#LocalNews
Published - 30 May 2022

ရန်ကုန်မြို့ကြည့်မြင်တိုင် ပန်းပင်ကြီးလမ်းရှိ နေအိမ်တစ်အိမ်ကို ဒီကနေ့ မေ ၃၀ ရက်၊ နံနက်ပိုင်းအချိန်က လူတစ်စုကဝင် ရောက်ကာ ဓါးပြတိုက်သွားပြီး ရွှေ ငွေပစ္စည်းများယူ ဆောင်သွားခဲ့တယ်လို့ အဆိုပါ နေအိမ်ပိုင်ရှင်ထံမှ သိရပါတယ်။

"ကျွန်တော်အိမ်ကို ဓားပြဝင်တိုက်သွားပါတယ်။ အုပ်စုလိုက်ကြီးဝင်ပြီး ဓားပြတိုက်တာပါ။ အဘွားကအောက်ထပ်မှာ အမေနဲ့နေတာပါ အမေစျေးသွားတဲ့အချိန် အဘွားနဲ့ကောင်မလေးပဲရှိတဲ့ အချိန်ဝင်တိုက်သွားတယ်။ ကိုယ်တွေ အပေါ်ထပ်မှာရှိနေတာတောင် တိုက်သွားပြီးမှ သိလိုက်ရတယ်။ အဘွားကအသက် (၈၀)ကျော်ပြီမလို့ လူကို တခုခုမလုပ်သွားတာပဲ တော်တော်ကျေးဇူးတင်ရမလို့ ဖြစ်နေတယ် ရွှေတွေရော၊ မှန်တွေပါအကုန်ရိုက်ခွဲပြီး ပိုက်ဆံရော ရွှေပါ အကုန်ယူသွားတာပါ။"လို့ ဓါးပြတိုက်ခံရသည့် အိမ်ပိုင်ရှင်က လူမှုကွန်ရက်မှာ ရေးသားခဲ့တာပါ။

အဆိုပါ ဓါးပြအဖွဲ့တွင် လူ ၁၀ ခန့်ပါဝင်တယ်လို့ ရပ်ကွက်နေ ပြည်သူတွေက ပြောပါတယ်။

"အောက်ထပ်က ဆိုင် ၂ ဆိုင်ရှိတာကို ကားအဲကွန်းပြင်ဆိုင်နဲ့ ဆေးဆိုင်ရှိတာ အဲ့ဒါ ပထမထပ်ကို အုပ်စုလိုက်ဝင်တိုက်တာနော်။ တကယ်အလုခံရတဲ့သူတွေက တကယ်ကြုံနေရတာဖြစ်လို့ ဖြဲခြောက်နေတာ မဟုတ်ပါဘူး။ အိမ်တိုင်း သော့ကိုဖြစ်နိုင်ရင်သေချာခတ်စေချင်တယ်။ အခုဖြစ်တာကလဲ ကိုယ်ဘယ်အချိန်မှာ ဘာလုပ်တက်တယ်၊ ဘယ်ချိန်ဆို လူမရှိဘူးဆိုတာ သိနေတဲ့သူကပဲ တိုက်တာမလို့ သေချာဂရုစိုက်စေချင်တယ်။"လို့ အားလုံးသတိထားနိုင်ရန် ၄င်းက အသိပေး ပြောပြမှုတွေကိုလည်း ပြုလုပ်ခဲ့တာပါ။

အဆိုပါ ကြည့်မြင်တိုင်မြို့နယ်အတွင်းရှိ ပန်းပင်ကြီးလမ်းဆိုတာ လူသွား၊ လူလာများပြားသည့် နေရာတစ်ခုဖြစ်ပြီး အဲ့ဒီလိုနေရာမျိုးကို မနက်ပိုင်းအချိန်မှာ ဓါးပြဝင်တိုက်သွားတာဟာ စဥ်းစားစရာဖြစ်တယ်လို့ ကာယကံရှင်အိမ်ပိုင်ရှင်က ဆိုပါတယ်။

"ဒီလိုနေရာကို မနက်ပိုင်းထဲက ဝင်တိုက်သွားတာမလို့ ပတ်ဝန်းကျင်ကို မယုံပါနဲ့ သေချာဂရုစိုက်ကြပါ။"လို့ ၄င်းက ထပ်လောင်းအသိပေးခဲ့တာပါ။

ဒါ့အပြင် ရန်ကုန်မြို့မှာ ယခုနောက်ပိုင်းကာလအတွင်း လုယက်မှုဖြစ်စဥ်တွေကိုလည်း ပြည်သူ တွေက အများအပြားကြုံတွေ့နေရတာလဲ ဖြစ်ပါတယ်။

Photo - CJ

ymg/kg
#Yangon_Media_Group

#LocalNews
Published -30 May 2022

မေလ(၃၁)ရက်ဟာ ကမ္ဘာ့ဆေးလိပ်မသောက်ရေးနေ့ ဖြစ်ပါတယ်၊၊ လတ်တလောမှာတော့မြန်မာနိုင်ငံမှာဆေးလိပ်သောက်နှုန်းတွေလျှော့မသွားဘဲ ဆေးလိပ်ထုတ်ကုန်သစ်တွေလည်းထွက်လာတယ်လို့ ပြည်သူ့ကျန်းမာရေးဖောင်ဒေးရှင်းဥက္ကဌ ဒေါက်တာသန်းစိန် ကပြောပါတယ်၊၊

#Yangon_Media_Group

#LocalNews
Published - 30 May 2022

ရန်ကုန်မြို့တွင်းပြေးဆွဲနေသည့် YBS ယာဥ်လိုင်းများထဲမှ စည်းကမ်းမလိုက်နာသည့် YBS ယာဥ်အစီးရေ ၅၃၀ ကို လုပ်ငန်းလိုင်စင်တစ်နှစ်ပိတ်သည်အထိ အရေးယူဆောင်ရွက်ထားကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ(YRTC) မှ တွဲဖက်အတွင်းရေးမှူး ဦးလျန်ကျင့်မာန်က ပြောသည်။

"သတ်မှတ်ထားတဲ့ ယာဥ်စီးခနှုန်းထားထက် ပိုကောက်တဲ့ ယာဥ်တွေကို CNG သုံးလ၊ ခြောက်လ၊ တစ်နှစ်အထိပိတ်တယ်၊ ခရီးသည်တွေတိုင်ကြားတဲ့ ယာဥ်လိုင်းတွေကို ကျွန်တော်တို့အသွင်ယူပြီး လိုက်စီစစ်တယ်၊ အမှန်တကယ်စည်းကမ်းဖောက်ဖျက်တယ်ဆိုရင် အရေးယူဆောင်ရွက်ပါတယ်"ဟု ဦးလျန်ကျင့်မာန်က ပြောသည်။

လက်ရှိတွင် မြို့တွင်းပြေးဆွဲနေသည့် YBS ယာဥ်လိုင်းများမှာ ယာဥ်စီးခပိုမိုကောက်ခံခြင်း၊ မချေမငံပြောဆိုဆက်ဆံခြင်း စသည့်သတ်မှတ်စည်းကမ်းများကို ချိုးဖောက်မှုများရှိနေကြောင်း သိရသည်။

ရန်ကုန်မြိုတွင်း YBS ယာဉ်လိုင်း ၁၁၃ လိုင်း၊ ယာဥ်အစီးရေ ၃၀၀၀ ကျော်ဖြင့် နေ့စဥ်ပုံမှန်ပြေးဆွဲပေးနေပြီး ခရီးသည် ၈ သိန်းနှင့် ၉ သိန်းကြားစီးနင်းမှုရှိကြောင်း သိရသည်။

ymg/sth
#Yangon_Media_Group

#LocalNews
Published -30 May 2022

တရုတ်နိုင်ငံက မြန်မာနိုင်ငံကို ရွေ့လျားဓာတ်ခွဲခန်းယာဉ် Mobile Laboratory Vehicles နှစ်စီးအပါအဝင် Sinopharm ကိုဗစ်ကာကွယ်ဆေး(၁၀)သန်း၊ ဆေးထိုးအပ်(၁၃)သန်းကိုလှူဒါန်းပေးအပ်ခဲ့တယ်လို့ မြန်မာနိုင်ငံဆိုင်ရာ တရုတ်သံရုံးမှ ထုတ်ပြန်ထားပါတယ်၊၊

အခုလှူဒါန်းတဲ့ရွေ့လျားဓာတ်ခွဲခန်းယာဉ် Mobile Laboratory Vehicles နှစ်စီးကို နယ်စပ်ဂိတ်တွေမှာ ဦးစားပေးထားရှိအသုံးပြုမှာဖြစ်တဲ့အတွက် ကုန်စည်စီးဆင်းမှုတွေမြန်ဆန်ချောမွေ့ပြီး နယ်စပ်ကုန်သွယ် ရေးကဏ္ဍပြန်လည်ဖွံ့ဖြိုးတိုးတက်ဖို့အတွက်များစွာ အသုံးဝင်မှာဖြစ်တယ်လို့ ကျန်းမာရေးဝန်ကြီးဌာန၊ ပြည်ထောင်စုဝန်ကြီးဒေါက်တာသက်ခိုင်ဝင်းက ကျေးဇူးတင်စကားဆိုရာမှာ ထည့်သွင်းပြောကြားခဲ့ပါတယ်၊၊

မေလ ၂၉ ရက်မှာ လွှဲပြောင်းပေးအပ်တဲ့အခမ်းအနားကို ရန်ကုန်အပြည်ပြည်ဆိုင်ရာလေဆိပ်မှာကျင်းပခဲ့ပြီး မြန်မာနိုင်ငံဆိုင်ရာ တရုတ်သံအမတ်ကြီး Mr. Chen Hai နဲ့ မြန်မာနိုင်ငံကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းတို့ တက်ရောက်ခဲ့ပါတယ်၊၊

အခုအကြိမ်လှူဒါန်းမှုမှာ Sinopharm ကိုဗစ်-၁၉ Vaccine ၁၀ သန်း၊ Vaccine ဆေးထိုးအပ် ၁၃ သန်းနဲ့ Mobile Laboratory Vehicles နှစ်စီးတို့ပါဝင်ပါတယ်၊၊

ပြည်ထောင်စုဝန်ကြီး ဒေါက်တာသက်ခိုင်းဝင်းက "တရုတ်နိုင်ငံမှ မြန်မာနိုင်ငံသို့ Vaccine ၊ ဆေးဝါး၊ ဆေးထိုးအပ်၊ Mobile Laboratory Vehicles ၊ ရွေ့လျားအမိုးအကာဓာတ်ခွဲခန်း၊ လူနာတင်ယာဉ်စသည့် ကပ်ရောဂါတိုက်ဖျက်ရေးပစ္စည်းနှင့် စက်ပစ္စည်းအများအပြား လှူဒါန်းပေးအပ်ခြင်းအား ကျေးဇူးတင်ရှိပါကြောင်း၊ ယခုအကြိမ် တရုတ်နိုင်ငံမှလှူဒါန်းသည့် Vaccine များအား မြန်မာနိုင်ငံ လူငယ်နှင့်ကလေးသူငယ်များအတွက် ထိုးနှံပေးသွားမည်ဖြစ်ကြောင်း၊ Mobile Laboratory Vehicles နှစ်စီးအား နယ်စပ်ဂိတ်များတွင် ဦးစားပေးထားရှိအသုံးပြုမည်ဖြစ်သည့်အတွက် ကုန်စည်စီးဆင်းမှုများ မြန်ဆန်ချောမွေ့၍ နယ်စပ်ကုန်သွယ်ရေးကဏ္ဍ ပြန်လည်ဖွံ့ဖြိုးတိုးတက်ရေးအတွက်များစွာ အသုံးဝင်မည်ဖြစ်ကြောင်း၊ တရုတ်နိုင်ငံမှ ကူညီတည်ဆောက်ပေးသည့် မြန်မာနိုင်ငံ ကူးစက်ရောဂါ ထိန်းချုပ်မှု ဗဟိုဌာန Myanmar Center of Disease Control (CDC) တည်ဆောက်ပြီးစီးပါက ဒေသတွင်းသာမက အပြည်ပြည်ဆိုင်ရာ အသိအမှတ်ပြု စင်တာတစ်ခုဖြစ်လာပြီး မြန်မာနိုင်ငံကူးစက်ရောဂါကာကွယ်ထိန်းချုပ်ရေးအတွက် အရေးပါသည့်အခန်းကဏ္ဍမှပါဝင်သွားမည်ဖြစ်ကြောင်း၊ မြန်မာ-တရုတ်ချစ်ကြည်ရင်းနှီးစွာ ပူးပေါင်းဆောင်ရွက်မှုသည် ကပ်ရောဂါကာကွယ်ထိန်းချုပ်မှုအား အထောက်အကူပြု၍ နှစ်နိုင်ငံကျန်းမာရေးနှင့် လူမှုစီးပွားညီမျှစွာ ဖွံ့ဖြိုးတိုးတက်ရေးအား မြှင့်တင်ပေးမည်ဟု ယုံကြည်ကြောင်း" ပြောကြားခဲ့ပါတယ်၊၊

မေလ(၂၉)ရက်အထိ တရုတ်နိုင်ငံမှမြန်မာနိုင်ငံသို့ထောက်ပံ့ပေးတဲ့ Vaccine ပမာဏစုစုပေါင်း (၅၁.၁၉)သန်းရှိပြီး ၎င်းတို့အနက် Vaccine (၂၁.၁) သန်းဟာ အခမဲ့လှူဒါန်းပေးအပ်ခြင်းဖြစ်ကာ Vaccine (၃၀.၀၉)သန်းကို သက်သာတဲ့စျေးနှုန်းနဲ့ မြန်မာနိုင်ငံကိုထောက်ပံ့ထားတာဖြစ်တယ်လို့ထုတ်ပြန်ချက်မှာ ဖော်ပြပါရှိပါတယ်၊၊

ymg/tthl
#Yangon_Media_Group

#LocalNews
Published_30 May 2022

ထိုင်းနိုင်ငံသို့ နယ်စပ်ဂိတ်ပေါက်များမှဖြစ်စေ၊ လေကြောင်းလိုင်းများဖြင့်ဖြစ်စေ သွားရောက်သူများအနေဖြင့် ဇွန်လ တစ်ရက်ကစ၍ ကွာရန်တင်း ဝင်ရန်မလိုတော့ကြောင်း သိရသည်။

နယ်စပ်ဂိတ်များမှ Thailand Pass ဖြင့် နဂိုအတိုင်း မှတ်ပုံတင်ရန်၊ ကိုဗစ်ကာကွယ်ဆေးရရှိထားသူများ အထောက်ထားတင်ပြ၍ ကျန်းမာရေး (အာမခံ) ငွေ သတ်မှတ်အမေရိကန်ဒေါ်လာတင်ပြရန်၊ ကိုဗစ်ကာကွယ်ဆေး မထိုးနှံထားသူ (သိုမဟုတ်) အကြိမ်ပြည့် မထိုးနှံထားသူများအနေဖြင့် Professinal ATK (သိုမဟုတ်) RT-PCR ဖြင့် ၇၂ နာရီအတွင်း မဝင်ရောက်မီ အထောက်ထား တင်ပြရန် လိုအပ်ကြောင်း သိရသည်။

ထိုင်းနိုင်ငံအနေဖြင့် လာမည့် ဇွန်လမှ စက်တင်ဘာလအတွင်း နိုင်ငံတကာခရီးသွား တစ်လလျင် ငါးသိန်း၊ အောက်တိုဘာလမှ ဒီဇင်ဘာလအတွင်း တစ်လလျင် နိုင်ငံတကာ ခရီးသွား တစ်သန်းထိ ဝင်ရောက်မည်ဟု ခန့်မှန်းလုပ်ဆောင်နေကြောင်းလည်း သိရသည်။

ymg/mt
#Yangon_Media_Group

#LocalNews
Published - 30 May 2022

လက်ရှိပြည်တွင်းပဲစျေးကွက်မှာ နိုင်ငံတကာကဝယ်သည့်စျေးနှုန်းနှင့် ကိုက်ညီမှုမရှိသည့်အတွက် ပဲစျေးကွက်အရောင်းအဝယ်အေးနေကြောင်း ပဲကုန်သည် ဦးကိုကိုမြင့်က ပြောသည်။

လက်ရှိတွင် သယ်ယူပို့ဆောင်ရေးစရိတ်အပါအဝင် အထွေထွေစရိတ် ကြီးမြင့်ခြင်း၊ ရရှိလာသည့် ပို့ကုန်ဝင်ငွေကို ဗဟိုဘဏ်မှ သတ်မှတ်ထားသည့် နှုန်းထားနှင့်သာ ကျပ်ငွေပြန်လည်ရရှိသည့်အတွက် အခက်အခဲကြုံတွေ့ခြင်းဖြစ်ကြောင်း သိရသည်။

"သိပ်ပြီးတော့မကိုက်ဘူး။ လက်တွေ့မှာဖြစ်တဲ့စျေးနဲ့ နိုင်ငံတကာကဝယ်တဲ့စျေးနဲ့မကိုက်ကြဘူး။ ဝယ်စျေး တစ်ဒေါ်လာကို ၁,၈၅၀ ကျပ်နဲ့အရောင်းအဝယ်လုပ်လိုမရဘူး။ အိန္ဒိယကကန့်သတ်ထားတာမရှိဘူး။ ပို့ချင်တာပို့လို့ရတယ်။ အဝယ်ကကိုအေးနေတာ။ ပဲတီစိမ်းကတော့ ကန့်သတ်ထားတယ်။ အရောင်းအဝယ်အေးတယ်လို့ပြောလို့ရမယ်"ဟု ဦးကိုကိုမြင့်က ပြောသည်။

ဗဟိုဘဏ်မှ ကန့်သတ်ထားသည့် ဒေါ်လာစျေးများကြောင့် ကုန်သည်များအနေဖြင့် အခက်အခဲများရှိနေကြောင်း၊ လက်ရှိတွင် ပြည်တွင်း စားသုံးဆီ ဖူလုံရေးအတွက် မြေပဲနှင့် နှမ်း ပြည်ပသို့ တင်ပို့မှုကို မေ ၉ ရက်မှစ၍ ယာယီဆိုင်းငံ့ထားပြီး နယ်စပ်ကုန်သွယ်ရေးဇုန်များမှ တစ်ဖက်နိုင်ငံသို့တင်ပို့နေသည့် လယ်ယာထွက်ကုန်ပစ္စည်းများအနက် ဆီထွက်သီးနှံ နှမ်းနက်မှအပ မြေပဲနှင့် နှမ်းတင်ပို့မှုများကို ဆိုင်းငံ့ထားကြောင်း သိရသည်။

လက်ရှိအချိန်သည် မြေပဲနှင့် နှမ်းရှားပါးချိန်ဖြစ်ပြီး စျေးကွက်အတွင်း၌ တက်ဈေးကိုစောင့်၍ လှောင်ထားသူများသာရှိကြောင်း ကုန်သည်များ၏ ပြောပြချက်အရ သိရသည်။

ymg/sth
#Yangon_Media_Group