#Local_News
Published_6 October 2022

သီလဝါဆိပ်ကမ်းကို စက်သုံးဆီဂါလန် ငါးသန်းကျော် ထပ်မံရောက်ရှိလာတယ်လို့ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီကနေ သိရပါတယ်။

#Yangon_Media_Group

#LocalNews
Published_6 October 2022

ရန်ကုန်မြို့ မြန်မာ့ကျောက်မျက်ရတနာပြတိုက်တွင် ယနေ့အောက်တိုဘာလ ၆ ရက်က တင်ဒါဖြင့်ရောင်းချခဲ့သည့် ရွှေတုံးနှင့်ရွှေစင်ခဲများကို ရွှေကုန်သည်များက ဈေးပြိုင်ပေး၍ ဝယ်ယူခဲ့ကြကြောင်း ရွှေလုပ်ငန်းရှင်များကပြောသည်။

"ကြမ်းခင်းဈေး တစ်ကျပ်သားကို ၂၄ သိန်း နဲ့ဖွင့်ထားတယ်။အပြင်မှာ ဒီနေ့ အောက်တိုဘာလ ၆ ရက်နေ့မှာ တစ်ကျပ်သားကို ၂၆ သိန်း ဝန်းကျင်လောက်ရှိနေတယ်။ဒီနေ့ တင်ဒါမှာ တစ်ပိဿာစီခွဲရောင်းယ်။တစ်ပိဿာစီ ခွဲပြီး lot နံပါတ် 99900 က တစ်ကျပ်သားကို ၂၅ သိန်း သုံးသောင်းခွဲ lot နံပါတ် 999900 က ၂၅ သိန်း ၆ သောင်း ၊ lot နံပါတ် 9999900 က ၂၄ သိန်း နဲ့ လေလံ ရခဲ့ကြတယ်"ဟု ရွှေလုပ်ငန်းရှင်တစ်ဦး YMG ကို ပြောသည်။

ယနေ့တွင် ရန်ကုန်နှင့် မန္တလေးတို့တွင် ရွှေတုံးနှင့်ရွှေစင်ခဲ ၃ ပိဿာစီရောင်းချပေးသွာမည်ဟု သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက ယမန်နေ့တွင် ကြေညာထားခဲ့ခြင်း ဖြစ်သည်။

ယင်းအပြင် ယနေ့ ဒင်္ဂါးပြား တစ်ကျပ်သား ဈေးနှုန်းမှာ ၂၄ သိန်း ဖြစ်ပြီး နောက်နေ့များတွင်လည်း ဆက်လက် ရောင်းချနေမည် ဖြစ်ကြောင်း၊ဈေးနှုန်းမှာ တက်ဈေး၊ကျဈေး ရှိနိုင်မည် ဖြစ်ကြောင်းလည်း သိရသည်။

ပြီးခဲ့သည့် စက်တင်ဘာလ ၂၉ ရက်က ပထမအကြိမ်အဖြစ် ရွှေစင်တုံးနှင့်ရွှေစင်ခဲ ၃ ပိဿာစီကို ဈေးပြိုင်တင်ဒါစနစ်ဖြင့် ထုတ်ရောင်းပေးခဲ့သော်လည်း ကြမ်းခင်းဈေးမှာ ၂၅ သိန်း ခွဲ ဖြစ်သောကြောင့် ယင်းအချိန်က ရွှေဈေးအကျဘက်ကို ရောက်လာနိုင်မည်ဟု သုံးသပ်ကာ တင်ဒါဝယ်ယူသူ မရှိခဲ့ပေ။

ymg/mt
#Yangon_Media_Group

#Local_News
Published _ 6 october 2022

ရန်ကုန်မြို့ လမ်းမတော်မြို့နယ်ရှိ Yangon Book Plazaမှ စာအုပ်များကို ဈေးလျှော့ရောင်းပေးမည့် စာအုပ်ပွဲတော်ကျင်းပသွားမည်ဟု Yangon Book Plaza ရဲ့တာဝန်ရှိသူထံမှသိရသည်။

သီတင်းကျွတ်အထိမ်းအမှတ်အနေဖြင့် လျှော့စျေးများနှင့် ရောင်းချပေးသွားမည်ဖြစ်ကြောင်း တာဝန်ရှိသူမှ YMG ကို အခုလိုပြောကြားခဲ့သည်။

"စာအုပ်ပွဲတော်ကို သီတင်းကျွတ်အထိမ်းအမှတ်အနေနဲ့ အောက်တိုဘာလ ၇ ရက်နေ့ကနေနေ့ ၁၀ ရက်အထိ ကျင်းပမှာဖြစ်ပြီး ငါတို့စာပေတိုက်က ထုတ်ဝေတဲ့ စာအုပ်တွေက ၂၀ ရာခိုင်နှုန်းနဲ့ တခြားစာပေတိုက်က ထုတ်ဝေတဲ့ စာအုပ်တွေကို ၁၀ ရာခိုင်နှုန်း လျှော့ပေးမှာပါ" ဟု Yangon Book Plaza ရဲ့မန်နေဂျာက ပြောသည်။

ယခုလို လျှော့ဈေးနှင့် စာအုပ်ရောင်းပေးသည့်အတွက် စာဖတ်ပရိသတ်များအနေဖြင့် အဆင်ပြေနိုင်ကြောင်း သူက ဆိုသည်။

ဒါ့အပြင် စာအုပ်လေးအုပ်လျင် ကျပ်တစ်ထောင်၊ သုံးအုပ်လျင် ကျပ်တစ်ထောင်၊ တစ်အုပ်လျင် ငါးရာကျပ်၊ ရုပ်ပြစာအုပ် တစ်အုပ်လျင် ကျပ်တစ်ထောင်ဖြင့် ရောင်းချပေးသည့် အစီအစဉ်လည်းရှိကြောင်း သိရသည်။

Yangon Book Plaza ဟာ ရန်ကုန်မြို့၊ လမ်းမတော်မြို့နယ်၊ သံဈေး၊ ငါးလွှာမှာ ရှိပြီး ယခင်ကလည်း စာအုပ်ပွဲတော်တွေ ကျင်းပခဲ့ကြောင်း သိရှိရသည်။

#ymg/NN
#Yangon_Media_Group

#Local_News
Published _6 October 20222

ယင်းမှာ ကုမ္ပဏီဘုတ်အဖွဲ့၏ ဆုံးဖြတ်ချက်အရဖြစ်ပြီး လတ်တလောတွင် Puma Energy Asia Sun (PEAS) နှင့် National Energy Puma Aviation Services (NEPAS) တို့ရှိ အစုရှယ်ယာများကို ပြည်တွင်းပုဂ္ဂလိက ကုမ္ပဏီတစ်ခုထံရောင်းချရန် သဘောတူစာချုပ်ချုပ်ဆိုခဲ့ပြီးဖြစ်ကြောင်းလည်း ယင်းထုတ်ပြန်ချက်တွင် ဖော်ပြထားသည်။

National Energy Puma Aviation Service (NEPAS) အမည်ရှိ ဖက်စပ်ကုမ္ပဏီကို စွမ်းအင်ဝန်ကြီးဌာန၊ မြန်မာ့ရေနံနှင့် ဓာတုဗေဒလုပ်ငန်းနှင့် အကျိုးတူပူးပေါင်း၍ ထူထောင်ခဲ့ကာ လေယာဉ်ဆီတင်သွင်းသိုလှောင် ဖြန့်ဖြူးခြင်းလုပ်ငန်းကို ဆောင်ရွက်ခဲ့ခြင်းဖြစ်သည်။

Puma စွမ်းအင်ကုမ္ပဏီ အနေဖြင့် Asia Sun Energy (ASE) နှင့် အကျိုးတူ ပူးပေါင်းပြီး Puma Energy Asia Sun (PEAS) အမည်ဖြင့် မြန်မာ့ရေနံထွက်ကုန်ဖြန့်ဖြူးရေးလုပ်ငန်းများတွင် ပါဝင်ခဲ့ပြီးလေယာဉ်ဆီအပါအဝင် အခြားလောင်စာဆီ တင်သွင်းရောင်းချခြင်းလုပ်ငန်းများကို ၂၀၁၅ ခုနှစ်မှစတင်၍ ဖြန့်ဖြူးပေးနေသည့် ပြည်ပစွမ်းအင်ကုမ္ပဏီလည်း ဖြစ်သည်။

Puma စွမ်းအင်ကုမ္ပဏီက ၂၀၂၁ ဖေဖော်ဝါရီလ နောက်ပိုင်းကစ၍ မြန်မာနိုင်ငံရှိ ယင်းတို့၏ လုပ်ငန်းများကို ယာယီရပ်ဆိုင်းထားကြောင်း ကြေညာခဲ့သေးသည်။

#ymg/mt
#Yangon_Media_Group

#Local_News
Published_6 October 2022

အခြေခံစားသောက်ကုန်ပစ္စည်းတစ်ခုဖြစ်သည့် စားအုန်းဆီဈေးနှုန်းမှာ တစ်ပိဿာ ကျပ် ၇၀၀၀ ဝန်းကျင်သို့ကျဆင်းလာကြောင်း ဈေးကွက်အတွင်းရှိ ရောင်းသူဝယ်သူများထံမှ သိရသည်။

ယင်းအပြင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ အခြေခံလက်ကားရည်ညွှန်းဈေးကို တစ်ပါတ်တစ်ကြိမ်ထုတ်ပြန်ပေးနေပြီး ယခုတစ်ပါတ်တွင် ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာကို ၄၀၂၀ ကျပ် ဖြစ်ပြီး ပြီးခဲ့သည့်တစ်ပါတ်ထက် ၆၀၀ ကျော်ကျဆင်းခဲ့ခြင်း ဖြစ်သည်။

လက်ရှိတွင် ဈေးကွက်အတွင်း၌ အခြေခံစားသောက်ကုန်အချို့မှာ ဈေးနှုန်းကျဆင်းလာကြောင်း သိရသည်။

“ဈေးကတော့ အရမ်းကြီးကျတယ်လို့လည်းမဟုတ်ဘူး။ ကြက်သွန်ဈေးဆိုရင်လည်းကျလာပြီ။ ဆီဆိုရင်လည်း တဖြည်းဖြည်းချင်းကျနေပြီပေါ့။ ဘာပဲပြောပြောကုန်ဈေးနှုန်းကိုကျစေချင်တယ်။ ဒါမှလည်း အဆင်ပြေမှာ”ဟု တောင်ဥက္ကလာပမြို့နယ်တွင်နေထိုင်သူ အိမ်ရှင်မတစ်ဦးကပြောသည်။

ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဟု အသိပေးထုတ် ပြန်ထားသည်။

ဈေးကွက်အတွင်း၌ စားအုန်းဆီဈေးနှုန်းကျဆင်းလာသော်လည်း ပြည်တွင်းထုတ် ပဲဆီ၊ နှမ်းဆီဈေးနှုန်းမှာတော့ ကုန်ကြမ်းရှားပါးခြင်းကြောင့် ဆက်လက်ဈေးမြင့်တက်နေခြင်း ဖြစ်သည်။

ပြည်တွင်း၌ စားအုန်းဆီသုံးစွဲမှုမှာ တစ်နှစ်လျှင် တန်ချိန်၁၀ သိန်းကျော်အထိရှိသည့်အတွက် နှစ်စဉ်တန်ချိန် ၆ သိန်းမှ ၇ သိန်းကြားကို မလေးရှားနိုင်ငံနှင့် အင်ဒိုနီးရှားနိုင်ငံကနေ အဓိထားတင်သွင်းနေရကြောင်း သိရသည်။

#ymg/STH
#Yangon_Media_Group

#Local_News
Published _6 October 20222

မန္တလေးမြို့၊ ပြည်ကြီးတံခွန်မြို့နယ်၊ အိမ်အမှတ် အ၁ /၆၄ ၊ ၇၂ လမ်း၊၁၁၈လမ်းနှင့် ၁၁၈ A လမ်းအကြားရှိ နေအိမ်ဆေးဆိုင်တစ်ဆိုင်တွင် ယနေ့ အောက်တိုဘာလ ၆ ရက်နံနက် ၅ နာရီခန့်က အနုကြမ်းစီးကာ အမျိုးသမီးနှစ်ဦးအား သတ်ဖြတ်သွားသည့်အမျိုးသားတစ်ဦးကို နာရီပိုင်းအတွင်း ဖမ်းမိကြောင်း ရဲတပ်ဖွဲ့နှင့် နီးစပ်သူများထံက သိရသည်။

အနုကြမ်းစီးသူက ဆေးဝယ်လို၍ တံခါးဖွင့်ပေးရန်ပြောဆိုသည့် အတွက် တံခါးဖွင့်ပေးစဉ်တွင် အဆိုပါ အမျိုးသမီးနှစ်ဦးကိုသတ်၍ နေအိမ်ရှိပစ္စည်းနှင့်ငွေများကို ယူဆောင်သွားကြောင်း၊ လူသတ်၍ အနုကြမ်းစီးသွားသူများကို မှတ်တမ်းများဖြင့် လိုက်လံရှာဖွေဖမ်းဆီးရမိထားကြောင်းလည်း သိရသည်။

မန္တလေးမြို့၊ ပြည်ကြီးတံခွန်မြို့နယ်၊ ၇၂လမ်း၊ ၁၁၈လမ်းနှင့် ၁၁၉လမ်းကြားတွင် အသက်ခြောက်ဆယ်အရွယ် မိခင်ဖြစ်သူနှင့် သမီးနှစ်ဦးအပါအဝင် သုံးဦးအတူ နေထိုင်၍ အိမ်ရှေ့တွင် ဆေးအရောင်းဆိုင် ဖွင့်လှစ်ထားရှိသည့် နေအိမ်ဖြစ်ကြောင်း၊ သမီးအငယ်နှင့်မိခင်ဖြစ်သူ နှစ်ဦးသာရှိနေချိန်တွင် လူသတ်ပစ္စည်းလုယူမှုဖြစ်ပွားခဲ့ခြင်းဖြစ်သည်။

သေဆုံးသွားသူများမှာ သားအမိနှစ်ဦးဖြစ်ပြီး သမီးမှာ အသက်နှစ်ဆယ်ခန့်အရွယ်၊ မိခင်မှာအသက်ခြောက်ဆယ်ခန့်အရွယ်တို့ ဖြစ်ကြောင်း ၊အဆိုပါနေအိမ်၌ သားအမိ သုံးဦးနေထိုင်ကြခြင်းဖြစ်ပြီး နောက်ထပ် သမီးတစ်ဦးမှာ အခင်းဖြစ်ပွားစဉ်တွင် နေအိမ်၌ ရှိမနေခဲ့ကြောင်းလည်း သိရသည်။

#ymg/mt
#Yangon_Media_Group