#LocalNews
Published - 15-5-2022

မြန်မာအမျိုးသမီးလက်ရွေးစင်‌ဘောလုံးအသင်းက စင်ကာပူအမျိုးသမီးဘောလုံးအသင်းကို တစ်ဂိုး ဂိုးမရှိဖြင့် အနိုင်ရထားသည်။

ယင်းကြောင့် ရမှတ် ၇ မှတ်ဖြင့် အကြို ဗိုလ်လုပွဲကို ‌တက်ရောက်သွားပြီဖြစ်သည်။

မြန်မာအမျိုးသမီးအသင်းအနေဖြင့် အုပ်စုနောက်ဆုံးပွဲစဉ်အဖြစ် ယှဉ်ပြိုင်ကစားရာတွင် အနိုင်ရရှိခဲ့ခြင်းဖြစ်ပြီး နောက်တစ်ဆင့် တက်ရောက်ခဲ့ခြင်းလည်း ဖြစ်သည်။

ယနေ့ ညနေ ၆ နာရီ ခွဲ အချိန်တွင်ကစားမည့် ထိုင်းအသင်းနှင့် လာအိုအသင်းတို့၏ ရလဒ်ကိုလည်းစောင့်ကြည့်ရဦးမည်ဖြစ်သည်။

ymg-mt
#Yangon_Media_Group

#TV Yangon Times Mattersအစီအစဉ်
Published - 14 May 2022

အစီအစဉ်တင်ဆက်သူ ဆရာဟိန်းလတ်က စာရေးဆရာအကြီးကိုကို (ကသာ) နှင့်အတူ

_ ဆရာအကြီးကိုကို (ကသာ) ရဲ့ ထွက်ရှိထားတဲ့ စာအုပ်များအကြောင်းနဲ့ စာရေးဆရာဖြစ်လာပုံများ။

_ ဆရာရဲ့ အကြီးကိုကို(ကသာ)စာကြည့်တိုက် များတည်ထောင်ဖြစ်ဖို့ပုံအကြောင်းများ။

_ ဆရာအကြီးကိုကို(ကသာ) ရဲ့ လစဉ် အမေကိုကန်တော့ဖြစ်တဲ့အကြောင်းများ" စတဲ့ စိတ်၀င်စားဖွယ် အကြောင်းအရာများကို ဆွေးနွေးခဲ့ကြပါတယ်။

#Yangon_Media_Group

#Local_News
Published_ 15 May 2022

ကိုဗစ်-၁၉ ကပ်ရောဂါအလွန် နှစ်နိုင်ငံပြည်သူ့ကျန်းမာရေးစောင့်ရှောက်မှု လုပ်ငန်းများ ပူးပေါင်းဆောင်ရွက်ရေးအတွက် ကျန်းမာရေးဝန်ကြီး ဒေါက်တာသက်ခိုင်ဝင်းသည် အင်ဒိုနီးရှားနိုင်ငံ၊ ဘာလီမြို့တွင် ထိုင်းနိုင်ငံ၊ ဒုတိယဝန်ကြီးချုပ်နှင့် ပြည်သူ့ကျန်းမာရေးဝန်ကြီး H.E. Anutin Charnvirakul နှင့် တွေ့ဆုံဆွေးနွေးခဲ့ကြောင်း သိရပါတယ်။

မြန်မာ-ထိုင်း နယ်စပ်ဒေသကူးစက်ရောဂါများ စောင့်ကြပ်ကြည့်ရှုခြင်းနှင့် သတင်းအချက်အလက်များဖလှယ်ရေး၊ ကျန်းမာရေး လူ့စွမ်းအားအရင်းအမြစ် ဖွံ့ဖြိုးတိုးတက်ရေးကိစ္စရပ်များကိုလည်း ဆွေးနွေးခဲ့ကြောင်း သိရပါတယ်။

ထိုသို့တွေ့ဆုံစဉ် ဝန်ကြီးက မြန်မာနိုင်ငံအနေဖြင့် ကိုဗစ်-၁၉ တတိယလှိုင်းအတွင်း အောက်ဆီဂျင် အခက်အခဲဖြစ်နေချိန်၌ နယ်စပ်ဒေသများမှတစ်ဆင့် Liquid Oxygen နှင့် Oxygen Tanks များ ရရှိရေးကူးညီဆောင်ရွက်ပေးခဲ့ခြင်းနှင့် မကြာသေးမီကလည်း ကိုဗစ်-၁၉ ကာကွယ်ဆေး AstraZeneca (၁) သန်း Doses မြန်မာနိုင်ငံသို့လှူဒါန်းခဲ့မှုနှင့် RT PCR ဓါတ်ခွဲပစ္စည်းများ အမျိုးသားကျန်းမာရေး ဓာတ်ခွဲမှုဆိုင်ရာဌာနသို့ လှူဒါန်းပေးမှုအတွက် ကျေးဇူးတင်ကြောင်း ပြောကြားခဲ့ပါတယ်။

မြန်မာနိုင်ငံ၌ လူတိုင်းလက်လှမ်းမီ လွှမ်းခြုံနိုင်သော ကျန်းမာရေးစောင့်ရှောက်မှု ရရှိရေး လုပ်ငန်းစဉ်များတွင် ပြည်သူများငွေကြေးကုန်ကျမှု သက်သာစေရေးအတွက် ထိုင်းနိုင်ငံ၏ အတွေ့အကြုံများကို လေ့လာနိုင်ရေးကိုလည်း ဆွေးနွေးခဲ့ကြပါတယ်။

ထို့ပြင် ထိုင်းနိုင်ငံရှိ မြန်မာရွှေ့ပြောင်းလုပ်သားများ ကိုဗစ်-၁၉ ရောဂါကာကွယ်ဆေး ထိုးနှံပေးနေမှုကိစ္စ၊ ထိုင်းနိုင်ငံမှမြန်မာနိုင်ငံသို့ ကိုဗစ်-၁၉ ရောဂါကာကွယ်ဆေး ထပ်မံလှူဒါန်းလို့သည့် ကိစ္စရပ်များလည်း ဆွေးနွေးခဲ့ကြောင်း သိရပါတယ်။

ymg-mnn
#Yangon_Media_Group

#LocalNews
Published_15 May 2022

ယနေ့ မေလ ၁၅ ရက်တွင် ပြန်လည်ဖွင့်လှစ်မည်ဟု သတင်းထွက်နေသော မဲဆောက် - မြဝတီ ချစ်ကြည်ရေးအမှတ် ၁ တံတားကို ပိတ်ထားဆဲဖြစ်ကြောင်း မဲဆောက်ရောက် မြန်မာရွှေ့ပြောင်းအလုပ်သမားများအရေး လုပ်ဆောင်နေသူများကပြောသည်။

"တံတားကို ဖွင့်စေချင်နေကြပြီ။ပြီးတော့ ထိုင်းသတင်းတွေမှာလည်း ဒီနေ့ဖွင့်မယ်ဆိုတာ ရေးနေကြတယ်။ဒါပေမယ့် တံတားက မဖွင့်ဘူးခင်ဗျ၊ကန့်သတ်ချက်တွေရှိနေသေးတယ်လို့မြင်ပါတယ်"ဟု မြန်မာရွှေ့ပြောင်းအလုပ်သမားများအရေး လုပ်ဆောင်နေသူတစ်ဦးကပြောသည်။

ထိုင်း - မြန်မာ နယ်စပ်ဂိတ်များ ပြန်လည်ဖွင့်လှစ်နိုင်ရေးအတွက် ထိုင်းအစိုးရ၊ဒေသန္တရအာဏာပိုင်အဖွဲ့များအနေဖြင့် အစည်းအဝေးများကို မကြာခဏ ပြုလုပ်လေ့ရှိသော်လည်းမြန်မာနိုင်ငံဘက်က သတင်းထုတ်ပြန်မှု မပြုလုပ်သေးပေ။

ymg/mt
#Yangon_Media_Group

#LocalNews
Published - 15 May 2022

ယခု မေလဆန်းပိုင်းမှစလို့ ပုဂံ - ညောင်ဦးဒေသသို့ ခရီးသွားဝင်ရောက်မှုတွေ ပြန်လည်နည်းပါးလာခဲ့သည့်အတွက် ပုဂံဒေသခံများအနေနဲ့ အလုပ်ကိုင်များ ပြန်လည်ရှားပါးလာခဲ့တယ်လို့ သိရပါတယ်။

ပုဂံဒေသဟာ ခရီးသွားတွေကိုသာ အဓိကမှီခိုအားထားနေရတဲ့ ဒေသတစ်ခုဖြစ်ကာ ပြီးခဲ့တဲ့ သင်္ကြန်ရုံးပိတ်ရက်ကာလအတွင်းမှာ ပုဂံဒေသသို့ ပြည်တွင်းခရီးသွားအများအပြားဝင် ရောက်ခဲ့သော်လည်း ယခုကာလမှာတော့ ခရီးသွားဧည့်သည်တွေဝင်ရောက်မှုက အနည်းအကျင်းသာ ရှိနေတာဖြစ်တယ်လို့ ဆိုပါတယ်။

"လာတော့လာကြပေမယ့် အရင်ကလောက်မလာကြတော့ဘူးပေါ့။ ကျဲသွားတာပေါ့ ရုံးပိတ်ရက် စနေ၊တနဂ်နွေလိုရက်မျိုးတွေဆိုရင်တော့ ဧည့်သည်တွေ နည်းနည်းပါးပြန်ရှိတယ်။ ကျန်တဲ့ရက်တွေက အတော်ပါးတယ်။ ပြီးခဲ့တဲ့ လပိုင်းတွေကတော့ ဧည့်သည်တွေ အတော်လေးဝင်ရောက်ခဲ့တာရှိပါတယ်။ အခုကာလကျတော့ မိုးတွင်းလည်း ရောက်တော့မယ်လေ အဲ့တော့ ဧည့်သည်တွေကပါးသွားတယ်။ တချို့ မြို့ ကြီးတွေက ဧည့်သည်တွေကျ တော့ မိုးတွင်းဆိုတော့ မိုးတွေရွာရင် သွားရလာရမကောင်းဘူး၊ ဘုရားဖူးလို့ မကောင်းဘူး ထင်ကြတာ။ ဒါပေမဲ့ ဒီဘက်ဒေသတွေက အဲ့လိုမဟုတ်ဘူး။ မိုးရွာလည်း ခဏပဲ ပြီးရင်ပြန်တိတ်တယ်၊ ဆက်တိုက်ကြီးရွာတဲ့ ဒေသမဟုတ်ဘူး။

ခရီးသွားတွေအနေနဲ့ မိုးတွင်းကာလမှာလည်း ပုဂံဒေသကို လာရောက်လည်ပတ်လို့ရပါတယ်လို့ ဖိတ်ခေါ်ချင်ပါတယ်။"လို့ ပုဂံဒေသရှိ ခရီးသွားလုပ်ငန်းရှင်တစ်ဦးက အခုလိုပြောပြခဲ့ပါတယ်။

ပြီးခဲ့တဲ့ နှစ်နှစ်ကျော်ကာလအတွင်းမှာ ကိုဗစ်ကပ်ရောဂါအခြေအနေနဲ့ နိုင်ငံရေးဖြစ်စဉ်အ ခြေအနေအချို့ကြောင့် ပုဂံဒေသသို့ ခရီးသွားဝင်ရောက်မှုတွေ သိသိသာသာကျဆင်းသွားခဲ့ရတာဖြစ်ပါတယ်။

သို့သော်လည်း ပြီးခဲ့သည့်နှစ် ခရီးသွားရာသီကာလမှစတင်ပြီး ပုဂံဒေသသို့ ပြည်တွင်း ခရီးသွားတွေ ပြန်လည်ဝင်ရောက်မှုတွေ ရှိလာခဲ့တာဖြစ်ပါတယ်။

ဒါ့အပြင် ယခု သင်္ကြန်ရုံးပိတ်ရက် ကာလအတွင်းမှာလည်း ဟိုတယ်၊မိုတယ်တွေ ပြည့်သည်အထိ ပုဂံဒေသသို့ ပြည်တွင်းခရီးသွားများ စံချိန်တင်ဝင်ရောက်ခဲ့မှုတွေရှိခဲ့တာပါ။

သို့သော်လည်း ယခုမိုးရာသီကာလမှစတင်ပြီး ပုဂံဒေသသို့ ခရီးသွားဝင်ရောက်မှုတွေက နည်းပါးနေအုံးမည်ဖြစ်ပြီး လာမည့်ပွင့်လင်းရာသီ ခရီးသွားကာလမှသာ ပုဂံ- ညောင်ဦး ဒေသသို့ ပြည်တွင်း၊ပြည်ပဧည့်သည်တွေ ပြန်လည်ဝင်ရောက်မှုတွေ များပြားနိုင်မယ်လို့လည်း ခရီးသွားလုပ်ငန်း လုပ်ကိုင်သူများက ခန့်မှန်းထားကြပါတယ်။

ymg/kg
#Yangon_Media_Group

#LocalNews
Published - 15 May 2022

အရှိန်မထိန်းနိုင်သည့် အိမ်စီးယာဥ်တစ်စီးကအမြန်လမ်းရှိ ဂက်ဝေးတန်းနှင့် ခရေပင်များအားဝင်ရောက်တိုက်မိခဲ့သည့် ဖြစ်စဥ်တစ်ခု မေလ ၁၅ ရက်၊နံနက် ၈ နာရီ ၁၅ မိနစ် အချိန်က ဖြစ်ပွားခဲ့တယ်လို့ သိရပါတယ်။

ဖြစ်စဥ်မှာ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၇၇/၅)တွင် ရန်ကုန်ဘက်မှ နေပြည်တော်ဘက်သို့ မောင်းနှင်လာသော Landcruiser cygnus အမျိုးအစား (ခဲရောင်)ယာဉ်သည် အရှိန်မထိန်းနိုင်ဘဲ လမ်းလယ်ရှိ ဂက်ဝေးတန်းနှင့် ခရေပင်များအား ဝင်ရောက်တိုက်မိမှုဖြစ်ပွားခဲ့တာပါ။

ယာဥ်တိုက်မှု ဖြစ်ပွားရာသို့ ဥသျှစ်ကုန်းအမြန်လမ်းမီးသတ်စခန်းမှ သန္ဓေမီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများသွားရောက်ဆောင်ရွက်ခဲ့ရတယ်လို့ သိရပါတယ်။

အဆိုပါ ယာဉ်တိုက်မှုကြောင့် ယာဉ်ပေါ် ပါ အမျိုးသား(၄)ဦးအနက် ယာဉ်မောင်းအမျိုးသား(၁)ဦး ထိခိုက်ဒဏ်ရာ(မစိုးရိမ်ရ)တိုအား မြို့ချောင်းပြည်သူ့ဆေးရုံသို့ ကူညီပို့ဆောင်ပေးခဲ့ရကြောင်း အမြန်လမ်း မီးသတ်တပ်ဖွဲ့က သတင်းထုတ်ပြန်ထားပါတယ်။

Photo - MFSD

ymg/kg
#Yangon_Media_Group