#Local_News
Published_ 4 October 2022

ကရင်ပြည်နယ်အတွင်းရှိ မြစ်ရေတင်စီမံကိန်း(၆)ခုမှ နွေသီးနှံစိုက်ဧက ၂၂၆၁ ဧက ကို စိုက်ပျိုးရေပေးဝေနိုင်ရန် လျာထားဆောင်ရွက်လျက်ရှိကြောင်း သိရပါတယ်။

ကရင်ပြည်နယ်၌ မြစ်ရေတင်စီမံကိန်း(၇)ခု ရှိပြီး စီမံကိန်းအကျိုးပြုဧက (၆၀၀၀) ဖြစ်ပါတယ်။ ကမ်းနီမြစ်ရေတင်လုပ်ငန်းဟာ ဒီဇယ်ကနေ လျှပ်စစ်မြစ်ရေတင်ကို အဆင့်မြှင့်တင်ပြုပြင်လျက်ရှိတာကြောင့် ရေပေးဝေခြင်းမရှိဘဲ ကျန်မြစ်ရေတင်လုပ်ငန်း (၆)ခုကနေ ရေပေးဝေလျက်ရှိကြောင်း သိရပါတယ်။

နိုဝင်ဘာလ ဒုတိယအပတ် လောက်ကနေစပြီး ရေပေးဝေဖို့ လျာထားဆောင်ရွက် လျက် ရှိပါတယ်၊ မိုးစပါးအောင်ရေ လိုအပ်တဲ့ လယ်ဧက (၄၀၀၀) ခန့် ရေပေးဝေဖို့အတွက် ကြိုတင်စီမံ ဆောင်ရွက်လျက်ရှိတယ်လို့ ဆိုပါတယ်။ ကရင်ပြည်နယ်အတွင်း တရုတ်လှ၊ ဘားကပ်၊ ထုံးအိုင်၊ ဇာသပြင်၊ သံလှယ်နှင့် ဂျိုင်း စသည့် မြစ်ရေတင်စီမံကိန်း (၆) ခုမှ စိုက်ပျိုးရေပေးဝေနေတာဖြစ်ပါတယ်။

စိုက်ပျိုးရေ ပေးဝေမှုအနေဖြင့် ၂၀၁၆-၂၀၁၇ တွင် မိုးစပါး(၂၀၅)ဧကနှင့် နွေသီးနှံ (၁၄၁၆)ဧက၊ ၂၀၁၇-၂၀၁၈ တွင် မိုးစပါး(၂၁၁) ဧကနှင့် နွေသီးနှံ(၁၁၀၆) ဧက၊ ၂၀၁၈-၂၀၁၉ တွင် မိုးစပါး (၄၇၈) ဧကနှင့် နွေသီးနှံ (၁၆၃၈)ဧက၊ ၂၀၁၉-၂၀၂၀ တွင် မိုးစပါး (၃၃၂) ဧကနှင့် နွေသီးနှံ (၁၇၉၇) ဧက၊ ၂၀၂၀-၂၀၂၁ တွင် မိုးစပါး (၂၂၅)ဧကနှင့် နွေသီးနှံ (၂၀၃၃)ဧကနှင့် ၂၀၂၁-၂၀၂၂တွင် မိုးစပါး (၃၂၅)ဧက၊ နွေသီးနှံ(၂၄၈၆)ဧက စိုက်ပျိုးရေ ပေးဝေနိုင်ခဲ့ကြောင်း သိရသည်။

ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန (ရေအရင်းအမြစ်)သည် လှိုင်းဘွဲ့မြိုနယ်တွင်စိုက်ဧက (၁၀၀၀) စိုက်ပျိုးရေပေးဝေနိုင်မည့် ကော့နွဲလျှပ်စစ် မြစ်ရေတင်စီမံကိန်းကို အကောင်အထည်ဖော် ဆောင်ရွက်နိုင်ရန်အတွက် အကြို ဖြစ်မြောက်နိုင်စွမ်း စူးစမ်းလေ့လာမှုများ ဆောင်ရွက်ထားရှိပြီး မြစ်ရေတင်စီမံကိန်းအသစ် တည်ဆောက်နိုင်ရန်အတွက် ၂၀၂၄-၂၀၂၅ ဘဏ္ဍာနှစ်တွင် လျာထားဆောင်ရွက်မှာ ဖြစ်ကြောင်း သိရပါတယ်။

#ygm_mnn
#Yangon_Media_Group

#Local_News
Published _4 October 2022

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီတွင် ပါတီဝင်နှစ်ထောင်ကျော်အသတ်ခံရသည့်အပေါ် အကာအကွယ်မပေးနိုင်ဟု မှတ်ယူကာ ဗဟိုအလုပ်အမှုဆောင်သစ်အတွက် ပြန်လည်အဆိုမပြုတော့ကြောင်း ဦးသန်းဌေးက ယနေ့အောက်တိုဘာလ ၄ ရက်က ပြုလုပ်သည့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ တတိယအကြိမ်ပါတီညီလာခံ(၂၀၂၂) ပထမနေ့တွင် ပြောကြားလိုက်သည်။

၎င်းအနေဖြင့် ဗဟိုအလုပ်အမှုဆောင်သစ်အတွက် ပြန်လည်အဆိုမပြုတော့သည့်အကြောင်းရင်း သုံးချက်ရှိကြောင်း၊ ယင်းတို့မှာရွေးကောက်ပွဲကိုနိုင်အောင် ဦးမဆောင်နိုင်ခဲ့ခြင်းသည်မိမိ၌တာဝန်ရှိသည်ဟုခံယူခြင်း၊ ပါတီဝင်နှစ်ထောင်ကျော် အသတ်ခံရခြင်းအတွက် ထိရောက်သော အကာအကွယ်မပေးနိုင်ခြင်းသည်မိမိ၌တာဝန်ရှိသည်ဟု မှတ်ယူခြင်း၊ ၇နှစ်ကြာခံစားလာရသော ခါးနာဝေဒနာကို ခွဲစိပ်ကုသခဲ့ပြီး ၆ လအတွင်းလှုပ်ရှားမှုကန့်သတ်ချက်အ
ရ လာမည့်ရွေးကောက်ပွဲတွင် နင်လားငါလားခရီးကြမ်း မထွက်နိုင်တော့ခြင်းတို့ဖြစ်ကြောင်း သိရသည်။

ပါတီမှအနားယူတော့မည်ဟု ဆုံးဖြတ်ခဲ့ခြင်းမှာ မိမိအားအွန်လိုင်းမှတိုက်ခိုက်နေမှုများကြောင့် မဟုတ်ကြောင်းနှင့် ပါတီကို မိမိပြီးနောက်ဦးဆောင်မည့်သူအနေဖြင့်လည်း ပါတီဝင်များစည်းလုံးညီညွှတ်ရေး ၊ ပါတီဝင်များ အသက်ဘဝလုံခြုံရေး၊ လာမည့်ရွေးကောက်ပွဲ၌ အောင်နိုင်ရေးတို့အတွက် ဦးဆောင်နိုင်လိမ့်မည်ဟု မျှော်လင့်ကြောင်း ပါတီဥက္ကဋ္ဌ ဦးသန်းဌေးက ညီလာခံ၏ အဖွင့်မိန့်ခွန်းတွင် ထည့်သွင်းပြောကြားခဲ့ခြင်း ဖြစ်သည်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ တတိယအကြိမ်ပါတီညီလာခံ(၂၀၂၂)ကို အောက်တိုဘာလ ၄ ရက်မှ ၆ ရက်အထိ သုံးရက်ကြာကျင်းပမည်ဖြစ်ပြီး ယခုကျင်းပသည့် ညီလာခံတွင် ငါးနှစ်သက်တမ်းရှိ
သော ပါတီဗဟိုအလုပ်အမှုဆောင်အဖွဲ့သစ်ကို အဆိုပြုရွေးချယ်သွားမည်ဖြစ်ကာ ပါတီဥက္ကဋ္ဌအသစ်ကိုလည်း ရွေးချယ်ကြမည် ဖြစ်သည်။

လက်ရှိတွင် ဦးသန်းဌေးက နှုတ်ထွက်ထားသည့်အတွက် ယာယီဥက္ကဋ္ဌအဖြစ် လဝကဝန်ကြီးဟောင်းဦးခင်ရီက တာဝန်ယူထားခြင်း ဖြစ်ရာ ဥက္ကဌအသစ်မှာလည်း ဦးခင်ရီသာ ဖြစ်လာနိုင်သည်ဟု ပြောဆိုနေကြကြောင်း သိရသည်။

#ymg/mt
#Yangon_Media_Group

#Local_News
Published _4 October 2022

ကမ္ဘာ့ရွှေဈေးမြင့်တက်လာပြီး ပြည်တွင်းရွှေဈေးကွက်အတွင်း၌လည်း ဈေးအနည်းငယ် ပြန်လည်မြင့်တက်လာကာ အဝယ်ထက် အရောင်းပိုများလာကြောင်း ရွှေဆိုင်များမှ သိရသည်။

ပြီးခဲ့သည့် ရက်ပိုင်းအတွင်း၌ ပြင်ပရွှေဈေးကွက်အတွင်း၌ အခေါက်ရွှေတစ်ကျပ်သားလျှင် ၂၃ သိန်းဝန်းကျင်အထိကျဆင်းခဲ့ပြီး ယနေ့ (အောက်တိုဘာ ၄ ရက်)တွင် ကမ္ဘာ့ရွှေဈေးမှာလည်း တစ်အောင်ကို အမေရိကန်ဒေါ်လာ ၁,၇၀၄ အထိမြင့်တက်လာခြင်းကြောင့် ပြည်တွင်းရွှေဈေးနှုန်းမှာလည်း အနည်းငယ်မြင့်တက်ခဲ့ခြင်းဖြစ်ကြောင်းသိရသည်။

ရန်ကုန်တိုင်းဒေသကြီး ရွှေလုပ်ငန်းရှင်များအသင်း (YGEA) မှနေ့စဉ်ထုတ်ပြန်နေသည့် ရည်ညွှန်ဈေးသည် ကြမ်းခမ်းဈေးသာဖြစ်ကြောင်း ပြောကြားထားပြီး ပြင်ပဈေးကွက်ပေါက်ဈေးအတိုင်း ရောင်းချခွင့်ပြုထားကြောင်း အသင်းမှ ဥက္ကဋ္ဌဖြစ်သူ ဦးမျိုးမြင့်က YMG ကို ပြောကြားထားသည်။

ယင်းအပြင် အစိုးရဘက်မှလည်း ရွှေဈေးနှုန်းကျဆင်းစေရန်အတွက် ရွှေစင်ရွှေတုံးနှင့်ရွှေဒင်္ဂါးပြားတွေကို ရောင်းချပေးလျက်ရှိပြီး ရွှေနှင့် ငွေကြေးဈေးကွက် ထိန်းသိမ်းကြပ်မတ်ရေး လုပ်ငန်းကော်မတီက တရားဝင်ရွှေဈေးကွက် ဖြစ်ပေါ်လာစေရေး၊ ဈေးနှုန်းများ တည်ငြိမ်ရေး၊ ပြည်တွင်းရွှေဈေးကွက်ကို နိုင်ငံတကာစံနှုန်းအတိုင်း ရောင်းချနိုင်ရေးတို့အတွက် ရွှေလုပ်ငန်းရှင်များနှင့် ခေါ်ယူတွေ့ဆုံမှုများပြုလုပ်ထားကြောင်း သိရသည်။

#ymg/sth
#Yangon_Media_Group

#Local_News
Published _4 October 2022

ဒေါ်အောင်ဆန်းစုကြည်ရင်ဆိုင်နေရသော စီးပွားရေးလုပ်ငန်းရှင် ဦးမောင်ဝိတ်နှင့်ပတ်သက်သည့်အမှုကို ယနေ့ အောက်တိုဘာလ ၄ ရက်က အပြီးသတ်လျှောက်လဲခဲ့ကာ နောက်တစ်ပတ်တွင်အမိန့်ချမည်ဖြစ်ကြောင်း တရားရုံးနှင့် နီးစပ်သူများက ပြောသည်။

"လာမယ့် အပတ် ဗုဒ္ဓဟူးနေ့အမိန့်ချမယ်။ ဒီနေ့လျှောက်လဲချက်မှာ အတိုင်ပင်ခံကသူ့မှာအပြစ်မရှိဘူး။ သူ့ကိုလွှတ်ပေးရမယ်ပေါ့။ ဒါတွေက လှူတာလေ။ ဒေါ်ခင်ကြည်ဖောင်ဒေးရှင်းကို မောင်ဝိတ်ကလှူတဲ့ကိစ္စလေ။ သွားအလှူခံတာလည်းမဟုတ်ဘူး။ သူ့ဘာသာလာလှူတာ။ အဲဒီငွေတွေကလည်း ဒေါ်ခင်ကြည်ဖောင်ဒေးရှင်းကို ပေးလိုက်တာဆိုတော့ အပြစ်မရှိဘူး။ လွှတ်ပေးရမှာပေါ့။ ဒီကိစ္စမှာလှူတဲ့မောင်ဝိတ်ကလည်း တရားစွဲတာမရှိဘူး။ သူ့သဘောနဲ့သူလှူတာလေ"ဟု တရားရုံးနှင့် နီးစပ်သူက ပြောသည်။

ဒေါ်အောင်ဆန်းစုကြည်ရင်ဆိုင်နေရသော အမှုများထဲတွင် စီးပွားရေးလုပ်ငန်းရှင်ဦးမောင်ဝိတ်က ဒေါ်ခင်ကြည်ဖောင်ဒေးရှင်းကို ငွေလှူသည်ဆိုသော အမှုမှာ ရာဇဝတ်ကြီးအမှုအမှတ် ၃/၂၀၂၂ နှင့် ၄/၂၀၂၂ တို့ ဖြစ်ပြီး ပြီးခဲ့သည့် ဇူလိုင်လ ၁၃ ရက်တွင် တရားလွှတ်တော်ချုပ်၌ ရှေ့နေအဖွဲ့က ချေဖျက်ခွင့်တင်ခဲ့သော်လည်း သြဂုတ်လ ၁၇ ရက်က ပယ်ချခြင်းကို ခံခဲ့ရသေးသည်။

ယမန်နေ့ အောက်တိုဘာလ ၃ ရက်က ဒေါ်အောင်ဆန်းစုကြည် ရင်ဆိုင်နေရဆဲ ဖြစ်သော ရဟာတ်ယာဉ်အမှု ၅ မှုလုံးနှင့် ပတ်သက်၍ တရားလိုပြသက်သေ စီမံဘဏ္ဍာ ဒုဝန်ကြီး ဦးမောင်မောင်ဝင်းအား စစ်ဆေးခဲ့ကြောင်း၊ နောက်ထပ်စစ်ဆေးရန် လိုပြသက်သေများ ကျန်နေသေးကြောင်းလည်း သိရသည်။

စီးပွားရေးလုပ်ငန်းရှင်ဦးမောင်ဝိတ်ကလည်း အဆိုပါ ဒေါ်ခင်ကြည်ဖောင်ဒေးရှင်းအတွက် အမေရိကန်ဒေါ်လာ ၅ သိန်းလှူခဲ့သည်ကိုလည်း တရားရုံး၌ ကိုယ်တိုင်သက်သေလာရောက် ထွက်ဆိုပြီးလည်း ဖြစ်သည်။

လက်ရှိတွင် ဒေါ်အောင်ဆန်းစုကြည်အနေဖြင့် သူရင်ဆိုင်နေရသော အမှုများထဲမှ တရားရုံးကစစ်ဆေးအမိန့်ချပြီးသည့် အမှုများအတွက် စုစုပေါင်းထောင်ဒဏ် နှစ် ၂၃ ကို ချမှတ်ခံထားရပြီး ဖြစ်ကြောင်းလည်း သိရသည်။

#ymg/mt
#Yangon_Media_Group

#Local_News
Published_4 October 2022

ယခုဘဏ္ဍာနှစ်၏ ငါးလတာကာလအတွင်း မြန်မာ-ထိုင်းနယ်စပ်ကုန်သွယ်မှုတွင် ၂ ဒသမ ၄၉ ဘီလျံခန့် ကုန်သွယ်မှုပြုလုပ်ခဲ့ပြီး ယခင်နှစ်ထက် ကန်ဒေါ်လာ အမေရိကန်ဒေါ်လာ ၁၇၃ ဒသမ ၉၆ သန်းတိုးလာကြောင်း စီးပွားရေးနှင့်ကူးသန်းရောင်းဝယ်ရေးကြီးဌာန၏ ထုတ်ပြန်ထားသည့် စာရင်းများအရ သိရသည်။

အဆိုပါ မြန်မာ-ထိုင်းနယ်စပ်ကုန်သွယ်ရေးစခန်းများအနက် တာချီလိတ်ဂိတ်မှ အမေရိကန်ဒေါ်လာ ၇၈ ဒသမ ၀၉ သန်း ကုန်သွယ်မှုပြုလုပ်ခဲ့ပြီး ယခင်နှစ်ထက်ကန်ဒေါ်လာ ၃၃ ဒသမ ၈၆ သန်းတိုးလာကြောင်း၊ မြဝတီဂိတ်မှ အမေရိကန်ဒေါ်လာ ၁ ဒသမ ၁ ဘီလျံကုန်သွယ်မှုပြုလုပ်ခဲ့ပြီး ယခင်နှစ်ထက် ကန်ဒေါ်လာ ၇၃ ဒသမ ၃၂ လျော့ကျခဲ့ကြောင်းသိရသည်။

ယင်းအပြင် ကော့သောင်းဂိတ်မှ အမေရိကန်ဒေါ်လာ ၉၂ ဒသမ ၇၈ သန်းကုန်သွယ်မှုပြုလုပ်ခဲ့ပြီး ယခင်နှစ်ထက် ကန်ဒေါ်လာ ၃ ဒသမ ၅၈ သန်းလျော့ကျခဲ့ကြောင်း၊ မြိတ်ဂိတ်မှအမေရိကန်ဒေါ်လာ ၅၁.၆၄ သန်း၊ ယခင်နှစ်ထက် ကန်ဒေါ်လာ သုည ဒသမ ၈၄ သန်းလျော့ကျခဲ့ကြောင်းလည်း သိရသည်။

ထီးခီးဂိတ်မှ အမေရိကန်ဒေါ်လာ ၁ ဒသမ ၁၅ ဘီလျံ၊ ယခင်နှစ်ထက် ကန်ဒေါ်လာ ၂၃၉ ဒသမ ၁၃ သန်းတိုးလာပြီး မောတောင်ဂိတ်မှ အမေရိကန်ဒေါ်လာ ၄ ဒသမ ၁၈သန်း၊ ယခင်နှစ်ထက် ကန်ဒေါ်လာ ၁.၇၁ သန်း လျော့ကျခဲ့ခြင်းဖြစ်သည်။

ထိုင်း-မြန်မာ နယ်စပ်ကုန်သွယ်ရေးတွင် မြန်မာ့လယ်ယာထွက်ကုန်များ ဖြစ်သော ပြောင်း၊ ရော်ဘာ၊ ငရုတ်၊ ပဲ၊ အားလူး၊ ကြက်သွန်နှင့် ရေထွက်ကုန် ဖြစ်သော ငါး၊ ပုဇွန်၊ ဂဏန်းများကို ထိုင်းနိုင်ငံသို့ အဓိကတင်ပို့ပြီး ထိုင်းနိုင်ငံဘက်မှ လူသုံးကုန်ပစ္စည်းများ၊ အိမ်သုံးဂတ်စ်၊ ဆောက်လုပ်ရေးလုပ်ငန်းသုံး အိမ်ဆောက်ပစ္စည်းများ၊ အထည်ချုပ် (CMP) လုပ်ငန်းသုံးပစ္စည်းများနှင့် စားသောက်ကုန်များ တင်သွင်းလျက်ရှိသည်။

#ymg/sth
#Yangon_Media_Group

#Local_News
Published_ 4 October 2022

မြန်မာနိုင်ငံမှ တရုတ်နိုင်ငံသို့ စားသောက်ကုန်ပစ္စည်းများ တင်ပို့ရန် GACC တွင် စက်တင်ဘာ ၃၀ ရက်အထိ ကုမ္ပဏီ/စက်ရုံ ၁၀၂၂ ခုမှ စောင်ရေစုစုပေါင်း ၁၈၅၀ စောင်အား မှတ်ပုံတင်ရန် လျှောက်ထားပြီးဖြစ်ကြောင်း သိရပါတယ်။

လျှောက်ထားမှုများမှာ စိုက်ပျိုးရေးဦးစီးဌာနမှ ကုမ္ပဏီ ၈၈၃ ခု၊ စောင်ရေ ၁၇၁၁ စောင်၊ ငါးလုပ်ငန်းဦးစီးဌာနမှ ကုမ္ပဏီ/ စက်ရုံ ၁၁၈ ခု၊ စောင်ရေ ၁၁၈ စောင်၊ မွေးမြူရေးနှင့် ကုသရေးဦးစီးဌာနမှ ကုမ္ပဏီ ၁၂ ခု၊ စောင်ရေ ၁၂ စောင်နှင့် အစားအသောက်နှင့် ဆေးဝါးကွပ်ကဲရေးဦးစီးဌာနမှ ကုမ္ပဏီ ၉ ခု၊ စောင်ရေ ၉ စောင် တို့ဖြစ်ကြပါတယ်။

တရုတ်နိုင်ငံ၊ အကောက်ခွန် အထွေထွေအုပ်ချုပ်မှုအာဏာပိုင်အဖွဲ့၏ ကြေညာချက် အမှတ် (၂၄၈) နှင့် (၂၄၉) တို့အရ ၂၀၂၂ ခုနှစ် ဇန်နဝါရီ ၁ ရက်မှစ၍ မြန်မာနိုင်ငံမှ တရုတ်နိုင်ငံသို့ စားသောက်ကုန် တင်ပို့မည့်/တင်ပို့လျက်ရှိတဲ့ လုပ်ငန်းရှင်များ အနေဖြင့် GACC တွင် မှတ်ပုံတင်ပြီးမှသာလျှင် တင်ပို့ခွင့်ရရှိမှာဖြစ်ကြောင်း သိရပါတယ်။

မြန်မာနိုင်ငံမှ တရုတ်နိုင်ငံသို့ တင်ပို့မည့် ကုန်စည်အမျိုး အစားလေးခုဖြစ်သည့် အသားနှင့် အသားထုတ်ကုန်များ၊ ရေထွက် ကုန်များ၊ နို့ထွက်ပစ္စည်းများ၊ ငှက်သိုက်နှင့် ဆက်စပ်ထုတ်ကုန်များနှင့် ကုန်စည်အမျိုးအစား ၁၄ ခုဖြစ်သည့် အစာသွတ်ရန် အသုံးပြုသည့် အပေါ်ခွံ အစွပ်၊ ပျားရည်နှင့် ပျားထွက်ပစ္စည်း၊ ဥနှင့် ဥထုတ်ကုန်များ၊ စားသုံးဆီ၊ အပြင်အသားအား ဂျုံသားဖြင့် ပြုလုပ်ထားပြီး စားသုံးနိုင်သည့် သို့မဟုတ် အေးခဲထားသည့်ထုတ်ကုန် များ၊ စားသုံးနိုင်သောအစေ့အဆန်များ၊ ကြိတ်ခွဲသီးနှံထွက်ကုန်များနှင့် မုယောစပါး၊ လတ်ဆတ်သော ဟင်းသီးဟင်းရွက်များ၊ ရေဓာတ်ထုတ်ထားသော ဟင်းသီးဟင်းရွက်များနှင့် ပဲခြောက်များ၊ အနံ့အရသာအတွက် အသုံးပြုသော ဟင်းခတ်အမွှေးအကြိုင်များ၊ အခွံမာသီးနှင့် အစေ့အဆန်များ၊ သစ်သီးခြောက်များ၊ မလှော်ထားသော ကော်ဖီနှင့် ကိုကိုးစေ့များ၊ အထူးအာဟာရ အစား အသောက်များ၊ ကျန်းမာရေးဖြည့်စွက်စာများ စုစုပေါင်း ကုန်စည် အမျိုးအစား ၁၈ အုပ်စုကို တရုတ်နိုင်ငံ၊ GACC တွင် မှတ်ပုံတင်ရမှာ ဖြစ်ပါတယ်။

ကုန်စည်အုပ်စု အလိုက် GACC တွင် မှတ်ပုံတင်နိုင်ရေးအတွက် သက်ဆိုင်ရာ အာဏာပိုင်အဖွဲ့များမှာ စိုက်ပျိုးရေးဦးစီးဌာန၊ မွေးမြူရေးနှင့် ကုသရေးဦးစီးဌာန၊ ငါးလုပ်ငန်းဦးစီးဌာနနှင့် အစားအသောက်နှင့် ဆေးဝါးကွပ်ကဲရေးဦးစီးဌာနတို့ ဖြစ်ကြပါတယ်။

အဆိုပါ ကုန်စည်အမျိုးအစား ၁၈ အုပ်စု၌ ပါဝင်ခြင်းမရှိသည့် ကုန်စည်များကို ထုတ်လုပ်/ တင်ပို့မည့်လုပ်ငန်းများ အနေဖြင့် https://cifer.singlewindow.cn သို့ ဝင်ရောက်၍ ကိုယ်တိုင် Account ဖွင့်လှစ်ကာ တိုက်ရိုက်လျှောက်ထားရမှာ ဖြစ်ပါတယ်။

#ygm_mnn
#Yangon_Media_Group