#LocalNews
Published - 19 Feb 2022

နိုင်ငံခြားရင်းနှီးမြှပ်နှံမှုပမာဏာအနေနဲ့ လုပ်ငန်းအရေအတွက်ပေါင်း ၁၂၈ ခုလျော့နည်းသွားပေမယ့် ရင်းနှီးမြှပ်နှံမှုပမာဏအားဖြင့် အမေရိကန်ဒေါ်လာ ၅၅၈ ဒဿမ ၃၃၉ သန်း တိုးမြှင့်ဝင်ရောက်ခဲ့တယ်လို့ ပြန်ကြားရေးဝန်ကြီးက ဂျပန်နိုင်ငံ Mainichi သတင်းစာမှ မေးမြန်းမှုကို ပြန်လည်ဖြေကြားခဲ့တာဖြစ်ပါတယ်။

မြန်မာနိုင်ငံအနေနဲ့ ၂၀၂၁ ခုနှစ် ဖေဖော်ဝါရီ ၁ ရက်နေ့ကစပြီး ၂၀၂၂ ခုနှစ် ဇန်နဝါရီ ၃၁ ရက်အထိ ရင်းနှီးမြှုပ်နှံကဏ္ဍ လုပ်ငန်းပေါင်း ၄၄ ခုတွင် အမေရိကန်ဒေါ်လာ ၃,၈၂၃ သန်းကျော်ကို ခွင့်ပြုခဲ့တယ်လို့ ဆိုပါတယ်။

အဆိုပါ ကန်ဒေါ်လာ ၃,၈၂၃ သန်းကျော်မှာ UK နိုင်ငံမှ အမေရိကန်ဒေါ်လာ ၂,၅၀၄ သန်းနဲ့ ဂျပန်နိုင်ငံမှ အမေရိကန်ဒေါ်လာ ၅၁၆ သန်း မြှုပ်နှံထားပြီး စင်ကာပူနိုင်ငံမှ အမေရိကန်ဒေါ်လာ ၄၄၂ သန်း ပါဝင်မြှုပ်နှံထားတယ်လို့ သိရပါတယ်။

ခွင့်ပြုပေးလိုက်တဲ့အထဲမှာ လျှပ်စစ်ကဏ္ဍတွင် ၃,၀၆၂ သန်းနဲ့ အများဆုံးရင်းနှီးမြှုပ်နှံခဲ့ပြီး အခြားဝန်ဆောင်မှုကဏ္ဍတွေမှာက ၂၃၇ သန်းကျော်နဲ့ စက်မှုကဏ္ဍမှာ အမေရိကန်ဒေါ်လာ ၁၉၉ သန်းကျော် ခွင့်ပြုခဲ့တာဖြစ်ပါတယ်။

ဒ့ါကြောင့် နိုင်ငံခြားရင်းနှီးမြှုပ်နှံမှုလုပ်ငန်းတွေကနေ နိုင်ငံသားလုပ်သား ၂၄,၂၅၈ ဦး၊ မြန်မာနိုင်ငံသားရင်းနှီးမြှုပ်နှံမှု လုပ်ငန်းတွေမှ နိုင်ငံသားလုပ်သား ၁၁,၇၀၄ ဦး စုစုပေါင်း နိုင်ငံသား ၃၅,၉၆၂ ဦးအတွက် အလုပ်အကိုင်ဖန်တီးပေးနိုင်ခဲ့ပါတယ်။

သို့ပေမယ့်လည်း မြန်မာနိုင်ငံမှာ ရင်းနှီးမြှုပ်နှံမှုတွေကို မပြုလုပ်တော့ဘဲ နိုင်ငံခြားကုမ္ပဏီတချို့ ပြန်လည်ထွက်ခွာမှုတွေလည်း ရှိနေခဲ့ပါတယ်။ အဲဒီလို ထွက်ခွာရတာဟာ မိခင်နိုင်ငံက ပြန်လည်ထွက်ခွာဖို့ တွန်အားပေးတာကြောင့်လို့ ပြန်ကြားရေးဝန်ကြီးက ဆိုပါတယ်။

ymg/ei
#Yangon_Media_Group

#LocalNews
Published - 19 Feb 2022

ဥရောပတိုက် စပိန်နိုင်ငံ၏ ယဉ်ကျေးမှုမြို့တော်ဖြစ်တဲ့(Caceres - ကပ်ဆီးရပ်)မြို့မှာ တည်ဆောက်မည့် ဗုဒ္ဓလုမ္ဗိနီဥယျာဉ်တော်ကြီးတွင် ရွှေတိဂုံစေတီတော် ပုံစံတူကိုပါ ထည့်သွင်းတည်ဆောက်သွားဖို့ စီမံဆောင်ရွက်နေတယ်လို့ သိရပါတယ်။

အဆိုပါ ဗုဒ္ဓလုမ္ဗိနီဥယျာဉ်တော်ကြီး တည်ဆောက်ဖို့အတွက် ခွင့်ပြုချက်ကိုလည်း စပိန်နိုင်ငံအစိုးရထံမှ ရရှိခဲ့ပြီးဖြစ်ပါတယ်။

"ရှေးဟောင်းယဥ်ကျေးမှု အမွေအနှစ်တွေကို ထိန်းသိမ်းတဲ့အနေနဲ့ ယူနက်စကိုက မာတီကာချာစီးတီးအဖြစ်နဲ့ တည် ဆောက်နေတာဖြစ်ပါတယ်။

စပိန်နိုင်ငံသား၊ ဗုဒ္ဓဘာသာကို ယုံကြည်သက်ဝင်သူများအဖွဲ့က ဦးဆောင်ပြီး လုမ္ဗိနီဥယျာဉ်တော်ကြီးကို တည် ဆောက်ဖို့ စီမံဆောင်ရွက်နေကြတာဖြစ်ပါတယ်။ မြတ်ဗုဒ္ဓရဲ့ ဖွားမြင်ရာနေရာ၊ တစ်နည်းအားဖြင့်ပြောရင်တော့ ဓမ္မတရားတွေကို ဥရောပမြေမှာ လွှမ်းခြုံလာမယ့် အနေအထားဖြစ်ပါတယ်။ ဒီနေရာရဲ့ အကျယ်အဝန်းဟာလည်း ဧက ပေါင်း ၂၇၀ ကျော်လောက် ကျယ်ဝန်းပါတယ်။ ဗုဒ္ဓလုမ္ဗိနီဥယျာဉ်တော်ကြီး တည်ဆောက်ဖို့အတွက် ကပ်ဆီးရပ်မြို့ တော်ဝန်နဲ့ တွေ့ဆုံဆွေးနွေးခဲ့ကြသလို ဒီပရောဂျက်ကိုဦးဆောင်တဲ့ အဖွဲ့တွေနဲ့လည်း တွေ့ဆုံဆွေးနွေးခဲ့ကြပြီးဖြစ်ပါတယ်။"လို့ ဥရောပတိုက် Lumbini Garden Project ဒါရိုက်အဖွဲ့က IBEC ဆရာတော်က မိန့်ကြားခဲ့ပါတယ်။

အဆိုပါ ဗုဒ္ဓလုမ္ဗိနီဥယျာဉ်တော်ကြီးကို စပိန်နိုင်ငံ Caceres ကပ်ဆီးရပ် ယူနက်စကို ရှေးဟောင်းယဉ်ကျေးမူမြို့တော်တွင် တည်ဆောက်သွားမည်ဖြစ်ပြီး ဘုရားရှင်၏ အငွေ့အသက်ဓမ္မတရားတွေမွမ်းထုံမည့် လုမ္ဗိနီဥယျာဉ်စီမံကိန်းအကောင်အထည်ဖေါ်ရန် ဥရောပတိုက် စပိန်နိုင်ငံ ကပ်ဆီးရပ်ခရိုင် အစိုးရအဖွဲ့အကြီးအကဲနှင့် lumbini Garden project တာဝန်ရှိသူများဆွေးနွေးညှိနှိုင်းပွဲကိုလည်း ယခု( ဖေဖော်ဝါရီလ ၁၆ ရက် )နေ့က ပြုလုပ်ခဲ့ပြီး အဆိုပါဆွေး နွေးပွဲသို့ မြန်မာနိုင်ငံ၊ စစ်ကိုင်းတောင်ရိုး International Buddhist Education Center တည်ထောင်သူ ကျွန်းလှဗုဒ္ဓတက္ကသိုလ်နှင့်နယ်သာလန် Stichting IBEC ဆရာတော်ဒေါက်တာ အရှင်သောဘိတ တို့ တက်ရောက်ခဲ့ကြတာပါ။

အဓိကဆွေးနွေးမှုမှာ ရွှေတိဂုံစေတီတော်တည်ဆောက်ရေးကိစ္စ မြန်မာပြည်မှ အဓိကပါဝင်ရန်ဖြစ်တယ်လို့လည်း သိရပါတယ်။

"ပြောရရင် ဒီတောင်တန်းတွေပေါ်မှာ ဗုဒ္ဓရုပ်ပွားတော်တွေ နီပေါနိုင်ငံမှာရှိတဲ့ လုမ္ဗိနီဥယျာဥ်တော်တွေနဲ့ ဘုရားရှင်ကိုယ်တော်မြတ်ကြီးရဲ့ အငွေ့အသက်တွေကို ဥရောပနိုင်ငံသားတွေ ခံစားကြရမှာဖြစ်ပါတယ်။ ဒီစီမံကိန်းပရောဂျက်အတွက် ဘူတန်နိုင်ငံ ဘုရင်နဲ့ မိသားစုတိုကလည်း ထောက်ပံ့လှူဒါန်းထားကြပြီး သဘောတူလက်မှတ်ရေးထိုးထားသလို ထိုင်းနိုင်ငံက ဘုရင့်သမီးတော်ကလည်း လှူဒါန်းထားပါတယ်။ မြန်မာနိုင်ငံအနေနဲ့ကလည်း ယခုတည်ဆောက်မည့် ဗုဒ္ဓလုမ္ဗိနီဥယျာဉ်တော်ကြီးအတွင်းမှာ ရွှေတိဂုံစေတီတော် ပုံစံတူကိုတည်ဖို့အတွက် စီမံဆောင်ရွက်နေကြတာဖြစ်ပါတယ်။ မြန်မာနိုင်ငံသူ၊ နိုင်ငံသားတွေကိုယ်စား ဗုဒ္ဓဘာသာတွေကိုယ်စား ရွှေတိဂုံစေတီတော်ကို တည်ဆောက်နိုင်ဖို့ ဝိုင်းဝန်းဆောင်ရွက်ကြမှာဖြစ်ပါတယ်။ ပြောရရင် ဒီနေရာက ဥရောပတိုက်ရဲ့ ခေတ်သစ် ဗုဒ္ဓလုမ္ဗိနီဥယျာဉ်တော် မြတ်ဗုဒ္ဓရဲ့ တရားတော်တွေ ပြန့်ပွားလာတဲ့နေရာလည်းဖြစ်ပါတယ်။"လို့ IBEC ဆရာတော်က ဆက်လက်မိန့်ကြားခဲ့ပါတယ်။

IBEC ဆရာတော်သည် အဆိုပါစီမံကိန်း၏ တရားဝင်ပူးပေါင်းဆောင်ရွက်မည့် ဒါရိုက်တာအဖွဲ့ဝင် ရဟန်းတော်ဖြစ်လည်း ဖြစ်ပါတယ်။

အဆိုပါ The Second Birth Place of Lord Buddha Garden Project in Spain စီမံကိန်းသည်အထူးစိတ်ဝင်စားစရာကောင်းသလို မြို့တော်ဝန် His Excellency Luis Salaya နှင့် Lumbini Garden Project အဖွဲ့တို့သည် IBEC ဆရာတော်နှင့်သာသနာပြုအဖွဲ့အား ယဉ်ကျေးမှုမြို့တော်အကြောင်းရှင်းပြကာ အပြန်အလှန်မိတ်ဆက်ဆွေးနွေးခဲ့ကြတယ်လို့လည်း International Buddhist Education Center(သတင်းထုတ်ပြန်ရေးအဖွဲ့ )က သတင်းထုတ်ပြန်ထားပါတယ်။

ဓါတ်ပုံ - International Buddhist Education Center(သတင်းထုတ်ပြန်ရေးအဖွဲ့ )

ymg/kg
#Yangon_Media_Group

#DailyNews
Published - 19 Feb 2022

၁။ YPS ကတ်စနစ်ပြောင်းလဲပါကဝန်ဆောင်ခစရိတ်ကြောင့် မဖြစ်မနေ ယာဉ်စီးခပြောင်းလဲရန်လိုဟုဆို

၂။ ကာကွယ်ဆေး လွမ်းခြုံလာနိုင်တာကြောင့် ကိုဗစ်အတည်ပြုလူနာတွေကို နေအိမ်သီးခြားနေထိုင်ခြင်း (Home Isolation) ခွင့်ပြုရခြင်းဖြစ်ဟုဆို

၃။ မိုးလေဝသ သတင်း

၄။ ကာဘွန်ဒိုင်အောက်ဆိုက်ထုတ်လွှတ်မှုလျှော့ချရန် ရဝမ်ဒါနိုင်ငံတွင် လျှပ်စစ်ဆိုင်ကယ်များ
ပြောင်းလဲမောင်းနှင်လာကြ.....အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 19 Feb 2022

မော်လမြိုင်မြို့၊ တောင်ရိုးတန်းရှိ နဂါးမောက်စေတီတော်တွင် ထားရှိကိုးကွယ်မည့် နဂါး(၃)ကောင် နဂါးရုံဘုရား
စကျင်ကျောက်တော်ကြီးသည် ( ဖေဖော်ဝါရီလ ၁၈ ရက်) နေ့က မော်လမြိုင်မြို့သို့ အဆင်ပြေချောမွေ့စွာဖြင့် ရောက်ရှိလာခဲ့ပြီဖြစ်တယ်လို့ သိရပါတယ်။

နဂါးရုံဘုရား ထုဆစ်ပူဇော်မည့် စကျင်ကျောက်တုံးကြီးအား မြဆည်းဆာနှင့် နဂါးမောက်ဆရာတော်၊ အလှူရှင် အဂ္ဂမဟာသီရိသုဓမ္မမဏိဇောတဓရ ဦးလှထွန်း (ကိုလှထွန်းငရုပ်သီးမှုန့်လုပ်ငန်း)သားသမီး မြေးများ၊ အကျိုးတော်ဆောင်များ၊ မွန်ပြည်နယ်ကြက်ခြေနီကော်မတီဝင်များ လူမှုရေးအသင်းအဖွဲ့များနှင့် ဒကာဒကာမများမှ မတ္တရာမြို့မှ မော်လမြိုင်မြို့သို့ ပင့်ဆောင်လာခဲ့ခြင်းဖြစ်ပါတယ်။

စကျင်ကျောက်တော်ကြီး ပင့်ဆောင်ရာလမ်းခရီးတစ်လျှောက်တွင် လမ်း၊ တံတား ခရီးစဉ်များအားလုံး လွယ်ကူချောမွေ့အဆင်ပြေအောင် ကူညီပေးသောသူများအားလုံးကို အထူးကျေးဇူးတင်ရှိကြောင်းကိုလည်း မော်လမြိုင်မြို့၊ တောင်ရိုးတန်းရှိ နဂါးမောက်စေတီတော် အကျိုးတော်ဆောင်များအဖွဲ့က သတင်းထုတ်ပြန်ထားပါတယ်။

Photo - ZinMoe/CJ

ymg/kg
#Yangon_Media_Group

Published - 19 Feb 2022

မြန်မာနိုင်ငံ၏ စိုက်ပျိုးရေးကဏ္ဍတွင် မျိုးစေ့ထုတ်လုပ်ရေးလုပ်ငန်းဟာ  အကျိုးအမြတ်ကောင်းစွာရနိုင်တဲ့ ရင်းနှီးမြှပ်နှံမှုလုပ်ငန်းကြီးတစ်ခုဖြစ်လာဖို့ သက်ဆိုင်သူတွေက အာရုံစိုက်ဆောင်ရွက်နေကြောင်းသိရပါတယ်။

ဖေဖော်ဝါရီ၁၈ရက် ယမန်နေ့က နေပြည်တော်မှာ  ဖွင့်လှစ်ခဲ့တဲ့ မျိုးစေ့ပြပွဲဟာ လုပ်ငန်းရှင်တွေနှင့် စိုက်ပျိုးရေးပညာရှင်တွေအနေနှင့်  မျိုးစေ့ထုတ်လုပ်ရေးလုပ်ငန်းကို အာရုံစိုက်လုပ်ဆောင်လာစေဖို့ ဆွဲဆောင်မှုတစ်ခု ဖြစ်လာခဲ့ပါတယ်။

မျိုးစေ့ထုတ်လုပ်ရေးလုပ်ငန်းဟာ ပြည်တွင်းလိုအပ်ချက်အတွက်သာမက ပြည်ပ သို့တင်ပို့မှုအတွက်ပါ ဆောင်ရွက်နိုင်တဲ့ အကျိုးအမြတ်ကောင်းတဲ့ရင်းနှီးမြှပ်နှံမှုတစ်ခုဖြစ်တယ်လို့ အဆိုပါပွဲကိုတက်ရောက်ဖွင့်လှစ်ခဲ့တဲ့ နစကဥက္ကဋ္ဌက ပြောပါတယ်။

မြန်မာနိုင်ငံဟာ ကွဲပြားခြားနားတဲ့ ရေမြေ ရာသီဥတုတွေရှိနေတဲ့အတွက် မျိုးစေ့ထုတ်လုပ်ဖို့အခြေအနေကောင်းတွေရှိနေတယ်လို့ ဗိုလ်ချူပ်မှူးကြီး မင်းအောင်လှိုင်ကပြောပါတယ်။

ဒါပေမယ့် အဲဒီလုပ်ငန်းဖွံ့ဖြိုးတိုးတက်ဖို့ လိုအပ်တဲ့ပြင်ဆင်မှုတွေ၊ဖြေလျော့မှုတွေနှင့်ပံ့ပိုးကူညီမှုတွေဖန်တီးပေးဖို့လိုအပ်တယ် ဆိုတဲ့အကြောင်းကိုလည်း သူက ထောက်ပြပြောဆိုသွားပါသေးတယ်။

မြန်မာနိုင်ငံမှာ မျိုးစေ့ကဏ္ဍဖွံ့ဖြိုးတိုးတက်ရေးအတွက် နိုင်ငံသားကုမ္ပဏီတွေသာမကဘဲ နိုင်ငံခြားရင်းနှီးမြှပ်နှံမှုကို ရာနှုန်းပြည့် ရင်းနှီးမြှပ်နှံခွင့်ပြုထားကြောင်းသိရပါတယ်။ဒါပေမယ့် မြန်မာနိုင်ငံမှာ နိုင်ငံခြားတိုက်ရိုက်ရင်းနှီးမြှပ်နှံမှုတွေဟာ  စိုက်ပျိုးရေးကဏ္ဍမှာ ဒုတိယမြောက်အနည်းဆုံးဖြစ်တာကို ရင်းနှီးမြှပ်နှံမှုနှင့် နိုင်ငံခြားစီးပွားဆက်ဆံရေးဝန်ကြီးဌာနရဲ့ ကိန်းဂဏန်းအချက်အလက်တွေအရသိရပါတယ်။ ၂၀၂၂ ဇန်နဝါရီ ၃၁ရက်အထိ စိုက်ပျိုးရေးကဏ္ဍ လက်ရှိ နိုင်ငံခြားရင်းနှီးမြှပ်နှံမှု စုစုပေါင်းဟာ အမေရိကန်ဒေါ်လာ ၄၁၈.၂သန်းရှိပြီး အဲဒါဟာတစ်နိုင်ငံလုံးနိုင်ငံခြား ရင်းနှီးမြှပ်နှံမှုပမာဏရဲ့ ၀.၅၇ ရာခိုင်နှုန်းရှိနေတာဖြစ်ပါတယ်။

ဖေဖော်ဝါရီလ ၁၈ ရက်မှ ၂၂ ရက်ထိ ပျဉ်းမနားမြို့ စိုက်ပျိုးရေးသိပ္ပံကျောင်း၌ ပြုလုပ်နေသော  မျိုးစေ့ပြပွဲ ၂၀၂၂ (Seed Fair 2022) တွင် သုတေသနခြံများ၊ မျိုးသန့်မျိုးပွားခြံများမှ ထုတ်လုပ်ထားသော ဆန်စပါး၊ ပဲမျိုးစုံ၊ ဆီထွက်သီးနှံများနှင့် ဟင်းသီးဟင်းရွက် သစ်သီးဝလံ မျိုးစေ့၊ ပျိုးပင်၊ ပြခန်း ပြကွက်များနှင့် စိုက်ခင်းများ၊ ပုဂ္ဂလိက ပြခန်းများ စုံလင်စွာ ခင်းကျင်းပြသထားကြောင်းလည်း သိရပါတယ်။

အဆိုပါ မျိုးစေ့ ပြပွဲကို၂၀၁၈ ခုနှစ် မတ် ၅ ရက်မှ ၉ ရက်ထိ ပထမအကြိမ်အဖြစ်လည်းကောင်း၊ ၂၀၁၉ ခုနှစ် ဖေဖော်ဝါရီလ ၂၁ ရက်မှ ၂၅ ရက်ထိ ဒုတိယအကြိမ်အဖြစ်လည်းကောင်း၊ ၂၀၂၀ ပြည့်နှစ်  ဇန်နဝါရီလ ၂၈ ရက်မှ ၃၀ ရက်ထိ လည်းကောင်း ပြုလုပ်ခဲ့ပြီး ၂၀၂၁ ခုနှစ်က ပြုလုပ်ခဲ့ခြင်း မရှိခဲပါဘူး။

"ပြပွဲတွေမှာတော့ စိုက်ပျိုးရေး၊မွေးမြူရေးနှင့် ဆည်မြောင်း ဝန်ကြီးဌာန အောက်ရှိ ဦးစီးဌာနတွေမှာ ရှိတဲ့ သုတေသနခြံတွေ ၊ မျိုးသန့်မျိုးပွားခြံတွေကနေ ထုတ်လုပ်ထားတဲ့ ဆန်စပါး၊ ပဲမျိုးစုံ၊ ဆီထွက်သီးနှံ၊ ဟင်းသီးဟင်းရွက် သစ်သီးဝလံမျိုးစေ့ ပျိုးပင် ပြခန်း ပြကွက်တွေ ၊ စိုက်ခင်းတွေ ၊ ပုဂ္ဂလိက ပြခန်းတွေကို ပြသထားမယ်။ပြပွဲရက်တွေမှာ စကားဝိုင်းဆွေးနွေးပွဲတွေကိုလည်း ထည့်သွင်းပေးမှာပါ"ဟု စိုက်ပျိုးရေးဦးစီးဌာန ၏ တာဝန်ရှိသူတစ်ဦးက YMG ကို ပြောပါတယ်။

မြန်မာတစ်နိုင်ငံလုံးတွင် မကွေးတိုင်းဒေသကြီး၊မန္တလေးတိုင်ဒဒေသကြီး၊စစ်ကိုင်းတိုင်းဒေသကြီး၊နေပြည်တော်တို့၌ ဆီထွက်သီးနှံနှင့် ပဲမျိုးစုံ မျိုးစေ့ထုတ်စိုက်ဧကပေါင်း ၄၅၅၂ ဧက ၊ စပါးသီးနှံအတွက် တိုင်းဒေသကြီးနှင့် ပြည်နယ်များတွင် မျိုးစေ့ထုတ်စိုက်ဧကပေါင်း ၈၀၄၈ ဧက စိုက်ပျိုး ထုတ်လုပ်နိုင်ခဲ့ကြောင်း  စိုက်ပျိုးရေး၊မွေးမြူရေးနှင့် ဆည်မြောင်း ဝန်ကြီးဌာန၏ စာရင်းများ အရ သိရပါတယ်။

ymg/mt

#Yangon_Media_Group

#LocalNews
Published - 19 Feb 2022

တပ်ကုန်းမြို့နယ်တွင် စစ်ကိုင်းတိုင်းဒေသကြီးကိုပို့ဆောင်ရန်အတွက် သယ်ဆောင်လာတဲ့ စိတ်ကြွရူးသွပ်ဆေးပြား ၁ ဒသမ ၈ သိန်းကျော် ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့က သိရပါတယ်။

ဖြစ်စဥ်မှာ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဖေဖော်ဝါရီလ ၁၆ ရက်နေ့ မွန်းတည့် ၁၂ နာရီအချိန်တွင် တပ်ကုန်းမြို့နယ်၊ ပင်လောင်း-တပ်ကုန်းသွားကားလမ်း၊ ကင်းသာ ပူးပေါင်းစစ်ဆေးရေးစခန်းတွင် ပင်လောင်းမှ တပ်ကုန်းဘက်သို့ ထိန်လင်းအောင်(၂၄)နှစ် မောင်းနှင်ပြီး မောင်မောင်(၆၅)နှစ် လိုက်ပါလာတဲ့ GRAND MARK II မော်တော်ယာဉ်ကို သတင်းအရရှာဖွေရာ ယာဉ်ပေါ်မှ ဒေသကာလတန်ဖိုး ငွေကျပ်သိန်း ၂,၇၀၀ ကျော်တန်ဖိုးရှိ စိတ်ကြွရူးသွပ်ဆေးပြား ၁.၈ သိန်းကျော် သိမ်းဆည်းရမိခဲ့ကြောင်း၊ ညနေ ၄ နာရီအချိန် ပင်လောင်းမြို့နယ်၊ ရေဆိုးကျေးရွာဘုရားအနီးတွင် စိတ်ကြွရူးသွပ်ဆေးပြားများ သယ်ဆောင်ရာတွင် ပူးပေါင်းပါဝင်သူ ကျော်လှ(၅၆)နှစ်အား ဆက်လက်ဖမ်းဆီးရမိခဲ့တယ်လို့ သိရပါတယ်။

စစ်ဆေးဖော်ထုတ်ချက်များအရ သိမ်းဆည်းရမိ စိတ်ကြွရူးသွပ်ဆေးပြားများအား ရှမ်းပြည်နယ်(တောင်ပိုင်း)မှ စစ်ကိုင်းတိုင်းဒေသကြီးသို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းတို့(၃)ဦးအား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိတယ်လို့သိရပါတယ်။

ymg/hm
#Yangon_Media_Group