#Local_News
Published_ 7 May 2022

ပညာရေးဝန်ကြီးဌာန၊ အဆင့်မြင့်ပညာဦးစီးဌာနအောက်ရှိ ဝိဇ္ဇာ၊ သိပ္ပံတက္ကသိုလ်များနှင့် ဒီဂရီကောလိပ်၊ ကောလိပ်(၄၉)ခုတို့တွင် နည်းပြနှင့်သရုပ်ပြ ဆရာ၊ ဆရာမ တာဝန်ထမ်းဆောင်ကြမည့် (၁၄၇၉) ဦးအား မေ ၆ ရက်နေ့ နံက်ပိုင်းက သက်ဆိုင်ရာ တက္ကသိုလ်၊ ကောလိပ်များတွင် ကြိုဆိုခဲ့ကြောင်း သိရပါတယ်။

ရန်ကုန်တိုင်းဒေသကြီးအတွင်းရှိ ရန်ကုန်တက္ကသိုလ်အပါအဝင် အခြားသော တက္ကသိုလ်တို့၌ နည်းပြနှင့် သရုပ်ပြ ဆရာ၊ ဆရာမအသစ်များအား ကြိုဆိုသော အခမ်းအနားများကို သက်ဆိုင်ရာ တက္ကသိုလ် အသီးသီးမှာ ကျင်းပခဲ့ပါတယ်။

ဒဂုံတက္ကသိုလ်၌ ယနေ့နံနက်ပိုင်းတွင် နည်းပြနှင့် သရုပ်ပြဆရာ၊ ဆရာမအသစ်(၃၄)ဦးကို ပါမောက္ခချုပ်နှင့် သင်ကြားရေး၊ အုပ်ချုပ်ရေးပိုင်းမှ တာဝန်ရှိသူများက နွေးထွေးလှိုက်လှဲစွာ ကြိုဆိုခဲ့ကြသည်။

ဒဂုံတက္ကသိုလ် ပါမောက္ခချုပ် ဒေါက်တာဦးသာထွန်းမောင်က ကြိုဆိုနှုတ်ခွန်းဆက် စကားပြောကြားရာတွင် မိမိတို့ရွေးချယ်ထားသော ဘာသာရပ်ဆိုင်ရာများကို ကျွမ်းကျင်ပိုင်နိုင်ရန် လိုအပ်ပြီး သင်ကြားရေးနှင့် သုတေသနသည် ဟန်ချက်ညီရန် လိုအပ်၍ စိတ်ဓာတ်၊ စည်းကမ်း၊ ပညာဟူ သော ဆောင်ပုဒ်နှင့်အညီ စံနမူပြသင်ကြားပေးသူများအဖြစ် ကြိုးပမ်းကြစေလိုကြောင်း မှာကြားခဲ့ပါတယ်။

စာပေသင်ကြားမှုတစ်ခုတည်း မဟုတ်ဘဲ လူ့အဖွဲ့အစည်းအတွက် စံပြုထိုက်သူများ ဖြစ်ရန်လိုအပ်ကြောင်း၊ နိုင်ငံ့အကျိုးကို သယ်ပိုးနိုင်သော ဆရာကောင်း ဆရာမကောင်းများဖြစ်ကြပါစေဟု ဆုမွန်ချွေလျက် လှိုက်လှဲစွာ ကြိုဆိုပါကြောင်း ပြောကြားခဲ့ပါတယ်။

ဒဂုံတက္ကသိုလ်ကို မေ(၂)ရက် မှစ၍ ဘာသာရပ်(၂၀)တွင် တက်ရောက်သင်ကြားကြမည့် ပထမနှစ်မှ တတိယနှစ်အထိ ကျောင်းသား၊ ကျောင်းသူများကို လက်ခံဖွင့်လှစ်သွားမည်ဖြစ်ပြီး ဆက်လက်၍ Master တန်းများကို ဖွင့်လှစ်သွားမှာ ဖြစ်ကြောင်း သိရပါတယ်။

#ymg_mnn
Yangon_Media_Group

#Local_News
Published_ 7 May 2022

ဂျပန်က UN-Habitat မှတစ်ဆင့် အိမ်ထောင်စု ၁၂၀၀၀ ကျော်ကို သောက်သုံးရေများ လှူဒါန်းခဲ့ကြောင်း UN-Habitat ရဲ့ထုတ်ပြန်ချက်အရ သိရပါတယ်။

ရပ်ရွာစေတနာ့ဝန်ထမ်းများ၏ အကူအညီဖြင့် ရန်ကုန်မြို့ရှိ အိမ်ထောင်စု ၁၂,၀၃၀ အတွက် တစ်ဆယ်လီတာ ရေသန့်ဗူး ၂၄,၀၆၀ ကျော်ကို ဖြန့်ဝေခဲ့ကြောင်း ထုတ်ပြန်ချက်မှာ ဖော်ပြထားပါတယ်။

“နွေရာသီမှာ ရာသီဥတု ပူလာတာကြောင့် မကြာခဏ ရေဆာပါတယ်။ ကျွန်မရဲ့ မိသားစုအတွက် လုံလောက်တဲ့ သောက်ရေ လိုအပ်ပါတယ်။ အခုလိုအပ်တာတွေကို လိုအပ်နေတဲ့ အချိန်အခိုက် အတန့်မှာရလို့ ဝမ်းသာပါတယ်။ ရေလှူတာက ကုသိုလ်ကောင်းမှု လုပ်တာလို့ ကျွန်မယုံကြည်တယ်။ ပြီးတော့ UN-Habitat နဲ့ ဂျပန်ပြည်သူတွေကို သူတို့ရဲ့အကူအညီအတွက် ကျေးဇူးတင်ပါတယ်” လို့ ရန်ကုန်မြို့ ဆင်ခြေဖုံးရပ်ကွက်တစ်ခုမှာနေထိုင်တဲ့ ဒေါ်မိုးမိုးက ဆိုပါတယ်။

UN-Habitat သည် ဂျပန်နိုင်ငံအစိုးရ၏ ပံ့ပိုးကူညီမှုဖြင့် COVID-19 အသိပညာပေး အချက် အလက်များနှင့် COVID-19 ကာကွယ်ရေး ဆောင်ရွက်မှုများကို ဆက်လက်ပံ့ပိုး ကူညီလျက်ရှိပါတယ်။

ymg-mnn
#Yangon_Media_Group.

#LocalNews
Published - 6 May 2022

ရှမ်းပြည်နယ်(မြောက်ပိုင်း)ရှိ ကျောက်မဲမြို့ပေါ်တွင် ခိုလှုံနေရတဲ့ စစ်ဘေးရှောင်ပြည်သူများ နေရပ်သို့ ပြန်သွားကြပြီဖြစ်တယ်လို့ စစ်ဘေးရှောင်အရေး ကူညီဆောင်ရွက်သူများထံမှ သိရပါတယ်။

#Yangon_Media_Group

#LocalNews
Published - 6 May 2022

မေလ(၈)ရက်မှာကျရောက်မယ့် ကမ္ဘာ့ကြက်ခြေနီနေ့အထိမ်းအမှတ်အဖြစ် ကမ္ဘာ့ကြက်ခြေနီနေ့အခမ်းအနားကို ရန်ကုန်မြို့မှာကျင်းပပြုလုပ်မည်ဖြစ်ပြီး ပြည်နယ်တိုင်းဒေသကြီးအသီးသီးကလည်း Video conferencing စနစ်နဲ့တက်ရောက်ကြမှာ ဖြစ်ပါတယ်။

#Yangon_Media_Group

#LocalNews
Published - 6 May 2022

အောင်မဂ်လာအဝေးပြေး ကားမှတ်တိုင်အနီးတွင် အုပ်စုဖွဲ့၍ ဓားထောက်လုယက်မှုများရှိနေပြီး အဆိုပါ ပတ်ဝန်းကျင်ရှိ ဆိုင်ကယ်ကယ်ရီသမားများနှင့် လူမိုက်အဖွဲ့အချို့ကပါ ပူးပေါင်းပါဝင်နေတယ်လို့ ယင်းမြို့နယ်အတွင်း နေထိုင်သူများထံမှ သိရပါတယ်။

"ကားဝန်းထဲမှာ ပါဆယ်ထုပ်စရာရှိလို့ မှတ်တိုင်မှာဆင်းပြီး ကယ်ရီနဲ့ ပါဆယ်သွားထုပ်ခဲ့ပါတယ်။
ကယ်ရီကိုလဲ အသွားပြန် ငှားလိုက်တယ်။ ပါဆယ်ထုပ်ပြီး အပြန်မှတ်တိုင်မှာ ခဏ YBS 93
ကိုစောင့်နေတာပါ။ အလုပ်က တောင်ဥက္ကလာမှာဆိုတော့ ဆိုင်ကယ်သမားအုပ်စုနဲ့ လူမိုက်လား ၊ သူခိုးလား ဓားပြလား မသိတဲ့ အဖွဲ့က ကျနော်ကို ဝိုင်းပြီး ဓားပြပြီးဖုန်းတောင်းတယ်၊ ပြီးတော့ဓားနဲ့ ထောက်သလိုလုပ်တယ်။ အဲ့အချိန်မှာ မှတ်တိုင်မှာ ကားစောင့်နေတဲ့လူ ၁၀ ယောက်လောက်လဲတွေ့တယ်။ ဖုန်းနဲ့ ပိုက်ဆံအိတ် ထုတ်ခိုင်းပြီး ပိုက်ဆံ ၃ သိန်းပါသွားတယ်။ ဖုန်းတော့ မလုပ်ပါနဲ့ဆိုပြီး တောင်းပန်လို့ ဖုန်းတော့အတင်းမလုဘူး။ ဖုန်းတော့ပြန်ပေးတယ် ပိုက်ဆံမပါရင်တော့ ဖုန်းယူမှာပေါ့၊ ပြီးတော့ ကျနော်တက္ကစီငှားနေတုန်း သူတို့ကို ကြည့်လိုက်တော့ အေးဆေးထိုင်နေကြတယ်။ ဒီလိုဖြစ်မျိုး နေ့တိုင်းနီးပါးလုပ်လေ့ရှိတယ်လို့ အဲ့မှတ်တိုင်နားက လူတွေကိုပြောပြခဲ့တယ်"လို့ လုယက်ခံရသူ တစ်ဦးက ၄င်းကြုံတွေ့ခဲ့ရသည့် ဖြစ်စဥ်ကို ယခုလိုပြောပြခဲ့ပါတယ်။

အဆိုပါ ဖြစ်စဥ်ဟာ မေလ ၂ ရက် နေ့ နံနက် အစောပိုင်းအချိန်က ဖြစ်ပွားခဲ့တာဖြစ်တယ်လို့လည်း ၄င်းကပြောပါတယ်။

ဒါ့အပြင် ယင်းဖြစ်စဥ်နဲ့ ပတ်သက်ပြီး အများပြည်သူသတိထားမိစေရန်နှင့် ဂရုတစိုက်သွားလာကြဖို့ကိုလည်း ၄င်းကြုံတွေ့ခဲ့ရသည်များကို လူမှုကွန်ရက်ပေါ်မှာ ပြန်လည်မျှဝေရေးသားခဲ့ပါတယ်။

"ဥပဒေမဲ့လုပ်ရပ်တွေပါပဲ။ လူတွေအများကြီးတွေ့တယ် ဝင်မပြောရဲဘူး။ ကျနော်က မေ့ပြစ်လို့ရပါတယ်၊ ရှောင်သွားလို့လဲရတယ်။ ဒါပေမဲ့ နောက်လူတွေ ဒီလိုမဖြစ်ရအောင် အသိပေးခြင်းဖြစ်ပါတယ်။ ကျနော်ငှားစီးတဲ့ ဆိုင်ကယ်သမားကိုယ်တိုင်က အဲ့လိုလုပ်စားနေတာပါ။ အဝေးပြေး မှတ်တိုင်က ဆိုင်ကယ်ကို မစီးမိပါစေနဲ့ဖြစ်နိုင်ရင် ကားမှတ်တိုင်မှာ မစောင့်ပါနဲ့ အခက်မသင့် ရင် အသက်အန္တရာယ်ပါစိုးရိမ်ရတယ်။" လို ၄င်းက ပြောပြခဲ့ပါတယ်။

ဒါ့အပြင် ယခု မေလ ၃ ရက်နေ့က လှည်းတန်းလမ်းဆုံမှာ ဖုန်းလုတဲ့သူကို ဝိုင်းဖမ်းဆီးတဲ့ ဆိုက်ကားဆရာဟာ အငြိုးထားခံခဲ့ရပြီး နောက်ရက်မှာ အုပ်စုဖွဲ့ရိုက်နှက်ခံရလို သေဆုံးသွားခဲ့ရတဲ့ ဖြစ်စဥ်တစ်ခုလည်း ရန်ကုန်မြို့မှာဖြစ်ပွားခဲ့တာပါ။

ကမာရွတ်မြို့နယ် လှည်းတန်းလမ်းဆုံအနီးရှိ ဇေယျာသီရိလမ်းထိပ်မှာ ဆိုက်ကားဆရာက ခရီးသည်စောင့်နေစဉ်မှာ အမည်မသိလူအုပ်စုက တုတ်၊ ဓားတွေနဲ့ ဝိုင်းဝန်းရိုက်နှက်ခဲ့တာပါ။

အဆိုပါ ဆိုက်ကားဆရာဟာ လှည်းတန်းမှာ ဖုန်းလုတဲ့သူတွေကို မေလ ၃ ရက်နေ့က ဝိုင်းဖမ်းပေးပြီး နောက်ရက် မေလ ၄ ရက်နေ့မှာ အခုလို ရိုက်နှက်ခံရတာဖြစ်ပါတယ်။

ထို့အပြင် ဆင်းကတ်ရောင်းသူတစ်ဦးလည်း ပေါင်ကို ဓားနဲ့ထိုးမိသွားပါသေးတယ်။ အနီးအနားကလူတွေလည်း ဝိုင်းဝန်းမကူညီရဲဘဲ ကြည့်ပဲနေရတယ်လို့ အဆိုပါ အနီးပတ်ဝန်းကျင်တွင် နေထိုင်သူတွေက ပြောပါတယ်။

ယင်းကဲ့သို့သော လုယက်ရိုက်နှက်မှု ဖြစ်စဥ်တွေဟာ ရန်ကုန်မြို့မှာ နေ့စဥ်ဆိုသလိုဖြစ်ပွားနေတာ ဖြစ်ပါတယ်။

ဒါကြောင့်လည်း ဂရုတစိုက်သွားလာကြဖို့ကို ပြည်သူအချင်းချင်း သတိပေးနေရတယ်လို့လည်း သိရပါတယ်။

ပုံစာ - အောင်မဂ်လာအဝေးပြေး ကားဝန်းတစ်နေရာအားတွေ့ရစဥ်။

ymg/kg
#Yangon_Media_Group

#LocalNews
Published - 6 May 2022

ဘင်္ဂလားပင်လယ်အော်အရှေ့တောင်ပိုင်းတို့မှာဖြစ်ပေါ်နေတဲ့ လေဖိအားနည်းရပ်ဝန်းအရှိန်ကြောင့် မြန်မာနိုင်ငံရှိ အချို့ဒေသတွေမှာ မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်းများ ဖြစ်ပေါ်နိုင်တဲ့အတွက် ကြိုတင်သတိပြုနေထိုင်ကြဖို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးချက်ထုတ်ပြန်လိုက်ပါတယ်၊၊

ဒါနဲ့ပတ်သက်လို့ မိုးလေဝသနှင့်ဇလဗေဒညွှန်ကြားမှုဦးစီးဌာန၊ညွှန်ကြားရေးမှူးဦးလှထွန်းက "အဲဒီလေဖိအားနည်းရပ်ဝန်းက လောလောဆယ်အထိတော့ မြန်မာနိုင်ငံဘက်ကို ဦးတည်ရွေ့လျားတာမျိုး မရှိသေးပါဘူး၊၊မေလ(၁၀)ရက်နေ့အထိ အိန္ဒိယဘက်ကို ဦးတည်ရမယ့်အနေအထားပေါ့ ကျန်တဲ့ရက်တွေမှာတော့ စောင့်ကြည့်ရဦးမှာပေါ့၊၊လေဖိအားနည်းရပ်ဝန်းကြောင့်ဖြစ်ပေါ်လာတဲ့ တိမ်တိုက်တွေကိုတော့ မြစ်ဝကျွန်းပေါ်ဒေသ၊ မုတ္တမကွေ့နဲ တနင်္သာရီ ကမ်းရိုးတန်းတစ်လျှောက် မြန်မာနိုင်ငံတောင်ပိုင်းဒေသတွအနေနဲ့သတိထားဖို့လိုတယ်"လို့ YMGကို ပြောပါတယ်၊၊

ဒီ့အပြင် ပြည်တွင်းလေကြောင်းပျံသန်းရေး၊ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နဲ့ကမ်းလွန်ပင်လယ်ပြင်တိုရှိ ကမ်းနီး၊ ကမ်းဝေး ငါးဖမ်းရေယာဉ်များ၊‌ သင်္ဘောများအနေနဲ့လည်း ကြိုတင်သတိပြုနိုင်ရန် အသိပေးနှိုးဆော်ထားပါတယ်၊၊

လေဖိအားနည်းရပ်ဝန်းဟာ အနောက်မြောက်ဘက်သို့ ရွေ့လျားနိုင်ပြီး၊မေလ(၇) ညနေပိုင်းမှာ မုန်တိုင်းငယ်အဖြစ်သို့လည်းကောင်း၊မေလ(၈)ရက်ညနေပိုင်းမှာ ဆိုင်ကလုန်းမုန်တိုင်းအဖြစ်သို့လည်းကောင်း ပိုမိုအားကောင်းလာနိုင်ပြီး၊ အနောက်မြောက်ဘက်သို့ ဆက်လက်ရွေ့လျားကာ၊မေလ(၁၀)ရက်မှာဘင်္ဂလားပင်လယ်အော်အနောက်အလယ်ပိုင်း (အိန္ဒိယ နိုင်ငံ၊ အင်ဒရာပရာဒေ့ရှ်မြောက်ပိုင်းကမ်းလွန်-ဩရိဿကမ်းခြေ)သို့ ရောက်ရှိနိုင်တယ်လို့ မိုး/ဇလက ခန့်မှန်းချက်ထုတ်ပြန်ထားပါတယ်၊၊

အဲဒီလေဖိအားနည်းရပ်ဝန်းအရှိန်ကြောင့် မေလ(၆)ရက်မှ(၁၀)ရက်အတွင်း နေပြည်တော်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူး တိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်း ဒေသကြီး၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင် ပြည်နယ်နှင့် မွန်ပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာနိုင်ပြီး၊ အချို့ဒေသတွေမှာ နေရာကွက်၍ မိုးကြီးနိုင်ကြောင်း၊မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တိုတွင် တစ်ခါတစ်ရံ မိုးသက်လေပြင်းများကျရောက်ပြီး လှိုင်းကြီးနိုင်ကြောင်းသိရပါတယ်၊၊ မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် (၃၅)မိုင်မှ မိုင်(၄၀)အထိ တိုက်ခတ်နိုင်ပြီးလှိင်းအမြင့်မှာ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တိုတွင် (၈)ပေမှ (၁၀)ပေခန့် ရှိနိုင်တယ်လို ထုတ်ပြန်ချက်မှာဖော်ပြပါရှိပါတယ်၊၊

ymg/tthl
#Yangon_Media_Group