#Local_News
Published _ 29 September 2022

ငြုတ်သီးစိုက်ပျိုး၊ တင်ပို့ရောင်းချတဲ့ ဒေသတွေမှာ အခုလက်ရှိအနေအထားအရ အခြောက်ခံရောင်းချမှုထက် ငြုတ်သီးအစိုကိုသာ တင်ပို့ရောင်းချတာတွေ ပိုများနေတယ်လို့ ငြုတ်သီးအစို၊ အခြောက် ရောင်းဝယ်ရေးကုန်စည်ဒိုင်တွေဆီကနေ သိရပါတယ်။

#Yangon_Media_Group

#DailyNews
Published _ 29 September 2022

၁။ နယ်ဘက်တွင် ငြုတ်သီးအစိုရောင်းချမှု ပိုများနေ၍ ငြုတ်သီးအခြောက်ဈေး ၂သောင်းကျော်သို့ မြင့်တက်နေနေ

၂။ ရွှေတိဂုံရှိပျက်ဆီးမှုများသည့် အရံစေတီတော်(၂၀)ဆူကို ယခုနှစ်အတွင်းရွှေသင်္ကန်းအသစ် ကပ်လှူပူဇော်မည်

၃။ ကိုဗစ်-၁၉ ရန်ပုံငွေမှ ခရီးသွားကဏ္ဍကို ငွေကျပ် ၃ ဘီလီယံ ထုတ်ချေးထား

၄။ တရုတ်နိုင်ငံ၏ AG600M မီးသတ်လေယာဉ် ရေဖြည့်ခြင်းနှင့် ရေဖြန်းချခြင်းတို့အား အောင်မြင်စွာ စမ်းသပ်နိုင်ခဲ့ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published 29 September 2022

နိုင်ငံပိုင် စက်သုံးဆီ အရောင်းဆိုင် ၈ ဆိုင်နဲ့ CNG ဆိုင် တစ်ဆိုင်ကို ကာလရှည်ငှားရမ်းဖို့ စွမ်းအင်ဝန်ကြီးဌာနက စီစဉ်နေပါတယ်။

#Yangon_Media_Group

#Local_News
Published_29 September 2022

တောင်တွင်းကြီးမြို့ရှိ ရတနာဗိမာန်ဂူဘုရားကြီးအားအမိုးအကာပြုလုပ်သည့်ကိစ္စ ဌာန၏မူလခွင့်ပြုချက်များနှင့် ကွဲလွဲနေကြောင်း ရှေးဟောင်း သုတေသနနှင့် အမျိုးသားပြတိုက်ဦးစီးဌာနက ယနေ့ စက်တင်ဘာလ ၂၉ ရက်တွင် ထုတ်ပြန်လိုက်သည်။

ယခု စက်တင်ဘာလ ၂၃ ရက်က ရှေးဟောင်းသုတေသနနှင့် အမျိုးသားပြတိုက်ဦးစီးဌာန မကွေး ဌာနခွဲ၊ ဗိဿနိုးဌာနစုနှင့် သရေခေတ္တရာဌာနစုတို့မှ အင်ဂျင်နီယာအဖွဲ့များက သွားရောက်၍ ကြည့်ရှုစစ်ဆေးခဲ့ရာတွင် ဘုရားကြီးအမိုး ပြုလုပ်ခြင်းနှင့် ပတ်သက်၍ ၎င်းတို ဆောင်ရွက်ထားရှိမှုများသည် ဌာန၏မူလခွင့်ပြုချက်များနှင့် ကွဲလွဲမှုအချို့ရှိခြင်း၊ မူလရှေးဟောင်း ပုံသဏ္ဌာန်ထိခိုက်နိုင်သည့် Visual Impact ဖြစ်နိုင်သည်များ တွေ့ရှိရခြင်း၊ ယခုကဲ့သို့ အမိုး ပြုလုပ်ခြင်းကြောင့် မူလအုတ်ရိုးများကဲ့သို့ တန်ပေါင်းများစွာ အလေးချိန်မရှိတော့သော်လည်း ကြံ့ခိုင်မှုနှင့် ရေရှည်တည်တံ့နိုင်မှုအတွက် အချို့ အစိတ်အပိုင်းများ ပြုပြင်ရန် လိုအပ်ချက်များရှိခြင်းတို့ကို စိစစ်တွေ့ရှိရသဖြင့် ပညာရပ်ဆိုင်ရာ ကျွမ်းကျင်အဖွဲ့ကို စေလွှတ်ပြီး ဆောင်ရွက်သွားမည် ဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

ရတနာဗိမာန်ဂူဘုရားကြီးမှာ မကွေးတိုင်းဒေသကြီး၊ တောင်တွင်းကြီးမြို၊ ရတနာဗိမာန် ကျောင်းဝင်းအတွင်းတည်ရှိပြီး ၂၀၁၉-၂၀၂၀ ဘဏ္ဍာရေးနှစ်၊ ၂၀၂၀-၂၀၂၁ဘဏ္ဍာရေးနှစ် ပြည်ထောင်စု ဘက်ဂျက်ငွေလုံးငွေရင်းရန်ပုံငွေကျပ်သိန်းဖြင့် ရေရှည်တည်တံ့ကြံ့ခိုင်စေရန် ရှေးဟောင်းအုတ် အရွယ်အစားအတိုင်း အုတ်အစားဖြည့်စီခြင်း၊ အနားသတ်ကြားသိပ်ခြင်း၊ ရေပိတ်လွှာလောင်းခြင်း လုပ်ငန်းများကို ရှေးဟောင်းသုတေသနနှင့် အမျိုးသားပြတိုက်ဦးစီးဌာနက ရှေးမူမပျက် ပြုပြင်ထိန်းသိမ်း ဆောင်ရွက်ခဲ့ကြောင်း၊ ဂူဘုရားအတွင်းရှိ ရုပ်ပွားတော်လေးဆူကိုလည်း ကမ္ဘာ့ဗုဒ္ဓသာသနာပြု ချမ်းမြေ့ဆရာတော်ဘုရားကြီး၏ ဒါယကာ၊ ဒါယိကာမများ စုပေါင်း အလှူငွေ ကျပ်(၁၃၈)သိန်း ဖြင့် ရှေးမူမပျက် ပြန်လည်ပြုပြင်ထိန်းသိမ်းခဲ့ကြောင်း သိရသည်။

ကမ္ဘာ့ဗုဒ္ဓသာသနာပြု ချမ်းမြေ့ဆရာတော်ဘုရားကြီး ငယ်စဉ်ကိုရင်ဘဝက နေထိုင်ခဲ့ဖူးသည့်အဆိုပါကျောင်းဝင်းအတွင်းရှိ ရတနာဗိမာန်ဘုရားကြီးအား မိုးဒဏ်မှကာကွယ်နိုင်ရန်အတွက် ရှေးဟောင်းသုတေသနနှင့် အမျိုးသားပြတိုက်ဦးစီးဌာနကခွင့်ပြုနိုင်သည့် ပုံစံဖြင့်ဆောင်ရွက်လိုကြောင်း ဆရာတော်ကြီးနှင့် တပည့်ဒါယကာ၊ ဒါယိကာမများကတင်ပြလာသဖြင့် ဘုရား အကျိုးဆောင်အဖွဲ့တာဝန်ရှိသူများကို ရှေးဟောင်းသုတေသနနှင့် အမျိုးသားပြတိုက် ဦးစီးဌာနက ဂူဘုရားကြီး၏ အုတ်နံရံပေါ်တွင် ရေပိတ်လွှာ(Slab)လောင်းရန်၊ မြင်ကွင်းမရှုပ် စေရန်(Visual Impact)၊ တိုင်များထည့်သွင်းမဆောင်ရွက်ရန်၊ Steel Structure Polycarbonate Sheet (သို့မဟုတ်) Steel Structure Acrylic Plastic ဖြင့် အမိုးအား Transparent Sheet ဖြင့် မိုးရန်နှင့်အမိုး၏ အလေးချိန်ကြောင့် ဘုရားအား ထိခိုက်မှုမရှိအောင်ဆောင်ရွက်ရန်၊ လေဝင် လေထွက်ကောင်းစေရန်နှင့် ရေဆင်းကောင်းအောင်ဆောင်ရွက်ရန် စသည့်အချက်များအား ဥပဒေ၊ နည်းဥပဒေ၊ လုပ်ထုံးလုပ်နည်းများနှင့်အညီ လိုက်နာဆောင်ရွက်သွားရန် အကြံပြုခဲ့ကြကြောင်းလည်း ထုတ်ပြန်ချက်တွင် ဖော်ပြထားသည်။

လုပ်ငန်းဆောင်ရွက်ရာတွင်ကြီးကြပ်ဆောင်ရွက်ခဲ့သည့် ပညာရှင်မှာ နည်းပညာတက္ကသိုလ် (မန္တလေး) ဗိသုကာဌာနတွင် ပါမောက္ခအဖြစ် တာဝန်ထမ်းဆောင်ခဲ့သော ဒေါက်တာဇာခြည်မင်း ဖြစ်ပြီး ၎င်း၏တင်ပြချက်အရ ဌာနမှ အကြံပြုခဲ့သည့် Polycarbonate / Acrylic Sheet အသုံးပြု ဆောင်ရွက်လျှင် Weight ပေါ့ပါးပြီး အမိုးကိုထမ်းမည့် Structure frame ၏ Weight ကို လျှော့ချနိုင် သော်လည်း ရေရှည်တွင် လေဒဏ်၊ မိုးဒဏ်၊ နေဒဏ် ခံနိုင်အား ကျဆင်းလွယ်ပြီး ရေရှည်တွင် အရောင်များမှေးမှိန်၍ အရည်အသွေး ကျဆင်းလာနိုင်ခြင်း၊ ရေရှည်တွင် ကျွတ်ဆတ်လာ၍ ကျိုးလွယ်ခြင်း၊ ကျိုးကြေသော အပိုင်းအစများ သည် ဘုရားဖူးများကို ထိခိုက်နိုင်ခြင်း၊ အမိုးကို သန့်ရှင်းရေးပြုလုပ်ရန်မလွယ်ကူခြင်း စသည့်အချက်များကြောင့် Tempered Laminated မှန်ဖြင့်ဆောင်ရွက်ခြင်းဖြစ်ကြောင်း၊ Tempered Laminated မှန်ဖြင့် ဆောင်ရွက်ခြင်းဖြင့် အဆောက်အအုံအတွင်း ဝင်ရောက်မည့် UV နှင့် Heat အပူကို ဖြတ်နိုင် ခြင်း၊ အပေါ်မှန်/အောက်မှန် (၂)ထပ်တွဲပြီး အတွင်း Laminate ကော်ပြားပါရှိသဖြင့် လွယ်ကူစွာ မကွဲခြင်း၊ နေ/လေ/မိုးဒဏ်ကို ကောင်းစွာခံနိုင်ခြင်း၊ ဘုရားဖူးများအန္တရာယ်ဖြစ်မှုအနည်းဆုံးဖြစ်ခြင်း၊ နှစ်ရှည်ခံနိုင်ရည်ရှိခြင်း၊ လိုအပ်သော အလင်းရောင်အမှန်အတိုင်းရရှိခြင်း၊ သန့်ရှင်းရေးလွယ်ကူစွာ လုပ်နိုင်ခြင်း၊ ရေရှည်တွင် ပြင်ဆင်စရိတ်သက်သာခြင်း စသည့်အားသာချက်များကြောင့် Tempered Laminated မှန်ကို အသုံးပြု၍ ဆောင်ရွက်ခြင်းဖြစ်ကြောင်း၊ အဆောက်အအုံသည် brick masonary structure ဖြစ်ပြီး existing အုတ်ရိုးဖွဲ့စည်းပုံသည် လှေကားထစ်များကဲ့သို့ ဖြစ်ပေါ်နေခြင်းနှင့် roof beam မရှိသည့်အတွက် အမိုး structure တင်နိုင်ရန် short colum ဖြင့် level ချိန်ညှိပြီး သံ frame beam ကို တပ်ဆင်ပါကြောင်း၊ အဆောက်အအုံပေါ်တွင် ကျရောက်သော steel structure frame ၏ အလေးချိန်မှာ မြောက်ဘက်တွင် steel structure frame (၁.၂၅)တန်နှင့် alu+glass (ဝ.၁+ဝ.၂၉) တန်၊ အလယ်အမိုးတွင် steel structure frame (ဝ.၇၅)တန်နှင့် alu+glass (ဝ.၃၉+၃.၅၆) တန် ရှိပါကြောင်း၊ တောင်ဘက်အမိုးသည် အဆောက်အအုံတည်ဆောက်ပုံအရ stand alone columns အတွင်း (၄)တိုင်၊ အပြင်(၂)တိုင်ဖြင့် အမိုးကို တပ်ဆင်ထားသည့်အတွက် weight မှာ အဆောက်အအုံအပေါ်သို့ တိုက်ရိုက်မသက်ရောက်ပါကြောင်း၊ အဆောက်အအုံ၏ ထုထည် ကြီးမားမှုကြောင့် အမိုးနှင့် frame weight ကို ကောင်းစွာခံနိုင်ရည်ရှိသော အဆောက်အအုံဖြစ်ကြောင်း တင်ပြခဲ့သည်ဟုယင်းထုတ်ပြန်ချက်တွင် ဖော်ပြထားသည်။

#ymg/mt
#yangon_Media_Group

#Local_News
Published_ 29 September 2022

မွန်ပြည်နယ် ကျိုက်ထိုမြို့နယ်အတွင်းရှိ ဆံတော်ရှင်ကျိုက်ထီးရိုးစေတီတော် ဗုဒ္ဓပူဇနိယပွဲတော်ကြီးအား ၁၃၈၄ ခုနှစ် သီတင်းကျွတ်လပြည့်နေ့ ၂၀၂၂ ခုနှစ် အောက်တိုဘာ ၉ ရက်မှ ၁၃၈၅ ခုနှစ် ကဆုန်လပြည့်နေ့ ၂၀၂၃ ခုနှစ် မေ ၃ ရက်အထိ (၇) လတိုင်တိုင် ကျင်းပသွားမည်ဖြစ်ကြောင်း သိရပါတယ်။

ဗုဒ္ဓပူဇနိယပွဲတော်ကာလတစ်လျှောက် ကျိုက်ထီးရိုးစေတီတော် ဘဏ္ဍာတော်ထိန်း ဂေါပကအဖွဲ့အနေဖြင့် ဘုရားလာရောက်ဖူးမြော်သူများ အခမဲ့တည်းခိုနိုင်ရန် ပြည့်စုံ ဓမ္မာရုံနှင့် ဆီမီး(၉၀၀၀) ဓမ္မာရုံတိုအား စီစဉ်ထားရှိပြီး၊ အခပေးတည်းခိုနိုင်တဲ့ ဟိုတယ်များ၊ တည်းခိုဆောင်များလည်း ရှိကြောင်း သိရပါတယ်။

ထို့ပြင် ကင်မွန်းစခန်းတောင်ခြေတွင် သန့်ရှင်းသည့် ထမင်းဆိုင်များနှင့် အမှတ်တရ ပစ္စည်းဆိုင်များ ဖွင့်လှစ်ရောင်းချသွားမည်ဖြစ်ပြီး ရင်ပြင်တော်တွင် ဘုရားဖူးများ အဆင်ပြေစွာစားသောက်နိုင်ရန် ထမင်းဆိုင်များ အမှတ်တရပစ္စည်းဆိုင်များကို ထုတ်ပြန်ထားတဲ့ စည်းကမ်းချက်များနှင့်အညီ ရောင်းချပေးသွားမည်ဖြစ်၍ ကျန်းမာရေးနှင့် ညီညွတ်သည့်ဆိုင်များ ဖြစ်စေရန် ကြိုတင်ပြင်ဆင်လျက်ရှိတယ်လို့ ဆိုပါတယ်။

ကိုဗစ်-၁၉ ရောဂါ ဖြစ်ပွားနေသည့် ၂၀၁၉-၂၀၂၀ ကာလတွင် ရောဂါပိုးပြန့်နှံ ကူးစက်မှု မဖြစ်ပေါ်စေရေးအတွက် ဗုဒ္ဓပူဇနိယပွဲတော်အား ကျင်းပနိုင်ခြင်းမရှိ၍ တောင်တော်အား ပိတ်ထားခဲ့ရပြီး ၂၀၂၁-၂၀၂၂ ခုနှစ်တွင် ဘုရားပွဲတော်အား ကျင်းပခဲ့ရာ လာရောက်ဖူးမြော်သူ (၄) သိန်းကျော်ခန့်ရှိခဲ့ပါတယ်။

ယခုနှစ်ဘုရားပွဲတော် ကျင်းပရာတွင် ဘုရားလာရောက်ဖူးမြော်သူများအား ကိုဗစ်-၁၉ ကူးစက် ရောဂါပြန့်ပွားမှုမရှိစေရေး ကျန်းမာရေးဝန်ကြီးဌာနမှ ထုတ်ပြန်ထားတဲ့ လမ်းညွှန်ချက်နှင့်အညီ နှာခေါင်းစည်း (Mask) များ တပ်ဆင်သွားလာနိုင်ရန် Mask များ အခမဲ့ဖြန့်ဝေပေးခြင်း၊ ကိုယ်အပူချိန်တိုင်းတာခြင်းများ စစ်ဆေးပြီးမှသာ ဘုရားရင်ပြင် တော်သို တက်ရောက်ခွင့်ပြုမည်ဖြစ်ပြီး ကျန်းမာရေးနှင့်ပတ်သက်၍ လိုအပ်ပါက ရင်ပြင်တော်တွင် ဖွင့်လှစ်ထားသည့် ကျန်းမာရေးဌာန(ခွဲ)မှ ကူညီဆောင်ရွက်ပေးသွားမည် ဖြစ်ကြောင်း သတင်းရရှိပါတယ်။

#ygm_mnn
#Yangon_Media_Group

#Local_News
Published_ 29 September 2022

ထားဝယ်အထူးစီးပွားရေးဇုန် ကနဦးစီမံကိန်းနှင့် ပင်မစီမံကိန်းများကို အောင်မြင်စွာ အကောင်အထည်ဖော်ဆောင်ရွက်နိုင်ရေးတို့အတွက် ထိုင်းနိုင်ငံနှင့် ညှိနှိုင်းဆွေးနွေး သွားရန် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ၏ (၃/၂၀၂၂) ကြိမ်မြောက် လုပ်ငန်းညှိနှိုင်းအစည်းအဝေးတွင် ဗဟိုလုပ်ငန်းအဖွဲ့ ဥက္ကဋ္ဌ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနဝန်ကြီး ဦးအောင်နိုင်ဦးက ပြောကြားခဲ့ပါတယ်။

အဆိုပါ အစည်းအဝေးကို စက်တင်ဘာ ၂၈ ရက် မွန်းလွဲ ၁ နာရီတွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ အစည်းအဝေးခန်းမ (၂) ၌ ကျင်းပခဲ့တာ ဖြစ်ပါတယ်။

ဆက်လက်၍ ဝန်ကြီးက အထူးစီးပွားရေးဇုန်များ တိုးတက်ရန် ဆက်လက်ဆောင်ရွက်ရမည့် ကိစ္စများကို အထူးစီးပွားရေးဇုန်ဥပဒေနှင့်အညီ စနစ်တကျဆောင်ရွက်ရေး၊ သီလဝါအထူးစီးပွားရေးဇုန်၏ လုပ်ငန်းများ ချောမွေ့စွာ ဆက်လက်လည်ပတ်နိုင်ရေး၊ ကျောက်ဖြူအထူး စီးပွားရေးဇုန် ရေနက်ဆိပ်ကမ်း စီမံကိန်းနှင့်စပ်လျဉ်း၍ လိုအပ်သည့် လုပ်ငန်းစဉ်များကို ဆက်လက် ဆောင်ရွက်ရေး ပြောကြားခဲ့ပါတယ်။

ထို့နောက် မြန်မာအထူးစီးပွားရေးဇုန်ဆိုင်ရာ ဗဟိုလုပ်ငန်းအဖွဲ့ အဖွဲ့ဝင်များ၊ အထူးစီး ပွားရေးဇုန်စီမံခန့်ခွဲမှု ကော်မတီ၊ ဥက္ကဋ္ဌများက သက်ဆိုင်ရာကဏ္ဍအလိုက် ဆောင်ရွက်နေမှုများအား အသေးစိတ် တင်ပြဆွေးနွေးခဲ့ကြပါတယ်။

အဆိုပါအစည်းအဝေးသို့ မြန်မာအထူးစီးပွားရေးဇုန်ဆိုင်ရာဗဟိုလုပ်ငန်းအဖွဲ့ ဒုတိယဥက္ကဋ္ဌနှင့် အဖွဲ့ဝင်များဖြစ်သည့် ဒုတိယဝန်ကြီးများ၊ သီလဝါ၊ ထားဝယ်နှင့် ကျောက်ဖြူ အထူးစီးပွားရေးဇုန်တို့မှ စီမံခန့်ခွဲမှုကော်မတီ၊ ဥက္ကဋ္ဌများ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူများ တက်ရောက်ခဲ့ကြပါတယ်။

#ygm_mnn
#Yangon_Media_Group