#Local_News
Published_ 20 September 2022

ရုရှားနိုင်ငံကပြုလုပ်သည့်ငွေပေးချေမှု MIR Card ကို မြန်မာတွင် အသုံးပြုရေးအတွက် ဆွေးနွေးလျက်ရှိကြောင်း နစက၏ သတင်းထုတ်ပြန်ရေးအဖွဲ့ခေါင်းဆောင်၊ ပြန်ကြားရေးဝန်ကြီးဌာန၊ ဒုတိယဝန်ကြီး ဗိုလ်ချုပ်ဇော်မင်းထွန်းက ပြောသည်၊၊

စက်တင်ဘာလ(၂၀)ရက်က ပြုလုပ်သည့်နစက၏ (၂၀)ကြိမ်မြောက်သတင်းစာရှင်းလင်းပွဲတွင် ထည့်သွင်းပြောခဲ့ခြင်း ဖြစ်သည်၊၊

ဗိုလ်ချုပ်ဇော်မင်းထွန်းက"ရုရှားနိုင်ငံက ပြုလုပ်တဲ့ MIR Card ကို လျှင်မြန်စွာ အသုံးပြုနိုင်ရေးအတွက် ရုရှားငွေရေးကြေးရေးအဖွဲ့အစည်းတွေက ကူညီဆောင်ရွက်ပေးသွားမှာဖြစ်ပြီး ရုရှားနိုင်ငံရဲ့ MIR Card မြန်မာနိုင်ငံရဲ့ငွေပေးချေမှုစနစ်မှာ အသုံးပြုနိုင်ရေးအတွက်ဆွေးနွေးလျက်ရှိပါတယ်၊၊ လာမယ့် နိုဝင်ဘာလမှာ တတိယအကြိမ်ရုရှားမြန်မာ အစိုးရ အချင်းချင်းကုန်သွယ်ရေးနဲ့ စီးပွားရေးပူးပေါင်းဆောင်ရွက်မှုကော်မရှင်အစည်းအဝေးရှိပါတယ်၊၊ အဲဒီ့အစည်းအဝေးမတိုင်မီမှာ ရုရှားနိုင်ငံဗဟိုဘဏ်ငွေကြေးဆိုင်ရာ စာတိုပို့စနစ် SPFF စတဲ့ ရုရှားနိုင်ငံဘဏ်တွေနဲ့ အမြန်ဆုံးချိတ်ဆက်ဆောင်ရွက်သွားမှာ ဖြစ်ပါတယ်၊၊ အဲဒီ့အချိန်မှာ ရူဘယ်နဲ့ကျပ်တိုက်ရိုက်ပေးချေနိုင်ဖို့အတွက် မြန်မာနိုင်ငံရှိ ဘဏ်တွေအနေနဲ့ ရုရှားဘဏ်တွေမှာ အကောင့်ဖွင့်နိုင်ဖို့နဲ့ SPFF အသုံးပြုနိုင်ဖို့အရေးပါလာမှာ ဖြစ်ပါတယ်"လို့ ထည့်သွင်းပြောခဲ့သည်၊၊

နှစ်နိုင်ငံငွေကြေး တိုက်ရိုက်လဲလှယ်ရာတွင် ဘဏ်လုံခြုံရေးစနစ်နဲ့ နည်းပညာသတင်းအချက်အလက်များ အသင့်အနေအထားရှိရမည်ဖြစ်ကြောင်းနှင့် ရုရှား-မြန်မာနှစ်နိုင်ငံဗဟိုဘဏ်များ အချင်းချင်းပူးပေါင်းဆောင်ရွက်မှုနားလည်မှု စာချွန်လွှာကို မြန်မာနိုင်ငံအနေနဲ့လက်မှတ်ရေးထိုးဆောင်ရွက်နိုင်ခဲ့ကြောင်း ဗိုလ်ချုပ်ဇော်မင်းထွန်းကထည့်သွင်း ပြောကြားခဲ့သည်၊၊

#ymg/tthl
#Yangon_Media_Group

#Local_News
Published - 20 September 2022

မှတ်ပုံတင်အတုဖြင့် ရန်ကုန်သို့သွားမည့် ဘင်္ဂါလီ ၂ ဦးကို ရခိုင်ပြည်နယ် စစ်တွေလေဆိပ်၌ ဖမ်းမိခဲ့ကြောင်း ရခိုင်ပြည်နယ် အစိုးရအဖွဲ့က သိရသည်။

စက်တင်ဘာလ ၁၉ ရက် ညနေ ၅ နာရီခွဲခန့်က အပြည်ပြည်ဆိုင်ရာ မြန်မာ့လေကြောင်းလိုင်းဖြင့် ရန်ကုန်သို့ လိုက်ပါမည်ခရီးသည်များအား မှတ်ပုံတင် စစ်ဆေးခြင်းဆောင်ရွက်စဉ် ခရီးသည် ၂ ဦး၏ မှတ်ပုံတင်ကို သံသယရှိသဖြင့် မြို့နယ်လဝကရုံးသို့ ပို့ဆောင်စစ်ဆေးခဲ့ရာမှ ဖမ်းဆီးမိခြင်း ဖြစ်သည်။

မှတ်ပုံတင်အတုပေါ်တွင် ၎င်းတို့၏အမည်နှင့် နေရပ်လိပ်စာများမှာ ကျော်ဌေး(၃၅)နှစ်၊ (ဘ)ဦးကျော်စန်း၊ သာယာကုန်းရွာ၊ စစ်တွေမြိုနယ်၊ ဝေယံထွန်း (၂၂)နှစ်၊ (ဘ)ဦးစိုးထွန်း၊ သက္ကေပြင်ရွာမကျေးရွာ၊ စစ်တွေမြိုနယ်ဟု ဖော်ပြထားသော်လည်း စစ်ဆေးချက်အရ ၎င်းတို၏ အမည်မှန်မှာ အဒူရော်ဟိန်း (၃၅)နှစ်၊ (ဘ)ဟာလာခမ်း၊ ဒါးပိုင်းရွာဟောင်း၊ စစ်တွေမြိုနယ်၊ အဒူရာမန် (၁၈)နှစ်၊ (ဘ)အဒူလာရှိန်း၊ သဲချောင်းကျေးရွာအုပ်စု၊ ဇင်ပိုင်ညှာရွာ၊ စစ်တွေမြို့နယ်နေသူတို့ဖြစ်ကြောင်း သိရသည်။

၎င်းတို့ ၂ ဦးမှာ ရန်ကုန်သို့ သွားရောက်ရန် မှတ်ပုံတင်အတုပြုလုပ်ပေးသူနှင့် ချိတ်ဆက်ခဲ့ပြီး လေယာဉ်လက်မှတ်အပါအဝင် တစ်ဦးလျှင် ငွေကျပ် ၁၀ သိန်း ပေးခဲ့ရကြောင်းနှင့် ရန်ကုန်လေဆိပ်တွင် ဆွေမျိုးတော်စပ်သူ ဆူလ်တန်အာမောက် ဆိုသူမှ လာရောက်ကြိုဆိုမည်ဖြစ်ပြီး ရန်ကုန်မှတစ်ဆင့် မလေးရှားနိုင်ငံသို့ သွားရောက်ရန် စီစဉ်ထားကြကြောင်းလည်း သိရသည်။

ယခုအခါ ယင်းဖမ်းဆီးရမိဘင်္ဂါလီ ၂ ဦးကို အမှုဖွင့်အရေးယူထားပြီး မှတ်ပုံတင်အတု ပြုလုပ်ပေးသူအား ဖမ်းဆီးရမိရေး ဆောင်ရွက်လျက်ရှိကြောင်း အစိုးရအဖွဲ့က သတင်းရရှိသည်။

#ymg/mt
#Yangon_Media_Group

#Local_News
Published - 20 September 2022

သက်တမ်းကုန်ဆုံးမည့် မော်တော်ယာဉ်နှင့်မော်တော်ဆိုင်ကယ်များအားလုံးကို ယာဉ်စစ်ဆေးခြင်းမပြုဘဲ ဖြေလျှော့၍ သက်တမ်းတိုးဆောင်ရွက်ပေးမည်ဖြစ်ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာန ကုန်းလမ်းပို့ဆောင်ရေးညွှန်ကြားမှုဦးစီးဌာနက စက်တင်ဘာလ ၁၉ ရက်က သတင်းထုတ်ပြန်လိုက်သည်။

ကိုဗစ်-၁၉ ကပ်ရောဂါကြောင့် ခေတ္တရပ်ဆိုင်းခဲ့ရသည့် မော်တော်ယာဉ်၊ မော်တော်ဆိုင်ကယ် နှစ်လဲသက်တမ်းတိုးလုပ်ငန်းများ ပြန်လည်ဖွင့်လှစ်ဆောင်ရွက်ရာတွင် ရုံးများ၌ လူစုလူဝေး အနည်းဆုံး ဖြစ်စေရေးနှင့် လုပ်ငန်းများ မြန်ဆန်စွာပြီးစီးရေးအတွက် တိုင်းဒေသကြီး၊ ပြည်နယ်၊ခရိုင်ရုံးများရှိ မှတ်ပုံတင်ထားသည့် မော်တော်ယာဉ်နှင့် မော်တော်ဆိုင်ကယ်များအနက် Road Safety ဖြစ်စေရေး အရေးကြီးသည့် အများပြည်သူသယ်ယူပို့ဆောင်သည့်ခရီးသည်တင်ယာဉ်များကိုသာ ယာဉ်စစ်ဆေး၍ အခြားမော်တော်ယာဉ်နှင့် မော်တော်ဆိုင်ကယ်များအားလုံးကို ယာဉ်စစ်ဆေးခြင်းမပြုဘဲ မှတ်တမ်းနှင့်သာ တိုက်ဆိုင်စစ်ဆေး၍ ယာဉ်စစ်ကင်းလွတ်ဖြင့် သက်တမ်းတိုးခြင်းကို သက်ဆိုင်ရာ ဌာနများသို ညွှန်ကြားထားရှိပြီးဖြစ်ကြောင်းလည်း ယင်းထုတ်ပြန်ချက်တွင် ဖော်ပြထားသည်။

ယင်းကြောင့် ပြည်သူသယ်ယူပို့ဆောင်သည့်ခရီးသည်တင်ယာဉ်များကိုသာ ယာဉ်စစ်ဆေး၍ အခြားမော်တော်ယာဉ် နှင့်မော်တော်ဆိုင်ကယ်များအားလုံးကို ယာဉ်စစ်ဆေးခြင်းမပြုဘဲ မှတ်တမ်းနှင့်သာတိုက်ဆိုင်စစ် ဆေး၍ ယာဉ်စစ်ကင်းလွတ်ဖြင့် သက်တမ်းတိုးဆောင်ရွက်ပေးသွားရန်ဖြစ်ကြောင်း သိရသည်။

#ymg/mt
#Yangon_Media_Group

#Local_News
Published_ 20 September 2022

ပညာရေးဝန်ကြီးဌာနအနေဖြင့် တက္ကသိုလ်နည်းပြ၊ သရုပ်ပြဆရာ/ဆရာမများအဖြစ် ၂၀၂၂ ခုနှစ် မေလ ၁၈ ရက်တွင် ၁၄၇၉ ဦး၊ စက်တင်ဘာလ ၁၅ ရက်တွင် ၈၆၂ ဦးဖြင့် စုစုပေါင်း ၂၃၄၁ ဦးကို ရွေးချယ်ခန့်အပ်နိုင်ခဲ့ကြောင်း သိရပါတယ်။

စက်တင်ဘာ ၁၉ ရက် နံနက်ပိုင်းတွင် ပညာရေးဝန်ကြီးဌာနမှာ ကျင်းပတဲ့ ပညာရေးဝန်ကြီးဌာနရဲ့ တက္ကသိုလ်၊ ဒီဂရီကောလိပ်များတွင် အသစ်ခန့်အပ်သော သစ်လွင်နည်းပြ၊ သရုပ်ပြ ဆရာဆရာမများအား ကြိုဆိုပွဲအခမ်းအနားတွင် ပညာရေး ဝန်ကြီးဌာနဝန်ကြီး ဒေါက်တာညွန့်ဖေရဲ့ ပြောကြားချက်အရ သိရပါတယ်။

ထို့ပြင်ဝန်ကြီးက သစ်လွင်နည်းပြ၊ သရုပ်ပြ ဆရာဆရာမများ အနေဖြင့် ပညာရည် မြင့်မားသည့် မျိုးဆက်သစ်များကို မွေးထုတ်ပေးရမည့် တာဝန်ရှိလာသည်နှင့်အညီ မိမိတို့ကိုယ်တိုင် ပညာအရည်အသွေး၊ အရည်အချင်းများ ပြည့်ဝအောင် အမြဲလေ့လာ သင်ယူနေကြရမယ်လို့ ဆိုပါတယ်။

အခမ်းအနားသို့ ဒုတိယဝန်ကြီး ဦးဇော်ဝင်း၊ အမြဲတမ်းအတွင်းဝန် ဒေါက်တာစိုးဝင်း၊ ဦးစီးဌာနများမှ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်များ၊ ဒုတိယ ညွှန်ကြားရေးမှူးချုပ်များနှင့် တာဝန်ရှိသူများ တက်ရောက်ကြပြီး တက္ကသိုလ်များ၊ ပညာရေး ဒီဂရီကောလိပ်များမှ ပါမောက္ခချုပ်များ၊ ကျောင်းအုပ်ကြီးများ၊ ဒုတိယ ပါမောက္ခချုပ်များ၊ ပါမောက္ခများနှင့် အသစ်ခန့်အပ်သော သစ်လွင်နည်းပြ၊ သရုပ်ပြ ဆရာဆရာမများက ဗီဒီယိုကွန်ဖရင့်ဖြင့် တက်ရောက်ခဲ့ကြကြောင်း သတင်းရရှိပါတယ်။

#ygm_mnn
#Yangon_Media_Group

#Local_News
Published -20 Sept 2022

ဘင်္ဂလားဒေ့ရှ်ပိုင်နက်နယ်မြေအတွင်း AA အဖွဲ့နှင့် ARSA အကြမ်းဖက်အဖွဲ့တို့၏ ခြေကုပ်စခန်းများတည်ရှိသည့် အချက်အလက်များကို ဘင်္ဂလားဒေ့ရှ်ဘက်သို့ စက်တင်ဘာလ ၇ ရက်၊ ရက်စွဲပါ သံတမန်စာဖြင့် ပေးပို့ပြီးဖြစ်သောကြောင့် ယင်းကိစ္စကို ဘင်္ဂလားဒေ့ရှ်ဘက်မှ မြေပြင်တွင် စုံစမ်းစစ်ဆေးအရေးယူမှုများ ချက်ချင်းပြုလုပ်ပေးရန် နိုင်ငံခြားရေးဝန်ကြီးဌာန၊ မဟာဗျူဟာလေ့လာရေးနှင့် လေ့ကျင့်ရေးဦးစီးဌာန၊ ညွှန်ကြားရေးမှူးချုပ် ဦးဇော်ဖြိုးဝင်းက မြန်မာနိုင်ငံဆိုင်ရာ ဘင်္ဂလားဒေ့ရှ် သံအမတ်ကြီး မစ္စတာ မန်ဂျူရူလ် ကရင်လ်ခမ်ချောင်ဒရီ အား စက်တင်ဘာလ ၁၉ ရက် နံနက် ၉ နာရီခွဲအချိန်က နိုင်ငံခြားရေးဝန်ကြီးဌာန (ရန်ကုန်)၌ ခေါ်ယူတွေ့ဆုံပြောကြားခဲ့ကြောင်း နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။

ယင်းသို့တွေ့ဆုံစဉ် မြန်မာ-ဘင်္ဂလားဒေ့ရှ် နှစ်နိုင်ငံနယ်နိမိတ်အနီး မကြာမီက ဖြစ်ပွား ခဲ့သည့် ပစ်ခတ်မှုဖြစ်စဉ်များနှင့်ပတ်သက်၍ ဘင်္ဂလားဒေ့ရှ်နိုင်ငံခြားရေး ဝန်ကြီးဌာန၊ ညွှန်ကြားရေးမှူးချုပ်က ဘင်္ဂလားဒေ့ရှ်နိုင်ငံဆိုင်ရာ မြန်မာသံအမတ်ကြီးအား ပကတိအခြေအနေမှန်ကို ရှင်းလင်းပြောကြား တုန့်ပြန်ခဲ့ကြောင်းလည်း သိရသည်။

အဆိုပါ တွေ့ဆုံမှုတွင် AA အဖွဲ့နှင့် ARSA အကြမ်းဖက်အဖွဲ့ပူးပေါင်း၍ မြန်မာ-ဘင်္ဂလားဒေ့ရှ် နှစ်နိုင်ငံနယ်နိမိတ်မှတ်တိုင်၊ BP-၃၁ အနီး လုံခြုံရေး ဆောင်ရွက်လျက်ရှိသည့် တောင်ပြိုဝဲရဲကင်းစခန်းကို မော်တာကျည်များဖြင့် ပစ်ခတ်တိုက်ခိုက်ခဲ့ရာ အဆိုပါ မော်တာကျည် (၃)လုံး ဘင်္ဂလားဒေ့ရှ်နိုင်ငံ ဘက်ခြမ်းသို့ ကျရောက်ခဲ့ကြောင်း၊အလားတူ စက်တင်ဘာလ (၁၆) ရက် နှင့် (၁၇) ရက်တိုတွင် မြန်မာ-ဘင်္ဂလားဒေ့ရှ် နှစ်နိုင်ငံနယ်နိမိတ်မှတ်တိုင်၊ BP-၃၄ အနီး တောင်ပြိုယာ ရဲကင်းစခန်းကို မော်တာကျည်များဖြင့် တိုက်ခိုက်ခဲ့ရာ မော်တာကျည် (၉)လုံးဘင်္ဂလားဒေ့ရှ်နိုင်ငံဘက်ခြမ်းသို့ ကျရောက်ခဲ့ကြောင်း ညွှန်ကြားရေးမှူးချုပ် ဦးဇော်ဖြိုးဝင်းက ရှင်းလင်းပြောကြားခဲ့သည်။

ယင်းကဲ့သို့ နှစ်နိုင်ငံနယ်နိမိတ် နယ်စပ်ခြံစည်းရိုးအနီးမှနေ၍ ပစ်ခတ်တိုက်ခိုက်နေမှုများသည် မြန်မာ-ဘင်္ဂလားဒေ့ရှ် နှစ်နိုင်ငံ ချစ်ကြည်ရေး ပျက်ပြားအောင် ရည်ရွယ်ချက်ရှိရှိဖြင့် လုပ်ဆောင်ခဲ့ခြင်းဖြစ်ကြောင်း ၊ မြန်မာဘက် တာဝန်ရှိသူများအနေဖြင့် နှစ်နိုင်ငံ နယ်နိမိတ်အနီး လိုအပ်သည့် လုံခြုံရေးကိစ္စများ ဆောင်ရွက်ရာတွင် နှစ်နိုင်ငံ သဘောတူညီချက်များနှင့် နိုင်ငံတကာစံနှုန်းများကို လေးစားလိုက်နာ ဆောင်ရွက်ပြီး၊ ထိန်းထိန်းသိမ်းသိမ်းဖြင့် ဆောင်ရွက်လျက်ရှိကြောင်း၊ ဘင်္ဂလားဒေ့ရှ်နိုင်ငံအပါအဝင် အခြားနိုင်ငံများ၏ အချုပ်အခြာ အာဏာပိုင်ဆိုင်မှုနှင့် နယ်မြေတည်တံ့မှုကို လေးစားကြောင်း၊ နှစ်နိုင်ငံနယ်စပ်တစ်လျှောက် တည်ငြိမ်အေးချမ်းမှုကို ထိန်းသိမ်းရန် ဘင်္ဂလားဒေ့ရှ်ဘက်နှင့် ပူးပေါင်း ဆောင်ရွက်သွားမည် ဖြစ်သကဲ့သို့ ဘင်္ဂလားဒေ့ရှ်ဘက်၏ အပြည့်အဝ ပူးပေါင်းဆောင်ရွက်မှုကလည်း အလွန် အရေးကြီးကြောင်း အသိပေးပြောကြားခဲ့ကြောင်း သိရသည်။

#ymg/mt
#Yangon_Media_Group

#Local_News
Published_ 19 September 2022

ကိုဗစ်ပိုးတွေ့သူတွေများပြားလာတဲ့အတွက် မွန်ပြည်နယ်မှာကိုဗစ်နဲ့ပတ်သက်လို့ ကုသနိုင်တဲ့ဆေးရုံ(၃၃)ရုံနဲ့ ကွာရန်တင်းစင်တာ(၂၅)ခုကြိုတင်ပြင်ဆင်ထားတယ်လို့ မွန်ပြည်နယ်၊ ပြည်သူ့ကျန်းမာရေးဦးစီးဌာနမှူးဒေါက်တာနန္ဒာဝင်းက ပြောပါတယ်၊၊

#Yangon_Media_Group