္ဍာထိန်း ဂေါပကအဖွဲ့ထံက သိရသည်။
နိုင်ငံခြားခရီးသွားဧည့်သည် အမျိုးသား ၁၁၂၁ ဦးနှင့် အမျိုးသမီး ၇၅၀ ဦး၊ စုစုပေါင်း ၁၈၇၁ ဦး လာရောက်ဖူးမြော်ခဲ့ ခြင်းဖြစ်ပြီး အများစုမှာ အာဆီယံဒေသ တွင်းနိုင်ငံများနှင့် အာရှနိုင်ငံများမှဖြစ်ကာ ရွှေတိဂုံစေတီတော်မြတ်ကြီး ရင်ပြင်တော်ပေါ်နှင့် ဘုရားပရိဝုဏ်အတွင်းရှိ ဘုရားစေတီပုထိုးများနှင့် ဗုဒ္ဓသာသနိက အဆောက်အအုံများကို စိတ်ဝင်တစား လေ့လာခဲ့ကြသည်။
ရွှေတိဂုံစေတီတော်မြတ်ကြီးသို့ ပြီးခဲ့သည့် ဇူလိုင်လအတွင်း ပြည်တွင်းဘုရားဖူးများ ဝင်ရောက်မှုအနေဖြင့် သံဃာတော် ၁၀၈၃၄ ပါး၊ သာသနာ့နွယ်ဝင် သီလရှင် ၇၃၄၀ ပါး၊ လူပုဂ္ဂိုလ် အမျိုးသား ၅၀၄၄၁၄ ဦးနှင့် အမျိုးသမီး ၅၉၁၅၈၇ ဦးတို့ လာရောက်ဖူးမြော်ကြည်ညိုခဲ့ကြပြီး အများ ပြည်သူရုံးပိတ်ရက်များဖြစ်သည့် စနေ၊ တနင်္ဂနွေနေ့များနှင့် အခါကြီးရက်ကြီးများတွင် ပိုမိုလာရောက်ကြကြောင်းလည်း သိရသည်။
ရွှေတိဂုံစေတီတော်မြတ်ကြီးကို ကိုဗစ်-၁၉ ရောဂါကူးစက်မှုကာလအတွင်း ယာယီပိတ်ထားခဲ့ပြီးနောက် ပြည်တွင်း၌ ကိုဗစ်-၁၉ ရောဂါကူးစက်မှုများ လျော့ကျလာသောအခါ ရဟန်းရှင်လူ ပြည်သူများလာရောက်ဖူးမြော်နိုင်စေရန် ၂၀၂၁ ခုနှစ်၊ ဧပြီ ၁၇ ရက်မှစတင်ကာ နံနက် ၆ နာရီမှ ညနေ ၆ နာရီအထိ ပြန်လည်ဖွင့်လှစ်ပေးထားသည်။
ယခုအခါ ရပ်ဝေးရပ်နီးက လာရောက် ဖူးမြော်ကြသည့် ဘုရားဖူးပြည်သူများ အားလုံးအတွက် ပိုမိုအဆင်ပြေစေရန် ၂၀၂၂ ခုနှစ်၊ မတ် ၂၆ ရက်မှစ၍ နံနက် ၅ နာရီမှ ည ၈ နာရီအထိ အချိန်တိုးမြှင့် သတ်မှတ်ကာ ဖွင့်လှစ်ပေးထားကြောင်း သိရသည်။
ymg/NN
#Yangon_Media_Group
#Local_News
Published -10 August 2022
ယနေ့ နံနက်ပိုင်းတွင် လှိုင်သာယာ စက်မှုဇုန် ၂ ၌ မီးလောင်မှုဖြစ်ပွားခဲ့ပြီး Level 2 အဆင့် ငြိမ်းသတ်ခဲ့ရကြောင်း မီးသတ်တပ်ဖွဲက ထုတ်ပြန်ထားသည်။
ဖြစ်စဉ်မှာ နံနက် ၆ နာရီခွဲအချိန်ခန့် ရန်ကုန်တိုင်း၊ လှိုင်သာယာမြို့နယ်၊ စက်မှုဇုန်(၂)၊ ဆိပ်ကမ်းသာလမ်းတွင် မီးလောင်မှုဖြစ်ပွားခဲ့ခြင်းဖြစ်ပြီးကုန်တွဲရုံ ၃ ရုံနှင့် နံဘေးရှိ ကျောပိုးအိတ်စက်ရုံပါ မီးကူး၍ တစ်ခြမ်းပါသွားကြောင်း သိရသည်။
ယင်းမီးလောင်မှုဖြစ်စဉ်ကို level 2ယာဉ်အုပ်စုများ ထွက်ခွာငြှိမ်းသတ်ခဲ့ပြီး ၈ နာရီခန့်တွင် မီးငြိမ်းသွားသော်လည်း မီးလောင်မှုဖြစ်စဉ်နှင့် ပျက်ဆီးဆုံးရှုံးမှုတန်ဖိုးကို မသိရသေးကြောင်း သိရသည်။
ymg/NN
#Yangon_Media_Group
Page 1386 of 1769
