#LocalNews
Published_26 May 2022
နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်နှင့် တိုင်းရင်းသား ကရင်အမျိုးသားအစည်းအရုံး၊ ကရင်အမျိုးသား လွတ်မြောက်ရေး တပ်မတော် (ငြိမ်းချမ်းရေးကောင်စီ) (KNU/KNLA–PC) ဥက္ကဋ္ဌ စောထော့လေး ဦးဆောင်သည့် ငြိမ်းချမ်းရေးကိုယ်စားလှယ်အဖွဲ့တို့ ယနေ့ မေလ ၂၅ ရက်တွင် နေပြည်တော်၌ ငြိမ်းချမ်းရေးဆွေးနွေးမှုစတင်ပြီ ဖြစ်သည်။
တွေ့ဆုံမှုတွင် နစက ဥက္ကဌက တိုင်းဒေသကြီးပြည်နယ်တိုင်း ၌ တိုင်းရင်းသားလူမျိုးတစ်ခုတည်း သီးသန့်နေထိုင်သည်မဟုတ်ဘဲ တိုင်းရင်းသားပေါင်းစုံနေထိုင်သည့် ပြည်ထောင်စုနိုင်ငံဖြစ်သောကြောင့် ပြည်ထောင်စုအကျိုးကိုကြည့်၍ ဆောင်ရွက်ရမည့် အခြေအနေ၊ငြိမ်းချမ်းရေးရရှိမှသာ နိုင်ငံတည်ဆောက်ရေး၊တိုင်းပြည်တည်ဆောက်ရေးကို ပိုမိုသွက်လက်စွာဆောင်ရွက်နိုင်မည်ဖြစ်၍ မိမိတိုင်းရင်းသား၊မိမိပြည်နယ်နှင့် မိမိတိုင်းပြည်ဖွံ့ဖြိုးတိုးတက်ရေးကို ဦးတည်စဉ်းစားရန်လိုသည့်အခြေအနေ၊ဒီမိုကရေစီစနစ်ကို ဖော်ဆောင်ရာတွင်အသိပညာ၊
အတတ်ပညာပြည့်စုံသည့် လူသားအရင်းအမြစ်များပေါ်ထွက်လာရန် အဓိကလိုအပ်သည့်အတွက် တစ်နိုင်ငံလုံးတိုင်းရင်းသားဒေသများပါမကျန် ပညာရည်မြင့်တင်ရေးကို လက်တွေ့ကျကျ အကောင်အထည်ဖော်ဆောင်ရွက်လျက်ရှိသည့် အခြေအနေ၊ပြည်သူလူထုဆန္ဒနှင့်ကိုက်ညီသည့် ပါတီစုံဒီမိုကရေစီစနစ်နှင့် ဖက်ဒရယ်ကိုအခြေခံသည့် ပြည်ထောင်စုစနစ်တည်ဆောက်ရေးဆိုင်ရာ ကိစ္စရပ်များနှင့် ပတ်သက်၍ ဆွေးနွေးခဲ့ခြင်း ဖြစ်သည်။
ကရင်အမျိုးသားအစည်းအရုံး၊ကရင်အမျိုးသားလွတ်မြောက်ရေးတပ်မတော်(ငြိမ်းချမ်းရေးကောင်စီ) KNU/KNLA(PC) ဥက္ကဌနှင့်အဖွဲ့ဝင်များက ပါတီစုံဒီမိုကရေစီစနစ်ကျင့်သုံးရေး၊ဒီမိုကရေစီနှင့်ဖက်ဒရယ်ကိုအခြေခံသည့် ပြည်ထောင်စုစနစ်တည်ဆောင်ရေးနှင့်ပတ်သက်၍ သဘောထားတူညီချက်အမြင်များကို ပြည်လည်ဆွေးနွေးကာ ဒေသဖွံ့ဖြိုးတိုးတက်ရေးဆိုင်ရာများတင်ပြခဲ့ကြကြောင်းနှင့် ငြိမ်းချမ်းရေးဆိုင်ရာကိစ္စရပ်များ၊ဒေသဖွံ့ဖြိုးရေးဆိုင်ရာကိစ္စရပ်များနှင့်ပတ်သက်၍ နှစ်ဖက်အမြင်များ ပွင့်ပွင့်လင်းလင်း ဆွေးနွေးခဲ့ကြကြောင်း သိရသည်။
ကရင်အမျိုးသားအစည်းအရုံး၊ကရင်အမျိုးသားလွတ်မြောက်ရေးတပ်မတော်(ငြိမ်းချမ်းရေးကောင်စီ) KNU/KNLA(PC) ဥက္ကဌနှင့်အဖွဲဝင်များအဖွဲ့နှင့် နစက ဖွဲ့စည်းထားသော ကောင်စီဝင်များပါသည့် ငြိမ်းချမ်းရေးဆွေးနွေးရေးအဖွဲ့၊အမျိုးသားစည်းလုံးညီညွတ်ရေးနှင့် ငြိမ်းချမ်းမှုဖော်ဆောင်မှုညှိနှိုင်းရေးကော်မတီတို့ နောက်နေ့များတွင် ဆက်လက်ဆွေးနွေးကြမည်ဖြစ်ကြောင်းလည်းသိရသည်။
KNU/KNLA–PC ဥက္ကဋ္ဌ စောထော့လေး ဦးဆောင်သည့် ငြိမ်းချမ်းရေးကိုယ်စားလှယ်အဖွဲ့သည် မေလ ၂၅ ရက်) မွန်းလွဲပိုင်းက မော်တော်ယာဉ်များဖြင့် နေပြည်တော်ရှိ Horizon Lake View Resort သို့ ရောက်ရှိကြခြင်းဖြစ်သည်။
နစက ဥက္ကဋ္ဌ တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီး မင်းအောင်လှိုင်နှင့် RCSS ဥက္ကဋ္ဌဗိုလ်ချုပ်ကြီး ယွက်စစ်တို့သည် မေလ ၂၀ ရက် နေပြည်တော်တွင် တွေ့ဆုံဆွေးနွေးပြီး ဒုတိယဗိုလ်ချုပ်ကြီး ရာပြည့် ဦးဆောင်သော နိုင်ငံတော် ငြိမ်းချမ်းရေးဆွေးနွေးရေးအဖွဲ့နှင့် RCSS ဥက္ကဋ္ဌ ဗိုလ်ချုပ်ကြီး ယွက်စစ်ဦးဆောင်သော အဖွဲ့တို့က မေလ ၂၁ ရက်မှ ၂၂ ရက်ထိလည်းကောင်း၊နစက ဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် မွန်ပြည်သစ်ပါတီ (NMSP) ဒုတိယဥက္ကဋ္ဌ နိုင်အောင်မင်းတို့ မေလ ၂၃ က နေပြည်တော်တွင် တွေ့ဆုံဆွေးနွေးပြီး ဒုတိယဗိုလ်ချုပ်ကြီး ရာပြည့် ဦးဆောင်သော နိုင်ငံတော် ငြိမ်းချမ်းရေးဆွေးနွေးရေးအဖွဲ့နှင့် မွန်ပြည်သစ်ပါတီ (NMSP) ဒုတိယဥက္ကဋ္ဌ နိုင်အောင်မင်းဦးဆောင်သော အဖွဲ့တို့သည် မေလ ၂၃ ရက်မှ ၂၅ ရက်ထိ လည်းကောင်း ဆွေးနွေးခဲ့ကြပြီး ဖြစ်သည်။
ymg/mt
#Yangon_Media_Group
#LocalNews
Published_26 May 2022
နှစ်နိုင်ငံ MOU စနစ်ဖြင့် ထိုင်းနိုင်ငံသို့ရွှေ့ပြောင်းလုပ်သား ၃၅၀ ဦးကို မဲဆောက် - မြဝတီ ချစ်ကြည်ရေးအမှတ် ၂ တံတားမှ ထပ်မံထွက်ခွာသွားကြကြောင်း ပြည်ပအလုပ်အကိုင် အေဂျင်စီများမှသိရသည်။
ယနေ့ မေလ ၂၆ ရက်တွင် ပြည်ပအလုပ်အကိုင်အကျိုးဆောင် ပွင့်ဖူးအောင် အေဂျင်စီ၊ ယွန်းနဒီ အေဂျင်စီ၊ New Covenant အေဂျင်စီ ကုမ္ပဏီတို့မှ မဲဆောက် - မြဝတီ ချစ်ကြည်ရေးအမှတ် ၂ တံတားမှ ထပ်မံစေလွှတ်ခဲ့ခြင်းဖြစ်ကြောင်းလည်း သိရသည်။
ပွင့်ဖူးအောင် အေဂျင်စီကုမ္ပဏီမှတာဝန်ယူ စေလွှတ်လိုက်သည့် လုပ်သား ၁၅၀ ဦးမှာ ထိုင်းနိုင်ငံ၊ဆူဖန်မြို့ရှိ ကြက်သားစက်ရုံသို့ လည်းကောင်း၊ ယွန်းနဒီ အေဂျင်စီကုမ္ပဏီမှလုပ်သား ၄၉ ဦးမှာ ထိုင်းနိုင်ငံ၊ နခွန်းနာယုတ်မြို့ရှိ Chuseng Farm Co., Ltd ကုမ္ပဏီပိုင် မွေးမြူရေးလုပ်ငန်းသို့လည်းကောင်း၊ New Covenant အေဂျင်စီကုမ္ပဏီမှ ထိုင်းနိုင်ငံ၊ ချွန်ဘူရီမြို့ရှိ ကြမ်းခင်းအထပ်သားထုတ်လုပ်ရေးစက်ရုံသို့ လုပ်သား ၉၈ ဦး နှင့် ဘန်ကောက်မြို့ရှိ ကလေးကစားစရာအရုပ်ချုပ်လုပ်သည့် စက်ရုံသို့ လုပ်သား ၅၇ ဦ၊ စုစုပေါင်း ၁၅၅ ဦးကို လည်းကောင်း အသီးသီး သွားရောက်လုပ်ကိုင်ခွင့်ရခဲ့ကြခြင်းဖြစ်ကြောင်း သိရသည်။
ymg/mt
#Yangon_Media_Group
#LocalNews
Published_26 May 2022
နှစ်ရက်အတွင်း ထိုင်းနိုင်ငံသို့တရားမဝင်သွားရောက်သူ ၃၀၀ ခန့် ဖမ်းဆီးခံရကြောင်း မြန်မာရွှေ့ပြောင်းအလုပ်သမားများအရေးဆောင်ရွက်နေသူများထံမှ သိရသည်။
မေလ ၂၄ ရက်နှင့် ၂၅ ရက်အတွင်း ထိုင်းနိုင်ငံ ပကျွတ်ခီရီခန်ပြည်နယ် နှင့် ကန်ကျနဘုရီပြည်နယ်၂ ခုတွင် တရားမဝင် မြန်မာ ၂၉၅ ဦး ဖမ်းဆီးခံရခြင်း ဖြစ်ကြောင်း၊ယင်းတို့မှာ ပွဲစားခ ဘတ် နှစ်သောင်းခွဲမှ သုံးသောင်းထိပေး၍ ထိုင်းနိုင်ငံသို့ လာရောက်ကြသူများ ဖြစ်ကြောင်း သိရသည်။
အဆိုပါ တရားမဝင်မြန်မာများမှာ ပဲခူးတိုင်းဒေသကြီး ပဲခူးမြို့ ၊ တနင်္သာရီတိုင်းဒေသကြီး ထာဝယ်မြို့၊ မန္တလေးတိုင်းဒေသကြီး၊နေပြည်တော်၊ရန်ကုန်တိုင်းဒေသကြီး၊မကွေးတိုင်းဒေသကြီး၊ဧရာဝတီတိုင်းဒေသကြီး၊မွန်ပြည်နယ် မော်လမြိုင်မြို့တို့မှဖြစ်ပြီး ဘန်ကောက် စမွတ်စခေါင် ချွန်ဘုရီ စုံခလာ ရာဇ်ဘုရီ ရယောင် သို့ သွားရောက်ရန်လာရောက်ကြသူများ ဖြစ်ကြောင်း သိရသည်။
ymg/mt
#Yangon_Media_Group
#DailyNews
Published - 26 May 2022
၁။ နေအိမ်ပြန်ပြင်နေရသည့်မော်လမြိုင်ရှိ သဘာဝဘေးသင့်ပြည်သူ(၁၆၀)အတွက် နေ့စဥ်ထမင်းထုတ်များလှူဒါန်း။
၂။ ပုဂံ ယွန်းစျေးကွက် ပြန်လည်ဦးမော့လာနိုင်ခြင်းမရှိသေး။
၃။ နေ့စဉ်မိုးလေဝသသတင်း။
၄။ တရုတ်နိုင်ငံတွင် အိမ်မွေးတိရိစ္ဆာန်အာမခံထားခြင်းခေတ်စားလာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
#LocalNews
Published - 26 May 2022
အခြေခံပညာကျောင်းများ ဖွင့်လှစ်ရန်အတွက် မေလ ၂၆ ရက် (ယနေ့) မှစတင်၍ ကျောင်းအပ်လပ်ခံနေပြီဖြစ်ကြောင်း အခြေခံပညာဦးစီးဌာနမှ သိရသည်။
"ကျောင်းစအပ်တဲ့နေ့မှာပဲ လာအပ်တဲ့သူတော်တော်များပါတယ်။ အရင်နှစ်ထက်စာရင်များလာတာပေါ့၊ မနှစ်ကဆိုရင် လူနည်းလို့ ကျောင်းတွေကိုတောင်ပေါင်းပြီးတော့ သင်ရတဲ့အခြေအနေမှာရှိခဲ့တယ်" ဟုအမည်မဖော်လိုသူ ဆရာမတစ်ဦးကပြောသည်။
ပြီးခဲ့သည့် ၂၀၂၁-၂၀၂၂ ပညာသင်နှစ်တွင် ကျောင်းအပ်နှံထားသူ ၄၇ သိန်းကျော်ရှိပြီး အမှန်တကယ်ကျောင်းတတ်ရောက်သူဦးရေမှာ ၃၃ သိန်းဝန်းကျင်သာရှိကြောင်း၊ ယခုပညာသစ်နှစ်တွင် ကျောင်းအပ်နှံသူဦးရေမှာ ယခင်ပညာသင်နှစ်ထက်ပိုများနိုင်ကြောင်း ကျောင်းအပ်လက်ခံနေသည့် ဆရာမတစ်ဦး၏ ပြောကြားချက်အရသိရသည်။
ကျောင်းအပ်နှံရေးသီတင်းပတ်ကာလကို မေလ ၂၆ ရက်မှ ဇွန်လ ၁ ရက်ထိသတ်မှတ်ထားပြီး ဇွန်လ ၂ ရက်တွင် ကျောင်းများစတင်ဖွင့်လှစ်မည်ဖြစ်ကြောင်းသိရသည်။
ymg/sth
#Yangon _Media_Group
#LocalNews
Published -26 May 2022
မျောက်ကျောက်ရောဂါဟုတ်မဟုတ် အနာအရည်(သို့မဟုတ်)အနာဖေးကိုရယူပြီး ဓာတ်ခွဲခန်းမှာ PCR Testအသုံးပြုပြီး စစ်ဆေးမှအတည်ပြု သိရှိနိုင်မှာဖြစ်တယ်လို့ ကျန်းမာရေးအသိပညာမြှင့်တင်ရေးဌာနခွဲ၊ ညွှန်ကြားရေးမှူး ဒေါက်တာသန်းနိုင်စိုးရဲ့ရေးသားဖော်ပြချက်တွေအရ သိရပါတယ်၊၊
သွေးရည်ကြည်ကို အသုံးပြုပြီး RTDနည်းနဲ့ စစ်ဆေးရင်တော့ အခြားမျိုးနွယ်တူ ကျောက်ရောဂါတွေနဲ့ ရောပြီးဖော်ပြနိုင်တယ်လို့ဆိုပါတယ်၊၊
လတ်တလောအချိန်အထိ မြန်မာနိုင်ငံမှာ မျောက်ကျောက်ရောဂါဖြစ်ပွားသူ မတွေ့ရသေးပေမယ့် အခြား ကျောက်ရောဂါ ဖြစ်ပွားနေသူတွေတော့ရှိတယ်လို့ ကျန်းမာရေးဝန်ကြီးဌာနက သိရပါတယ်၊၊
မြန်မာနိုင်ငံမှာထိုးနှံပေးခဲ့ဖူးတဲ့ ကျောက်ကြီးရောဂါ ကာကွယ်ဆေးဟာ မျောက်ကျောက်ရောဂါကို (၈၅)ရာခိုင်နှုန်းကာကွယ်ပေးတယ်လို့ သိရပါတယ်၊၊
ကျောက်ကြီးရောဂါကာကွယ်ဆေးထိုးပြီးသူတွေက လက်မောင်းရင်းမှာ သိသာတဲ့အမာရွတ်တွေကျန်ရှိခဲ့သူတွေဖြစ်ပါတယ်၊၊
၁၉၈၀နောက်ပိုင်းမှာ ကျောက်ကြီးရောဂါအမြစ်ပြတ်သွားပြီလို့ ကမ္ဘာ့ကျန်းမာရေးအဖွဲ့ကကြေညာခဲ့လို့ နိုင်ငံအများစုမှာ ကျောက်ကြီးရောဂါကာကွယ်ဆေးထိုးတာတွေ ရပ်ခဲ့တာဖြစ်ပါတယ်၊၊ ၂၀၁၉ခုနှစ်မှာ မျောက်ကျောက်ရောဂါကအတွက် နှစ်ကြိမ်ထိုးရတဲ့ ကာကွယ်ဆေးအသစ်ထပ်မံထုတ်လုပ်ဖို့ ခွင့်ပြုချက်ရခဲ့ပေမယ့်လည်း အရေအတွက်အကန့်အသတ်နဲ့သာ ရရှိနိုင်သေးတယ်လိုသိရပါတယ်၊၊
မျောက်ကျောက်ရောဂါကာကွယ်ဖို့ ရောဂါသံသယရှိသူနဲ့အနီးကပ်ထိတွေ့တာ ရှောင်ကြဥ်တာ၊တောရိုင်း တိရစ္ဆာန်တွေကိုထိတွေ့ကိုင်တွယ်ခြင်းမျိုး ရှောင်ကြဥ်ရမှာဖြစ်ပြီး၊ အသားကိုကျက်အောင်ချက်ပြုတ်စားသောက်ရမှာ ဖြစ်ပါတယ်၊၊
မျောက်ကျောက်ရောဂါသံသယရှိသူကို ပြုစုပေးမယ့် သူတွေက ကျောက်ကြီးရောဂါကာကွယ်ကာကွယ်ဆေးထိုးထားသူတွေ ဖြစ်ရမှာဖြစ်တယ်လို့ ဆိုပါတယ်၊၊
မျောက်ကျောက်ရောဂါရဲ့ ရောဂါလက္ခဏာတွေကတော့ ဖျားခြင်း၊ ခေါင်းကိုက်ခြင်း၊ ပြန်ရည်ကျိတ်များ ရောင်ရမ်းခြင်း၊ နောက်ကျောနာကျင်ခြင်း၊ ကြွက်သားများနာကျင်ကိုက်ခဲခြင်း၊အားအင်ကုန်ခမ်းခြင်းတွေ ပထမဦးဆုံးဖြစ်မှာဖြစ်ပြီး အရေပြားမှာ အကွက်ပေါ်တာ၊ အဖုကနေ ပြည်ဖုတွေဖြစ်ပြီး အရေပြားကွာကျတာတွေဖြစ်ပွားနိုင်တယ်လို့ ဆိုပါတယ်၊၊
နောက်ဆက်တွဲဆိုးကျိုးအနေနဲ့ အနာပိုးဝင်တာ၊ အဆုတ်ရောင်တာ၊ ပြည်တည်တာ၊ ဦးနှောက်ရောင်တာ၊ မျက်စိကွယ်တာတွေ အသက်ဆုံးရှုံးနိုင်တဲ့ အထိဖြစ်ပွားနိုင်တယ်လို့ သိရပါတယ်၊၊
ymg/tthl
#Yangon_Media_Group
#LocalNews
Published_26 May 2022
ရန်ကုန်တိုင်းဒေသကြီးအတွင်းတွင် လျှပ်စစ်မီး ညလုံးပေါက်ရတော့မည်ဖြစ်ကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်း(YESC) တာဝန်ရှိသူက YMG ကို ပြောသည်။
"အခု မိုးရွာနေပြီဖြစ်လို့ တစ်နေ့ကို မဂ္ဂါဝပ် ၂၀၀ လောက် တိုးပြီးရနေတယ်။ရန်ကုန်တိုင်းကိုတော့အဓိကထားပြီးတော့ ည ၈ နာရီကနေ နောက်နေ့ မနက် ၈ နာရီထိ တောက်လျှောက် ပေးဖို့ လုပ်နေပြီ။မနေ့က(မေလ ၂၅)ရက် ညပိုင်းမှာ သတိထားမိမယ်ဆိုရင် သိကြမှာပါ။
စတင်ပြီးတော့ စမ်းသပ်နေပါပြီ။တချို့နေရာတွေမှာ မီးအားမနိုင်တာတွေရှိသေးတာကြောင့် ည ၈ နာရီကနေ မနက် ၈ နာရီထိ လို သတ်မှတ်ပေမယ့် ည ၉ နာရီကနေ နောက်နေ့ မနက် ၈ နာရီထိကတော့ သေချာတဲ့ ပေးဝေမှုကို လုပ်နိုင်ပါပြီ"ဟု ယင်းကပြောသည်။
ယင်းအပြင် နေ့ပိုင်းတွင် A , B အုပ်စု နှစ်ခုခွဲ၍ ပေးဝေမည်ဖြစ်ပြီး မီးပေးချိန်ကို နံနက် ၈ နာရီမှ မွန်းလွဲ ၁ နာရီထိ တစ်အုပ်စု ၊ မွန်းလွဲ ၁ နာရီမှ ညနေ ထိ တစ်အုပ်စု သတ်မှတ်ပေးဝေဖြန့်ဖြူးသွားမည်ဖြစ်ကြောင်း ၊သို့သော် စက်မှုဇုန်များကို နံနက် ၉ နာရီမှ ညနေ ၅ နာရီထိသာ ပေးဝေနိုင်ဦးမည်ဖြစ်ကြောင်းလည်း သိရသည်။
ymg/mt
#Yangon_Media_Group
Page 1561 of 1767
