#Local_News
Published -18 August 2022
ငွေလွှဲ၊ ငွေထုတ်သူများကို လျှို့ဝှက်ဓာတ်ပုံရိုက်ထားရန်နှင့် မိုဘိုင်းငွေကြေး လုပ်ငန်းများကို CCTV ကင်မရာ တပ်ဆင်ထားရန် ဗဟိုဘဏ် ညွှန်ကြားချက်ထုတ်ထားကြောင်း သိရသည်။
KBZ Pay ၊ Wave Money စသည့် မိုဘိုင်းငွေကြေး ဝန်ဆောင်မှုလုပ်ငန်း လုပ်သည့်သူများအနေဖြင့် ငွေလွှဲငွေထုတ်သူတွေကို မှတ်တမ်းတင်ထားနိုင်ရန်နှင့် ဆိုင်များတွင် CCTV ကင်မရာတပ်ဆင်ခြင်း (သို့မဟုတ်) ငွေလွှဲ၊ ငွေထုတ်သူတွေကို လျှို့ဝှက်ဓာတ်ပုံရိုက်ယူထားရန် ဗဟိုဘဏ်က အသိပေးချက်ထုတ်ထားသည်။
ယင်းအပြင် ဩဂုတ်လ ၁၅ ရက်နေ့မှ စပြီး မိုဘိုင်းငွေစာရင်းအသစ်ဖွင့်လှစ်ခြင်းကို အမည်၊ နိုင်ငံသားစိစစ်ရေးကတ်ပြား အရှေ့/အနောက်ပုံ၊ ဖုန်းနံပါတ်၊ Face ID (Live Photo) စတဲ့ Know Your Customer (KYC) အချက်အလက် အပြည့်အစုံ ရယူပြီးမှ ဖွင့်လှစ်ပေးရန်လည်း ညွှန်ကြားထားသည်။
ငွေလွှဲသူနှင့် ငွေလက်ခံသူများ၏ အမည်၊ နိုင်ငံသားစိစစ်ရေးကတ်နံပါတ်၊ ဖုန်းနံပါတ်၊ နေရပ်လိပ်စာတွေ ငွေလွှဲပေးတဲ့ အကြောင်းအရင်းကိုလည်း အပြည့်အစုံရယူထားရန်လည်း အသိပေးထားသည်။
ymg/sth
#Yangon_Media_Group
#Local_News
Published _ 18 August 2022
စက်သုံးဆီစျေးနှုန်းများ ယနေ့ သြဂုတ်လ ၁၈ ရက်တွင်၂၂၀၀ ကျပ်ကျော်သို ပြန်လည်ရောက်ရှိခဲ့သဖြင့် ရန်ကုန်တိုင်းအတွင်း 92 Ron တစ် လီတာလျင် ၂၂၉၀ ကျပ်ဖြစ်လာခဲ့သည်ကို စက်သုံးဆီတင်သွင်းသို လှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှ ထုတ်ပြန်သည့် ရည်ညွှန်းလက်လီစျေးနှုန်းများအရ သိရသည်။
မန္တလေး၊ နေပြည်တော်၊ ပဲခူး၊ မကွေး၊ ထားဝယ်၊ မုံရွာ၊ ပုသိမ်၊ ဘားအံ၊ မော်လမြိုင်၊ လားရှိုး၊ တောင်ကြီး၊ လွိုင်ကော်တို့တွင်လည်း 92 Ron တစ်လီတာလျင် ၂၃၀၀ ကျပ်ကျော်ရှိကြောင်း သိရသည်။
ယင်းပြင် မြစ်ကြီးနားနှင့်စစ်တွေမြို့များတွင် 92 Ron တစ်လီတာလျင် ၂၄၀၀ ကျပ်ကျော်၊ ဟားခါးတွင် ၂၅၀၀ ကျပ်ကျော်နှင့် ကျိုင်းတုံတွင် ၂၉၀၀ ကျပ် ကျော်ရှိကြောင်း သိရသည်။
စက်သုံးဆီတင်သွင်းသိုလှောင်ဖြန့်ဖြူခြင်းလုပ် ငန်းကြီးကြပ်ရေးကော်မတီ၏ ယနေ့ထုတ်ပြန်ခဲ့သည့် စက်သုံးဆီရည်ညွှန်းစျေးနှုန်းများအရ ရန်ကုန်တိုင်းအတွင်း၌ လက်လီစျေးအဖြစ် 92 Ron တစ်လီတာလျင် ၂၂၉၀ ကျပ်၊ 95 Ron တစ်လီတာလျင် ၂၃၇၀ ကျပ်၊ HSD (500 ppm) တစ်လီတာလျင် ၂၆၈၅ ကျပ် သတ်မှတ်ခဲ့သည်။
HSD (50 ppm)နှင့် HSD (10 ppm)တိုမှာ တစ်လီတာလျင် ၂၇၆၀ ကျပ်အဖြစ် စက်သုံးဆီရည်ညွှန်းလက်လီစျေးနှုန်းများအဖြစ် သတ်မှတ်ခဲ့သည်။
စက်သုံးဆီတင်သွင်းသိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီ၏ စက်သုံးဆီရည်ညွန်းလက်ကားစျေးနှုန်းမှာလည်း ရန်ကုန်တိုင်း၌ 92 Ron တစ်လီတာလျင် ၂၁၈၃ ကျပ်၊ 95 Ron တစ်လီတာလျင် ၂၂၆၀ ကျပ်၊ HSD(500 ppm) တစ်လီတာလျင် ၂၅၆၆ ကျပ်၊ HSD (50 ppm)နှင့် HSD(10 ppm)တိုမှာ တစ်လီတာလျင် ၂၆၃၉ ကျပ်တိုဖြစ်သည်။
ယင်းစျေးနှုန်းများအား စက်သုံးဆီတင်သွင်းသိုလှောင်ဖြန့်ဖြူခြင်းလုပ်ငန်းကြီးကြပ်ရေးကော်မတီမှ MOPS စျေးနှုန်းအပေါ်တွင် အခြေခံတွက်ချက်ထားခြင်းဖြစ်ကာ စက်သုံးဆီဝယ်ယူသူများအနေဖြင့် ကျေနပ်မှုမရှိပါက ကော်မတီထံ ဆက်သွယ်တိုင်ကြားနိုင်ကြောင်းလည်း သိရသည်။
ymg/NN
#Yangon_Media_Group
#Local_News
Published _ 18 August 2022
လာမည့်သုံးနှစ်အတွင်း ပြည်ပသို့ဆန်တန်ချိန် လေးသန်းခန့်အထိ တိုးမြှင့်တင်ပို့နိုင်ရန် မျှော်မှန်းလုပ်ဆောင်နေကြောင်း မြန်မာနိုင်ငံဆန်စပါးကုန်သည်များအသင်းမှ သိရသည်၊၊
မြန်မာ့ဆန်တွေကို ပြည်ပက ဝယ်ယူမှု မြှင့်တက်လာတာကြောင့် ပုံမှန်ထက်ပိုမိုတင်ပို့လာနိုင်ပြီး လာမည့် ၂၀၂၅-၂၀၂၆ ခုနှစ်ဘဏ္ဍာနှစ်မှာ ဆန်တန်ချိန် လေးသန်းအထိ တိုးမြှင့်တင်ပို့ရန် စီစဉ်ထားကြောင်း သိရသည်။
လက်ရှိ မြန်မာနိုင်ငံမှ ပြည်ပသို့ တစ်လလျှင် ပျမ်းမျှ ဆန်တန်ချိန် နှစ်သိန်းခန့်တင်ပို့နေရပြီး ယခုဘဏ္ဍာနှစ်တွင် ပြည်ပသို့ဆန်တန်ချိန် နှစ်သန်းခန့် တင်ပို့နိုင်ရန် ဆောင်ရွက်နေကြောင်းလည်း သိရသည်။
ymg/NN
#Yangon_Media_Group
#Local_News
Published_ 18 Aug 2022
နှစ်စဉ်ပျဉ်းမျှ ဝါးအလုံးရေ ၁၄၇ သန်းနှင့် ကြိမ်အလုံးရေ ၄.၈ သန်းကျော် ထုတ်လုပ်နိုင်ခဲ့ပြီး ပြည်တွင်း/ပြည်ပဝင်ငွေများ ရှာဖွေပေးလျက်ရှိကြောင်း မြန်မာနိုင်ငံ ကြိမ်နှင့်ဝါး လုပ်ငန်းဖွံ့ဖြိုးတိုးတက်ရေး လုပ်ငန်းညှိနှိုင်း အစည်းအဝေးတွင် သယံဇာတနှင့် သဘာဝ ပတ်ဝန်းကျင် ထိန်းသိမ်းရေးဝန်ကြီးဌာနဝန်ကြီး ဦးခင်မောင်ရီက ပြောကြားခဲ့ပါတယ်။
မြန်မာနိုင်ငံသည် အာရှတွင်တတိယမြောက် ဝါးနှင့်ကြိမ် သယံဇာတ ကြွယ်ဝသော နိုင်ငံဖြစ်ပြီး ဝါးမျိုးစု ၂၁ မျိုးနှင့် ဝါးမျိုးစိတ် ၁၀၂ မျိုး၊ ကြိမ်မျိုးစု ၆ မျိုးနှင့် ကြိမ်မျိုးစိတ် ၃၂ မျိုး ပျံ့နှံ ပေါက်ရောက်လျက်ရှိရာ စီးပွားရေးအရ အရေးပါသော ဝါးမျိုးစိတ် ၁၈ မျိုးနှင့် ကြိမ်မျိုးစိတ် ၁၄ မျိုးရှိကြောင်း သိရပါတယ်။
ပြည်ပစျေးကွက်သို့ တင်ပို့ရောင်းချမှုတွင် ကုန်ကြမ်းများ တင်ပို့ခြင်းထက် ဝါးအချောထည်ပစ္စည်းများ တိုးမြှင့်ထုတ်လုပ် တင်ပို့နိုင်ရန် ကြိုးပမ်းဆောင်ရွက်သွားကြရန်၊ ကြိမ်နှင့် ဝါးအခြေခံ စက်မှုလုပ်ငန်းများ တိုးတက်လာစေရန်အတွက် စက်ရုံများအတွက်လိုအပ်သော ဝါးကုန်ကြမ်းများ စဉ်ဆက်မပြတ်ရရှိရေး သဘာဝတောများမှသာမက ဝါးစိုက်ခင်း များ တည်ထောင်၍ ဖြည့်ဆည်းဆောင်ရွက်သွားရန် ဝန်ကြီးက မှာကြားခဲ့ပါတယ်။
ဆက်လက်၍ တက်ရောက်လာသူများက ဝါး၊ ကြိမ် ပေါက်ရောက်မှု၊ ထုတ်လုပ်နိုင်မှု၊ စိုက်ပျိုး ပျိုးထောင်မှုနှင့် ဝါးအချောထည်ပစ္စည်းများ တိုးမြင့်ထုတ်လုပ်နိုင်ရေးနှင့် ပတ်သက်၍ လက်ရှိဆောင် ရွက်နေမှုများနှင့် ရှေ့ဆက်ဆောင်ရွက်မည့် အစီအမံများကို ဆွေးနွေးခဲ့ကြပါတယ်။
ထို့နောက်ဝန်ကြီးသည် သစ်အချောထည်စက်ရုံအတွင်း တန်ဖိုးမြှင့် သစ်အချော ထည် ပစ္စည်းများထုတ်လုပ်နေမှု လုပ်ငန်းအဆင့်ဆင့်နှင့် ဝါးကုန်ချောပစ္စည်းနှင့် ပရိဘောဂ ထုတ်လုပ်နေမှုကို လိုက်လံကြည့်ရှုခဲ့ပါတယ်။
မွန်းပိုင်းတွင် တောင်ဥက္ကလာပမြို့နယ်ရှိ Green Gold Industry သစ်အချောထည် စက်ရုံအတွင်း ကျွန်း၊ ပျဉ်းကတိုး ကြမ်းခင်း၊ လှေကား၊ တံခါးနှင့် ပရိဘောထုတ်လုပ်နေမှုကို သွားရောက်ကြည့်ရှု စစ်ဆေးခဲ့ကြောင်း သတင်းရရှိပါတယ်။
ygm_mnn
#Yangon_Media_Group
#Local_News
Published_ 18 Aug 2022
ရှမ်းပြည်နယ်(အရှေ့ပိုင်း)၊ ကျိုင်းတုံမြို့တွင် ငွေကျပ် ၁ ဒသမ ၄၆ ဘီလီယံကျော် တန်ဖိုးရှိစိတ်ပြောင်းဆေး အိုက်စ်(မက်သ်အဖက်တမင်း) ကီလို ၁၂၀ နှင့် ကက်တမင်း ၅၉ ကီလို ဖမ်းဆီးရမိခဲ့ကြောင်း မြန်မာနိုင်ငံ ရဲတပ်ဖွဲ့က သတင်းထုတ်ပြန်ထားပါတယ်။
မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဩဂုတ် ၁၅ ရက် နံနက် ၆ နာရီခွဲတွင် ရှမ်းပြည်နယ်(အရှေ့ပိုင်း)၊ ကျိုင်းတုံမြို့အဝင် ကျိုင်းဖောင်းစစ်ဆေးရေးဂိတ်တွင် စိုင်းတစ် မောင်းနှင်လာသည့် မော်တော်ဆိုင်ကယ်ကို သတင်းအရရှာဖွေခဲ့ပါတယ်။
ထိုသို့ရှာဖွေရာ ကက်တမင်း ၅၃ ကီလိုနှင့် အိုက်စ် (မက်သ်အဖက် တမင်း) ၁၄ ကီလို သိမ်းဆည်းရမိခဲ့ပြီး စစ်ဆေးဖော်ထုတ်ချက်အရ ၎င်းနှင့်အတူ စိုင်းဆမ်(ဘ)ဦးထမ်ဝုန်းအား နံနက် ၇ နာရီတွင် ကျိုင်းတုံမြို့၊ အကောက်ခွန်ရုံးရှေ့၌ မော်တော်ဆိုင်ကယ်တစ်စီး၊ အိုက်စ်(မက်သ်အဖက် တမင်း) ကီလို ၄၀ နှင့်လည်းကောင်း၊ စိုင်းဆမ်(ဘ)ဦးဖျာဝန်း နံနက် ၇ နာရီခွဲတွင် ကျိုင်းတုံ-တာချီလိတ်သွားကားလမ်း၊ ကျိုင်းတုံမြို့အထွက်တိုးဂိတ်၌ မော်တော်ဆိုင်ကယ်တစ်စီး၊ အိုက်စ်(မက်သ်အဖက်တမင်း) ၆၆ ကီလို၊ ကက်တမင်း ၆ ကီလိုနှင့်လည်းကောင်း အသီးသီး ဖမ်းဆီးရမိခဲ့ပါတယ်။
ဖမ်းဆီးရမိမှု စုစုပေါင်းမှာ ဒေသကာလတန်ဖိုးငွေကျပ် ၁ ဒသမ ၄၆ ဘီလီယံကျော် တန်ဖိုးရှိ စိတ်ပြောင်းဆေး အိုက်စ်(မက်သ်အဖက်တမင်း) ကီလို ၁၂၀ နှင့် ကက်တမင်း ၅၉ ကီလိုတို့ ဖြစ်ပါတယ်။
စစ်ဆေးဖော်ထုတ်ချက်အရ သိမ်းဆည်းရမိ စိတ်ပြောင်းဆေးများအား မိုင်းပျဉ်း မြိုနယ်မှ တာချီလိတ်မြို့နယ်သို့ သယ်ဆောင်ခြင်းဖြစ်ကြောင်း သိရသဖြင့် ၎င်းတို့အား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများကို ဆက်လက်စစ်ဆေး ဖော်ထုတ် လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။
ygm_mnn
#Yangon_Media_Group
#Local_News
Published -18 August 2022
အမေရိကန်ဒေါ်လာဈေးနှင့် ထိုင်းဘတ်ငွေဈေးများ မြင့်တက်နေမှုကြောင့် လက်ရှိ မြန်မာနိုင်ငံသို့ ထိုင်းသွင်းကုန်ပစ္စည်းများ တင်သွင်းနေမှု ရပ်တန့်လုနီးပါးဖြစ်နေကြောင်း မြ၀တီကုန်သည်များ၏ ပြောပြချက်အရ သိရသည်။
လက်ရှိပြည်တွင်းဒေါ်လာဈေးမှာ ဗဟိုဘဏ် သတ်မှတ်ရည်ညွှန်းဈေး တစ်ဒေါ်လာကျပ်၂၁၀၀ ဖြစ်သော်လည်း ပြင်ပဈေးကွက်တွင် ကျပ် ၂၉၅၀ ဝန်းကျင်အထိ ပေါက်ဈေးရှိနေသည့်အတွက် ဈေးနှုန်းကွာဟမှုများ ဖြစ်ပေါ်နေကြောင်း သိရသည်။
အလားတူ ထိုင်းဘတ်ငွေလဲလှယ်နှုန်းမှာ ပြီးခဲ့သည့် ရက်သတ္တပတ်အတွင်း တစ်ဘတ်လျှင် ၆၉ ဝန်းကျင်ရှိရာမှ လက်ရှိ တွင် ၇၅ ကျပ်ဝန်းကျင်သို ရောက်ရှိလာကာ ပို့ကုန်တင်ပို့နိုင်ခြေ လျော့နည်းလာသည့်အတွက်လည်း ထိုင်းဘတ်ငွေ ဈေးများဆက်လက်မြင့်တက်နိုင်ခြေရှိကြောင်း သိရသည်။
ယင်းကဲ့သို့ ထိုင်းဘတ်ငွေဈေး စံချိန်တင်မြင့်တက်လာပြီး ဘတ်ဈေးနှုန်းမှာ တစ်ရက်တည်း၌ပင် အတက်အကျ အပြောင်းအလဲဖြစ်နေသောကြောင့် ကုန်စည်ဈေးနှုန်းများမှာ အချိန်နှင့်အမျှ ပြောင်းလဲလျက်ရှိကာ ဈေးနှုန်းသတ်မှတ်နိုင်ခြင်းမရှိသည့်အတွက် ကုန်သည်များအနေဖြင့် အခက်အခဲများဖြစ်ပေါ်နေကြောင်း သိရသည်။
ဗဟိုဘဏ်အနေဖြင့် နယ်စပ်ကုန်သွယ်ရေးအတွက် ငွေကြေးသုံးစွဲခွင့်ကို ယခုနှစ်အစောပိုင်းက နိုင်ငံအလိုက်ငွေကြေးနှင့် မြန်မာကျပ်ငွေ တိုက်ရိုက်လဲလှယ်ခွင့်စနစ်ကျင့်သုံးခဲ့သော်လည်း လက်ရှိတွင် ဒေါ်လာဖြင့်သာပြန်လည်ပေးချေရန် ပြောင်းလဲသတ်မှတ်ထားခြင်း ဖြစ်သည်။
မြန်မာနိုင်ငံအနေဖြင့် လက်ရှိတွင် ထိုင်းမှ ဆပ်ပြာမှုန့်၊ အလှကုန်ပစ္စည်း၊ ယိုးဒယားစက်ဘီး၊ အခြေခံစားသောက်ကုန်၊ အရက်၊ ဘီယာ၊ အချိုရည်၊ အဝတ်အထည်၊ ကော်ပစ္စည်း၊ ဆေးဝါးအချို့၊ ဆိုင်ကယ်နှင့် ယာဉ်အပိုပစ္စည်းများကို တင်သွင်းနေ ခြင်းဖြစ်သည်။
ymg/sth
#Yangon_Media_Group
#Local_News
Published_18 August 2022
ရန်ကုန်တစ်ဖက်ကမ်း ဒလမြို့နယ်တွင် တည်ဆောက်နေသည့်အစိုးရ စက်မှုလက်မှု သိပ္ပံကျောင်းရာနှုန်းပြည့်ပြီးစီးနိုင်ရေး ပုဂ္ဂလိက လုပ်ငန်းရှင်များအား ဖိတ်ခေါ်ထားကြောင်း သိရသည်။
၂၀၂၂ - ၂၀၂၃ ဘဏ္ဍာနှစ်တွင် တည်ဆောက်ဆဲဖြစ်သော အဆိုပါ စက်မှုလက်မှု သိပ္ပံကျောင်းကို သိပ္ပံနှင့် နည်းပညာဝန်ကြီးဌာနကပြီးခဲ့သည့်၂၀၁၉ - ၂၀၂၀ ဘဏ္ဍာနှစ်ကတည်းကပင် ဒလမြို့နယ်၊ သပြေကုန်းကျေးရွာအနီး (၁၁/၁၄)ရက်ကွက်ရှိကွင်းအမှတ် (၁၈၆) ၊ မြေဧရိယာ ၂၅ ဧကပေါ်၌ စတင်ဆောက်လုပ်ခဲ့ခြင်းလည်း ဖြစ်သည်။
ယင်း စီမံကိန်းတွင် အလျား ၁၉၂ ပေ၊ အနံ ၃၉ ပေရှိ အာစီသုံးထပ်ဆောင်၊ သံကူကွန်ကရစ် လေးခန်းတွဲ လေးထပ် ဝန်ထမ်းအိမ်ရာ၊ အလျား ၁၂၅ ပေ၊ အနံ ၈၂ ပေ၊ အမြင့် ၁၈ ပေရှိ Steel Structure လက်တွေ့သင်ကြားရေး အဆောင်၊ သင်တန်းသား သင်တန်းသူအဆောင်၊ သံကူကွန်ကရစ်သုံးထပ်ပင်မဆောင်၊ အခြားအဆောက်အအုံများ ပါဝင်ရမည် ဖြစ်ကြောင်း သိရသည်။
လက်ရှိတွင်သင်တန်းသား၊ သင်တန်းသူ အဆောင် တည်ဆောက်ရေးလုပ်ငန်းတစ်ခုသာ ရာနှုန်းပြည့် ပြီးစီးနေပြီး ဆက်လက်တည်ဆောက်မည့် သံကူကွန်ကရစ်လေးခန်းတွဲ၊ လေးထပ်ဝန်ထမ်းအိမ်ရာတစ်လုံး၊ သံကူကွန်ကရစ်တစ်ထပ် အုပ်ချုပ်ဆောင်တစ်ဆောင်၊ kitchen Theatre အဆောက်အအုံတစ်ခု၊ အထွေထွေသုံးခန်းမဆောင်တစ် ဆောင်၊ မီးစက်ရုံများကို ယခုဘဏ္ဍာနှစ်တွင် အကောင်အထည်ဖော်ရန် ပုဂ္ဂလိလုပ်ငန်းရှင်များအား တင်ဒါစနစ်ဖြင့် ခေါ်ယူနေခြင်း ဖြစ်ကြောင်း သိရသည်။
အဆိုပါ စက်မှုလက်မှုသိပ္ပံကျောင်းမှ တစ်နှစ်လျှင် AGTI ဒီပလိုမာ ကျောင်းသား ကျောင်းသူ ဦးရေ ၃၀၀ ထိ လေ့ကျင့် မွေးထုတ်ပေးနိုင်မည် ဖြစ်ပြီဒ ဒလ၊ တွံတေး၊ ကော့မှူး၊ ဆိပ်ကြီးခနောင်တို၊ ကွမ်းခြံကုန်း၊ ဧရာဝတီတိုင်းဒေသကြီးတို့မှ ဒေသခံ လူငယ်များ သင်ကြားနိုင်မည် ဖြစ်ကြောင်း ၊ပြီးခဲ့သည့် အစိုးရလက်ထက်က အဆိုပါစီမံကိန်းတည်ဆောက်ရန် ခွင့်ပြုရန်ပုံငွေကျပ် သန်းပေါင်း (၄၀၀၀) ကျော် ခွင့်ပြုပေးထားပြီးဖြစ်ကြောင်း သိရသည်။
ယင်းကြောင့် စိတ်ဝင်စားသော ပြည်တွင်း စီးပွားရေးလုပ်ငန်းရှင်များ ၊ တိုင်းရင်းသားလုပ်ငန်းကုမ္ပဏီများ အနေဖြင့်ရန်ကုန်တိုင်း ဒေသကြီး၊ အင်းစိန်မြိုနယ်ရှိ အစိုးရစက်မှုလက်မှု သိပ္ပံတွင် လျှောက်လွှာပုံစံများကို ထုတ်ယူနိုင်ကာ စက်တင်ဘာလ ၁၄ရက် နောက်ဆုံးထား၍ တင်သွင်းနိုင်ကြောင်းလည်း သိရသည်။
ymg/mt
#Yangon_Media_Group
Page 1368 of 1769
